Иоанн адӕмӕн хъусын кодта: «Тагъд ӕрцӕудзӕн, мӕнӕй уӕлдӕр чи у, уый». Йесойыл 30 азы бӕрц куы цыд, уӕд Галилейӕйӕ ацыд Иорданы цӕугӕдонмӕ, Иоанн адӕмӕн донаргъуыд кӕм лӕвӕрдта, уырдӕм. Йесойы фӕндыд, цӕмӕй йын Иоанн донаргъуыд раттаид, фӕлӕ йын Иоанн загъта: «Ӕз дӕуӕн нӕ, фӕлӕ ды мӕнӕн хъуамӕ раттай донаргъуыд». Йесо Иоаннӕн загъта: «Йегъовӕйы фӕнды, цӕмӕй ды мӕнӕн раттай донаргъуыд». Уӕд сӕ дыууӕ дӕр Иорданы цӕугӕдонмӕ бацыдысты ӕмӕ Иоанн Йесойы ӕнӕхъӕнӕй дӕр доны бын фӕкодта.

Йесо донӕй куы рахызт, уӕд Хуыцаумӕ скуывта. Раст уыцы рӕстӕг арв фегом, ӕмӕ йыл Хуыцауы сыгъдӕг тых бӕлоны хуызы ӕрцыд. Уӕд Йегъовӕ уӕларвӕй ӕрдзырдта: «Ды дӕ мӕ уарзон Фырт, мӕ зӕрдӕйы фӕндиаг Фырт».

Йегъовӕйы сыгъдӕг тых Йесойыл куы ’рцыд, уӕд сси Чырысти (кӕнӕ Мессийӕ). Ӕмӕ ныр йӕ бон уыд, Йегъовӕ йӕ зӕхмӕ цы хъуыддаджы тыххӕй рарвыста, уый кӕнын.

Йесо донаргъуыд куы райста, уӕд ацыд ӕдзӕрӕг быдырмӕ ӕмӕ уым фӕци 40 боны. Уырдыгӕй куы ӕрыздӕхт, уӕд ацыд Иоанны бабӕрӕг кӕнынмӕ. Иоанн ӕй куы ауыдта, уӕд загъта: «Ай у Хуыцауы Уӕрыкк. Уый фӕрцы дунейӕн йӕ тӕригъӕдтӕ хатыргонд ӕрцӕудзысты». Уыцы ныхӕстӕй адӕмӕн бамбарын кодта, Йесо кӕй у Мессийӕ. Зоныс ӕй, Йесо ӕдзӕрӕг быдыры куы уыд, уӕд ыл цы ’рцыд? Цӕй ӕмӕ йӕ базонӕм.

Йесо донаргъуыд куы райста, уӕд ӕй сыгъдӕг тых акодта ӕдзӕрӕг быдырмӕ. Уым Йесо 40 боны дӕргъы ницы хордта, ӕмӕ тынг сӕххормаг. Уӕд ӕм Хӕйрӕг ӕрбацыд, цӕмӕй йӕ бафӕлвӕрдтаид, ӕмӕ йын загъта: «Кӕд ӕцӕгдӕр Хуыцауы Фырт дӕ, уӕд ацы дуртӕн зӕгъ, цӕмӕй дзултӕ фестой». Фӕлӕ йын Йесо Фыстадӕй дзуапп радта: «Фыст у, зӕгъгӕ, адӕймаг ӕрмӕст хӕринаджы фӕрцы нӕ цӕры, фӕлӕ, Йегъовӕйы алы ныхасмӕ кӕй хъусы, уый фӕрцы дӕр».

Стӕй та йын Хӕйрӕг загъта: «Кӕд ӕцӕгдӕр Хуыцауы Фырт дӕ, уӕд кувӕндоны ӕппӕты бӕрзонддӕр ранӕй дӕхи аппар, уымӕн ӕмӕ фыст у, зӕгъгӕ, Хуыцау йӕ зӕдты рарвитдзӕн, цӕмӕй дӕ ӕрцахсой ӕмӕ ма ахауай». Фӕлӕ та йын Йесо Фыстадӕй дзуапп радта: «Фыст у, зӕгъгӕ, ма фӕлвар дӕ Хуыцау Йегъовӕйы».

Уый фӕстӕ Хӕйрӕг Йесойӕн равдыста дунейы паддзахӕдтӕ иууылдӕр, сӕ хъӕздыгдзинӕдтӕ ӕмӕ сӕ кад ӕмӕ йын загъта: «Иу хатт дӕр мын куы бакувай, уӕд дын ӕз ацы паддзахӕдтӕ иууылдӕр ратдзынӕн». Фӕлӕ йын Йесо загъта: «Ацу ардыгӕй, Сайтан! Фыст у, зӕгъгӕ, ӕрмӕстдӕр дӕ Хуыцау Йегъовӕйӕн кув».

Стӕй Хӕйрӕг Йесойы ныууагъта, ӕмӕ йӕм уӕд зӕдтӕ фӕзындысты ӕмӕ йын хӕринаг радтой. Уый фӕстӕ Йесо райдыдта хъусын кӕнын Хуыцауы Паддзахады тыххӕй хорз хабар, уымӕн ӕмӕ йӕ Хуыцау зӕхмӕ уый тыххӕй рарвыста. Йесо адӕмӕн цы амыдта, уый сӕ зӕрдӕмӕ тынг цыд, ӕмӕ, кӕдӕмфӕнды ма цыдаид, уӕддӕр-иу йӕ фӕдыл цыдысты.

Нӕ эрӕйы 30 азы уалдзӕджы Йесо ацыд Иерусалиммӕ. Уыцы рӕстӕг уырдӕм Куадзӕн сбӕрӕг кӕнынмӕ бирӕ адӕм ӕрцыд. Адӕм кувӕндоны хастой фосы нывӕндтӕ. Чи йӕ хӕдзарӕй ӕртардта галтӕ ӕмӕ фыстӕ, чи та сӕ Иерусалимы балхӕдта.

Йесо кувӕндонмӕ куы бацыд, уӕд федта, чидӕртӕ дзы фос кӕй уӕй кӕнынц, уый. Йегъовӕйы хӕдзары – адӕм кӕм куывтой, уым – сӕхицӕн ӕхца куыстой! Йесо сӕм тынг смӕсты. Уый бӕндӕнтӕй ехс скодта ӕмӕ фысты ӕмӕ галты кувӕндонӕй ратардта. Ӕхцаивджытӕн та се стъӕлттӕ афӕлдӕхта ӕмӕ сын се ’хцатӕ зӕххыл ныппырх кодта. Бӕлӕттӕ чи уӕй кодта, уыдонӕн та загъта: «Адӕттӕ ардыгӕй ахӕссут! Мӕ Фыды хӕдзарӕй мын базаргӕнӕн мауал аразут!»

Кувӕндоны цы адӕм уыд, уыдонмӕ диссаг фӕкаст, Йесо цы сарӕзта, уый. Ӕмӕ йӕ ахуыргӕнинӕгтӕн сӕ зӕрдыл ӕрбалӕууыд, Мессийӕйы тыххӕй цы пехуымпарад загъд уыд, уый: «Йегъовӕйы хӕдзар мын тынг зынаргъ у».

Фӕстӕдӕр, нӕ эрӕйы 33 азы, Йесо кувӕндон дыккаг хатт ссыгъдӕг кодта. Йесо уый бар никӕмӕн лӕвӕрдта, цӕмӕй йын йӕ Фыды хӕдзарӕй исчи хынджылӕг кодтаид.

Куадзӕны бӕрӕгбонӕй цасдӕр рӕстӕг куы рацыд, уӕд Йесо ӕмӕ йӕ ахуыргӕнинӕгтӕ фӕстӕмӕ Галилейӕмӕ аздӕхтысты. Сӕ фӕндаг акодтой Самарийыл. Горӕт Сихармӕ куы бахӕццӕ сты, уӕд Йесо ӕрлӕууыд иу цъайы раз, хуыдтой йӕ Иаковы цъай. Ӕмӕ цалынмӕ уым йӕ фӕллад уагъта, уӕдмӕ йӕ ахуыргӕнинӕгтӕ та горӕтмӕ ацыдысты, цӕмӕй хӕринаг балхӕдтаиккой.

Уыцы рӕстӕг цъайы размӕ ӕрбацыд иу сылгоймаг, цӕмӕй дзы дон систаид. Йесо йын загъта: «Дон-ма мын авӕр». Сылгоймаг та йын афтӕ: «Ӕз самариаг дӕн. Дзуттӕгтӕ самариӕгтимӕ дзургӕ дӕр куы нӕ кӕнынц, уӕд мемӕ цӕмӕн дзурыс?» Йесо йын загъта: «Куы йӕ зонис, ӕз чи дӕн, уӕд мӕ дон дӕхӕдӕг ракурис, ӕмӕ дын ӕз раттин, цард чи дӕтты, ахӕм дон». Сылгоймаг ӕй бафарста: «Цы зӕгъынмӕ хъавыс, уый не ’мбарын. Дон цӕмӕй сисай, уый дӕр дӕм куы нӕй». Йесо йын загъта: «Ӕз цы дон дӕттын, уымӕй чи бануаза, уый никуыуал сдойны уыдзӕн». Уӕд ын сылгоймаг загъта: «Мӕ буц хицау, ратт-ма мын уыцы донӕй».

