КЪУЫРИСӔРЫ изӕрӕй Йесо Иерусалимӕй фӕстӕмӕ аздӕхт Вифанимӕ. Уый ис Елеоны хохы скӕсӕн фарс. Фесты Иерусалимы йӕ лӕггаддзинады фӕстаг дыууӕ боны. Кӕй зӕгъын ӕй хъӕуы, Йесо ныр дӕр ӕхсӕвуиат кӕны йӕ хӕлар Лазӕрмӕ. Майрӕмбоны Иерихонӕй куы ӕрцыд, уӕдӕй нырмӕ цыппӕрӕм ӕхсӕв ӕрвиты Вифанийы.

11 нисаны, дыццӕджы, райсомӕй раджы та йӕ ахуыргӕнинӕгтимӕ ис фӕндагыл. Ацы бон у Йесойы лӕггаддзинады сӕйраг ӕмӕ ӕппӕты ӕнӕвдӕлондӕр бон. Йесо фӕстаг хатт цӕуы кувӕндонмӕ. Йӕ тӕрхон ӕмӕ йӕ мӕлӕты размӕ зӕххыл лӕггад кӕны фӕстаг бон.

Ныр дӕр та Йесо ӕмӕ йӕ ахуыргӕнинӕгтӕ Иерусалиммӕ цӕуынц, алыхатт кӕуылты цыдысты, уыцы фӕндагыл, Елеоны хохыл. Вифанийӕ куы рахызтысты, уӕд Петр ауыдта, Йесо уый размӕ бон райсомӕй цы легъуибӕлас ралгъыста, уый ӕмӕ дзуры: «Ахуыргӕнӕг! акӕс-ма, Ды цы легъуи бӕлас ралгъыстай, уый бахус».

Фӕлӕ цӕмӕн бахус кодта Йесо уыцы бӕлас? Уый дзуры: «Ӕцӕг зӕгъын сымахӕн: куы уӕм уа уырнындзинад ӕмӕ дызӕрдыг куы нӕ кӕнат, уӕд лӕгъуи бӕласимӕ цы конд ӕрцыд, ӕрмӕст уый нӕ бакӕндзыстут, фӕлӕ куы зӕгъат ацы хохӕн [Елеоны хохӕн — кӕм лӕууынц, уымӕн]: „сыст ӕмӕ ныххау денджызмӕ“,— уыдзӕн; ӕмӕ ӕппӕт дӕр, цы ракурат кувгӕйӕ уырнындзинадимӕ, райсдзыстут».

Йесо легъуибӕлас кӕй бахус кодта, уымӕй йӕ ахуыргӕнинӕгтӕн цӕстуынгӕ хуызы равдыста, Хуыцауыл кӕй хъуамӕ ӕууӕндой. Дарддӕр уый дзуры: «Ӕппӕтдӕр, цы курат кувгӕйӕ, ӕууӕндут кӕй райсдзыстут,— ӕмӕ уыдзӕн сымахӕн». Тагъд сӕм стыр зындзинӕдтӕ кӕй ӕнхъӕлмӕ кӕсы, уымӕ гӕсгӕ сын ацы зондамынд тынг пайда у. Фӕлӕ ма, легъуибӕлас кӕй бахус, уый ӕмӕ уырнындзинады ’хсӕн ис ӕндӕр бастдзинад дӕр.

Легъуибӕласау Израилы адӕмӕн дӕр ис цӕстсайӕн ӕддаг бакаст. Кӕд уыцы адӕм Хуыцауимӕ цӕдисы сты ӕмӕ ахӕм хуыз ӕвдисынц, цыма йын йӕ фӕдзӕхстытӕ ӕххӕст кӕнынц, уӕддӕр сӕ хъуыддӕгтӕй сбӕлвырд кодтой, уырнындзинад ӕмӕ сӕм хорз дыргътӕ кӕй нӕй. Уый аххосӕй атигъ кӕндзысты сӕхи Хуыцауы Фыртыл дӕр! Уӕдӕ Йесо ӕнӕдыргъ легъуибӕлас кӕй бахус кодта, уымӕй равдыста, ӕнӕдыргъ, ӕнӕуырнӕг адӕммӕ цы ӕнхъӕлмӕ кӕсы, уый.

Гыццыл фӕстӕдӕр Йесо ӕмӕ йӕ ахуыргӕнинӕгтӕ ӕрхӕццӕ сты Иерусалиммӕ ӕмӕ та кувӕндонмӕ ацыдысты. Уым Йесо ахуыр кӕны адӕмы. Сауджынтӕ ӕмӕ адӕмы хистӕртӕй нӕма ферох, уый размӕ бон Йесо ӕхцаивджыты кӕй фӕсырдта, ӕмӕ йӕм ныр лӕбурӕгау кӕнынц: «Цавӕр хицауадӕй кӕныс Ды адон? ӕмӕ чи ратта Дӕуӕн ахӕм бар?»

Йесо сын дзуры: «Бафӕрсдзынӕн Ӕз дӕр сымах иу хъуыддагӕй; кӕд уый тыххӕй зӕгъат Мӕнӕн, уӕд Ӕз дӕр зӕгъдзынӕн сымахӕн, цавӕр хицауадӕй кӕнын адон; Иоанны аргъуыд кӕцӕй уыдис: ӕрвтӕй ӕви адӕймӕгтӕй?»

Сауджынтӕ ӕмӕ адӕмы хистӕртӕ сӕ кӕрӕдзиимӕ уынаффӕ кӕнынц, цавӕр дзуапп ын раттой: «Куы зӕгъӕм: „ӕрвтӕй“, уӕд нын Уый зӕгъдзӕн: „уӕдӕ цӕй тыххӕй сымах нӕ баууӕндыдыстут ууыл?“ Фӕлӕ куы зӕгъӕм: „адӕймӕгтӕй“ — тӕрсӕм адӕмӕй, уымӕн ӕмӕ уыдон иуылдӕр Иоанны нымайынц пехуымпарыл».

Разамонджытӕ цы дзуапп раттой, уый нӕ зонынц. Уымӕ гӕсгӕ Йесойӕн дзурынц: «Нӕ зонӕм».

Уӕд сын Йесо дзуры: «Ӕз дӕр нӕ зӕгъдзынӕн сымахӕн, цавӕр хицауадӕй кӕнын адон». Матфейы 21:19—27; Маркы 11:19—33; Лукайы 20:1—8.

▪ 11 нисан, дыццӕг, ахӕм ахсджиаг бон цӕмӕн у?

▪ Йесо легъуибӕлас кӕй бахус кодта, уымӕй нын цы зӕгъынмӕ хъавы?

▪ Йесойы куы бафарстой, цавӕр хицауадӕй архайыс, зӕгъгӕ, уӕд цы дзуапп ратта?

ЙЕСО ис кувӕндоны. Гыццыл раздӕр уый фӕкъӕмдзӕстыг кодта, кӕй хицауадӕй архайы, уый базонын кӕй фӕндыд, уыцы дины разамонджыты. Сӕхимӕ нӕма ӕрцыдысты, афтӕ сӕ Йесо фӕрсы: ‘Куыд уӕм кӕсы?’ Ӕмӕ сын уый фӕстӕ фӕсномыг ныхасӕй ӕвдисы, ӕцӕгӕй цавӕр адӕймӕгтӕ сты, уый.

«Иу адӕймагӕн уыд дыууӕ фырты,— дзуры Йесо,— ӕмӕ уый, бацӕугӕйӕ фыццагмӕ, загъта: мӕ фырт! ацу, абон бакус мӕ сӕнӕфсирдоны. Фӕлӕ уый загъта дзуаппӕн: „нӕ мӕ фӕнды“; уый фӕстӕ, ӕрфӕсмон кӕнгӕйӕ, ацыд. Ӕмӕ бацыд иннӕмӕ дӕр, уымӕн дӕр та афтӕ загъта. Уый загъта дзуаппӕн: „цӕуын, ӕлдар“; ӕмӕ нӕ ацыд». «Дыууӕйӕ кӕцы сӕххӕст кодта фыды фӕндон?» — фӕрсы сӕ Йесо.

«Фыццаг»,— дзуапп раттой йӕ ныхмӕлӕуджытӕ.

Уӕд сын Йесо дзуры: «Ӕцӕг зӕгъын сымахӕн, мытӕртӕ ӕмӕ хӕтджытӕ сымах разӕй цӕуынц Хуыцауы Паддзахадмӕ». Мытӕртӕ ӕмӕ хӕтаг адӕм фыццаг разы нӕ уыдысты Хуыцауӕн лӕггад кӕныныл. Фӕлӕ уый фӕстӕ фыццаг фыртау ӕрфӕсмон кодтой ӕмӕ лӕггад кӕнын райдыдтой Хуыцауӕн. Дины разамонджытӕ та дыккаг фыртау дзырдтой, зӕгъгӕ, Хуыцауӕн лӕггад кӕндзыстӕм, фӕлӕ Йесо куыд зӕгъы, афтӕмӕй аразгӕ та иннӕрдӕм кодтой: «Уымӕн ӕмӕ ӕрцыд сымахмӕ [Аргъауӕг] Иоанн рӕстдзинады фӕндагыл ӕмӕ йыл сымах нӕ баууӕндыдыстут, фӕлӕ мытӕртӕ ӕмӕ хӕтджытӕ баууӕндыдысты ууыл; сымах та, фенгӕйӕ адон, уый фӕстӕ нӕ ӕрфӕсмон кодтат, цӕмӕй баууӕндат ууыл».

Уый фӕстӕ Йесо ӕвдисы, дины разамонджытӕ Хуыцауӕн кӕй нӕ лӕггад кӕнынц, ӕрмӕст уый тыххӕй кӕй не сты зылынджын. Уыдон ӕцӕгдӕр сты ӕвзӕр, фыдзӕрдӕ адӕймӕгтӕ. «Уыдис иу хӕдзары хицау,— дзуры Йесо,— кӕцы ныссагъта сӕнӕфсирдон, йӕ алыварс ын сӕхгӕдта, скъахта дзы сӕнлӕмарӕн, сарӕзта мӕсыг ӕмӕ йӕ ратгӕйӕ сӕнӕфсирдоны кусджытӕм, ацыд. Дыргъты афон куы ӕрбахӕццӕ ис, уӕд арвыста йӕ ӕххуырстыты сӕнӕфсирдоны кусджытӕм, йӕ дыргътӕ исынмӕ; сӕнӕфсирдоны кусджытӕ, ӕрцахсгӕйӕ йӕ ӕххуырстыты, кӕй фӕнадтой, кӕй амардтой, кӕй та дуртӕй амардтой. Ноджыдӕр та арвыста уый ӕндӕр ӕххуырстыты фылдӕр фыццӕгтӕй; ӕмӕ уыдонӕн дӕр афтӕ бакодтой».

«Ӕххуырстытӕ» сты, «хӕдзары хицау» Иегъовӕ Хуыцау йӕ «сӕнӕфсирдоны кусджытӕм» кӕй ӕрвыста, уыцы пехуымпартӕ. Сӕнӕфсирдоны кусджытӕ сты израилаг адӕмы разамонджытӕ. Библи куыд ӕвдисы, афтӕмӕй адӕм та сты Хуыцауы «сӕнӕфсирдон».

