ФӔСИВӔДЫ ФАРСТАТӔ
Кувын цӕмӕн хъӕуы?
Иртасджытӕ куыд сбӕрӕг кодтой, афтӕмӕй Америкӕйы ӕрыгӕттӕй 80 проценты Хуыцаумӕ фӕкувынц. Фӕлӕ ӕрмӕстдӕр се ’мбис фӕкувы алы бон дӕр. Уыдонӕй иуӕй-иутӕ, чи зоны, фӕхъуыды кӕнынц: «Адӕймаг уый тыххӕй хъуамӕ кува, цӕмӕй йын фенцондӕр уа ӕви ӕндӕр цӕйдӕр тыххӕй?»
Цы у куывд?
Адӕймаг куы фӕкувы, уӕд фӕныхас кӕны, Дун-дуне чи сфӕлдыста, уыимӕ. Ӕрмӕстдӕр ма ахъуыды кӕн: Йегъовӕ Хуыцау адӕймагӕй бирӕ уӕлдӕр у, фӕлӕ уӕддӕр «махӕй алкӕмӕй дӕр дард нӕу» (Хъуыддӕгтӕ 17:27). Библийы фыст ис ахӕм диссаджы ныхӕстӕ: «Баввахс ут Хуыцаумӕ, ӕмӕ уӕм уый дӕр ӕрбаввахс уыдзӕн» (Иаковы 4:8).
Цы дын баххуыс кӕндзӕн, цӕмӕй Хуыцаумӕ баввахс уай?
Фыццаг, дӕ бон ӕм у кувын – афтӕмӕй Хуыцауимӕ ныхас кӕндзынӕ.
Дыккаг, дӕ бон у Библи ахуыр кӕнын – афтӕмӕй та Хуыцау демӕ ныхас кӕндзӕн.
Куы кувай ӕмӕ Библи куы ахуыр кӕнай, уӕд дын уый баххуыс кӕндзӕн, цӕмӕй Хуыцауы ӕввахс хӕлар суай.
«Йегъовӕимӕ, Иунӕг Стыр Хуыцауимӕ, ныхас кӕнай, уымӕй стырдӕр кад нӕй адӕймагӕн» (Джереми).
«Мӕ зӕрдӕйы цы ис, уыдӕттӕ Йегъовӕйӕн куы радзурын, уӕд ӕм тынгдӕр баввахс вӕййын» (Мирандӕ).
Хуыцау куывдтытӕ хъусы?
Кӕд Хуыцауыл ӕууӕндыс ӕмӕ йӕм кувгӕ дӕр фӕкӕныс, уӕддӕр дӕ, чи зоны, нӕ уырны, кӕй дӕ хъусы, уый. Фӕлӕ Библийы Йегъовӕйы тыххӕй фыст ис, зӕгъгӕ, уый у, «куывдтытӕ чи хъусы, уыцы Хуыцау» (Псалом 65:2). Стӕй ма дзы афтӕ фыст дӕр ис, зӕгъгӕ, «уе ’ппӕт сагъӕстӕ дӕр Хуыцауы бар бакӕнут». Цымӕ цӕмӕн? «Уымӕн ӕмӕ уый тыхсы сымахыл» (1 Петры 5:7).
Цӕуыл хъӕуы ахъуыды кӕнын. Дӕ хорз ӕмбӕлттимӕ ӕдзух нӕ фӕныхас кӕныс? Хуыцауимӕ дӕр дӕ бон у ӕдзух ныхас кӕнын. Хуыцаумӕ кувынӕн-иу алы бон дӕр рӕстӕг ссар ӕмӕ-иу ӕм йӕ номӕй кув, Йегъовӕ, зӕгъгӕ (Псалом 86:5–7; 88:9). Библийы фыст ис: «Ӕппынӕдзух кувут» (1 Фессалоникӕгтӕм 5:17).
«Куы фӕкувын, уӕд мӕ уӕларвон Фыдимӕ фӕныхас кӕнын. Ӕмӕ, мӕ зӕрдӕйы цыдӕриддӕр ис, уый йын раргом кӕнын» (Мойзес).
«Йегъовӕйӕ ницы басусӕг кӕнын, алцыдӕр ын радзурын, мӕ мадӕн кӕнӕ мӕ хорз ӕмбалӕн куыд радзурын, афтӕ» (Карен).
Мӕ бон цӕй тыххӕй у кувын?
Библийы фыст ис: «Алы уавӕры дӕр Хуыцаумӕ кувут, лӕгъстӕ йын кӕнут, бузныг ын дзурут ӕмӕ дзы афтӕмӕй курут, цы уӕ хъӕуы, уый» (Филиппӕгтӕм 4:6).
Цымӕ уый ууыл дзурӕг у, ӕмӕ йын дӕ бон у, цы дӕ тыхсын кӕны, уыдӕттӕ дзурын? О. Библийы дӕр афтӕ фыст ис: «Дӕ уаргъ Йегъовӕйыл сӕвӕр, ӕмӕ дын уый баххуыс кӕндзӕн» (Псалом 55:22).
Кӕй зӕгъын ӕй хъӕуы, Хуыцаумӕ куы кувай, уӕд ын ӕрмӕст дӕ зындзинӕдты тыххӕй хъуамӕ ма дзурай. Иу ӕрыгон сылгоймаг, Шантель, зӕгъгӕ, загъта: «Йегъовӕйӕ ӕрмӕст ӕххуыс куы курай, уӕд афтӕ зӕгъӕн нӕ уыдзӕн, ӕмӕ дӕ хорз хӕлар у. Мӕнмӕ гӕсгӕ йын фыццаг фӕхъӕуы бузныг зӕгъын. Бузныг дзы цӕй тыххӕй хъуамӕ уон, уыцы хъуыддӕгтӕ та бирӕ сты».
Цӕуыл хъӕуы ахъуыды кӕнын. Ды Хуыцауӕй бузныг цӕй тыххӕй дӕ? Дӕ бон у зӕгъын, абон Йегъовӕйӕ цавӕр ӕртӕ хъуыддаджы тыххӕй дӕ бузныг, уый?
«Йегъовӕйӕн бузныг дзурӕн ис хуымӕтӕг хъуыддӕгты тыххӕй дӕр. Зӕгъӕм, адӕймаг рӕсугъд дидинӕг куы фены, уӕд ӕй бафӕнды Хуыцауӕн бузныг зӕгъын» (Анитӕ).
«Ахъуыды кӕн, Йегъовӕ цы сфӕлдыста, уыдонӕй дӕ дисы тынгдӕр цы ’фтауы кӕнӕ Библийы дӕ зӕрдӕмӕ цы стих фӕцыд, ууыл ӕмӕ йын стӕй бузныг зӕгъ» (Брайан).