Ӕмӕ йын уӕд Йесо загъта: «Ацу ӕмӕ дӕ лӕджы ардӕм ӕрбакӕн». Сылгоймаг ын загъта: «Нӕй мын лӕг». Йесо та йын загъта: «Уымӕй раст зӕгъыс. Фондз лӕджы дын уыди, ӕмӕ дын ныр чи ис, уый дӕр дын лӕг нӕу». Сылгоймаг ын загъта: «Мӕнмӕ гӕсгӕ, ды пехуымпар дӕ. Нӕ адӕмы уырны, Хуыцауӕн нӕ бон ацы хохыл дӕр кӕй у кувын, фӕлӕ дзуттӕгтӕ та зӕгъынц, Хуыцауӕн ӕрмӕстдӕр Иерусалимы кӕй хъӕуы кувын. Фӕлӕ мӕн уырны, тагъд Мессийӕ кӕй ӕрцӕудзӕн ӕмӕ нын кӕй бацамондзӕн, Хуыцауӕн ӕцӕгдӕр куыд хъӕуы кувын, уый». Стӕй йын Йесо загъта: «Ӕз дӕн Мессийӕ». Уый размӕ Йесо ахӕм ныхӕстӕ никуы никӕмӕн загъта.

Уӕд сылгоймаг горӕтмӕ алыгъди ӕмӕ самариӕгтӕн загъта: «Мӕнмӕ гӕсгӕ, Мессийӕйы ссардтон. Уый мӕн тыххӕй алцыдӕр зоны. Цомут, фенут ӕй!» Адӕм дӕр йемӕ цъайы размӕ ацыдысты ӕмӕ Йесомӕ лӕмбынӕг байхъуыстой.

Самариӕгтӕ Йесойӕн загътой, цӕмӕй сӕ горӕты баззадаид. Гъемӕ сӕм уый дӕр дыууӕ бонмӕ баззад ӕмӕ сын бирӕ цыдӕртӕ бацамыдта. Уыцы адӕмӕй йыл бирӕтӕ баууӕндыдысты. Уыдон самариаг сылгоймагӕн загътой: «Ацы лӕгмӕ байхъуыстам, ӕмӕ йӕ ныр зонӕм, уый кӕй у дунейы ирвӕзынгӕнӕг».

Йесо донаргъуыд куы райста, уымӕй гыццыл фӕстӕдӕр хъусын кӕнын райдыдта: «Хуыцауы паддзахад ӕрхӕстӕг». Галилейӕйыл ӕмӕ Иудейӕйыл куы зылди, уӕд-иу йӕ ахуыргӕнинӕгтӕ дӕр йемӕ уыдысты. Кӕм схъомыл, уыцы горӕтмӕ, Назаретмӕ, куы ’рцыд, уӕд ӕмбырдгӕнӕнмӕ бацыд, Исайы тыхтон байгом кодта ӕмӕ хъӕрӕй кӕсын райдыдта: «Йегъовӕ мӕ йӕ сыгъдӕг тыхӕй схайджын кодта, цӕмӕй мӕ бон уа хорз хабар хъусын кӕнын». Уыцы ныхӕстӕ цӕуыл дзурӕг уыдысты? Кӕд адӕмы уый фӕндыд, цӕмӕй Йесо диссӕгтӕ арӕзтаид, уӕддӕр ӕй Хуыцау сыгъдӕг тыхӕй сӕйраджыдӕр уый тыххӕй схайджын кодта, цӕмӕй хорз хабар хъусын кодтаид. Стӕй Йесо, чи йӕм хъуыста, уыдонӕн загъта: «Абон ацы пехуымпар-ныхас сӕххӕст».

Уый фӕстӕ Йесо ацыд Галилейӕйы денджызмӕ ӕмӕ уым фембӕлд цыппар кӕсагахсӕгыл – Петр, Андрей, Иаков ӕмӕ Иоанныл. Фӕстӕдӕр уыдон систы йӕ ахуыргӕнинӕгтӕ. Йесо сын загъта: «Цомут мемӕ ӕмӕ уӕ ӕз скӕндзынӕн адӕмахсджытӕ». Ӕмӕ уыдон дӕр уайтагъд сӕ кӕсагахсыны куыст ныууагътой ӕмӕ йӕ фӕдыл ацыдысты. Уыдон ӕнӕхъӕн Галилейӕйыл ӕрзылдысты ӕмӕ Йегъовӕйы Паддзахады тыххӕй хъусын кодтой. Хъусын кодтой ӕмбырдгӕнӕнты, базарты ӕмӕ уынгты. Кӕдӕмфӕнды ма ацыдаиккой, уӕддӕр-иу сӕ фӕстӕ алы хатт дӕр цыди тынг бирӕ адӕм. Йесойӕн йӕ кой айхъуыст алы рӕтты, суанг Сирийы дӕр.

Рӕстӕг куы рацыд, уӕд Йесо йӕ фӕдылдзӕуджытӕй иуӕй-иутӕн ахӕм тых радта, цӕмӕй сӕ бон уыдаид адӕмы дзӕбӕх кӕнын ӕмӕ хӕйрӕджыты сурын. Иннӕтӕ та-иу йемӕ цыдысты, иу горӕтӕй-иу иннӕ горӕтмӕ хъусын кӕнынмӕ куы цыди, уӕд. Марийӕ Магдалинӕ, Иоаннӕ, Сусаннӕ ӕмӕ иннӕ иузӕрдион сылгоймӕгтӕ та Йесойӕн ӕмӕ йе ’мбӕлттӕн ӕххуыс кодтой.

Йесо йӕ ахуыргӕнинӕгты куы бацӕттӕ кодта, уӕд сӕ хъусын кӕнынмӕ арвыста. Уыдон Галилейӕйыл зылдысты, ӕмӕ бирӕтӕ Йесойы ахуыргӕнинӕгтӕ систы ӕмӕ донаргъуыд райстой. Йесойы фӕдыл цӕуын кӕй фӕндыд, уыдон афтӕ бирӕ уыдысты, ӕмӕ сӕ Йесо абарста, кӕрдынмӕ цӕттӕ чи у, ахӕм хуымтимӕ. Йесо загъта: «Кувут Йегъовӕмӕ, цӕмӕй хуыммӕ ноджы фылдӕр кусджытӕ рарвита». Фӕстӕдӕр йӕ ахуыргӕнинӕгтӕй равзӕрста 70 адӕймаджы ӕмӕ сӕ дыгӕйттӕй арвыста, цӕмӕй ӕнӕхъӕн Иудейӕйы хъусын кодтаиккой. Уыдон алкӕмӕн дӕр дзырдтой Хуыцауы Паддзахады тыххӕй. Йӕ ахуыргӕнинӕгтӕ фӕстӕмӕ куы ’рбаздӕхтысты, уӕд Йесойӕн цингӕнгӕйӕ радзырдтой, цытӕ сыл ӕрцыд, уый. Кӕд Хӕйрӕг сӕ ныхмӕ архайдта, уӕддӕр йӕ бон ницы уыд саразын, цӕмӕй сӕ баурӕдтаид.

Цалынмӕ Йесо уӕлӕрвтӕм нӕ аздӕхт, уӕдмӕ алцыдӕр сарӕзта, цӕмӕй йӕ ахуыргӕнинӕгтӕн йӕ ацыды фӕстӕ дӕр сӕ бон уыдаид хъусын кӕнын. Уый сын загъта: «Хорз хабар хъусын кӕнут ӕнӕхъӕн зӕххыл дӕр. Адӕмӕн амонут, Хуыцауы Ныхасы цы фыст ис, уый ӕмӕ сын донаргъуыд дӕттут».

Йесо зӕхмӕ ӕрцыд, цӕмӕй адӕмӕн Хуыцауы Паддзахады тыххӕй хорз хабар дзырдтаид. Йегъовӕ йӕ йӕ сыгъдӕг тыхӕй схайджын кодта, цӕмӕй диссӕгтӕ арӕзтаид ӕмӕ адӕм федтаиккой, Йесо Паддзах куы суа, уӕд цы сараздзӕн, уый. Йӕ бон уыди цыфӕнды низ дӕр сдзӕбӕх кӕнын. Кӕмфӕнды ма уыдаид, уӕддӕр-иу ӕм рынчын адӕм ӕрбацыдысты, ӕмӕ-иу сӕ се ’ппӕты дӕр сдзӕбӕх кодта. Ӕмӕ-иу куырмытӕ цӕстӕй ракастысты, къуырматӕн-иу сӕ хъустӕ байгом сты, йӕ бон цӕуын кӕмӕн нӕ уыд, уыдон-иу сӕ къахыл слӕууыдысты, йӕ мидӕг хӕйрӕджытӕ кӕмӕн уыд, уыдон та-иу сӕ ссӕрибар сты. Суанг-иу ын йӕ дарӕсы кӕроныл дӕр чи андзӕвыд, уый дӕр-иу адзӕбӕх. Кӕдӕмфӕнды ма ацыдаид, уӕддӕр-иу адӕм йӕ фӕдыл цыдысты. Ӕмӕ-иу ӕй кӕд иунӕгӕй аззайын дӕр фӕндыд, уӕддӕр сын афтӕ никуы загъта, нӕ мӕ ’вдӕлы, зӕгъгӕ.

Иухатт Йесо иу хӕдзары уыд, ӕмӕ йӕм уырдӕм чидӕртӕ ӕрбахастой, паралич кӕй ныццавта, ахӕм нӕлгоймаджы. Фӕлӕ дзы уыйбӕрц адӕм уыди, ӕмӕ мидӕмӕ бахизӕн дӕр нӕ уыд. Уӕд уыдон хӕдзары цар райхӕлдтой ӕмӕ уыцы нӕлгоймаджы Йесомӕ уӕлӕты ӕруагътой. Йесо уыцы лӕгӕн загъта: «Сыст уӕлӕмӕ ӕмӕ цу». Лӕг куы сыстад, уӕд адӕм тынг бадис кодтой.

