Алы рӕтты адӕм нозтмӕ алыхуызон цӕстӕй кӕсынц. Иуӕй-иутӕ уарзынц хаттӕй-хатт се ’мбӕлттимӕ ануазын. Иннӕтӕ та ӕппындӕр нӕ нуазынц. Чидӕртӕ та фӕнуазынц, цалынмӕ не срасыг вӕййынц, уӕдмӕ. Цымӕ Библийы та нозты тыххӕй цы фыст ис?

1. Библимӕ гӕсгӕ, нуазын ӕвзӕр у?

Библи афтӕ нӕ зӕгъы, ӕмӕ нуазын ӕвзӕр у. Хуыцау нын цы бирӕ лӕвӕрттӕ скодта, уыдонӕй иу у сӕн. Библийы фыст ис: «Дӕттыс сӕн, цӕмӕй адӕймаджы зӕрдӕ хъӕлдзӕг кӕна» (Псалом 104:14, 15). Хуыцауы иузӕрдион лӕггадгӕнджытӕй Библийы кӕй тыххӕй ис фыст, уыдонӕй дӕр-иу чидӕртӕ хатт анызтой (1 Тимофеймӕ 5:23).

2. Библийы нозты фӕдыл цавӕр уынаффӕ ис?

Йегъовӕ у фыднозт кӕныны ныхмӕ, адӕймагыл йӕ нозт бӕрӕг куы нӕ уа, уӕд дӕр (Галатӕгтӕм 5:21). Йӕ Ныхасы фыст ис: «Сӕнӕй бӕрц чи нӕ зоны... уыдонимӕ ма у» (Ӕмбисӕндтӕ 23:20). Уӕдӕ кӕд нуазӕм (суанг иунӕгӕй дӕр), уӕддӕр-иу уыйбӕрц хъуамӕ ма бануазӕм, цӕмӕй нӕхи мауал ӕмбарӕм, цы дзурӕм ӕмӕ цы аразӕм, ууыл нӕ бар мауал цӕуа кӕнӕ не ’нӕниздзинадӕн исты зиан ӕрхӕссӕм. Нозтӕй бӕрц куы нӕ зонӕм, уӕд хъуамӕ ӕппындӕр ма нуазӕм.

3. Иннӕтӕ нозты фӕдыл цы уынаффӕ рахастой, уымӕн нӕ бон аргъ кӕнын куыд у?

Алчидӕр хъуамӕ аскъуыддзаг кӕна, нуаздзӕн ӕви нӕ. Бӕрцӕй нуаздзынӕн, зӕгъгӕ, чи аскъуыддзаг кодта, уыдонӕн хъуамӕ ма тӕрхон кӕнӕм. Нуазын кӕй нӕ фӕнды, уыдонӕн та хъуамӕ тыххӕй ма нуазын кӕнӕм (Ромӕгтӕм 14:10). Ӕмӕ, кӕй нуазӕм, уый искӕмӕн цӕлхдур куы уа, уӕд ӕппындӕр нӕ нуаздзыстӕм. (Бакӕс Ромӕгтӕм 14:21.) Мах хъуыды кӕнӕм иннӕты пайдайыл, нӕхи пайдайыл нӕ, фӕлӕ. (Бакӕс 1 Коринфӕгтӕм 10:23, 24.)

ФЫЛДӔР БАЗОН

4. Аскъуыддзаг кӕн, нуаздзынӕ ӕви нӕ

Йесо нозтмӕ цы цӕстӕй каст? Ацы фарстайӕн дзуапп базоныны тыххӕй бакӕс, Йесо фыццаг цы диссаг сарӕзта, уый тыххӕй. Бакӕсут Иоанны 2:1–11 ӕмӕ стӕй аныхас кӕнут ацы фарстатыл:

• Ацы диссагӕй нӕ бон цы у базонын, Йесо нозтмӕ ӕмӕ, чи нуазы, уыдонмӕ цы цӕстӕй кӕсы, уый тыххӕй?

• Йесо нозты ныхмӕ кӕй нӕ уыд, уымӕ гӕсгӕ чырыстӕттӕ цы цӕстӕй хъуамӕ кӕсой, чи нуазы, уыдонмӕ?