«Сӕнӕфсирдоны кусджытӕ» «ӕххуырстыты» кӕй фӕнадтой ӕмӕ сӕ кӕй амардтой, уый тыххӕй радзургӕйӕ, Йесо зӕгъы: «Фӕстагмӕ арвыста уый уыдонмӕ йӕ фырты, зӕгъгӕйӕ: мӕ фыртӕй фефсӕрмы уыдзысты. Фӕлӕ сӕнӕфсирдоны кусджытӕ, фенгӕйӕ фырты, загътой кӕрӕдзийӕн: уый бындар у; ацӕуӕм, амарӕм ӕй ӕмӕ йӕ бынтӕ нӕхи бакӕнӕм. Ӕмӕ ӕрцахсгӕйӕ уый, ракодтой ӕддӕмӕ сӕнӕфсирдонӕй ӕмӕ йӕ амардтой».

Ныр Йесо фӕрсы дины разамонджыты: «Уӕдӕ, куы ӕрцӕуа сӕнӕфсирдоны хицау, уӕд цы бакӕндзӕн уый уыцы сӕнӕфсирдоны кусджытӕн?»

«Уыцы фыдгӕнджыты ратдзӕн фыдмӕлӕтмӕ, сӕнӕфсирдон та ратдзӕн ӕндӕр кусджытӕм, кӕцытӕ уымӕн дӕтдзысты дыргътӕ сӕ афоныл»,— дзуапп раттой дины разамонджытӕ.

Бар-ӕнӕбары сӕхицӕн тӕрхон рахастой, уымӕн ӕмӕ уыдон дӕр Израилы «сӕнӕфсирдоны кусджытӕй» сты ӕмӕ уыдон дӕр Иегъовӕйы «сӕнӕфсирдоны», ома Израилы адӕмы ’хсӕн кусынц. Иегъовӕ уыцы сӕнӕфсирдоны кусджытӕй цы дыргъмӕ ӕнхъӕлмӕ кӕсы, уый уый мидӕг ис, цӕмӕй йын йӕ Фыртыл, ӕцӕг Мессиайыл ӕууӕндой. Ӕмӕ сӕм уыцы дыргъ кӕй нӕй, уымӕ гӕсгӕ сӕ Йесо фӕдзӕхсы: «Ӕппын сымах никуы кастыстут Фысты [Псалом 117:22, 23]: „дур, кӕцы аиуварс кодтой аразджытӕ, гъе уый сси фисыны сӕр: уый — у Хицауӕй, ӕмӕ у диссаг мах цӕстыты“? Уымӕ гӕсгӕ зӕгъын сымахӕн, ист кӕй уыдзӕн сымахӕй Хуыцауы Паддзахад ӕмӕ лӕвӕрд уыдзӕн йӕ дыргътӕ хӕссӕг адӕмӕн; ӕмӕ уый, кӕцы ӕрхауа ацы дурыл, ныппырх уыдзӕн; фӕлӕ хаугӕ кӕуыл ӕркӕна, уый та ныцъцъӕл кӕндзӕн».

Чиныджы дӕснытӕ ӕмӕ хистӕр сауджынтӕ бамбӕрстой, Йесо уыдон тыххӕй кӕй дзуры, ӕмӕ ныр уый, ӕцӕг «бындары», хъавынц амарынмӕ. Гъе уымӕ гӕсгӕ уыцы адӕмӕй ист ӕрцӕудзӕн Хуыцауы Паддзахады хицауиуӕг кӕныны кадджын бар ӕмӕ арӕзт ӕрцӕудзӕн, хорз дыргътӕ чи хӕсса, ахӕм «сӕнӕфсирдоны кусджыты» ног адӕм.

Адӕм Йесойы пехуымпарыл кӕй нымайынц, уымӕ гӕсгӕ дины разамонджытӕ ныртӕккӕ сӕ ныфс нӕ бахастой йӕ амарынмӕ. Матфейы 21:28—46; Маркы 12:1—12; Лукайы 20:9—19; Исайы 5:1—7.

▪ Кӕй ӕвдисынц Йесойы фыццаг фӕсномыг ныхасы дыууӕ фырты?

▪ Дыккаг фӕсномыг ныхасы «хицау», «сӕнӕфсирдон», «сӕнӕфсирдоны кусджытӕ», «ӕххуырстытӕ» ӕмӕ «бындар» чи сты?

▪ Цы ’рцӕудзӕн «сӕнӕфсирдоны кусджытыл» ӕмӕ сын сӕ бынат чи бацахсдзӕн?

ДЫУУӔ фӕсномыг ныхасӕй Йесо хурмӕ ракалдта чиныджы дӕсныты ӕмӕ хистӕр сауджынты миддуне, ӕмӕ йӕ уый тыххӕй марынмӕ хъавынц. Фӕлӕ Йесо йӕ ныхас нӕма фӕци. Дарддӕр сын дзуры ӕндӕр фӕсномыг ныхас:

«Уӕларвон Паддзахад у адӕймаг паддзахы хуызӕн, кӕцы скодта чындзӕхсӕв йӕ фыртӕн ӕмӕ арвыста йӕ цагъарты хуындтытӕм фӕдзурынмӕ чындзӕхсӕвмӕ; ӕмӕ уыдоны нӕ фӕндыд ӕрбацӕуын».

Паддзах у Иегъовӕ Хуыцау, ӕмӕ уый йӕ Фырт Йесо Чырыстийӕн скодта чындзӕхсӕв. Чындз конд у 144 000 сыгъдӕг удӕй сӕрст фӕдонӕй, ӕмӕ фӕстагмӕ уыдон Йесоимӕ уӕларвыл баиу уыдзысты. Паддзахы минӕвӕрттӕ сты, н. э. агъоммӕ 1513 азы Закъоны цӕдисы чи бацыд ӕмӕ, «сауджынты паддзахад» цӕмӕй суыдаиккой, уый фадат кӕмӕн уыд, уыцы израилӕгтӕ. Уымӕ гӕсгӕ чындзӕхсӕвмӕ фыццаг уыдон ӕрцыдысты хуынд.

Ӕрмӕст хуындтытӕм фыццаг хатт фӕдзырдтой ӕрмӕстдӕр н. э. 29 азы фӕззӕджы, Йесо ӕмӕ йӕ ахуыргӕнинӕгтӕ (паддзахы цагъартӕ) Паддзахады уацхъуыд куы райдыдтой хъусын кӕнын, уӕд. Фӕлӕ н. э. 29—33 азмӕ цагъартӕ кӕмӕн хъусын кодтой, уыцы зӕххон израилӕгты нӕ бафӕндыд ӕрбацӕуын. Ӕмӕ Йесо куыд зӕгъы, афтӕмӕй уыцы хуынд адӕмӕн Хуыцау ратта ноджы иу фадат:

«Ноджы арвыста ӕндӕр цагъарты, зӕгъгӕйӕ: зӕгъут хуындтытӕн: „мӕнӕ ӕз ӕрцӕттӕ кодтон мӕ сихор, родтӕ ӕмӕ цы фӕхастон, уыдон ӕргӕвст сты ӕмӕ ӕппӕт дӕр цӕттӕ у; ӕрцӕут чындзӕхсӕвы минасмӕ“». Ацы дыккаг ӕмӕ фӕстаг ӕрхуынд рацыд н. э. 33 азы Фӕндзайӕм бон, Йесойы фӕдылдзӕуджытыл сыгъдӕг уд куы ӕрцыд, уӕд. Ӕмӕ уыцы хуынд йӕ тыхы уыд н. э. 36 азмӕ.

Фӕлӕ израилӕгтӕн сӕ фылдӕр ӕнӕрвӕссонӕй аиуварс кодтой уыцы хуынд дӕр. Йесо дзуры: «Уыдон, ницӕмӕ ӕрдаргӕйӕ уый, ацыдысты чи йӕ хуыммӕ, чи та базар кӕнынмӕ; иннӕтӕ та, ӕрцахсгӕйӕ йӕ цагъарты, бафхӕрдтой ӕмӕ амардтой уыдоны». «Паддзах смӕсты,— йӕ ныхас дарддӕр кӕны Йесо,— ӕмӕ арвитгӕйӕ йӕ ӕфсады, ныццагъта уыцы марджыты ӕмӕ басыгъта сӕ сахар». Уый ӕрцыд н. э. 70 азы, ромӕгтӕ Иерусалимӕй дур-дурыл куы нал ныууагътой ӕмӕ уыцы лӕгмарты куы ныццагътой, уӕд.

Уый фӕстӕ Йесо дзуры дарддӕры цаутӕ: «Уӕд зӕгъы уый [паддзах] йӕ цагъартӕн: чындзӕхсӕвы минас цӕттӕ у, фӕлӕ хуындтытӕ аккаг нӕ уыдысты; уӕдӕ ацӕут алвӕндагмӕ ӕмӕ кӕй ссарат, сеппӕты дӕр ӕрбахонут чындзӕхсӕвы минасмӕ». Раст афтӕ бакодтой цагъартӕ ӕмӕ «чындзӕхсӕвы фынг байдзаг бадджытӕй».

Сахары ӕддейӕ, фӕндаггӕрӕтты кӕй ссардтой, уыцы уазджытӕ ӕмбырд кӕнын райдыдтой н. э. 36 азы. Ӕнӕсунӕт адӕмтӕй фыццӕгтӕ уыдысты ромаг сӕдӕйы хицау Корнилий ӕмӕ йӕ бинонтӕ. Хуыцау фыццаг кӕй фӕхуыдта ӕмӕ чи не ’рбацыд, уыдоны бынӕттӕ чи хъуамӕ бацахса, уыцы ӕнӕ-иудейтӕ ӕмбырдгонд цӕуынц суанг XX ӕнусмӕ.

Абон, XX ӕнусы, чындзӕхсӕвы уат фӕдзаг кӕны. Йесо дзуры, уый фӕстӕ цы ӕрцӕудзӕн: «Паддзах, бацӕугӕйӕ бадджыты фенынмӕ, ӕмӕ дзы фенгӕйӕ чындзӕхсӕвы дарӕс кӕуыл нӕ уыд, ахӕм адӕймаджы, зӕгъы уымӕн: мӕ хӕлар! куыд ӕрбацыдтӕ ардӕм ды ӕнӕ чындзӕхсӕвы дарӕсы? Уый та ницы дзырдта. Уӕд загъта паддзах йӕ цагъартӕн: бабӕтгӕйӕ уымӕн йӕ къухтӕ ӕмӕ къӕхтӕ, сисут ӕмӕ йӕ аппарут ӕддагон талынгмӕ: уым уыдзӕн кӕуын ӕмӕ дӕндӕгты хъыс-хъыс».

Чындзӕхсӕвы дарӕс кӕуыл нӕ уыд, уыцы адӕймаг ӕвдисы мӕнгчырыстӕтты. Хуыцау сӕ никуы нымадта, духовон израилӕгты хицӕнгӕнӕг миниуджытӕ кӕмӕ ис, уыдоныл. Уӕдӕ куыд Паддзахады бындартӕ, афтӕ сӕ сыгъдӕг удӕй дӕр никуы байсӕрста. Уымӕ гӕсгӕ уыдон ӕппӕрст ӕрцӕудзысты ӕддагон талынгмӕ ӕмӕ сӕ кой дӕр никуыуал уыдзӕн.

