«Бӕстон хъусын кӕнӕм Хуыцауы Паддзахады тыххӕй»
1. 14 мартъийӕ райдайгӕ къуырийӕ ӕмбырды цавӕр чиныг райдайдзыстӕм ахуыр кӕнын?
1 2011 азы 14 мартъийӕ райдайгӕ къуырийӕ ӕмбырды ахуыр кӕнын райдайдзыстӕм чиныг «Бӕстон хъусын кӕнӕм Хуыцауы Паддзахады тыххӕй». Ацы публикаци арӕзт у Хъуыддӕгты чиныгыл. Куы йӕ ахуыр кӕнӕм, уӕд тынг бадис кӕндзыстӕм, Хъуыддӕгты чиныджы фыст цаутӕ кӕрӕдзи куыд тагъд ивтой, ууыл. Стих дзы стихы фӕдыл ӕвзӕрст нӕ цӕуы. Фӕлӕ дзы фыст ис, цӕуыл ахуыр кӕнӕм уыцы чиныгӕй ӕмӕ дзы нӕ царды куыд ис пайда кӕнӕн, уый (Ром. 15:4).
2. Чиныг «Бӕстон хъусын кӕнут» куыд арӕзт у?
2 Чиныг куыд арӕзт у. 2 фарсыл дзы ис Разамонӕг советы зӕрдӕфидаргӕнӕн писмо. Ӕмӕ дзы фыссынц, кӕй сӕ фӕнды, цӕмӕй нын уыцы чиныг пайда ӕрхӕсса. 2 сӕрӕй райдайгӕйӕ алы сӕры райдианы дӕр цыбыртӕй фыст ис, ӕнӕхъӕн сӕры ныхас цӕуыл цӕуы, уый тыххӕй. Сӕры райдианы ма дзы стихтӕ дӕр ис, уыдон та ӕвдисынц, Хъуыддӕгты чиныгӕй дзы кӕцы скъуыддзагыл цӕуы ныхас, уый. Бирӕ сӕрты дзы ис рамкӕтӕ, ӕмӕ дзы фыст ис алыхуызон адӕймӕгты, бынӕтты ӕмӕ хабӕртты тыххӕй. Алы фарсыл дӕр дзы фӕрсырдыгӕй ис бирӕ бынат, ӕмӕ дзы нӕ бон у нӕ хъуыдытӕ фыссын. Ис ма дзы рагон хабӕртты тыххӕй бирӕ нывтӕ дӕр, ӕмӕ уыдоны фӕрцы нӕ бон у уыцы ахсджиаг хабӕрттӕ нӕ цӕстытыл ауайын кӕнын. Фӕстаг фарсыл та дзы ис нывты индекс, ӕмӕ сӕ фарсмӕ фыст ис, уыцы нывтӕ цӕуыл дзурӕг сты, уый. Чиныджы цъары мидӕггаг фарсыл ис картӕ, ахӕм картӕ ма ис фӕстаг цъарыл дӕр мидӕгӕй, ӕмӕ уыдонӕй базонӕн ис, фыццаг ӕнусы чырыстӕттӕ хорз хабар «суанг зӕххы кӕрӕттӕм дӕр» куыд фӕхӕццӕ кодтой (Хъуыд. 1:8).
3. Хъуыддӕгты чиныг цавӕр ахсджиаг фарстатӕн дӕтты дзуапп?
3 Ахсджиаг фарстатӕн дзуапп. Хъуыддӕгты чиныг куы равзарӕм, уӕд бӕлвырд дзуапп райсдзыстӕм нӕ лӕггады тыххӕй бирӕ ахсджиаг фарстатӕн. Дзырдӕн, Йесо Чырыстийы ӕцӕг фӕдылдзӕуджыты куыд ис базонӕн, цавӕр куыст кӕнынц ӕмӕ цы хабар хъусын кӕнынц, уымӕй? Ӕгас дунейы дӕр сын хъусын кӕныны хъуыддагӕн разамынд чи дӕтты ӕмӕ куыд? Чырыстӕтты фӕдыл куы фӕзилынц ӕмӕ сӕ ныхмӕ куы фӕцӕуынц, уӕд сын цавӕр фадӕттӕ фӕзыны? Хуыцауы сыгъдӕг тых нын куыд ӕххуыс кӕны?
4. Ацы чиныг нын стыр пайда куыд ӕрхӕсдзӕн?
4 Цӕмӕй нын ацы чиныг стыр пайда ӕрхӕсса, уый тыххӕй хъӕуы ӕрмӕг рагацау цӕттӕ кӕнын ӕмӕ ӕмбырдты дзуапп дӕттын. Иу ӕмбырд дӕр макуы фӕцух кӕн. Хъуыды-иу кӕн, ӕмбырдты цы базонай, уымӕй уацамынды куыд спайда кӕндзынӕ, ууыл. Цӕй уӕдӕ нын ацы диссаджы чиныг баххуыс кӕнӕд, цӕмӕй бӕстон хъусын кӕнӕм Хуыцауы Паддзахады тыххӕй! (Хъуыд. 28:23).