Ӕндӕр хатт та Йесо иу хъӕумӕ бацыди, ӕмӕ йӕм, хъотырӕй рынчын чи уыд, дӕс ахӕм лӕджы дардӕй хъӕр кӕнын райдыдтой: «Йесо, баххуыс нын кӕн!» Уӕды заман хъотырджынтӕн адӕммӕ хӕстӕг цӕуӕн нӕ уыди. Йегъовӕйы Закъонмӕ гӕсгӕ, хъотырӕй рынчын чи уыд, уый-иу куы сдзӕбӕх уыдаид, уӕд-иу хъуамӕ кувӕндонмӕ ацыдаид. Ӕмӕ Йесо дӕр уыцы нӕлгоймӕгтӕн загъта, цӕмӕй афтӕ бакодтаиккой. Ӕмӕ нырма фӕндагыл уыдысты, афтӕ сдзӕбӕх сты. Сӕ иу, кӕй сдзӕбӕх, уый куы бамбӕрста, уӕд фӕстӕмӕ раздӕхт, цӕмӕй Йесойӕн бузныг загътаид ӕмӕ Хуыцауы скадджын кодтаид. Уыцы дӕс адӕймагӕй Йесойӕн бузныг ӕрмӕстдӕр ацы нӕлгоймаг загъта.

Иу сылгоймаг та 12 азы уыд тынг рынчын, ӕмӕ афтӕ хъуыды кодта, ӕмӕ никуыуал сдзӕбӕх уыдзӕн. Уый Йесомӕ фӕстӕрдыгӕй адӕмы ’хсӕнты бацыд ӕмӕ йын йе ’ддаг дарӕсы кӕроныл андзӕвыд. Уыцы тӕккӕ сылгоймаг адзӕбӕх. Уӕд Йесо загъта: «Чи мыл андзӕвыд?» Сылгоймаг фӕтарст, фӕлӕ уӕддӕр размӕ рацыд ӕмӕ, хабар куыд уыд, уый радзырдта. Йесо йын фӕлмӕнӕй загъта: «Мӕ чызг, фарнимӕ цу».

Иухатт та иу хицау, Иаир, зӕгъгӕ, Йесойӕн ныллӕгъстӕ кодта: «Мӕ гыццыл чызг тынг рынчын у. Дӕ хорзӕхӕй, цом мемӕ!» Фӕлӕ Йесо Иаиры хӕдзармӕ нӕма бахӕццӕ, афтӕ чызг амард. Йесо куы ’рбацыд, уӕд дзы бирӕ адӕмы ӕрбаййӕфта. Уыдон ӕрбацыдысты, цӕмӕй зианджын бинонты фарсмӕ балӕууыдаиккой. Йесо сын загъта: «Ма кӕут, чызг фынӕй кӕны». Стӕй чызгӕн йӕ къухыл рахӕцыд ӕмӕ загъта: «Чызг, сыст!» Чызг уайтагъд уӕлӕмӕ сыстад, ӕмӕ йын Йесо йӕ ныййарджытӕн загъта, цӕмӕй йын исты бахӕрын кодтаиккой. Ахъуыды-ма кӕн, чызджы ныййарджытӕ куыд тынг цин кодтаиккой!

Йесо хъусын кӕнын куы райдыдта, уымӕй афӕдз ӕмӕ ӕрдӕг куы рацыд, уӕд ӕй бахъуыд ахсджиаг уынаффӕ рахӕссын. Хъуамӕ равзӕрстаид, ӕдзухдӕр йемӕ чи лӕггад кодтаид ӕмӕ чырыстон ӕмбырды ахсджиаг хӕстӕ кӕй бар бакодтаид, ахӕм нӕлгоймӕгты. Ахӕм уынаффӕ рахӕссынӕн Йесойы хъуыди Йегъовӕйы ӕххуыс. Гъемӕ Йесо хохмӕ ссыд, цӕмӕй йӕ мачи хъыгдардтаид ӕмӕ ӕнӕхъӕн ӕхсӕв Йегъовӕмӕ фӕкуывта. Райсомӕй Йесо йӕ ахуыргӕнинӕгтӕй кӕйдӕрты ӕрӕмбырд кодта ӕмӕ дзы равзӕрста 12 апостолы. Искӕй нӕмттӕ дзы хъуыды кӕныс? Апостолтӕ хуындысты: Петр, Андрей, Иаков, Иоанн, Филипп, Варфоломей, Фома, Матфей, Алфейы фырт Иаков, Фаддей, Симон ӕмӕ Иудӕ Искариот.

Уыцы 12 апостолы алкӕддӕр уыдысты Йесоимӕ. Куы сӕ бацӕттӕ кодта, уӕд сын сӕхи дӕр арвыста хъусын кӕнынмӕ. Йегъовӕ сын ахӕм тых радта, цӕмӕй адӕмӕй хӕйрӕджыты сырдтаиккой ӕмӕ рынчынты дзӕбӕх кодтаиккой.

Йесо йӕ 12 апостолы хуыдта йе ’мбӕлттӕ ӕмӕ сыл ӕууӕндыди. Фарисейтӕ сӕ нымадтой хуымӕтӕг ӕмӕ, ахуырдзинад кӕмӕ нӕй, ахӕм адӕймӕгтыл. Фӕлӕ сӕм Йесо ахӕм цӕстӕй нӕ каст. Уый сӕ сахуыр кодта, цы куыст сын бахӕс кодта, уый кӕнын. Уыдон Йесойы фарсмӕ уыдысты йӕ мӕлӕты размӕ дӕр ӕмӕ, куы райгас, уый фӕстӕ дӕр. Апостолтӕн сӕ фылдӕр Йесойау уыдысты Галилейӕйӕ. Кӕмӕндӕрты дзы бинонтӕ дӕр уыди.

Апостолтӕ уыдысты ӕнӕххӕст. Хатгай-иу исты зӕгъыны размӕ хъуыды дӕр нӕ акодтой, стӕй-иу рӕдийгӕ дӕр фӕкодтой. Стӕй ма-иу сын фӕразондзинад нӕ фаг кодта. Суанг ма-иу быцӕу дӕр кодтой, уӕлдӕр сӕ чи у, ууыл. Фӕлӕ уӕддӕр апостолтӕ уыдысты хорз адӕймӕгтӕ ӕмӕ Йегъовӕйы уарзтой. Йесо зӕххыл куы нал уыд, уӕд уыдон чырыстон ӕмбырды ахсджиаг хӕстӕ ӕххӕст кодтой.

Йесо йӕхицӕн 12 апостолы куы равзӕрста, уӕд хохӕй ӕрхызти ӕмӕ федта, дуне адӕм ӕм кӕй ӕрбацыд. Уыцы адӕм уыдысты Галилейӕйӕ, Иудейӕйӕ, Тирӕй, Сидонӕй, Сирийӕ ӕмӕ Иорданы фаллаг фарсӕй. Уыдон семӕ ӕрбакодтой бирӕ рынчынты ӕмӕ, сӕ мидӕг хӕйрӕджытӕ кӕмӕн уыд, ахӕм адӕймӕгты, ӕмӕ сӕ Йесо се ’ппӕты дӕр сдзӕбӕх кодта. Уый фӕстӕ адӕмы ахуыр кӕнын райдыдта. Бамбарын сын кодта, адӕймаджы цы хъӕуы, цӕмӕй Хуыцауы ӕмбал суа. Адӕймаг хъуамӕ ӕмбара, ӕнӕ Йегъовӕйы разамындӕй цӕрӕн кӕй нӕй, уый ӕмӕ йӕ хъуамӕ уарза. Фӕлӕ иннӕты чи нӕ уарзы, уымӕй афтӕ зӕгъӕн нӕй, ӕмӕ Хуыцауы уарзы. Адӕймаг хъуамӕ фӕлмӕнзӕрдӕ ӕмӕ хӕларзӕрдӕ уа алкӕмӕ дӕр, суанг йе знӕгтӕм дӕр.

Йесо загъта: «Ӕрмӕст уе ’мбӕлтты ма уарзут, фӕлӕ уе знӕгты дӕр. Иннӕтӕн зӕрдӕйӕ хатыр кӕнут. Кӕд искӕй фӕхъыг кодтат, уӕд ӕм уайтагъд ацӕут ӕмӕ дзы хатыр ракурут. Куыд уӕ фӕнды, цӕмӕй уын иннӕтӕ уой, афтӕ сын ут сымах дӕр».

Йесо ма адӕмӕн бамбарын кодта, ӕхца ӕмӕ мулкмӕ цы цӕстӕй хъуамӕ кӕсой, уый дӕр. Уый загъта: «Бирӕ ӕхца ӕмбырд кӕныныл ма архайут, фӕлӕ архайут, цӕмӕй Йегъовӕйы ӕмбӕлттӕ суат. Уымӕн ӕмӕ давджытӕн сӕ бон у уе ’хца адавын, фӕлӕ уын Йегъовӕимӕ цы хӕлардзинад ис, уый уын ничи адавдзӕн. Цы бахӕрат, цы бануазат ӕмӕ уӕ уӕлӕ цы скӕнат, ууыл мауал мӕт кӕнут. Бакӕсут-ма цъиутӕм. Йегъовӕ сӕ ӕнӕ хӕринагӕй никуы ныууадзы. Уыдӕттыл ӕгӕр куы мӕт кӕнат, уӕд дӕр афтӕмӕй уӕ царды бонтыл иу бон дӕр нӕ бафтаудзыстут. Рох уӕ ма уӕд: Йегъовӕ зоны, цы уӕ хъӕуы, уый».

Уыцы адӕм уый размӕ никуы фехъуыстой, ӕмӕ исчи Йесойы хуызӕн дзырдтаид. Сӕ дины разамонджытӕ сын, ома фарисейтӕ ӕмӕ чиныджыдӕснытӕ, ахӕм цыдӕртӕ никуы амыдтой. Йесо ахӕм хорз ахуыргӕнӕг цӕмӕн уыди? Уымӕн ӕмӕ алцыдӕр дзырдта Йегъовӕйы зондӕй.

