Фидӕны зӕххыл дзӕнӕты адӕм цин кӕнынц, се ’мбӕлттӕй ӕмӕ сӕ хиуӕттӕй чи райгас, уыдоныл

Райгасдзинады тыххӕй Библийы цы фыст ис?

Дзуапп Библийӕ

Библийы дзырд «райгасдзинад»-ӕй ратӕлмац кодтой грекъаг дзырд ана́стасис, ӕмӕ нысан кӕны «слӕууын» кӕнӕ «ногӕй сыстын». Чи райгас вӕййы, уыцы адӕймаг мӕрдтӕй сысты ӕмӕ цардмӕ раздӕхы, раздӕр цавӕр адӕймаг уыд, ахӕмӕй (1 Коринфӕгтӕм 15:12, 13).

Мӕрдтӕ кӕй райгас уыдзысты, уыцы хъуыды ӕмбӕлы Дзуттаг Фыстыты, кӕнӕ Рагон Фӕдзӕхсты. Зӕгъӕм, пехуымпар Осийы уылты Хуыцау зӕрдӕ бавӕрдта: «Ӕз сӕ ингӕнӕй фервӕзын кӕндзынӕн, мӕлӕтӕй сӕ раздахдзынӕн» (Оси 13:14; Иов 14:13–15; Исай 26:19; Данел 12:2, 13).

Чи райгас уыдзӕн, уыдон кӕм цӕрдзысты? Адӕмӕй иуӕй-иутӕ райгас вӕййынц уӕлӕрвты цӕрынӕн, цӕмӕй Чырыстиимӕ паддзӕхтӕ уой (2 Коринфӕгтӕм 5:1; Раргомад 5:9, 10). Библийы уыдоны тыххӕй фыст ис, «фыццаг чи райгас уа, уыдон», зӕгъгӕ (Раргомад 20:6; Филиппӕгтӕм 3:11). Уый ууыл дзурӕг у, ӕмӕ ма уый фӕстӕ дӕр чидӕртӕ райгас уыдзӕн. Уыдон райгас уыдзысты зӕххыл цӕрынӕн ӕмӕ уыдзысты тынг бирӕ (Псалом 37:29).

Мӕрдтӕ куыд ӕгас кӕнынц? Хуыцау Йесойӕн ахӕм тых радта, ӕмӕ йӕ бон у мӕрдты ӕгас кӕнын (Иоанны 11:25). Йесо фӕстӕмӕ цардмӕ раздахдзӕн, «зӕрдылдарӕн зӕппӕдзты» чидӕриддӕр ис, уыдоны ӕмӕ та уыдзысты, сӕ мӕлӕты размӕ цавӕр адӕймӕгтӕ уыдысты, ахӕм адӕймӕгтӕ (Иоанны 5:28, 29, фиппаинаг). Уӕлӕрвты цӕрынӕн чи райгас уа, уыдонӕн уыдзӕн ӕнӕуынгӕ уӕларвон буӕрттӕ. Зӕххыл цӕрынӕн чи райгас уа, уыдонӕн та сӕ буӕрттӕ уыдзысты туг ӕмӕ стӕгӕй конд, ӕмӕ уыдзысты ӕххӕст ӕмӕ ӕнӕниз (Исай 33:24; 35:5, 6; 1 Коринфӕгтӕм 15:42–44, 50).

Чи райгас уыдзӕн? Библийы фыст ис, кӕй «райгас уыдзысты рӕстгӕнджытӕ дӕр ӕмӕ фыдгӕнджытӕ дӕр» (Хъуыддӕгтӕ 24:15). Рӕстгӕнджытӕм хауынц, Хуыцауыл иузӕрдион чи уыд, уыцы адӕм, зӕгъӕм, Ной, Саррӕ ӕмӕ Авраам (Райдиан 6:9; Дзуттӕгтӕм 11:11; Иаковы 2:21). Фыдгӕнджытӕм та хауынц, Хуыцауы базоныны фадат кӕмӕн нӕ уыд ӕмӕ йӕ коммӕ уый тыххӕй чи нӕ каст, уыдон.

Фӕлӕ иуӕй-иутӕ ахӕм фыдзӕрдӕ свӕййынц, ӕмӕ никуыуал сраст уыдзысты. Ахӕм адӕм нӕ райгас уыдзысты (Матфейы 23:33; Дзуттӕгтӕм 10:26, 27).

Мӕрдтӕ кӕд ӕгас кӕндзысты? Библийы фыст ис, уӕлӕрвты чи уыдзӕн, уыдон ӕгас кӕнын кӕй райдайдзысты Чырыстийы ӕрцыды рӕстӕг (1 Коринфӕгтӕм 15:21–23). Уыцы рӕстӕг райдыдта 1914 азы. Зӕххыл чи цӕрдзӕн, уыдон та ӕгас кӕнын райдайдзысты, Йесо Чырысти зӕххӕн мин азы дӕргъы Паддзах куы уа ӕмӕ зӕхх дзӕнӕт куы суа, уӕд (Лукайы 23:43; Раргомад 20:6, 12, 13).

