ФӔСИВӔДЫ ФАРСТАТӔ
Цы саразон, мӕ кой куы кӕной, уӕд?
Зын цӕмӕн вӕййы
Иуӕй-иутӕ искӕй кой фӕкӕнынц фыддӕрагӕн, зӕгъӕм, истытӕ йыл ӕрымысынц, цӕмӕй йын йӕ номыл цъыф бакалой. Фӕлӕ дӕ кӕд уадиссагӕй ницы загътой, уӕддӕр дын уый, чи зоны, зын уа, уӕлдайдӕр та кӕд уыцы ныхас, ӕввахс кӕимӕ уыдтӕ, ахӕм адӕймагӕй рацыд, уӕд (Псалом 55:12–14).
«Базыдтон, ме ’мбал мӕ иннӕтӕн афтӕ кӕй дзырдта, иннӕ адӕмы рыст мӕм ӕппындӕр кӕй нӕ хъары. Тынг хъыг мын уыд! Афтӕ мӕ цӕмӕн дзуры, уый не ’мбӕрстон» (Эшли).
Фидарӕй зӕгъӕн ис. Дӕ кой иннӕтӕн чифӕнды ма кӕна – де ’ввахс ӕмбал уа ӕви ӕндӕр исчи – уӕддӕр зын вӕййы фехъусын, исчи дӕ фыдкой кӕй кӕны, уый.
Ӕвзӕр хабар: алы хатт уымӕн бауромӕн нӕ вӕййы
Адӕм иннӕты кой бирӕ цӕйдӕрты тыххӕй фӕкӕнынц, зӕгъӕм:
Зӕрдиагӕй сыл тыхсынц. Адӕм афтӕ конд сты, ӕмӕ ӕнӕ кӕрӕдзийӕ сӕ бон цӕрын нӕу. Уымӕ гӕсгӕ уым диссагӕй ницы ис, кӕрӕдзиимӕ (кӕнӕ кӕрӕдзийы тыххӕй) кӕй фӕныхас кӕнӕм. Стӕй нӕ Библи дӕр разӕнгард кӕны, цӕмӕй иннӕтыл дӕр хъуыды кӕнӕм, ӕрмӕст ӕгӕр нӕ (Филиппӕгтӕм 2:4).
«Иууылдӕр ӕппӕты фылдӕр уарзынц адӕмы тыххӕй дзурын!» (Бьянкӕ).
«Ӕргом куы зӕгъон, уӕд мӕ зӕрдӕмӕ цӕуы, иннӕты тыххӕй исты ног хабӕрттӕ базонын ӕмӕ сӕ стӕй иннӕтӕн дзурын. Цӕмӕн, уый нӕ зонын, фӕлӕ мӕ зӕрдӕмӕ цӕуы» (Кати).
Ницы куыст сын вӕййы. Раджы заманты уыд ахӕм адӕм, ӕмӕ сӕ «сӕрибар рӕстӕг сӕ хуыздӕр куыст уый уыди, ӕмӕ-иу исты ног хабӕрттӕ дзырдтой ӕмӕ сӕм хъуыстой» (Хъуыддӕгтӕ 17:21). Афтӕ у абон дӕр!
«Иуӕй-иу хатт царды уадиссагӕй куы ницы вӕййы, уӕд адӕм сӕхӕдӕг истытӕ ӕрхъуыды кӕнынц, цӕмӕй, цӕуыл аныхас кӕной, уый сын уа» (Джоаннӕ).
Ӕнӕныфсхаст вӕййынц. Библи нӕ дзӕгъӕлы нӕ фӕдзӕхсы, цӕмӕй нӕхи иннӕтимӕ ма барӕм (Галатӕгтӕм 6:4). Иуӕй-иутӕ ӕнӕныфсхаст кӕй вӕййынц, уый тыххӕй, хъыгагӕн, иннӕты фыдкой фӕкӕнынц, цӕмӕй сын сӕхи цӕсты кад уа.
«Фыдкой чи кӕны, уымӕн йӕ ныхӕстӕй цыдӕртӕ базонӕн ис йӕхи тыххӕй дӕр. Арӕхдӕр уый фӕхӕлӕг кӕны, кӕй кой фӕкӕны, уымӕ. Искӕй ӕвзӕры кой фӕкӕны, цӕмӕй афтӕ уайа, ӕмӕ уыимӕ абаргӕйӕ йӕхӕдӕг хуыздӕр у, ӕмӕ йын уый фӕрцы йӕхи цӕсты стырдӕр кад уа» (Фил).
Фидарӕй зӕгъӕн ис. Дӕ зӕрдӕмӕ цӕуы ӕви нӕ, уӕддӕр адӕм иннӕты кой кӕндзысты – ӕмӕ дӕу дӕр нӕ ферох кӕндзысты.
Хорз хабар: уый дын хъуамӕ дӕ ныфс ма сӕтта
Кӕй зӕгъын ӕй хъӕуы, адӕм уӕддӕр дӕ кой кӕндзысты, фӕлӕ дӕхицӕй кӕнгӕ у, уымӕ цы цӕстӕй кӕсдзынӕ, уый. Куы йӕ базонай, ӕмӕ дӕ кой кӕнынц, уӕд дын ис дыууӕ варианты.
