Йесо Чырыстийы царды тыххӕй Библийы цы фыст ис, ууыл ӕууӕндӕн ис?

Дзуапп Библийӕ

Библийы фысджытӕй иу, Лука, цалынмӕ Йесо Чырыстийы царды хабӕрттӕ ныффыстаид, уӕдмӕ уал «ӕппӕт дӕр кӕрӕй-кӕронмӕ сбӕлвырд кодта» (Лукайы 1:3).

Чырыстийы царды хабӕрттӕ фыст сты цыппар Евангелийы. Ныффыстой сӕ, йемӕ иу рӕстӕджы чи цард, уыдон – Матфей, Марк, Лука ӕмӕ Иоанн. Фӕлӕ иуӕй-иутӕ куыд зӕгъынц, афтӕмӕй нӕ эрӕйы 4-ӕм ӕнусы Евангелитӕ ивд ӕрцыдысты.

Фӕлӕ 20-ӕм ӕнусы райдианы Египеты ссардтой Иоанны Евангелийӕ иу ахсджиаг скъуыддзаг. Хонынц ӕй Райленды папирус 457 (P⁵²) ӕмӕ ис Джон Райленды библиотекӕйы горӕт Манчестеры (Англи). Уыцы скъуыддзаджы цы фыст ис, уый абоны Библиты у Иоанны 18:31–33, 37, 38.

Райленды папирус у Чырыстон Грекъаг Фыстыты ӕппӕты рагондӕр къухфыст. Ахуыргӕндтӕй бирӕтӕ зӕгъынц, ацы папирус фыст кӕй ӕрцыд н. э. 125 азмӕ ӕввахс – ома уыцы ныхӕстӕ фыццаг хатт сӕ куы ныффыстой, уымӕй 25 азы йеддӕмӕ куы нӕма рацыд, уӕд. Зӕгъӕн ис, ӕмӕ уыцы скъуыддзаг ӕппындӕр нӕ хицӕн кӕны, фӕстӕдӕр кӕй скодтой, уыцы къухфыстытӕй.