Библи кӕимӕ ахуыр кӕнӕм, уыдонӕн ӕххуыс кӕнӕм, цӕмӕй донаргъуыд райсой (2 хай)

1. Кӕцӕй йӕ зонӕм, ӕмӕ, ахуыргӕнинӕгтӕ кӕй цӕттӕ кӕнӕм, уый фӕрцы адӕмӕн сӕ бон у фервӕзын?

АХУЫРГӔНИНӔГТӔ кӕй цӕттӕ кӕнӕм, уый фӕрцы адӕмӕн сӕ бон у фервӕзын! Кӕцӕй йӕ зонӕм, уый афтӕ кӕй у? Матфейы 28:19, 20 стихты фыст ис Йесойы фӕдзӕхст: «Ацӕут... цӕттӕ кӕнут ахуыргӕнинӕгтӕ. Дӕттут сын донаргъуыд». Цымӕ донаргъуыд райсын тынг ахсджиаг у? Кӕд нӕ фервӕзын фӕнды, уӕд уый ӕнӕмӕнг у. Ӕмӕ, донаргъуыд райсын чи фӕнд кӕны, уый хъуамӕ уырна, фервӕзӕн кӕй ис, Йесо мах тыххӕй кӕй амард ӕмӕ кӕй райгас, ӕрмӕстдӕр уый фӕрцы. Апостол Петр дӕр иннӕ чырыстӕттӕн уый тыххӕй загъта ахӕм ныхӕстӕ: «Афтӕ у донаргъуыд дӕр, ныр уӕ уый ирвӕзын кӕны, Йесо Чырысти кӕй райгас, уый фӕрцы» (1 Пет. 3:21). Уӕдӕ, адӕймаг донаргъуыд куы райсы, уӕд ын фӕзыны ныфс, кӕй фервӕздзӕн ӕмӕ ӕнустӕм кӕй цӕрдзӕн.

2. 2 Тимофеймӕ 4:1, 2 стихтӕм гӕсгӕ, адӕмы куыд хъуамӕ ахуыр кӕнӕм?

² Цӕмӕй ахуыргӕнинӕгтӕ цӕттӕ кӕнӕм, уый тыххӕй хъуамӕ адӕмы «арӕхстджынӕй ахуыр кӕнӕм». (Бакӕс 2 Тимофеймӕ 4:1, 2.) Цӕмӕн? Йесо нын бафӕдзӕхста: «Ацӕут... цӕттӕ кӕнут ахуыргӕнинӕгтӕ. ...Ӕмӕ сӕ ахуыр кӕнут». Апостол Павел та Тимофеймӕ ныффыста: «Дӕ хъус дар, иннӕтӕн куыд ӕмӕ цы амоныс, уымӕ. Ацы хъуыддӕгты лӕуд у алкӕддӕр, уымӕн ӕмӕ афтӕмӕй дӕхи дӕр фервӕзын кӕндзынӕ ӕмӕ дӕм чи хъусы, уыдоны дӕр» (1 Тим. 4:16). Ӕмӕ ацы ныхӕстӕ махмӕ дӕр хауынц. Иннӕтӕн куыд ӕмӕ цы амонӕм, уый баст у ахуыргӕнинӕгтӕ цӕттӕ кӕнынимӕ. Ӕмӕ нӕ уымӕ гӕсгӕ фӕнды, цӕмӕй адӕмы хорз ахуыр кӕнӕм.

3. Ацы статьяйы цӕуыл аныхас кӕндзыстӕм?

³ Ӕгас зӕххыл дӕр Библи милуангай адӕмимӕ ахуыр кӕнӕм. Фӕлӕ, айразмӕйы статьяйы куыд загъд уыд, афтӕмӕй нӕ фӕнды уыцы адӕмӕй ноджыдӕр бирӕтӕн баххуыс кӕнын, цӕмӕй донаргъуыд райсой ӕмӕ Йесо Чырыстийы ахуыргӕнинӕгтӕ суой. Ӕмӕ ацы статьяйы аныхас кӕндзыстӕм, хъусынгӕнджыты ма ноджыдӕр цавӕр фондз хъуыддаджы хъӕуы аразын, цӕмӕй, Библи кӕимӕ ахуыр кӕнынц, уыдонӕн донаргъуыд райсынӕн баххуыс кӕной.

