КӔЦЫДӔР бӕстӕты адӕм ныхасгӕнгӕйӕ сӕ къухтӕ, сӕ уӕнгтӕ тынгдӕр фезмӕлын кӕнынц, иннӕты та — къаддӕр. Фӕлӕ дзургӕ-дзурын йӕ цӕсгомы нуӕрттӕ кӕнӕ йӕ къухтӕ ӕппын чи не змӕлын кӕны, ахӕм адӕймаг уӕвгӕ дӕр нӕй — фӕнды ӕнӕуи искӕимӕ ныхас кӕнӕд, фӕнды сценӕйӕ дзурӕд.

Йесо ӕмӕ-иу йӕ ахуыргӕнинӕгтӕ дӕр дзургӕ-дзурын къухтӕй цыдӕртӕ арӕх амыдтой. Иухатт Йесойӕн фӕхабар чындӕуыд, дӕ мад ӕмӕ де ’фсымӕрты демӕ аныхас кӕнын фӕнды, зӕгъгӕ. Ууыл Йесо загъта: «Чи у Мӕ мад, ӕмӕ чи сты Мӕ ӕфсымӕртӕ?» Дарддӕр Библийы кӕсӕм: «Бацамонгӕйӕ Йӕ къухӕй Йӕ ахуыргӕнинӕгтӕм, загъта: мӕнӕ Мӕ мад ӕмӕ Мӕ ӕфсымӕртӕ» (Матф. 12:48, 49). Библи нын куыд ӕвдисы, афтӕмӕй-иу апостолтӕ Петр ӕмӕ Павел дӕр дзургӕ-дзурын арӕх амыдтой къухӕй. Уымӕн цӕвиттонтӕ бакӕсӕн ис, зӕгъӕм, Куыстыты 12:17 ӕмӕ 13:16.

Хъуыдытӕ ӕмӕ ӕнкъарӕнтӕ айдагъ ныхӕстӕй нӕй радӕттӕн, фӕлӕ ма уӕнгтӕ ӕмӕ цӕсгомы змӕлдӕй дӕр. Ӕнӕ уыдонӕй дӕ ныхасмӕхъусджытӕм афтӕ кӕсдзӕн, цыма дӕ уыдон дӕр не ’ндавынц ӕмӕ, цы дзурыс, уый дӕр. Адӕймагӕн йӕ цӕсгом, йӕ къухтӕ ӕмӕ йе уӕнгты алы фезмӕлд дӕр цӕуылдӕр дзурӕг вӕййы, ӕмӕ уыцы фӕрӕзтӕй арӕхстджынӕй куы пайда кӕнай, уӕд дӕ ныхас уыдзӕн хъӕздыгдӕр ӕмӕ фӕлгонцджындӕр. Суанг ма телефонӕй ныхасгӕнгӕйӕ дӕр дӕ цӕсгом ӕмӕ де уӕнгтӕ куы змӕлой, уӕд дӕ хъӕлӕсӕй тынгдӕр бӕрӕг уыдзӕн, цы дзурыс, уый куыд ахсджиаг у ӕмӕ дын дӕхи зӕрдӕ дӕр куыд агайы, уый. Иугӕр афтӕ у, уӕд,— ныхасы рацӕуай ӕви иннӕтӕн кӕсай, дӕ ныхасмӕхъусджытӕ дӕумӕ кӕсой ӕви сӕ Библитӕм,— уӕнгтӕ ӕмӕ цӕсгомы змӕлдӕй бирӕ аразгӕ у.

Дӕ къухтӕ ӕмӕ дӕ цӕсгомы змӕлд, кӕмдӕр чиныджы куыд бакастӕ, афтӕ хъуамӕ ма уой. Цӕвиттон, худын кӕнӕ дӕ мӕсты кӕныныл ахуыр кӕнын хъуыди? Уӕдӕ де уӕнгты змӕлд дӕр, дӕ зӕрдӕйы цы ис, уый хъуамӕ ӕвдиса. Де уӕнгтӕ ӕмӕ дӕ къухты змӕлд йӕхигъӕдӕй куы уайа, уый уыдзӕн иууыл хуыздӕр.

