Хуыцауы Ныхас дын цины хос у?

«БИБЛИ алы бон дӕр кӕсын куы райдыдтон, уӕд-иу цыдӕрхуызон схъыг дӕн,– зӕгъы иу хо, Лорен, зӕгъгӕ.– Зынтӕй-иу ӕй кӕй ӕмбӕрстон, уый тыххӕй-иу арӕх мӕ хъуыдытӕ адзӕгъӕл сты».

Иннӕтӕ дӕр зӕгъдзысты, ӕмӕ-иу раздӕр Библи куы кастысты, уӕд сын уый циндзинад нӕ хаста. Фӕлӕ йӕ уӕддӕр кастысты, уымӕн ӕмӕ зыдтой, афтӕ кӕнын кӕй хъӕуы. Марк афтӕ зӕгъы: «Адӕймаджы Библи кӕсын ӕмӕ йӕ иртасын алыхуызон хъуыддӕгтӕ ӕнцонтӕй бакъуылымпы кӕнынц. Ӕмӕ цӕмӕй Библи алы бон дӕр кастаин, уый тыххӕй бирӕ фӕкуывтон ӕмӕ бирӕ фӕархайдтон».

Цы у дӕ бон саразын, цӕмӕй Хуыцауы Ныхасӕн тынгдӕр аргъ кӕнай, ӕмӕ йӕ куы кӕсай, уӕд дын цины хос уа? Ӕркӕсӕм цалдӕр уынаффӕмӕ.

Нысӕнттӕ ӕмӕ мадзӕлттӕ

Библи кӕсыны размӕ-иу скув ӕмӕ-иу дӕ хъуыдытӕ ӕрӕмбырд кӕн. Йегъовӕйӕ ӕххуыс кур, цӕмӕй дӕ фӕнда йӕ Ныхас ахуыр кӕнын. Кув ӕм, ӕмӕ дын ӕмбарындзинад ратдзӕн ӕмӕ дын дӕ зӕрдӕ байгом кӕндзӕн, цӕмӕй цы стыр зонды хицау у, уый хуыздӕр ӕмбарай (Пс. 119:34). Афтӕ куы нӕ кӕнай, уӕд Библи кӕсынӕй фӕлмӕцдзынӕ ӕмӕ дӕ уый, гӕнӕн ис, фӕндгӕ дӕр ма кӕна. Линн афтӕ зӕгъы: «Хатт Библи тагъд-тагъд акӕсын, ӕмӕ дзы цы хорз хъуыдытӕ вӕййы, уыдонӕй ӕппындӕр ницы бахъуыды кӕнын. Арӕх та сӕйраг хъуыдытӕ дӕр нӕ бамбарын. Ӕз фӕкувын, цӕмӕй мӕ уыцы рӕстӕг мацы хъыгдара ӕмӕ мӕ мацы тыхсын кӕна, ӕмӕ уый фӕрцы мӕ хъуыдытӕ нӕ адзӕгъӕл вӕййынц».

Цы базоныс, уымӕн аргъ кӕн. Рох дӕ ма уӕд, Библи куы ӕмбарай ӕмӕ дзы царды куы пайда кӕнай, уӕд ӕнусон цардӕй хайджын уыдзынӕ. Уымӕ гӕсгӕ дӕ тых дӕ бонӕй архай, цӕмӕй дзы цы хорз уынаффӕтӕ ис, уыдонӕй царды пайда кӕнай. Иу ӕфсымӕр, Крис, зӕгъгӕ, дзуры: «Библи куы фӕкӕсын, уӕд фӕархайын, цӕмӕй раст кӕм нӕ дӕн, уый ӕмбарон ӕмӕ алцыдӕр куыд ӕмбӕлы, афтӕ кӕнон. Тынг ӕхсызгон мын у, мӕ удыхъӕд мын Библи ӕмӕ нӕ публикацитӕ кӕй ивынц, уый, кӕд сӕ чи ныффыста, уыдон мӕ лӕгӕй-лӕгмӕ нӕ зонынц, уӕддӕр».

