Хуыцауы Паддзахады тыххӕй хъусын кӕнын – стыр кад

¹ Зӕххыл цӕрӕг адӕм иу бон дӕр цух не сты Иегъовӕйы стыр хорзӕхтӕй,– цард цӕй фӕрцы ис, уыцы хорзӕхтӕй (Матф. 5:45). Фӕлӕ ӕрмӕстдӕр стӕмтӕ пайда кӕнынц уыцы кадджын фадатӕй – Хуыцауы Паддзахады хорз хабар хъусын кӕнын ӕмӕ уымӕй ӕвдисын, се Сфӕлдисӕгӕй бузныг кӕй сты (Матф. 24:14). Куыд тынг аргъ кӕныс, ахӕм кадджын фадат дын кӕй ис, уымӕн?

² Паддзахады тыххӕй хъусын кӕныны хъуыддаг Хуыцауы кадджын кӕны ӕмӕ ацы змӕст рӕстӕг тыхст адӕмӕн та дӕтты ныфс ӕмӕ фарн (Дзут. 13:15). Уыцы хабар йӕ зӕрдӕмӕ чи айса, уыдон цӕрдзысты ӕнустӕм (Иоан. 17:3). Ацы дунейы кӕцы стыр бынат кӕнӕ кӕцы куыст хӕссы ахӕм хорзӕхтӕ? Апостол Павел йӕ лӕггад нымадта стыр хӕзнайыл, ӕмӕ уый бӕрӕг уыд, куыд ӕй ӕххӕст кодта, уымӕй (Ап. к. 20:20, 21, 24; 2 Кор. 4:1, 7).

³ Аргъ кӕнӕм, цы стыр кад нӕм ӕрхауд, уымӕн. Хъусын кӕныны кад нӕм кӕй ӕрхауд, уымӕн кӕй аргъ кӕнӕм, уый равдисынӕн иу амал – куыд хъусын кӕнӕм, уымӕ нӕ хъус дарын. Цымӕ уацамындмӕ цӕттӕ кӕнынӕн рӕстӕг ссарӕм, цӕмӕй кӕимӕ ныхас кӕндзыстӕм, уыдоны зӕрдӕтӕ бацагайӕм? Библийӕ куыд пайда кӕнӕм ӕмӕ адӕмимӕ куыд ныхас кӕнӕм, уым ма исты фӕхуыздӕр кӕнын у нӕ бон? Цы территорийы хъусын кӕнӕм, уым бӕстон ӕххӕст кӕнӕм нӕ куыст? Нӕ бон у Библийы ахуыр райдайын ӕмӕ йӕ адарддӕр кӕнын? Рагзаманты ӕмӕ абоны иузӕрдион чырыстӕттау, мах дӕр раст цӕстӕй кӕсӕм нӕ лӕггадмӕ ӕмӕ стыр аргъ кӕнӕм, цы кад нӕм ӕрхаудта, уымӕн (Матф. 25:14–23).

⁴ Кӕд нӕ исчи ацӕргӕ кӕнӕ рынчын у, йе та ӕндӕр зындзинӕдтӕ ӕвзары, уӕддӕр ӕй зонӕм, зӕрдиагӕй хъусын кӕныныл кӕй архайӕм, уымӕн стыр агъ кӕй ис, ӕмӕ нын уый ныфсы хос у. Хуыцауы Ныхас нын зӕрдӕ ӕвӕры, нӕ фыдӕбон Иегъовӕйӕ рох кӕй нӕу, кӕд иннӕты цӕсты уадиссагӕй ницы аразӕм, уӕд дӕр (Лук. 21:1–4).

⁵ Хуыцауы Паддзахады тыххӕй хъусын кӕнын зӕрдӕрухсы хос у. 92 азы кӕуыл цӕуы, ахӕм хо загъта: «Цӕй стыр кад у, Иегъовӕйӕн 80 азы ӕнувыдӕй фӕлӕггад кӕнын! Уыцы азтӕм акӕсгӕйӕ ӕз ницӕуыл фӕсмон кӕнын. Мӕ бон куы уаид мӕ цард ногӕй фӕцӕрын, уӕддӕр ницы аивин, уыцы фӕндаг та равзарин, уымӕн ӕмӕ Хуыцауы „хорзӕх хуыздӕр у, цӕйнӕфӕлтау цард“» (Пс. 62:4). Цӕй уӕдӕ мах дӕр стыр аргъ кӕнӕм, Хуыцауӕй нӕм цы кад ӕрхауд, уымӕн – йӕ Паддзахады тыххӕй хъусын кӕнын.

