Йесо Чырысти цыхуызӕн уыд?
Дзуапп Библийӕ
Йесо Чырысти цыхуызӕн уыд, уый бӕлвырд зӕгъын никӕй бон у, уымӕн ӕмӕ Библийы уый тыххӕй ницы ис фыст. Уымӕй бӕрӕг у, цыхуызӕн уыд, уый зонын ӕнӕмӕнг кӕй нӕу. Фӕлӕ уӕддӕр Библи кӕсгӕйӕ бамбарӕн ис, Чырысти цыхуызӕн уыдаид, уый.
Йӕ бакаст. Чырыстийӕн йӕ мад уыд дзуттаг, ӕмӕ уымӕ гӕсгӕ, ӕвӕццӕгӕн, уыд дзуттӕгты хуызӕн (Дзуттӕгтӕм 7:14). Афтӕ зӕгъӕн нӕй, ӕмӕ бакастӕй иннӕтӕй тынг хицӕн кодта. Иухатт Галилейӕйӕ Иерусалиммӕ фӕцыд, ӕмӕ йӕ зонгӕ дӕр ничи бакодта (Иоанны 7:10, 11). Стӕй, ӕдзухдӕр йемӕ чи уыд, уыцы ахуыргӕнинӕгтӕй дӕр ницӕмӕй хицӕн кодтаид. Зӕгъӕм, адӕм хӕцӕнгӕрзтимӕ Чырыстийы ӕрцахсынмӕ куы ӕрбацыдысты, уӕд сын Иудӕ Искариот бацамыдта, Чырысти кӕцы у, уый (Матфейы 26:47–49).
Йӕ сӕрыхъуынтӕ. Чырыстийӕн йӕ сӕрыхъуынтӕ даргъ нӕ уыдаиккой, уымӕн ӕмӕ Библийы фыст ис, «нӕлгоймагыл даргъ сӕрыхъуынтӕ куы уа, уӕд ын уый худинаг кӕй у» (1 Коринфӕгтӕм 11:14).
Йӕ боцъотӕ. Дзуттӕгты Закъонмӕ гӕсгӕ нӕлгоймӕгтӕ хъуамӕ сӕ «боцъоты кӕрӕттӕ ма фыдынд кодтаиккой». Ӕмӕ Чырысти уыцы закъон кӕй ӕххӕст кодта, уымӕ гӕсгӕ боцъотӕ дӕр дардтаид (Левит 19:27; Галатӕгтӕм 4:4). Стӕй ма, Чырысти цы хъизӕмӕрттӕ бавзардзӕн, уый тыххӕй Библийы цы пехуымпарад ӕрцыд фыст, уымӕй дӕр бӕрӕг у, боцъотӕ кӕй дардта (Исай 50:6).
Йӕ буар. Фидарӕй зӕгъӕн ис, Чырысти фидӕрттӕ арӕзт кӕй уыд. Зӕгъӕм, фистӕгӕй бирӕ цыд, цӕмӕй-иу адӕмӕн Хуыцауы тыххӕй дзырдтаид (Матфейы 9:35). Дыууӕ хатты дзуттӕгты кувӕндон ссыгъдӕг кодта: ӕхцаивджытӕн-иу се стъӕлттӕ афӕлдӕхта, иухатт та бӕндӕнтӕй ехс скодта ӕмӕ дзы цы фос уыд, уыдон ратардта (Лукайы 19:45, 46; Иоанны 2:14, 15). Иу энциклопедийы фыст ис: «Евангелиты фыст хабӕрттӕй бӕрӕг у, [Йесо Чырысти] хъаруджын ӕмӕ ӕнӕниз адӕймаг кӕй уыд» («McClintock and Strong’s Cyclopedia», 4 том, 884 фарс).
Йӕ цӕсгом. Чырысти уыд хӕларзӕрдӕ ӕмӕ тӕригъӕдгӕнаг адӕймаг, ӕмӕ уый, ӕвӕццӕгӕн, йӕ цӕсгомӕй дӕр бӕрӕг уыд (Матфейы 11:28, 29). Алыхуызон адӕм ӕм цыдысты, цӕмӕй-иу сӕ ныфс бауагътаид ӕмӕ-иу сын баххуыс кодтаид (Лукайы 5:12, 13; 7:37, 38). Суанг ма йӕ сывӕллӕттӕ дӕр уарзтой (Матфейы 19:13–15; Марчы 9:35–37).
Чырысти цыхуызӕн уыд, уый фӕдыл адӕм цавӕр рӕдыд хъуыдытыл хӕст сты
Рӕдыд хъуыды. Чидӕртӕ фӕзӕгъынц, Чырыстийӕн йӕ рагфыдӕлтӕ Африкӕйӕ рацӕугӕ кӕй уыдысты, уымӕн ӕмӕ Раргомады чиныджы йӕ сӕрыхъуынтӕ барст цӕуынц къуымбилимӕ, йӕ къӕхтӕ та – «сыгъдӕг ӕрхуыимӕ» (Раргомад 1:14, 15).