БИБЛИЙӔН ДЗЫРДЫ БАР ДӔТТ

4. Хъусынгӕнӕг Библийы ахуыр уадзгӕйӕ йӕхӕдӕг ӕгӕр бирӕ цӕуылнӕ хъуамӕ дзура? (Кӕс ма фиппаинаг дӕр.)

⁴ Мах тынг уарзӕм, Библийы цы рӕстдзинад ис, уый. Ӕмӕ, цы уарзӕм, уыдӕттыл дзурынӕй та хатт нӕ фефсӕдӕм. Фӕлӕ, зӕгъӕм, «Хъахъхъӕнӕн мӕсыджы» ахуыр ӕмӕ «Библийы ахуыр ӕмбырдимӕ» чи фӕуадзы, стӕй кӕимӕдӕр Библи чи фӕахуыр кӕны, уыдон-иу хъуамӕ ахуыры рӕстӕг сӕхӕдӕг ӕгӕр бирӕ ма дзурой. Хъуамӕ-иу нӕхиуыл фӕхӕцӕм ӕмӕ-иу Библийӕн дзырды бар раттӕм. Библийӕ кӕцыдӕр скъуыддзаджы тыххӕй кӕнӕ, цы темӕйыл ныхас кӕнӕм, уый тыххӕй цыдӕриддӕр зонӕм, уый дзурын нӕ фӕхъӕуы (Иоан. 16:12)b. Дӕхиуыл-ма ахъуыды кӕн. Донаргъуыд куы истай, уӕд, ӕвӕццӕгӕн, ӕрмӕстдӕр сӕйраг ахуырӕдтӕ зыдтай (Дзут. 6:1). Фӕлӕ, ныр цытӕ зоныс, уыдӕттӕ базонынӕн дӕ азтӕ бахъуыд. Ӕмӕ уый гӕнӕн нӕй, цӕмӕй, кӕимӕ ахуыр кӕныс, уымӕн иу хаттӕн алцыдӕр бамбарын кӕнай.

5. а) 1 Фессалоникӕгтӕм 2:13 стихы цы фыст ис, уымӕ гӕсгӕ, Библи кӕимӕ ахуыр кӕнӕм, уый цы хъуамӕ ӕмбара? б) Нӕ бон куыд у адӕймагӕн ӕххуыс кӕнын, цӕмӕй-иу, цы базоны, уый тыххӕй йӕ хъуыды зӕгъа?

⁵ Мах фӕнды, цӕмӕй, кӕимӕ ахуыр кӕнӕм, уый ӕмбара, цы базоны, уыдӕттӕ Хуыцауы Ныхасӕй кӕй сты. (Бакӕс 1 Фессалоникӕгтӕм 2:13.) Нӕ бон ын куыд у баххуыс кӕнын? Уадз ӕмӕ-иу, цы базоны, уый тыххӕй йӕ хъуыды зӕгъа. Библийы стихтӕ йын иууылдӕр ды ма ӕмбарын кӕн. Зӕгъ-иу ын, цӕмӕй дзы кӕцыдӕртӕ йӕхӕдӕг бамбарын кӕна. Ӕххуыс ын кӕн, цӕмӕй-иу фена, Библийӕ цы базоны, уый йӕхимӕ куыд хауы. Ратт-иу ӕм, йӕ хъуыды йын кӕй фӕрцы базондзынӕ, ахӕм фарстатӕ. Уадз ӕмӕ-иу зӕгъа, цы стихтӕ бакаст, уыдоны тыххӕй цы хъуыды кӕны (Лук. 10:25–28). Ис ӕм ахӕм фарстатӕ раттӕн: «Ацы стихӕй Йегъовӕйы миниуджытӕй кӕцыйы тыххӕй базыдтай? Ныртӕккӕ цӕуыл аныхас кодтам, уый дын цы пайда фӕуыдзӕн? Цы базыдтай, уый тыххӕй цы хъуыды кӕныс?» (Ӕмб. 20:5). Адӕймаг цас зоны, уый сӕйраг нӕу. Сӕйраг у, цӕмӕй-иу, цы базоны, уыдӕттӕ бауарза ӕмӕ йӕ цард уыцы зонындзинӕдтӕм гӕсгӕ араза.

