Йегъовӕйы Ӕвдисӕнтӕ хицӕн кӕнынмӕ цы цӕстӕй кӕсынц?
Мах цӕрӕм, Библи бинонты царды ӕмӕ хицӕн кӕныны тыххӕй цы дзуры, уымӕ гӕсгӕ. Бинонты цардӕн бындур Хуыцау ӕрӕвӕрдта, ӕмӕ йӕ фӕндмӕ гӕсгӕ лӕг ӕмӕ ус хъуамӕ цӕрӕнбонтӕм уой иумӕ. Лӕг ӕмӕ усӕн хицӕн кӕныны бар ис, иу дзы иннӕйыл гадзрахатӕй куы рацӕуа, ӕрмӕстдӕр уӕд (Матфейы 19:5, 6, 9).
Лӕг ӕмӕ ус кӕрӕдзи куы нал фембарынц, уӕд сын Йегъовӕйы Ӕвдисӕнтӕ истӕмӕй феххуыс кӕнынц?
О, цалдӕр хъуыддаджы фӕрцы.
Публикацитӕ. Цӕмӕй лӕг ӕмӕ ус кӕрӕдзи хуыздӕр ӕмбарой, уый тыххӕй цы саразӕн ис, уый фӕдыл нӕ публикациты арӕх вӕййы статьятӕ. Уыдон стыр ӕххуыс фӕвӕййынц, ахицӕнӕввонг чи вӕййы, суанг ахӕм бинонтӕн дӕр. Зӕгъӕм, дӕ бон у фенын статьятӕ «Кӕрӕдзийыл ӕнувыд ут» ӕмӕ «Дӕ цардӕмбал дыл нал ӕууӕнды. Цы ис бакӕнӕн?».
Ӕмбырдтӕ. Библийы бинонтӕн цы уынаффӕтӕ ис, уыдоныл фӕныхас кӕнӕм ӕмбырдты ӕмӕ конгрессты.
Хистӕр нӕлгоймӕгтӕ. Ӕмбырды хистӕр нӕлгоймӕгтӕ бинонтимӕ фӕныхас кӕнынц ӕмӕ сын сӕ хъус ӕрдарынц Библийӕ кӕцыдӕр стихтӕм, зӕгъӕм, Ефесӕгтӕм 5:22–25.
Йегъовӕйы Ӕвдисӕн йӕ цардӕмбалӕй хицӕн кӕнынмӕ куы хъава, уӕд ын уымӕн бар хъуамӕ ӕмбырды хистӕр нӕлгоймӕгтӕ раттой?
Нӕ. Лӕг ӕмӕ ус хистӕр нӕлгоймӕгтӕй ӕххуыс сӕхӕдӕг куы ракурой, уӕддӕр хистӕр нӕлгоймӕгтӕн уый бар нӕй, цӕмӕй сын дзурой, куыд бакӕной, уый (Галатӕгтӕм 6:5). Фӕлӕ адӕймагӕн Библимӕ гӕсгӕ йӕ цардӕмбалӕй хицӕн кӕныны бар куы нӕ уа, афтӕмӕй дзы куы ахицӕн уа, уӕд ын уый бар нӕ уыдзӕн, цӕмӕй ногӕй йӕ цард искӕимӕ баиу кӕна (1 Тимофеймӕ 3:1, 5, 12).
Лӕг ӕмӕ ус хицӕнтӕй цӕрой, уымӕ Йегъовӕйы Ӕвдисӕнтӕ цы цӕстӕй кӕсынц?
Библи зӕгъы, цӕмӕй лӕг ӕмӕ ус цыфӕнды зын уавӕрты дӕр иумӕ уой (1 Коринфӕгтӕм 7:10–16). Бинонтӕн сӕ бон уыдзӕн бирӕ зындзинӕдты сӕрты ахизын, Хуыцаумӕ зӕрдӕбынӕй куы кувой, Библийы уагӕвӕрдтӕм гӕсгӕ куы архайой ӕмӕ, кӕрӕдзи кӕй уарзынц, уый хъуыддагӕй куы ’вдисой, уӕд (1 Коринфӕгтӕм 13:4–8; Галатӕгтӕм 5:22).
Фӕлӕ иуӕй-иу уавӕрты чырыстонӕн ӕндӕр гӕнӕн нал вӕййы, ӕмӕ аскъуыддзаг кӕны, йӕ цардӕмбалӕй кӕй ацӕудзӕн ӕмӕ хицӕнтӕй кӕй цӕрдзысты, зӕгъӕм, дӕлдӕр кӕй кой цӕуы, уыцы уавӕрты.
Лӕджы йӕ бинонты дарын куы нӕ фӕнда (1 Тимофеймӕ 5:8).
Чырыстоны йӕ цардӕмбал фыднад куы кӕна (Псалом 11:5).
Йӕ цардӕмбал ӕй Хуыцауӕн лӕггад кӕнын куы нӕ уадза. Библийы фыст ис: «Хуыцау у нӕ хицау, ӕмӕ фыццаджыдӕр хъуамӕ уымӕ хъусӕм, адӕммӕ нӕ, фӕлӕ» (Хъуыддӕгтӕ 5:29). Уымӕ гӕсгӕ, Йегъовӕйы Ӕвдисӕнӕн йӕ цардӕмбал Хуыцауы закъӕттӕ куы халын кӕна, уӕд уыцы Ӕвдисӕн, чи зоны, аскъуыддзаг кӕна, хицӕнӕй кӕй цӕрдзӕн, кӕннод йӕ бон нӕ уыдзӕн Хуыцаумӕ хъусын.