Йесо йӕ фӕсномыг ныхас фӕуд кӕны ахӕм ныхӕстӕй: «Уымӕн ӕмӕ бирӕ сты хуындтытӕ, гыццыл сты ӕвзӕрстытӕ». Ӕмӕ ӕцӕгдӕр, Израилы адӕмӕй бирӕтӕ уыдысты хуынд, цӕмӕй Чырыстийы чындзы уӕнгтӕ суыдаиккой, фӕлӕ дзы ӕрмӕстдӕр иуӕй-иутӕ ӕрцыдысты ӕвзӕрст. Уӕларвон хорзӕх цы 144 000 уазӕгмӕ ӕнхъӕлмӕ кӕсы, уыдонӕн сӕ фылдӕр сты ӕнӕизраилӕгтӕ. Матфейы 22:1—14; Рацыд 19:1—6; Раргомад 14:1—3.

▪ Чындзӕхсӕвмӕ фыццаг кӕй ӕрхуыдтой ӕмӕ кӕд?

▪ Хуындтытӕм фыццаг хатт кӕд фӕдзырдтой ӕмӕ чи сты хонӕг цагъартӕ?

▪ Дыккаг хатт сӕм кӕд фӕдзырдтой ӕмӕ уый фӕстӕ хуынд чи ӕрцыд?

▪ Чындзӕхсӕвы дарӕс кӕуыл нӕ уыд, уыцы адӕймаг кӕй ӕвдисы?

▪ Чи сты бирӕ хуындтытӕ ӕмӕ гыццыл ӕвзӕрстытӕ?

ЙЕСО нырма ис кувӕндоны. Гыццыл раздӕр ӕртӕ фӕсномыг ныхасӕй раргом кодта йӕ ныхмӕлӕуджыты фыдзӕрдӕдзинад. Ныр фарисейтӕ фырмӕстӕй фыцынц ӕмӕ уынаффӕ кӕнынц, цӕмӕй йын ахӕм исты зӕгъын кӕной, цӕй ӕфсонӕй йӕ ӕрцахсой. Куы бауынаффӕ кодтой, уӕд сӕ ахуыргӕнджыты ӕмӕ Ироды партийы фарслӕуджыты барвыстой, цӕмӕй йӕ ныхасӕй ӕрцахсой.

«Ахуыргӕнӕг! — зӕгъынц уыдон,— мах зонӕм, Ды кӕй дӕ раст ӕмӕ ӕцӕг ахуыр кӕныс Хуыцауы фӕндагыл, ӕмӕ искӕйы зӕрдӕ балхӕныныл нӕ тыхсыс, уымӕн ӕмӕ нӕ кӕсыс цӕсгӕмттӕм; уӕдӕ зӕгъ махӕн: куыд Дӕм кӕсы? кесӕрӕн хъалон фидын ӕмбӕлы ӕви нӕ?»

Йесойы нӕ фӕсайдтой сӕ зӕрдӕлхӕнӕн ныхӕстӕй. Уый ӕмбары, афтӕ куы зӕгъа: „Нӕ, уыцы хъалон фидыны бар нӕй“, уӕд ӕй Ромы ныхмӕ ардауӕгыл кӕй банымайдзысты. Афтӕ куы зӕгъа: „О, сымах хъуамӕ уыцы хъалон фидат“, уӕд та иудейты йӕ ныхмӕ скӕндзӕн, уымӕн ӕмӕ сын Ромы хицауиуӕгад ӕнӕуынон у. Уымӕ гӕсгӕ Йесо дзуапп дӕтты: «Цы Мӕ фӕлварут, цӕстмӕхъустӕ? Равдисут ма Мӕнмӕ хъалон цӕмӕй фидут, уыцы ӕхца».

Ӕхца куы ӕрбахастой, уӕд сӕ фӕрсы: «Кӕй ныв ӕмӕ уӕлфыст сты адон?»

«Кесӕры»,— дзуапп раттой уыдон.

«Уӕдӕ кесӕрыон кесӕрӕн дӕттут, Хуыцауыон та Хуыцауӕн». Уыцы куырыхон дзуапп фехъусгӕйӕ, нӕлгоймӕгтӕ дисгӕнгӕ аздӕхтысты ӕмӕ йӕ ныууагътой.

Фарисейтӕн Йесойы ныхасӕй ӕрцахсын сӕ бон кӕй не сси, уый фенгӕйӕ йӕ, райгасдзинадыл чи не ’ууӕнды, уыцы саддукейтӕ фӕрсынц: «Ахуыргӕнӕг! Моисей загъта: „исчи ӕнӕзӕнӕгӕй куы амӕла, уӕд йе ’фсымӕр йӕхицӕн уый усы ӕрбакӕнӕд усӕн ӕмӕ мыггаг сфидар кӕнӕд йе ’фсымӕрӕн“. Уыд махмӕ авд ӕфсымӕры: фыццаг ус ракуырдта ӕмӕ ӕнӕзӕнӕгӕй амард, йӕ усы ныууагъта йе ’фсымӕрӕн; афтӕ дыккаг дӕр, ӕртыккаг дӕр, суанг ӕвдӕмы онг; ӕппӕты фӕстӕ амард ус дӕр. Уӕдӕ, мӕрдты райгасы, уый авдӕй кӕцыйы ус уыдзӕн? уымӕн ӕмӕ сеппӕты дӕр уыд».

Йесо сын дзуры: «Уыдӕттӕй рӕдийут цымӕ сымах, нӕдӕр Фыст зонгӕйӕ, нӕдӕр Хуыцауы тых? Уымӕн ӕмӕ мӕрдтӕй куы райгас уой, уӕд нӕдӕр ус курдзысты, нӕдӕр мой кӕндзысты, фӕлӕ уыдзысты, куыд Зӕдтӕ уӕлӕрвты. Мӕрдты тыххӕй та, уыдон кӕй райгас уыдзысты, исты нӕ кастыстут Моисейы чиныджы, Хуыцау къутӕры раз куыд загъта уымӕн: „Ӕз Авраамы Хуыцау, Исахъы Хуыцау, ӕмӕ Иаковы Хуыцау“? Хуыцау нӕу мӕрдты Хуыцау, фӕлӕ ӕгӕсты Хуыцау. Уӕдӕ сымах иттӕг рӕдийут».

Адӕм та ныр дӕр дис кӕнынц Йесойы дзуаппыл. Суанг ма чиныджы дӕснытӕй дӕр иуӕй-иутӕ сразы сты: «Ахуыргӕнӕг! Ды хорз загътай».

Йесо саддукейты кӕй басаста, уый фарисейтӕ куы федтой, уӕд ӕм ӕнӕхъӕн къордӕй бацыдысты. Ногӕй та йӕ фӕлварынц, ӕмӕ йӕ чиныджы дӕснытӕй иу фӕрсы: «Ахуыргӕнӕг! цавӕр у ӕппӕтӕй стылдӕр фӕдзӕхст закъоны?»

Йесо дзуры: «Ӕппӕт фӕдзӕхстытӕй фыццаг у: „хъус, Израил! нӕ Хицау Хуыцау у иунӕг Хицау; ӕмӕ бауарз дӕ Хицау Хуыцауы дӕ ӕппӕт зӕрдӕйӕ, ӕмӕ дӕ ӕппӕт удӕй, ӕмӕ дӕ ӕппӕт зондӕй, ӕмӕ дӕ ӕппӕт хъаруйӕ“: мӕнӕ фыццаг фӕдзӕхст! Дыккаг дӕр уый хуызӕн: „бауарз дӕ хӕстӕджы, куыд дӕхӕдӕг дӕхи“: адонӕй стылдӕр фӕдзӕхст нӕй». Дарддӕр Йесо бафтыдта: «Ацы дыууӕ фӕдзӕхстыл фидаргонд сты ӕппӕт закъон ӕмӕ пехуымпартӕ».

«Ахуыргӕнӕг! ӕцӕгдзинад загътай Ды,— чиныджы дӕснытӕй иу сразы йемӕ,— иу кӕй у Хуыцау ӕмӕ нӕй ӕндӕр, Уый йеддӕмӕ; ӕмӕ уарзын Уый ӕппӕт зӕрдӕйӕ ӕмӕ ӕппӕт зондӕй, ӕмӕ ӕппӕт удӕй, ӕмӕ ӕппӕт хъаруйӕ, ӕмӕ уарзын хӕстӕджы дӕхи хуызӕн, у стылдӕр ӕппӕт басудзинӕгтӕ ӕмӕ нывӕндтӕй».

Йесо уыны, ацы адӕймаг ӕмбаргӕ дзуапп кӕй ратта, ӕмӕ йын дзуры: «Дард нӕ дӕ Хуыцауы Паддзахадӕй».

Ӕртӕ боны фӕд-фӕдыл — хуыцаубон, къуырисӕр ӕмӕ дыццӕджы — Йесо ахуыр кӕны кувӕндоны. Адӕм ӕм зӕрдиагӕй хъусынц, дины разамонджытӕ та йӕ хъавынц марынмӕ, кӕд уыцы хъуыддаг нырмӕ сӕ къухы не ’фты, уӕддӕр. Матфейы 22:15—40; Маркы 12:13—34; Лукайы 20:20—40.

▪ Фарисейтӕ Йесойы ныхасӕй ӕрцахсыныл куыд архайдтой ӕмӕ сын «о» кӕнӕ «нӕ» куы загътаид, уӕд цы ӕрцыдаид?

▪ Йесо саддукейты куыд басаста?

▪ Фарисейтӕ дыккаг хатт куыд фӕлварынц Йесойы ӕмӕ цы уыд йӕ фӕстиуӕг?

▪ Йесо Иерусалимы кувӕндоны йӕ фӕстаг лӕггаддзинады рӕстӕджы адӕмы цал боны ахуыр кодта ӕмӕ цы ӕрцыд уый фӕстиуӕгӕн?

ЙЕСО йӕ ныхмӕлӕуджыты афтӕ фӕкъӕмдзӕстыг кодта, ӕмӕ ма йӕ истӕмӕй бафӕрсой, уымӕ сӕ ныфс нал хӕссынц. Уымӕ гӕсгӕ Йесо ныхасы бар йӕхимӕ райста ӕмӕ сын хурмӕ ракалдта сӕ талынгдзинад. Фӕрсы сӕ: «Цы хъуыды кӕнут сымах Чырыстийы тыххӕй? Кӕй Фырт у Уый?»

«Давиды»,— дзуапп раттой фарисейтӕ.

Давид Чырыстийы кӕнӕ Мессиайы зӕххон фыдӕл кӕй уыд, уымӕ гӕсгӕ сӕ Йесо фӕрсы: «Уӕдӕ Давид уд цырынӕй [Псалом 109] Уый куыд хоны Хицау, куы дзуры: „Загъта Хицау [«Иегъовӕ», СПб] мӕ Хицауӕн: сбад Мӕ рахизварс, цалынмӕ Де знӕгты ӕрӕвӕрон Дӕ къӕхты бын“? Уӕдӕ, кӕд Давид Уый Хицау хоны, уӕд куыд у Уый Уымӕн Фырт?»

Фарисейтӕ ницы дзурынц, уымӕн ӕмӕ нӕ зонынц, Чырысти кӕнӕ та Сӕрст ӕцӕгӕй чи у. Куыд зыны, афтӕмӕй фарисейтӕ хъуыды кӕнынц, Мессиа Давидӕн ӕрмӕстдӕр йӕ зӕххон байзӕддаг кӕй у. Фӕлӕ уый афтӕ нӕу, уымӕн ӕмӕ Йесо Давидӕй раздӕр уӕларвыл цард ӕмӕ уымӕ гӕсгӕ у уымӕй стырдӕр, ома йӕ Хицау.