12 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Ахуыргӕнинӕгтӕн ӕххуыс кӕнӕм Библийы ахуыр райдайын ӕмӕ йӕ адарддӕр кӕнынӕн

¹ Нӕ ахуыргӕнинӕгтӕ хъусын кӕнын куы райдайынц, уӕд, чи зоны, тӕрсой искӕимӕ Библи ахуыр кӕнын райдайын ӕмӕ йӕ адарддӕр кӕнын. Куыд сын баххуыс кӕнӕн ис, цӕмӕй фӕныфсджындӕр уой ӕмӕ нӕ лӕггады ахсджиагдӕр хъуыддаг ӕххӕст кӕной? (Матф. 24:14; 28:19, 20).

² Ахуыргӕнинаг ӕнӕаргъуыд хъусынгӕнӕг куы свӕййы, уӕд фылдӕр хатт Хъусынгӕнджыты скъолайы дӕр вӕййы фыст. Уым ын цы хӕслӕвӕрдтӕ раттынц, уыдон кӕй фӕцӕттӕ кӕны ӕмӕ сӕ ӕмбырды кӕй фӕдзуры, уый фӕрцы сфӕлтӕрдзӕн, ӕнӕмӕнг ӕй цы миниуджытӕ хъӕуы, уыдоны ӕмӕ «йӕ куысты тыххӕй къӕмдзӕстыг чи нӕу, ӕцӕгады ныхас раст чи амоны, ахӕм... кусӕг» суыдзӕн (2 Тим. 2:15, НТ).

³ Дӕхӕдӕг ын у фӕзминаг. Йесо йӕ ахуыргӕнинӕгты ахуыр кӕнгӕйӕ лӕвӕрдта бӕлвырд амындтӕ ӕмӕ сын йӕхӕдӕг дӕр уыд хорз цӕвиттон. Уый загъта: «Чи сахуыр кӕна, уый суыдзӕн йӕ ахуыргӕнӕджы хуызӕн» (Лук. 6:40, НТ). Тынг ахсджиаг у, цӕмӕй ды дӕр, Йесойы фӕзмгӕйӕ, хорз цӕвиттон уай. Дӕумӕ кӕсгӕйӕ дӕ ахуыргӕнинаг дӕр бамбардзӕн, адӕммӕ ногӕй уый тыххӕй кӕй цӕуӕм, цӕмӕй семӕ Библи ахуыр кӕнын райдайӕм.

⁴ Бамбарын кӕн дӕ ахуыргӕнинагӕн, адӕймагӕн Библийы ахуыры тыххӕй куы фӕдзурӕм, уӕд, ахуыр куыд цӕудзӕн, ууыл лыстӕггай дзурын ӕнӕмӕнг кӕй нӕу. Куыд фӕахуыр кӕнӕм, уый арӕх хуыздӕр вӕййы равдисын, ахуыргӕнӕн чиныг кӕнӕ брошюрӕйӕ иу-дыууӕ абзацы равзаргӕйӕ. Уый фӕдыл хорз уынаффӕтӕ ссарӕн ис «Нӕ хъусын кӕныны хъуыддаджы» ацы номыры 8 фарсыл кӕнӕ та 2002 азы январы номыры 6 фарсыл.

⁵ Гӕнӕн куы уа, уӕд-иу ахуыргӕнинаг демӕ кӕнӕ ӕндӕр фӕлтӕрд хъусынгӕнӕгимӕ Библийы ахуырмӕ ацӕуӕд. Ахуыры рӕстӕг йӕ бон у абзацы йе та сӕйраг стихы тыххӕй йӕ хъуыды зӕгъын. Афтӕмӕй ног хъусынгӕнӕг сахуыр уыдзӕн Библийы ахуыр уадзын ӕмӕ иннӕтӕн уырнындзинады рӕзынӕн ӕххуыс кӕнын (Ӕмб. 27:17; 2 Тим. 2:2). Ӕппӕл дзы ӕмӕ йемӕ ныхас кӕн, йӕ бон цы фӕхуыздӕр кӕнын у, ууыл.

⁶ Ног хъусынгӕнджытӕн куы ӕххуыс кӕнӕм, цӕмӕй Хуыцауы Ныхасы ахуыргӕнджытӕ суой, уӕд цӕттӕ уыдзысты «хорз хъуыддагмӕ» – искӕимӕ Библийы ахуыр райдайын ӕмӕ йӕ адарддӕр кӕнынмӕ (2 Тим. 3:17). Куыд ӕхсызгон у семӕ уӕхски-уӕхск лӕггад кӕнын ӕмӕ иумӕ зӕрдӕбынӕй хонын: «Кӕй фӕнды, уый царды дон айсӕд лӕвар»! (Рарг. 22:17, НТ).