6. Хорз цӕмӕн у Библийы ахуырмӕ фӕлтӕрдджын хъусынгӕнджыты хонын?

⁶ Библийы ахуырмӕ-иу фӕхон, иннӕты ахуыр кӕнынмӕ хорз чи арӕхсы, ахӕм фӕлтӕрдджын хъусынгӕнджыты. Бафӕрс-иу сӕ, Библийы ахуыр куыд уадзыс ӕмӕ Библийӕ куыд пайда кӕныс, уый тыххӕй цы хъуыды кӕнынц. Кӕд дӕ фӕнды, цӕмӕй иннӕты ахуыр кӕнынмӕ ноджы хуыздӕр арӕхсай, уӕд хъуамӕ уай сӕрныллӕг. (Абар Хъуыддӕгтӕ 18:24–26.) Ахуыры фӕстӕ, демӕ чи уыд, уыцы хъусынгӕнӕджы бафӕрс, кӕимӕ ахуыр кӕныс, уыцы адӕймаджы тыххӕй цы хъуыды кӕны, уымӕй – куыд ӕм кӕсы, рӕстдзинад ӕмбары ӕви нӕ. Иу къуыримӕ кӕнӕ цалдӕр къуыримӕ искуыдӕм куы цӕуай, уӕд дӕ бон у уыцы хъусынгӕнӕгӕн зӕгъын, цӕмӕй-иу дӕ бӕсты ахуыр ауадза. Уӕд ахуыр алы къуыри дӕр цӕудзӕн, ӕмӕ адӕймаг ӕмбардзӕн, уый куыд ахсджиаг у. Афтӕ ма хъуыды кӕн, уый «мӕхи» ахуыр у, ӕмӕ йӕ ӕндӕр никӕй бон у уадзын, зӕгъгӕ. Кӕй зӕгъын ӕй хъӕуы, дӕу фӕнды, цӕмӕй хъӕуы, уымӕй йын ӕххуыс кӕнын, цӕмӕй йӕ уырнындзинад фидарӕй-фидардӕр кӕна.

БӔРӔГ УӔД, РӔСТДЗИНАД КӔЙ УАРЗЫС ӔМӔ БИБЛИЙЫЛ ФИДАРӔЙ КӔЙ ӔУУӔНДЫС

7. Библи кӕимӕ ахуыр кӕныс, уымӕн цы ӕххуыс кӕндзӕн, цӕмӕй, цы базоны, уымӕн аргъ кӕна?

⁷ Библи кӕимӕ ахуыр кӕныс, уый хъуамӕ уына, рӕстдзинад кӕй уарзыс ӕмӕ Библийыл фидарӕй кӕй ӕууӕндыс (1 Фес. 1:5). Ӕмӕ уӕд уый дӕр, цы базоны, уымӕн аргъ кӕндзӕн. Кӕд уавӕр амоны, уӕд ын радзур, дӕхицӕн Библийы уагӕвӕрдтӕ царды куыд ӕххуыс кӕнынц, уый тыххӕй. Ӕмӕ уӕд бамбардзӕн, Библийы уынаффӕтӕ уымӕн дӕр царды стыр ӕххуыс кӕй фӕуыдзысты.