Ныр та Йесо адӕмы ӕмӕ йӕ ахуыргӕнинӕгты фӕдзӕхсы чиныджы дӕснытӕ ӕмӕ фарисейтӕй. Уыдон «Моисейы бадӕныл» кӕй сбадтысты ӕмӕ Хуыцауы Закъон кӕй амонынц, уымӕ гӕсгӕ Йесо уынаффӕ кӕны: «Цы [уын] кӕнын кӕнынц, уый ӕххӕст кӕнут, хъахъхъӕнут ӕмӕ кӕнут». Фӕлӕ дарддӕр дзуры: «Сӕ хъуыддӕгтӕ та сын ма кӕнут, уымӕн ӕмӕ уыдон дзурынц ӕмӕ нӕ кӕнынц».

Уыдон сты цӕстмӕхъустӕ, ӕмӕ Йесо цалдӕр мӕйы размӕ иу фарисейы хӕдзары фынгыл бадгӕйӕ цы ныхӕстӕй спайда кодта, ныр дӕр та сыл ахӕм ныхӕстӕй тӕрхон кӕны. «Сӕ хъуыддӕгтӕ та иуылдӕр кӕнынц уый тыххӕй, цӕмӕй сӕ феной адӕм»,— дзуры Йесо ӕмӕ, ӕцӕгдӕр афтӕ кӕй у, уый цӕвиттонӕй ӕвдисы:

«Уӕрӕх кӕнынц сӕ ӕвӕрӕнтӕ [«къоппытӕ», НД], бӕттӕнтӕ сӕ ныхтыл ӕмӕ сӕ къухтыл закъоны ныхӕстимӕ» (НФ). Уыцы къоппыты ис Закъонӕй цыппар хайы: Рацыд 13:1—10, 11—16; ӕмӕ Дыккаг закъон 6:4—9; 11:13—21. Фӕлӕ фарисейтӕ уыцы къоппытӕ стырдӕр кӕнынц, цӕмӕй адӕм ӕнхъӕлой, Закъоныл тынг ӕнувыд сты.

Йесо дарддӕр дзуры, уыдон кӕй «стылдӕр кӕнынц сӕ дарӕсты кӕрӕттӕ». Нымӕцты 15:38—40-ӕм стихтӕм гӕсгӕ израилӕгтӕн фӕдзӕхст уыд сӕ дарӕстыл хаутӕ аразын; фӕлӕ фарисейтӕ аразынц иннӕ израилӕгтӕй даргъдӕр хаутӕ. Алцыдӕр сӕхи равдисынӕн аразынц! «[Уыдон] уарзынц минасы фынгтыл хистӕртӕн бадын ӕмӕ разӕй бадын ӕмбырдгӕнӕнты»,— дзуры Йесо.

Хъыгагӕн, зынгӕ бынат ахсыны фӕндон йӕ ахуыргӕнинӕгтӕй дӕр иуӕй-иутыл бандӕвта. Уымӕ гӕсгӕ сын Йесо уынаффӕ кӕны: «Сымах та уӕхи ма хонут ахуыргӕнджытӕ, уымӕн ӕмӕ иу Ахуыргӕнӕг ис сымахӕн — Чырысти, сымах та иуылдӕр — ӕфсымӕртӕ; ӕмӕ уӕ фыд дӕр макӕйы хонут зӕххыл, уымӕн ӕмӕ иу Фыд ис сымахӕн, Кӕцы ис ӕрвтыл; ӕмӕ уӕхи зондамонджытӕ ма хонут, уымӕн ӕмӕ иу у уӕ Зондамонӕг — Чырысти». Йӕ ахуыргӕнинӕгтӕ сӕхи иннӕтӕй уӕлдӕр хъуамӕ ма ӕвӕрой. «Стылдӕр чи у сымахӕй, уый уӕд сымахӕн лӕггадгӕнӕг»,— дзуры сын Йесо.

Уый фӕстӕ Йесо чиныджы дӕснытӕ ӕмӕ фарисейтӕн дзуры «мӕгуыр уӕ бон», зӕгъгӕ, ӕмӕ та сӕ ногӕй хоны цӕстмӕхъустӕ. Уыдон ‘Уӕларвон Паддзахад ӕхгӕнынц адӕймӕгтӕн’ ӕмӕ ‘идӕдзты хӕдзӕрттӕ хӕрынц ӕмӕ цӕстмӕ бирӕ кувынц’.

«Мӕгуыр уӕ бон, куырм разамонджытӕ»,— дзуры сын Йесо. Уый тӕрхон кӕны фарисейтыл, кӕй ницы духовон хӕрзиуӕг сӕм ис, уый тыххӕй, ӕмӕ уый та бӕрӕг у, сӕхи ӕрымысгӕ ӕгъдӕуттӕм гӕсгӕ кӕй архайынц, уымӕй. Зӕгъӕм, уыдон дзурынц: «Исчи куы басомы кӕна кувӕндонӕй, уӕд ницы кӕны, фӕлӕ исчи куы басомы кӕна кувӕндоны сызгъӕринӕй, уӕд аххосджын уыдзӕн». Кувӕндоны духовон хъӕздыгдзинӕдтӕй йӕ сызгъӕринӕн стырдӕр нысаниуӕг кӕй дӕттынц, уымӕй ӕвдисынц, духовон ӕгъдауӕй куырм кӕй сты.

Ныр дӕр та Йесо тӕрхон кӕны фарисейтыл, суанг гыццыл хӕрзад кӕрдӕджытӕй дӕр дӕсӕм хай фидын тынг ахсджиаг хъуыддагыл кӕй нымайынц ӕмӕ ‘кӕй ныууагътой закъоны сӕйрагдӕрты: тӕрхон, хорзӕх ӕмӕ уырнындзинад’.

Йесо хурмӕ хӕссы фарисейты хъуыддӕгтӕ: «Куырм разамонджытӕ, къогъойы фӕрсудзджытӕ, теуайы та ныхъуырджытӕ!» Уыдон къогъойы сӕнӕй ӕрмӕст уый тыххӕй нӕ фӕрсудзынц, саск кӕй у, фӕлӕ ӕгъдаумӕ гӕсгӕ ӕнӕсыгъдӕг кӕй у. Закъоны сӕйрагдӕр хъуыддӕгтӕ кӕй ницӕмӕ дарынц, уый та у, ӕгъдаумӕ гӕсгӕ ӕндӕр ӕнӕсыгъдӕг цӕрӕгойы, теуайы, аныхъуырдау. Матфейы 22:41—23:24; Маркы 12:35—40; Лукайы 20:41—47; Левит 11:4, 21—24.

▪ Давид 109-ӕм псалмы цы загъта, уымӕй Йесо фарисейты куы бафарста, уӕд ын дзуапп цӕуылнӕ раттой?

▪ Фарисейтӕ цӕмӕн стырдӕр кӕнынц, Фыстады ныхӕстӕ кӕм сты, уыцы къоппытӕ ӕмӕ цӕмӕн даргъдӕр кӕнынц сӕ дарӕсы хаутӕ?

▪ Йесо йӕ ахуыргӕнинӕгтӕн цы бафӕдзӕхста?

▪ Фарисейтӕ цавӕр ӕгъдӕуттӕ ӕвӕрынц ӕмӕ сӕйрагдӕр хъуыддӕгтӕ кӕй ницӕмӕ дарынц, уый тыххӕй сыл Йесо куыд стӕрхон кодта?

ЙЕСО фӕстаг хатт ис кувӕндоны. Ӕртӕ боны фӕстӕ йын тӕрхон кӕй рахӕсдзысты ӕмӕ йӕ кӕй амардзысты, уый куы нӕ нымайӕм, уӕд зӕххыл йӕ лӕггаддзинад ууыл фӕуыдзӕн. Йесо дарддӕр карзӕй тӕрхон кӕны чиныджы дӕснытӕ ӕмӕ фарисейтыл.

Уый ӕртӕ хатты фӕлхат кӕны: «Мӕгуыр уӕ бон, чиныджы дӕснытӕ ӕмӕ фарисейтӕ, цӕстмӕхъустӕ». «Мӕгуыр уӕ бон» сын фыццаг хатт уый тыххӕй зӕгъы, кӕй сыгъдӕг кӕнынц «къус ӕмӕ тӕбӕгъы ӕддаг фарс, афтӕмӕй мидӕгӕй та дзаг сты давындзинадӕй ӕмӕ ӕнӕрӕстдзинадӕй». Ӕмӕ сын уынаффӕ кӕны: «Ныссыгъдӕг кӕн раздӕр къус ӕмӕ тӕбӕгъы мидӕгӕй, цӕмӕй сыгъдӕг уа сӕ ӕддаг фарс дӕр».

Дыккаг хатт та сын уый тыххӕй дзуры, духовон ӕгъдауӕй дӕр ӕмӕ моралон ӕгъдауӕй дӕр хӕлд кӕй сты, фӕлӕ уый, Хуыцауӕн кувджыты хуыз ӕвдисгӕйӕ, ӕмбӕхсынмӕ кӕй хъавынц. Йесо сын дзуры, зӕгъгӕ, сымаг стут ‘ахуырст зӕппӕдзты хуызӕн, кӕцытӕ ӕддейӕ бакӕсгӕйӕ зынынц рӕсугъд, мидӕгӕй та дзаг сты мӕрдты стджытӕй ӕмӕ алы ӕнӕсыгъдӕгдзинадӕй’.

Сӕ цӕстмӕхъусдзинад ма бӕрӕг у, хӕрзгӕнӕджы хуыз равдисынӕн пехуымпартӕн зӕппӕдзтӕ кӕй аразынц ӕмӕ сӕ кӕй рӕсугъд кӕнынц, уымӕй дӕр. Фӕлӕ Йесойы ныхӕстӕм гӕсгӕ уыдон сты, ‘пехуымпарты чи фӕцагъта, уыдоны фырттӕ’. О, сӕ цӕстмӕхъусдзинад сын раргом кӕнынмӕ йӕ ныфс чи бахӕсса, уыдонӕй алкӕмӕндӕр тас у мӕлӕтӕй!

Дарддӕр сын Йесо карз тӕрхон хӕссы: «Кӕлмытӕ, ӕмӕ кӕлмыты зӕнӕг! куыд фервӕздзыстут сымах гееннӕйы тӕрхонӕй» (НФ). Гееннӕ у, Иерусалимы цӕрджытӕ-иу сӕ бырӕттӕ кӕдӕм калдтой, уыцы быдыр. Уымӕй Йесо ӕмбарын кӕны, чиныджы дӕснытӕ ӕмӕ фарисейтӕ сӕ фыдзӕрдӕдзинады тыххӕй ӕнустӕм куынӕггонд кӕй ӕрцӕудзысты.

Йӕ минӕвӕрттӕй кӕй ӕрвиты, уыдоны тыххӕй та сын Йесо дзуры: «Сымах иуты амардзыстут ӕмӕ байтындздзыстут, иннӕты та нӕмдзыстут уӕ ӕмбырдгӕнӕнты ӕмӕ сурдзыстут иу сахарӕй иннӕмӕ; ӕрцӕуӕд сымахыл, зӕххыл цы ӕппӕт раст туг калд ӕрцыд, уый, рӕстгӕнӕг Авелы тугӕй, Варахийы [Паралипоменоны дыккаг чиныджы хуыйны Иодай] фырт Захарийы онг, кӕцыйы сымах амардтат кувӕндонӕй нывондхӕссӕны ӕхсӕн. Ӕцӕг зӕгъын сымахӕн, адон ӕппӕт кӕй ӕрцӕудзысты ацы мыггагыл».

