Ӕххуыс бинонтӕн

1. Сабатбоны Закъон израилаг бинонтӕн цы пайда уыд?

¹ Йегъовӕ израилӕгтӕн сабатбоны тыххӕй цы Закъон радта, уый дзурӕг уыди йӕ уарзондзинадыл, ӕмӕ бинонтӕн хаста пайда. Уыцы бон-иу сӕ хъуыддӕгтӕй баулӕфыдысты ӕмӕ-иу сын рӕстӕг уыд, цӕмӕй-иу Йегъовӕйы хорздзинӕдтыл ӕмӕ йӕм куыд ӕввахсдӕр кодтаиккой, ууыл хъуыды кодтаиккой. Афтӕмӕй-иу ныййарджытӕ сӕ сывӕллӕтты зӕрдӕты Закъон арф ӕвӕрдтой (Дык. з. 6:6, 7). Ацы Закъон Йегъовӕйы адӕмӕн алы къуыри дӕр фадат лӕвӕрдта сӕ уырнындзинадыл хъуыды кӕнынӕн.

2. Сабатбоны Закъонӕй Йегъовӕйы тыххӕй цы ис базонӕн?

² Кӕй зӕгъын ӕй хъӕуы, абон Йегъовӕ нӕ домы, цӕмӕй бинонтӕ уыцы Закъон ӕххӕст кӕной. Фӕлӕ уыцы Закъонӕй нӕ Хуыцауы тыххӕй нӕ бон бирӕ цыдӕртӕ у базонын. Йегъовӕ алкӕддӕр йӕ адӕмы хорздзинадыл тыхсти (Ис. 48:17, 18). Абон ма Йегъовӕ йӕ уарзондзинад уымӕй ӕвдисы, ӕмӕ алы бинонтӕн дӕр фӕзынд фадат, цӕмӕй иумӕ Библи ахуыр кӕной.

3. Бинонты ахуыры нысан цы у?

³ Бинонты ахуыры нысан цы у? 2009 азы январӕй ӕмбырды фембӕлдты ӕрцыд ивындзинад. Чиныгахуыр уадзын райдыдтам Хъусынгӕнджыты скъола ӕмӕ Хъусын кӕныны фембӕлдимӕ иумӕ. Ацы ивындзинады фӕрцы бинонтӕн фадат фӕзынд, цӕмӕй-иу алы къуыри дӕр иу изӕр иууылдӕр ӕрӕмбырд уой ӕмӕ сӕ уырнындзинад фидар кӕной. Загъд ма сын уыди, цӕмӕй сӕ бинонты ахуыр уадзой, чиныгахуыр раздӕр цы изӕр уыди, уыцы изӕр. Стӕй ма ахуыр кӕнынӕн ӕвзарой, сӕ бинонтӕн сын чи баххуыс кӕндзӕн, ахӕм темӕтӕ Библийӕ. Ӕмӕ уыцы темӕтӕ бӕстон ӕвзарой.

4. Бинонты ахуыр хъуамӕ иу сахат уа? Бамбарын ӕй кӕн.

⁴ Раздӕр-иу цӕмӕй чиныгахуырмӕ ацыдаиккам, уый тыххӕй-иу нӕ рӕстӕг хъуыд нӕхи ӕрцӕттӕ кӕнынӕн, уырдӕм ацӕуынӕн ӕмӕ ӕндӕр хъуыддӕгтӕн. Бирӕты та-иу ноджы фылдӕр цыдӕртӕ хъуыди саразын, цӕмӕй чиныгахуырмӕ бахаудтаиккой, кӕд иу сахат йеддӕмӕ нӕ цыд, уӕд дӕр. Ӕмӕ нӕ фембӕлдтӕ кӕй фӕивтой, уымӕ гӕсгӕ ныр уыцы изӕр нӕ бон у хӕдзарыдзагӕй Йегъовӕйы кадджын кӕнын. Фӕлӕ хъуамӕ афтӕ ма хъуыды кӕнӕм, ӕмӕ нӕ бинонты ахуыр дӕр хъуамӕ иу сахат уа. Хъуамӕ кӕсӕм нӕ бинонты уавӕртӕм ӕмӕ гӕнӕнтӕм, ӕмӕ уымӕ гӕсгӕ рӕстӕг хицӕн кӕнӕм.