8. Библи кӕимӕ ахуыр кӕныс, уымӕн ма дӕ бон куыд у баххуыс кӕнын ӕмӕ уый хорз цӕмӕй уыдзӕн?

⁸ Библи кӕимӕ ахуыр кӕныс, уымӕн-иу ахуыры рӕстӕг радзур, цы зындзинӕдтыл ӕмбӕлы, ахӕм зындзинӕдты сӕрты чи ахызт, уыцы лӕггадгӕнджыты тыххӕй. Кӕд уе ’мбырды ахӕм хотӕ ӕмӕ ’фсымӕртӕ ис, уӕд сӕ дӕ бон у ахуырмӕ фӕхонын. Кӕнӕ та ахӕм лӕггадгӕнджыты хабӕрттӕ ссарӕн ис сайты jw.org рубрикӕйы «Библи ивы адӕймаджы цард»c. Ахӕм статьятӕ ӕмӕ видеороликты фӕрцы дӕр адӕймаг бамбардзӕн, Библийы уагӕвӕрдтӕ йын царды куыд баххуыс кӕндзысты, уый.

9. Дӕ бон куыд у адӕймаджы разӕнгард кӕнын, цӕмӕй, цы базоны, уый тыххӕй йӕ бинонтӕн ӕмӕ йе ’мбӕлттӕн дӕр дзура?

⁹ Кӕимӕ ахуыр кӕныс, уымӕн кӕд бинонтӕ ис ӕмӕ йӕ цардӕмбал Библи нӕма ахуыр кӕны, уӕд уымӕн дӕр ис зӕгъӕн, йӕ бон кӕй у уемӕ ахуыр кӕнын. Кӕимӕ ахуыр кӕныс, уый разӕнгард кӕн, цӕмӕй, цы базоны, уый тыххӕй йӕ бинонтӕн ӕмӕ йе ’мбӕлттӕн дӕр дзура (Иоан. 1:40–45). Дӕ бон ӕй у бафӕрсын: «Ацы хъуыды дӕ бинонтӕн куыд бамбарын кӕнис? Де ’мбалӕн кӕцы стих равдисис, цӕмӕй йын ацы хъуыды бамбарын кӕнай?» Афтӕмӕй йӕ ахуыр кӕндзынӕ иннӕтӕн рӕстдзинад амонын. Уый фӕстӕ та, цӕттӕ куы уа, уӕд, суыдзӕн ӕнӕаргъуыд хъусынгӕнӕг дӕр, ӕмӕ йӕ бон уыдзӕн ӕмбырдимӕ хъусын кӕнын. Дӕ бон ӕй у бафӕрсын, кӕд, мыййаг, зоны, Библи ахуыр кӕнын кӕй фӕнды, ахӕм адӕймаджы. Кӕд о, уӕд, чи зоны, йӕ бон уаид уыцы адӕймагимӕ баныхас кӕнын, цӕмӕй йемӕ фембӕлай ӕмӕ йын равдисай видеоролик «Библи адӕмимӕ куыд фӕахуыр кӕнӕм?»d.

ӔХХУЫС ЫН КӔН, ЦӔМӔЙ ЙЫН ӔМБЫРДЫ ӔМБӔЛТТӔ ФӔЗЫНА

10. 1 Фессалоникӕгтӕм 2:7, 8 стихты цы фыст ис ӕмӕ нӕ бон куыд у Павелы бафӕзмын?