Къухты змӕлд, къухамындтӕ дих кӕнынц дыууӕ сӕйраг къордыл: иутӕ — амонӕн къухамындтӕ, иннӕтӕ — хъуыды фӕтыхджындӕр кӕнынӕн. Амонӕн къухамындтӕ ӕвдисынц архайд, кӕнӕ фӕамонынц ас, дӕрддзӕг ӕмӕ бынат. Ацы урокыл кусгӕйӕ хорз уаид, къухтӕй иу-дыууӕ нӕ, фӕлӕ бирӕ алыхуызон амындтӕ куы бафӕлварис равдисын. Дӕ ныхасӕн йӕ райдианӕй йӕ кӕронмӕ бацархай, цӕмӕй дӕ къухты змӕлд йӕхигъӕдӕй уайа. Кӕд уый дӕ къухы зынтӕй ӕфты, уӕд дзы ссар, бынат, дӕрддзӕг, ас ӕмӕ уавӕр амонӕг дзырдтӕ, ӕмӕ дын уӕд ӕнцондӕр уыдзӕн. Йӕ хуыздӕр хос та уый у, ӕмӕ дӕ цы ахъуыды кӕндзысты, ууыл ма тыхс, аразгӕ ныхас, аразгӕ змӕлд ма кӕн, фӕлӕ ӕрмӕстдӕр дӕ раныхасыл хъуыды кӕн. Адӕймаг куы нӕ фӕтыхсы, уӕд къухтӕ сӕхӕдӕг дӕр «дзурын» байдайынц.

Фӕтыхджындӕргӕнӕн къухамындтӕй адӕймаг ӕвдисы йе ’нкъарӕнтӕ ӕмӕ, цӕуыл дзуры, ууыл фидарӕй кӕй ӕууӕнды. Ахӕм къухамындты руаджы, цы дзуры, уый цӕстыты раз сысты, ӕмӕ йӕ ныхасы вӕййы стырдӕр уӕз, тынгдӕр фӕхъары зӕрдӕмӕ. Бӕгуыдӕр, хъуыды фӕтыхджындӕргӕнӕн къухамындтӕй бирӕ аразгӕ у, фӕлӕ ам дӕр ӕгӕр кӕнын нӕ хъӕуы. Адӕймаг, кӕм хъӕуа, ӕмӕ кӕм нӕ хъӕуа, уым уыцы иухуызон куы амона йӕ къухӕй, уӕд ын уый йӕ ныхас рӕсугъддӕр нӕ фӕкӕндзӕн, фӕлӕ ӕрмӕстдӕр адӕмы ӕргом ӕнӕхъуаджы йӕхимӕ здахдзӕн. Скъолайы цӕстдарӕг дын куы зӕгъа, ахӕм ӕвзӕр ахуыр дӕм ис, зӕгъгӕ, уӕд цасдӕр рӕстӕг пайда кӕн ӕрмӕстдӕр амонӕн къухамындтӕй. Фӕстӕдӕр та ногӕй райдайдзынӕ фӕтыхджындӕргӕнӕн къухамындтӕй пайда кӕнын.

Дӕ ныхасы хуыздӕр цавӕр фӕтыхджындӕргӕнӕн къухамындтӕ сфидаудзысты ӕмӕ цас, уый сбӕрӕг кӕнынӕн дӕ зӕрдыл дар: дӕ ныхасмӕхъусджытӕ сӕхи куыд хатдзысты, цы ахъуыды кӕндзысты. Аив нӕ уыдзӕн, къухӕй сӕм куы амонай. Иуӕй-иу адӕмтӕм нӕлгоймагыл алы къухамынд нӕ фидауы. Зӕгъӕм, фырдисӕй йӕ къух йӕ дзыхыл куы авӕра, уӕд ын уый худинагыл нымад уыдзӕн, уымӕн ӕмӕ афтӕ сылгоймӕгтӕ фӕкӕнынц. Кӕцыдӕр адӕмтӕм та аив нӕу, сылгоймаг ныхасгӕнгӕйӕ йӕ къухтӕ куы тила. Уымӕ гӕсгӕ ахӕм бӕстӕты хоты хъӕуы сӕ ныхас фылдӕр сӕ цӕсгомы змӕлдӕй тыхджындӕр кӕнын. Зӕгъӕн ма ис уый дӕр, ӕмӕ гыццыл къорд адӕмы раз къухтӕ дардыл тилын цыфӕнды бӕстӕйы дӕр худӕгӕй дарддӕр рӕсугъд никӕмӕ фӕкӕсдзӕн.