5. Бинонтӕ ахуыры изӕр алцыдӕр хъуамӕ иумӕ аразой? Бамбарын ӕй кӕн.

⁵ Бинонтӕ уыцы изӕр алцыдӕр хъуамӕ иумӕ аразой? Лӕг ӕмӕ ус кӕнӕ ныййарджытӕ сӕ сывӕллӕттимӕ Библийӕ исты темӕтӕ иумӕ куы февзарынц, уӕд кӕрӕдзийы уырнындзинад фӕфидар кӕнынц (Ром. 1:12). Афтӕмӕй бинонтӕ кӕнынц ӕнгомдӕр. Кӕй зӕгъын ӕй хъӕуы, бинонты ахуыры рӕстӕджы сӕйраджыдӕр хъуамӕ ныхас цӕуа Библийыл. Фӕлӕ бинонтӕй алкӕмӕн дӕр йӕ бон у хицӕнӕй цыдӕр фарстатӕ дӕр иртасын. Зӕгъӕм, бинонты ахуыры фӕстӕ алкӕмӕн дӕр йӕ бон у йӕхи хицӕнӕй ӕмбырдмӕ цӕттӕ кӕнын кӕнӕ нӕ публикацитӕ кӕсын. Иуӕй-иу бинонтӕ уыцы изӕр телевизормӕ ӕппындӕр нӕ фӕкӕсынц.

6. Бинонты ахуыр куыд ис уадзӕн?

⁶ Бинонты ахуыр куыд ис уадзӕн? Бинонты ахуыр алыхатт нӕ хъӕуы фарстатӕ ӕмӕ дзуаппытӕм гӕсгӕ уадзын. Цӕмӕй хъӕлдзӕг ӕмӕ цымыдисаг уа, уый тыххӕй йӕ бирӕтӕ скӕнынц, къуырийы астӕу нын цы фембӕлд вӕййы, уый хуызӕн. Цы ӕрмӕг февзарынц, уый цалдӕр хайыл адих кӕнынц ӕмӕ йӕ алыхуызӕтты равзарынц. Дзырдӕн, Библи иумӕ фӕкӕсынц, фембӕлдтӕй цыдӕр хай фӕцӕттӕ кӕнынц ӕмӕ, уацамынды куыд ныхас кӕндзысты, уый фӕрепетици кӕнынц. Уый фӕдыл 6 фарсыл ис хорз уынаффӕтӕ.

7. Ныййарджытӕ цӕуыл хъуамӕ архайой?

⁷ Ныййарджытӕ цӕуыл хъуамӕ архайой? Бинонты ахуыр пайда ӕрхӕсдзӕн, ныййарджытӕ фӕлмӕнӕй куы ныхас кӕной ӕмӕ алчидӕр йӕ хъуыдытӕ сӕрибарӕй куы дзура, уӕд. Боныхъӕд хорз куы уа, уӕд бинонты ахуыр ис скӕнӕн ӕддейӕ дӕр. Куы бахъӕуа, уӕд-иу иу гыццыл улӕфгӕ дӕр акӕнут. Иуӕй-иу бинонтӕ ахуыры фӕстӕ сӕхи ирхӕфсгӕ дӕр акӕнынц. Бинонты ахуыры рӕстӕджы ныййарджытӕ сӕ сывӕллӕттӕн уайдзӕфтӕ нӕ кӕндзысты. Фӕлӕ сын сӕ хъус цӕмӕ хъӕуы ӕрдарын, ууыл иу уӕддӕр иу цасдӕр аныхас кӕндзысты. Хуыздӕр уаид ахсджиаг хъуыддӕгтыл сӕ сывӕллӕттимӕ алкӕимӕдӕр ӕндӕр бон хибарӕй куы ныхас кӕниккой, цӕмӕй йӕ иннӕты цӕсты ма бафтауой. Бинонты ахуыр хъуамӕ алкӕмӕн дӕр циндзинад хӕсса, уымӕн ӕмӕ мах кувӕм амондджын Хуыцауӕн (1 Тим. 1:11).