Мӕрдтӕ кӕй райгас уыдзысты, ууыл ӕууӕндӕн цӕмӕн ис? Библийы фараст адӕймаджы тыххӕй ис фыст, кӕй райгас сты. Ӕмӕ-иу куыд райгас сты, уый-иу иннӕтӕ федтой (1 Паддзӕхты 17:17–24; 2 Паддзӕхты 4:32–37; 13:20, 21; Лукайы 7:11–17; 8:40–56; Иоанны 11:38–44; Хъуыддӕгтӕ 9:36–42; 20:7–12; 1 Коринфӕгтӕм 15:3–6). Зӕгъӕм, Лазӕр куы амард, уӕд ӕй Йесо цыппар боны фӕстӕ райгас кодта. Ӕмӕ уый бирӕтӕ федтой (Иоанны 11:39, 42). Суанг Йесойы ныхмӕ чи цыд, уыдонӕн дӕр сӕ бон афтӕ зӕгъын нӕ уыд, зӕгъгӕ йӕ нӕ райгас кодта. Ӕмӕ уый тыххӕй сфӕнд кодтой Йесойы дӕр ӕмӕ Лазӕры дӕр амарын (Иоанны 11:47, 53; 12:9–11).

Библийы кӕй тыххӕй фыст ис, ахӕм ӕртӕ адӕймаджы райгас сты: идӕдз сылгоймаджы лӕппу, иу чырыстон сылгоймаг ӕмӕ Йесойы ӕмбал Лазӕр

Библийӕ бӕрӕг у, Хуыцаумӕ мӕрдты райгас кӕныны хъару кӕй ис ӕмӕ йӕ уый фӕндгӕ дӕр кӕй кӕны. Чи амард, уыдоны тыххӕй Хуыцау алцыдӕр хъуыды кӕны ӕмӕ сӕ йе стыр хъомысы фӕрцы райгас кӕндзӕн (Иов 37:23; Матфейы 10:30; Лукайы 20:37, 38). Хуыцауӕн йӕ бон у мӕрдты фӕстӕмӕ цардмӕ раздахын ӕмӕ йӕ уый тынг фӕнды! Ӕмӕ уый бӕрӕг у, Библийы Хуыцауы тыххӕй цы фыст ис, уымӕй: «Дӕ къухтӕ кӕуыл фӕфыдӕбон кодтой, уый фенынмӕ бӕлдзынӕ» (Иов 14:15).

Рӕдыд хъуыдытӕ райгасдзинады тыххӕй

Рӕдыд хъуыды. Райгасдзинад у, уд ӕмӕ буар ногӕй куы баиу вӕййынц, уый.

Хабар ӕцӕгӕй куыд у. Библимӕ гӕсгӕ, уд у адӕймаг йӕхӕдӕг. Ӕмӕ адӕймаг куы амӕлы, уӕд дзы цӕргӕйӕ ницыуал баззайы (Райдиан 2:7, фиппаинаг; Йезекил 18:4). Цӕмӕй мард райгас уа, уый тыххӕй йӕ хъуамӕ Хуыцау ногӕй сфӕлдиса.

Рӕдыд хъуыды. Иуӕй-иутӕ райгас уыдзысты ӕмӕ уайтагъд фӕстӕмӕ амӕлдзысты.

Хабар ӕцӕгӕй куыд у. Библийы фыст ис, зӕгъгӕ, «фыдхъуыддӕгтӕ чи кодта, уыдон» райгас уыдзысты «тӕрхон баййафынӕн» (Иоанны 5:29). Фӕлӕ тӕрхонгонд цӕудзысты, сӕ мӕлӕты размӕ цы арӕзтой, уымӕ гӕсгӕ нӕ, фӕлӕ, куы райгас уой, уӕд цы араздзысты, уымӕ гӕсгӕ. Йесо загъта: «Мӕрдтӕ фехъусдзысты Хуыцауы Фырты хъӕлӕс, ӕмӕ, чи байхъуса, уыдон цӕрдзысты» (Иоанны 5:25). Куы райгас уой, уӕд сын цы амондзысты, уымӕ чи байхъуса, уыдонӕн сӕ нӕмттӕ фыст ӕрцӕудзысты «царды тыхтоны» (Раргомад 20:12, 13).

Рӕдыд хъуыды. Адӕймаг райгас вӕййы, йӕ мӕлӕты размӕ йын чи уыд, уыцы буары.

Хабар ӕцӕгӕй куыд у. Мӕлӕты фӕстӕ адӕймаджы буар арӕхдӕр бамбийы ӕмӕ дзы ницыуал баззайы (Екклесиаст 3:19, 20).