Кӕд чырыстӕттӕн нуазӕн ис, уӕддӕр хатт хуыздӕр вӕййы, цӕмӕй-иу ма бануазӕм. Бакӕсут Ӕмбисӕндтӕ 22:3 ӕмӕ стӕй ахъуыды кӕн, дӕлдӕр цы уавӕртӕ ис, уыдоны бануазис ӕви нӕ, ууыл:

• хъӕудзӕн дӕ машинӕ скъӕрын кӕнӕ техникӕимӕ архайын;

• сывӕрджын дӕ;

• дохтыр дын нуазын нӕ уадзы;

• нозтӕй бӕрц нӕ зоныс;

• закъонмӕ гӕсгӕ дын нуазыны бар нӕй;

• раздӕр нозтӕй бӕрц чи нӕ зыдта ӕмӕ ныр ӕппындӕр чи нал нуазы, ахӕм адӕймагимӕ дӕ.

Чындзӕхсӕвты кӕнӕ ӕндӕр бадтыты хъуамӕ ӕнӕмӕнг нозт ӕрӕвӕрай? Уый фӕдыл дын уынаффӕ рахӕссынӕн баххуыс кӕндзӕн видеоролик. Бакӕсут ВИДЕОРОЛИКМӔ.

ВИДЕОРОЛИК: «Фынгыл нозт ӕрӕвӕрон ӕви нӕ?» (2:41)

Бакӕсут Ромӕгтӕм 13:13 ӕмӕ 1 Коринфӕгтӕм 10:31, 32. Алы стихы фӕстӕ дӕр-иу аныхас кӕнут ацы фарстайыл:

• Ацы уагӕвӕрд дын куыд баххуыс кӕндзӕн, Йегъовӕйы зӕрдӕ кӕмӕй барухс уыдзӕн, ахӕм уынаффӕ рахӕссынӕн?

5. Аскъуыддзаг кӕн, цас нуаздзынӕ, уый

Кӕд нуазыс, уӕд дӕ зӕрдыл бадар: кӕд Йегъовӕ нозты ныхмӕ нӕу, уӕддӕр фыднозт кӕнын тӕригъӕдыл нымайы. Цӕмӕн? Бакӕсут Осийы 4:11, 18 ӕмӕ стӕй аныхас кӕнут ацы фарстайыл:

• Ӕгӕр бирӕ нуазын тӕссаг цӕмӕй у?

Цы нын баххуыс кӕндзӕн, цӕмӕй ӕгӕр бирӕ ма нуазӕм? Хъуамӕ уӕм бонзонгӕ, ома нӕ бӕрц зонӕм. Бакӕсут Ӕмбисӕндтӕ 11:2 ӕмӕ стӕй аныхас кӕнут ацы фарстайыл:

• Хорз цӕмӕн у, цӕмӕй, цас нуаздзынӕ, уый аскъуыддзаг кӕнай ӕмӕ уымӕй фылдӕр ма нуазай?

6. Адӕймагӕн цы баххуыс кӕндзӕн, цӕмӕй фыднозт мауал кӕна

ВИДЕОРОЛИК: «Мӕ цардӕй сфӕлмӕцыдтӕн» (6:32)

• Дмитрий-иу нозтджынӕй цыхуызӕн уыд?

• Йӕ нозт ныууадзын йӕ бон уайтагъд баци ӕви нӕ?

• Йӕ нозт ныууадзынӕн ын цы баххуыс кодта?

Бакӕсут 1 Коринфӕгтӕм 6:10, 11 ӕмӕ стӕй аныхас кӕнут ацы фарстатыл:

• Библийы фыднозт кӕныны тыххӕй цы фыст ис?

• Цӕмӕй бӕрӕг у, фыднозт чи кӕны, уыдонӕн сӕ бон аивын кӕй у?

Бакӕсут Матфейы 5:30 ӕмӕ стӕй аныхас кӕнут ацы фарстайыл:

• Йесойы ныхӕстӕ, дӕ къух ралыг кӕн, зӕгъгӕ, ууыл дзурӕг сты, ӕмӕ нӕ цӕуылдӕрты нӕ къух сисын бахъӕуы, цӕмӕй Йегъовӕйы зӕрдӕ рухс кӕнӕм. Кӕд нозтмӕ ӕмхиц дӕ, уӕд дын цы баххуыс кӕндзӕн, цӕмӕй йӕ ныууадзай?a

Бакӕсут 1 Коринфӕгтӕм 15:33 ӕмӕ стӕй аныхас кӕнут ацы фарстайыл:

• Фыднозт кӕнын чи уарзы, уыдонимӕ куы лымӕн кӕнай, уӕд дыл уый куыд фӕзындзӕн?

