Нӕ фӕразондзинад дзӕгъӕлы нӕу

¹ «Уӕ фӕразондзинадӕй уӕ удты ирвӕзын кӕнут» (Лук. 21:19). Ацы ныхӕстӕ загъта Йесо йӕ пехуымпарады ацы цардӕвӕрды кӕроны тыххӕй. Уыдон нын бӕлвырд ӕвдисынц, кӕд нӕ иузӕрдионӕй баззайын фӕнды, уӕд фӕлварӕнтӕм хъуамӕ цӕттӕ уӕм. Фӕлӕ Иегъовӕйы ӕххуысӕй махӕй алкӕмӕндӕр йӕ бон у кӕронмӕ бафӕразын ӕмӕ фервӕзын (Матф. 24:3, 13; Фил. 4:13).

² Нӕ фӕдыл куы зилой, низтӕ нӕ куы бадомой, хъуаг куы ӕййафӕм кӕнӕ ныфссаст куы уӕм, уӕд гӕнӕн ис, ӕмӕ нын алы бон дӕр суа фӕлварӕн. Фӕлӕ нӕ рох макуы уӕд: Сайтан ӕппӕт тыхтӕй архайы, цӕмӕй Иегъовӕйыл нӕ зӕрдӕ сивӕм. Иегъовӕйыл иузӕрдионӕй цы бон баззайӕм, уыцы бон, фидистӕ йын чи кӕны, уымӕн йӕ ных бакъуырӕм. Зын рӕстӕджыты цы «цӕссыгтӕ» фӕкалӕм, уыдон Иегъовӕйӕ рох не сты! Нӕ алы цӕстысыг дӕр ын зынаргъ у ӕмӕ йын нӕ иузӕрдиондзинад йӕ зӕрдӕ рухс кӕны! Цӕй стыр ныфс у уый махӕн (Пс. 55:9; Ӕмб. 27:11).

³ Фӕлварӕнты кӕнӕм хуыздӕр. Хатт уӕззау уавӕрты рабӕрӕг вӕййы, нӕ уырнындзинад фидар кӕй нӕу кӕнӕ нӕ удыхъӕды кӕй ис лӕмӕгъ миниуджытӕ: стӕм сӕрыстыр йе та нӕм нӕй фӕразондзинад. Хъуамӕ фӕлварӕнтӕй нӕхи ма сайӕм кӕнӕ та сӕ, Библийы ныхмӕ чи у, ахӕм мадзӕлттӕй ма иуварс кӕнӕм, фӕлӕ Хуыцауы Ныхасмӕ хъусӕм, цӕмӕй фӕразондзинад йӕ «хъуыддаг сӕххӕст кӕна» (НФ). Цӕмӕн? Уымӕн ӕмӕ фӕлварӕнты фӕразон, фидар куы уӕм, уӕд уыдзыстӕм «алцӕмӕй дӕр ӕххӕст, ӕнӕ исты хъуагӕй» (Иак. 1:2—4). Фӕразондзинад нын ӕххуыс кӕны нӕ удыхъӕды, аргъ кӕмӕн нӕй, ахӕм миниуджытӕ хъомыл кӕнын: уый руаджы свӕййӕм ӕмбаргӕ, сахуыр вӕййӕм тӕригъӕд кӕнын ӕмӕ хатыр кӕнын (Ром. 12:15).

⁴ Фӕлвӕрд уырнындзинад. Фӕлварӕнтӕн куы фӕразӕм, уӕд нӕ уырнындзинад уыдзӕн фӕлвӕрд, уымӕн та Хуыцауы цӕсты стыр кад ис (1 Пет. 1:6, 7). Ахӕм уырнындзинад нӕ цӕттӕ кӕны фидӕны фӕлварӕнтӕ сфӕразынмӕ. Уымӕй уӕлдай ма тынгдӕр банкъарӕм, Хуыцау махӕй разы кӕй у, ӕмӕ уымӕй нӕ ныфс фидардӕр кӕны (Ром. 5:3—5).

⁵ Фӕразондзинады тыххӕй ӕппӕты стырдӕр хорзӕх цы у, уый фыст ис Иаковы 1:12: «Тӕхудиаг у адӕймаг, кӕцы фӕлварӕнтӕ хӕссы фӕразонӕй, уымӕн ӕмӕ фӕлварӕнты фӕуӕвгӕйӕ уый райсдзӕн царды кады худ». Цӕй уӕдӕ Иегъовӕйыл нӕ зӕрдӕ макуы сивӕм, ӕмӕ нӕ макуы рох кӕнӕд, чи йӕ уарзы, уыдоныл кӕлгӕуӕлдайӕ йӕ хорзӕхтӕ кӕй ӕруадздзӕн!