Захари Израилы разамонджытӕн карзӕй кӕй уайдзӕф кодта, уый тыххӕй «йӕ ныхмӕ сусӕгвӕнд скодтой ӕмӕ йӕ паддзахы бардзырдӕй Хицауы хӕдзары кӕрты дуртӕй амардтой». Фӕлӕ Йесойы рагзагъдмӕ гӕсгӕ Израил цы ӕнаххос туг ныккалдта, уый тыххӕй ӕфхӕрд баййафдзӕн. Ӕмӕ сыл уыцы ӕфхӕрд ӕрцыд 37 азы фӕстӕ, н. э. 70 азы Ромы ӕфсӕдтӕ Иерусалим куы ныппырх кодтой ӕмӕ иудейтӕй милуанӕй фылдӕр куы фӕмард, уӕд.

Уыцы ӕвирхъау уавӕрыл хъуыдыгӕнгӕйӕ, Йесо ӕрӕнкъард. «Иерусалим, Иерусалим,— дзуры та ногӕй уый.— Цал хатты Мӕ фӕндыд дӕ сывӕллӕтты ӕрӕмбырд кӕнын, куыд маргъ йӕ цъиуты ӕрӕмбырд кӕны [йӕ] базырты бын, ӕмӕ сымах нӕ бафӕндыд! Мӕнӕ ныр уагъд цӕуы сымахӕн уӕ хӕдзар афтидӕй».

Ӕмӕ ноджыдӕр бафтыдта: «Нӕ фендзыстут амӕй фӕстӕмӕ Мӕн, цалынмӕ схъӕр кӕнат: „арфӕгонд у Хицауы номӕй Ӕрцӕуӕг!“». Уый уыдзӕн Чырыстийы уӕларвон Паддзахад райсгӕйӕ куы ’рцӕуа ӕмӕ адӕмы ’хсӕн ӕнӕуынгӕ хуызы куы уа, уӕд. Уыцы рӕстӕджы йӕ адӕм фендзысты уырнындзинады цӕстӕй.

Ныр та Йесо бацыд кувӕндоны хӕзнадоны цурмӕ ӕмӕ кӕсы, адӕм ӕхца куыд ӕвӕрынц, уымӕ. Хъӕздгуытӕ ӕвӕрынц бирӕ. Фӕлӕ уӕртӕ ӕрбацыд иу мӕгуыр идӕдз ус, ӕмӕ дзы хӕрз гыццыл, дыууӕ ӕхцайы, сӕвӕрдта.

Йесо йӕ ахуыргӕнинӕгтӕм фӕдзырдта ӕмӕ сын зӕгъы: «Ӕцӕг зӕгъын сымахӕн, уыцы мӕгуыр идӕдз сӕвӕрдта хӕзнадоны ӕвӕрджытӕй сеппӕтӕй фылдӕр». Ахуыргӕнинӕгтӕ не ’мбарынц, куыд ис уый гӕнӕн, ӕмӕ сын уымӕ гӕсгӕ Йесо дзуры: «Уымӕн ӕмӕ иуылдӕр ӕвӕрдтой сӕ уӕлдӕйттӕй, фӕлӕ уый та йӕ мӕгуырӕй сӕвӕрдта ӕппӕтдӕр, цы йӕм уыд, хойрагӕн ӕм цы уыд уыдон». Уыцы ныхӕсты фӕстӕ Йесо фӕстаг хатт рацыд кувӕндонӕй.

Кувӕдон куыд стыр ӕмӕ куыд рӕсугъд у, ууыл дисгӕнгӕйӕ, ахуыргӕнинӕгтӕй иу хъӕрӕй дзуры: «Ахуыргӕнӕг! акӕс-ма, цы дуртӕ ӕмӕ цы агъуыстытӕ ис!» Ӕцӕгдӕр, бӕлвырдгӕнӕнтӕ куыд дзурынц, афтӕмӕй кувӕндоны дуртӕн сӕ дӕргъ уыд 11 метры, сӕ уӕрх — 5 метры, сӕ бӕрзӕнд та — 3 метрӕй фылдӕр.

«Уыныс ацы стыр агъуыстытӕ? — фӕрсы йӕ Йесо. — Уыдон иуылдӕр уыдзысты хӕлд, афтӕ ӕмӕ нӕ баззайдзӕн дур дурыл».

Уыцы ныхӕсты фӕстӕ Йесо ӕмӕ йӕ апостолтӕ Кедроны комыл ахызтысты ӕмӕ Елеоны хохмӕ ссыдысты. Ардыгӕй сӕ бон у диссаджы кувӕндоныл фӕлгӕсын. Матфейы 23:25—24:3; Маркы 12:41—13:3; Лукайы 21:1—6; 2 Паралипоменон 24:20—22.

▪ Йесо кувӕндоны фӕстаг хатт куы уыд, уӕд дзы цы сарӕзта?

▪ Куыд рабӕрӕг чиныджы дӕснытӕ ӕмӕ фарисейты цӕстмӕхъусдзинад?

▪ Цы нысан кӕны «гееннӕмӕ» тӕрхонгонд ӕрцӕуын?

▪ Йесо цӕмӕн загъта, зӕгъгӕ, мӕгуыр идӕдз ус хъӕздгуытӕй фылдӕр сӕвӕрдта?

ДЫЦЦӔГ, фӕссихор. Йесо бады Елеоны хохыл ӕмӕ уырдыгӕй кӕсы кувӕндонмӕ. Уырдӕм ӕм ӕрбацыдысты Петр, Андрей, Иаков ӕмӕ Иоанн. Йесо афтӕ кӕй загъта, зӕгъгӕ, кувӕндонӕй дур дурыл нал баззайдзӕн, уымӕ гӕсгӕ уыдон тынг сагъӕс кӕнынц.

Фӕлӕ куыд зыны, афтӕмӕй Йесоимӕ ныхасгӕнгӕйӕ, уыдон ӕрмӕст кувӕндоныл нӕ хъуыды кӕнынц. Цалдӕр къуырийы размӕ сын Йесо дзырдта йӕ «уӕвындзинады» тыххӕй, «Адӕймаджы Фырт куы фӕзына», уыцы рӕстӕджы тыххӕй. Уый размӕ та сын «цардыуагон системӕйы кӕроны» кой кодта. Уӕдӕ апостолты тынг цымыдис кӕнынц уыцы фарстытӕ.

«Зӕгъ нын,— дзурынц уыдон,— кӕд уыдзӕн уый [Иерусалим ӕмӕ кувӕндоны фехӕлд]? ӕмӕ цы нысан ис Дӕу ӕрцӕуынӕн ӕмӕ ӕнусы кӕронӕн [«не ’хсӕн кӕй уыдзынӕ ӕмӕ ацы... йӕ кӕрон кӕй ӕрцыд, уымӕн», НД]?» Куыд зыны, афтӕмӕй сӕ фарст арӕзт у ӕртӕ хайӕ. Иуырдыгӕй сӕ базонын фӕнды Иерусалим ӕмӕ кувӕндоны фехӕлды тыххӕй, иннӕрдыгӕй та — Йесо Паддзах куы суа, уӕд адӕмы ’хсӕн кӕй уыдзӕн, уый тыххӕй ӕмӕ, ӕппынфӕстаг, уыдон тынг цымыдис кӕны ӕппӕт цардыуагон системӕйы кӕрон.

Йесо бӕстон дзуапп дӕтты фарсты ӕртӕ хайӕн дӕр. Уый ратта, иудейаг цардыуагон системӕйы кӕрон цӕй фӕрцы уыдзӕн базонӕн, ахӕм нысан; фӕлӕ уымӕй уый равдыста ноджы фылдӕр. Уыцы нысаны руаджы фидӕны йӕ ахуыргӕнинӕгтӕ бамбардзысты, ӕнӕуынгӕ хуызы се ’хсӕн кӕй ис ӕмӕ ӕппӕт цардыуагон системӕйы кӕрон кӕй ӕрхӕстӕг.

Цалдӕр азы дӕргъы апостолтӕ сӕхи цӕстӕй уынынц, Йесойы пехуымпарӕдтӕ куыд ӕххӕст кӕнынц, уый. О, йӕ ныхӕстӕ ӕххӕст кӕнын райдыдтой сӕ рӕстӕджы. Уӕдӕ 37 азы фӕстӕ, н. э. 70 азы иудейаг цардыуагон системӕйӕн йӕ кӕрон куы ӕрцыд ӕмӕ кувӕндон куы фехӕлд, уӕд уый чырыстӕттӕн ӕнӕнхъӕлӕджы цау нӕ уыд.

Фӕлӕ Чырысти адӕмы ’хсӕн н. э. 70 азӕй нӕй. Куыд Паддзах, афтӕ адӕмы ’хсӕн бирӕ фӕстӕдӕр райдыдта уӕвын. Фӕлӕ кӕд? Уый базондзыстӕм, Йесойы пехуымпарад куы раиртасӕм, уӕд.

Йесо загъта, зӕгъгӕ, уыдзӕн ‘хӕстытӕ ӕмӕ хӕстыты койтӕ’. «Сыстдзысты адӕм адӕмыл», дзуры уый, ӕмӕ уыдзӕн ӕххормаг рӕстӕджытӕ, зӕххӕнкъуыстытӕ ӕмӕ эпидемитӕ. Йӕ ахуыргӕнинӕгтӕ адӕмӕн уыдзысты ӕнӕуынон ӕмӕ сӕ мардзысты. Сыстдзысты мӕнг пехуымпартӕ ӕмӕ бирӕты фӕсайдзысты. Сарӕх уыдзӕн ӕнӕзакъондзинад ӕмӕ бирӕтӕн сӕ уарзондзинад ӕруазал уыдзӕн. Ӕмӕ растдӕр уыцы рӕстӕджы ӕппӕт адӕмтӕн ӕвдисӕнадӕн хъуыстгонд цӕудзӕн Хуыцауы Паддзахады хорз уацхъуыд.

Кӕд Йесойы пехуымпарад гыццыл масштабы н. э. 70 азы Иерусалимы фехӕлды размӕ сӕххӕст, уӕддӕр стырдӕр масштабы сӕххӕст уыдзӕн адӕмы ’хсӕн куы уа ӕмӕ ӕппӕт цардыуагон системӕйы кӕрон, куы ’рхӕццӕ уа, уӕд. 1914 азӕй фӕстӕмӕ дунейы цы цаутӕ цӕуы, уыдонмӕ лӕмбынӕг ӕркӕсгӕйӕ, фендзыстӕм, ацы ахсджиаг пехуымпарад стырдӕр масштабы уыцы азӕй кӕй райдыдта ӕххӕст кӕнын.

Йесо цы нысаны кой кӕны, уымӕн йӕ иннӕ хай у «гӕныстоны ӕнаккагдзинады» фӕзынд. Уыцы ӕнаккагдзинад фӕзынд н. э. 66 азы, Иерусалимыл чи ӕрхъула кодта ӕмӕ кувӕндоны сисы бын чи бакъахта, уыцы ромаг ӕфсӕдты хуызы. «Ӕнаккагдзинад» лӕууы, кӕм ын не ’мбӕлы, уым.