ЦЫ БАЗЫДТАЙ

Йегъовӕ нозт радта, цӕмӕй адӕймаджы зӕрдӕ хъӕлдзӕг кӕна. Фӕлӕ Йегъовӕ у фыднозт кӕныны ныхмӕ.

Дӕ зӕрдыл ӕрлӕууын кӕн

• Библийы нозты тыххӕй цы фыст ис?

• Фыднозт кӕнын тӕссаг цӕмӕй у?

• Нӕ бон куыд у ӕвдисын, иннӕтӕ нозты фӕдыл цы уынаффӕ рахастой, уымӕн кӕй аргъ кӕнӕм?

ФЫЛДӔР ӔРМӔГ

Ӕрыгӕттӕн цы ’ххуыс кӕндзӕн нозты фӕдыл раст уынаффӕтӕ хӕссынӕн?

«Нозт цӕмӕ ӕркӕны, ууыл-иу ахъуыды кӕн» (2:31)

Базон, адӕймагӕн йӕ бон цы у саразын, цӕмӕй фыднозт мауал кӕна.

«Нозтӕй хъӕуы бӕрц зонын» (2010 азы 1 январы «Хъахъхъӕнӕн мӕсыг»)

Чырыстӕттӕн сидтытӕ уадзын ӕмбӕлы?

«Кӕсджыты фарстатӕ» (2007 азы 15 февралы «Хъахъхъӕнӕн мӕсыг», уырыссаг)

Иу нӕлгоймаджы царды хабарӕй, «Ӕз уыдтӕн „ӕнӕбын боцкъа“», зӕгъгӕ, базондзынӕ, йӕ нозт ныууадзынӕн ын цы баххуыс кодта.

«Библи ивы адӕймаджы цард» (2012 азы 1 майы «Хъахъхъӕнӕн мӕсыг»)

Алчидӕр нӕ йӕхӕдӕг ӕвзары, йӕ конд ӕмӕ йӕ уынд цыхуызӕн уыдзысты, уый. Библийы уагӕвӕрдтӕ нын баххуыс кӕндзысты, цӕмӕй ӕвзарӕм, нӕхи зӕрдӕмӕ дӕр чи цӕуа ӕмӕ Йегъовӕйы цӕсты дӕр аив чи уа, ахӕм дзаумӕттӕ. Цӕй ӕмӕ уыцы уагӕвӕрдтӕй цалдӕрмӕ ӕркӕсӕм.

1. Цавӕр уагӕвӕрдтӕ нын баххуыс кӕндзысты, не ’ддаг бакаст цыхуызӕн уыдзӕн, уый фӕдыл уынаффӕ хӕсгӕйӕ?

Нӕ дзаумӕттӕ хъуамӕ уой «аив». Ӕмӕ нӕ конд ӕмӕ нӕ уындӕй хъуамӕ бӕрӕг уа, кӕй стӕм «хӕдӕфсарм ӕмӕ ӕмбаргӕ», стӕй «Хуыцауыл иузӕрдион» (1 Тимофеймӕ 2:9, 10). Ацы цыппар уагӕвӕрдыл бӕстондӕр аныхас кӕнӕм. 1) Нӕ дзаумӕттӕ хъуамӕ уой «аив». Ӕвӕццӕгӕн, ӕмбырды бафиппайдтай, хотӕ ӕмӕ ’фсымӕртӕ ӕмхуызон конд кӕй нӕ вӕййынц. Фӕлӕ сӕ дарӕсӕй ӕмӕ сӕ сӕрыфастӕй бӕрӕг вӕййы, Хуыцауӕн кӕй кад кӕнынц. 2) Нӕ дарӕсӕй хъуамӕ бӕрӕг уа «хӕдӕфсарм» кӕй стӕм. Ома хъуамӕ ахӕм дзаумӕттӕ ма дарӕм, цӕмӕй махмӕ кӕсгӕйӕ иннӕтӕм ӕнӕгъдау хъуыдытӕ фӕзына кӕнӕ та цӕмӕй адӕмы нӕхимӕ ӕркӕсын кӕнӕм. 3) «Ӕмбаргӕ» кӕй стӕм, уый та уымӕй уыдзӕн бӕрӕг, ӕмӕ куы нӕ архайӕм, цӕмӕй ӕдзух фӕстаг модӕмӕ гӕсгӕ конд уӕм, цавӕрфӕнды ма уа, уӕддӕр. 4) Не ’ддаг бакастӕй хъуамӕ алкӕддӕр бӕрӕг уа, «Хуыцауыл иузӕрдион» кӕй стӕм ӕмӕ ӕцӕг Хуыцауӕн кӕй лӕггад кӕнӕм (1 Коринфӕгтӕм 10:31).