Дӕ къухы ӕнцонтӕй чи бафтдзӕн, ахӕм нысӕнттӕ ӕвӕр. Библи цы адӕймӕгты кой кӕны, уыдоны тыххӕй ног хабӕрттӕ базоныныл архай. Уый тыххӕй фылдӕр ӕрмӕг ссардзынӕ Библийӕн йӕхи мидӕг ӕмӕ не ’хсӕнады уагъд публикациты. Библи цы нӕлгоймӕгты ӕмӕ сылгоймӕгты кой кӕны, уыдонмӕ цавӕр миниуджытӕ ӕмӕ ӕнкъарӕнтӕ уыд, уыдон куы базонай, уӕд дын уый стыр пайда ӕрхӕсдзӕн.

Агур, адӕмимӕ ныхас кӕнгӕйӕ цы ног хъуыдытӕй пайда кӕндзынӕ, уыдон (Хъуыд. 17:2, 3). София дӕр ууыл архайы, ӕмӕ афтӕ зӕгъы: «Зӕрдиагӕй мӕ фӕнды ног хъуыдытӕ агурын, цӕмӕй сӕ мӕ бон уа пайда кӕнын уацамынды дӕр ӕмӕ ӕнӕуи дӕр, ӕмӕ мӕ бон уа Библийы ахуырӕдтӕ хуыздӕр ӕмбарын кӕнын. Уыцы хъуыддаджы мын стыр ӕххуыс у „Хъахъхъӕнӕн мӕсыг“» (2 Тим. 2:15).

Библийы хабӕрттӕ-иу дӕ цӕстытыл ауайын кӕн. «Хуыцауы ныхас у удӕгас»,– фыст ис Дзуттӕгтӕм 4:12. Цӕмӕй, Библийӕ цы бакӕсыс, уый дӕ зӕрдӕйы баззайа, уый тыххӕй-иу дӕ цӕстытыл ауайын кӕн, цы адӕмы кой дзы цӕуы, уыдон цы уыдтой, цы хъуыстой ӕмӕ сӕм цы ӕнкъарӕнтӕ уыд, уый. Сӕ царды хабӕрттӕ-иу сын дӕхи царды хабӕрттимӕ сбӕтт. Уыдон-иу бӕлвырд уавӕрты куыд кодтой, уый дын зондзонӕн уӕд. Афтӕмӕй Библи хуыздӕр ӕмбардзынӕ ӕмӕ дзы цы фыст ис, уый хуыздӕр бахъуыды кӕндзынӕ.

Зынӕмбарӕн стихтӕ раиртасынӕн-иу рӕстӕг рахицӕн кӕн, цӕмӕй сӕ хуыздӕр бамбарай. Библи ахуыр кӕнынӕн-иу алы хатт дӕр фаг рӕстӕг рахицӕн кӕн. Чи зоны дӕ бафӕнда уӕлдай цымыдисаг фарстатӕ равзарын, ӕмӕ дӕ уый тыххӕй бахъӕуа фылдӕр рӕстӕг рахицӕн кӕнын. Ӕркӕс-иу ӕнӕзонгӕ ныхӕстӕм, фиппаинӕгтӕм ӕмӕ уӕлӕмхасӕн стихтӕм. Библи цас хуыздӕр ӕмбарай ӕмӕ дзы царды цас арӕхдӕр пайда кӕнай, уыйас дын стырдӕр цины хос уыдзӕн. Уӕд дӕ бон уыдзӕн псаломзарӕггӕнӕгау зӕгъын: «[Йегъовӕйы] амындтӕ... мӕхи бакодтон ӕнустӕм, уымӕн ӕмӕ уыдон сты мӕ зӕрдӕйы цин» (Пс. 119:111).

