Дӕхицӕн хицауӕй кӕй равзардзынӕ? Библийы цы фыст ис?

Адӕм хъуыды кӕнынц, кӕй равзардзысты, ууыл.

Библийы цы фыст ис?

Зӕххон хицӕуттӕн сӕ бон алцы нӕу

Библийӕ бӕрӕг у, зӕххон хицӕуттӕй иуӕн дӕр йӕ бон алцы кӕй нӕу.

• «Уӕ зӕрдӕ ма дарут кадджын лӕгтыл, адӕймаджы фыртыл, уымӕн ӕмӕ йӕ бон нӕу ирвӕзын кӕнын. Йӕ царды тых рацӕуы, ӕмӕ сыджытмӕ аздӕхы. Уыцы бон фесӕфынц йӕ хъуыдытӕ иууылдӕр» (Псалом 146:3, 4).

Цыфӕнды хорз хицау дӕр кӕддӕр амӕлдзӕн. Уымӕй уӕлдай, иу хицауӕн дӕр йӕ бон афтӕ зӕгъын нӕу, ӕмӕ йӕ фӕстӕ чи уыдзӕн, уый йын йӕ хорз хъуыддӕгтӕ кӕронмӕ ахӕццӕ кӕндзӕн (Екклесиаст 2:18, 19).

Библийы фыст ис, Хуыцау адӕмы афтӕ кӕй не сфӕлдыста, цӕмӕй сӕхицӕн разамынд дӕттой.

• «Адӕймагӕн йӕ къахдзӕфтыл дӕр йӕ бар нӕ цӕуы» (Йереми 10:23).

Цымӕ, хорз хицау чи уыдзӕн, ахӕм исчи ис?

Хуыцау кӕй равзӕрста, уыцы Хицау

Библийӕ базонӕн ис, Хуыцау кӕй равзӕрста ӕппӕты хуыздӕр Хицауы – Йесо Чырыстийы (Псалом 2:6). Йесо у Хуыцауы Паддзахады Паддзах. Уыцы Паддзахад у, уӕлӕрвтӕй разамынд чи дӕтты, уыцы хицауад (Матфейы 6:10).

Йесо Чырыстийы дӕхицӕн хицауӕй равзардзынӕ? Библийӕ бӕрӕг у, уый ахсджиаг цӕмӕн у.

• «Скадджын кӕнут фырты [Йесо Чырыстийы], цӕмӕй уӕм Хуыцау ма смӕсты уа ӕмӕ ма фесӕфат, уымӕн ӕмӕ йӕ маст уайтагъд ссудздзӕн. Амондджын сты, йӕхи йе уазӕг чи бакодта, уыдон иууылдӕр» (Псалом 2:12).

Дӕхицӕн хицау ныр хъуамӕ равзарай. Библийы пехуымпарадӕй бӕрӕг у, 1914 азы Йесо Паддзах кӕй сси ӕмӕ тагъд Хуыцауы Паддзахад кӕй баивдзӕн, зӕххыл цы хицауӕдтӕ ис, уыдон иууылдӕр (Данел 2:44).

Йесойы дӕхицӕн хицауӕй кӕй ӕвзарыс, уый дӕ бон равдисын куыд у, уый базондзынӕ статьяйӕ «Хуыцауы Паддзахады фарс ныр слӕуу!».