Ӕххуыс кӕнӕм адӕмӕн, цӕмӕй «зӕрдӕйӕ коммӕгӕс» суой
1. Иегъовӕ йӕ лӕггадгӕнджытӕй цӕмӕ ӕнхъӕлмӕ кӕсы?
1 Цӕмӕй Иегъовӕ нӕ лӕггадӕй разы уа, уый тыххӕй ӕнӕмӕнг хъуамӕ уӕм коммӕгӕс (Дык. з. 12:28; 1 Пет. 1:14–16). «Хуыцауы чи нӕ зоны ӕмӕ... фарны уацы коммӕ чи нӕ кӕсы, уыдоны» тагъд Иегъовӕйы тӕрхон баййафдзӕн (2 Фес. 1:8, НТ). Куыд у нӕ бон адӕмӕн баххуыс кӕнын, цӕмӕй «зӕрдӕйӕ коммӕгӕс» суой Хуыцауы Ныхасӕн? (Ром. 6:17).
2. Адӕмӕн сӕ зӕрдӕйы фидар уырнындзинад хъомыл кӕнынӕн ӕххуыс кӕнын ахсджиаг цӕмӕн у?
2 Сӕ зӕрдӕйы сын уырнындзинад ӕмӕ уарзондзинад хъомыл кӕнынӕн ӕххуыс кӕнӕм. Фыстады коммӕгӕсдзинад ӕмӕ уырнындзинад тынг ӕнгом баст сты. Апостол Павел дзырдта, «ӕнусон Хуыцау [кӕй] бафӕдзӕхста, цӕмӕй иууылдӕр коммӕгӕс суой уырнындзинады фӕрцы» (Ром. 16:26, НД). Дзуттытӕм 11 сӕры дзырдӕуы, фидар уырнындзинад кӕмӕн уыд, ахӕм адӕмы тыххӕй. Ӕмӕ уыдонӕй бирӕтӕ сӕ уырнындзинад уымӕй равдыстой, Иегъовӕйы фӕндон кӕй ӕххӕст кодтой (Дзут. 11:7, 8, 17). Иннӕрдыгӕй та, Хуыцаумӕ чи нӕ хъусы, уымӕ уырнындзинад нӕй (Иоан. 3:36; Дзут. 3:18, 19). Мах хъуамӕ архайӕм Хуыцауы Ныхас хуыздӕр амоныныл, цӕмӕй адӕмӕн ӕххуыс кӕнӕм, Хуыцауӕн коммӕгӕс цӕй руаджы уыдзысты, ахӕм уырнындзинад сын сӕ зӕрдӕйы хъомыл кӕнынӕн (2 Тим. 2:15; Иак. 2:14, 17).
3. а) Хуыцаумӕ хъусын уарзондзинадимӕ куыд баст у? ӕ) Библи кӕимӕ ахуыр кӕнӕм, уыдонӕн куыд баххуыс кӕнӕм, цӕмӕй Хуыцауы бауарзой?
3 Цӕмӕй адӕймаг Хуыцаумӕ хъуса, уый тыххӕй ма йӕ уарзгӕ дӕр хъуама кӕна (Дык. з. 5:10; 11:1, 22; 30:16). «Хуыцауы уарзын уый у,– фыст ис 1 Иоанны 5:3,– цӕмӕй мах ӕххӕст кӕнӕм йӕ фӕдзӕхстытӕ; ӕмӕ йӕ фӕдзӕхстытӕ уӕззау не сты». Библи кӕимӕ ахуыр кӕнӕм, уыдонӕн куыд баххуыс кӕнӕм, цӕмӕй Хуыцауы бауарзой? Ахуыры рӕстӕджы сын фылдӕр дзур Иегъовӕйы миниуджыты тыххӕй, цӕмӕй сын тынгдӕр аргъ кӕной. Дӕхӕдӕг куыд тынг уарзыс Хуыцауы, уый тыххӕй дӕр дзур. Ӕххуыс кӕн дӕ ахуыргӕнинагӕн хъуыды кӕнын ууыл, ӕмӕ Иегъовӕйы хӕлар куыд суа. Иегъовӕйӕн зӕрдӕйӕ коммӕгӕс уай, уымӕ уарзондзинадӕй тынгдӕр ницы разӕнгард кӕны – иннӕты дӕр ӕмӕ мах дӕр (Матф. 22:37).
4. а) Нӕхи цӕвиттон ахсджиаг цӕмӕн у? ӕ) Цы хъуамӕ аразӕм, цӕмӕй нын «коммӕгӕс зӕрдӕ» уа?
4 Нӕхи цӕвиттон. Нӕхи цӕвиттонӕн дӕр ис стыр тых. Фӕзминаг куы уӕм, уӕд адӕмы разӕнгард кӕндзыстӕм Хуыцауы коммӕ кӕсынмӕ. Фӕлӕ нӕхӕдӕг дӕр хъуамӕ ӕдзухдӕр архайӕм ууыл, цӕмӕй нын «коммӕгӕс зӕрдӕ» уа (3 Пад. 3:9; Ӕмб. 4:23). Уый тыххӕй цы хъӕуы? Ӕдзух Библи ахуыр кӕн, ӕмбырдтӕм цу ӕмӕ афтӕмӕй дӕ зӕрдӕ ӕцӕгадӕй ӕфсад (Пс. 1:1, 2; Дзут. 10:24, 25). Раст диныл хӕст чи у, уыдонимӕ лымӕн кӕн (Ӕмб. 13:20). Ӕдзухдӕр хъусын кӕн ӕмӕ зӕрдиагӕй тыхс адӕмыл. Кув Иегъовӕмӕ, ӕмӕ дын баххуыс кӕна, цӕмӕй дын коммӕгӕс зӕрдӕ уа (Пс. 85:11). Дӕхи хиз, дӕ зӕрдӕ кӕмӕй фӕхъӕстӕ уыдзӕн, уыцы ирхӕфсӕнтӕй – ӕнӕгъдаудзинад ӕмӕ тыхми кӕм ис, ахӕмтӕй. Иегъовӕмӕ дӕ чи баввахс кӕндзӕн ӕмӕ уӕ хӕлардзинад фидардӕр кӕй руаджы уыдзӕн, ахӕм хъуыддӕгтыл хӕст у (Иак. 4:7, 8).
5. Коммӕгӕс чи у, уыдонӕн Иегъовӕ куыд арфӕ кӕны?
5 Рагзаманты Иегъовӕ йӕ адӕмӕн загъта, йӕ ныхасмӕ йын куы хъусой, уӕд сын кӕлгӕуӕлдайӕ кӕй арфӕ кӕндзӕн (Дык. з. 28:1, 2). Афтӕ абон дӕр, Иегъовӕ рӕдауӕй арфӕ кӕны, «коммӕ йын чи кӕсы, уыдонӕн» (Ап. к. 5:32). Цӕй уӕдӕ, куыд ахуыр кӕнӕм, уымӕй ӕмӕ нӕхи цӕвиттонӕй дӕр адӕмӕн ӕххуыс кӕнӕм, цӕмӕй зӕрдӕйӕ коммӕгӕс суой.