Адӕмӕн рӕстдзинад базонынӕн ӕххуыс кӕнӕм
1 Ӕнусты дӕргъы Хӕйрӕг бирӕ адӕмы сайы мӕнг ахуырӕдты руаджы. Архайы, цӕмӕй ӕууӕндой Троицӕйыл, уд кӕй нӕ мӕлы ӕмӕ зындон кӕй ис, ууыл. Адӕмы дызӕрдыг хъуыдытыл ӕфтауы, зӕгъгӕ, Сфӕлдисӕг нӕй ӕмӕ Библи Хуыцауы ныхас нӕу. Цӕмӕй адӕм рӕстдзинад ма базоной, уый тыххӕй ма адӕмы ахӕм зондыл ардауы, зӕгъгӕ, иу адӕмыхатт иннӕмӕй хуыздӕр у (2 Кор. 4:4). Ахӕм мӕнг хъуыдытӕ ӕмӕ ахуырӕдтӕ басӕттӕн кӕнӕ сраст кӕнӕн куыд ис? (2 Кор. 10:4, 5).
2 Мӕнг ахуырӕдтӕ адӕмыл тынг ӕндавынц. Мӕнг ахуырӕдтӕ адӕймаджы зӕрдӕйы арф уидӕгтӕ ауадзынц. Иуӕй-иутӕ сыл сӕ гыццылӕй фӕстӕмӕ ӕууӕндынц. Цӕмӕй ахӕм адӕмӕн баххуыс кӕнӕм, уый тыххӕй хъуамӕ семӕ уӕзданӕй ныхас кӕнӕм ӕмӕ сын сӕ хъуыдыйӕн аргъ кӕнӕм (1 Пет. 3:15).
3 Кӕй сын аргъ кӕнӕм, уый бӕрӕг уыдзӕн, цӕуыл ӕууӕндынц ӕмӕ цӕмӕн, уый бамбарын кӕнынӕн сын фадат куы дӕттӕм, уӕд (Иак. 1:19). Чи зоны, фидарӕй ӕууӕндынц, уд кӕй нӕ мӕлы, ууыл, уымӕн ӕмӕ сын чидӕр фӕзиан ӕмӕ сӕ фӕнды, ногӕй та йӕ куы фениккой, уый. Кӕнӕ бӕрӕгбӕттӕ уый тыххӕй кӕнынц, ӕмӕ афтӕмӕй сӕ бон у сӕ рӕстӕг сӕ бинонтимӕ ’рвитын. Куы сӕм байхъусӕм, уӕд сӕ хуыздӕр бамбардзыстӕм ӕмӕ зондзыстӕм, семӕ куыд ныхас кӕнӕм, уый (Ӕмб. 16:23).
4 Йесо Чырыстийы фӕзмӕм. Хуыцауы Закъон хорз чи зыдта, ахӕм адӕймагимӕ Чырысти куыд ныхас кодта, уымӕй нын у фӕзминаг. Уыцы лӕджы цы аразын хъуыди, уый йын нӕ загъта. Чи зоны йӕм нӕ байхъуыстаид, уымӕн ӕмӕ цӕуыл ӕууӕндыд, уый йын зынаргъ уыд. Чырысти йын Фыстадӕй иу хъуыды йӕ зӕрдыл ӕрлӕууын кодта, бафарста йӕ, цы хъуыды кӕны, уымӕй ӕмӕ цӕвиттонтӕй спайда кодта, цӕмӕй раст хатдзӕгмӕ ӕрцыдаид (Лук. 10:25–37).
5 Хуыцауы Ныхасы фӕрцы адӕм мӕнг ахуырӕдтыл нал феууӕндынц (Дзут. 4:12). Библи сын фӕразонӕй куы ӕмбарын кӕнӕм, уӕд мӕнг ахуырӕдтӕ ныууадздзысты, рӕстдзинад базондзысты, ӕмӕ сӕ уый ссӕрибар кӕндзӕн (Иоан. 8:32).