Ӕрмӕг бакӕсыныл-иу тагъд ма кӕн. Библи ахуыр кӕнынӕн рӕстӕг хицӕнгӕнгӕйӕ ӕмбаргӕ у. Уый дӕ хъуамӕ ӕмбырды фембӕлдтӕм цӕттӕ кӕнын ма хъыгдара. «Арӕх ахӕм тыхст вӕййын, ӕмӕ мӕ хъуыдытӕ адзӕгъӕл вӕййынц,– зӕгъы Ракель.– Уымӕ гӕсгӕ равзарын гыццыл ӕрмӕг. Уый мын фылдӕр пайда ӕрхӕссы». Крис та зӕгъы: «Ӕрмӕг тагъд-тагъд куы акӕсын, уӕд мӕ уый фӕстӕ мӕ цӕсгом фӕхӕры, уымӕн ӕмӕ дзы уыйбӕрц ницы бахъуыды кӕнын. Стӕй цы бакӕсын, уый мын мӕ зӕрдӕ нӕ бацагайы». Уӕдӕ куыд зыны, афтӕмӕй Библи иртасгӕйӕ хъуамӕ тагъд ма кӕнӕм.

Дӕ зӕрдӕ тынг агурӕд Хуыцауы ныхас. Апостол Петр загъта: «Ноггуырд сывӕллӕттау уӕ зӕрдӕ агурӕд, Хуыцауы ныхасы чи ис, уыцы сыгъдӕг ӕхсыр, цӕмӕй уый фӕрцы рӕзат ӕмӕ фервӕзат» (1 Пет. 2:2). Сывӕллон йӕхӕдӕг фӕагуры ӕхсыр – ууыл ӕй ничи фӕахуыр кӕны. Фӕлӕ Библи куыд зӕгъы, афтӕмӕй мах та хъӕуы ахуыр кӕнын, цӕмӕй йӕ нӕ зӕрдӕ агура. Алы бон дӕр ӕрмӕст иу фарс куы кӕсай, уӕд дӕ зӕрдӕ Хуыцауы ныхас агурдзӕн. Ӕмӕ дӕм фыццаг зын цы каст, уый фӕстӕдӕр ӕхсызгондӕрӕй араздзынӕ.

Библийы стихтыл-иу хъуыды кӕн. Стыр пайда ма дын уыдзӕн, Библийыл лӕмбынӕг куы хъуыды кӕнай, уый. Уый фӕрцы дын ӕнцондӕр уыдзӕн, цы фарстатӕ раиртасыс, уыдон кӕрӕдзийыл бабӕттын. Афтӕмӕй цыбыр рӕстӕгмӕ тынг бирӕ диссӕгтӕ базондзынӕ (Пс. 19:14; Ӕмб. 3:3).

Дӕ рӕстӕгӕй хуыздӕр пайда кӕн

Кӕй зӕгъын ӕй хъӕуы, ахуыр спълан кӕнын ӕнцон нӕ вӕййы, фӕлӕ цы арфӕдзинӕдтӕ хӕссы, уыдонӕн аргъ нӕй. Уый фӕрцы Библи хуыздӕр ӕмбардзынӕ (Дзут. 5:12–14). Фыстады руаджы схайджын уыдзынӕ ӕмбаргӕдзинадӕй ӕмӕ зондӕй, ӕмӕ уый та хӕссы циндзинад ӕмӕ фарн. Хуыцауы Ныхасы цы зонд ис, ууыл чи хӕцы ӕмӕ дзы царды чи пайда кӕны, уыдонӕн уый у «царды бӕлас» (Ӕмб. 3:13–18).