Уыцы нысан стырдӕр масштабы куы ӕххӕст кӕны, уӕд ӕнаккагдзинад райдианы у Нациты Лигӕ ӕмӕ уый фӕстӕ та — Иугонд Нациты Организаци. Ацы сабырдзинадыл архайӕг организаци чырыстон дуне сӕвӕрдта Хуыцауы Паддзахады бынаты. Уымӕй стырдӕр ӕнаккагдзинад ма цы хъуамӕ уа! Уымӕ гӕсгӕ йӕ рӕстӕджы Иугонд Нациты Организациимӕ баст политикон тыхтӕ растдзысты чырыстон дунейы (Иерусалимы нырыккон фӕлгонцы) ныхмӕ ӕмӕ йӕ скуынӕг кӕндзысты.

Уыцы рӕстӕджы тыххӕй Йесо дзуры: «Уӕд уыдзӕн стыр зындзинад, цавӕр нӕ уыд дунейы райдайӕнӕй нырмӕ, ӕмӕ нӕ уыдзӕн». Н. э. 70 азы Иерусалимы фехӕлд ӕцӕг стыр зындзинад уыд. Бӕрӕггӕнӕнтӕм гӕсгӕ уым фӕмард иу милуан адӕймагӕй фылдӕр. Йесойы пехуымпарады ацы хай стырдӕр масштабы куы сӕххӕст уа, уӕд та уыдзӕн ноджы ӕвирхъаудӕр уавӕр.

Фидардзинад фӕстаг бонты рӕстӕджы

11 нисаны изӕр. Дыццӕг. Йесо нырма йӕ апостолтимӕ ныхас кӕны, куыд Паддзах, афтӕ се ’хсӕн кӕй уыдзӕн, уый ӕмӕ цардыуагон системӕйы кӕроны нысаныл. Фӕдзӕхсы сӕ, цӕмӕй сӕхи хизой мӕнг чырыститӕй, уымӕн ӕмӕ уыдон архайдзысты, «цӕмӕй фӕсайой гӕнӕн куы уа, уӕд ӕвзӕрстыты дӕр». Фӕлӕ уыцы ӕвзӕрстытӕ дардмӕуынӕг цӕргӕстау ӕрӕмбырд уыдзысты ӕцӕг духовон хӕринагмӕ — Чырыстимӕ адӕмы ’хсӕн ӕнӕуынгӕ хуызы куы уа, уыцы рӕстӕджы. Уыдон сӕхи фӕсайын нӕ бауадздзысты ӕмӕ цавӕрдӕр мӕнг чырыстийыл не ’мбырд кӕндзысты.

Мӕнг чырыститӕн ӕрмӕстдӕр цӕстуынгӕ хуызы у сӕ бон фӕзынын. Йесо та ӕнӕуынгӕ хуызы уыдзӕн адӕмы ’хсӕн. Ӕмӕ зындзинад куы райдайа, уӕд Йесойы ныхӕстӕм гӕсгӕ, «хур баталынг уыдзӕн ӕмӕ мӕй йӕ рухс нал ратдзӕн». Уӕвгӕ, уый уыдзӕн адӕймагады равзӕрдӕй нырмӕ иуыл уӕззаудӕр рӕстӕг. Боныгон хур куы баталынг уаид, ӕхсӕв та мӕй йӕ рухс куы нӕуал дӕттид, раст афтӕ уыдзӕн.

«Уӕларвон тыхтӕ фенкъуысдзысты»,— дзуры дарддӕр Йесо. Уымӕй ӕмбарын кӕны, арвӕн ӕцӕгдӕр фыдуацхӕссӕг хуыз кӕй уыдзӕн. Адӕм ӕвзардзысты, уӕды онг историйы бынат кӕмӕн нӕ уыд, ахӕм тас ӕмӕ тыхми.

Гъе уымӕ гӕсгӕ Йесо куыд зӕгъы, афтӕмӕй зӕххыл уыдзӕн «адӕмы ӕнкъарддзинад ӕмӕ дызӕрдыгдзинад; ӕмӕ денджыз дӕр схъӕр кӕндзӕн ӕмӕ сызмӕнтдзӕн; адӕм мӕлдзысты тӕссӕй ӕмӕ бӕллӕхтӕм ӕнхъӕлмӕ кӕсгӕйӕ, кӕцытӕ ӕрцӕудзысты ӕппӕт дунейыл». О, уый уыдзӕн адӕймагады царды ӕппӕты уӕззаудӕр рӕстӕг. Ӕмӕ уый фӕстӕ «фӕзындзӕн Адӕймаджы Фырты нысан арвыл; ӕмӕ уӕд скӕудзысты ӕппӕт зӕххон адӕмыхӕттытӕ».

Фӕлӕ ‘Адӕймаджы Фырт хъаруимӕ куы ӕрцӕуа’ ацы фыдцардыуагон системӕ скуынӕг кӕнынмӕ, уӕд алчи не скӕудзӕн. Чырыстиимӕ йӕ уӕларвон Паддзахады хайад чи исдзӕн, уыцы 144 000 «ӕвзӕрсты» ӕмӕ се ’мбӕлццӕттӕ, Йесо «ӕндӕр фыстӕ» кӕй схуыдта, уыдон дӕр нӕ кӕудзысты. Кӕд уыдон адӕймагады историйы ӕппӕты уӕззаудӕр рӕстӕджы цӕрынц, уӕддӕр сӕ зӕрдыл дарынц Йесойы зӕрдӕвӕрд: «Адон ӕххӕст кӕнын куы райдайой, уӕд хӕрдмӕ уӕхиуыл схӕцут ӕмӕ уӕ сӕртӕ сисут, уымӕн ӕмӕ ӕрхӕстӕг кӕны уӕ ирвӕзындзинад».

Цӕмӕй фӕстаг бонты цӕрӕг ахуыргӕнинӕгтӕн, кӕрон кӕй ӕрхӕстӕг, уый сӕ бон базонын уа, уый тыххӕй Йесо ӕрхаста цӕстуынгӕ цӕвиттон: «Акӕсут легъуи бӕласмӕ ӕмӕ ӕппӕт бӕлӕстӕм: уыдон сыфтӕ уадзын куы райдайынц, уӕд уый фенгӕйӕ, зонут уӕхӕдӕг, сӕрд хӕстӕг кӕй у; афтӕ сымах дӕр, куы фенат уыдон ӕххӕстгӕнгӕ, зонут, Хуыцауы Паддзахад хӕстӕг кӕй у. Ӕцӕг зӕгъын сымахӕн: нӕма аивгъуыйдзӕн ацы мыггаг, афтӕ адон ӕппӕтдӕр уыдзысты».

Уӕдӕ уыцы нысаны бирӕ лыстӕг хӕйттӕ куыд ӕххӕст кӕнынц, уый йӕ ахуыргӕнинӕгтӕ куы уыной, уӕд хъуамӕ бамбарой, ацы цардыуагон системӕйы кӕрон кӕй ӕрхӕстӕг ӕмӕ тагъд Хуыцауы Паддзахад ӕппӕт ӕвзӕрдзинадӕн дӕр кӕрон кӕй скӕндзӕн. Йесойы ныхӕстӕ куыд ӕххӕст кӕнынц, уый чи уына, уыцы адӕм нӕма амӕлдзысты, афтӕ ӕрцӕудзӕн кӕрон! Фӕстаг ахсджиаг бонты чи цӕрдзӕн, уыцы ахуыргӕнинӕгты фӕдзӕхсгӕйӕ, Йесо дзуры:

«Кӕсут уӕхимӕ, цӕмӕй уӕ зӕрдӕтӕ ма ӕруӕззау уой фырхӕрдӕй ӕмӕ расыг кӕнынӕй ӕмӕ царды мӕтӕй, ӕмӕ уӕ цӕмӕй уыцы бон ма ӕрӕййафа ӕвиппайды: уымӕн ӕмӕ уый, куыд хыз, ӕрцӕудзӕн зӕххы цӕсгомыл ӕппӕт цӕрджытыл; уӕдӕ, хъӕлдзӕг ут алы афон ӕмӕ кувут, цӕмӕй ӕппӕт ӕрцӕуинаг бӕллӕхтӕй аирвӕзат ӕмӕ Адӕймаджы Фырты раз балӕууыны аккаг уат».

Зондджын ӕмӕ ӕнӕзонд чызджытӕ

Йесо дзуапп ратта йӕ апостолты фарстӕн, куыд Паддзах, афтӕ адӕмы ’хсӕн кӕдӕй уыдзӕн, уый тыххӕй. Нысаны иннӕ хӕйттӕ равдисынӕн та сын ӕрхаста ӕртӕ фӕсномыг ныхасы.

Йесо адӕмы ’хсӕн куы уа, уыцы рӕстӕджы рӕстӕджы чи цӕра, уыдонӕн сӕ бон уыдзӕн, уыцы фӕсномыг ныхӕстӕ куыд ӕххӕст кӕнынц, уый фенын. Йесо дзуры фыццаг фӕсномыг ныхас: «Уӕд Уӕларвон Паддзахад уыдзӕн дӕс чызджы хуызӕн, кӕцытӕ, райсгӕйӕ сӕ рухсгӕнӕнтӕ, рацыдысты усгуры размӕ; уыдонӕй фондз уыдысты зондджынтӕ ӕмӕ фондз ӕнӕзӕндтӕ».

Йесо куы загъта, зӕгъгӕ, «Уӕларвон Паддзахад уыдзӕн дӕс чызджы хуызӕн», уӕд йӕ хъуыдыйы уый нӕ уыд, уӕларвон Паддзахады бындартӕн се ’рдӕг ӕнӕзӕндтӕ кӕй уыдзысты, иннӕ ӕрдӕг та — зондджынтӕ. Уымӕй Йесо равдыста, уӕларвон Паддзахадмӕ дыууӕ хуызы ахаст дӕр кӕй уыдзӕн кӕнӕ Паддзахады хъуыддаджы дыууӕ хуызы фӕзындтӕ дӕр кӕй бӕрӕг кӕндзӕн.

Дӕс чызджы ӕвдисынц, уӕларвон ныфс кӕмӕн ис кӕнӕ афтӕ чи ӕнхъӕлы, ӕмӕ йын уӕларвон ныфс ис, ӕппӕт уыцы чырыстӕтты. Н. э. 33 азы Фӕндзайӕм бон чырыстон ӕмбырдӕн лӕвӕрд ӕрцыд, райгас уӕвӕг, кадджын Усгур Йесо Чырыстийы ус кӕй суыдзӕн, уый ныфс. Фӕлӕ чындзӕхсӕв хъуамӕ уыдаид снысангонд рӕстӕджы, фидӕны, уӕларвыл.

Фӕсномыг ныхасы дӕс чызджы рацыдысты усгуры размӕ, цӕмӕй чындзӕхсӕвы йемӕ уой. Ӕмӕ усгур чындзы, цы уат ын ӕрцӕттӕ кодта, уырдӕм акӕнынмӕ куы ӕрбацыд, уӕд ын чызджытӕ йӕ фӕндаг рухсгӕнӕнтӕй рухс кӕнынц ӕмӕ йын уымӕй кад кӕнынц. Йесо ӕмбарын кӕны: «Ӕнӕзӕндтӕ, райсгӕйӕ сӕ рухсгӕнӕнтӕ, нӕ райстой семӕ зети; зондджынтӕ та, сӕ рухсгӕнӕнтимӕ райстой зети сӕ мигӕнӕнты; ӕмӕ усгур куы фӕстиат кодта, уӕд сеппӕты дӕр хуыссӕг ӕрцахста ӕмӕ бафынӕй сты».

