Иегъовӕйӕн дӕттӕм, хуыздӕрӕй нӕм цы ис, уый

¹ Иегъовӕ израилӕгтӕн цы Закъон радта, уым бӕлвырдӕй уыд загъд, нывондӕн «ӕнаипп» фос кӕй хъуамӕ хастаиккой. Сахъат фос хӕссыны бар нӕ уыд (Лев. 22:18—20; Мал. 1:6—9). Уымӕй уӕлдай ма-иу нывонд куы ӕрхастой, уӕд-иу йӕ фиу иууылдӕр — йӕ хуыздӕр хай — ӕмбӕлди Иегъовӕмӕ (Лев. 3:14—16). Иегъовӕ Израилы Фыд ӕмӕ Кадджын Хицау кӕй уыд, уымӕ гӕсгӕ йӕм ӕмбӕлд, иууыл хуыздӕр цы у, уый.

² Рагзаманты куыд уыд, афтӕ абон дӕр Хуыцауӕн уӕлдай нӕу, цавӕр нывӕндтӕ йын хӕссӕм, уый. Нӕ лӕггадӕй хъуамӕ зына, Иегъовӕйӕ кӕй аргъуыц кӕнӕм. Дзырд дӕр ыл нӕй, алы адӕймагӕн дӕр йӕ уавӕртӕ иннӕтӕй кӕй хицӕн кӕнынц. Фӕлӕ нӕ уӕддӕр хъӕуы нӕ зӕрдӕтӕм лӕмбынӕг ныккӕсын ӕмӕ сбӕлвырд кӕнын, хуыздӕрӕй нӕм цы ис, уый йын дӕттӕм ӕви нӕ (Еф. 5:10).

³ Ӕппӕт зӕрдӕйӕ лӕггад кӕнын. Цӕмӕй нӕ лӕггадӕй Иегъовӕйы кадджын кӕнӕм ӕмӕ нӕ ныхасмӕхъусджыты зӕрдӕтӕм фӕндаг арӕм, уый тыххӕй йӕ хъуамӕ ӕнӕбары ма кӕнӕм. Нӕ Хуыцауы ӕмӕ йӕ диссаджы фӕндты тыххӕй куы фӕдзурӕм, уӕд уый хъуамӕ цӕуа нӕ бузныг зӕрдӕйы арфӕй (Пс. 144:7). Уый та ууыл дзурӕг у, ӕмӕ адӕймагӕн хъуамӕ уа хорз фӕтк Библи кӕсынӕн ӕмӕ йӕ ахуыр кӕнынӕн (Ӕмб. 15:28).

⁴ Хуыздӕрӕй нӕм цы ис, уый ма Иегъовӕйӕн дӕтдзыстӕм, уый адӕмы куыд уарзы, афтӕ сӕ куы уарзӕм, уӕд (Еф. 5:1, 2). Ахӕм уарзондзинад нӕ разӕнгард кӕндзӕн цардирвӕзынгӕнӕн хабар хъусын кӕнын фылдӕр адӕмӕн (Маркы 6:34). Кӕимӕ ныхас кӕнӕм, уыдоныл сыгъдӕг зӕрдӕйӕ тыхсдзыстӕм. Нӕ фыццаг фембӕлды фӕстӕ дӕр сыл хъуыды кӕндзыстӕм ӕмӕ та сӕм ноджыдӕр бацӕудзыстӕм. Кӕй сӕ уарзӕм, уый тыххӕй сын нӕ бон цы у, уымӕй сӕ уырнындзинад фидар кӕндзыстӕм (Ап. к. 20:24; 26:28, 29).

⁵ «Ӕппӕлды нывонд». Хуыздӕрӕй нӕм цы ис, уый ма нӕ бон у Иегъовӕйӕн дӕттын ӕппӕт тыхтӕй лӕггад кӕнгӕйӕ. Нӕ хъуыддӕгтӕ хорз куы пълан кӕнӕм ӕмӕ нӕ царды фыццаг бынаты уацамынд куы уа, уӕд нӕ рӕстӕгӕй иууыл хуыздӕр пайда кӕндзыстӕм (1 Тим. 4:10). Хорз цӕттӕгӕнгӕйӕ нӕ ныхас уыдзӕн бӕлвырд, ӕнцонӕмбарӕн, дзурдзыстӕм фидарӕй, ӕмӕ нӕм афтӕмӕй та, гӕнӕн ис, фылдӕр адӕм байхъуса (Ӕмб. 16:21). Хорз хабар адӕмӕн куы фӕдзурӕм, уӕд нын нӕ зӕрдӕйы арфӕй цӕуӕг ныхӕстӕ ӕцӕгдӕр схонӕн ис «ӕппӕлды нывонд» (Дзут. 13:15).