¹⁰ Библи кӕимӕ ахуыр кӕнӕм, уыдон хъуамӕ уыной, кӕй сӕ уарзӕм ӕмӕ сыл кӕй хъуыды кӕнӕм. Нымай сӕ дӕ фидӕны хотӕ ӕмӕ ’фсымӕртыл. (Бакӕс 1 Фессалоникӕгтӕм 2:7, 8.) Ӕнцон сын нӕ вӕййы, Йегъовӕйӕн чи нӕ лӕггад кӕны, ахӕм ӕмбӕлтты ныууадзын ӕмӕ хъӕугӕ ивындзинӕдтӕ скӕнын. Ӕмӕ-иу сын хъуамӕ баххуыс кӕнӕм ӕмбырды ӕцӕг ӕмбӕлттӕ ссарынӕн. Библи кӕимӕ ахуыр кӕныс, уымӕн дӕхӕдӕг дӕр хъуамӕ йе ’мбал суай. Куы фӕахуыр кӕнут, уӕд йемӕ рӕстӕг куыннӕ фервитыс. Фӕлӕ-иу йемӕ ӕнӕуи дӕр рӕстӕг ӕрвит. Ӕндӕр бонты дӕр-иу ӕм телефонӕй бадзур, афысс-иу ӕм кӕнӕ-иу ӕм бауай. Ӕмӕ уӕд уындзӕн, кӕй йыл хъуыды кӕныс ӕмӕ йӕ кӕй уарзыс.

11. Библи кӕимӕ ахуыр кӕнӕм, уыдоны цӕмӕн хъӕуы ӕмбырды ӕмбӕлттӕ ссарын?

¹¹ Ис ахӕм африкаг ӕмбисонд: «Сывӕллоны ӕнӕхъӕн сых хъомыл кӕны». Махӕн та нӕ бон у зӕгъын: «Ахуыргӕнинаджы ӕнӕхъӕн ӕмбырд цӕттӕ кӕны». Уымӕ гӕсгӕ, фӕлтӕрдджын хъусынгӕнджытӕ, Библи кӕимӕ фӕахуыр кӕнынц, уыдоны базонгӕ кӕнынц иннӕ хотӕ ӕмӕ ’фсымӕртимӕ дӕр. Ӕмӕ сын уыдон дӕр феххуыс кӕнынц Йегъовӕмӕ ӕввахсдӕр кӕнынӕн. Стӕй сын вӕййынц ныфсы хос, зындзинӕдтыл куы сӕмбӕлынц, уӕд. Мах фӕнды, цӕмӕй, Библи кӕимӕ ахуыр кӕнӕм, уыдонӕй алчидӕр бамбара, ӕмбырды йын йӕхи бынат кӕй ис ӕмӕ мах йӕ бинонтӕ кӕй стӕм. Фӕнды нӕ, цӕмӕй хотӕ ӕмӕ ’фсымӕрты бауарза. Уӕд ын ӕнцондӕр уыдзӕн, Йегъовӕйыл ӕй чи нӕ бӕтты, уыцы ӕмбӕлтты ныууадзын (Ӕмб. 13:20). Йӕ раздӕры ӕмбӕлттӕ дзы сӕхи дард куы ласой, уӕд ӕй зондзӕн, Йегъовӕйы организацийы ӕцӕг ӕмбӕлттӕ кӕй ссардзӕн (Мар. 10:29, 30; 1 Пет. 4:4).

ӔМБАРЫН ЫН КӔН, АХСДЖИАГ КӔЙ У ДОНАРГЪУЫД РАЙСЫН

12. Цӕмӕн хъӕуы адӕймагӕн ӕмбарын кӕнын, йӕхи Хуыцауӕн снывонд кӕна ӕмӕ донаргъуыд райса, уый ахсджиаг кӕй у?

¹² Библи кӕимӕ ахуыр кӕныс, уымӕн-иу ӕмбарын кӕн, ахсджиаг кӕй у, цӕмӕй йӕхи Хуыцауӕн снывонд кӕна ӕмӕ донаргъуыд райса. Библи дӕр адӕмимӕ уымӕн фӕахуыр кӕнӕм. Кӕд адӕймагимӕ цалдӕр мӕйы дӕргъы алы къуыри дӕр Библи ахуыр кӕныс ӕмӕ уӕлдайдӕр кӕд ӕмбырдтӕм цӕуын райдыдта, уӕд хъуамӕ ӕмбара йӕ ахуыры нысан – уый йын хъуамӕ баххуыс кӕна, цӕмӕй Йегъовӕйы Ӕвдисӕн суа.

