АЦЫ тӕккӕ ды цы аразыс, цӕрӕгойтӕ уый кӕнынхъом не сты. Фӕлӕ кӕд махӕн, адӕмӕн, нӕ бон кӕсын у, уӕддӕр скъоламӕ цӕуыны фадат алкӕмӕн кӕй нӕй, уый фыдӕй зӕххыл алы ӕхсӕзӕм адӕймаг дӕр кӕсын нӕ зоны. Стӕй кӕсын чи зоны, уыдонӕй дӕр бирӕтӕ искуы иу стӕм хатт райсынц чиныг сӕ къухмӕ. Афтӕмӕй та нын чиныг гом кӕны уӕрӕх фӕндаг алы ӕмӕ алы бӕстӕтӕм, зонгӕ нӕ кӕны, нӕ удыхъӕд нын чи хъӕздыг кӕны, ахӕм адӕймӕгты цардимӕ ӕмӕ нын ӕххуыс кӕны, царды зындзинӕдтимӕ тох кӕнынӕн нӕ цы хъӕуы, бирӕ ахӕм хорз цыдӕртӕ базонынӕн.

Адӕймаг скъолайы цы базондзӕн, уый, хорз кӕсы ӕви нӕ, уымӕй бирӕ кӕнгӕ у. Куыст куы агурай, уӕд дӕр, гӕнӕн ис, кӕсын куыд зоныс, уымӕ кӕсой, ӕмӕ ууыл баст уа, дӕхи фӕдарынӕн дӕ фылдӕр кӕнӕ къаддӕр кусын хъӕудзӕн, уый. Хӕдзары ӕфсин кӕсын куы уарза, уӕд йӕ бинонтӕн сӕ хӕрд дӕр хуыздӕр уыдзӕн, стӕй сыгъдӕгдӕрӕй цӕудзысты ӕмӕ ӕнӕниздӕр уыдзысты. Афтӕ мад дӕр кӕсын ахуыр куы уа, уӕд йӕ сывӕллӕтты бирӕ цӕуылдӕртыл ахуыр кӕндзӕн, фылдӕр цыдӕртӕ ӕмбардзысты.

Фӕлӕ кӕсын зонын сӕйраджыдӕр уымӕн хъӕуы, ӕмӕ уый фӕрцы ис «Хуыцауы тыххӕй раст зонындзинӕдтӕ» ссарӕн (Ӕмб. 2:5). Хуыцауӕн лӕггадгӕнгӕйӕ нӕ кӕсын кӕм нӕ хъӕуы, ахӕм хъуыддӕгтӕ стӕм сты. Зӕгъӕм, ӕмбырды фембӕлдты фӕкӕсӕм Библи ӕмӕ, Библийӕ алыхуызон фарстатӕ ӕвзӕрст кӕм цӕуы, ахӕм литературӕ. Цас хуыздӕр кӕсай, уыйас дын адӕм уацамынды рӕстӕджы дӕ ныхасмӕ хуыздӕр хъусдзысты. Уӕдӕ, цӕмӕй фембӕлдтӕм ӕмӕ уацамындмӕ бацӕттӕ кӕнай, уый тыххӕй дӕр кӕсын хъӕуы. Ӕмӕ иугӕр афтӕ у, уӕд, дӕ удыхъӕд куыд ивдзӕн, уый дӕр, хорз кӕсыс ӕви нӕ, ууыл баст уыдзӕн.

Цы фадӕттӕ дын ис, уыдон ма уадз

Хуыцауимӕ зонгӕ кӕнын чи райдайы, уыдонӕй иуӕй-иутӕ ӕрмӕстдӕр цалдӕр къласы фесты каст. Цӕмӕй сӕ уырнындзинад фидар кӕна, уый тыххӕй сӕ, чи зоны, хъӕуа кӕсын базонын. Йе та сӕ, чи зоны, хъӕуы ӕххуыс, цӕмӕй хуыздӕр кӕсой. Зӕгъгӕ, уый сӕр хъӕуы, уӕд ӕмбырдты кӕсын ӕмӕ фыссыны уроктӕ дӕр фӕуадзынц. Ахӕм уроктӕ стыр ахъаз фесты тынг бирӕ адӕмӕн, мингӕйттӕн. Хорз кӕсын афтӕ ахсджиаг кӕй у, уымӕ гӕсгӕ иуӕй-иу рӕтты кӕсыны уроктӕ бахӕссынц Хуыцауы Ныхас хъусынгӕнджыты скъолайы программӕмӕ дӕр. Фӕлӕ ӕнӕ уымӕй дӕр дӕхӕдӕг алы бон хибарӕй хъӕрӕй куы кӕсай, Скъоламӕ ӕрвылкъуыри дӕр куы цӕуай ӕмӕ дзы уазӕджы бадт куы нӕ кӕнай, уӕд бирӕ хуыздӕр кӕсдзынӕ.

Хъыгагӕн, телевизор, худӕг нывтӕй конд чингуытӕ ӕмӕ ӕндӕр ахӕм цыдӕртӕ афтӕ сарӕх сты, ӕмӕ бирӕты кӕсынмӕ нал февдӕлы. Ӕмӕ адӕймаг кӕсгӕ куы нӕ кӕна, фӕлӕ ӕппынӕдзух дӕр телевизоры раз куы бада, уӕд та никуы сахуыр уыдзӕн нӕдӕр хорз кӕсын, нӕдӕр хъуыды кӕнын, нӕдӕр йӕ хъуыдытӕ кӕрӕдзийыл бӕттын ӕмӕ сӕ аив дзурын.

Библи ӕмбарынӕн нын ӕххуыс кӕны, «ӕууӕнкджын ӕмӕ зондджын цагъар» цы литературӕ уадзы, уый. Уым ӕвзӕрст цӕуынц, Библийӕ нӕ цы фарстатӕ цымыдис кӕны, уыдон (Матф. 24:45; 1 Кор. 2:12, 13). Афтӕ ма нӕ уыцы литературӕ зонгӕ кӕны, дунейы цы хабӕрттӕ цӕуы ӕмӕ уыцы хабӕрттӕ цӕуыл дзурӕг сты, уыимӕ. Бирӕ цыдӕртӕ дзы базонӕн ис ӕрдзы диссӕгты тыххӕй. Амоны нын, зын уавӕрты куыд кӕнгӕ у, уый. Фӕлӕ нын иууыл сӕйраг та амоны, Хуыцауӕн раст кувын куыд хъӕуы ӕмӕ йӕ хорзӕх ссарӕн куыд ис, уый. Уӕдӕ ахӕм хъӕугӕ ӕрмӕг куы кӕсай, уӕд дӕ бон уыдзӕн царды алцӕмӕдӕр Иегъовӕйы цӕстӕй кӕсын.

Кӕй зӕгъын ӕй хъӕуы, адӕймаг хорз кӕсын кӕй зоны, уый нырма ницӕуыл дзурӕг у. Кӕсгӕ хъуамӕ кӕнӕм, ахъаз нын цы уыдзӕн, уый. Алцы куыд нӕ хӕрӕм, афтӕ кӕсгӕ дӕр алцы хъуамӕ ма кӕнӕм. Цӕмӕн нӕ хъӕуы, тых нын цы нӕ дӕтты, фӕлӕ ма хъӕстӕ дӕр кӕмӕй фӕуыдзыстӕм, ахӕм хӕринаг? Уӕдӕ цӕмӕн хъуамӕ кӕсӕм (искуы иу стӕм хатт дӕр), нӕ зонд нын чи зыгъуыммӕ кӕны ӕмӕ нӕ чи халы, ахӕм ӕрмӕг? Кӕсын цы ӕмбӕлы ӕмӕ цы не ’мбӕлы, уый раиртасынӕн нын ӕххуыс кӕны Библи. Уӕдӕ цалынмӕ равзарай, цы кӕсдзынӕ, уый, уӕдмӕ-иу ахъуыды кӕн Фыстадӕй ахӕм бынӕттыл: Екклесиаст 12:12, 13; Ефесӕгтӕм 4:22—24; 5:3, 4, НФ; Филиппӕгтӕм 4:8; Колоссӕгтӕм 2:8; 1 Иоанны 2:15—17 ӕмӕ 2 Иоанны 10.

Цӕмӕн кӕсыс

Адӕймаг Хуыцауы Ныхас цӕмӕн кӕсы, уымӕн куыд стыр нысаниуӕг ис, уый бӕрӕг у Евангелитӕй. Зӕгъӕм, Матфейы Евангели нын дзуры, Фыстытӕ йӕ фондз ӕнгуылдзау чи зыдта, уыцы дины разамонджытӕ Йесойы хинӕйдзаг фӕрстытӕ кӕй кодтой. Фӕлӕ сын-иу цалынмӕ Фыстадӕй дзуапп радта, уӕдмӕ уал-иу сын сӕхи бафарста: «Ӕцӕг сымах нӕ кастыстут?» кӕнӕ «Мыййаг сымах никуы кастыстут?» (Матф. 12:3, 5; 19:4; 21:16, 42; 22:31). Уый нӕ ууыл ахуыр кӕны, ӕмӕ, кӕсгӕ-кӕсын ӕрмӕст нӕхи пайдайыл куы хъуыды кӕнӕм, уӕд, цы кӕсӕм, уымӕй раст хатдзӕгтӕм не ’рцӕудзыстӕм, йе та дзы сӕйраг цы у, уый бынтондӕр нӕ бамбардзыстӕм. Фарисейтӕ Фыстытӕ уымӕн кастысты, ӕмӕ уый фӕрцы ӕнустӕм цӕрын ӕнхъӕл уыдысты. Фӕлӕ Йесо куыд загъта, афтӕмӕй, Хуыцауы чи нӕ уарзы ӕмӕ, адӕмы фервӕзын кӕнынмӕ кӕй рарвыста, ууыл йӕхи чи тигъ кӕны, уыдон уыцы хорзӕх нӕ фендзысты (Иоан. 5:39—43). Фарисейтӕ ӕрмӕстдӕр сӕхиуыл кӕй хъуыды кодтой, уымӕ гӕсгӕ бирӕ цыдӕртӕ раст не ’мбӕрстой.

