Нӕ лӕггады уӕм фӕразон
1. Йегъовӕ адӕммӕ фӕразондзинад куыд ӕвдисы?
1 Хуыцау адӕммӕ алкӕддӕр ӕвдыста фӕразондзинад ӕмӕ уарзондзинад (Рац. 34:6; Пс. 106:41–45; 2 Пет. 3:9). Ӕмӕ уый ӕппӕты хуыздӕр зыны, ӕгас дунейы дӕр хорз хабар хъуыстгонд кӕй цӕуы, уымӕй. Йегъовӕ адӕммӕ 2 000 азы бӕрц фӕразондзинад ӕвдисы, ӕмӕ дарддӕр дӕр сыгъдӕгзӕрдӕ адӕмы йӕхимӕ хоны (Иоан. 6:44). Нӕ бон куыд у, цӕмӕй нӕ лӕггады Йегъовӕйау фӕразон уӕм?
2. Нӕ участокты хъусын кӕнгӕйӕ нӕ бон куыд у фӕразондзинад ӕвдисын?
2 Хӕдзарӕй-хӕдзармӕ хъусын кӕнгӕйӕ. Мах Йегъовӕйы фӕразондзинад фӕзмӕм, хорз хабармӕ адӕм куыдфӕндыйы цӕстӕй кӕм кӕсынц, ахӕм рӕтты «ӕппынӕдзух» кӕй хъусын кӕнӕм, уымӕй (Хъуыд. 5:42). Кӕд нӕм адӕм уазал цӕстӕй кӕсынц, худынц ныл ӕмӕ нӕ ныхмӕ цӕуынц, уӕддӕр фӕразондзинад ӕвдисӕм (Мар. 13:12, 13). Фӕразондзинад ма нӕ фӕхъӕуы, хорз нӕм чи байхъуыста, уыдоны зӕрдӕты цы рӕстдзинады мыггӕгтӕ байтыдтам, уыдоныл дон кӕнынӕн дӕр. Ӕмӕ нӕ къухтӕ нӕ ауадзӕм, хӕдзары сӕ куы нӕ баййафӕм, уӕд.
3. Фӕразондзинад нӕ цӕмӕн фӕхъӕуы, искӕимӕ Библийы куы фӕахуыр кӕнӕм, уӕд?
3 Адӕмимӕ Библи ахуыр кӕнгӕйӕ. Цӕмӕй зайӕгой сырӕза, уый тыххӕй фӕхъӕуы фӕразонӕй банхъӕлмӕ кӕсын. Мах зайӕгоймӕ фӕзилӕм, фӕлӕ йӕ тагъддӕр сырӕзын кӕнын нӕ бон нӕ вӕййы (Иак. 5:7). Афтӕ адӕймагӕн дӕр йӕ уырнындзинад фӕрӕзы сабыргай (Мар. 4:28). Библи кӕимӕ ахуыр кӕнӕм, уымӕн, чи зоны, зын у, Хуыцауы зӕрдӕмӕ чи нӕ цӕуы, уыцы уырнындзинӕдтӕ ӕмӕ ӕгъдӕуттӕ ныууадзын. Ӕмӕ йын хъуамӕ уыдӕттӕ тыххӕй ма уадзын кӕнӕм, зӕгъгӕ, афтӕ тагъддӕр сырӕздзӕн. Цӕмӕй Хуыцауы сыгъдӕг тых нӕ ахуыргӕнинаджы зӕрдӕйыл ӕндавын райдайа, уый тыххӕй фӕхъӕуы цасдӕр рӕстӕг (1 Кор. 3:6, 7).
4. Фӕразондзинад нын куыд баххуыс кӕндзӕн, цӕмӕй нӕ ӕнӕуырнӕг хиуӕттӕн ӕнтыстджынӕй хъусын кӕнӕм?
4 Ӕнӕуырнӕг хиуӕттӕн ӕххуыс кӕнгӕйӕ. Алкӕйдӕр нӕ зӕрдиагӕй фӕнды, цӕмӕй нӕ ӕнӕуырнӕг хиуӕттӕ рӕстдзинад базоной. Ӕмӕ уый тыххӕй хъӕуы фӕразондзинад. Уымӕ гӕсгӕ-иу хорз фадат куы фӕзына, уӕд-иу сын рӕстдзинады тыххӕй радзурдзыстӕм, фӕлӕ-иу архайдзыстӕм, цӕмӕй-иу сӕ ныхӕсты бын ма фӕкӕнӕм (Еккл. 3:1, 7). Уымӕй уӕлдай ма сыл бандавдзысты нӕ хорз хъуыддӕгтӕ дӕр ӕмӕ нӕ уырнындзинады тыххӕй семӕ сабырӕй ӕмӕ уӕзданӕй куы ныхас кӕнӕм, уый дӕр (1 Пет. 3:1, 15). Уӕдӕ нӕ лӕггады фӕразон куы уӕм, уӕд уыдзыстӕм ӕнтыстджындӕр ӕмӕ нӕ уӕларвон Фыды зӕрдӕ рухс кӕндзыстӕм.