Дӕ хъус лӕмбынӕг дар, дӕ рӕстӕгӕй куыд пайда кӕныс, уымӕ

1. Абон адӕм алы ран дӕр цавӕр зындзинадыл ӕмбӕлынц?

¹ Абон цы нӕ фӕрӕзтӕ ис, цӕмӕй адӕймаг исты кусгӕйӕ къаддӕр рӕстӕг ӕмӕ хъарутӕ хардз кӕна. Фӕлӕ бирӕтӕ бафиппайдтой, фылдӕр хъуыддӕгтӕ сӕ кӕй хъӕуы аразын ӕмӕ сын уымӕн къаддӕр рӕстӕг кӕй ис. Зын дын у монон хъуыддӕгтӕн хорз фӕтк скӕнын ӕмӕ ууыл хӕцын? Фӕнды дӕ, цӕмӕй дын фылдӕр рӕстӕг уа хъусын кӕнынӕн? Куыд у нӕ бон нӕ рӕстӕгӕй иууыл хуыздӕр пайда кӕнын? (Пс. 89:12; Фил. 1:9—11).

2, 3. Хабархӕссӕг техникӕ къуылымпыйы хос цӕмӕй у ӕмӕ махӕй алкӕмӕндӕр йӕ бон куыд у йӕ цардмӕ ӕркӕсын?

² Базон, дӕ рӕстӕг цӕуыл ацӕуы. Алчидӕр нӕ хъуамӕ хаттӕй-хатт бӕлвырд кӕна, нӕ рӕстӕгӕй куыд пайда кӕнӕм, уый. Библи нын дзуры: «Уӕ хъус лӕмбынӕг дарут, цӕмӕй ӕнӕзӕндтау ма архайат, фӕлӕ зондджынтау, ӕмбӕлон рӕстӕг ӕлхӕнгӕйӕ уӕхицӕн, уымӕн ӕмӕ фыдрӕстӕг у» (Еф. 5:15, 16, НД). Ӕркӕсӕм, хабархӕссӕг техникӕ размӕ кӕй ацыд, уый цы къуылымпыдзинӕдтӕ ӕвзӕрын кӕны, уымӕ. Кӕд компьютертӕ ӕмӕ ӕндӕр электрон фӕрӕзтӕ стыр ӕххуыс сты, уӕддӕр нын гӕнӕн ис къӕппӕг суой, нӕ рӕстӕгӕй куыд пайда кӕнӕм, уымӕ нӕ хъус лӕмбынӕг куы нӕ дарӕм, уӕд (1 Кор. 7:29, 31).

³ Алчидӕр нӕ хъуамӕ йӕхи бафӕрса: «Цымӕ алы бон дӕр мӕ рӕстӕг бахардз кӕнын, электрон постӕй цы фыстӕджытӕ райсын, — кӕд къуылымпыйы хос йеддӕмӕ ӕндӕр ницы сты, уӕддӕр — уыдон кӕсыныл кӕнӕ та сын дзуапп фыссыныл? Ӕнӕпайда хабӕрттыл арӕх фӕдзурын телефонӕй, кӕнӕ электрон постӕй арӕх фервитын фыстӕджытӕ уыдӕтты тыххӕй? (1 Тим. 5:13). Бӕлвырдӕй мӕ куы ницы фӕхъӕуы, уӕддӕр Интернеты истытӕ фӕагурын, кӕнӕ та телевизоры куы ницы вӕййы, уӕддӕр ӕй иу каналӕй иннӕ каналмӕ фӕракъӕпп-бакъӕпп кӕнын? Электрон хъӕзтыты афтӕ аныгъуылдтӕн, ӕмӕ мӕ Хуыцауы Ныхас ахуыр кӕнынмӕ нал ӕвдӕлы?» Ахӕм хъуыддӕгтӕй нӕ уырнындзинад ӕрлӕмӕгъ уыдзӕн (Ӕмб. 12:11).

4. Иу ӕрыгон лӕппу йӕ царды цы фӕивта ӕмӕ цӕмӕн?

⁴ Рӕстӕгӕй раст пайда кӕнын. Электрон фӕрӕзтӕ сӕ уацары бакӕнынц мах дӕр ӕмӕ нӕ рӕстӕг дӕр. Иу ӕрыгон лӕппуйы компьютерон хъӕзтытӕй дарддӕр ницыуал ӕндӕвта. Уый ӕргом загъта: «Уацамынды кӕнӕ та-иу чырыстон фембӕлды размӕ компьютерон хъӕзтытӕй куы хъазыдтӕн, уӕд-иу мын стӕй тынг зын уыди мӕ хъуыдытӕ ӕрӕмбырд кӕнын. Зӕгъӕн ис, ӕмӕ ӕппынӕдзух хъуыды кодтон, хӕдзармӕ баздӕхгӕйӕ цавӕрдӕр хъазты мӕ бон хуыздӕр ахъазын куыд уыдзӕн, ууыл. Мӕ къух ауыгътон ахуыр кӕнын ӕмӕ Библи кӕсыныл. Хуыцауӕн лӕггад кӕнын мын цы циндзинад хаста, уый мынӕг кӕнын байдыдта». Ацы лӕппу куы бамбӕрста, йӕ царды йӕ цыдӕр кӕй хъӕуы фӕивын, уӕд йӕ компьютерон хъӕзтытӕ иууылдӕр схафта. «Раст зӕгъгӕйӕ мын уый саразын зын уыди,— дзуры уый.— Ӕз уый ӕнхъӕл нӕ уыдтӕн, ӕмӕ хъӕзтытыл афтӕ фӕцалх уыдзынӕн. Фӕлӕ уыимӕ тынг цин кодтон, кӕй фӕуӕлахиз дӕн, уымӕн ӕмӕ ӕмбӕрстон, афтӕ кӕй бакодтон, уый ӕрмӕстдӕр мӕхи пайдайӕн кӕй уыд» (Матф. 5:29, 30).