Уӕдӕ Иегъовӕйы кӕй уарзӕм, сӕйраджыдӕр ын уый тыххӕй хъуамӕ кӕсӕм йӕ Ныхас. Ахӕм уарзт нӕм куы уа, уӕд нӕ фӕнддзӕн Хуыцауы фӕндон хуыздӕр базонын, уымӕн ӕмӕ уарзондзинад «ӕмцин кӕны ӕцӕгадыл» (1 Кор. 13:6). Кӕд раздӕр кӕсын ӕппындӕр нӕ уарзтам, уӕддӕр нӕ ныр фӕнды Иегъовӕйы «ӕппӕт зондӕй» уарзын, ӕмӕ уымӕ гӕсгӕ Хуыцауы тыххӕй фылдӕр базоныныл нӕ зонды ӕвӕрӕнтӕ не ’вгъау кӕндзыстӕм (Матф. 22:37). Адӕймаг искӕй куы фӕуарзы, уӕд ӕй фӕфӕнды уый тыххӕй фылдӕр базонын.

Ахуыр кӕн тагъд кӕсын

Цы у кӕсын? Кӕсгӕ-кӕсын адӕймаджы магъз дзырдтӕ базоны ӕмӕ сӕ чи цы нысан кӕны, уый ӕрхъуыды кӕны. Уӕдӕ дӕ магъзӕн уыцы иу рӕстӕг цас фылдӕр дзырдтӕ уа йӕ бон базонын, уыйас кӕсгӕ дӕр тагъддӕр кӕндзынӕ. Исты куы фӕкӕсыс, уӕд-иу алы хицӕн дзырдыл ма ӕрлӕуу, фӕлӕ-иу дӕ цӕст цалдӕр дзырдыл иумӕ ахӕсс. Уый дӕ къухы куы бафта, уӕд ӕй дӕхӕдӕг дӕр фӕхатдзынӕ, цы кӕсыс, уый хуыздӕр кӕй ӕмбарыс.

Фӕлӕ арф хъуыды кӕм ис, ахӕм ӕрмӕг кӕсын хъӕуы ӕндӕр хуызы. Сыгъдӕг Фыстад куыд кӕсын хъӕуы, уый тыххӕй Иегъовӕ Навины фырт Йесойӕн загъта: «Ацы закъоны чиныг алкӕддӕр де ’взагыл уӕд, ӕмӕ йӕ дӕхицӕн сабыр хъӕлӕсӕй кӕс» (Йес. Н. 1:8). Адӕймаг цӕуылдӕр куы фӕхъуыды кӕны, уӕд хатт афтӕ вӕййы, цыма йӕхӕдӕг йӕхицӕн цыдӕртӕ фӕдзуры. Уымӕ гӕсгӕ дзуттаг дзырдбаст, «дӕхицӕн сабыр хъӕлӕсӕй кӕс», зӕгъгӕ, кӕмдӕрты тӕлмац у «хъуыды кӕнынӕй» дӕр (Пс. 62:7; 76:13; 142:5). Адӕймаг хъуыды кӕны, зӕгъгӕ, уый ууыл дзурӕг у, ӕмӕ хъуыдыты ацӕуы, тагъд нӕ фӕкӕны. Цы кӕсыс, ууыл арф куы хъуыды кӕнай, цаутӕ дӕ цӕстытыл куы уайын кӕнай, уӕд Хуыцауы Ныхас дӕ зондыл дӕр тынгдӕр зындзӕн ӕмӕ дын дӕ зӕрдӕ дӕр тынгдӕр агайдзӕн. Библийы ис пехуымпарӕдтӕ, зондамындтӕ, ӕмбисӕндтӕ ӕмӕ поэтикон уацмыстӕ; Хуыцау йӕ тӕрхӕттӕ кӕм дзуры, ахӕм бынӕттӕ; Иегъовӕйы фӕнд куыд ӕххӕст кӕны, уый тыххӕй бӕстон хабӕрттӕ ӕмӕ, ӕцӕг чи ӕрцыди, ахӕм цаутӕ. Иегъовӕйы фӕндагыл цӕуын кӕй фӕнды, уыдонӕн уыцы фыстытӕ сты зынаргъ хӕзна. Куыд хорз у Библи афтӕ кӕсын, ӕмӕ нын нӕ зонд ӕмӕ нӕ зӕрдӕйы арф фӕд куыд уадза!

Кӕсгӕ-кӕсын дӕ хъуыдытӕ дзӕгъӕлтӕ ма кӕнӕнт

Библийӕ цыфӕнды ма кӕсай, дӕхи афтӕ хат, цыма ды дӕр уым дӕ. Мӕнӕ дӕ цӕстыты раз лӕууынц, кӕй тыххӕй кӕсыс, уыдон, хатыс сын сӕ цин, сӕ рис, сӕ маст ӕмӕ сӕ хъыг. Уый зын нӕ вӕййы, зӕгъӕм, 1 Паддзахӕдты чиныджы 17-ӕм сӕры цы цауы кой цӕуы, ахӕм цаутӕ кӕсгӕйӕ (уым ис Давид ӕмӕ Голиафы хабар). Фӕлӕ, Рацыд ӕмӕ Левиты чингуыты сыгъдӕг цатыры арӕзтады тыххӕй кӕнӕ, сауджынтӕ ӕвӕрд куыд цыдысты, уый тыххӕй цы лыстӕг хабӕрттӕ ис фыст, уыдон дӕр цардӕгасау сыстдзысты дӕ разы, кӕд ӕмӕ дӕ цӕстытыл уайын кӕнай, цатыр ӕмӕ мигӕнӕнтӕ цӕйас ӕмӕ цӕмӕй арӕзт уыдысты, уый, судзгӕ буд, судзгӕ хор ӕмӕ нывӕндты адджын тӕф дӕ фындзыл куыд ӕмбӕлы, уыдӕттӕ. Мӕнӕ дӕхи цӕстӕй уыныс, кувӕндоны лӕггадгӕнгӕйӕ сауджынтӕ Иегъовӕйӕ куыд аргъуыц кӕнынц, уый (Лук. 1:8—10). О, цы кӕсыс, дӕ зӕрдӕ уым куы уа, уӕд ын йӕ нысаниуӕг ӕмӕ йӕ ахадындзинад дӕр арфдӕр бамбардзынӕ ӕмӕ йӕ хъуыды дӕр хуыздӕр бакӕндзынӕ.

Фӕлӕ кӕсгӕ-кӕсын дӕ хъуыдытӕ сӕхи бар куы ауадзай, уӕд дӕ, гӕнӕн ис, ӕндӕр искуыдӕм ахӕссой. Кӕсгӕ чиныгмӕ кӕныс, хъуыды та — бынтон ӕндӕр цӕуылдӕр. Цӕмӕн афтӕ у, мыййаг кӕд музыкӕ цӕгъды кӕнӕ телевизор кусы? Йе та кӕд хӕдзары иннӕтӕ ныхас кӕнынц, ӕмӕ дӕ уый хъыгдары? Гӕнӕн ӕмӕ амал уӕвгӕйӕ, кӕсынӕн иууыл хуыздӕр уыдзӕн, кӕм дӕ ницы хъыгдардзӕн, ахӕм хибар бынат. Фӕлӕ иу уынӕр дӕр куы никуыцӕй хъуыса, уӕддӕр дӕ, чи зоны, исты тыхсын кӕна ӕмӕ дӕ уый хъыгдара. Чи зоны дын бонӕй бирӕ хъуыддӕгтӕ уыди, ӕмӕ дӕ дӕ хъуыдытӕ бар-ӕнӕбары уырдӕм ахӕссынц. Фӕстӕмӕ акӕсын, цытӕ сарӕзтай, уыдӕттыл ахъуыды кӕнын ӕвзӕр нӕу. Ӕрмӕст кӕсгӕ куы кӕнай, уӕд нӕ. Чи зоны, кӕсыныл куы ӕрбадтӕ, уӕд дӕ хъуыдытӕ ӕрмӕстдӕр дӕ кӕсинагыл уыдысты, кувгӕ дӕр скодтай. Фӕлӕ куыд кӕсыс, афтӕ сындӕггай дӕ хъуыдытӕ авд ӕфцӕджы сӕрты ахызтысты. Ницы кӕны, ногӕй та бафӕлвар. Кус дӕхиуыл, ахуыр кӕн дӕ хъуыдытӕн сӕ рохтыл хӕцын, цӕмӕй, цы кӕсыс, ӕрмӕст ууыл хъуыды кӕнай. Кӕс-иу, кӕддӕра дын нӕ рауайа!

Кӕсгӕ-кӕсын цыдӕр дзырд куы нӕ фембарыс, уӕд цы бакӕныс? Хатт ӕнӕзонгӕ дзырдтӕ фембарын кӕнынц дарддӕр. Арӕх та ӕнӕмбӕрст дзырдты хъуыды рабӕрӕг вӕййы, дарддӕр цӕуыл цӕуы дзырд, уымӕй. Йе та ма фӕзивӕг кӕн дзырдуатмӕ ӕркӕсын (кӕд дӕм ис, уӕд), науӕд та йӕ фӕнысан кӕн ӕмӕ дзы фӕстӕдӕр искӕй бафӕрс. Афтӕмӕй фылдӕр дзырдтӕ дӕр базондзынӕ ӕмӕ цы кӕсыс, уый ӕмбаргӕ дӕр дзӕбӕхдӕр кӕндзынӕ.

Иннӕтӕн хъӕрӕй кӕс

Апостол Павел Тимофейӕн куы фӕдзӕхста, «дарддӕр дӕр... кӕс», зӕгъгӕ, уӕд йӕ ныхас сӕйраджыдӕр иннӕтӕн кӕсыныл уыди (1 Тим. 4:13, НД). Иннӕтӕн хорз кӕсын ӕрмӕст уый нӕ нысан кӕны, ӕмӕ, гӕххӕттыл цы фыст ис, уый хъӕрӕй бакӕсай. Иннӕтӕн чи кӕса, уый хъуамӕ ӕмбара алы дзырды нысаниуӕг дӕр ӕмӕ уыцы дзырдтӕ иумӕ цы хъуыды ӕвдисынц, уый дӕр. Ӕрмӕстдӕр уӕд уыдзӕн йӕ бон, чи йӕм хъусы, уыдонмӕ ӕрмӕджы мидис раст зӕрдӕйы уагимӕ фӕхӕццӕ кӕнын. Ӕмӕ уый тыххӕй та хъӕуы цӕттӕ кӕнын, бирӕ хатт ӕй бакӕсын. Уымӕн сидти Павел дӕр: «Дарддӕр дӕр иннӕтӕн кӕс». Уыцы хъуыддаджы дын Хуыцауы Ныхас хъусынгӕнджыты скъола стыр ӕххуыс фӕуыдзӕн.