Ӕцӕгӕй та куыд у. Раргомады чиныджы фыст хабӕрттӕ иууылдӕр комкоммӕ ӕмбаргӕ не сты. Уыдон, цӕмӕдӕр чи амыдта, ахӕм «нысӕнттӕ» сты (Раргомад 1:1). Чырыстийӕн йӕ сӕрыхъуынтӕ ӕмӕ йӕ къӕхты тыххӕй цы фыст ис, уый, зӕххыл цӕргӕйӕ цыхуызӕн уыд, уымӕ нӕ амыдта, фӕлӕ йӕм йӕ райгасы фӕстӕ цы миниуджытӕ уыд, уыдонмӕ. Раргомады 1:14 стихы фыст ис, зӕгъгӕ, «йӕ сӕр ӕмӕ йӕ сӕрыхъуынтӕ... уыдысты урс къуымбилы хуызӕн, митау урс-урсид», фӕлӕ ам ӕргом здӕхт цӕуы йӕ сӕрыхъуынты хъӕдмӕ, сӕ хуызмӕ нӕ, фӕлӕ. Йӕ сӕрыхъуынтӕ урс кӕй сты, уый амоны, йӕ кармӕ гӕсгӕ йӕм цы зонд ис, уымӕ (Раргомад 3:14).
Чырыстийы «къӕхтӕ уыдысты, пецы чи сзынг, ахӕм сыгъдӕг ӕрхуыйы хуызӕн» (Раргомад 1:15). Йӕ цӕсгом та «ирд хурау тӕмӕнтӕ калдта» (Раргомад 1:16). Иу адӕмыхаттӕн дӕр ахӕм буары хуыз нӕй, ӕмӕ уымӕ гӕсгӕ ацы ныхӕстӕ комкоммӕ ӕмбаргӕ не сты. Уыдон амонынц, Йесо йӕ райгасы фӕстӕ кӕй «цӕры, бацӕуӕн кӕдӕм нӕй, ахӕм рухсы» (1 Тимофеймӕ 6:16).
Рӕдыд хъуыды. Йесо уыд лӕмӕгъ ӕмӕ ӕнӕбон.
Ӕцӕгӕй та куыд у. Йесо уыд хъӕбатыр адӕймаг. Зӕгъӕм ӕм адӕм хӕцӕнгарзимӕ ахсынмӕ куы ӕрбацыдысты, уӕд нӕ фӕтарст ӕмӕ сӕ размӕ рацыд (Иоанны 18:4–8). Стӕй тыхджын дӕр куыннӕ уыдаид, кӕд ӕмӕ хъӕддӕсныйы куыст кодта (Марчы 6:3).
Фӕлӕ цымӕ уӕд Чырыстийӕн йӕ хъизӕмӕртты хъӕд хӕссынӕн ӕххуыс кӕнын цӕмӕн бахъуыд? Ӕмӕ йӕ фарсмӕ кӕй байтыгътой, уыдонӕй раздӕр цӕмӕн амард? (Лукайы 23:26; Иоанны 19:31–33). Уымӕн ӕмӕ уый размӕ тынг ӕрлӕмӕгъ – ӕнӕхъӕн ӕхсӕв ӕгъуыссӕг фӕци, стӕй тынг хъуырдухӕн кодта (Лукайы 22:42–44). Дзуттӕгтӕ йӕ ӕнӕхъӕн ӕхсӕв тухӕнӕй мардтой, стӕй йын райсомӕй ромӕгтӕ хъизӕмӕрттӕ бавзарын кодтой (Матфейы 26:67, 68; Иоанны 19:1–3). Ӕмӕ афтӕ тагъд, ӕвӕццӕгӕн, уый тыххӕй амард.
Рӕдыд хъуыды. Йесо Чырысти алкӕддӕр уыд ӕнкъард, ӕрхӕндӕг.
Ӕцӕгӕй та куыд у. Чырыстимӕ уыд, йӕ уӕларвон Фыд Йегъовӕмӕ цы миниуджытӕ уыд, уыдон. Ӕмӕ Йегъовӕйы та Библи хоны «амондджын Хуыцау» (1 Тимофеймӕ 1:11; Иоанны 14:9). Йесо адӕмӕн амыдта, амондджын цӕй фӕрцы уыдзысты, уый (Матфейы 5:3–9; Лукайы 11:28). Уӕдӕ Йесойӕн йӕ цӕсгомӕй дӕр бӕрӕг уыдаид, хъӕлдзӕгзӕрдӕ адӕймаг кӕй уыд.