Алыхуызон адӕм дӕр фервӕздзысты
1. Хуыцауы раз нын цавӕр ном ис, уый цӕмӕй кӕнгӕ у?
1 Хуыцауы стыр хорзӕхы фӕрцы адӕмӕн байгом фӕндаг ирвӕзындзинадмӕ. Иегъовӕйы фӕнды, цӕмӕй «алыхуызон адӕм дӕр фервӕзой ӕмӕ, ӕцӕгад цы у, уый бӕлвырд базоной» (1 Тим. 2:3, 4, НД). Хуыцауы раз нын цавӕр ном ис, уый нӕдӕр нӕ буары хуызӕй кӕнгӕ у, нӕдӕр, цы куыст кӕнӕм, уымӕй, нӕдӕр нӕ курдиӕттӕй ӕмӕ нӕдӕр не ’ддаг бакастӕй. Уый, Йесойы ӕлхӕнӕг нывондыл ӕууӕндӕм ӕви нӕ, уымӕй кӕнгӕ у (Иоан. 3:16, 36). Мах стӕм Хуыцауы ӕмкусджытӕ, ӕмӕ, Иегъовӕйы йӕхимӕ цы адӕмы ӕрбаввахс кӕнын фӕнды, уыдон хъуамӕ хъулон ма кӕнӕм, нӕхи сыл ма тигъ кӕнӕм.
2, 3. Цы нын баххуыс кӕндзӕн, цӕмӕй адӕмӕн сӕ уындмӕ гӕсгӕ ма тӕрхон кӕнӕм?
2 Тӕрхон ма кӕнӕм. Иегъовӕ кӕсы адӕмӕн сӕ зӕрдӕтӕм, ӕмӕ сӕм фыдӕх нӕ хӕссы, хъулон сӕ нӕ кӕны (1 Пад. 16:7). Уый ма уыны, адӕймагӕн йӕ бон куыд аивын у, уый дӕр. Йӕ зӕрдӕ барухс кӕнын кӕй фӕнды, уыдон ын сты хӕзнатау зынаргъ (Агг. 2:7). Мах дӕр адӕммӕ Хуыцауы цӕстӕй кӕсӕм?
3 Уацамынды ахӕм адӕмыл дӕр фембӕлӕм, ӕмӕ сӕ уындӕй, чи зоны, хорзау нал фӕвӕййӕм. Чи сӕ вӕййы чъизи бызгъуырты кӕнӕ ӕнӕуаг дарӕсы, чи вӕййы ӕнӕзылд зачъетимӕ, кӕмӕн та йӕ фындз кӕнӕ йӕ былыл – хъусцӕг. Фембӕлӕм ӕнӕхӕдзар адӕмыл дӕр. Чидӕр та нӕм схуыстӕй сдзуры. Ахӕм адӕмыл тӕрхон ма кӕнӕм, зӕгъгӕ, Иегъовӕйӕн кувджытӕ никуы суыдзысты, фӕлӕ сӕм хорз цӕстӕй кӕсӕм, «уымӕн ӕмӕ мах дӕр кӕддӕр уыдыстӕм ӕнӕрхъуыдытӕ, ӕгоммӕгӕстӕ [ӕмӕ] фӕдзӕгъӕл уӕвджытӕ» (Тит. 3:3). Уый нӕ зӕрдыл куы дарӕм, уӕд тырндзыстӕм алкӕмӕндӕр хъусын кӕнын, суанг ма йӕ уындӕй искӕмӕ ницӕйаг чи фӕкӕса, уыдонӕн дӕр.
4, 5. Цӕуыл ахуыр кӕнӕм Йесо ӕмӕ Павелӕй?