Цас фылдӕр кусай дӕхиуыл, уыйас тынгдӕр фӕлтӕрдзынӕ ӕмӕ ныхасгӕнгӕйӕ дӕхи сӕрибардӕр хатдзынӕ. Ӕмӕ уӕд дӕ къухамындтӕ бӕрӕг ӕвдисдзысты дӕ зӕрдӕйы арф ӕнкъарӕнтӕ, бӕлвырд кӕндзысты, зӕрдӕбынӕй, фидарӕй кӕй дзурыс. Ӕмӕ уый фӕрцы та дӕ ныхас уыдзӕн бирӕ хъӕздыгдӕр ӕмӕ аивдӕр.

Цӕсгомы змӕлд. Нӕ зӕрдӕйы цы ис, уый иууыл тынгдӕр бӕрӕг вӕййы нӕ цӕсгомӕй. Цӕстӕнгас, былты змӕлд, сӕр кӕцырдӕм къул у — уыдӕттӕ бирӕ цӕуылдӕрты дзурӕг сты. Адӕймаг, гӕнӕн ис, иу ныхас дӕр ма зӕгъа, фӕлӕ йӕ зӕрдӕйы цы ис, уый фыст уыдзӕн йӕ цӕсгомыл: ӕнӕмӕт, ӕнӕуынон ахаст, цин, дис кӕнӕ тыхст. Уӕдӕ цы дзурыс, уый дӕ цӕсгомыл дӕр куы уа фыст, уӕд ӕй адӕймаг ӕрмӕст хъусӕй нӕ хъусы, фӕлӕ ма йӕ уынгӕ дӕр кӕны ӕмӕ уӕд зӕрдӕмӕ тынгдӕр хъары. Хуыцау адӕймаджы афтӕ скодта, ӕмӕ йӕ цӕсгомыл ис тынг бирӕ нуӕрттӕ — дӕс ӕмӕ ссӕдзӕй фылдӕр. Ӕмӕ уыдонӕн се ’мбис сызмӕлынц айдагъ иу мидбылхудтӕй.

Уӕдӕ ныхасы рацӕуай ӕви уацамынды уай,— адӕмӕн хӕссыс ӕхсызгон хабар, цины хабар. Ӕмӕ афтӕ кӕй у, уый та бӕрӕг уыдзӕн дӕ фӕлмӕн мидбылхудтӕй. Ӕрхуымӕй куы кӕсай, ӕмӕ афтӕмӕй куы ныхас кӕнай семӕ, уӕд та дызӕрдыг кӕндзысты, цы дзурыс, уый ӕцӕг хорз хабар у ӕмӕ дӕхи уырны, ууыл.

Адӕймаг дын дӕ цӕсгомыл фӕлмӕн мидбылхудт куы фена, уӕд ын уый ууыл дзурӕг дӕр уыдзӕн, ӕмӕ йӕм хӕлары зӕрдӕ дарыс. Ӕмӕ уый та абоны хуызӕн никуы хъӕуы, уымӕн ӕмӕ арӕх адӕм ӕнӕзонгӕтӕй тӕрсгӕ фӕкӕнынц. Адӕймагмӕ дӕ мидбылты куы бахудай, уӕд тынг нал тыхсдзӕн, ӕмӕ йын цы зӕгъай, уымӕ дӕр хуыздӕр байхъусдзӕн.

ЦӔСТЫТӔ сты адӕймаджы зӕрдӕйы айдӕн. Цӕстыты фызыны дис ӕмӕ тас. Цӕстыты ферттивы уарзты зынг, цӕстӕнгасӕй бӕрӕг вӕййы, адӕймаджы зын кӕй ӕмбарыс, уый дӕр. Хатт цӕстыты фаст вӕййы зӕрдӕйы сагъӕс, дудгӕ маст ӕмӕ гуырысхойы фӕд. Иу ацӕргӕ лӕг йӕхи ӕмӕ йе ’мбӕстаг цардӕфхӕрд адӕмы тыххӕй афтӕ загъта: «Мах дзурӕм цӕстытӕй».