Фарисейтӕ цыфӕнды ма арӕзтаиккой, алцыдӕр арӕзтой адӕмы цӕстмӕ. Ӕмӕ кӕд хорзӕй исты арӕзтой, уӕддӕр уый тыххӕй, цӕмӕй-иу адӕмы дисы бафтыдтаиккой. Барӕй-иу куывтой, бирӕ адӕм кӕм уыд, ахӕм рӕтты. Бирӕ ныхӕстӕ кӕм уыд, ахӕм куывдтытӕ-иу сахуыр кодтой ӕмӕ-иу сӕ ӕмбырдгӕнӕнты ӕмӕ уынгты тигътыл ногӕй ӕмӕ ногӕй дзырдтой, цӕмӕй-иу сӕ иннӕтӕ дӕр фехъуыстаиккой. Уымӕ гӕсгӕ адӕм тынг бадис кодтой, Йесо сын афтӕ куы загъта: «Фарисейты хуызӕн ма кувут. Уыдон афтӕ хъуыды кӕнынц, ӕмӕ, бирӕ кӕй фӕкувынц, уый Хуыцауы зӕрдӕмӕ цӕуы, фӕлӕ уый афтӕ нӕу. Йегъовӕмӕ-иу уый тыххӕй ма кувут, цӕмӕй уӕ иннӕтӕ феной, стӕй-иу ӕдзух уыцы иу ныхӕстӕ ма кӕнут. Хуыцауы фӕнды, цӕмӕй-иу ын радзурат, уӕ зӕрдӕйы цы ис, уый».

Йесо дарддӕр загъта: «Кувгӕ та кӕнут афтӕ: “Нӕ уӕларвон Фыд, срухс уӕд дӕ ном. Ӕрцӕуӕд дӕ паддзахад. Дӕ фӕндон уӕлӕрвты куыд ис, афтӕ уӕд зӕххыл дӕр”». Йесо ма адӕмӕн загъта, цӕмӕй кувой хӕринаджы тыххӕй, сӕ тӕригъӕдтӕ хатыр кӕныны тыххӕй ӕмӕ ӕндӕр ахӕм хъуыддӕгты тыххӕй.

Йесо ма ноджыдӕр загъта: «Ӕппынӕдзух кувут. Уӕ уӕларвон Фыд Йегъовӕмӕ кувут, цӕмӕй уӕ йӕ хорздзинӕдтӕй хайджын кӕна. Алы ныййарӕджы дӕр фӕнды йӕ сывӕллонӕн хорздзинад ракӕнын. Дӕ фырт дӕ дзул куы ракура, уӕд ын дур ратдзынӕ? Кӕнӕ дӕ кӕсаг куы ракура, уӕд ын калм ратдзынӕ?»

Йесо йӕ ныхӕстӕ афтӕ бамбарын кодта: «Кӕд сымах фӕнды уӕ сывӕллӕттӕн хорздзинад аразын, уӕд уӕ Фыд Йегъовӕ та сымахӕн йӕ сыгъдӕг тых куыннӕ ратдзӕн. Уӕдӕ дзы сыгъдӕг тых курут». Ды дӕр афтӕ фӕкӕныс? Цӕй тыххӕй фӕкувыс?

Нӕ эрӕйы 32 азы Куадзӕны бӕрӕгбоны размӕ апостолтӕ ӕрыздӕхтысты сӕ уацамындон балцӕй. Уыдысты тынг фӕллад, ӕмӕ сын Йесо загъта, цӕмӕй бӕлӕгъыл иумӕ Вифсаидӕмӕ ацыдаиккой ӕмӕ уым баулӕфыдаиккой. Фӕлӕ былмӕ куы ’рбахӕстӕг сты, уӕд Йесо федта, уырдӕм сӕм мингай адӕм кӕй ӕрбацыд. Кӕд Йесойы йӕ рӕстӕг йӕ апостолтимӕ арвитын фӕндыд, уӕддӕр адӕмӕн афтӕ нӕ загъта, ӕндӕр хатт мӕм ӕрбацӕут, зӕгъгӕ. Рынчын дзы чи уыд, уыдоны сдзӕбӕх кодта ӕмӕ сӕ стӕй ахуыр кӕнын райдыдта. Ӕнӕхъӕн бон сын дзырдта Хуыцауы Паддзахады тыххӕй. Куы ӕризӕр, уӕд ӕм йӕ апостолтӕ бацыдысты ӕмӕ йын загътой: «Адӕм ӕххормаг сты. Арвит сӕ, цӕмӕй сӕхицӕн хӕринаг балхӕной».

Йесо сын загъта: «Цӕуын сӕ никуыдӕм хъӕуы. Ам сын бахӕрын кӕнут исты». Апостолтӕ йын загътой: «Кӕд дӕ фӕнды, уӕд мах ацӕудзыстӕм ӕмӕ сын дзул балхӕндзыстӕм». Апостолтӕй иу, Филипп, загъта: «Бирӕ ӕхца дӕр нӕм куы уаид, уӕддӕр уыйбӕрц адӕмӕн дзул балхӕнын нӕ бон нӕ бауаид».

Йесо сӕ бафарста: «Хӕринагӕй нӕм цы ис?» Андрей йын загъта: «Фондз дзулы ӕмӕ нӕм дыууӕ гыццыл кӕсаджы йеддӕмӕ ницы ис. Уыдон кӕй фаг сты?!» Йесо сын загъта: «Рахӕссут-ма сӕ». Стӕй адӕмы кӕрдӕгыл къордгӕйттӕй ӕрбадын кодта. Алы къорды дӕр уыд 50 кӕнӕ 100 адӕймаджы. Уый фӕстӕ Йесо дзул ӕмӕ кӕсӕгтӕ райста, уӕларвмӕ скаст ӕмӕ скуывта. Стӕй хӕринаг апостолтӕм алӕвӕрдта, уыдон та йӕ адӕммӕ алӕвӕрдтой. 5 000 нӕлгоймаджы, стӕй ма сылгоймӕгтӕ ӕмӕ сывӕллӕттӕ дӕр бахордтой ӕмӕ бафсӕстысты. Уый фӕстӕ апостолтӕ, цы хӕринаг ма баззад, уый чыргъӕдты ӕрӕмбырд кодтой, цӕмӕй ӕппаринаг мацы фӕуыдаид. Ӕмӕ дзы рауад 12 чыргъӕды сӕ тӕккӕ дзагӕй. Уый диссаг куыннӕ у!

Адӕм уыцы хабарыл афтӕ дис кодтой, ӕмӕ сӕ бафӕндыд Йесойы сӕ паддзахӕй сӕвӕрын. Фӕлӕ Йесо зыдта, Йегъовӕ йӕ паддзахӕй кӕд хъуамӕ сӕвӕра, уыцы рӕстӕг кӕй нӕма ӕрцыд. Уӕд Йесо адӕмы арвыста, йӕ апостолтӕн та загъта, цӕмӕй Галилейӕйы денджызы фаллаг фарсмӕ ацыдаиккой. Апостолтӕ бӕлӕгъы сбадтысты, Йесо та иунӕгӕй хохмӕ ссыд. Цымӕ цӕмӕн? Фӕндыд ӕй йӕ Фыдмӕ скувын. Цыфӕнды ӕнӕвдӕлон ма уыдаид, уӕддӕр-иу кувынӕн алы хатт дӕр рӕстӕг ссардта.

Йесойӕн йӕ бон ӕрмӕст рынчынты дзӕбӕх кӕнын ӕмӕ мӕрдты ӕгас кӕнын нӕ уыд, фӕлӕ ма йӕ бон уыд, зӕгъӕм, тыхдымгӕ ӕрсабыр кӕнын ӕмӕ къӕвда бауромын дӕр. Иухатт Йесо хохыл уыд ӕмӕ Хуыцаумӕ куывта. Стӕй Галилейӕйы денджызмӕ акаст ӕмӕ федта, тыхдымгӕ кӕй сыстад. Уыцы рӕстӕг йӕ апостолтӕ уыдысты денджызы ӕмӕ сӕ тых сӕ бонӕй архайдтой, цӕмӕй бӕлӕгъ ма фӕдӕлдон уыдаид. Уӕд Йесо хохӕй ӕрхызт ӕмӕ доныл бӕлӕгъырдӕм ацыд. Апостолтӕ доныл кӕйдӕр ӕрбацӕйцӕугӕ куы федтой, уӕд тынг фӕтарстысты. Фӕлӕ сын Йесо загъта: «Уый ӕз дӕн. Ма тӕрсут».

Петр ын загъта: «Хицау, кӕд уый ӕцӕгдӕр ды дӕ, уыд мын зӕгъ, цӕмӕй дӕм доныл бацӕуон». Йесо йын загъта: «Рацу». Ӕмӕ уыцы тыхдымгӕйы Петр бӕлӕгъӕй рахызт ӕмӕ Йесомӕ доныл ацыд. Фӕлӕ йӕм куы бахӕстӕг, уӕд тыхдымгӕмӕ ӕмӕ стыр уылӕнтӕм акаст, ӕмӕ тынг фӕтарст. Петр ныгъуылын райдыдта ӕмӕ ныхъхъӕр кодта: «Хицау, фервӕзын мӕ кӕн!» Йесо йын йӕ къух рацахста ӕмӕ йын загъта: «Цӕмӕн фӕтарстӕ? Кӕм ис дӕ уырнындзинад?»

Йесо ӕмӕ Петр бӕлӕгъмӕ куыддӕр схызтысты, афтӕ тыхдымгӕ банцад. Ахъуыды-ма кӕн, апостолтӕ уыдӕттӕ фенгӕйӕ куыд дис кодтаиккой! Уыдон загътой: «Ды ӕцӕгдӕр Хуыцауы Фырт дӕ!»