8, 9. Бинонты ахуырмӕ хӕдзары хицау цы хъуамӕ цӕттӕ кӕна ӕмӕ куыд?

⁸ Хӕдзары хицау йӕхи куыд хъуамӕ цӕттӕ кӕна? Цӕмӕй бинонты ахуыр стыр пайда хӕсса, уый тыххӕй хӕдзары хицау хъуамӕ йӕхи рагацау цӕттӕ кӕна. Хъуамӕ-иу ахъуыды кӕна, цӕуыл ныхас кӕндзысты ӕмӕ йыл куыд хуыздӕр уыдзӕн аныхас кӕнын, ууыл (Ӕмб. 21:5). Хорз уаид, лӕг-иу уыцы хъуыддаджы йӕ усы дӕр куы афӕрсид (Ӕмб. 15:22). Хорз ма уаид иуӕй-иу хатт сывӕллӕтты хъуыды дӕр базонын. Афтӕмӕй зондзынӕ, дӕ сывӕллӕтты зӕрдӕты цы ис ӕмӕ сӕ цы тыхсын кӕны.

⁹ Хӕдзары хицауӕн арӕхдӕр бирӕ рӕстӕг нӕ вӕййы, цӕмӕй алы къуыри дӕр ног ӕрмӕг цӕттӕ кӕна. Бинонтӕн сӕ бон у алы къуыри дӕр уыцы иу ӕрмӕг ахуыр кӕнын, зӕгъӕм, Библийӕ искӕцы хай кӕсын. Ӕмӕ уӕд алы хатт хӕдзары хицау бинонты ахуыры программӕ ӕнӕхъӕнӕй нӕ ивдзӕн. Бинонты ахуыры фӕстӕ йӕ бон у йӕхи иннӕ хатмӕ цӕттӕ кӕнын, уымӕн ӕмӕ, йӕ бинонты тынгдӕр цы хъӕуы, уый федта ӕмӕ дзы нӕма ферох. Иуӕй-иутӕ цыбыртӕй афыссынц, иннӕ хатт цы ахуыр кӕндзысты, уый ӕмӕ йӕ зынгӕ ран сӕвӕрынц, цӕмӕй йӕ бинонтӕ иууылдӕр уыной, зӕгъӕм, холодильниккыл ӕй бандадзынц. Афтӕмӕй алчидӕр бинонты ахуырмӕ цингӕнгӕйӕ ӕнхъӕлмӕ кӕсдзӕн ӕмӕ сын рӕстӕг уыдзӕн, цӕмӕй, куы хъӕуа, уӕд сӕхи бацӕттӕ кӕной.

10. Иунӕгӕй чи цӕры, уыдон бинонты ахуыры изӕр цы фӕкусынц?

¹⁰ Иунӕг куы уай. Иунӕгӕй чи цӕры, уыдонӕн сӕ бон у бинонты ахуыры изӕр Библи ахуыр кӕнын, ӕмбырдтӕм цӕттӕ кӕнын ӕмӕ нӕ публикацитӕ кӕсын. Иуӕй-иутӕ бинонты ахуыры изӕр баиу кодтой сӕхӕдӕг Библи куы фӕахуыр кӕнынц, уыцы изӕримӕ. Сӕ бон ма у искуы иу хатт хотӕй кӕнӕ ӕфсымӕртӕй, йе та искӕцы бинонты фӕхонын, ӕмӕ иумӕ Библи ахуыр кӕнын.

11, 12. Бинонты ахуыр алы къуыри куы вӕййы, уӕд цы пайда ӕрхӕссы?

