Адӕмӕй хӕсджын стӕм

¹ Апостол Павел ӕмбӕрста, адӕмӕн хъусын кӕнын йӕ хӕс кӕй у. Ӕмӕ зыдта, Иегъовӕ фӕндаг кӕй бакодта, цӕмӕй йӕ Фырты зынаргъ туджы руаджы ӕппӕт адӕмтӕ дӕр фервӕзой (1 Тим. 2:3–6). Уымӕн загъта Павел: «Ӕз хӕсджын дӕн Еллинтӕй, фыдгӕнджытӕй, зондджынтӕй ӕмӕ ницы зонджытӕй». Адӕмӕн хорз хабар хъусынгӕнгӕйӕ, уый йӕ хӕс ӕххӕст кодта зӕрдӕргъӕвдӕй ӕмӕ ӕнӕрынцойӕ (Ром. 1:14, 15, НФП).

² Абон чырыстӕттӕ дӕр Павелау хорз хабар дзурынц, куыддӕр сын фадат фӕзыны, афтӕ. «Стыр бӕллӕх» нӕм бонӕй-бонмӕ ӕввахсдӕр кӕй кӕны, уымӕ гӕсгӕ хъуамӕ ӕвӕстиатӕй агурӕм сыгъдӕгзӕрдӕ адӕмы. Ӕцӕгӕйдӕр сӕ кӕй уарзӕм, уый тыххӕй нӕ фӕнды бӕстон ӕххӕст кӕнын цардирвӕзынгӕнӕн куыст (Матф. 24:21; Иез. 33:8).

³ Нӕ хӕс ӕххӕст кӕнӕм. Сӕйраджыдӕр адӕмы ссарӕм хӕдзарӕй-хӕдзармӕ хъусын кӕнгӕйӕ. Сӕ хӕдзӕртты сӕ куы нӕ ӕййафӕм, уӕд уый хъӕуы нӕхимӕ фӕнысан кӕнын ӕмӕ сӕм ӕндӕр рӕстӕг цӕуын, афтӕмӕй нӕ бон уыдзӕн фылдӕр адӕмимӕ аныхас кӕнын (1 Кор. 10:33). Нӕ бон ма у хъусын кӕнын куыстуӕтты, уынгты, паркты ӕмӕ машинӕты лӕууӕндӕтты, стӕй телефонӕй дӕр. Ахъуыды ма кӕн: «Царддӕттӕг хабар хъусын кӕныны хъуыддаджы алы мадзалӕй дӕр хуыздӕр пайда кӕныныл архайын?» (Матф. 10:11).

⁴ Иу пионер-хо ӕмбӕрста, кӕм хъусын кӕны, уым цы адӕм цӕры, уыдонӕй хӕсджын кӕй у. Иу хӕдзарӕн ӕдзух йӕ рудзгуыты ӕмбӕрзӕнтӕ уыдысты ӕхгӕд, ӕмӕ-иу дзы никуы ничи ракаст. Фӕлӕ иу бон, пионер куы нӕ хъусын кодта, уӕд уыцы хӕдзары раз федта машинӕ. Уый дӕр фадатӕй спайда кодта ӕмӕ дуары дзӕнгӕрӕгыл бахӕцыд. Ракасти йӕм иу нӕлгоймаг ӕмӕ сын ныхас бацайдагъ. Уый фӕстӕ йӕм хо йӕ цардӕмбалимӕ цалдӕр хатты бацыд. Фӕстӕдӕр нӕлгоймаг сразы Библи ахуыр кӕныныл ӕмӕ ныр у аргъуыд ӕфсымӕр. Уый уыцы хойӕ тынг бузныг у, хъусын кӕнын йӕ хӕсыл кӕй нымадта, уымӕй.

⁵ Рӕстӕг кӕй тӕхы, уымӕ гӕсгӕ ныр у нӕ хӕс фидыны афон – адӕмӕн ӕппӕт хъарутӕй ныфсджынӕй хъусын кӕнын (2 Кор. 6:1, 2).