2 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Библийы ахуырмӕ цӕттӕ кӕнын

¹ Адӕймагимӕ Библи ахуыр кӕнын ӕрмӕст уый нӕу, ӕмӕ ӕрмӕгыл ӕрдзурӕм ӕмӕ амынд стихтӕ бакӕсӕм. Ӕрмӕг афтӕ хъуамӕ бацамонӕм, цӕмӕй ахуыргӕнинаджы зӕрдӕ бацагайӕм. Уымӕн та хъӕуы хорз цӕттӕ кӕнын ӕмӕ алы ахуыргӕнинагыл дӕр хъуыды кӕнын (Ӕмб. 15:28).

² Куыд хъӕуы цӕттӕ кӕнын. Фыццаг уал уыцы адӕймаджы тыххӕй Иегъовӕмӕ скув. Радзур ын, цы йӕ къуылымпы кӕны ӕмӕ йын йӕ зӕрдӕйы дуар байгом кӕнынӕн ӕххуыс ракур (Кол. 1:9, 10). Цӕмӕй сӕр кӕнӕ урочы мидис хорз бамбарай, уый тыххӕй ахъуыды кӕн йӕ номыл, сӕргӕндтӕ ӕмӕ нывтыл. Дӕхимӕ ратт ахӕм фарст: «Ацы ӕрмӕджы нысан цы у?». Уый дын ахуыры рӕстӕджы баххуыс кӕндзӕн сӕйраг хъуыдытӕм хъус ӕрдарынӕн.

³ Абзацтӕм фӕд-фӕдыл лӕмбынӕг ӕркӕс. Мыхуыр фарстытӕн дзуаппытӕ ссар ӕмӕ ӕрмӕстдӕр сӕйраг дзырдтӕ ӕмӕ дзырдбӕстытӕ бахахх кӕн. Ахъуыды кӕн, амынд стихтӕ абзацы сӕйраг хъуыдыимӕ куыд баст сты, ӕмӕ дзы ахуыры рӕстӕджы кӕцытӕ хъӕудзӕн бакӕсын, уыдон банысан кӕн. Чи зоны дӕ бафӕнда чиныджы кӕнӕ брошюрӕйы фӕрстыл уыцы стихты фӕдыл цыбыртӕй истытӕ афыссын. Ахуыргӕнинаг хъуамӕ ӕмбара, цы ахуыр кӕны, уый Хуыцауы Ныхасыл кӕй ӕнцайы (1 Фес. 2:13).

⁴ Ахуыргӕнинагыл хъуыды кӕн. Ныр та ӕрмӕгмӕ ӕркӕс, кӕимӕ ахуыр кӕныс, уыцы адӕймаджы цӕстӕй. Ахъуыды кӕн, цы фарстытӕ дӕм раттид ӕмӕ йын цавӕр хъуыдытӕ уаиккой зын бамбарӕн кӕнӕ зынтӕй цӕуыл сразы уаид. Дӕхи бафӕрс: «Цы йӕ хъӕуы бамбарын кӕнӕ йӕ цӕуыл хъӕуы бакусын, цӕмӕй йӕ уырнындзинад рӕза? Куыд ын ис йӕ зӕрдӕ бацагайӕн?». Цы хатдзӕгтӕм ӕрцӕуай, уыдонмӕ гӕсгӕ архай. Цӕмӕй ахуыргӕнинаг цавӕрдӕр хъуыды кӕнӕ стих бамбара, уый тыххӕй дӕ хатт, чи зоны, бахъӕуа цӕстуынгӕ цӕвиттон, ӕмбарынгӕнӕн ӕрмӕг ссарын кӕнӕ та цалдӕр фарсты бацӕттӕ кӕнын (Неем. 8:8). Фӕлӕ темӕмӕ чи нӕ хауы ӕмӕ йӕ чи нӕ халы, ахӕм хъуыддӕгтыл ма дзур. Ахуыры кӕрон, цы рацыдыстут, уый цыбыртӕй куы сфӕлхат кӕнат, уӕд ахуыргӕнинаг сӕйраг хъуыдытӕ хуыздӕр бахъуыды кӕндзӕн.

⁵ Цӕй стыр цин банкъарӕм, ног ахуыргӕнинӕгтӕ Иегъовӕйы кадӕн рӕстдзинады дыргъ куы фӕхӕссынц! (Фил. 1:11). Цӕмӕй уыцы нысан сӕ къухы бафта, уый тыххӕй алы хатт дӕр семӕ Библи ахуыр кӕнынмӕ дӕхи дзӕбӕх цӕттӕ кӕн.