Иннӕтӕн ӕххуыс кӕн фембӕлдтӕм цӕуынӕн
1 «Нӕ сыхӕгтӕй... кӕй фӕнды фембӕлдтӕм ӕрбацӕуын, уыдоны зӕрдиагӕй хонӕм». Ацы хъусинаг 1880 азы «Сионы Хъахъхъӕнӕг мӕсыджы», ноябры номыры, куы фӕзынд, уӕдӕй нырмӕ Иегъовӕйы Ӕвдисӕнтӕ зӕрдиагӕй хонынц адӕмы семӕ Библи ахуыр кӕнынмӕ (Рар. 22:17). Уый у ӕцӕг кувынады ахсджиаг хай.
2 Фембӕлдтӕм цӕуын у ахсджиаг. Фембӕлдтӕм цӕугӕйӕ, мах ӕнкъарӕм бирӕ арфӕдзинӕдтӕ. Уым хуыздӕр зонгӕ кӕнӕм нӕ диссаджы Хуыцау Иегъовӕимӕ. Фембӕлдтӕм цӕуӕм, цӕмӕй нӕ «Иегъовӕ... ахуыр кӕна» (Ис. 54:13). Йӕ организацийы уылты арӕзт ӕрцыд, Библи иудадзыг ахуыр кӕнынӕн чи ӕххуыс кӕны, ахӕм программӕ, ӕмӕ уый руаджы Хуыцаумӕ хӕстӕгдӕр кӕнӕм ӕмӕ ахуыр кӕнӕм «Хуыцауы ӕппӕт фӕндон» ӕххӕст кӕныныл (Ап. к. 20:27; Лук. 12:42). Фембӕлдты алчидӕр ахуыр кӕны, Хуыцауы Ныхас куыд хъӕуы амонын, ууыл. Фыстадӕй нын нӕ зӕрдыл цы ӕрлӕууын кӕнынц, уый нын ӕххуыс кӕны, цӕмӕй нын иннӕтимӕ ӕмӕ Иегъовӕимӕ хорз ахастытӕ уа. Хуыцауы чи уарзы, уыдонимӕ куы уӕм, уӕд фидар кӕндзыстӕм нӕ уырнындзинад (Ром. 1:11, 12).
3 Адӕймаджы фӕхоныныл ма фӕстиат кӕн. Ахуыр кӕнын кӕимӕ райдайай, уыдонӕй алкӕй дӕр фыццаг ахуыры фӕстӕ фембӕлдтӕм фӕхон. Радт ын хуынды гӕххӕтт. Цӕмӕй йӕ ӕрбацӕуынмӕ сразӕнгард кӕнай, уый тыххӕй йын радзур, фӕстаг фембӕлдӕй дӕ зӕрдӕмӕ цы фӕцыд, уый, стӕй ма йын зӕгъ, иннӕ фембӕлды цӕуыл цӕудзӕн дзырд, уый тыххӕй дӕр. Бамбарын ын кӕн, Паддзахады зал цыхуызӕн у, уый, ӕмӕ йӕ базон, кӕм ис, уый зоны ӕви нӕ.
4 Библи кӕимӕ ахуыр кӕныс, уый фыццаг хуындӕй куы нӕ райдайа цӕуын, уӕд та-иу ӕй ногӕй фӕхон. Алы къуыри дӕр цалдӕр минуты хицӕн кӕн, цӕмӕй йын бамбарын кӕнай, нӕ организаци куыд архайы, уый. Спайда кӕн брошюрӕ «Иегъовӕйы Ӕвдисӕнтӕ Хуыцауы фӕндон иумӕйагӕй ӕххӕст кӕнынц ӕппӕт зӕххыл»-ӕй ӕмӕ видеофильм «Иегъовӕйы Ӕвдисӕнтӕ — йӕ номмӕ гӕсгӕ архайӕг организаци»-йӕ, цӕмӕй фылдӕр базона мах тыххӕй дӕр ӕмӕ нӕ фембӕлдты тыххӕй дӕр. Иннӕ хъусынгӕнджыты дӕр демӕ кӕн, цӕмӕй семӕ базонгӕ уа. Кувгӕйӕ, Иегъовӕйӕн бузныг дзур нӕ организацийы тыххӕй ӕмӕ чи ахуыр кӕны, уый фембӕлдтӕм цӕуын кӕй хъӕуы, уый тыххӕй дӕр-иу ма ферох кӕн зӕгъын.
5 Чи цымыдис кӕны, уыдоны фембӕлдтӕм фӕхоныныл ма фӕстиат кӕн. Иегъовӕйӕн тынгдӕр аргъ кӕнын куы райдайой, уӕд сӕ бафӕнддзӕн, цы базонынц, уымӕй царды пайда кӕнын ӕмӕ Хуыцауы иугонд организацийы хай суӕвын (1 Кор. 14:25).