11 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Ахуыргӕнинӕгтӕн ӕххуыс кӕнӕм адӕммӕ ногӕй цӕуынӕн

¹ Ахуыргӕнинаг хъусын кӕнын куы райдайы, уӕд, гӕнӕн ис, фембӕла, хорз хабары тыххӕй фылдӕр базонын кӕй фӕнда, ахӕм адӕмыл. Куыд баххуыс кӕнӕм ног хъусынгӕнӕгӕн, цӕмӕй адӕммӕ ногӕй цӕуа, семӕ ӕнтыстджынӕй ныхас кӕна ӕмӕ сӕ разӕнгард кӕна дарддӕр Библи ахуыр кӕнынмӕ?

² Адӕймагмӕ ногӕй бацӕуынмӕ куы цӕттӕ кӕнат, уӕд уӕ зӕрдыл дарут уӕ фыццаг фембӕлд. Ахуыргӕнинаджы разӕнгард кӕн, кӕимӕ ныхас кодта, уыдоныл зӕрдӕйӕ мӕт кӕнын (Фил. 2:4). Ахуыр ӕй кӕн, цӕмӕй адӕмы сӕ хъуыдытӕ дзурынмӕ разӕнгард кӕна, лӕмбынӕг сӕм хъуса ӕмӕ сӕ цы тыхсын кӕны, уымӕ йӕ хъус дара. Искӕй фылдӕр базонын куы фӕнда, уӕд ног хъусынгӕнӕг йӕхимӕ ныффыссӕд, адӕймаджы тынгдӕр цы цымыдис кӕны, уый. Афтӕмӕй зондзӕн, иннӕ хӕттыты цӕуыл ныхас кӕндзӕн, уый.

³ Цӕттӕ сӕ кӕнӕм адӕймагмӕ ногӕй бацӕуынмӕ. Ахуыргӕнинагимӕ уӕ зӕрдыл ӕрлӕууын кӕнут, адӕймагимӕ фыццаг хатт цӕуыл ныхас кодтат ӕмӕ йын равдис, Хуыцауы Паддзахады хорз хабары тыххӕй цы зӕгъӕн ис, цӕмӕй йӕм адӕймаг байхъуса (1 Кор. 9:19–23). Иумӕ бацӕттӕ кӕнут цыбыр цӕвиттон Библи ӕмбарынгӕнӕн ӕрмӕгӕй – иу абзац ӕмӕ стих. Стӕй ма бацӕттӕ кӕнут, ныхасы кӕрон кӕй ратта, ахӕм фарст, цӕмӕй йыл иннӕ хатт аныхас кӕнӕн уа. Ног хъусынгӕнӕгӕн равдис, алы ног бацыды рӕстӕджы дӕр куыд ис адӕймагӕн Хуыцауы Ныхасӕй йӕ зонындзинӕдтыл ӕфтауӕн.

⁴ Стӕй ма йын бацамон, цӕмӕй йӕ ныхас хуымӕтӕгӕй райдайа. Салам раттыны фӕстӕ йӕ бон у зӕгъын: «Айразмӕ куыд аныхас кодтам, уый мӕ зӕрдӕмӕ фӕцыди ӕмӕ ма мӕ фӕнды демӕ Библийыл дарддӕр аныхас кӕнын (йӕ зӕрдыл ын ӕрлӕууын кӕн, цӕуыл дзырдтат, уый)». Хъусынгӕнӕгӕн ма бамбарын кӕн, ӕндӕр адӕймаг ӕм куы ракӕса, уӕд ын цы зӕгъдзӕн.

⁵ Ӕнӕмӕнгӕй сӕм цӕуӕм. Ахуыргӕнинаджы разӕнгард кӕн, чи бацымыдис кодта, уыдонӕй алкӕмӕдӕр ӕвӕстиатӕй цӕуынмӕ. Цӕмӕй адӕмы хӕдзары ӕййафӕм, уый тыххӕй сӕм хъӕуы ӕдзух цӕуын. Бацамон, ахуыргӕнинагӕн йӕ бон куыд у баныхас кӕнын ногӕй бацӕуыныл, ӕмӕ йын бамбарын кӕн, ӕнӕмӕнг ӕй кӕй хъӕуы йӕ дзырд ӕххӕст кӕнын (Матф. 5:37). Амон ын, цӕмӕй фысы хуызӕн адӕмы агургӕйӕ ӕмӕ сӕ фылдӕр базонынмӕ разӕнгард кӕнгӕйӕ хӕларзӕрдӕ, лӕмбынӕг ӕмӕ уӕздан уа (Тит. 3:2).