2. Не ’ддаг бакаст не ’мчырыстӕттыл куыд бандавы?

Кӕд махӕй алкӕмӕн дӕр йӕ бон у ӕвзарын, цы дардзӕни, уый, уӕддӕр-иу хъуамӕ ахъуыды кӕнӕм: «Мӕ конд ӕмӕ мӕ уынд иннӕтыл куыд бандавдзӕн?» Мах фӕнды нӕ хоты ӕмӕ не ’фсымӕрты ӕнкъарӕнтыл хъуыды кӕнын ӕмӕ ацы уагӕвӕрдмӕ гӕсгӕ архайын: «Алчидӕр нӕ хъуыды кӕнӕд, иннӕмӕн хуыздӕр цы уыдзӕн ӕмӕ йӕ фидардӕр цы фӕкӕндзӕн, ууыл». (Бакӕс Ромӕгтӕм 15:1, 2.)

3. Не ’ддаг бакаст иннӕтӕн куыд баххуыс кӕндзӕн рӕстдзинад базонынӕн?

Нӕ уӕлӕ цы скӕндзыстӕм, уый ӕвзаргӕйӕ фӕхъуыды кӕнӕм, кӕм цавӕр дзаума сфидаудзӕн, ууыл. Фӕлӕ нӕ уӕлӕдарӕсыл уӕлдай тынгдӕр фӕхъуыды кӕнӕм, ӕмбырдмӕ кӕнӕ уацамынды куы фӕцӕуӕм, уӕд. Мах фӕнды, цӕмӕй адӕм се ’ргом не ’ддаг бакастмӕ ма здахой, фӕлӕ сын цы ахсджиаг хабар дзурӕм, уымӕ. Фӕнды нӕ, цӕмӕй нӕ конд ӕмӕ нӕ уындӕй «нӕ Ирвӕзынгӕнӕг Хуыцауы ахуырад рӕсугъд кӕнӕм» ӕмӕ-иу адӕмы хорз хабармӕ байхъусын бафӕнда (Титмӕ 2:10).

ФЫЛДӔР БАЗОН

4. Нӕ аив ӕддаг бакастӕй кад хӕссӕм Йегъовӕйӕн

Сӕйраджыдӕр нӕ цӕмӕн фӕнды, цӕмӕй нӕ конд ӕмӕ нӕ уынд аив уой? Бакӕсут Псалом 47:2 ӕмӕ стӕй аныхас кӕнут ацы фарстатыл:

• Йегъовӕйы ном кӕй хӕссӕм, уый куыд хъуамӕ ӕндава, цы дарӕм ӕмӕ нӕ бакаст цыхуызӕн у, ууыл?

• Дӕумӕ гӕсгӕ, ӕмбырдтӕм ӕмӕ хъусын кӕнынмӕ цавӕр дзаумӕтты фӕцӕуӕм, ууыл хъуыды кӕнын хъӕуы? Афтӕ цӕмӕн зӕгъыс?

5. Цы нын баххуыс кӕндзӕн, цӕмӕй не ’ддаг бакаст аив уа?

Бакӕсут ВИДЕОРОЛИКМӔ.

ВИДЕОРОЛИК: «Алцыдӕр аразут Хуыцауы кадӕн» (10:18)

Нӕ дзаумӕттӕ зынаргъ уой ӕви аслам, уӕддӕр хъуамӕ уой сыгъдӕг. Стӕй хъуамӕ ӕмбарӕм, кӕм цавӕр дзаума сфидаудзӕн, уый. Бакӕсут 1 Коринфӕгтӕм 10:24 ӕмӕ 1 Тимофеймӕ 2:9, 10. Стӕй аныхас кӕнут ацы фарстатыл:

• Куыдфӕндыйы кӕндтытӕ цӕуылнӕ хъуамӕ уӕм?