Адӕм нын нӕхицӕн дӕр ӕмӕ нӕ ныхӕстӕн дӕр куыд аргъ кӕндзысты, уый аразгӕ у, дзургӕ-дзурын кӕдӕм фӕкӕсӕм, уымӕй дӕр. Адӕм тынгдӕр баууӕндынц, йӕ цӕстӕнгас сӕ чи нӕ ӕмбӕхсы, фӕлӕ сӕм хӕлар цӕстӕй комкоммӕ чи фӕкӕсы, уыдоныл. Адӕймаг йӕ ныхасӕмбалмӕ нӕ, фӕлӕ зӕхмӕ куы кӕса кӕнӕ йӕ цӕстытӕ алырдӕмты куы радав-бадав кӕна, уӕд афтӕ фенхъӕлдзӕн, ӕмӕ йӕ сайгӕ кӕны йе та, цы хъуыддагыл дзуры, уымӕн ницы ӕмбары. Фӕлӕ алы адӕмӕ аив нӕу искӕмӕ ӕдзынӕг кӕсын. Уый афтӕ ӕмбарынц, ӕмӕ адӕймаг у ӕнӕфсарм, къӕйных, кӕнӕ хылмондаг. Нӕлгоймаг сылгоймагмӕ (йе та сылгоймаг нӕлгоймагмӕ) ӕдзынӕг куы кӕса, уӕд дзы зӕгъдзысты, ӕнӕфсарм кӕстытӕ кӕны, зӕгъгӕ. Бирӕ адӕмтӕм рӕсугъд нӕу, кӕстӕр хистӕрӕн комкоммӕ йӕ цӕстытӕм куы кӕса, уый дӕр.

Фӕлӕ адӕймагмӕ комкоммӕ кӕсын ӕвзӕрыл кӕм нӕ нымайынц, уым цӕстӕнгасӕй фӕтыхджындӕр кӕнӕн ис, цы ахсджиаг хабӕрттӕ дзурыс, уыдон. Стӕй, ныхасгӕнӕг адӕймагӕн йӕ цӕстытӕм кӕй кӕсы, уый ууыл дзурӕг у, ӕмӕ фидарӕй зоны, йӕ ныхӕстӕ раст кӕй сты. Дӕ хъус ма ӕрдар, Йесо йӕ ахуыргӕнинӕгтӕн дзуапп куыд радта, тыхстхуызӕй йӕ куы бафарстой: «Чи ма фервӕздзӕни уӕдӕ?» Библийы кӕсӕм: «Йесо бакасти уыдонмӕ, ӕмӕ сын загъта: адӕмӕн ай ӕнӕбафӕразон у, фӕлӕ Хуыцау ӕппӕт дӕр фӕразы» (Матф. 19:25, 26, НФ). Фыстад ма нын ӕвдисы, апостол Павел-иу, кӕимӕ ныхас кодта, уыцы адӕмыл йӕ цӕст кӕй ахаста, куыд мӕ ӕмбарынц, зӕгъгӕ. Иухатт Павелы ныхасмӕхъусджыты ’хсӕн уыди гуырдзӕй къуылых адӕймаг. Ӕмӕ Куыстыты 14:9, 10 кӕсӕм: «Уый хъуыста Павелы ныхасмӕ, кӕцы йӕм бакаст ӕмӕ федта, кӕй йӕм ис уырнындзинад, ӕнӕниздзинад райсынмӕ, [ӕмӕ йын] загъта хъӕрӕй: ...слӕуу дӕ къӕхтыл раст».

