Сабыр адӕмы ахуыр кӕн Хуыцауы фӕндагыл цӕуын
1. Ахуыргӕнинӕгтӕ цӕттӕ кӕнынмӕ цы хауы?
1 Фыццаг ӕнусы Чырыстийы ахуыргӕнинӕгты хуыдтой «Фӕндагыл» цӕуджытӕ (Ап. к. 9:2, НД). Ӕцӕг чырыстон дин адӕймагӕн у йӕ царды фӕндаг ӕнӕхъӕнӕй дӕр (Ӕмб. 3:5, 6). Фӕлӕ Библи кӕимӕ фӕахуыр кӕнӕм, уыдонӕн ӕрмӕст Библийы ахуырӕдтӕ амонын фаг нӕ вӕййы. Хъуамӕ ма сын ӕххуыс кӕнӕм, цӕмӕй Иегъовӕйы фӕндагыл цӕуой (Пс. 24:8, 9).
2. Ахуыргӕнинаджы цы сразӕнгард кӕндзӕн, цӕмӕй Хуыцауы фӕдзӕхстытӕ ӕххӕст кӕна?
2 Уарзын сын кӕн Иегъовӕ ӕмӕ Йесойы. Куыд зын вӕййы ӕнӕххӕст адӕмӕн сӕ хъуыдытӕ, сӕ зондахаст, сӕ ныхасыуаг ӕмӕ сӕ уагахаст Хуыцауы фӕндонмӕ гӕсгӕ аивын! (Ром. 7:21–23; Еф. 4:22–24). Фӕлӕ сабыр адӕм Хуыцауы ӕмӕ йӕ Фырты кӕй уарзынц, уымӕ гӕсгӕ уыцы зын хъуыддаг сӕ къухы бафты (Иоан. 14:15; 1 Иоан. 5:3). Нӕ ахуыргӕнинӕгтӕн куыд баххуыс кӕнӕм, цӕмӕй сӕм ахӕм уарзондзинад уа?
3. Куыд у нӕ бон ахуыргӕнинӕгтӕн баххуыс кӕнын, цӕмӕй Иегъовӕ ӕмӕ Йесойы бауарзой?
3 Библи кӕимӕ ахуыр кӕныс, уымӕн бамбарын кӕн, Иегъовӕ цавӕр Хуыцау у, уый. Иу ӕфсымӕр дзуры: «Адӕймаг кӕй нӕ зоны, уый уарзын йӕ бон нӕу. Уымӕ гӕсгӕ ахуыр кӕнын кӕимӕ райдайын, уыдонӕн сӕрысуангӕй Библийы фенын кӕнын Хуыцауы ном, ӕмӕ фӕархайын, цӕмӕй сын Иегъовӕйы миниуджыты тыххӕй фылдӕр дзурон». Уымӕн диссаджы фадат у ахуыргӕнинӕгты ӕргом Йесойы цӕвиттонмӕ здахын (Иоан. 1:14; 14:9). Уыимӕ ма, чиныг «Библи цы дзуры»-йы алы сӕры фӕстӕ дӕр цы фӕлгӕт ис, уымӕй пайда кӕн, ӕмӕ афтӕмӕй ахуыргӕнинагӕн ӕххуыс кӕн йӕ удыхъӕды Хуыцау ӕмӕ йӕ Фырты диссаджы миниуджытӕ хъомыл кӕнынӕн.
4. а) Ахуыргӕнинӕгтӕй бирӕтӕм хъусын кӕнын зын цӕмӕн фӕкӕсы? ӕ) Ахуыргӕнинӕгтӕн куыд баххуыс кӕндзыстӕм, цӕмӕй хъусын кӕныны хъуыддаджы фыццаг къахдзӕфтӕ кӕнын райдайой?
4 Ахуыр сӕ кӕн дӕхи цӕвиттонӕй. Мах ахуыргӕнджытӕ ӕмӕ фӕндагамонджытӕ кӕй стӕм, уымӕ гӕсгӕ иннӕтӕн нӕ хъуыддӕгтӕй ӕвдисӕм, Хуыцауы фӕндагыл цӕуын цы нысан кӕны, уый (1 Кор. 11:1). Зӕгъӕм, ахуыргӕнинӕгтӕн сӕ фылдӕр ахуыр нӕ вӕййынц ӕнӕзонгӕ адӕмӕн сӕ дины тыххӕй дзурын. Адӕймаджы хъусын кӕнын ӕмӕ ахуыргӕнинӕгтӕ цӕттӕ кӕнынӕн хъӕуы уарзондзинад, уырнындзинад ӕмӕ хъӕбатырдзинад. Уӕдӕ сӕм цӕмӕй уыцы миниуджытӕ фӕзыной, уый тыххӕй нӕ гӕнӕн ис бахъӕуа фӕразондзинад ӕмӕ арӕхстдзинад (2 Кор. 4:13; 1 Фес. 2:2). Нӕ ахуыргӕнинӕгтӕн нӕ фӕндаг амонын кӕй фӕнды, уымӕ гӕсгӕ сӕ фарсмӕ уыдзыстӕм, хъусын кӕныны хъуыддаджы фыццаг къахдзӕфтӕ кӕнын куы райдайой, уӕд.
5. Хорз цӕвиттоны руаджы ахуыргӕнинӕгтӕ куыд фендзысты, Хуыцауы фӕдзӕхстытӕ ӕххӕст кӕнынмӕ цы хауы, уый?
5 Ахуыргӕнинӕгтӕн ма дӕ цӕвиттон ахъаз уыдзӕн чырыстон царды ӕндӕр фӕзилӕнты дӕр. Рынчынты куы бӕрӕг кӕнай кӕнӕ ӕмбырды фембӕлдты иннӕтӕн зӕрдиаг салам куы дӕттай, уӕд уындзысты, уарзондзинад хъуыддагӕй ӕвдисын цы нысан кӕны (Иоан. 15:12). Паддзахады зал куы ӕфснайай кӕнӕ та иннӕтӕн исты хъуыддаджы куы ӕххуыс кӕнай, уӕд сӕ ахуыр кӕныс, лӕггад кӕнын куыд хъӕуы, ууыл (Иоан. 13:12–15). Хуымӕтӕг цард кӕй кӕныс, уый куы уыной, уӕд бамбардзысты, фыццаджыдӕр Хуыцауы Паддзахад агурын цы нысан кӕны, уый (Матф. 6:33).
6. Цы пайда у сабыр адӕмӕн Иегъовӕйӕн лӕггад кӕнынӕн ӕххуыс кӕнын?
6 Хуыцауы Ныхас амонынӕн ӕмӕ ахуыргӕнинӕгтӕ цӕттӕ кӕнынӕн бирӕ хъарутӕ хъӕуы. Фӕлӕ уымӕй ӕхсызгондӕр цы ис, куы уынай, сабыр адӕм «кӕй цӕуынц ӕцӕгады»! (3 Иоан. 4).