4 Цӕвиттонтӕ фыццаг ӕнусӕй. Йесо Чырысти йӕ рӕстӕг не ’вгъау кодта, иннӕтӕ-иу сӕ къух кӕуыл ауыгътой, зӕгъгӕ, адонӕй ницы рауайдзӕн, уыдонӕн баххуыс кӕнынӕн дӕр (Лук. 8:26–39). Йесо ӕвзӕр митӕм куыдфӕндыйы цӕстӕй нӕ каст, фӕлӕ уый дӕр зыдта, ӕмӕ алчи йӕ хорз цардӕй нӕ ныллӕууы ӕвзӕр фӕндагыл (Лук. 7:37, 38, 44–48). Афтӕ, адӕмы ӕмбӕрста, ӕмӕ «фӕтӕригъӕд кодта уыдонӕн, уымӕн ӕмӕ уыдысты ӕнӕфыййау фыстау» (Маркы 6:34). Цымӕ нӕ бон нӕ уаид, ӕмӕ Йесойы хуызӕн тынгдӕр уӕм?
5 Апостол Павелы дуртӕй дӕр фӕхостой, нӕмгӕ дӕр-иу ӕй фӕкодтой, уӕдӕ йӕ ахӕстоны дӕр бакодтой (Ап. к. 14:19; 16:22, 23). Ахӕм ӕфхӕрд баййафгӕйӕ цымӕ уыцы адӕммӕ фӕхӕрам ӕмӕ афтӕ загъта, зӕгъгӕ, ацы адӕмыхӕттытыл мӕ рӕстӕг дзӕгъӕлы хардз кодтон? Нӕ, нӕ загъта. Уый зыдта, алы адӕмыхӕттыты ӕхсӕн дӕр кӕй разындзӕн сыгъдӕгзӕрдӕ адӕймӕгтӕ, ӕмӕ йӕ уд хъардта ахӕмты ссарыныл. Афтӕ зӕгъӕн ис, ӕмӕ, кӕм хъусын кӕнӕм, уым цы алыхуызон адӕм цӕры, уыдонмӕ мах дӕр ахӕм цӕстӕй кӕсӕм?
6. Ӕмбырды фембӕлдмӕ фыццаг хатт чи ӕрбацӕуы, уыдонӕн нӕ ахаст сӕ зӕрдӕтӕ куыд бацагайы?
6 Уазӕгуарзондзинад абон. Иегъовӕйы Ӕвдисӕнтӕй бирӕтӕ бузныг сты уыцы ӕфсымӕртӕ ӕмӕ хотӕй, кӕддӕр сын сӕ уындмӕ чи нӕ фӕкаст ӕмӕ сӕ ӕмбырдмӕ чи фӕхуыдта. Германы Паддзахады залмӕ бацыд иу нӕлгоймаг, йӕ зачъетӕ – ӕнӕзылд, йӕ дзыккутӕ – йе ’уӕхсчыты онг. Йе ’взӕры ном дардыл хъуыстгонд уыд. Фӕлӕ йыл ӕмбырды тынг баузӕлыдысты. Уый йын йӕ зӕрдӕ афтӕ бацагайдта, ӕмӕ та иннӕ къуыри дӕр ӕрбацыд. Бирӕ рӕстӕг нӕ рацыд, ӕмӕ лӕг йӕхимӕ базылд, тамако дымын ныууагъта, цы сылгоймагимӕ цард, уыимӕ та сӕ къухтӕ ӕрфыстой. Цасдӕры фӕстӕ сӕ дыууӕ дӕр, сӕ сывӕллӕттимӕ иумӕ, Иегъовӕйӕн лӕггад кӕнын райдыдтой.
7. Куыд у нӕ бон нӕ ӕнӕхӕрам Хуыцауы фӕзмын?
7 Нӕ ӕнӕхӕрам Хуыцауы фӕзмгӕйӕ, цӕй, ӕмӕ алкӕйдӕр хонӕм Хуыцауы стыр хорзӕх райсынмӕ.
[Хицӕнгонд текст 3 фарсыл]
«Хуыцау... нӕ кӕсы цӕсгоммӕ, фӕлӕ алы адӕмы ӕхсӕн, Уымӕй чи тӕрсы ӕмӕ рӕстдзинад чи кӕны, ӕхсызгон у Уымӕн» (Ап. к. 10:34, 35).