Хиуыл хӕцын. Уый хъӕуы, цӕмӕй Йегъовӕйы зӕрдӕ рухс кӕнӕм

«Нӕ хиуӕттӕй иу мемӕ хыл кӕнын райдыдта. Ӕз ын йӕ хурхыл ныххӕцыдтӕн, зӕгъын ӕй ныртӕккӕ амардзынӕн» (Пол).

«Хӕдзары-иу гыццыл ницӕй тыххӕй дӕр мӕстӕй рафыхтӕн. Ӕмӕ-иу мӕ сывӕллӕтты хъазӕнтӕ, мебель ӕмӕ-иу цӕуылдӕриддӕр фӕхӕст дӕн, уый ныппырх кодтон» (Марко).

Чи зоны, махӕн нӕ хабар афтӕ ӕвзӕр нӕу. Фӕлӕ нын хатт уӕддӕр зын вӕййы нӕхиуыл хӕцын, уымӕн ӕмӕ Адамӕй нӕ туджы рахастам тӕригъӕд (Ром. 5:12). Пол ӕмӕ Маркау иуӕй-иутӕ сты мӕстыгӕр. Иннӕтӕн зын вӕййы, тас сӕ чи уадзы ӕмӕ сӕ ныфс кӕмӕй асӕтты, ахӕм хъуыдытимӕ тох кӕнын. Чидӕртӕ та хӕтынц, фыднозт кӕнынц ӕмӕ сты наркотикты цагъартӕ.

Йӕ хъуыдытыл, йӕ фӕндтыл ӕмӕ йӕ хъуыддӕгтыл йӕ бар кӕмӕн нӕ фӕцӕуы, ахӕм адӕймаг йӕ цард халы. Нӕхи уымӕй куыд бахизӕм? Хъуамӕ нӕхиуыл хӕцын сахуыр уӕм. Уый у, «сыгъдӕг тых цы дыргъ дӕтты, уымӕ» чи хауы, уыцы миниуджытӕй иу (Гал. 5:22, 23). Аныхас кӕнӕм ӕртӕ фарстайыл: 1) Кӕй ис схонӕн хиуылхӕцгӕ адӕймаг? 2) Хиуыл хӕцын ахсджиаг цӕмӕн у? 3) Нӕ бон куыд у ацы миниуӕг нӕ удыхъӕды фидар кӕнын? Уый фӕстӕ та аныхас кӕндзыстӕм, нӕхиуыл фӕхӕцын нын куы нӕ рауайы, уӕд-иу цы хъуамӕ саразӕм, ууыл.

КӔЙ ИС СХОНӔН ХИУЫЛХӔЦГӔ АДӔЙМАГ?

Йӕхиуыл хӕцын чи зоны, ахӕм адӕймаг сонт митӕ нӕ фӕкӕны. Уый йӕхи фӕхизы, Хуыцауы зӕрдӕмӕ чи нӕ цӕуы, ахӕм ныхӕстӕй ӕмӕ хъуыддӕгтӕй.

Йесо Чырысти нын фӕзминаг у йӕ хиуылхӕцындзинадӕй. Библийы фыст ис: «Алы ӕфхӕрӕн ныхӕстӕ йын куы кодтой, уӕд сӕ уый не ’фхӕрдта. Хъизӕмӕрттӕ куы ’взӕрста, уӕд не ’ртхъирӕн кодта, хъизӕмӕрттӕ йын чи ӕвзарын кодта, уыдонмӕ, фӕлӕ йӕхи бакодта, раст тӕрхон чи кӕны, уый бар» (1 Пет. 2:23). Йесо хъизӕмӕртты хъӕдыл ауыгъд куы уыд ӕмӕ дзы йе знӕгтӕ куы хынджылӕг кодтой, уӕд дӕр йӕхиуыл хӕцыд (Матф. 27:39–44). Кӕнӕ йӕ дины разамонджытӕ ныхасӕй ӕрцахсынмӕ куы хъавыдысты, уӕд семӕ быцӕу кӕнын нӕ райдыдта (Матф. 22:15–22). Ӕмӕ йӕ знӕт дзуттӕгтӕ дуртӕй фӕхойынмӕ куы хъавыдысты, уӕд сӕм не ’ртхъирӕн кодта, фӕлӕ «фӕаууон ӕмӕ кувӕндонӕй рацыд» (Иоан. 8:57–59).

Цымӕ махӕн дӕр нӕ бон у Йесойы фӕзмын? Апостол Петр ныффыста: «Чырысти сымах тыххӕй фӕхъизӕмар кодта ӕмӕ уын равдыста, куыд цӕрын хъӕуы, уый, цӕмӕй йӕ къахвӕдтыл цӕуат» (1 Пет. 2:21). Кӕд ӕнӕххӕст стӕм, уӕддӕр нӕ бон у Йесойы фӕзмын ӕмӕ архайын, цӕмӕй хиуылхӕцгӕ уӕм. Уый афтӕ ахсджиаг цӕмӕн у?

