Бинонты фӕтк: ӕмбырды фембӕлдтӕ
1 Кӕд ныййарӕг дӕ, уӕд дӕ, бӕгуыдӕр, фӕнды, цӕмӕй дӕ сывӕллӕттӕ Иегъовӕйы уарзой ӕмӕ йын лӕггад кӕной, ӕмӕ ӕнустӕм цӕрой Хуыцауы зӕрдӕвӕрд дунейы. Цӕмӕй Иегъовӕйӕн лӕггад кӕнын сӕ царды фыццаг бынаты уа, уымӕн сын дӕ бон куыд у баххуыс кӕнын? Сӕйрагдӕр дӕхи цӕвиттонӕй (Ӕмб. 20:7). Иу хо йӕ мады ӕрымысгӕйӕ, загъта: «Фӕрсын дӕр нӕ никуы хъуыди, фембӕлдмӕ цӕуӕм, ӕви нӕ». Уый йӕ зӕрдӕйы баззад.
2 Ӕмбырды фембӕлдтӕ цӕмӕн сты, уый дӕ бинонтӕ ӕмбарынц? Уым цы уынаффӕтӕ исӕм, уыдон нын ӕххуыс кӕнынц Хуыцауы фӕндон ӕххӕст кӕнынӕн. Ӕмӕ не ’муырнджытимӕ ӕмгуыст кӕй кӕнӕм, уый нӕ ныфсыл ныфс ӕфтауы (Ис. 54:13; Ром. 1:11, 12). Фӕлӕ ахӕм фембӕлдтӕ сӕйраджыдӕр сты, цӕмӕй адӕмы ’хсӕн Иегъовӕйӕн кад кӕнӕм (Пс. 25:12). Уӕдӕ чырыстон фембӕлдтӕм кӕй цӕуӕм, уымӕй ӕвдисӕм, Иегъовӕйы кӕй уарзӕм ӕмӕ йын кӕй кувӕм.
3 «Уӕ хъус лӕмбынӕг дарут». Нӕ фембӕлдтӕ Хуыцауы кадджын кӕнынӕн кӕй сты, уымӕн кӕй аргъ кӕнӕм, уымӕ гӕсгӕ «нӕ хъус лӕмбынӕг дардзыстӕм» (НД), цӕмӕй ахсджиаг чи нӕу, уыцы хъуыддӕгты тыххӕй нӕ фембӕлдтӕ цух кӕнын ма райдайӕм (Еф. 5:15, 16; Дзут. 10:24, 25). Дӕ бинонтӕн график аразгӕйӕ фыццаг ныффысс ӕмбырды фембӕлдты рӕстӕг. Дӕ хъус дар, цӕмӕй уӕ ӕндӕр хъуыддӕгтӕ фембӕлдтӕм цӕуын ма хъыгдарой.
4 Не ’фсымӕртӕ ӕмбырдтӕм ӕмӕ конгресстӕм цӕуынӕн цы цӕлхдурты сӕрты хизынц, уый тыххӕй куы фӕкӕсӕм, уӕд ныл бандавынц. Чи зоны дӕ уавӕртӕ афтӕ уӕззау не сты, фӕлӕ уӕддӕр зындзинӕдтыл ӕмбӕлыс. Сайтан Хуыцауы адӕмӕн фылдӕрӕй-фылдӕр цӕлхдуртӕ ӕвӕры, цӕмӕй Иегъовӕйӕн ма кувой. Уӕ бинонтӕ ӕмбырды фембӕлдтӕм цӕуынӕн ӕппӕт тыхтӕй кӕй архайынц, уымӕн дӕ сывӕллӕттӕ ӕнӕмӕнгдӕр саргъ кӕндзысты. Афтӕмӕй сын дӕ бон у, ӕппындӕр кӕй никуы ферох кӕндзысты, ахӕм лӕвар ракӕнын.