5. Монон хъуыддӕгтӕн нӕ бон куыд у рӕстӕг «ӕлхӕнын» ӕмӕ нын уый куыд фӕахъаз уыдзӕн?

⁵ Кӕд дӕ цавӕрдӕр хъуыддӕгты цыдӕртӕ фӕивын хъӕуы, уӕд дӕу дӕр, гӕнӕн ис, бахъӕуа афтӕ бакӕнын. Ахсджиаг цы хъуыддӕгтӕ не сты, уыдонӕй дӕ бон нӕ уыдзӕн алы бон дӕр ӕрдӕг сахат «ӕлхӕнын»? Цӕмӕй Библи ӕнӕхъӕнӕй иу афӕдзмӕ бакӕсай, уый тыххӕй дӕ растдӕр уыйбӕрц рӕстӕг хъӕуы алы бон дӕр. Уӕвгӕ, уый куыд фӕахъаз уыдзӕн нӕ уырнындзинадӕн! (Пс. 18:8—12; 118:97—100). Бӕрӕг рӕстӕг хицӕн кӕн Библи кӕсынӕн, фембӕлдтӕм цӕттӕ кӕнынӕн ӕмӕ хъусын кӕнынӕн (1 Кор. 15:58). Афтӕмӕй, дӕ рӕстӕг ӕнӕпайда хъуыддӕгтыл нӕ цӕудзӕн ӕмӕ ӕмбардзынӕ, «цы у Хуыцауы фӕндон» (Еф. 5:17).

Журналтӕ дӕтгӕйӕ цы ис зӕгъӕн

«Хъахъхъӕнӕн мӕсыг», 15 янв. (уыр.)

«Абон адӕм сӕ ныхасӕн хицау кӕй не сты, уымӕ гӕсгӕ бирӕтӕ никӕуыл ӕууӕндынц. Куыд хъуыды кӕныс, искӕй зӕрдӕвӕрдтыл ма ис ӕууӕндӕн? [Бауадз ӕй йӕ хъуыды зӕгъын. Уый фӕстӕ бакӕс Йесо Навин 23:14.] Ацы журналы дзырдӕуы, куыд у нӕ бон, Хуыцау Библийы цы зӕрдӕвӕрдтӕ радта, уыдоныл ӕууӕндын».

«Райхъал ут!», 22 янв. (уыр.)

«Мӕнӕ афтӕ у Хуыцауы ном дзуттаг ӕвзагыл. [Равдис журналы цъар.] Бирӕтӕ афтӕ хъуыды кӕнынц, ӕмӕ ацы ном хъӕрӕй дзурын не ’мбӕлы. Иннӕтӕ та йӕ сӕрибарӕй дзурынц. Ацы „Райхъал ут!“-ӕй базондзынӕ, уыцы номы фӕдыл алыхуызон хъуыдытӕ цӕмӕн ис. Ӕмӕ ма дзы дзырд цӕуы, куыд ис Хуыцауы хуыздӕр базонӕн». [Бакӕс Псалом 82:19.]

«Хъахъхъӕнӕн мӕсыг», 1 фев.

«Бирӕтӕ нӕ тынг тыхсынц се ’нӕниздзинадыл. Фӕлӕ фӕстаг иртӕстытӕй куыд рабӕрӕг, афтӕмӕй ма адӕймаджы амондыл ӕндавы йӕ уырнындзинад дӕр. Куыд хъуыды кӕныс, уый ӕцӕгдӕр афтӕ у? [Бауадз ӕй йӕ хъуыды зӕгъын. Уый фӕстӕ бакӕс Матфейы 5:3.] Ацы „Хъахъхъӕнӕн мӕсыг“-ы дзырд цӕуы, нӕ бон куыд у нӕ уырнындзинад фидар кӕнын».

«Райхъал ут!», 8 фев. (уыр.)

«Абон бирӕтӕ ӕнӕвдӕлон сты ӕмӕ сӕ уымӕ гӕсгӕ хъӕуы фылдӕр улӕфын. Ӕвӕццӕгӕн сразы уыдзынӕ, иу-3000 азы размӕ цы ныхӕстӕ ныффыстой, уыдонимӕ. [Бакӕс Екклесиасты 4:6. Уый фӕстӕ йӕ бауадз йӕ хъуыды зӕгъын.] Ацы „Райхъал ут!“-ы ис хорз уынаффӕтӕ, куыд ис базонӕн фаг фынӕй кӕныс ӕви нӕ ӕмӕ цы ис саразӕн».