ХИУЫЛ ХӔЦЫН АХСДЖИАГ ЦӔМӔН У?

Кӕд нӕ фӕнды Йегъовӕйы зӕрдӕ рухс кӕнын, уӕд хъуамӕ нӕхиуыл хӕцын зонӕм. Чи зоны, Йегъовӕйӕн иузӕрдионӕй рагӕй лӕггад кӕнӕм. Фӕлӕ нӕ ныхӕстыл ӕмӕ нӕ хъуыддӕгтыл куы нӕ хъуыды кӕнӕм, уӕд нӕ йӕ хӕлӕрттыл нал нымайдзӕн.

Ахъуыды-ма кӕнӕм Моисейы хабарыл. Уыцы рӕстӕг «зӕххыл... Моисейы хуызӕн сабыр адӕймаг нӕ уыд» (Ным. 12:3). Бирӕ азты дӕргъы уый фӕразонӕй хъуыста, израилӕгтӕ сӕ цардӕй куыд хъаст кодтой, уымӕ. Фӕлӕ иу бон йӕхиуыл нал фӕхӕцыд. Израилӕгтӕ та доны тыххӕй хъуыр-хъуыр кӕнын куы райдыдтой, уӕд сӕм смӕсты ӕмӕ сын карзӕй загъта: «Райхъусут-ма, ӕнӕсӕттон адӕм! Афтӕ уӕ фӕнды, ӕмӕ уын мах ацы къӕдзӕхӕй рауадзӕм дон?» (Ным. 20:2–11).

Моисей йӕхиуыл нӕ фӕхӕцыд. Йегъовӕ сын диссаджы хуызы дон кӕй радта, уый тыххӕй йӕ не скадджын кодта (Пс. 106:32, 33). Ӕмӕ йӕ Йегъовӕ Зӕрдӕвӕрд зӕхмӕ бацӕуын нӕ бауагъта (Ным. 20:12). Ӕвӕццӕгӕн, Моисей йӕ мӕлӕты онг йӕхи фӕсмонӕй хордта, уӕд йӕхиуыл кӕй нӕ фӕхӕцыд, уый тыххӕй (Дык. з. 3:23–27).

Ацы хабарӕй цӕуыл ахуыр кӕнӕм? Кӕд Йегъовӕйӕн рагӕй лӕггад кӕнӕм, уӕддӕр, кӕмӕ смӕсты вӕййӕм кӕнӕ зонд бацамонын кӕмӕн фӕхъӕуы, уыдонӕн хъуамӕ рӕхуыст, ӕфхӕрӕн ныхӕстӕ ма кӕнӕм (Еф. 4:32; Кол. 3:12). Адӕймагыл азтӕ куы рацӕуы, уӕд ын, чи зоны, хатт хиуыл хӕцын зындӕр вӕййы. Фӕлӕ хъуамӕ Моисейы цӕвиттон нӕ зӕрдыл дарӕм. Мах нӕ фӕндид, цӕмӕй, нӕхиуыл кӕй нӕ фӕхӕцыдыстӕм, уый тыххӕй нын Йегъовӕйы раз хорз ном мауал уа. Нӕ бон куыд у ацы ахсджиаг миниуӕг нӕ удыхъӕды фидар кӕнын?

ЦЫ ХЪУАМӔ АРАЗӔМ, ЦӔМӔЙ ХИУЫЛ ХӔЦЫН САХУЫР УӔМ?

Хуыцауӕй йӕ сыгъдӕг тых кур. Хиуылхӕцындзинад дӕр хауы, Хуыцауы сыгъдӕг тых цы дыргъ дӕтты, уымӕ. Ӕмӕ Йегъовӕйӕ йӕ сыгъдӕг тых чидӕриддӕр куры, уыдонӕн ӕй ратты (Лук. 11:13). Йегъовӕ нын йӕ сыгъдӕг тыхы фӕрцы хъарутӕ ратты, цӕмӕй нӕ бон уа нӕхиуыл хӕцын (Фил. 4:13). Стӕй ма нын ӕххуыс кӕны, цӕмӕй нӕ удыхъӕды фидар кӕнӕм иннӕ хорз миниуджытӕ дӕр, зӕгъӕм, уарзондзинад. Ӕмӕ нын уыцы миниуджыты фӕрцы ӕнцондӕр вӕййы нӕхиуыл хӕцын (1 Кор. 13:5).