Хуыцауы Ныхас лӕмбынӕг куы ахуыр кӕнай, уӕд дын уыдзӕн ӕмбаргӕ зӕрдӕ (Ӕмб. 15:14). Уый фӕрцы дӕ бон уыдзӕн Библимӕ гӕсгӕ уынаффӕтӕ хӕссын. Хуыцау нын Библи ӕмӕ «ӕууӕнкджын ӕмӕ зондджын цагъары» публикациты уылты цы уынаффӕтӕ дӕтты, уыдонмӕ гӕсгӕ куы архайай, уӕд дыл Библи хуыздӕрырдӕм ӕндавдзӕн (Матф. 24:45). Уӕд алцӕмӕдӕр раст цӕстӕй кӕсдзынӕ, дӕ зӕрдӕ уыдзӕн хъӕлдзӕг ӕмӕ алцыдӕр араздзынӕ Хуыцауы Ныхасмӕ гӕсгӕ. Уымӕй уӕлдай ма Хуыцауимӕ уыдзынӕ ӕнгомдӕр (Пс. 1:2, 3).

Хуыцауы тынг куы уарзай, уӕд дӕ фӕнддзӕн иннӕтӕн дӕ уырнындзинады тыххӕй дзурын. Ӕмӕ уый дӕр, кӕй зӕгъын ӕй хъӕуы, хӕссы бирӕ арфӕдзинӕдтӕ. София архайы, цӕмӕй алыхуызон стихтӕ бахъуыды кӕна ӕмӕ сӕ уацамынды пайда кӕна. Афтӕмӕй йӕ лӕггады ӕнтыстджын у, ӕмӕ йын уый циндзинад хӕссы. София афтӕ зӕгъы: «Адӕм Библийӕ цы бакӕсынц, уый сыл тынг куы бандавы, уӕд мӕ зӕрдӕ цинӕй байдзаг вӕййы».

Хуыцауы Ныхас нын цины хос куы суа, уӕд нӕ къухы бафтдзӕн ӕппӕты стырдӕр арфӕдзинад – Йегъовӕимӕ ӕввахс хӕлӕрттӕ суыдзыстӕм. Библи куы ахуыр кӕнай, уӕд уый фӕрцы хуыздӕр базондзынӕ Йегъовӕйы закъӕттӕ ӕмӕ тынгдӕр аргъ кӕндзынӕ йӕ уарзтӕн, йӕ рӕдаудзинадӕн ӕмӕ йӕ рӕстдзинадӕн. Уымӕй ахсджиагдӕр нын цы хъуамӕ уа? Уӕдӕ дӕ тыхтӕ иууылдӕр Хуыцауы Ныхас ахуыр кӕнынмӕ сараз. Афтӕмӕй дӕ рӕстӕгӕй хуыздӕр пайда кӕндзынӕ (Пс. 19:7–11).

[Рамкӕ/Нывтӕ 5 фарсыл]

ХУЫЦАУЫ НЫХАС АХУЫР КӔНЫН: НЫСӔНТТӔ ӔМӔ МАДЗӔЛТТӔ

▪ Библи кӕсыны размӕ-иу скув ӕмӕ-иу дӕ хъуыдытӕ ӕрӕмбырд кӕн.

▪ Цы базоныс, уымӕн аргъ кӕн.

▪ Дӕ къухы ӕнцонтӕй чи бафтдзӕн, ахӕм нысӕнттӕ ӕвӕр.

▪ Агур, адӕмимӕ ныхас кӕнгӕйӕ цы ног хъуыдытӕй пайда кӕндзынӕ, уыдон.

▪ Библийы хабӕрттӕ-иу дӕ цӕстытыл ауайын кӕн.

▪ Зынӕмбарӕн стихтӕ раиртасынӕн-иу рӕстӕг рахицӕн кӕн, цӕмӕй сӕ хуыздӕр бамбарай.

▪ Ӕрмӕг бакӕсыныл-иу тагъд ма кӕн.

▪ Дӕ зӕрдӕ тынг агурӕд Хуыцауы ныхас.

▪ Библийы стихтыл-иу хъуыды кӕн.

[Ныв 4 фарсыл]

Библийы-иу кӕй тыххӕй кӕсай, уыдоны уавӕры-иу дӕхи сӕвӕр