Йесо ӕрмӕст уӕд не ’рсабыр кодта тыхдымгӕ. Иухатт йӕ ахуыргӕнинӕгтимӕ бӕлӕгъыл денджызы иннӕ фарсмӕ цыди, ӕмӕ иуафон бӕлӕгъы фӕстӕрдыгӕй ӕрхуыссыд ӕмӕ бафынӕй. Уӕдмӕ денджызы тыхдымгӕ сыстад. Уылӕнтӕ сӕхи бӕлӕгъыл цавтой, ӕмӕ бӕлӕгъ донӕй дзаг кӕнын райдыдта. Апостолтӕ Йесомӕ хъӕр кӕнын райдыдтой: «Ахуыргӕнӕг, сӕфӕм! Фервӕзын нӕ кӕн!» Йесо райхъал ӕмӕ денджызӕн загъта: «Ныссабыр у!» Ӕмӕ ӕвиппайды дымгӕ банцад ӕмӕ денджыз ӕрсабыр. Йесо йӕ апостолтӕн загъта: «Кӕм ис уӕ уырнындзинад?» Уыдон кӕрӕдзийӕн дзурын райдыдтой: «Суанг дымгӕ ӕмӕ денджыз дӕр йӕ коммӕ кӕсынц». Апостолтӕ иу хъуыддаг бамбӕрстой: Йесойыл ӕппӕт зӕрдӕйӕ куы ӕууӕндой, уӕд сӕ ӕппындӕр ницӕмӕй хъӕудзӕн тӕрсын.

Фарисейтӕ Йесойӕ сӕ удхӕссӕг уыдтой, ӕмӕ фадат агуырдтой, цӕмӕй йӕ ӕрцахстаиккой. Уыдон дзырдтой, зӕгъгӕ, дам, хъуамӕ сабаты рынчынты ма дзӕбӕх кӕна. Уыцы бон дзуттӕгтӕм у улӕфты бон. Иу сабатбон Йесо уынджы федта, куырмӕй чи райгуырд, иу ахӕм лӕджы. Уыцы лӕг уыд мӕгуыргур. Йесо йӕ ахуыргӕнинӕгтӕн загъта: «Кӕсут, ныртӕккӕ ацы адӕймагӕн Хуыцауы тых куыд баххуыс кӕндзӕн, уымӕ». Стӕй сыджыт йӕ сӕтимӕ азмӕста ӕмӕ дзы уыцы лӕгӕн йӕ цӕстытӕ байсӕрста. Йесо йын загъта: «Ацу Силоамы найӕнмӕ ӕмӕ уым дӕ цӕстытӕ ныхс». Уыцы лӕг дӕр афтӕ бакодта, ӕмӕ цӕстӕй ракаст.

Адӕмы дисӕн кӕрон нал уыд. Уыдон загътой: «Ай уыцы мӕгуыргур нӕу? Ӕви уый хуызӕн чидӕр у?» Уыцы лӕг загъта: «Уый ӕз дӕн. Ӕз куырмӕй райгуырдтӕн!» Уӕд ӕй адӕм бафарстой: «Цӕстӕй куыд ракастӕ?» Цы йыл ӕрцыд, уый сын куы радзырдта, уӕд ӕй фарисейтӕм акодтой.

Уый фарисейтӕн радзырдта: «Йесо мын мӕ цӕстытӕ цӕмӕйдӕр байсӕрста ӕмӕ мын стӕй загъта, цӕмӕй сӕ ныхсадтаин. Ӕз дӕр сӕ ныхсадтон, ӕмӕ цӕстӕй ракастӕн!» Уӕд фарисейтӕ загътой: «Сабаты чи дзӕбӕх кӕны, уый Хуыцауӕй ӕрвыст куыд хъуамӕ уа?!» Фӕлӕ иннӕтӕ та загътой: «Уыцы адӕймаг Хуыцауӕй куы нӕ уаид, уӕд йӕ бон адӕмы дзӕбӕх кӕнын нӕ уаид».

Стӕй фарисейтӕ уыцы лӕгӕн йӕ ныййарджытӕм фӕдзырдтой ӕмӕ сӕ бафарстой: «Уӕ фырт цӕстӕй куыд ракаст?» Йӕ ныййарджытӕ фӕтарстысты, уымӕн ӕмӕ фарисейтӕ афтӕ загътой, ӕмӕ, Йесойыл чи баууӕнда, уыдоны ӕмбырдгӕнӕнӕй ратӕрдзысты. Ӕмӕ уымӕ гӕсгӕ загътой: «Нӕ йӕ зонӕм. Йӕхи йын бафӕрсут». Фарисейтӕ уыцы лӕджы фӕрафӕрс-бафӕрс кодтой, ӕмӕ сын уӕд уый дӕр загъта: «Цыдӕриддӕр зонын, уый уын радзырдтон. Цы ма мӕ рафӕрс-бафӕрс кӕнут?» Фарисейтӕ йӕм тынг смӕсты сты, ӕмӕ йӕ ӕмбырдгӕнӕнӕй ратардтой.

Йесо уыцы лӕджы бацагуырдта ӕмӕ йӕ бафарста: «Мессийӕйыл ӕууӕндыс?» Уый йын загъта: «Чи у, уый куы зонин, уӕд ыл баууӕндин». Йесо йын загъта: «Ӕз дӕн Мессийӕ». Куыд хӕларзӕрдӕ уыд Йесо! Уыцы лӕджы ӕрмӕст цӕстӕй нӕ ракӕсын кодта, фӕлӕ ма йын ӕххуыс дӕр бакодта, цӕмӕй йӕм уырнындзинад фӕзындаид.

Йесойӕн уыд, бирӕ кӕй уарзта, ӕртӕ ахӕм ӕмбалы – Лазӕр ӕмӕ йӕ дыууӕ хойы, Марийӕ ӕмӕ Марфӕ. Уыдон цардысты Вифанийы. Иуафон Лазӕр тынг фӕрынчын. Уыцы рӕстӕг Йесо уыд Иорданы фаллаг фарс, ӕмӕ йӕм Марийӕ ӕмӕ Марфӕ кӕйдӕр арвыстой, цӕмӕй йын фӕхабар кодтаиккой: «Лазӕр тынг рынчын у. Дӕ хорзӕхӕй, тагъддӕр-ма нӕм ӕрцу!» Фӕлӕ сӕм Йесо уайтагъд нӕ ацыд. Дыууӕ боны ма уым фӕци, ӕмӕ уӕд йӕ ахуыргӕнинӕгтӕн загъта: «Цомут Вифанимӕ. Лазӕр бафынӕй, ӕмӕ ӕз цӕуын, цӕмӕй йӕ райхъал кӕнон». Апостолтӕ йын загътой: «Хицау, кӕд бафынӕй, уӕд адзӕбӕх уыдзӕн». Ӕмӕ сын уӕд Йесо комкоммӕ загъта: «Лазӕр амард».

Йесо Вифанимӕ ӕрцыд, Лазӕры куы баныгӕдтой, уымӕй цыппар боны куы рацыд, уӕд. Бирӕтӕ ӕрцыдысты, цӕмӕй Марфӕ ӕмӕ Марийӕйы фарсмӕ балӕууыдаиккой. Йесо кӕй ӕрбацӕуы, уый Марфӕ куы фехъуыста, уӕд уайтагъд йӕ размӕ рацыди. Марфӕ йын загъта: «Хицау, ды ам куы уыдаис, уӕд ме ’фсымӕр нӕ амардаид». Йесо та йын загъта: «Де ’фсымӕр райгас уыдзӕн. Уырны дӕ уый, Марфӕ?» Уый йын загъта: «Мӕн уырны, кӕй райгас уыдзӕн, мӕрдтӕ куы ӕгас кӕной, уӕд». Уӕд ын Йесо загъта: «Ӕз дӕн райгасдзинад ӕмӕ цард».

Уый фӕстӕ Марфӕ Марийӕмӕ ацыд ӕмӕ йын загъта: «Йесо ам ис». Марийӕ уый куы фехъуыста, уӕд Йесойы размӕ алыгъд, ӕмӕ адӕм дӕр йӕ фӕдыл ацыдысты. Йӕ кӕуын бауромын йӕ бон нӕ уыд, афтӕмӕй Йесойы раз йӕ зонгуытыл ӕрхауд ӕмӕ загъта: «Хицау, ды ам куы уыдаис, уӕд ме ’фсымӕр ныр дӕр ма ӕгас уаид!» Марийӕ куыд тынг маст кӕны, уымӕ кӕсгӕйӕ Йесойӕн йӕхицӕн дӕр йӕ цӕссыгтӕ ӕркалдысты. Адӕм ӕй кӕугӕ куы федтой, уӕд загътой: «Кӕс-ма, Лазӕры куыд тынг уарзта!» Чидӕртӕ та дзырдтой: «Йе ’мбалы мӕлын цӕмӕн бауагъта?» Цымӕ Йесо дарддӕр цы сарӕзта?

Йесо зӕппадзмӕ ацыд. Зӕппадзы бахизӕныл фӕлдӕхт уыди стыр дур. Йесо адӕмӕн загъта: «Дур-ма иуварс айсут». Марфӕ та йын загъта: «Хицау, ныр ыл цыппар боны рацыд, ӕмӕ афонмӕ стӕф кодта». Фӕлӕ Йесо уӕддӕр дур афӕлдахын кодта ӕмӕ Хуыцаумӕ скуывта: «Мӕ Фыд, бузныг дын, кӕй мӕ фехъуыстай. Зонын ӕй, алкӕддӕр мӕ кӕй хъусыс, фӕлӕ хъӕрӕй ацы адӕмы тыххӕй дзурын, цӕмӕй зоной, ды мӕ кӕй рарвыстай, уый». Стӕй хъӕрӕй загъта: «Лазӕр, ӕддӕмӕ рацу!» Ӕмӕ уӕд ӕрцыд диссаг: Лазӕр зӕппадзӕй рацыд, йӕ цӕсгом ӕмӕ йӕ буар кӕттаг хӕцъилтӕй тыхт, афтӕмӕй. Йесо загъта: «Йӕ хӕцъилтӕ йын райхалут, цӕмӕй йӕ бон цӕуын уа».