13. Донаргъуыд райсын кӕй фӕфӕнды, уый цавӕр къахдзӕфтӕ саразы?

¹³ Афтӕ размӕ къахдзӕфтӕгӕнгӕ адӕймаг йӕ нысанмӕ бахӕццӕ вӕййы – донаргъуыд райсы! Цавӕр къахдзӕфтӕ саразы? Фыццаг базоны Йегъовӕйы, баууӕнды йыл ӕмӕ йӕ бауарзы (Иоан. 3:16; 17:3). Уый фӕстӕ Йегъовӕ свӕййы йӕ Хӕлар, стӕй хотӕ ӕмӕ ’фсымӕртимӕ дӕр балымӕн вӕййы (Дзут. 10:24, 25; Иак. 4:8). Уымӕй уӕлдай ма йе ’взӕр хъуыддӕгтӕ ныууадзы ӕмӕ йӕ тӕригъӕдтыл ӕрфӕсмон кӕны (Хъуыд. 3:19). Уырнындзинад ӕм кӕй фӕзыны, уымӕ гӕсгӕ райдайы иннӕтӕн дӕр рӕстдзинады тыххӕй дзурын (2 Кор. 4:13). Уый фӕстӕ йӕхи Йегъовӕйӕн снывонд кӕны ӕмӕ донаргъуыд райсы (1 Пет. 3:21; 4:2). Уый алкӕмӕн дӕр вӕййы стыр цины бон! Адӕймаджы донаргъуыд райсынӕн цы къахдзӕфтӕ фӕхъӕуы скӕнын, уыдон куы фӕкӕны, уӕд-иу дзы зӕрдиагӕй раппӕл ӕмӕ-иу ын йӕ ныфсыл ныфс бафтау, цӕмӕй дарддӕр размӕ цӕуа.

АХЪУЫДЫ-ИУ КӔН, КЪАХДЗӔФТӔ КӔНЫ ӔВИ НӔ

14. Куыд ис бамбарӕн, Библи кӕимӕ ахуыр кӕнӕм, уый Йегъовӕйӕн лӕггад кӕнын фӕнды ӕви нӕ?

¹⁴ Адӕймагӕн куы феххуыс кӕнӕм, цӕмӕй донаргъуыд райса, уӕд-иу хъуамӕ фӕразон уӕм. Фӕлӕ-иу нӕ уӕддӕр хъӕудзӕн сбӕлвырд кӕнын, Йегъовӕйӕн лӕггад кӕнын ӕй фӕнды ӕви нӕ. Зӕгъӕм, бӕрӕг у, Йесойы фӕдзӕхстытӕм гӕсгӕ цӕрыныл кӕй архайы? Ӕви йӕ ӕнӕуи фӕнды, Библи цы хабӕртты кой кӕны, уыдон базонын?

15. Библи кӕимӕ ахуыр кӕнӕм, уыцы адӕймаг къахдзӕфтӕ кӕй кӕны, уый цӕмӕй уыдзӕн бӕрӕг?

¹⁵ Адӕймаг къахдзӕфтӕ кӕны ӕви нӕ, ууыл-иу рӕстӕгӕй-рӕстӕгмӕ ахъуыды кӕн. Зӕгъӕм, Йегъовӕйы кӕй уарзы, уый тыххӕй фӕдзуры? Йегъовӕмӕ фӕкувы? (Пс. 116:1, 2). Библи кӕсын уарзы? (Пс. 119:97). Алы ӕмбырдмӕ дӕр цӕуы? (Пс. 22:22). Йӕ царды, цы хъӕуы, уыдӕттӕ ивы? (Пс. 119:112). Цы базоны, уый тыххӕй йӕ бинонтӕн ӕмӕ йе ’мбӕлттӕн фӕдзуры? (Пс. 9:1). Ӕмӕ ӕппӕты ахсджиагдӕр фарста: фӕнды йӕ, цӕмӕй Йегъовӕйы Ӕвдисӕн суа? (Пс. 40:8). Кӕд уыцы хъуыддӕгтӕ нӕ аразы, уӕд бацархай, афтӕ цӕмӕн у, уый базоныныл. Ӕмӕ-иу уый фӕстӕ йемӕ фӕлмӕнӕй, фӕлӕ ӕргом аныхас кӕнe.