• Ӕлхъывд, гом кӕнӕ, иннӕтӕм ӕвзӕр хъуыдытӕ кӕй тыххӕй фӕзына, ахӕм дзаумӕттӕ цӕуылнӕ хъуамӕ дарӕм?

Кӕд чырыстӕтты Моисейы закъон ӕххӕст кӕнын нӕ хъӕуы, уӕддӕр дзы бирӕ цыдӕртӕ ис базонӕн, Йегъовӕ куыд хъуыды кӕны, уый тыххӕй. Бакӕсут Дыккаг закъон 22:5 ӕмӕ стӕй аныхас кӕнут ацы фарстайыл:

• Нӕлгоймаджы сылгоймаджы хуызӕн чи кӕны, сылгоймаджы та нӕлгоймаджы хуызӕн, ахӕм дзаумӕттӕ цӕуылнӕ хъуамӕ дарӕм ӕмӕ нӕ сӕрыфаст ахӕм цӕуылнӕ хъуамӕ уа?

Бакӕсут 1 Коринфӕгтӕм 10:32, 33 ӕмӕ 1 Иоанны 2:15, 16 ӕмӕ стӕй аныхас кӕнут ацы фарстатыл:

• Не ’ддаг бакаст цыхуызӕн уыдзӕн, уый фӕдыл уынаффӕ хӕсгӕйӕ не ’мчырыстӕтты ӕмӕ иннӕ адӕмы ӕнкъарӕнтыл цӕмӕн хъуамӕ хъуыды кӕнӕм?

• Кӕм цӕрыс, уым адӕмӕн сӕ фылдӕр цы дарынц ӕмӕ сӕ сӕрыфаст цыхуызӕн у?

• Дӕумӕ гӕсгӕ, чырыстӕттӕ дӕр ахӕм кондӕй куы цӕуой, уӕд уый раст уыдзӕн? Афтӕ цӕмӕн хъуыды кӕныс?

ЦЫ БАЗЫДТАЙ

Нӕ конд ӕмӕ нӕ уынд аив куы вӕййынц, уӕд бӕрӕг вӕййы Йегъовӕйӕн дӕр ӕмӕ иннӕтӕн дӕр кӕй кад кӕнӕм.

Дӕ зӕрдыл ӕрлӕууын кӕн

• Нӕ конд ӕмӕ нӕ уынд цыхуызӕн сты, уымӕ Йегъовӕ куыдфӕндыйы цӕстӕй цӕуылнӕ кӕсы?

• Не ’ддаг бакаст цыхуызӕн уыдзӕн, уый фӕдыл уынаффӕ хӕсгӕйӕ цавӕр уагӕвӕрдтыл хъуамӕ хъуыды кӕнӕм?

• Не ’ддаг бакаст, гӕнӕн ис, куыд бандава, адӕм рӕстдзинадмӕ цы цӕстӕй ракӕсдзысты, ууыл?

ФЫЛДӔР ӔРМӔГ

Базон, дӕ дзаумӕттӕм гӕсгӕ дӕ иннӕтӕ, гӕнӕн ис, цы ахъуыды кӕной.

«Мӕ бакаст куыд у?» (интернет-статья)

Базон, татуировкӕ скӕныны размӕ хорз ахъуыды кӕнын цӕмӕн хъӕуы.

«Татуировкӕты тыххӕй Библи цы дзуры?» (интернет-статья)

Базон, ноджыдӕр дын цавӕр уагӕвӕрдтӕ баххуыс кӕндзысты, де ’ддаг бакаст цыхуызӕн уыдзӕн, уый фӕдыл уынаффӕтӕ хӕсгӕйӕ.

«Дӕ уӕлӕдарӕсӕй Хуыцауӕн кад хӕссыс?» (2016 азы сентябры «Хъахъхъӕнӕн мӕсыг»)

Базон, иу сылгоймагӕн цы баххуыс кодта иннӕтӕн сӕ конд ӕмӕ сӕ уындмӕ раст цӕстӕй кӕсынӕн.

«Иннӕты конд ӕмӕ уынд мын цӕлхдур уыдысты» (2003 азы 22 декабры «Райхъал ут!», уырыссаг)