Уыцы хабар чи федта, уыдонӕй бирӕтӕ Йесойыл баууӕндыдысты. Чидӕртӕ та сӕ ацыдысты ӕмӕ хабар фарисейтӕн радзырдтой. Ӕмӕ уӕд фарисейтӕ сфӕнд кодтой Лазӕры дӕр ӕмӕ Йесойы дӕр амарын. 12 апостолӕй сӕ иу, Иудӕ Искариот, фарисейтӕм сусӕгӕй ацыд ӕмӕ сӕ бафарста: «Куы уын баххуыс кӕнон, цӕмӕй йӕ ӕрцахсат, уӕд мын цас бафиддзыстут?» Уыдон ын загътой, 30 ӕвзист ӕхцайы йын кӕй ратдзысты. Ӕмӕ уӕдӕй фӕстӕмӕ Иудӕ Искариот фадат агуырдта, цӕмӕй сын Йесойы ӕрцахсынӕн баххуыс кодтаид.

Дзуттӕгтӕ Куадзӕн алы аз дӕр бӕрӕг кодтой, нисан чи хуыйны, уыцы мӕйы цыппӕрдӕсӕм бон. Уыцы бӕрӕгбон сын сӕ зӕрдыл лӕууын кодта, Йегъовӕ сӕ Египеты цагъарадӕй куыд фервӕзын кодта ӕмӕ сӕ Зӕрдӕвӕрд зӕхмӕ куыд бакодта, уый. Нӕ эрӕйы 33 азы Йесо ӕмӕ йӕ апостолтӕ Иерусалимы иу хӕдзары уӕллаг уаты ӕрӕмбырд сты, цӕмӕй Куадзӕн сбӕрӕг кодтаиккой. Куы йӕ сбӕрӕг кодтой, уӕд сын Йесо загъта: «Сымахӕй мӕ иу ауӕй кӕндзӕн». Апостолтӕ дисы ныххаудысты, ӕмӕ йӕ бафарстой: «Уыцы адӕймаг чи у?» Йесо сын загъта: «Ацы дзулӕй кӕмӕн раттон, уый». Стӕй дзулы карст Иудӕ Искариотмӕ радта. Уӕд Иудӕ фестад ӕмӕ уырдыгӕй ацыд.

Уый фӕстӕ Йесо Хуыцаумӕ скуывта, дзул ӕрсаста, йӕ 11 апостолмӕ йӕ алӕвӕрдта ӕмӕ загъта: «Айсут ӕмӕ хӕрут. Ацы дзул нысан кӕны мӕ буар. Ӕз ӕй дӕттын сымах тыххӕй». Стӕй та райста сӕны къус, Хуыцаумӕ скуывта, йӕ апостолтӕм ӕй алӕвӕрдта ӕмӕ загъта: «Бануазут дзы. Ацы сӕн нысан кӕны мӕ туг, ӕмӕ ныккӕлдзӕн бирӕты тыххӕй, цӕмӕй сын Хуыцау сӕ тӕригъӕдтӕ ныххатыр кӕна. Ӕз уын дзырд дӕттын, мемӕ уӕлӕрвты паддзӕхтӕ кӕй уыдзыстут. Алы аз дӕр ацы бон бӕрӕг кӕнут мӕн ӕрымысыны тыххӕй». Нӕ рӕстӕджы дӕр Йесойы фӕдылдзӕуджытӕ алы аз дӕр ӕрӕмбырд вӕййынц, цӕмӕй-иу уыцы хабар сбӕрӕг кӕной. Уыцы бӕрӕгбон абон хуыйны Чырыстийы мӕлӕт Ӕрымысӕн изӕр.

Уыцы хабар куы сбӕрӕг кодтой, уӕд апостолтӕ быцӕу кӕнын райдыдтой, уӕлдӕр сӕ чи у, ууыл. Фӕлӕ сын Йесо загъта: «Уе ’хсӕн уӕлдӕр у, йӕхи иннӕты раз кӕстӕрыл чи нымайы ӕмӕ иннӕтӕн чи лӕггад кӕны, уый».

Йесо дарддӕр загъта: «Сымах стут ме ’мбӕлттӕ. Ӕмӕ уын ӕз дзурын, мӕ Фыд мын цы загъта, уый. Тагъд мӕ Фыдмӕ уӕлӕрвтӕм ацӕудзынӕн, сымах та ам баззайдзыстут. Ӕмӕ мӕ ахуыргӕнинӕгтӕ кӕй стут, уый адӕм уымӕй базондзысты, ӕмӕ уӕ кӕрӕдзи куы уарзат. Уӕ кӕрӕдзи хъуамӕ уарзат, ӕз уӕ куыд уарзын, афтӕ».

Фӕстагмӕ Йесо Йегъовӕмӕ скуывта, цӕмӕй йын йӕ ахуыргӕнинӕгты се ’ппӕты дӕр хъахъхъӕна. Ноджыдӕр ма дзы ракуырдта, цӕмӕй се ’хсӕн иудзинад уа. Стӕй ма Йегъовӕмӕ скуывта, цӕмӕй йӕ ном срухс уа. Уый фӕстӕ ма Йесо ӕмӕ йӕ апостолтӕ Хуыцауӕн кады зарджытӕ азарыдысты ӕмӕ ацыдысты. Йесойы куы хъуамӕ ӕрцахстаиккой, уымӕ бирӕ нал хъуыди.

Ӕмбисӕхсӕв Йесо йӕ апостолтимӕ Кедроны дӕлвӕзыл ацыд Оливӕбӕлӕсты хохы ’рдӕм. Цалхыдзаг мӕй сын сӕ фӕндаг рухс кодта. Гефсиманийы дыргъдонмӕ куы бахӕццӕ сты, уӕд сын Йесо загъта: «Ам фӕлӕуут, ма бафынӕй ут». Йӕхӕдӕг гыццыл фалдӕр ацыди ӕмӕ йӕ зонгуытыл ӕрлӕууыд, цӕмӕй Йегъовӕмӕ скуывтаид. Йесо йӕ куывды загъта: «Дӕу куыд фӕнды, афтӕ уӕд». Йесо уыд тынг тыхст уавӕры, ӕмӕ йӕм Йегъовӕ йӕ зӕды рарвыста, цӕмӕй йӕ бафидар кодтаид. Йесо апостолтӕм куы ’рбаздӕхт, уӕд сӕ фынӕйӕ ӕрбаййӕфта ӕмӕ сын загъта: «Сыстут! Ныртӕккӕ уый рӕстӕг нӕу, ӕмӕ фынӕй кӕнат. Ӕрхӕстӕг уыцы сахат, ӕмӕ мӕ знӕгты къухтӕм ратдзысты».

Уӕдмӕ ӕрбацыд Иудӕ дӕр, йемӕ уыд бирӕ адӕм хъаматӕ ӕмӕ хъилтимӕ. Йесойы ссарӕн кӕм уыд, уый зыдта, уымӕн ӕмӕ-иу уыцы дыргъдоны Йесо йӕ апостолтимӕ арӕх уыд. Иудӕ ӕфсӕддонтӕн рагацау загъта, зӕгъгӕ, кӕмӕн апъа кӕнон, уый у Йесо. Иудӕ Йесомӕ комкоммӕ бацыд ӕмӕ йын загъта: «Дзӕбӕх у, Ахуыргӕнӕг!» Ӕмӕ йын стӕй апъа акодта. Йесо йын загъта: «Иудӕ, пъайӕ мӕ уӕй кӕныс?»

Йесо размӕ рацыд ӕмӕ уыцы адӕмы бафарста: «Кӕй агурут?» Уыдон ын дзуапп радтой: «Назаретаг Йесойы». Уӕд сын уый загъта: «Уый ӕз дӕн». Уӕд уыдон фӕстӕмӕ алӕууыдысты ӕмӕ зӕххыл ӕрхаудтой. Ӕмӕ та сӕ ногӕй бафарста: «Кӕй агурут?» Уыдон ын ногӕй дзуапп радтой: «Назаретаг Йесойы». Ӕмӕ та сын Йесо загъта: «Куы уын загътон, уый ӕз дӕн. Мемӕ чи ис, уыдоны ауадзут».

Петр хабар куы бамбӕрста, уӕд йӕ хъама фелвӕста ӕмӕ хистӕр сауджыны цагъартӕй иуӕн йӕ хъус ахауын кодта. Фӕлӕ Йесо уыцы лӕджы хъусмӕ бавнӕлдта ӕмӕ йӕ сдзӕбӕх кодта. Стӕй Петрӕн загъта: «Дӕ хъама йӕ бынаты сӕвӕр. Чидӕриддӕр йӕ къухмӕ хъама райса, уый йӕ мӕлӕт хъамайӕ ссардзӕн». Ӕфсӕддонтӕ Йесойы ӕрцахстой ӕмӕ йӕ сбастой, йӕ апостолтӕ та уырдыгӕй алыгъдысты. Уый фӕстӕ Йесойы акодтой сауджынты хистӕр Аннӕмӕ. Уый йӕ цӕмӕйдӕрты фӕрафӕрс-бафӕрс кодта ӕмӕ йӕ стӕй хистӕр сауджын Кайафӕйы хӕдзармӕ арвыста. Цымӕ апостолтыл та уый фӕстӕ цы ’рцыд?

Йесо йӕ апостолтимӕ, Куадзӕн кӕм сбӕрӕг кодтой, уыцы хӕдзары куы уыд, уӕд сын загъта: «Ахсӕв мӕ уе ’ппӕт дӕр ныууадздзыстут». Петр та йын загъта: «Се ’ппӕт дӕр дӕ куы ныууадзой, уӕддӕр дӕ ӕз никуы ныууадздзынӕн!» Фӕлӕ йын Йесо загъта: «Ахсӕв, уасӕг нӕма ныууасдзӕн, афтӕ ды мӕнӕй ӕртӕ хатты зӕгъдзынӕ, нӕ йӕ зонын, зӕгъгӕ».