Усгур ӕрӕгмӕ кӕй цӕуы, уый ууыл дзурӕг у, куыд Паддзах, афтӕ Чырысти адӕмы ’хсӕн куы уа, уыцы рӕстӕг тагъд кӕй нӕ уыдзӕн. Ӕппынфӕстаг, 1914 азы уый ӕрбадт йӕ паддзахы бадӕныл. Йе ’рцыдмӕ, ӕхсӕвы, чызджытӕ се ’ппӕтдӕр бафынӕй сты. Фӕлӕ уый тыххӕй ӕфхӕрд нӕ цӕуынц. Ӕфхӕрд цӕуынц ӕрмӕстдӕр ӕнӕзӕндтӕ, сӕ мигӕнӕнты зети кӕй нӕ уыд, уый тыххӕй. Йесо ӕмбарын кӕны, усгуры ӕрцыды хӕдразмӕ чызджытӕ куы райхъал сты, уӕд цы ӕрцыд: «Фӕлӕ ӕмбисӕхсӕв райхъуыст хъӕр: „мӕнӕ, усгур ӕрбацӕуы, рацӕут йӕ размӕ“. Уӕд сыстадысты уыцы чызджытӕ иуылдӕр ӕмӕ сӕ рухсгӕнӕнтӕ барӕвдз кодтой. Ӕнӕзӕндтӕ та загътой зондджынтӕн: „раттут нын уӕ зетийӕ, уымӕн ӕмӕ нӕ рухсгӕнӕнтӕ мынӕг кӕнынц“. Зондджынтӕ та загътой: „цӕмӕй мах дӕр ӕмӕ сымах дӕр ма схъуаг уӕм, хуыздӕр у, ацӕут уӕйгӕнджытӕм ӕмӕ балхӕнут уӕхицӕн».

Зети нысан кӕны ахӕм цыдӕр, цӕй фӕрцы ӕцӕг чырыстӕттӕн сӕ бон у рухсгӕнӕнтау рухс кӕнын. Уый у, чырыстӕттӕ фидар цӕуыл хӕцынц, уый — Хуыцауы удцырынӕй фыст Ныхас, ӕмӕ сын уыцы Ныхас ӕмбарынӕн цы сыгъдӕг уд ӕххуыс кӕны, уый. Духовон зетийы фӕрцы зондджын чызджытӕн сӕ бон у чындзхӕсджытӕн сӕ фӕндаг рухс кӕнын. Ӕнӕзонд чызджытӕн та сӕ мигӕнӕнты нӕй духовон зети. Уымӕ гӕсгӕ Йесо ӕвдисы дарддӕры цаутӕ:

«Куы ацыдысты уыдон [ӕнӕзонд чызджытӕ зети] ӕлхӕнынмӕ, уӕд ӕрбацыд усгур, ӕмӕ цӕттӕтӕ бацыдысты йемӕ чындзӕхсӕвмӕ ӕмӕ дуӕрттӕ ӕхгӕд ӕрцыдысты. Уый фӕстӕ ӕрбацыдысты иннӕ чызджытӕ дӕр ӕмӕ зӕгъынц: „Хицау! Хицау! байгом нын кӕн“. Уый та загъта уыдонӕн дзуаппӕн: „ӕцӕг зӕгъын сымахӕн: нӕ уӕ зонын“».

Чырысти уӕларвон Паддзах куы сси, уӕд зондджын чызджытӕ — сыгъдӕг удӕй сӕрст ӕцӕг чырыстӕттӕ — райхъал сты, цӕмӕй ӕрыздӕхӕг Усгуры кадӕн ацы талынг дунейы рухс кӕной. Ӕнӕзонд чызджытӕ кӕй ӕвдисынц, уыдон цӕттӕ не сты, цӕмӕй йыл йе ’рыздӕхты рӕстӕджы ахӕм кадимӕ сӕмбӕлой. Уымӕ гӕсгӕ уӕларвыл чындзӕхсӕвы рӕстӕг куы ’рцӕуа, уӕд сын Чырысти дуар нӕ бакӕндзӕн. Уый сӕ ацы талынг дунейы ныууадздзӕн, ӕмӕ уыдон дӕр иннӕ фыдгӕнджытимӕ куынӕггонд ӕрцӕудзысты. «Уӕдӕ хъӕлдзӕг ут,– зӕгъы кӕронбӕттӕны Йесо,– уымӕн ӕмӕ нӕ зонут нӕдӕр бон, нӕдӕр сахат».

Фӕсномыг ныхас талантты тыххӕй

Елеоны хохыл йӕ апостолтимӕ ныхасгӕнгӕйӕ, дарддӕр Йесо дзуры ӕртӕ фӕсномыг ныхасӕй дыккаг. Цалдӕр боны размӕ, Иерихоны ма куы уыдысты, уӕд сын, Паддзахад тагъд кӕй нӕма ’рцӕудзӕн, уый равдисынӕн Йесо радзырдта фӕсномыг ныхас минаты тыххӕй. Иннӕ фӕсномыг ныхас дӕр уый хуызӕн у, ӕрмӕст уый ӕххӕст кӕндзӕн, куыд Паддзах, афтӕ Йесо адӕмы ’хсӕн куы уа, уӕд. Ӕмӕ ӕвдисы, ахуыргӕнинӕгтӕ цалынмӕ зӕххыл сты, уӕдмӕ йын «йӕ мулк» кӕй хъуамӕ фылдӕр кӕной.

Йесо дзуры: «Уымӕн ӕмӕ Уый [Паддзахады хъуыддаджы] бакӕндзӕн уыцы адӕймаджы хуызӕн, кӕцы кӕйдӕр бӕстӕм цӕугӕйӕ, фӕдзырдта йӕ цагъартӕм ӕмӕ йӕ мулк уыдоныл бафӕдзӕхста». Уыцы адӕймаг у Йесо. Уый зӕххӕй уӕларвмӕ ацӕуыны агъоммӕ йӕ мулк бафӕдзӕхста йӕ цагъартӕн — йӕ ахуыргӕнинӕгтӕн, куыд уӕларвон Паддзахады фидӕны хайадисджытӕн. Уыцы мулк материалон исбон нӕу, фӕлӕ ӕвдисы, Йесо бирӕ ног ахуыргӕнинӕгтӕ цӕттӕ кӕнынӕн хорз уавӕртӕ кӕм сарӕзта, ахӕм хуымгонд быдыр.

Цалынмӕ Йесо уӕларвмӕ нӕ ацыд, уӕдмӕ йӕ мулк бакодта йӕ ахуыргӕнинӕгты бӕрны. Цы хуызы? Бафӕдзӕхста сын, цӕмӕй хуымгонд быдыры дарддӕр кусой, ома Паддзахады хорз уацхъуыд зӕххы кӕрӕттӕм хъусын кӕной. Уый тыххӕй Йесо дзуры: «Иуӕн ратта фондз таланты, иннӕмӕн дыууӕ, иннӕмӕн иу, алкӕмӕн дӕр йӕ хъарумӕ гӕсгӕ; ӕмӕ уыцы сахат араст».

Афтӕмӕй аст таланты — Чырыстийы мулк — дих ӕрцыдысты цагъартӕн сӕ хъарутӕм кӕнӕ сӕ духовон гӕнӕнтӕм гӕсгӕ. Цагъартӕ сты ахуыргӕнинӕгты къордтӕ. Фыццаг ӕнусы апостолтӕ, ӕвӕццӕгӕн, хауынц, фондз таланты кӕмӕн ӕрцыд лӕвӕрд, уыцы къордмӕ. Дарддӕр Йесо дзуры, фондз ӕмӕ дыууӕ таланты чи райста, уыцы цагъартӕ Паддзахады тыххӕй хъусынгӕнгӕйӕ ӕмӕ ахуыргӕнинӕгты цӕттӕгӕнгӕйӕ, таланттӕ дыууӕ хатты кӕй фӕфылдӕр кодтой. Иу талант чи райста, уыцы цагъар та йӕ зӕххы баныгӕдта.

«Бирӕ рӕстӕджы фӕстӕ, ӕрбацыд уыцы цагъарты ӕлдар ӕмӕ бацагуырдта уыдонӕй хыгъд»,— дзуры дарддӕр Йесо. Ӕцӕгдӕр «бирӕ рӕстӕг» рацыд, уымӕн ӕмӕ Йесо хыгъд бацагурынмӕ ӕрцыд ӕрмӕстдӕр XX ӕнусы, 1 900 азӕй фылдӕр куы рацыд, уӕд. Дарддӕр Йесо ӕмбарын кӕны:

«Бацӕугӕйӕ, фондз таланты райсӕг, ӕрбахаста ӕндӕр фондз таланты ӕмӕ зӕгъы: „ӕлдар! фондз таланты ды раттай мӕнӕн; мӕнӕ ӕндӕр фондз таланты самал кодтон уыдонӕй ӕз“. Йӕ ӕлдар загъта уымӕн: „хорз, хӕлар ӕмӕ ӕнӕсайд цагъар! гыццылы уыдтӕ ӕнӕсайд, бирӕты сӕргъыл дӕ сӕвӕрдзынӕн; бацу дӕ ӕлдары циндзинадмӕ“». Дыууӕ таланты чи райста, уыцы цагъар дӕр сӕ дыууӕ хатты фӕфылдӕр кодта, ӕлдар уымӕй дӕр раппӕлыд ӕмӕ уый дӕр раст афтӕ схорзӕхджын кодта.

Куыд бацыдысты уыцы ӕууӕнкджын цагъартӕ сӕ Хицауы циндзинадмӕ? Сӕ Хицау, Йесо Чырыстийы циндзинад уый мидӕг ис, цӕмӕй дард бӕстӕм, ома йӕ Фыдмӕ уӕларвмӕ ацӕугӕйӕ, Паддзахад бынӕн райса. Абон ӕууӕнкджын цагъартӕн стыр циндзинад хӕссы, Паддзахады хъуыддаг сӕ бӕрны кӕй ис; сӕ зӕххон царды фӕстӕ куы райгас уой ӕмӕ уӕларвон Паддзахадмӕ ист куы ӕрцӕуой, уӕд та бавзардзысты, зӕгъӕн кӕмӕн нӕй, ахӕм циндзинад. Фӕлӕ ӕртыккаг цагъар та цы бацис?

«Ӕлдар! ӕз зыдтон дӕу, кӕй дӕ ӕнӕхатыр адӕймаг,— хъаст кӕны уыцы цагъар.— Ӕмӕ, фӕтӕрсгӕйӕ, ацыдтӕн ӕмӕ бамбӕхстон дӕ талант зӕххы; мӕнӕ дӕуӕн дӕхион». Цагъар барвӕндонӕй не сразы хуымгонд быдыры кусыныл, ома хъусын кӕнын ӕмӕ ахуыргӕнинӕгтӕ цӕттӕ кӕныныл. Уымӕ гӕсгӕ йӕ хицау схуыдта «хинӕйдзаг ӕмӕ зивӕггӕнаг» ӕмӕ йын тӕрхон рахаста: «Райсут уымӕй талант... Ницӕййаг цагъары та аппарут ӕддаг талынгмӕ: уым уыдзӕн кӕуын ӕмӕ дӕндӕгты хъыс-хъыс». Хинӕйдзаг цагъары къордмӕ чи хауы, уыдон ӕддӕмӕ ӕппӕрст кӕй цӕуынц, уый та нысан кӕны, сӕ духовон циндзинад бынтондӕр кӕй фесӕфтой.