Кӕсынӕн рӕстӕг ар

«Бӕстонгӕнӕгӕн йӕ фӕндтӕ йӕ къухы бафтынц, йӕ хъуыддӕгтӕ уӕлӕнгӕйтты чи кӕны, уымӕн та йӕ фӕстаг мӕгуырмӕ ӕрцӕуы» (Ӕмб. 21:5). Ӕвӕдза, куыд раст ныхӕстӕ сты, Хуыцауы Ныхас куыд хъуамӕ кӕсӕм, уый тыххӕй! Цӕмӕй «нӕ фӕнд нӕ къухы бафта», уый тыххӕй нӕ алцыдӕр бӕстон кӕнын хъӕуы, ӕмӕ нын уӕд, кӕсынӕн цы рӕстӕг уыди, уый иннӕ хъуыддӕгтӕ нӕ байсдзысты.

Цафон фӕкӕсыс ды? Кӕсын дын ӕнцондӕр райсомӕй раджы вӕййы ӕви фӕстӕдӕр бонӕй? Бон 15—20 минуты уӕддӕр куы кӕсай, уӕд дӕхӕдӕг дӕр дис кӕндзынӕ, куыд бирӕ дын ӕнтысдзӕн, ууыл. Сӕйраг у алы бон дӕр кӕсын.

Иегъовӕ йе стыр ӕмӕ йӕ рӕсугъд фӕндты тыххӕй чиныджы цӕмӕн радзырдта? Цӕмӕй йын йӕ фыст Ныхас кӕсӕм ӕмӕ дзы зонд исӕм. Уый фӕрцы нӕ бон у Иегъовӕйы диссаг хъуыддӕгтыл хъуыды кӕнын, нӕ кӕстӕртӕн сӕ дзурын; иудзырдӕй, уый фӕрцы сӕ нӕ рох кӕнӕм (Пс. 77:5—7). Иегъовӕйы зынаргъ лӕварӕн, йӕ цардхӕссӕг Ныхасӕн, кӕй аргъ кӕнӕм, уый та уымӕй бӕрӕг уыдзӕни, ӕмӕ йӕ алы бон дӕр куы кӕсӕм.

АДӔМ дыргътӕ куыд февзарынц, уымӕ никуы кастӕ? Дыргъ рӕгъӕд у ӕви нӕ, уый базонынӕн бирӕтӕ фӕкӕсынц йӕ хуызмӕ ӕмӕ цӕйас у, уымӕ. Ноджы ма йӕм басмудынц йе та йыл къухӕй дӕр бахӕцынц. Чидӕр та йӕ дыууӕ къухмӕ райсы фӕйнӕ дыргъы, уӕззаудӕр дзы кӕцы у, уый базонынӕн (цас уӕззаудӕр уа, уыйас донджындӕр уыдзӕн). Уыцы рӕстӕг цӕуыл фӕхъуыды кӕнынц? Цы ӕлхӕнинаг сты, уый лыстӕг барынц, дыргътӕй иу иннӕмӕй цӕмӕй хицӕн кӕны, уымӕ лӕмбынӕг кӕсынц; ӕрхъуыды кӕнынц, раздӕр-иу куыд ӕвзӕрстой, уый ӕмӕ уӕд цы ӕвзӕрстой, уый, ныртӕккӕ сӕ разы цы ис, уыимӕ абарынц. Йӕ равзарыныл афтӕ кӕй бафыдӕбон кодтой, уый та дзӕгъӕлы, ай-гъай дӕр, нӕ уыдзӕн: бахӕрдзысты хӕрзад, адджын дыргъ.

Уӕдӕ уӕд цы зӕгъӕн ис Хуыцауы Ныхас ахуыр кӕнынӕй та? Нӕ царды ӕппӕт хъуыддӕгты сӕрӕвӕрӕн Библи ахуыр кӕнын куы уа, уӕд нӕ уырнындзинад кӕндзӕн фидардӕр, нӕ уарзт та — тыхджындӕр; Хуыцауы номыл цыдӕриддӕр аразӕм, уый кӕндзыстӕм зӕрдӕйӕ ӕмӕ алы хъуыддаджы дӕр архайдзыстӕм ӕмбаргӕйӕ, Хуыцауы зондмӕ гӕсгӕ. Уыцы стыр хорзӕхты тыххӕй Ӕмбисӕндты 3:15 ис ахӕм ныхӕстӕ: «Дӕу цы хъӕуы, цӕмӕ бӕллыс, уыдонӕй иуӕн дӕр [уыимӕ] абарӕн нӕй» («Мах дуг» № 12, 1999). Ды дӕр хайджын дӕ ахӕм хорздзинӕдтӕй? Куыд ахуыр кӕныс, уымӕй аразгӕ у ӕппӕт дӕр (Кол. 1:9, 10).

Цы у ахуыр кӕнын? Уый нӕу цыдӕр уӕлӕнгӕйтты акӕсын. Уый тыххӕй хъуамӕ дӕ зонд ӕмӕ дӕ хъуыдытӕ ӕгасӕй дӕр фарста раиртасынмӕ скӕнай. Ома, цы бакастӕ, уымӕ алывӕрсонӕй ӕркӕсын, цы зоныс, уыимӕ йӕ абарын ӕмӕ афтӕ цӕмӕн у, уый равзарын. Исты куы фӕахуыр кӕныс, уӕд алы ног хъуыдыйыл дӕр арф ӕмӕ бӕстон хъуыды кӕн. Афтӕ ма-иу ахъуыды кӕн: Фыстадӕй дзы цы уынаффӕ ис, уымӕ гӕсгӕ кӕд цӕрын, уӕддӕр ма ноджыдӕр цы ис саразӕн? Уымӕй уӕлдай, Иегъовӕйы Ӕвдисӕнтӕ уӕвгӕйӕ мах канд нӕхиуыл нӕ хъуыды кӕнӕм, фӕлӕ цы базыдтам, уый адӕмӕн куыд феххуыс уыдзӕн, ууыл дӕр. Уӕдӕ зӕгъӕн ис, ӕмӕ ахуыр кӕнын у арф хъуыды кӕнын.

Раст зӕрдӕйы уаг

Цалынмӕ ахуыр кӕныныл не ’рбадыс, уӕдмӕ дӕ разы ӕрӕвӕрыс Библи, кӕй ахуыр кӕндзынӕ, уыцы чиныг йе та журнал, кърандас кӕнӕ ручкӕ ӕмӕ цӕуыл фыссай, ахӕм исты. Фӕлӕ, дӕ зӕрдӕ дӕр ахуырмӕ цӕттӕ уа, ууыл бацархайыс? Библийы куыд кӕсӕм, афтӕмӕй Ездрӕ «йӕ зӕрдӕ сарӕзта Иегъовӕйы закъон ахуыр кӕнынмӕ ӕмӕ йӕ ӕххӕст кӕнынмӕ, стӕй ма Израилы адӕмӕн закъон ӕмӕ рӕстдзинад амонынмӕ дӕр» (Ездрӕ 7:10). Цӕмӕй нӕ зӕрдӕ ахуырмӕ цӕттӕ уа, уый тыххӕй цы саразын хъӕуы?

Иегъовӕмӕ куы скувӕм, уӕд ын йӕ Ныхас ахуыр кӕндзыстӕм раст зӕрдӕйы уагимӕ. Мах уый фӕнды, ӕмӕ нын Иегъовӕ йӕ Ныхасы цы дзуры, уый нӕм дзура нӕ зӕрдӕ дӕр, ома нӕ мидӕг чи ис, уыцы адӕймаг. Уымӕ гӕсгӕ-иу ахуыр кӕныныл куы ӕрбадай, уӕд-иу алы хатт дӕр скув Иегъовӕмӕ, цӕмӕй дын йӕ сыгъдӕг удӕй ӕххуыс кӕна (Лук. 11:13). Кур дзы ӕххуыс, цы ахуыр кӕндзынӕ, уый ӕмбарынӕн: цы базыдтай, уый куыд баст у йӕ фӕндимӕ, куыд дын фӕахъаз уыдзӕн хорз ӕвзӕрӕй хицӕн кӕнынӕн, кӕм дӕ бахъӕудзӕн царды ӕмӕ дӕ куыд ӕввахсдӕр кӕны Хуыцауимӕ? (Ӕмб. 9:10). Ахуыры рӕстӕджы «кур Хуыцауӕй» зонд (Иак. 1:5). Ныккӕс-иу дӕ зӕрдӕмӕ ӕмӕ-иу ахъуыды кӕн: цымӕ цы базыдтон, уый мӕнмӕ нӕ хауы? Ӕз ахӕм дӕн? Ӕз дӕр афтӕ аразын? Ӕмӕ Иегъовӕйӕн ӕргом дзур, цӕмӕй, раст кӕм нӕ хъуыды кӕныс кӕнӕ дӕ дӕ зӕрдӕ рӕдыд фӕндагыл кӕм сайы, уым дын фӕивынӕн ӕххуыс кӕна. Алкӕддӕр «арфӕ кӕн» Иегъовӕйӕн, бирӕ цыдӕртӕ дын кӕй ӕргом кӕны, уый тыххӕй (Рарг. 11:17). Уӕдӕ ахуыры рӕстӕджы нӕ хъуыдытӕ Хуыцауимӕ куы уой, уӕд нын, йӕ фыст Ныхасы цы дзуры, уый нӕ зӕрдӕ агайдзӕн. Ӕмӕ нын йӕ Ныхас нӕ зӕрдӕ куы агайа, уӕд та йемӕ нӕ хӕлардзинад тыхджындӕр кӕндзӕн (Пс. 144:18).