¹¹ Бинонты ахуыр алы къуыри дӕр куы вӕййы, уӕд цы пайда ӕрхӕссы? Йегъовӕйӕн ӕппӕт зӕрдӕйӕ чи лӕггад кӕны, уыдон ӕм баввахс вӕййынц. Афтӕмӕй дӕр бинонтӕ кӕрӕдзиимӕ ӕнгомдӕр кӕнынц. Бинонты ахуыр стыр пайда кӕмӕн ӕрхаста, ахӕм къай зӕгъы: «Мах лӕггад кӕнӕм пионертӕй, стӕй нын зӕнӕг нӕй, ӕмӕ тынг фенхъӕлмӕ кӕсӕм бинонты ахуырмӕ. Уый фӕрцы кӕрӕдзимӕ дӕр ӕмӕ нӕ уӕларвон Фыдмӕ дӕр ӕввахсӕй-ӕввахсдӕр кӕнӕм. Бинонты ахуыр нын цы изӕр вӕййы, уыцы райсом куы райхъал вӕййӕм, уӕд кӕрӕдзи афӕрсӕм: „Базон-ма, абон нын изӕрӕй цы уыдзӕн? Бинонты ахуыр!“».

¹² Бинонты ахуыры изӕр ма стыр ӕххуыс у, бирӕ хъуыддӕгтӕ кӕмӕн вӕййы, уыцы бинонтӕн дӕр. Пионерӕй чи лӕггад кӕны ӕмӕ йӕ дыууӕ лӕппуйы иунӕгӕй чи хъомыл кӕны, иу ахӕм мад ныффыста: «Раздӕр нын бинонты ахуыр нӕ пълан кодта. Тынг-иу кӕй бафӕлладтӕн, уый тыххӕй-иу бинонты ахуыр искуы-иу хатт скодтам. Алцӕуыл дӕр куыд аххӕссыдаин, уый дӕр нӕ зыдтон. Гъемӕ уын зӕрдӕбынӕй арфӕ кӕнын бинонты ахуыры изӕры тыххӕй. Ныр нын алы къуыри дӕр вӕййы бинонты ахуыр ӕмӕ нын стыр пайда хӕссы».

13. Бинонты ахуыр уын стыр пайда хӕсдзӕн ӕви нӕ, уый цӕмӕй кӕнгӕ у?

¹³ Сабатбоны Закъонау бинонты ахуыры изӕр дӕр у нӕ уӕларвон Фыды лӕвар (Иак. 1:17). Израилаг бинонтӕ-иу сабат куыд арвыстой, уымӕй-иу бӕрӕг уыди, цас тынг сӕ фӕндыд Йегъовӕмӕ ӕввахсдӕр кӕнын. Афтӕ у бинонты ахуыры изӕр дӕр, цас фылдӕр ын аргъ кӕнӕм, уыйас фылдӕр пайда ӕрхӕсдзӕн нӕ бинонтӕн дӕр (2 Кор. 9:6; Гал. 6:7, 8; Кол. 3:23, 24). Дӕ хъарутӕ иууылдӕр бинонты ахуырмӕ куы саразай, уӕд дӕ бинонтӕ дӕр псаломзарӕггӕнӕгау зӕгъдзысты: «Мӕнӕн та хорз у Хуыцаумӕ ӕввахс кӕнын. Ӕз мӕхи бакодтон Дунедарӕг Хуыцау Йегъовӕйы уазӕг» (Пс. 73:28).

[Хицӕнгонд текст 5 фарсыл]

Бинонты ахуыр хъуамӕ алкӕмӕн дӕр циндзинад хӕсса, уымӕн ӕмӕ мах кувӕм амондджын Хуыцауӕн

[Рамкӕ 6 фарсыл]

БАФСНАЙ ЙӔ

Уынаффӕтӕ бинонты ахуыры фӕдыл

Библи

• Иумӕ бакӕсут, Скъолайы программӕмӕ гӕсгӕ Библийӕ цы сӕртӕ вӕййы, уырдыгӕй иу скъуыддзаг. Кӕд ӕй ролтӕм гӕсгӕ ис бакӕсӕн, уӕд ӕй бакӕсут.

• Ахъазут, Библийӕ цы скъуыддзаг бакастыстут, уый.

• Рагацау алкӕмӕн дӕр бабар кӕн, цӕмӕй Библийӕ сӕртӕ бакӕсой ӕмӕ уыцы сӕртӕм иу-дыууӕ фарстайы ныффыссут. Стӕй иумӕ равзарут алкӕй фарстатӕ дӕр.

