Уӕнгроггӕнӕн музыкӕ
1 Зарын ӕмӕ музыкӕ алкӕддӕр ахсджиаг уыдысты раст дины. Рагон Израилы Асаф ӕмӕ йе ’фсымӕртӕ зарыдысты: «Арфӕ кӕнут Иегъовӕйӕн... Зарут ын, цӕгъдут ын, уӕ хъус дарут йӕ ӕппӕт диссаг хъуыддӕгтӕм» (1 Пар. 16:8, 9). Абон мах Иегъовӕйӕн зарӕм алы къуыри дӕр нӕ ӕмбырды фембӕлдты (Еф. 5:19). Цӕй диссаджы фадат у уый йӕ ном скадджын кӕнынӕн! (Пс. 68:31).
2 «Паддзахады мелодитӕ» цӕгъдын куы райдайынц, уӕд фӕхъуыды кӕнӕм Хуыцауы хъуыддӕгтыл. «Паддзахады мелодитӕм куы фӕхъусын, уӕд мӕ зӕрдыл уайтагъд ӕрлӕууынц зарӕджы ныхӕстӕ,— дзуры иу хо.— Куыд хорз у Иегъовӕйыл хъуыды кӕнын зӕрдӕскъӕфӕн музыкӕмӕ хъусгӕйӕ!» (Фил. 4:8).
3 Кӕд ис «Паддзахады мелодитӕм» хъусӕн? «Паддзахады мелодитӕ» хӕдзары куы фӕзӕлынц, уӕд бинонтӕм уый гуырын кӕны рӕсугъд, уырнындзинад фидаргӕнӕг хъуыдытӕ, ӕмӕ сын уый та фарн хӕссы. «Мах ӕм [музыкӕмӕ] тынг арӕх фӕхъусӕм хӕдзары дӕр, машинӕйы дӕр, фӕлӕ дзы фӕлмӕцгӕ никуы скӕнӕм,— ныффыстой иу бинонтӕ.— Арӕх нӕ „Паддзахады мелодитӕ“ раст зондыл саразынц, нӕхи чырыстон фембӕлдтӕм куы фӕцӕттӕ кӕнӕм, кӕнӕ та конгресмӕ куы фӕцӕуӕм, уӕд». Иу хо загъта: «Уыдон мын хӕдзары куыстытӕ кӕнгӕйӕ мӕ зӕрдӕ бахъӕлдзӕг кӕнынц. Кӕд ма мын уыдаид ногӕхсад дзаумӕттӕ сӕ бынӕтты ӕвӕрын ахӕм ӕхсызгон куыст? Ӕз сфӕнд кодтон, ӕнкъард куы уон, уӕд ацы музыкӕ ӕвӕрдзынӕн. Музыкӕмӕ хъусгӕйӕ мӕм цӕрын ӕрцӕуы! [...] Алы зарӕг дӕр дзы зӕрдӕрухсы хос у». Чи зоны дӕуӕн дӕр ахъаз уаид ахӕм уӕнгроггӕнӕн музыкӕмӕ хъусын?
4 Абоны музыкӕйы ӕмткӕй райсгӕйӕ ис ацы дунейы тӕфаг. Ныййарджытӕн «Паддзахады мелодиты» ӕххуысӕй сӕ бон у сӕ сывӕллӕтты хорз музыкӕ ӕвзарын сахуыр кӕнын. Библи чи ахуыр кӕны ӕмӕ цымыдис чи кӕны, уыцы адӕмӕй дӕр бирӕтӕн ӕхсызгон уыдзӕн, Иегъовӕйы чи кадджын кӕны ӕмӕ адӕймаджы ныфс чи уадзы, ахӕм диссаджы зарджыты тыххӕй базонын (Пс. 46:2, 3, 7, 8).