Иегъовӕйӕн йӕ адӕм йӕ зондамындтӕ сӕ зӕрдӕмӕ кӕй исынц, уымӕй хицӕн кӕнынц дунейы иннӕ адӕмӕй. Дунейы ӕнӕхуыцау адӕм алцӕмӕйдӕр афтӕ дзурын уарзынц, уый дыууӕйыл у, зӕгъгӕ. Фӕлӕ мах афтӕ нӕ кӕнӕм. Мах алы хъуыддаджы дӕр нӕ зӕрдӕ дарӕм Иегъовӕйыл (Ӕмб. 3:5—7). Исты куы нӕ фембарӕм, уӕд та нӕ ныхас уый нӕ вӕййы, раст нӕу, зӕгъгӕ. Кӕд нӕ фарстайӕн дзуапп агурӕм, уӕддӕр ӕй нӕхирдыгонау нӕ фӕлгъаудзыстӕм, фӕлӕ йӕ Иегъовӕ куыд бамбарын кӕндзӕн, уымӕ ӕнхъӕлмӕ кӕсдзыстӕм (Мих. 7:7). Ездрӕйау мах дӕр фӕнды, цы базыдтам, уымӕ гӕсгӕ цӕрын ӕмӕ йӕ иннӕтӕн дӕр амонын. Библи ахӕм зӕрдӕйы уагимӕ куы ахуыр кӕнӕм, уӕд нӕм бирӕ хорзӕхтӕ ӕнхъӕлмӕ кӕсы.

Ахуыр кӕнын куыд хъӕуы

Ахуыр кӕныныл куы ’рбадай, уӕд-иу уайтагъд фыццаг абзацӕй кӕсын ма райдай. Хуыздӕр уыдзӕн, фыццаг уал, цы сӕргонд кӕнӕ цы статья ахуыр кӕндзынӕ, ууыл иумӕйагӕй цӕст ахӕссын. Ахъуыды кӕн статьяйы ном кӕнӕ сӕргондыл — ууыл цӕудзӕн дзырд дарддӕр. Дзӕбӕх ахъуыды кӕн, дӕлсӕргӕндтӕ статьяйы номимӕ куыд баст сты. Лӕмбынӕг ӕркӕс нывтӕм, фӕлгӕтты цы фыст ис, уымӕ ӕмӕ дзы кӕд фӕлхат кӕнынӕн фарстытӕ ис, уӕд уыдонмӕ дӕр. Уый фӕстӕ ахъуыды кӕн: цымӕ дзы цы базондзынӕн? Мӕхицӕн дзы хорзӕй цы райсдзынӕн? Ӕрмӕгмӕ развӕлгъау куы ӕркӕсай, уӕд уый дӕ ахуырӕн уыдзӕн, мӕнӕ донӕн бӕрӕг фӕд куыд акӕнай, уый хуызӕн.

Ныр та дӕ бон у, ӕмӕ ӕрӕвналай ахуыр кӕнынмӕ. «Хъахъхъӕнӕн мӕсыг»-ы ахуыргӕнӕн статьяты, стӕй чингуытӕй дӕр сӕ фылдӕры вӕййы фарстытӕ. Хорз уыдзӕн алы абзацы дӕр дзуапп ссарын ӕмӕ йӕ бахахх кӕнын. Фӕлӕ фарстытӕ кӕм нӕй, уым дӕр дӕ бон у, цы ахсджиаг хъуыдытӕ дӕ фӕнды бахъуыды кӕнын, уыдон фӕнысан кӕнын. Ног хъуыдыйыл дзы куы фембӕлай, уӕд ыл фылдӕр ахъуыды кӕн, цӕмӕй йӕ дзӕбӕх бамбарай. Дӕ хъус уӕлдай лӕмбынӕг дар цӕвиттонтӕ ӕмӕ бӕлвырдгӕнӕнтӕм, хъусын кӕнгӕйӕ йе та хӕслӕвӕрд цӕттӕ кӕнгӕйӕ сӕ дӕ бон спайда кӕнын куыд уа. Хъуыды кӕн, цы ахуыр кӕныс, уый кӕмӕн ис радзурӕн ӕмӕ йын афтӕмӕй йӕ уырнындзинад бафидар кӕнӕн. Цы хъуыдытӕ дӕ бахъӕудзысты, уыдон фӕнысан кӕн ӕмӕ сӕ фӕстагмӕ сфӕлхат кӕн.

Бакӕн-иу, Библийӕ дзы цы стихтӕ ис, уыдон иууылдӕр ӕмӕ-иу ахъуыды кӕн, алкӕцыдӕр дзы куыд ӕххуыс кӕны абзацы иумӕйаг хъуыды хуыздӕр бамбарынӕн.

Гӕнӕн ис, цыдӕр дзы хорз нӕ бамбарай йе та дӕ бафӕнда цавӕрдӕр фарста бӕстондӕр раиртасын. Цӕмӕй, цы ахуыр кӕныс, уымӕй ма адзӕгъӕл уай, уый тыххӕй фарстытӕ дӕхимӕ фӕнысан кӕн ӕмӕ сӕ фӕстӕдӕр раиртас. Фылдӕр хатт афтӕ вӕййы, ӕмӕ ӕрмӕг дарддӕр куыд кӕсыс, куыд ыл хъуыды кӕныс, афтӕ дзы зынӕмбаринагӕй ницыуал баззайы. Фӕлӕ ма дӕм уӕддӕр цыдӕр фарстытӕ куы баззайа, уӕд сӕ ма ныууадз. Ӕнӕмӕнг цы хъӕуы раиртасын? Зӕгъӕм, Библийӕ цавӕрдӕр стих дзӕбӕх нӕ бамбӕрстай. Кӕнӕ, цы кӕсыс, уымӕ куыд хауы, уый дӕ сӕр нӕ ахсы. Йе та цыдӕр хъуыды дӕхӕдӕг бамбӕрстай, фӕлӕ дӕм афтӕ кӕсы, ӕмӕ йӕ искӕмӕн бамбарын кӕнын дӕ бон не суыдзӕн. Ахӕм фарстытӕн рохуаты ныууадзӕн нӕй. Ӕрмӕг кӕронмӕ куы сахуыр кӕнай, уӕд ма сӕ лӕмбынӕг раиртас, ӕркӕс, кӕм ма цы дзырдӕуы уыцы фарстаты фӕдыл.

Райсӕм, апостол Павел дзуттаг чырыстӕттӕм цы фыстӕг ныффыста, уый. Хабӕрттыл бӕстон дзургӕйӕ, иу ран цыма йӕ хъуыды фескъуыдта, афтӕ загъта: «Нӕ ныхасӕн йӕ сӕр та ай у» (Дзут. 8:1, НФ). Цы ахуыр кӕныс, уымӕн йӕ сӕйраг хъуыды цы у, уый ды дӕр рӕстӕгӕй-рӕстӕгмӕ дӕ зӕрдыл ӕрлӕууын кӕныс? Цымӕ Павел афтӕ цӕмӕн бакодта? Сыгъдӕг удӕй зӕрдӕргъӕвд уӕвгӕйӕ Павел йӕ фыстӕджы раззаг сӕрты бамбарын кодта, Хуыцауӕй ӕвӕрд Хистӕр сауджын Чырысти кӕй бацыд арвӕн йӕхи мидӕг (Дзут. 4:14—5:10; 6:20). Фӕлӕ 8-ӕм сӕры райдианы уыцы сӕйраг хъуыды кӕй рахицӕн кодта ӕмӕ сын се ’ргом уымӕ кӕй аздӕхта, уымӕй сӕ бацӕттӕ кодта, уыцы хъуыддаг сӕ цардыл куыд зыны, ууыл арф ныхъхъуыды кӕнынмӕ. Павел бамбарын кодта, Чырысти уыдоны тыххӕй кӕй ӕрлӕууыд Хуыцауы раз ӕмӕ сын уӕларвон «кувӕндонмӕ» фӕндаг кӕй бакодта (Дзут. 9:24; 10:19—22). Сӕ ныфсӕн фидар бындур кӕй ис, уый хъуамӕ бамбӕрстаиккой ӕмӕ сӕ уӕд тынгдӕр фӕндыдаид, уыцы фыстӕджы сын дарддӕр уырнындзинад, фидардзинад ӕмӕ чырыстон уагахасты тыххӕй цы бауынаффӕ кодта, уый сӕ зӕрдӕмӕ арф айсын. Ахуыр кӕнгӕйӕ мах дӕр нӕ хъус тынгдӕр сӕйраг хъуыдытӕм куы дарӕм, уӕд нын ӕнцондӕр уыдзӕн, фарста куыд хӕлд цӕуы, уый фенын. Уымӕй дарддӕр, цы базыдтам, уымӕ гӕсгӕ архайын нӕ цӕмӕн хъӕуы, уый нӕ хъуыдыйы баззайдзӕн.

Цы сахуыр кӕнай, уый дын дӕ зӕрдӕйы зынг ссудздзӕн ӕмӕ дӕ хъуыддагмӕ баразӕнгард кӕндзӕн? Ай хуымӕтӕг фарста нӕу. Ног цыдӕр куы базоныс, уӕд-иу ахъуыды кӕн: ацы хъуыды мӕ зондахастыл ӕмӕ, царды цӕмӕ тырнын, ууыл куыд хъуамӕ фӕзына? Куыд мын феххуыс уыдзӕн зын хъуыддаг алыг кӕнынӕн, раст уынаффӕ рахӕссынӕн ӕмӕ мӕ разы цы нысан сӕвӕрдтон, уый сӕххӕст кӕнынӕн? Куыд мын фӕахъаз уыдзӕн мӕ бинонты царды, ӕмбырды ӕмӕ уацамынды? Кув Хуыцаумӕ, ӕмӕ афтӕмӕй хъуыды кӕн ацы фарстатыл, уыимӕ дӕ дӕ зонындзинӕдтӕ ӕцӕгӕйдӕр кӕм бахъӕудзысты, ахӕм бӕлвырд уавӕртыл.

Иу сӕргонд кӕнӕ статья ӕвзӕрст куы фӕуай, уӕд, цы базыдтай, уый цыбыртӕй сфӕлхат кӕн. Дӕхицӕн фӕлварӕн скӕн, кӕддӕра сӕйраг хъуыдытӕ ӕмӕ бӕлвырдгӕнӕнтӕ ӕрхъуыды кӕнын дӕ бон суыдзӕн. Уый фӕрцы сӕ хъуыды дӕр бакӕндзынӕ ӕмӕ дӕ дарддӕр царды кӕм бахъӕуой, уым дӕр сӕ спайда кӕндзынӕ.