Ӕфсӕддонтӕ Йесойы Кайафӕйы хӕдзармӕ куы акодтой, уӕд апостолтӕн сӕ фылдӕр алыгъдысты. Фӕлӕ дзы дыууӕйӕ йӕ фӕдыл ацыдысты. Ӕмӕ сӕ цӕмӕй мачи базыдтаид, уый тыххӕй адӕмы ’хсӕнты цыдысты. Сӕ иу уыд Петр. Уый Кайафӕйы хӕдзары кӕртмӕ бацыд ӕмӕ арты раз слӕууыд. Иу лӕггадгӕнӕг чызг ын арты рухсмӕ йӕ цӕсгом федта ӕмӕ загъта: «Ӕз дӕ базыдтон! Ды дӕр Йесоимӕ уыдтӕ!»

Петр загъта: «Нӕ, нӕ уыдтӕн! Цӕй кой кӕныс, уый не ’мбарын!» Ӕмӕ кулдуары ’рдӕм куы ацыд, уӕд ӕй уым та ӕндӕр лӕггадгӕнӕг чызг федта ӕмӕ адӕмӕн загъта: «Ацы лӕг дӕр Йесоимӕ уыди». Петр загъта: «Ӕз Йесойы зонгӕ дӕр нӕ кӕнын!» Уый фӕстӕ ма йын иу чидӕр загъта: «Ды дӕр уыдонӕй дӕ! Дӕ ныхасӕй бӕрӕг у, ды дӕр Йесойау галилейаг кӕй дӕ». Фӕлӕ Петр сомытӕ кӕнын райдыдта: «Ӕз уыцы адӕймаджы нӕ зонын!»

Ӕмӕ раст уыцы рӕстӕг уасӕг ныууасыд. Уӕд Йесо Петрмӕ фӕстӕмӕ ракаст, ӕмӕ йын Петр йӕ ныхӕстӕ ӕрхъуыды кодта. Уӕд ӕддӕмӕ рацыди ӕмӕ тынг ныккуыдта.

Уыцы рӕстӕг Сӕйраг тӕрхондон Кайафӕйы хӕдзары ӕрӕмбырд, цӕмӕй Йесойӕн стӕрхон кодтаиккой. Уыдон ӕй сфӕнд кодтой амарын, ӕмӕ ӕфсон агуырдтой, цӕмӕ йын мӕлӕты тӕрхон рахастаиккой. Фӕлӕ ницы ӕфсон ссардтой. Ӕмӕ уӕд Кайафӕ Йесойы комкоммӕ бафарста: «Уӕдӕ Хуыцауы Фырт дӕ?» Йесо загъта, о, зӕгъгӕ. Уӕд Кайафӕ загъта: «Ай мӕнӕ Хуыцауы куы фауы! Цӕй ӕвдисӕнтӕ ма нӕ хъӕуы?» Тӕрхондоны чи уыд, уыдон загътой: «Ацы адӕймаг хъуамӕ амӕла». Уый фӕстӕ йӕ чидӕртӕ райдыдтой цӕвын ӕмӕ йыл тутӕ кӕнын, иннӕтӕ та йын йӕ цӕсгом бамбӕрзтой ӕмӕ йӕ дзӕхстытӕ кодтой ӕмӕ дзырдтой: «Кӕд пехуымпар дӕ, уӕд-ма нын ӕй зӕгъ, чи дӕ ныццавта?»

Куы сбон, уӕд Йесойы Сӕйраг тӕрхондоны агъуыстмӕ бакодтой ӕмӕ та йӕ ногӕй бафарстой: «Уӕдӕ Хуыцауы Фырт дӕ?» Йесо сын загъта: «Уӕхӕдӕг ӕй куы зӕгъут». Уӕд ӕй фӕаххосджын кодтой, Хуыцауы фауы, зӕгъгӕ, ӕмӕ йӕ ромаг хицау Понтий Пилатмӕ акодтой. Цымӕ дарддӕр цы ’рцыд? Цӕй ӕмӕ йӕ базонӕм.

Сауджынты хистӕртӕ Йесойы акодтой ромаг хицау Пилаты галуанмӕ. Пилат сӕ бафарста: «Ацы адӕймаджы цавӕр хъуыддаджы аххосджын кӕнут?» Уыдон ын загътой: «Йӕхи паддзах хоны!» Уӕд Пилат Йесойы бафарста: «Ды дзуттӕгты паддзах дӕ?» Йесо йын дзуапп радта: «Мӕ паддзахад ацы дунейӕ нӕу».

Уый фӕстӕ Пилат Йесойы арвыста Иродмӕ, Галилейӕйы хицаумӕ, цӕмӕй йын уый дӕр йӕ хъуыддагмӕ ӕркастаид. Фӕлӕ Ирод Йесомӕ ницы аххос ссардта, ӕмӕ йӕ фӕстӕмӕ Пилатмӕ арвыста. Уӕд Пилат адӕмӕн загъта: «Нӕдӕр Ирод, нӕдӕр ӕз ацы адӕймагмӕ ницы аххос ссардтам. Ӕз ӕй суӕгъд кӕндзынӕн». Фӕлӕ адӕм хъӕр кӕнын райдыдтой: «Амар ӕй! Амар ӕй!» Ӕфсӕддонтӕ Йесойы ехсӕй фӕнадтой, стӕй йыл тутӕ кӕнын ӕмӕ йӕ тымбылкъухӕй цӕвын райдыдтой. Уый фӕстӕ йын йӕ сӕрыл сындзытӕй быд кадыхуд ӕркодтой ӕмӕ дзы хынджылӕг кӕнын райдыдтой: «Ӕгас нӕм цу, дзуттӕгты Паддзах!» Пилат та ногӕй адӕмӕн загъта: «Ӕз ацы адӕймагмӕ ницы аххос ссардтон». Фӕлӕ уыдон хъӕр кодтой: «Хъӕдыл ӕй байтындз!» Гъемӕ Пилат ӕфсӕддонтӕн загъта, цӕмӕй йӕ хъӕдыл байтыгътаиккой.

Уыдон Йесойы акодтой, Голгофӕ чи хуынд, уыцы бынатмӕ. Уым ӕй зӕгӕлтӕй хъӕдмӕ ныххостой ӕмӕ стӕй уыцы хъӕд зӕххы ныссагътой. Йесо Хуыцаумӕ скуывта: «Мӕ Фыд, ныххатыр сын кӕн, уымӕн ӕмӕ, цы аразынц, уый не ’мбарынц». Адӕм та Йесойӕ хынджылӕг кодтой: «Кӕд Хуыцауы фырт дӕ, уӕд дӕхи фервӕзын кӕн! Ӕрхиз хъизӕмӕртты хъӕдӕй!»

Йӕ фӕйнӕ фарс цы дыууӕ фыдгӕнӕджы байтыгътой, уыдонӕй йын иу загъта: «Паддзах куы суай, уӕд-иу мӕ ӕрхъуыды кӕн». Йесо йын загъта: «Ды уыдзынӕ мемӕ Дзӕнӕты». Фӕссихор бӕстӕ баталынг, ӕмӕ ӕртӕ сахаты дӕргъы уыди талынг. Йесойы ахуыргӕнинӕгтӕ дӕр цалдӕрӕй уым уыдысты, ӕмӕ се ’хсӕн уыд йӕ мад Марийӕ дӕр. Йесо Иоаннӕн бафӕдзӕхста, цӕмӕй Марийӕйӕн ӕххуыс кодтаид, йӕхи мадӕн куыд ӕххуыс кодтаид, афтӕ.

Фӕстагмӕ Йесо загъта: «Цыдӕриддӕр мын бафӕдзӕхстай, уый сӕххӕст кодтон!» Ӕмӕ йӕ сӕр йӕ риуыл ӕркъул, ӕмӕ амард. Раст уыцы рӕстӕг зӕхх тынг нынкъуысыд. Кувӕндоны Сыгъдӕг бынаты ӕмӕ Ӕппӕты сыгъдӕг бынаты ’хсӕн цы ӕмбӕрзӕн уыд, уый та уӕлейӕ бынмӕ ӕрыскъуыд ӕмӕ дыууӕ дихы фӕци. Ӕфсӕддон хицау уыдӕттӕ фенгӕйӕ загъта: «Ацы адӕймаг ӕцӕгдӕр Хуыцауы Фырт уыд».

Йесо куы амард, уӕд иу хъӕздыг лӕг, Иосиф, Пилатмӕ бацыди ӕмӕ дзы бар ракуырдта, цӕмӕй Йесойы хъӕдӕй ӕристаид. Иосиф ӕй ӕппӕты хуыздӕр кӕттаг хъуымацы хӕрздӕфгӕнаг кӕрдӕджытимӕ батыхта. Стӕй йӕ ног зӕппадзы бавӕрдта ӕмӕ йын йӕ бахизӕныл стыр дур бафӕлдӕхта. Сауджынты хистӕртӕ Пилатӕн загътой: «Тӕрсӕм, мыййаг, Йесойы ахуыргӕнинӕгтӕ йӕ мард куы адавой ӕмӕ стӕй афтӕ куы дзурой, мӕрдтӕй райгас, зӕгъгӕ». Ӕмӕ сын уӕд Пилат загъта: «Зӕппадзыл мыхуыр сӕвӕрут ӕмӕ йӕ хъахъхъӕнут».

Ӕртӕ боны фӕстӕ райсомӕй раджы сылгоймӕгтӕй чидӕртӕ зӕппадзмӕ ӕрбацыдысты ӕмӕ кӕсынц, ӕмӕ бахизӕны дур иуварс фӕлдӕхтӕй лӕууы. Уым мидӕгӕй федтой зӕды, ӕмӕ сын уый загъта: «Ма тӕрсут. Йесо райгас. Ацӕут ӕмӕ йын йӕ ахуыргӕнинӕгтӕн зӕгъут, Галилейӕйы йӕ кӕй фендзысты».

