Хуыцауы кӕй уарзӕм, уый бӕрӕг у, кӕй хъусын кӕнӕм, уымӕй
1. Чырысти Хуыцауы кӕй уарзта, уый йӕ цӕмӕ разӕнгард кодта?
1 Чырыстийы хъусын кӕнынмӕ разӕнгард кодта уарзондзинад. Куыд лӕггад кодта, уымӕй бӕрӕг уыд, Йегъовӕйы кӕй уарзта, уый. Йесо загъта: «Цӕмӕй дуне зона, ӕз мӕ Фыды кӕй уарзын, уый тыххӕй аразын, мӕ Фыд мын куыд бафӕдзӕхста, афтӕ» (Иоан. 14:31). Мах стӕм Чырыстийы фӕдылдзӕуджытӕ, ӕмӕ махӕн дӕр стыр кад у Хуыцауӕн лӕггад кӕнын ӕмӕ уымӕй ӕвдисын, кӕй йӕ уарзӕм, уый (Матф. 22:37; Еф. 5:1, 2).
2. Йегъовӕйы кӕй уарзӕм, уый нӕ лӕггадыл куыд зыны?
2 «Срухс уӕд дӕ ном». Алы фадатӕй дӕр куы фӕпайда кӕнӕм, цӕмӕй Йегъовӕйы ӕмӕ йӕ Паддзахады тыххӕй адӕмӕн зӕрдиагӕй дзурӕм, уӕд февдисӕм, кӕй йӕ уарзӕм ӕмӕ йын йӕ ном кӕй рухс кӕнӕм (Пс. 83:18; Иез. 36:23; Матф. 6:9). Чырыстийы лӕггадӕй куыд уыди бӕрӕг, афтӕ абон дӕр нӕ уацамындӕй бӕрӕг вӕййы, зӕрдиагӕй нӕ кӕй фӕнды, цӕмӕй Йегъовӕйы ном срухс уа ӕмӕ йӕ фӕндон сӕххӕст уа (Матф. 26:39).
3. Йегъовӕйы кӕй уарзӕм, уый нын куыд ӕххуыс кӕны цӕлхдурты сӕрты хизынӕн?
3 Уарзондзинады фӕрцы цӕлхдурты сӕрты хизӕм. Йегъовӕйы кӕй уарзӕм, уый фӕрцы цыфӕнды цӕлхдурты сӕрты дӕр ахиздзыстӕм (1 Кор. 13:4, 7). Йесо бирӕ алыхуызон цӕлхдуртыл ӕмбӕлд, ӕмӕ гӕнӕн уыд, цӕмӕй йын йӕ лӕггад ныкъкъуылымпы кодтаиккой. Фӕлӕ уыцы зындзинӕдтӕн быхста, Йегъовӕйы тынг кӕй уарзта ӕмӕ йӕ йӕ фӕндон ӕххӕст кӕнын кӕй фӕндыд, уый фӕрцы (Марчы 3:21; 1 Пет. 2:18–23). Махӕн дӕр бирӕ зындзинӕдтӕ ис, ӕмӕ Хуыцауы кӕй уарзӕм, уый фӕрцы сӕ сӕрты хизӕм. Чырыстийы куы фӕзмӕм, уӕд дарддӕр дӕр ныфсджынӕй ӕмӕ ӕнӕкъуылымпыйӕ лӕггад кӕндзыстӕм. Гӕнӕн ис, нӕ бинонтӕ нӕ ныхмӕ цӕуой, не ’нӕниздзинад фӕцуда, азтӕ ныл сӕ уӕз ӕруадзой кӕнӕ нӕм уацамынды адӕм ма хъусой. Фӕлӕ нӕ уӕддӕр ницы бакъуылымпы кӕндзӕн ӕмӕ дарддӕр, гӕнӕн уӕвгӕйӕ, ӕнтыстджынӕй хъусын кӕндзыстӕм ӕмӕ уымӕй ӕвдисдзыстӕм, Йегъовӕйы кӕй уарзӕм, уый.
4. Йегъовӕйы кӕй уарзӕм, уый цӕмӕй бӕрӕг уыдзӕн?
4 Уарзондзинадӕн стыр тых ис. Хуыцауы ӕппӕт зӕрдӕйӕ кӕй уарзӕм, уый бӕрӕг у, кӕй йын лӕггад кӕнӕм, уымӕй (1 Кор. 13:13). Тынг хӕстӕг у, Йегъовӕйы ном кӕд срухс уыдзӕн, уыцы рӕстӕг, фӕлӕ уал уӕдмӕ архайӕм, цӕмӕй «нӕ уарзондзинад фылдӕрӕй-фылдӕр кӕна» (Фил. 1:9; Матф. 22:36–38).