Чырыстийы фӕдыл цӕуын кӕй фӕнды, уыдонӕй алкӕмӕндӕр уый ахсджиаг зондамынд у. Цӕмӕй сӕ ӕддаг талынгмӕ ма аппарой ӕмӕ куынӕггонд ма ’рцӕуой, фӕлӕ сӕ сӕ Хицау райгонд уа ӕмӕ сӕ схорзӕхджын кӕна, уый тыххӕй, сӕ бон цас у, уыйбӕрц хъуамӕ хъусын кӕной ӕмӕ фылдӕр кӕной сӕ уӕларвон Хицауы мулк. Ды дӕр ӕнӕзивӕгӕй архайыс уыцы хъуыддаджы?

Чырысти Паддзахӕй куы ӕрцӕуа

Йесо ӕмӕ йӕ апостолтӕ нырма сты Елеоны хохыл. Адӕмы ’хсӕн кӕд уыдзӕн ӕмӕ цардыуагон системӕйы кӕрон кӕй ӕрцӕудзӕн, уый тыххӕй йӕм цы фарст раттой, уымӕн Йесо дзуапп дӕтты ӕртыккаг фӕсномыг ныхасӕй. «Куы ӕрцӕуа Адӕймаджы Фырт Йӕ кады ӕмӕ ӕппӕт сыгъдӕг Зӕдтӕ Йемӕ,— райдыдта йӕ ныхас Йесо,— уӕд ӕрбаддзӕн Йӕ кады паддзахы бадӕны».

Йесо ӕрцыд, ацы цардыуагон системӕйы кӕрон бынтон куы ӕрхӕстӕг, уӕд. Фӕлӕ цӕмӕн? Йесо ӕмбарын кӕны: «Ӕрӕмбырд уыдзысты Йӕ разы ӕппӕт адӕмтӕ; ӕмӕ ахицӕн кӕндзӕн иуты иннӕтӕй, фыййау куыд ахицӕн кӕны фысты сӕгътӕй, афтӕ; ӕмӕ сӕвӕрдзӕн фысты Йӕ рахизырдыгӕй, сӕгъты та — галиуырдыгӕй».

Кадджын бынаты чи ӕрцыд ӕвӕрд, уыдон фидӕны тыххӕй Йесо дзуры: «Уӕд зӕгъдзӕн Паддзах Йӕ рахизырдыгӕй чи ис, уыдонӕн: „ӕрцӕут, Мӕ Фыдӕй арфӕгӕндтытӕ, уӕхи бакӕнут дуне сфӕлдисынӕй нырмӕ сымахӕн цӕттӕгонд Паддзахад“». Фысты хуызӕн адӕм Паддзахад сӕхи кӕй бакӕндзысты, уый нысан кӕны, Чырыстиимӕ уӕларвыл кӕй нӕ паддзахиуӕг кӕндзысты, фӕлӕ зӕххыл уыцы Паддзахады дӕлбариуӕгады кӕй цӕрдзысты. «Дунейы сфӕлдисын» нымад цӕуы Адам ӕмӕ Евӕйы фыццаг сывӕллӕтты райгуырдӕй, кӕцытӕн сӕ бон уыд пайда исын, Хуыцау адӕймагады балхӕнынӕн цы сарӕзта, уымӕй.

Фӕлӕ фыстӕ кадджын бынаты, рахизырдыгӕй цӕмӕн сты? «Уымӕн ӕмӕ ӕххормаг уыдтӕн Ӕз,— дзуры Паддзах,— ӕмӕ Мын сымах хӕринаг раттат; дойны уыдтӕн, ӕмӕ Мын сымах баназын кодтат; уыдтӕн фӕндаггон ӕмӕ сымах райстат Мӕн; бӕгънӕг уыдтӕн ӕмӕ сымах дарӕс скодтат Мӕныл; рынчын уыдтӕн ӕмӕ сымах бабӕрӕг кодтат Мӕн; ахӕстоны уыдтӕн ӕмӕ сымах ӕрбацыдыстут Мӕнмӕ».

Фыстӕ зӕххыл кӕй сты, уымӕ гӕсгӕ сӕ базонын фӕнды, сӕ уӕларвон Паддзахӕн ахӕм хӕрзиуӕг кӕд ракодтой. «Хицау! кӕд федтам мах Дӕу ӕххормагӕй ӕмӕ бафсӕстам? — фӕрсынц уыдон.— Кӕнӕ дойныйӕ ӕмӕ баназын кодтам? кӕд федтам мах Дӕу фӕндаггонӕй ӕмӕ ӕрбакодтам? кӕнӕ бӕгънӕгӕй ӕмӕ дарӕс скодтам? Кӕд федтам мах Дӕу рынчынӕй, кӕнӕ ахӕстоны ӕмӕ бацыдыстӕм Дӕумӕ?»

«Ӕцӕг зӕгъын сымахӕн,— дзуапп дӕтты Паддзах,— кӕд сымах уый бакодтат Мӕ ацы кӕстӕр ӕфсымӕртӕй иуӕн, уӕд Мӕнӕн бакодтат». Чырыстийы ӕфсымӕртӕ сты, уӕларвыл йемӕ чи паддзахиуӕг кӕндзӕн, уыцы 144 000 ма зӕххыл чи ис, уыдон. Йесойы ныхӕстӕм гӕсгӕ уыдонӕн хорздзинад чи аразы, уый йӕ аразы уымӕн.

Уый фӕстӕ Йесо дзуры сӕгътӕн: «Ацӕут Мӕнӕй, ӕлгъыстытӕ, хӕйрӕг ӕмӕ йӕ зӕдтӕн цӕттӕгонд, мыггагмӕйы артмӕ. Уымӕн ӕмӕ ӕххормаг уыдтӕн Ӕз, ӕмӕ сымах нӕ раттат Мӕнӕн хӕринаг; дойны уыдтӕн ӕмӕ Мын нӕ баназын кодтат; уыдтӕн фӕндаггон ӕмӕ нӕ райстат Мӕн; бӕгънӕг уыдтӕн ӕмӕ дарӕс не скодтат Мӕныл; уыдтӕн рынчын, уыдтӕн ахӕстоны ӕмӕ нӕ бабӕрӕг кодтат Мӕн».

Фӕлӕ сӕгътӕ хъаст кӕнынц: «Хицау! кӕд федтам Дӕу ӕххормагӕй, кӕнӕ дойныйӕ, кӕнӕ фӕндаггонӕй, кӕнӕ бӕгънӕгӕй, кӕнӕ рынчынӕй, кӕнӕ ахӕстоны ӕмӕ нӕ балӕггад кодтам Дӕуӕн?» Сӕгътӕ дӕр ӕмӕ фыстӕ дӕр иу хъуыддаджы бындурыл цӕуынц тӕрхонгонд. «Кӕд сымах адон нӕ бакодтат ацы кӕстӕртӕй [Ме ’фсымӕртӕй] иуӕн, уӕд нӕ бакодтат Мӕнӕн».

Уӕдӕ цалынмӕ ацы фыдцардыуагон системӕйӕн стыр зындзинады йӕ кӕрон ӕрцӕуа, уӕдмӕ куыд Паддзах, афтӕ Чырысти адӕмы ’хсӕн куы уа, уыцы рӕстӕгмӕ хауы тӕрхоны рӕстӕг дӕр. Сӕгътӕ ацӕудзысты «мыггагмӕйы зындонмӕ [«ӕнусон куынӕгдзинадмӕ», НД], рӕстгӕнджытӕ [фыстӕ] та мыггагмӕйы цардмӕ». Матфейы 24:2—25:46; 13:40, 49; Маркы 13:3—37; Лукайы 21:7—36; 19:43, 44; 17:20—30; 2 Тимофеймӕ 3:1—5; Иоанны 10:16; Раргомад 14:1—3.

▪ Цы сразӕнгард кодта апостолты фарст раттынмӕ ӕмӕ ма ноджыдӕр цӕуыл хъуыды кодтой?

▪ Йесойы пехуымпарады кӕцы хай сӕххӕст н. э. 70 азы, фӕлӕ уӕд цы не ’рцыд?

▪ Йесойы пехуымпарад фыццаг хатт кӕд сӕххӕст ӕмӕ стырдӕр масштабы та кӕд сӕххӕст уыдзӕн?

▪ Цы уыд «ӕнаккагдзинад» фыццаг сӕххӕсты ӕмӕ цы у кӕронбӕттӕн сӕххӕсты та?

▪ Стыр зындзинады пехуымпарад Иерусалимы фехӕлдӕй цӕуылнӕ сӕххӕст?

▪ Чырыстийы адӕмы ’хсӕн кӕдӕй ис, уый цавӕр дунеон уавӕртӕй у бӕрӕг?

▪ Кӕд скӕудзысты «ӕппӕт зӕххон адӕмыхӕттытӕ» ӕмӕ уыцы рӕстӕджы Чырыстийы фӕдылдзӕуджытӕ та цы араздзысты?

▪ Цавӕр фӕсномыг ныхасӕй баххуыс кодта Йесо йӕ фидӕны ахуыргӕнинӕгтӕн кӕроны ӕрхӕстӕг базонынӕн?

▪ Цы бафӕдзӕхста Йесо, фӕстаг бонты рӕстӕджы чи цӕрдзӕн, уыцы ахуыргӕнинӕгтӕн?

▪ Кӕй ӕвдисынц дӕс чызджы?

▪ Чырыстон ӕмбырдӕн кӕд ӕрцыд лӕвӕрд, чындз кӕй суыдзӕн, уый ныфс, фӕлӕ кӕд ӕрцыд усгур чындзы акӕнынмӕ?

▪ Цы нысан кӕны зети ӕмӕ зондджын чызджытӕм зети кӕй ис, уымӕ гӕсгӕ цы у сӕ бон аразын?

▪ Чындзӕхсӕв кӕм уыдзӕн?

▪ Ӕнӕзонд чызджытӕ цавӕр диссаджы хорзӕх фесӕфтой ӕмӕ сӕм цы ӕнхъӕлмӕ кӕсы?

▪ Цӕуыл нӕ ахуыр кӕны талантты тыххӕй фӕсномыг ныхас?

▪ Чи сты цагъартӕ ӕмӕ цавӕр мулк ис сӕ бӕрны?

▪ Хицау хыгъд бацагурынмӕ кӕд ӕрцыд ӕмӕ цы сбӕрӕг кодта?

▪ Цӕуыл цин кӕнынц ӕууӕнкджын цагъартӕ ӕмӕ ӕртыккаг, хинӕйдзаг, цагъарыл та цы ӕрцыд?

▪ Цавӕр тӕрхоны куыст кӕны Чырысти адӕмы ’хсӕн куы ис, уыцы рӕстӕджы?

▪ Фыстӕ Паддзахад сӕхи куыд бакӕндзысты?

▪ Кӕдӕй нымад цӕуы «дунейы сфӕлдисын»?

▪ Адӕм фыстӕ ӕмӕ сӕгътыл цӕмӕ гӕсгӕ цӕуынц дихгонд?

ДЫЦЦӔГ. 11 нисан. Изӕрдалынгтӕ. Елеоны хохыл Йесо йӕ апостолтӕн ратта фӕстаг амындтӕ. Цӕй бирӕ хъуыддӕгтӕ сарӕзта ацы бон ӕмӕ куыд тынг бафӕллад, ӕвӕдза! Ныр Вифанимӕ ӕхсӕвуиат кӕнынмӕ здӕхгӕйӕ, йӕ апостолтӕн дзуры: «Сымах зонут, дыууӕ боны фӕстӕ кӕй уыдзӕн Куадзӕн ӕмӕ Адӕймаджы Фырт лӕвӕрд уыдзӕн байтындзынмӕ».