Цы ис ахуыр кӕнӕн

Махӕн, Иегъовӕйы адӕмӕн, фагӕй фылдӕр ис цы ахуыр кӕнӕм, уый. Фӕлӕ цӕмӕй ис райдайӕн? Хорз уаид, брошюрӕйы, «Алы бон дӕр ӕвзар Фыстытӕ», зӕгъгӕ, алы бонӕн дӕр Библийӕ цы стих ӕмӕ уыцы стихмӕ цы хъуыдытӕ ис, уыдон куы ахуыр кӕниккам. Алы къуыри дӕр нын вӕййы фембӕлдтӕ, ӕмӕ сӕм куы цӕттӕ кӕнӕм, уӕд нын фылдӕр пайда хӕсдзысты. Афтӕ ма бирӕтӕ ахуыр кӕнынц, ӕцӕгад цалынмӕ нӕ базыдтой, уӕдмӕ нӕ Ӕхсӕнад цы чингуытӕ рауагъта, уыдон, ӕмӕ уый раппӕлинаг хъуыддаг у. Иннӕтӕ та, Библийӕ ӕрвылкъуыри дӕр цы бакӕсынц, уымӕй кӕцыдӕр хай рахицӕн кӕнынц, ӕмӕ йӕм стӕй лӕмбынӕгдӕр ӕркӕсынц.

Фембӕлдтӕм дын бӕстон бацӕттӕ кӕнынӕн рӕстӕг куы нӕ уа, уӕд та? Раст нӕ уаид, цы дзы уыдзӕн, уыдӕттӕ иууылдӕр уӕлӕнгӕйтты, ӕфсоны каст акӕнын. Ноджы ӕвзӕрдӕр та у афтӕ хъуыды кӕнын, зӕгъгӕ, иугӕр мӕ бон алцы сахуыр кӕнын нӕу, уӕд дзы ӕппындӕр ницы ахуыр кӕнын. Хуыздӕр уыдзӕн, дӕ бон бацӕттӕ кӕнын цас у, ууыл ахъуыды кӕнын ӕмӕ йӕ уый фӕстӕ дзӕбӕх бацӕттӕ кӕнын. Афтӕ кӕн алы къуыри дӕр. Сындӕг-сындӕг архай иннӕ фембӕлдтӕм цӕттӕ кӕныныл дӕр.

«Дӕ бинонты мӕт дӕр бакӕн»

Иегъовӕ ӕмбары, хӕдзары хистӕрты сӕ бинонты фӕдарынӕн бирӕ фыдӕбон кӕнын кӕй хъӕуы. «Бакӕн дӕ хӕдзары ӕдде дӕ куыстытӕ,— дзырдӕуы Ӕмбисӕндты 24:27,— ӕмӕ дӕ хуымы куыстытӕ кӕронмӕ ахӕццӕ кӕн», фӕлӕ бинонтӕн сӕ уырнындзинад фидар кӕнын кӕй хъӕуы, уый дӕр рохгӕнинаг нӕу, ӕмӕ уымӕ гӕсгӕ ӕмбисонд дарддӕр дзуры: «Уый фӕстӕ дӕ бинонты мӕт дӕр бакӕн». Цы нысан кӕны уый хӕдзары хистӕрӕн? Ӕмбисӕндты 24:3 кӕсӕм, зӕгъгӕ, бинонтӕ «ӕмбаргӕдзинадӕй фидар уыдзысты».

Куыд фӕахъаз уыдзӕн ӕмбаргӕдзинад дӕ бинонтӕн? Ӕмбаргӕ адӕймаг у арфуынаг, уый ӕппӕт дӕр уыны зӕрдӕйы цӕстытӕй. Зӕгъӕн ис, ӕмӕ бинонтимӕ Хуыцауы Ныхас ахуыр кӕнын райдайын хъӕуы, бинонтӕ цы уавӕры сты, уымӕ ӕркӕсынӕй (афтӕмӕй уӕ ахуыр уыдзӕн ахадгӕ). Чырыстон фӕндагыл размӕ цӕуынц, истытӕ сын ӕнтысы? Семӕ куы фӕныхас кӕныс, уӕд цы фӕдзурынц, уымӕ лӕмбынӕг хъус. Мыййаг, алкӕуыл фаутӕ ӕвӕрынц кӕнӕ искӕмӕ маст хӕссынц? Ӕхца ӕмӕ дзаумӕттыл ӕгӕр нӕ мӕт кӕнынц? Дӕ сывӕллӕттимӕ хъусын кӕнынмӕ куы вӕййыс, уӕд се ’мбӕлтты цур, Иегъовӕйы Ӕвдисӕнтӕ кӕй сты, уымӕй нӕ фефсӕрмы кӕнынц? Библи иумӕ кӕй кӕсут ӕмӕ йӕ кӕй ахуыр кӕнут, уый сӕ зӕрдӕмӕ цӕуы? Иегъовӕйы фӕндаг сӕ цардвӕндаг сси? Дӕ бинонтӕм дӕ хъус лӕмбынӕг куы дарай, уӕд уындзынӕ, куыд хистӕр, афтӕ дӕ бон цы у саразын, цӕмӕй сӕ алчидӕр ахуыр кӕна ӕмӕ йӕ удыхъӕды чырыстон миниуджытӕ фидар кӕна.

Семӕ цӕуыл аныхас кӕнинаг уай, уый фӕдыл ссар статьятӕ «Хъахъхъӕнӕн мӕсыг» ӕмӕ «Райхъал ут!»-ы. Иумӕ цы ахуыр кӕндзыстут, уый сын рагацау зӕгъ, цӕмӕй йыл гыццыл уӕддӕр ахъуыды кӕной. Ахуыры рӕстӕджы сӕ алкӕйдӕр рӕвдау дӕ цӕстӕнгасӕй. Ӕнӕ хыл ӕмӕ сын ӕнӕ уайдзӕфтӕй сӕ хъус ӕрдар, цы ахуыр кӕнут, уый сӕ алкӕйдӕр куыд ӕхсызгонӕй хъӕуы, уымӕ. Бинонтӕй алчидӕр йӕ хъуыдытӕ сӕрибарӕй куыд дзура, ууыл бацархай. Баххуыс сын кӕн, Иегъовӕйы Ныхас «ӕххӕст» кӕй у, ома царды алы хъуыддаджы дӕр кӕй ахады, уый бамбарынӕн (Пс. 18:8).

Цы хорзӕхтӕй стӕм хайджын

Алцы зонын дӕр кӕй фӕнды, фӕлӕ Библи цы дзуры, уый чи не ’мбары, ахӕм адӕм ахуыр кӕнынц ӕгӕрон Дун-дуне, дунейы цаутӕ ӕмӕ ма архайынц сӕхи базоныныл дӕр, фӕлӕ ӕппӕт уыдӕттӕн се ’цӕг мидис бамбарын сӕ бон нӕу. Хуыцауӕй сыгъдӕг уды ӕххуыс чи куры ӕмӕ йын йӕ Ныхас афтӕмӕй чи ахуыр кӕны, уыдон та ӕмбарынц, ӕппӕт дӕр Хуыцау кӕй сфӕлдыста, Библийы пехуымпарӕдтӕ кӕй ӕххӕст кӕнынц ӕмӕ Хуыцау коммӕгӕс адӕмы йӕ хорздзинӕдтӕй кӕй бафсаддзӕн, уый (Маркы 13:4—29; Ром. 1:20; Рарг. 12:12).

Уыдӕттӕ кӕй ӕмбарӕм, уый нын цины хос куыннӕ у, фӕлӕ, сӕрбӕрзонд уӕм, уый бар нын нӕ дӕтты. Уый нӕ, фӕлӕ Хуыцауы Ныхас алы бон дӕр кӕй ӕвзарӕм, уый фӕрцы стӕм сӕрныллӕг (Дык. з. 17:18—20). Хуыцауы Ныхас нӕ зӕрдӕты куы уа, уӕд «тӕригъӕды» амӕттӕгтӕ дӕр нӕ фӕуыдзыстӕм, ӕмӕ нӕ кӕд тӕригъӕд йӕхимӕ тынг ӕлвасы, уӕддӕр йӕ фӕдыл никуы ацӕудзыстӕм (Дзут. 2:1; 3:13; Кол. 3:5—10). Ӕмӕ уӕд афтӕ цӕрдзыстӕм, «Хуыцауы аккаг нӕхи куыд дарӕм, ӕмӕ Йын йӕ зӕрдӕ алцӕмӕй куыд ӕлхӕнӕм, алы хорз хъуыддаджы дыргъ ӕрхӕссынӕй» (Кол. 1:10, НФ). Раст уый тыххӕй ахуыр кӕнӕм Хуыцауы Ныхас, ӕмӕ уый нӕ къухы куы ӕфта, уӕд царды мидӕг уымӕй стырдӕр хорзӕх нӕй.

ПАДДЗАХ СОЛОМОН «арф... хъуыды кодта ӕмӕ алцыдӕр лӕмбынӕг... раиртӕста, цӕмӕй бирӕ ӕмбисӕндтӕ бӕлвырд фӕткмӕ гӕсгӕ равӕрдтаид». Цӕмӕн? Уымӕн ӕмӕ йӕ фӕндыд «ӕцӕгады дзырдтӕ раст ныффыссын» (Еккл. 12:9, 10). Лука та «ӕппӕт дӕр райдианӕй, бӕлвырд сбӕрӕг кӕнгӕйӕ кӕрӕдзийы фӕдыл ныффыста» Чырыстийы царды хабӕрттӕ (Лук. 1:3). Уӕдӕ зӕгъӕн ис, ӕмӕ Хуыцауы уыцы дыууӕ лӕггадгӕнӕджы иртӕстой цавӕрдӕр фарстатӕ.

Цы у иртасын? Зӕгъӕм, цыдӕр фарста дӕм фӕзындис, уӕд уый фӕдыл ӕрмӕг агурын. Уый тыххӕй дӕ бахъӕудзӕн цавӕрдӕр ӕрмӕг кӕсын, ӕмӕ уымӕ гӕсгӕ уыцы хъуыддаг бирӕ цӕмӕйдӕрты у цыдӕр ахуыр кӕныны хуызӕн. Афтӕ ма исты раиртасынӕн бахъӕуы адӕмимӕ аныхас кӕнын дӕр.