Цалынмӕ иннӕ сылгоймӕгтӕ уым уыдысты, уӕдмӕ Марийӕ Магдалинӕ та Петрмӕ ӕмӕ Иоанмӕ атагъд кодта. Куы сыл фембӕлд, уӕд сын загъта: «Чидӕр Йесойы мард ахаста!» Уӕд Петр ӕмӕ Иоанн зӕппадзмӕ азгъордтой. Фӕлӕ зӕппадз афтидӕй куы федтой, уӕд фӕстӕмӕ сӕ хӕдзӕрттӕм аздӕхтысты.

Марийӕ фӕстӕмӕ зӕппадзмӕ куы ’рбаздӕхт, уӕд дзы мидӕгӕй дыууӕ зӕды федта ӕмӕ сын загъта: «Мӕ Хицауы мын кӕдӕм ахастой, уымӕн ницы зонын». Уый фӕстӕ Марийӕ иу лӕджы ауыдта ӕмӕ фенхъӕлдта, дыргъдонгӕс кӕй у, ӕмӕ йын загъта: «Хорз лӕг, зӕгъ мын ӕй, кӕдӕм ӕй ахастай». Уыцы лӕг ӕм йӕ номӕй сдзырдта: «Марийӕ!» Уӕд Марийӕ бамбӕрста, уый Йесо кӕй у, ӕмӕ йӕм сдзырдта: «Ахуыргӕнӕг!» Марийӕ йын ныхъхъӕбыс кодта, ӕмӕ йын Йесо загъта: «Ацу ме ’фсымӕртӕм ӕмӕ сын зӕгъ, кӕй мӕ федтай». Марийӕ уайтагъд ахуыргӕнинӕгтӕм азгъордта ӕмӕ сын радзырдта, Йесойы кӕй федта.

Уыцы бон фӕстӕдӕр Йесойы ахуыргӕнинӕгтӕй дыууӕйӕ Иерусалимӕй Еммаусмӕ фӕцӕйцыдысты. Фӕндагыл сӕм иу лӕг ӕрбаиу ӕмӕ сӕ бафарста, цӕуыл ныхас кӕнут, зӕгъгӕ. Уыдон ын загътой: «Ам цы хабӕрттӕ ӕрцыд, уыдоны тыххӕй нӕ фехъуыстай? Ӕртӕ боны размӕ сауджынты хистӕртӕ Йесойы амарын кодтой. Ныр та сылгоймӕгтӕй чидӕртӕ дзурынц, удӕгас, дам, у!» Уыцы лӕг сӕ бафарста: «Пехуымпарты ныхӕстыл не ’ууӕндут, ӕви? Уыдон дзырдтой, Чырысти кӕй амӕлдзӕн ӕмӕ стӕй кӕй райгас уыдзӕн». Ӕмӕ сын дарддӕр Фыстадӕй уыцы хабӕрттӕ ӕмбарын кодта. Еммаусмӕ куы бахӕццӕ сты, уӕд ын ахуыргӕнинӕгтӕ загътой, цӕмӕй уым семӕ ӕрлӕууыдаид. Изӕры фынгыл куы бадтысты, уӕд уыцы лӕг дзул райста ӕмӕ Хуыцаумӕ скуывта. Ӕмӕ уӕд бамбӕрстой, уый Йесо кӕй у. Фӕлӕ уӕдмӕ ӕрбацыдӕр.

Уыцы дыууӕ ахуыргӕнинаджы Иерусалиммӕ атагъд кодтой, апостолтӕ цы хӕдзары ӕрӕмбырд сты, уырдӕм ӕмӕ сын хабар радзырдтой. Уалынмӕ сӕ разы Йесо февзӕрд. Апостолты уайтагъд нӕ бауырныдта, уый Йесо кӕй у. Ӕмӕ сӕ цӕмӕй бауырныдтаид, уый тыххӕй сын загъта: «Мӕнӕ мын мӕ къухтӕм ӕрбакӕсут, бавналут мӕм. Фыстады загъд уыд, Чырысти мӕрдтӕй кӕй райгас уыдзӕн».

Йесо йӕ апостолтӕм куы фӕзынд, уымӕй цасдӕр рӕстӕджы фӕстӕ Петр сфӕнд кодта Галилейӕйы денджызмӕ кӕсаг ахсынмӕ ацӕуын. Йемӕ ма ацыдысты Фома, Иаков, Иоанн ӕмӕ ма ноджыдӕр цалдӕр ахуыргӕнинаджы. Ӕнӕхъӕн ӕхсӕв фӕархайдтой, фӕлӕ ницы ӕрцахстой.

Райсомӕй раджы былгӕрон иу лӕджы лӕугӕ ауыдтой. Уый сӕм фӕхъӕр кодта: «Исты ӕрцахстат?» Уыдон ын загътой: «Ницы!» Уӕд сын уый загъта: «Уӕ хыз бӕлӕгъы рахиз фарс баппарут». Ӕмӕ уыдон дӕр сӕ хыз баппӕрстой, фӕлӕ йӕ сӕ бон фӕстӕмӕ сласын нӕ баци, уымӕн ӕмӕ кӕсӕгтӕй йедзаг уыд. Уӕд Иоанн бамбӕрста, уый Йесо кӕй у, ӕмӕ загъта: «Уый нӕ Хицау куы у!» Петр уайтагъд донмӕ ныггӕпп кодта ӕмӕ былмӕ аленк кодта. Иннӕ ахуыргӕнинӕгтӕ та йӕ фӕдыл бӕлӕгъыл былмӕ баленк кодтой.

Былмӕ куы рахызтысты, уӕд кӕсынц, ӕмӕ арт судзы, зынгтыл та – кӕсӕгтӕ, стӕй дзы уыди дзул дӕр. Йесо сын загъта, цӕмӕй ма сӕ кӕсӕгтӕй дӕр рахастаиккой. Стӕй сын загъта: «Рацӕут, бахӕрут».

Куы бахордтой, уӕд Йесо Петрӕн загъта: «Кӕсагахсыны куыстӕй мӕ фылдӕр уарзыс?» Уый йын дзуапп радта: «О, Хицау, куы йӕ зоныс, кӕй дӕ уарзын». Уӕд ын Йесо загъта: «Кӕс мын мӕ уӕрыччытӕм». Дыккаг хатт дӕр та йӕ бафарста: «Петр, уарзыс мӕ?» Уый йын дзуапп радта: «Хицау, куы йӕ зоныс, кӕй дӕ уарзын». Йесо та йын загъта: «Кӕс мын мӕ гыццыл фыстӕм». Ӕмӕ йӕ ӕртыккаг хатт куы бафарста, уӕд Петр тынг ӕрӕнкъард ӕмӕ йын загъта: «Хицау, ды алцыдӕр зоныс. Зоныс ӕй, кӕй дӕ уарзын». Йесо йын загъта: «Кӕс мын мӕ гыццыл фыстӕм». Уый фӕстӕ ма йын загъта: «Дарддӕр дӕр мӕ фӕдыл цу».

Йесо Галилейӕйы йӕ фӕдылдзӕуджытимӕ фембӕлд. Уым сын иу ахсджиаг хъуыддаг бахӕс кодта: «Ацӕут ӕмӕ мын ӕппӕт адӕмтӕй дӕр цӕттӕ кӕнут ахуыргӕнинӕгтӕ. Амонут сын, ӕз уын цы бацамыдтон, уыдӕттӕ ӕмӕ сын донаргъуыд дӕттут». Стӕй сын загъта: «Ма рох кӕнут, ӕз алкӕддӕр уемӕ кӕй уыдзынӕн».

Йесо куы райгас, уӕд ма зӕххыл цыппор боны фӕци, ӕмӕ Галилейӕйы ӕмӕ Иерусалимы цалдӕр сӕдӕ ахуыргӕнинагмӕ бирӕ хӕттыты фӕзынд. Уый сын ахсджиаг хабӕрттӕ ӕмбарын кодта ӕмӕ бирӕ диссӕгтӕ арӕзта. Уый фӕстӕ йӕ апостолтимӕ Оливӕбӕлӕсты хохыл фӕстаг хатт фембӕлд.

Иу бон апостолтӕм куы фӕзынд, уӕд сын загъта: «Иерусалимӕй ма ацӕут. Ӕнхъӕлмӕ кӕсут, мӕ Фыд уын зӕрдӕ цӕмӕй бавӕрдта, уымӕ». Уыдон ын йӕ ныхӕстӕ нӕ бамбӕрстой, ӕмӕ йӕ бафарстой: «Израилы Паддзах ныр хъуамӕ суай?» Йесо сын загъта: «Рӕстӕг нӕма ӕрцыд, цӕмӕй мӕ Йегъовӕ Паддзахӕй сӕвӕра. Тагъд рӕстӕджы схайджын уыдзыстут сыгъдӕг тыхӕй, ӕмӕ мын уыдзыстут ӕвдисӕнтӕ. Цӕут ӕмӕ хъусын кӕнут Иерусалимы, Иудейӕйы ӕмӕ Самарийы, ӕмӕ суанг зӕххы кӕрӕттӕм дӕр».

Стӕй Йесо уӕлӕрвтӕм ссыд, ӕмӕ йӕ мигъ бамбӕрзта. Йӕ ахуыргӕнинӕгтӕ ма йӕ фӕдыл кастысты, фӕлӕ сӕм нал зынд.

Ахуыргӕнинӕгтӕ Оливӕбӕлӕсты хохӕй ацыдысты Иерусалиммӕ. Цы хӕдзары ӕрлӕууыдысты, уым-иу уӕллаг уаты ӕдзухдӕр иумӕ ӕмбырд кодтой ӕмӕ Хуыцаумӕ куывтой. Ахуыргӕнинӕгтӕ зыдтой, Йесо ма сын ноджыдӕр цыдӕртӕ кӕй хъуамӕ бацамона, ӕмӕ йӕ разамындмӕ ӕнхъӕлмӕ кастысты.