1 ВАРИАНТ. Мацӕмӕ йӕ ӕрдар. Арӕхдӕр-иу ӕппӕты хуыздӕр уыдзӕн, уыцы ныхӕстӕ-иу куы ницӕмӕ ӕрдарай, уӕлдайдӕр та дӕ уадиссагӕй куы ницы зӕгъой, уӕд. Архай, Библийы цы уынаффӕ ис, уымӕ гӕсгӕ: «Гыццыл ницӕй тыххӕй дӕр-иу ма фӕтӕргай у» (Екклесиаст 7:9).
«Ахӕм ныхас ахъӕр ис, цыма цыдӕр лӕппуимӕ ӕмбӕлын, афтӕмӕй та йӕ уынгӕ дӕр никуы фӕкодтон! Уый мӕм ахӕм худӕг фӕкаст, ӕмӕ зӕрдиагӕй фӕхудтӕн» (Элис).
«Кой кӕныны ныхмӕ хорз номӕй хуыздӕр хӕцӕнгарз нӕй. Исчи дӕ кой куы кӕна, уӕддӕр бирӕты нӕ бауырндзӕн, хорз ном дын куы уа, уӕд. Ӕцӕгӕй цы дӕ, уый дын дӕ номыл цъыф абадын нӕ бауадздзӕн» (Алисон).
Уынаффӕ. Ныффысс: 1) цы дӕ загътой ӕмӕ 2) дӕхи куыд фӕхатыдтӕ. Дӕ зӕгъинӕгтӕ дӕхицӕн дӕ зӕрдӕйы куы радзурай, уӕд дын ӕнцондӕр уыдзӕн дӕ маст ферох кӕнын (Псалом 4:4).
2 ВАРИАНТ. Дӕ кой чи фӕкодта, уыимӕ аныхас кӕн. Хатт-иу, чи зоны, аскъуыддзаг кӕнай, зӕгъгӕ, хабар ахӕм нӕу, цӕмӕй йыл мӕ цӕстытӕ сӕхгӕнон, ӕмӕ сфӕнд кӕнай уыцы адӕймагимӕ аныхас кӕнын.
«Дӕ кой чи кӕны, уыцы адӕмимӕ куы аныхас кӕнай, уӕд ӕй базондзысты, иннӕтӕн кӕй кой кӕнынц, уымӕ, абон уа ӕви райсом, уӕддӕр сӕ ныхӕстӕ кӕй бахӕццӕ уыдзысты. Уымӕй уӕлдай, семӕ куы аныхас кӕнай, уӕд алцыдӕр сбӕлвырд уыдзӕн ӕмӕ дзы загъта-багътатӕ нал уыдзӕн» (Элис).
Дӕ кой чи фӕкодта, уыимӕ аныхас кӕныны размӕ ӕркӕс ацы уагӕвӕрдтӕм Библийӕ ӕмӕ сӕм цы фарстатӕ ис, уыдоныл ахъуыды кӕн.
«Адӕймагмӕ куы нӕ байхъусай, афтӕмӕй дзуапп куы раттай, уӕд уый у ӕнӕзонд ми ӕмӕ худинаг» (Ӕмбисӕндтӕ 18:13). «Цымӕ алцыдӕр зонын? Цымӕ уыцы ныхӕстӕ мӕнӕн чи радзырдта, уый алцыдӕр раст бамбӕрста?»
«Рӕвдз у байхъусынмӕ, дзурын ӕмӕ мӕсты кӕнынмӕ та тагъд ма кӕн» (Иаковы 1:19). «Цымӕ ныр ӕппӕты хуыздӕр рӕстӕг у, мӕ кой чи фӕкодта, уыимӕ аныхас кӕнынӕн? Цы ӕрцыд, уымӕ раст цӕстӕй кӕсын? Ӕви хуыздӕр уыдзӕн, иу гыццыл куы банхъӕлмӕ кӕсон, цӕмӕй уал ӕрсабыр уон?»
«Алы хъуыддаджы дӕр [уӕ] куыд фӕнды, цӕмӕй уын адӕм уой, афтӕ сын ут уӕхӕдӕг дӕр» (Матфейы 7:12). «Ӕз йӕ бынаты куы уыдаин, уӕд мӕн куыд фӕндыдаид, цӕмӕй мемӕ аныхас кодтаид? Кӕм мӕ фӕндыдаид, цӕмӕй мемӕ аныхас кодтаид? Тынгдӕр мыл цавӕр ныхӕстӕ ӕмӕ цавӕр хъӕлӕсы уаг бандӕвтаиккой?»
Уынаффӕтӕ. Дӕ кой чи кодта, уыимӕ аныхас кӕныны размӕ ныффысс, цы йын зӕгъдзынӕ, уый. Стӕй иу-дыууӕ къуырийы банхъӕлмӕ кӕс ӕмӕ, цы ныффыстай, уый ногӕй бакӕс – кӕд дӕ дзы, мыййаг, исты аивын фӕнды. Уымӕй уӕлдай уый тыххӕй аныхас кӕн дӕ ныййарджытӕй кӕнӕ дӕ фӕлтӕрд ӕмбӕлттӕй искӕимӕ ӕмӕ йӕ бафӕрс, куыд бакӕнай, уымӕй.
Фидарӕй зӕгъӕн ис. Царды бирӕ хъуыддӕгтӕ дӕуӕй кӕнгӕ куыд не сты, афтӕ дӕуӕй кӕнгӕ нӕу, дӕ кой кӕндзысты ӕви нӕ, уый дӕр. Фӕлӕ уый ууыл дзурӕг нӕу, ӕмӕ дӕ цард, исчи дӕ цы дзуры, уымӕй кӕнгӕ хъуамӕ уа!