Кӕд фӕхъӕуы уӕлӕмхасӕн ӕрмӕг бацагурын? Мӕнӕ цалдӕр цӕвиттоны. Зӕгъӕм, Библи кӕсыс кӕнӕ ахуыр кӕныс, ӕмӕ дӕм цыдӕр ахсджиаг фарстатӕ сӕвзӕрд. Кӕнӕ дӕ хъусын кӕнгӕйӕ адӕймаг цӕмӕйдӕр бафарста, ӕмӕ йын иумӕйаг ныхӕстӕй дарддӕр дӕ бон бӕлвырд-бӕрӕгӕй ницы у зӕгъын. Йе та дын ӕмбырды раныхас бахӕс кодтой.

Ӕркӕсӕм фӕстаг цӕвиттонмӕ: бахӕс дын кодтой раныхас. Дӕ раныхасӕн йӕ бындуры цы ӕрмӕг ис, уый дӕм фаг нӕ кӕсы, цы хъуыдытӕ дзы ис, уыдон ӕгӕр иумӕйаг сты. Цыдӕр хъӕуы саразын, цӕмӕй дзы дӕ ныхасмӕхъусджытӕн сӕ бон уа царды спайда кӕнын. Фӕлӕ цы? Уӕлӕмхасӕн ӕрмӕг куы бацагурай, уӕд дӕ раныхас уыдзӕн бирӕ ахадгӕдӕр ӕмӕ хъӕздыгдӕр. Афтӕ дӕм куы кӕса, ӕмӕ кӕцыдӕр хъуыды адӕм зонынц, уӕд ӕй фӕтыхджындӕр кӕн цалдӕр бӕлвырдгӕнӕнӕй, цардӕй ист, ӕмбӕлон цӕвиттонӕй, хорз зонгӕ цы у, ахӕм цауӕй, ӕмӕ сын сӕ зӕрдӕ бацагайдзӕн. Цы ӕрмӕг ссардтай, уый фыст ӕрцыд, ӕгас дунейы дӕр ӕй чи кӕса, уыдонӕн. Ӕмӕ йӕ уымӕ гӕсгӕ хъӕуы фӕбӕлвырддӕр кӕнын, цӕвиттонты руаджы йӕ бамбарын кӕнын ӕмӕ йӕ бӕлвырд ӕмбырдмӕ кӕнӕ адӕймагмӕ ахӕссын. Куыд ис уый саразӕн?

Цалынмӕ уӕлӕмхасӕн ӕрмӕг ӕмбырд кӕнынмӕ ӕрӕвналай, уӕдмӕ уал ахъуыды кӕн, кӕмӕн ӕй дзурдзынӕ, уыдоныл. Цӕуыл дзурдзынӕ, уый тыххӕй цы зонынц? Цы сӕ хъӕуы базонын? Уый фӕстӕ сбӕрӕг кӕн, цы у дӕ ныхасӕн йӕ нысан. Цыдӕр сын бамбарын кӕнын? цӕуылдӕр сӕ баууӕндын кӕнын? цыдӕр раст кӕй нӕу, уый сын равдисын? цӕмӕдӕр сӕ баразӕнгард кӕнын? Исты бамбарын кӕнынӕн хъӕуы уӕлӕмхасӕн хъуыдытӕ ӕрхӕссын. Дзырд цӕуыл цӕуы, уый сӕ фылдӕр куы зоной, уӕддӕр бамбарын кӕнын хъӕуы, цы сын дзурыс, уый сӕ кӕд ӕмӕ куыд аразын хъӕуы. Истӕуыл баууӕндын кӕнынӕн та хъӕуы, афтӕ цӕмӕн у, уый бамбарын кӕнын ӕмӕ бӕлвырдгӕнӕнтӕ ӕрхӕссын. Цӕмӕй, цыдӕр раст кӕй нӕу, уый равдисай, уый тыххӕй та хъуамӕ хорз зонай, раст цӕмӕ у ӕмӕ цӕуылнӕ у, афтӕ ма хъуамӕ лӕмбынӕг ӕркӕсай, уымӕн цы бӕлвырдгӕнӕнтӕ ис, уыдонмӕ дӕр. Кӕй зӕгъын ӕй хъӕуы, ӕрмӕст ууыл хъуамӕ ма хъуыды кӕнӕм, цы бӕлвырдгӕнӕнтӕ йын ӕрхӕсдзыстӕм, фӕлӕ ма сӕ куыд зӕгъдзыстӕм, ууыл дӕр, цӕмӕй нӕ ныхӕстӕй макӕй зӕрдӕ фӕриссын кӕнӕм. Цӕмӕй адӕймаджы цӕмӕдӕр баразӕнгард кӕнай, уый тыххӕй та йын хъӕуы йӕ зӕрдӕ бацагайын. Ӕмӕ уый та дӕ къухы уӕд бафтдзӕн, дӕ ныхасы ахӕм уӕз куы уа, ӕмӕ дӕм чи хъуса, уыдонӕн сӕ зӕрдӕты зынг куыд ссудза ӕмӕ цы фехъуыстой, уымӕ гӕсгӕ бакӕнын сӕ куыд бафӕнда. Уый тыххӕй тынг хорз уаид, цыфӕнды зын уавӕрты дӕр Хуыцауы Ныхасмӕ гӕсгӕ чи архайдта, ахӕм адӕймӕгты тыххӕй радзурын.

Уӕдӕ ныр ис райдайӕн? Ма тагъд кӕн. Цас ӕрмӕг дӕ бахъӕудзӕн, ууыл дӕр ахъуыды кӕн. Ӕппӕт аразӕг дӕр рӕстӕг у. Раныхасӕн дын цас рӕстӕг ис? Фондз минуты? Цыппор фондз минуты? Ӕмбырды раз дӕ хъӕуы ныхасы рацӕуын, ӕмӕ цас хъуамӕ дзурай, уый бӕрӕг у? Ӕви Библи искӕимӕ ахуыр кӕндзынӕ, йе та хистӕр нӕлгоймаг дӕ ӕмӕ хъусынгӕнджытӕй кӕйдӕр бӕрӕг кӕндзынӕ ӕмӕ, цас рӕстӕг ныхас кӕндзынӕ, уый дӕхи бар у?

Ӕппынфӕстаг, цавӕр кусӕнгӕрзтӕ ис дӕ къухы? Хӕдзары дӕм цы ис, уымӕй дарддӕр Паддзахады залы чиныгдоны цы ис ссарӕн? Йе та, Иегъовӕйы фӕндагыл рагӕй чи цӕуы, уыдон дын бар нӕ раттиккой сӕ кусӕнгӕрзтӕй пайда кӕнынӕн? Науӕд дӕ бон нӕу хӕстӕгдӕр ӕхсӕнадон чиныгдонмӕ бацӕуын ӕмӕ дзы цы бӕрӕгуӕттӕ ӕмӕ дзырдуӕттӕ ис, уыдонӕй спайда кӕнын?

Нӕ сӕйраг кусӕнгарз — Библи

Кӕд дӕ Библийӕ кӕцыдӕр стих хъӕуы раиртасын, уӕд фыццаджыдӕр ӕркӕс, Библи йӕхӕдӕг цы дзуры, уымӕ.

Лӕмбынӕг ӕркӕс, стих Библийӕ кӕцӕй ист у, уыцы скъуыддзагмӕ ӕнӕхъӕнӕй. Ахъуыды кӕн: ацы ныхӕстӕ кӕмӕн уыдысты загъд? Ацы ныхӕстӕ фыст цӕмӕн ӕрцыдысты ӕмӕ дзы кӕй кой цӕуы, уыдон цавӕр зондыл хӕст уыдысты, уый тыххӕй йӕ разӕй ӕмӕ йӕ фӕстӕ фыст стихтӕй цы базонӕн ис? Ахӕм лыстӕг хабӕрттӕ арӕх стыр ахъаз фӕвӕййынц стихы хъуыды бамбарынӕн, ӕмӕ стӕй уыцы стихтӕ дӕ раныхасы куы ӕмбарын кӕнай, уӕд иннӕтӕн дӕр цымыдисаг уыдзӕн.

Зӕгъӕм, Хуыцауы Ныхас афтӕ тыхджын у, ӕмӕ адӕймагӕн йӕ зӕрдӕйы ахизы ӕмӕ йын йӕ цард фӕивы. Уый равдисынӕн арӕх ӕрхӕссӕм Дзуттытӕм 4:12. Афтӕ цӕмӕн у, уый нын арфдӕр бамбарынӕн ӕххуыс кӕнынц, йӕ разӕй ӕмӕ йӕ фӕстӕ цы стихтӕ ис, уыдон. Павел дзуры, Иегъовӕ Авраамӕн зӕрдӕ кӕмӕй бавӕрдта, уыцы зӕхмӕ бацӕуыны размӕ израилӕгтыл 40 азы дӕргъы ӕдзӕрӕг быдыры цытӕ ӕрцыди, уый тыххӕй (Дзут. 3:7—4:13). «Хуыцауы дзырд» — Авраамимӕ бадзырды бындурыл сын афтӕ кӕй загъта, ӕнцой кӕм ссарат, уыцы бынатмӕ бацӕудзыстут, зӕгъгӕ — уыд йӕ тыхы. Уыцы дзырд уыди ӕгас ӕмӕ ӕххӕст кодта. Израилӕгтӕ йыл ма ӕууӕндыдаиккой, уымӕн сын ницы ӕфсон уыди. Фӕлӕ йыл уӕддӕр цал ӕмӕ цал хатты фӕгуырысхо сты, цалынмӕ сӕ Египетӕй Синайы хохмӕ, уырдыгӕй та Зӕрдӕвӕрд зӕхмӕ кодта, уӕдмӕ. Уӕдӕ, Хуыцау йӕ дзырд куыд ӕххӕст кодта, уымӕ цы цӕстӕй кастысты, уый ӕргом ӕвдыста, сӕ зӕрдӕты ӕцӕгӕй цы уыди, уый. Раст афтӕ у абон дӕр: Хуыцауы дзырд, ома йӕ зӕрдӕвӕрдтӕ, ӕргом кӕнынц, адӕмӕн сӕ зӕрдӕты цы ис, уый.