Дӕхи хиз, дӕхиуыл хӕцын дын зын цӕй тыххӕй уыдзӕн, ахӕм цӕмӕйдӕрты. Хъуамӕ дӕхи хизай, ӕвзӕр цыдӕртӕ кӕм фендзынӕ, ахӕм сайттӕй ӕмӕ ӕвзӕр ирхӕфсӕнтӕй (Еф. 5:3, 4). Уӕвгӕ, хъуамӕ нӕхи хизӕм, цыдӕриддӕр нӕ рӕдийын кӕны, уыдӕттӕй (Ӕмб. 22:3; 1 Кор. 6:12). Зӕгъӕм, йӕ буары монцтимӕ чи тох кӕны, уыцы адӕймаг, чи зоны, аскъуыддзаг кӕндзӕн, уарзондзинады тыххӕй кинотӕм ӕмӕ чингуытӕ ӕппындӕр кӕй нӕ кӕсдзӕн.

Чи зоны нын ӕнцон ма уа ацы уынаффӕмӕ гӕсгӕ архайын ӕмӕ алцӕмӕй нӕхи хизын. Фӕлӕ ӕппӕт тыхтӕй куы архайӕм, уӕд нын Йегъовӕ ратдзӕн хъарутӕ, цӕмӕй нӕ бон уа нӕхиуыл хӕцын (2 Пет. 1:5–8). Йегъовӕ нын ӕххуыс кӕндзӕн, цӕмӕй нӕ бар цӕуа нӕ хъуыдытыл, нӕ ныхӕстыл ӕмӕ нӕ хъуыддӕгтыл. Уӕлдӕр кӕй кой уыд, уыцы Пол ӕмӕ Марко сахуыр сты хиуыл хӕцын. Иу ӕфсымӕр та-иу машинӕ скъӕргӕйӕ арӕх иннӕ шофыртӕм рамӕсты ӕмӕ-иу суанг семӕ схыл. Цы йын баххуыс кодта, цӕмӕй йӕхиуыл хӕцын сахуыр уыдаид? Уый зӕгъы: «Алы бон дӕр-иу Йегъовӕмӕ зӕрдӕбынӕй куывтон. Хиуылхӕцындзинады тыххӕй-иу статьятӕ бакастӕн ӕмӕ-иу мын чи баххуыс кодтаид, ахӕм стихтӕ-иу бахъуыды кодтон. Ныр цалдӕр азы архайын, цӕмӕй ацы миниуӕг мӕ удыхъӕды фидар кӕнон. Фӕлӕ уӕддӕр алы райсом дӕр мӕхицӕн фӕзӕгъын, кӕй хъуамӕ ма мӕсты кӕнон. Стӕй хӕдзарӕй дӕр раздӕр рацӕуын, цӕмӕй-иу тагъд ма кӕнон».

НӔХИУЫЛ КУЫ НӔ ФӔХӔЦӔМ

Хатт-иу нын нӕ рауайдзӕн нӕхиуыл фӕхӕцын. Ӕмӕ уӕд, чи зоны, Йегъовӕмӕ кувын ӕфсӕрмы кӕнӕм. Фӕлӕ нӕ кувын гъеуӕд хъӕудзӕн. Уӕдӕ-иу Йегъовӕмӕ уайтагъд скув. Балӕгъстӕ-иу ын кӕн, цӕмӕй дын ныххатыр кӕна, ӕххуыс-иу дзы ракур ӕмӕ-иу дӕхицӕн зӕгъ, афтӕ кӕй никуыуал бакӕндзынӕ (Пс. 51:9–11). Йегъовӕ дын дӕ зӕрдӕбын куывдмӕ куыдфӕндыйы цӕстӕй нӕ ракӕсдзӕн (Пс. 102:17). Апостол Иоанн загъта, Хуыцауы Фырты туг нӕ кӕй «сыгъдӕг кӕны ӕппӕт тӕригъӕдтӕй дӕр» (1 Иоан. 1:7; 2:1; Пс. 86:5). Йегъовӕ нын фӕдзӕхсы, цӕмӕй иннӕтӕн сӕ рӕдыдтытӕ алкӕддӕр хатыр кӕнӕм. Ӕмӕ нын йӕхӕдӕг дӕр хатыр кӕндзӕн нӕ рӕдыдтытӕ (Матф. 18:21, 22; Кол. 3:13).

Моисей ӕдзӕрӕг быдыры йӕхиуыл кӕй нӕ фӕхӕцыд, уый Йегъовӕйы зӕрдӕмӕ нӕ фӕцыд, фӕлӕ йын уӕддӕр ныххатыр кодта. Ӕмӕ Библийы Моисейы тыххӕй фыст ис, диссаджы уырнындзинады хицау кӕй уыд (Дык. з. 34:10; Дзут. 11:24–28). Йегъовӕ йын Зӕрдӕвӕрд зӕхмӕ бацӕуыны бар нӕ радта. Фӕлӕ йын бар ратдзӕн, цӕмӕй зӕххыл дзӕнӕты ӕнустӕм цӕра. Мах дӕр нӕ удыхъӕды хиуылхӕцындзинад куы фидар кӕнӕм, уӕд нӕм ахӕм бӕллиццаг цард ӕнхъӕлмӕ кӕсы (1 Кор. 9:25).