16. Куыд ис бамбарӕн, адӕймагимӕ дарддӕр Библи ахуыр кӕнын кӕй нал хъӕуы?

¹⁶ Стӕй-иу рӕстӕгӕй-рӕстӕгмӕ ахъуыды кӕн, уӕвгӕ ма адӕймагимӕ дарддӕр ахуыр кӕнын хъӕуы ӕви нӕ. Кӕд йӕхи ахуырмӕ нӕ бацӕттӕ кӕны, ӕмбырдтӕм цӕуын ӕй нӕ фӕнды, йе ’взӕр хъуыддӕгтӕ нӕ ныууагъта кӕнӕ нырма мӕнг диныл хӕст у, уӕд уый афтӕ уыдзӕн, цыма адӕймаджы ахуыр кӕныс ленк кӕнын, фӕлӕ йӕ донмӕ ныххизын нӕ фӕнды. Кӕд, цы базоны, уымӕн нӕ аргъ кӕны ӕмӕ йӕ ивын нӕ фӕнды, уӕд цы пайда у йемӕ дарддӕр Библи ахуыр кӕнын?

17. 1 Тимофеймӕ 4:16 стихмӕ гӕсгӕ, хъусынгӕнджытӕ цы хъуамӕ аразой, искӕимӕ Библи куы ахуыр кӕной, уӕд?

¹⁷ Мах тынг ахсджиагыл нымайӕм ахуыргӕнинӕгтӕ цӕттӕ кӕныны хъуыддаг. Ӕмӕ нӕ фӕнды, Библи кӕимӕ ахуыр кӕнӕм, уыдонӕн ӕххуыс кӕнын, цӕмӕй сӕ уырнындзинад фидар кӕна ӕмӕ ӕппынфӕстаг донаргъуыд райсой. Уымӕ гӕсгӕ Библийӕн дзырды бар дӕтдзыстӕм. Рӕстдзинад сын афтӕ амондзыстӕм, цӕмӕй бӕрӕг уа, нӕхӕдӕг дӕр ӕй кӕй уарзӕм ӕмӕ Библийыл фидарӕй кӕй ӕууӕндӕм. Ӕххуыс сын кӕндзыстӕм, цӕмӕй сын ӕмбырды ӕмбӕлттӕ фӕзына. Стӕй сын ӕмбарын кӕндзыстӕм, ахсджиаг кӕй у, цӕмӕй сӕхи Хуыцауӕн снывонд кӕной ӕмӕ донаргъуыд райсой. Уымӕй уӕлдай ма-иу рӕстӕгӕй-рӕстӕгмӕ ахъуыды кӕндзыстӕм, къахдзӕфтӕ кӕнынц ӕви нӕ. (Кӕс рамкӕ «Библи кӕимӕ ахуыр кӕныс, уымӕн дӕ бон куыд у ӕххуыс кӕнын?».) Адӕмы цард чи ирвӕзын кӕны, уыцы хъуыддаджы кӕй архайӕм, уый нын стыр циндзинад хӕссы! Цӕй уӕдӕ, Библи кӕимӕ ахуыр кӕнӕм, уыдонӕн рӕстдзинад арӕхстджынӕй амонӕм, цӕмӕй сӕ уырнындзинад фидар кӕна ӕмӕ ӕппынфӕстаг донаргъуыд райсой!