Ӕркӕс уӕлӕмхасӕн стихтӕм. Бирӕ Библиты алы фарсыл дӕр амынд фӕцӕуы уӕлӕмхасӕн стихтӕ. Кӕд ахӕм стихтӕ ис дӕ Библийы дӕр, уӕд дын стыр ӕххуыс уыдзысты. Бирӕ ахӕм стихтӕ ис «Сыгъдӕг Фыстады Ног дунейы тӕлмацы», ӕмӕ уыцы тӕлмац йе ’взагыл кӕмӕн нӕй, уыдонӕй дӕр дзы бирӕтӕн сӕ бон у пайда кӕнын. Уӕлӕмхасӕн стихтӕ ис ирон ӕвзагыл уагъд «Ног Фӕдзӕхст ӕмӕ Псалтир»-ы дӕр (1994). Цӕвиттонӕн райсӕм 1 Петры 3:6. Уым дзырд цӕуы, чырыстон устытӕн фӕзминаг кӕй у Саррӕ. Ацы стих нын амоны, уыцы хъуыды кӕм бӕлвырд кӕны, ӕндӕр ахӕм стихмӕ — Уӕвынады 18:12. Уым кӕсӕм, Саррӕ Авраамы «йӕ хинымӕр» афтӕ кӕй хуыдта, мӕ сӕрыхицау, зӕгъгӕ. Уый та ууыл дзурӕг у, ӕмӕ алы хъуыддаджы дӕр йӕ лӕджы фӕндыл зӕрдӕйӕ кӕй уыд. Уӕлӕмхасӕн стихтӕй ма базонӕн вӕййы, Библийы пехуымпарӕдтӕ кӕд ӕмӕ куыд сӕххӕст сты кӕнӕ, дзырд цӕуыл цӕуы, уый бирӕ раздӕр Закъоны бадзырды ӕвдыст куыд ӕрцыд, уый. Фӕлӕ зӕрдыл дарын хъӕуы, уӕлӕмхасӕн стихтӕй алыхатт ахӕм цыдӕртӕ кӕй нӕ вӕййы базонӕн. Арӕх дзы ӕнӕуи фӕлхат фӕцӕуы стихы хъуыды кӕнӕ та дзы фыст вӕййы, архайджытӕ чи сты кӕнӕ архайд кӕм цӕуы, уыдӕтты тыххӕй.

Агур Библийы симфонийы фӕрцы. Библийы симфони у, Библийы дзырдтӕ алфавитмӕ гӕсгӕ амынд кӕм цӕуынц, ахӕм чиныг. Уым ӕнцон ссарӕн сты стихтӕ, бӕлвырдӕй цы фарста иртасыс, уый фӕдыл. Уыцы стихтӕм лӕмбынӕг куы ӕркӕсай, куы сыл ахъуыды кӕнай, уӕд базондзынӕ бирӕ хъӕугӕ хабӕрттӕ. Ды фендзынӕ, Хуыцауы Ныхасы цы ӕцӕгад ис, уый «хуызӕг» (2 Тим. 1:13). «Ног дунейы тӕлмац»-ы (уыр.) фӕстейӕ ис «Библийы дзырдтӕ амонӕн» (алы дзырд дзы нӕй). Бирӕ фылдӕр дзырдтӕ ис стыр симфониты. Кӕд ахӕм симфони, кӕй ӕмбарыс, ахӕм ӕвзагыл ис, уӕд дын Библи иртасынӕн стыр ӕххуыс уыдзӕн.

Куыд ис ӕндӕр кусӕнгӕрзтӕй пайда кӕнӕн

«Ӕууӕнкджын ӕмӕ зондджын цагъар» нын иртасынӕн ноджыдӕр цы хорз кусӕнгӕрзтӕ радта, уый фенӕн ис 33-аг фарсыл фӕлгӕты (Матф. 24:45—47). Уыцы чингуытӕй бирӕты ис сӕргӕндтӕ ӕмӕ фӕстейӕ дзырдтӕ амонӕнтӕ, ӕмӕ уый фӕрцы ссарӕн ис ӕрмӕг, цы фарста иртасыс, уый фӕдыл. Алы аз дӕр «Хъахъхъӕнӕн мӕсыг» ӕмӕ «Райхъал ут!»-ы фӕстаг номырты вӕййы, ӕгас афӕдзы дӕргъы дзы цы статьятӕ ӕрцыд мыхуыр, уыдоны амонӕн.

Библи ӕмбарынгӕнӕн чингуытӕй кӕм цӕуыл цӕуы дзырд, уый иумӕйагӕй уӕддӕр куы зонай, уӕд дӕ цы хъӕуы, уый бирӕ тагъддӕр ссардзынӕ. Цӕвиттон, фӕнды дӕ хуыздӕр бамбарын Библийы пехуымпарад кӕнӕ фылдӕр базонын, Библи Хуыцауы тыххӕй цӕуыл ахуыр кӕны, цы дзуры чырыстон уагахасты тыххӕй, йе та куыд ис йӕ уагӕвӕрдтӕй царды пайда кӕнӕн. Ахӕм фарстатӕ агурын хъӕуы «Хъахъхъӕнӕн мӕсыг»-ы. «Райхъал ут!»-ӕйa та базонӕн ис, кӕм цы ’рцыди, адӕмы цы тыхсын кӕны, уыдӕтты тыххӕй; дин, зонад ӕмӕ алы бӕстӕты цӕрӕг адӕмты тыххӕй. Чиныджы, «Ӕппӕты номдзыддӕр адӕймаг», зӕгъгӕ, бӕстон дзырдӕуы Йесо Чырыстийы царды хабӕрттыл (кӕрӕдзийы фӕдыл куыд цыдысты, афтӕмӕй). Библийы хицӕн чингуытӕ та стих стихы фӕдыл ӕвзӕрст цӕуынц ахӕм чингуыты: «Раргомад — йӕ диссаджы сӕххӕст хӕстӕг у!», «Хъусут Данелы пехуымпарадмӕ!» ӕмӕ дыууӕ томӕй уагъд «Исайы пехуымпарад — рухс ӕппӕт адӕмӕн»b. «Бӕлвырдгӕнӕнтӕ Фыстадӕй»c, зӕгъгӕ, уым та ссардзынӕ хорз дзуаппытӕ, хъусын кӕнгӕйӕ нӕм адӕм Библийӕ цы бирӕ фарстытӕ фӕдӕттынц, уыдонӕн. Иннӕ динтӕ куыд равзӕрдысты, цӕуыл ахуыр кӕнынц, уыдӕтты тыххӕй бирӕ цыдӕртӕ базонӕн ис ахӕм чиныгӕй, «Адӕм агурынц Хуыцауы»d, зӕгъгӕ. Иегъовӕйы Ӕвдисӕнты тыххӕй та цыдӕртӕ базонӕн ис брошюрӕйӕ «Иегъовӕйы Ӕвдисӕнтӕ Хуыцауы фӕндон иумӕйагӕй ӕххӕст кӕнынц ӕппӕт зӕххыл». Хъусын кӕныны хъуыддаг ӕгас дунейы куыд цӕуы, уый тыххӕй бирӕ лыстӕг хабӕрттӕ вӕййы «Хъахъхъӕнӕн мӕсыг»-ы 1 январы номыры. «Фыстады ӕмбарынад»e та у Библийы энциклопеди, ис дзы бирӕ картӕтӕ. Библийы цы адӕмтӕ, ӕвзӕгтӕ, цаутӕ, бӕстӕтӕ ӕмӕ алыхуызон дзауматы кой цӕуы, уыдон тыххӕй дӕ исты куы фӕнда базонын, уӕд дын стыр ӕххуыс уыдзӕн ацы энциклопеди.

«Хъахъхъӕнӕн Мӕсыджы уагъд литературӕйы амонӕн». Ахӕм «Амонӕн» цӕуы 20 ӕвзагӕй фылдӕрыл. Йӕ нысан уый у, цӕмӕй нын ӕнцондӕр уа, нӕ Ӕхсӕнады уагъд литературӕйы нӕ цы бахъӕуа, уый ссарын. Ис дзы, кӕм цавӕр фарстайыл цӕуы дзырд, уый амонӕн, стӕй Библийы стихтӕ амонӕн дӕр. Цавӕрдӕр фарстайы фӕдыл ӕрмӕг агурын хъӕуы сӕйраг дзырдмӕ гӕсгӕ. Цы стих дӕ цымыдис кӕны, уый та ссарӕн ис Библийы стихтӕ амонӕны. Кӕд, кӕй ӕмбарыс, ахӕм ӕвзагыл «Амонӕн» ис ӕмӕ цы азтӕн у, уыцы азты де ’взагыл мыхуыргонд литературӕйы уыцы фарста кӕнӕ стих ӕвзӕрст цӕуы, уӕд ӕй дӕ бон уыдзӕн ссарын. «Амонӕн»-ы фыццаг фарсыл вӕййы, литературӕ цыбыргондӕй куыд амынд цӕуы, уый. (Зӕгъӕм, w99 3.1. 15 амоны «Хъахъхъӕнӕн мӕсыг» 1999 аз 1 мартъи, 15 фарс.) Кӕд дӕ дӕ раныхасмӕ исты зӕрдӕмӕхъаргӕ хъуыдытӕ фӕнды бахӕссын, уӕд та кӕс ахӕм сӕргӕндтӕ: «Цаутӕ уацамындӕй» ӕмӕ «Иегъовӕйы Ӕвдисӕнты царды хабӕрттӕ».

Уӕлӕмхасӕн ӕрмӕг агургӕйӕ адӕймаг бирӕ хорз хъуыдытыл кӕй фӕхӕст вӕййы, уымӕ гӕсгӕ, гӕнӕн ис, цы агуырдтай, уый дӕ ферох уа. Цӕмӕй афтӕ ма рауайа, уый тыххӕй «Амонӕн»-ы хъӕугӕ чиныг кӕнӕ журнал куы ссарай, уӕд уайтагъд бакӕн, кӕцы фарс дӕ хъӕуы, уый; стӕй кӕс дӕлсӕргӕндтӕм ӕмӕ абзацты фыццаг хъуыдыйӕдтӕм ӕмӕ афтӕмӕй ссар, цы дӕ хъуыди, уый. Цавӕрдӕр стих нӕ литературӕ куыд ӕмбарын кӕны, уый базонын дӕ куы фӕнда, уӕд «Амонӕн» кӕдӕм амоны, уыцы фарсыл уал ссар стихӕн йӕхи, уый фӕстӕ та — цы хъуыдытӕ йӕм ис, уыдон.