Фӕсивӕд, кӕсут Хуыцауы Ныхас!

¹ Ӕвзонджы бонтӕ сты лӕгӕвзарӕн ӕмӕ цардаразӕн дуг. Ӕрыгон чырыстӕттӕ, бирӕты уӕ алы бон дӕр амидин кӕнынц, Хуыцау хӕрзӕгъдаудзинады тыххӕй цы уагӕвӕрдтӕ сфидар кодта, уыдоны сӕрты ахизынмӕ. Ахуыр, куыст, ус курын кӕнӕ чындзы цӕуыны разӕй уал хъуамӕ уӕ разы нысӕнттӕ сӕвӕрат, Хуыцауӕн куыд лӕггад кӕндзыстут. Ӕрмӕстдӕр уӕд уыдзӕн уӕ бон хӕссын ахӕм уынаффӕтӕ, уӕ дарддӕры цардыл уын хорзырдӕм чи фӕзына. Бӕрӕг монон нысӕнттӕ уын баххуыс кӕндзысты зондджынӕй архайынӕн ӕмӕ уӕ цардвӕндагыл ӕнтыстджынӕй цӕуынӕн. Хуыцауы Ныхас иудадзыг куы кӕсат, куы йыл хъуыды кӕнат, уӕд уӕ фӕнддзӕн уӕ цард Хуыцауы зондамындмӕ гӕсгӕ аразын ӕмӕ уӕ рӕсугъд фӕндтӕ уӕ къухы бафтдзысты (Йес. Н. 1:8; Пс. 1:2, 3).

² Уый уын цы пайда ӕрхӕсдзӕн? Сайтаны дуне дзаг у сайӕнтӕй (1 Иоан. 2:15, 16). Ӕвӕццӕгӕн, уе ’мкъласонтӕй кӕнӕ уе ’мгӕрттӕй зонут ахӕмты, иннӕты зондыл чи ацыд ӕмӕ фыдбылызы чи бахауд. Библийы уынаффӕмӕ куы хъусат, уӕд уын уӕ удыхъӕд ӕмӕ уӕ уырнындзинад афтӕ сфидар кӕндзӕн, ӕмӕ тӕригъӕды фӕндагыл не слӕудзыстут. Уымӕй уӕлдай ма, Хуыцауы Ныхасы уынаффӕйы ӕххуысӕй уӕхи хиздзыстут Сайтаны хинбыд къӕппӕджытӕй (2 Кор. 2:11; Дзут. 5:14). Хуыцауы фӕндагыл цӕугӕйӕ уыдзыстут ӕцӕг амондджын — уӕ цардӕй уӕ зӕрдӕ рухс кӕндзӕн (Пс. 118:1, 9, 11).

³ Хуыцауы Ныхасы ӕнӕивгӕ уагӕвӕрдтӕ адӕймаджы зондӕй бӕрзонддӕр сты (Пс. 118:98—100). Библийы уагӕвӕрдтӕ куы иртасат, Иегъовӕйы фӕндтыл куы хъуыды кӕнат, зӕрдӕбынӕй куы куват, уӕд Библийы хӕдзонд Автор Иегъовӕ Хуыцаумӕ баввахс уыдзыстут. Уый зӕрдӕ ӕвӕры: «Бамбарын кӕндзынӕн дӕуӕн, сӕвӕрдзынӕн дӕ фӕндагыл, кӕцыйыл дӕу цӕуын хъӕуы; разамынд дын дӕтдзынӕн, Мӕ цӕстӕнгас дӕ сӕрмӕ» (Пс. 31:8).

⁴ Ар рӕстӕг Библи кӕсынӕн. Иу ӕрыгон чырыстон хо йӕ разы нысан сӕвӕрдта — Библи ӕнӕхъӕнӕй бакӕсын,— ӕмӕ йӕ иу афӕдзмӕ бакасти. Уый йын цы пайда ӕрхаста? Мӕнӕ цы зӕгъы йӕхӕдӕг: «Ӕз Иегъовӕйы тыххӕй тынг бирӕ цыдӕртӕ базыдтон. Ӕппӕт уыдӕттӕ мӕ уымӕ баввахсдӕр кодтой ӕмӕ мӕ бафӕндыд цард-цӕрӕнбонты Хуыцауӕй аргъуыц кӕнын» (Иак. 4:8). Библи ӕнӕхъӕнӕй бакастӕ? Кӕд нӕ, уӕд цӕуылнӕ ис ахӕм нысан сӕвӕрӕн? Иегъовӕ дын ӕнӕмӕнгдӕр раарфӕ кӕндзӕн ӕмӕ стыр хорзӕхтӕй хайджын уыдзынӕ.