Уацамынды. Хъусын кӕнгӕйӕ цы адӕмимӕ фӕныхас кӕныс, уыдонмӕ дын уӕд хӕлары ахаст ӕмӕ сӕ дӕ зӕрдӕйы хъармӕй тав. Гӕнӕн уӕвгӕйӕ-иу дӕ ныхас райдай, уӕ дыууӕйы дӕр чи цымыдис кӕны ӕмӕ хъуыды кӕнынмӕ чи разӕнгард кӕны, ахӕм фарстӕй. Уыимӕ бацархай, цӕмӕй кӕрӕдзимӕ кӕсат (кӕд уый гӕнӕн нӕй, уӕд ӕм дӕхӕдӕг уӕддӕр кӕс уӕздан ӕмӕ зӕрдӕхӕларӕй). Дӕ цӕстыты цины цӕхӕр куы судза ӕмӕ дӕ мидбылты фӕлмӕн куы худай, уӕд уый адӕймагӕн тынг ӕхсызгон уыдзӕн, дӕу тыххӕй йын бирӕ цӕуылдӕрты дзурӕг уыдзӕн, ӕмӕ йын ӕнцондӕр уыдзӕн демӕ ныхас кӕнын.

Дӕ ныхасӕмбалӕн йӕ цӕстытӕм куы кӕсай, уӕд уайтагъд бамбардзынӕ, дарддӕр дӕ куыд бакӕнын хъӕуы, уый: кӕд, мыййаг, мӕсты у кӕнӕ йын цы дзурыс, уый йӕ не ’ндавы. Зӕгъгӕ дын дӕ ныхас не ’мбары кӕнӕ йӕ демӕ ныхас кӕнын нал фӕнды, уӕд уый дӕр бӕрӕг уыдзӕн йӕ цӕсгомыл. Цы йын дзурыс, уый йӕ ӕцӕг куы цымыдис кӕна, уӕд дын уый дӕр йӕ цӕстытӕ зӕгъдзысты. Йӕ цӕстӕнгасӕй бамбардзынӕ, сындӕгдӕр дӕ хъӕуы дзурын ӕви гыццыл рӕвдздӕр, кӕнӕ йын ахӕмӕй исты зӕгъын хъӕуы, ӕмӕ йӕ йӕ хъуыды зӕгъын бафӕнда, йе та дӕ ныхас балхынцъ кӕнын. Кӕнӕ та йын, чи зоны, Библи куыд ис ахуыр кӕнӕн, уый хъӕуы равдисын.

Уацамынды уай ӕви искӕимӕ Библи ахуыр кӕнай,— адӕймагмӕ комкоммӕ кӕс (бынӕттон ӕгъдау дӕ цас амоны, уыйас). Ӕрмӕст ӕм джихкаст ма кӕн, кӕннод фӕкъӕмдзӕстыг уыдзӕн (4 Пад. 8:11). Фӕлтау-иу ӕм арӕх бакӕс-бакӕс кӕн, дӕ хорз зонгӕимӕ куыд фӕныхас кӕныс, афтӕ. Бирӕ бӕстӕты адӕймаг ахӕм цӕстӕнгасӕй бамбары, йемӕ чи ныхас кӕны, уый йыл зӕрдӕйӕ кӕй у. Кӕй зӕгъын ӕй хъӕуы, Библийӕ кӕнӕ ӕндӕр искӕцӕй куы кӕсай, уӕд дӕ цӕстытӕ гӕххӕтмӕ арӕзт уыдзысты. Фӕлӕ дӕ цавӕрдӕр хъуыдымӕ адӕймаджы ӕргом раздахын куы фӕнда, уӕд-иу ӕм бакӕс. Рӕстӕгӕй-рӕстӕгмӕ афтӕ куы кӕнай, уӕд фендзынӕ, цы кӕсыс, уый йӕм хъары ӕви нӕ.

Кӕд ӕфсӕрмыгӕнаг дӕ, уӕд дын райдианты адӕймагмӕ комкоммӕ кӕсын ӕнцон нӕ уыдзӕн. Фӕлӕ дӕхиуыл куы кусай, уӕд сахуыр уыдзынӕ адӕймагӕн йӕ цӕстытӕм кӕсын, ӕмӕ дын бирӕ ӕнцондӕр уыдзӕн ныхас кӕнын.

Ныхасы рацӕугӕйӕ. Библийы куыд кӕсӕм, афтӕмӕй Йесо йӕ Уӕлхох уацамынд уымӕй райдыдта, ӕмӕ уал фыццаг «Йӕ ахуыргӕнинӕгтӕм бакасти» (Лук. 6:20, НФ). Афтӕ кӕн ды дӕр. Цалынмӕ дӕ