«Хъахъхъӕнӕн Мӕсыджы уагъд литературӕ» компакт-дискыл. Кӕд дын компьютеримӕ архайыны фадат ис, уӕд ма дӕ бон у пайда кӕнын «Хъахъхъӕнӕн Мӕсыджы уагъд литературӕ»-йӕ компакт-дискыл дӕр (нӕ литературӕйӕ дзы бирӕ цыдӕртӕ ис). Хӕрзӕнцонӕй дзы ис ссарӕн дзырд, дзырдбаст кӕнӕ стих нӕ литературӕйӕ кӕмфӕнды дӕр. Ахӕм компакт-дисктӕ ис, зӕххыл ӕппӕты фылдӕр цы ӕвзӕгтыл дзурынц, уыдоныл. Уымӕ гӕсгӕ, кӕд де ’взагыл нӕй, фӕлӕ уыцы ӕвзӕгтӕй искӕцы зоныс, уӕд дзы дӕ бон у пайда кӕнын.

Ӕндӕр ӕххуысчингуытӕ

Павел, сыгъдӕг удӕй разӕнгард уӕвгӕйӕ, Тимофеймӕ йӕ дыккаг фыстӕджы фыста, зӕгъгӕ мын Роммӕ демӕ ӕрхӕсс «чингуытӕ, уӕлдайдӕр цӕрмынтӕ» (2 Тим. 4:13). Павелӕн фыстыты тыхтонтӕй кӕцыдӕртӕ уыдысты тынг зынаргъ, йӕхимӕ сӕ дардта. Ды дӕр афтӕ кӕн. «Хъахъхъӕнӕн мӕсыг», «Райхъал ут!» ӕмӕ «Нӕ хъусын кӕныны хъуыддаг» куы бакӕсыс ӕмӕ сӕ ӕмбырды фембӕлдты куы равзарӕм, уый фӕстӕ сӕ дӕхимӕ бафснайыс? Кӕд о, уӕд дын уыдон дӕр, ӕмӕ ма дӕм нӕ Ӕхсӕнады уагъд литературӕйӕ цы ис, уыдон дӕр уыдзысты замманайы кусӕнгӕрзтӕ. Ӕвӕццӕгӕн, иу стӕмӕй фӕстӕмӕ алы ӕмбырдӕн дӕр Паддзахады залы ис йӕхи чиныгдон. Уыцы чиныгдон у ӕгас ӕмбырдӕн, Паддзахады залмӕ куы ӕрбацӕуынц, уӕд.

Дӕхӕдӕг дӕр ӕмбырд кӕн ӕрмӕг

Дӕ раныхасӕн кӕнӕ дӕ адӕмимӕ ныхасы чи бахъӕудзӕн, ахӕм хъуыдытӕм дӕ хъус дар. Зӕгъгӕ, газет кӕнӕ журналы, чи дӕ бахъӕудзӕн, ахӕм ног хабар, цӕвиттон ӕмӕ бӕрӕггӕнӕнтыл фӕхӕст дӕ, уӕд-иу уыцы ӕрмӕг ралыг кӕн кӕнӕ та-иу дзы дӕхицӕн ксерокъопи скӕн. Ӕрмӕст-иу дӕ ма ферох уӕд, кӕцӕй, кӕцы номырӕй ист у, чи йӕ ныффыста кӕнӕ кӕй уагъд у, уый фӕнысан кӕнын. Ӕмбырды фембӕлдты дӕхимӕ фысс, адӕмӕн ӕцӕгад ӕмбарын кӕнынӕн чи бабӕздзӕн, ахӕм хъуыдытӕ, цӕвиттонтӕ ӕмӕ бӕлвырдгӕнӕнтӕ. Афтӕ дын никуы уыди, ӕмӕ дӕ сӕрмӕ цыдӕр хорз цӕвиттон ӕрцыд, фӕлӕ дзы уыцы тӕккӕ спайда кӕнай, уый фадат дын нӕ разынд? Афысс ӕй ӕмӕ йӕ дӕхимӕ сӕвӕр. Хуыцауы Ныхас хъусынгӕнджыты скъолайы ахуыр кӕнгӕйӕ-иу дын дӕтдзысты хӕслӕвӕрдтӕ. Уыцы фыстытӕ дӕр-иу ма аппар, фӕлӕ сӕ иу ран ӕвӕр. Цы хорз хъуыдытӕ ссардтай, уыдон ма дӕ искуы бахъӕудзысты.

Ныхас кӕн адӕмимӕ

Бирӕ хорз цыдӕртӕ базонӕн ис адӕмӕй дӕр. Лука йӕ Евангели куы фыста, уӕд бирӕ цыдӕртӕ базыдта, хабӕрттӕ йӕхи цӕстӕй чи федта, уыдонимӕ ныхас кӕнгӕйӕ (Лук. 1:1—4). Арӕх афтӕ вӕййы, ӕмӕ ӕмчырыстӕттимӕ ныхас кӕнгӕйӕ дзуапп ссарӕм, тынг нӕ чи цымыдис кодта, ахӕм фарстайӕн. Ефесӕгтӕм 4:8, 11—16 (НД) куыд кӕсӕм, афтӕмӕй нын «Хуыцауы Фырты базонынӕн» Чырысти радта «лӕварӕн адӕймӕгты». Уӕдӕ Хуыцауӕн рагӕй чи лӕггад кӕны, уыдонимӕ ныхас кӕнгӕйӕ фехъусдзынӕ бирӕ хорз ӕмӕ хъӕугӕ хъуыдытӕ. Афтӕ ма хуыздӕр ӕмбардзынӕ адӕмы, сӕ миддуне, ӕмӕ уый фӕрцы дӕ бон уыдзӕн, стырдӕр ахъаз сын чи уа, ахӕм раныхӕстӕ цӕттӕ кӕнын.

Цы ӕрӕмбырд кодтай?

Мӕнӕу куы ӕркӕрдынц, уӕд ӕй уый фӕстӕ та най фӕкӕнынц, ома мӕнӕу йӕ цъарӕй фӕхицӕн кӕнынц. Афтӕ кӕнын хъӕуы, ӕрмӕг агургӕйӕ цы «тыллӕг» ӕрӕмбырд кодтай, уымӕн дӕр. Цалынмӕ дзы спайда кӕнай, уӕдмӕ уал дзы уӕлдай цы у, уый ахицӕн кӕн.

Кӕд раныхас цӕттӕ кӕныс, уӕд дӕхи бафӕрс: ацы хъуыды мӕ ныхасы мидис райхалынӕн исты ахъаз фӕуыдзӕн? Ӕви, кӕд цыфӕнды цымыдисаг у, уӕддӕр мын мӕ хъуыдытӕ ныссуйтӕ кӕндзӕн? Зонад ӕмӕ медицинӕ ӕдзухдӕр цӕуынц размӕ, ӕмӕ дӕ уыцы фадгуытӕй куы фӕнда цыдӕр бӕрӕггӕнӕнтӕ ӕрхӕссын, уӕд ӕнӕмӕнг базон, ног кӕй сты. Дӕ зӕрдыл дар, нӕ Ӕхсӕнад иуӕй-иу фарстатӕ бирӕ азты размӕ куыд ӕмбарын кодта, ныр сӕ афтӕ кӕй нал ӕмбарын кӕны. Уымӕ гӕсгӕ дӕ фарстӕн ӕрмӕг агур фӕстаг азты уагъд литературӕйы.

Уӕлдай лӕмбынӕг хъуыды кӕнын хъӕуы, нӕ Ӕхсӕнады уагъд чи нӕу, ахӕм чингуытӕ ӕмӕ бӕрӕгуӕттӕй дӕ куы фӕнда цыдӕр хъуыды райсын, уӕд. Макуы дӕ ферох уӕд — ӕцӕгад Хуыцауы Ныхасы ис (Иоан. 17:17). Хуыцауы фӕнд сӕххӕст кӕныны хъуыддаджы сӕйраг ахадындзинад Йесойӕн ис. Уымӕ гӕсгӕ Колоссӕгтӕм 2:3 (НФ) кӕсӕм: «Чырыстийы мидӕг сты ӕмбӕхст тарф хъуыдыйы ӕмӕ зонды алы хӕзнатӕ!» Уӕдӕ ацы хъуыды дӕ зӕрдыл даргӕйӕ ӕркӕс, цы ӕрмӕг ссардтай, уымӕ. Ӕнӕуи чингуытӕй цы ӕрмӕг райстай, уый тыххӕй та ахъуыды кӕн: адӕймаг дзы йӕхицӕй ницы бафтыдта, ӕцӕг цы у, уый нӕ, фӕлӕ дзы, йӕхимӕ раст цы кӕсы, уыдӕттӕ нӕ дзуры, йе та дзы цыбырзонд адӕймаджы хъуыдытӕ нӕй? Чи йӕ фыста, уый йӕ кадмондаг зӕрдӕ кӕнӕ ӕхца нӕ баразӕнгард кодта йӕ ныффыссынмӕ? Уыцы хъуыдытимӕ, ӕууӕндӕн кӕуыл ис, уыцы ахуыргӕндтӕ разы сты? Ӕмӕ иууыл сӕйрагдӕр та — Библи цы дзуры, уый ныхмӕ нӕу?

Ӕмбисӕндтӕ 2:1—5 нӕм уымӕ сиды, цӕмӕй «ӕвзист» ӕмӕ «ӕмбӕхст хӕзнатау» агурӕм зонындзинӕдтӕ, ӕмбарынад ӕмӕ ӕмбаргӕдзинад. Ӕмӕ кӕд уый ӕнцон нӕу, уӕддӕр адӕймагӕн кӕуылты ӕххуыс у! Ӕрмӕг ссарын, цыдӕр раиртасын, бӕгуыдӕр, стыр фыдӕбон у, фӕлӕ ма ахъуыды кӕн: ды базондзынӕ, уыцы хъуыддаджы фӕдыл Хуыцау цы хъуыды кӕны, уый. Фендзынӕ, раст кӕм нӕ хъуыды кодтай, уый ӕмӕ ӕцӕгад хуыздӕр ӕмбардзынӕ. Уый фӕрцы дӕ ныхас алкӕддӕр уыдзӕн арфхъуыдыджын ӕмӕ зӕрдӕмӕхъаргӕ; зӕрдӕрухсы хос уыдзӕн дӕхицӕн дӕр ӕмӕ дӕм чи хъуса, уыдонӕн дӕр.