Бӕхджын ӕфсады ныббырст дӕумӕ дӕр хауы
1, 2. Раргомады 9:13—19 стихтӕм гӕсгӕ Хуыцауы лӕггадгӕнджытӕ абон пехуымпарадон цӕстылуайӕны сӕххӕсты куыд архайынц?
1 «Ӕхсӕзӕм Зӕд ныууасыд». Йӕ фӕстӕ нӕргӕ рацыд «бӕхджын ӕфсад», сӕ нымӕц уыди «дыууӕ мин-мины» (НФ). Уый уыд ӕнахуыр ӕфсад. «Бӕхты сӕртӕ... [уыдысты] домбайы сӕртау» (НФ). Сӕ дзыхтӕй цыд арт, фӕздӕг ӕмӕ сондон, «сӕ къӕдзилтӕ та уыдысты кӕлмыты хуызӕн». Ацы бӕхджын ӕфсад йӕ разы цы ӕййафы, уыдон иууылдӕр куынӕг кӕны (Рарг. 9:13—19). Зоныс, ацы пехуымпарадон цӕстылуайӕны сӕххӕст дӕумӕ куыд хауы?
2 Сӕрст чырыстӕттӕ ӕмӕ сӕ цӕдисӕмбӕлттӕ, ӕндӕр фыстӕ, ӕмвӕнд-ӕмзондӕй хъусын кӕнынц Хуыцауы тӕрхӕттӕ. Уыдон раргом кодтой, чырыстон дуне Хуыцауы цӕсты мард кӕй у. Цӕй ӕркӕсӕм, Хуыцауы лӕггадгӕнджытӕ афтӕ ӕнтыстджын цӕй фӕрцы сты, дыууӕ ахӕм хъуыддагмӕ ацы пехуымпарадон цӕстылуайӕнӕй.
3. Цавӕр ахуырады руаджы у нӕ бон Хуыцауы хабар арӕхстджынӕй дзурын?
3 Цӕттӕ ӕмӕ ифтонг сты Хуыцауы хабар хъусын кӕнынӕн. Хуыцауы Ныхас хъусынгӕнджыты скъолайы ӕмӕ иннӕ фембӕлдты Хуыцауы лӕггадгӕнджытӕ ахуыр кӕнынц Хуыцауы хабар арӕхстджынӕй дзурын. Йесо ӕмӕ йӕ фӕдылдзӕуджытау уыдон дӕр цӕуынц ӕмӕ агурынц, аккаг чи у, ахӕмты, хъусынгӕнгӕйӕ, адӕм кӕмдӕриддӕр ис, уым (Матф. 10:11; Маркы 1:16; Лук. 4:15; Ап. к. 20:18—20). Цӕй хорз ахады ацы мадзал уацамынды!
4. Цавӕр кусӕнгӕрзтӕ ис бирӕтӕм ӕнтыстджынӕй хъусын кӕнынӕн?
4 Хуыцау сын сӕ бӕрны кӕй бакодта, уыцы хъусын кӕныны хъуыддаг ӕххӕстгӕнгӕйӕ, Чырыстӕттӕ апарахат кодтой миллиардгай Библитӕ, чингуытӕ, брошюрӕтӕ ӕмӕ журналтӕ. Уыцы литературӕ мыхуыр цӕуы иу-400 ӕвзагыл, ӕвзӕрст дзы цӕуынц алыхуызон темӕтӕ ӕмӕ ӕххуыс кӕнынц алыхуызон адӕмӕн. Уыцы кусӕнгӕрзтӕй арӕхстджынӕй пайда кӕныс?
5, 6. Цӕмӕй бӕрӕг у, Иегъовӕ йӕ адӕмӕн кӕй ӕххуыс кӕны?
5 Разамынд ӕмӕ ӕххуыс уӕларвӕй. Пехуымпарадон цӕстылуайӕны ма ирдӕй зыны, бӕхджын ӕфсады ныббырст Хуыцауы ӕххуысӕй кӕй цӕуы (Рарг. 9:13—15). Ӕппӕтдунеон хъусын кӕныны хъуыддаг адӕймаджы зонд ӕмӕ тыхы руаджы нӕ цӕуы, фӕлӕ Хуыцауы сыгъдӕг уды руаджы (Зах. 4:6). Иегъовӕ уыцы куыстӕн разамынд дӕтты зӕдты уылты (Рарг. 14:6). Афтӕмӕй, йӕ зӕххон лӕггадгӕнджыты уылты Иегъовӕ ӕххуыс кӕны сӕрныллӕг адӕмӕн, цӕмӕй йӕм баввахс уой ӕмӕ ма сын уӕларвӕй дӕр ӕххуыс кӕны (Иоан. 6:45, 65).
6 Иегъовӕйы адӕм сты цӕттӕ, хӕрзифтонг хорз хабар хъусын кӕнынӕн ӕмӕ архайынц зӕдты разамындӕй. Уыдон сты ӕндон мӕсыгау фидар. Цӕй дарддӕр дӕр ӕдӕрсгӕйӕ ахъаз кӕнӕм уыцы диссаджы пехуымпарадон цӕстылуайӕны сӕххӕстӕн.