• Алы къуыри дӕр-иу гӕххӕттыл Библийӕ иу стих ныффыссут, сахуыр-иу ӕй кӕнут ӕмӕ-иу ӕй бамбарын кӕнут. Уыцы гӕххӕттытӕ ӕмбырд кӕнут, ӕмӕ-иу сӕм алы къуыри дӕр кӕсут, кӕддӕра дзы цас бахъуыды кодтат.

• Хъусут-иу Библийы аудиозаписмӕ, ӕмӕ-иу афтӕ Библи кӕсут.

Фембӕлдтӕ

• Иумӕ-иу бацӕттӕ кӕнут фембӕлдтӕй искӕцымӕ.

• Хӕдзары-иу азарут, иннӕ фембӕлды чи уыдзӕн, уыцы зарджытӕ.

• Иумӕ-иу ӕрныхас кӕнут, искӕмӕн уӕ Хъусынгӕнджыты скъолайы хӕслӕвӕрд куы уа кӕнӕ Хъусын кӕныны фембӕлды равдыст бацӕттӕ кӕнын куы хъӕуа, уӕд. Хӕслӕвӕрд ма радзурӕн ис бинонты раз дӕр.

Бинонты хабӕрттӕ

• Уӕ бон ма у ӕвзарын чингуытӕ «Вопросы молодежи» кӕнӕ «Хъус ӕппӕты хуыздӕр Ахуыргӕнӕгмӕ».

• Репетици кӕнут, скъолайы цы уавӕртӕ сӕвзӕры, уыдон, цӕмӕй сӕм цӕттӕ уой.

• Ныййарджытӕ сӕхи сӕвӕрӕнт сывӕллӕтты бынаты, сывӕллӕттӕ та ныййарджыты. Сывӕллӕттӕ цыдӕр ӕрмӕг ӕвзарынц ӕмӕ йыл стӕй сӕ ныййарджытимӕ ныхас кӕнынц.

Уацамынд

• Репетици кӕнут, уацамынды сабаты ӕмӕ хуыцаубоны цы дзурдзыстут, уый.

• Аныхас кӕнут, уӕ бинонтӕн сӕ бон цы у саразын, цӕмӕй Ӕрымысӕн изӕры рӕстӕг кӕнӕ отпусчы рӕстӕг уӕ бон уа фылдӕр хъусын кӕнын.

• Уацамынды уӕм цы фарстатӕ ратдзысты, уыдонӕн цы зӕгъдзыстут, ууыл-иу цалдӕр минуты ахъуыды кӕнут, ӕмӕ-иу стӕй репетици скӕнут.

Ӕндӕр уынаффӕтӕ

• Иумӕ-иу кӕсут ног брошюрӕтӕ.

• Алчидӕр-иу ног брошюрӕтӕй бакӕсӕд, цы ӕрмӕг ӕй цымыдис кӕны, уый ӕмӕ-иу ӕй радзурӕд.

• Фӕхонут-иу хотӕ кӕнӕ ӕфсымӕртӕй искӕй, йе та искӕцы бинонты, ӕмӕ-иу сӕ сӕ царды хабӕрттӕй бафӕрсут.

• Бакӕсут нӕ видеофильмтӕй искӕцымӕ ӕмӕ-иу ыл аныхас кӕнут.

• Ныхас-иу кӕнут брошюрӕты рубрикӕтыл «Молодые люди спрашивают», «Семейная викторина», «Уӕ сывӕллӕтты ахуыр кӕнут» кӕнӕ «Кӕстӕртӕн».

• Бакӕсут-иу ног ӕрвылазон чиныг, стӕй конгрессы кӕй райсӕм, уыцы публикацитӕ дӕр ӕмӕ-иу сыл аныхас кӕнут.

• Конгрессы фӕстӕ-иу программӕйыл ӕрныхас кӕнут.

• Ныхас кӕнут Йегъовӕйы сконд хъуыддӕгтыл ӕмӕ нын Йегъовӕйы тыххӕй цӕуыл дзурынц, ууыл.

• Иумӕ-иу скӕнут истӕй модельтӕ, таблицӕтӕ кӕнӕ картӕтӕ.