Де ’ххуыс тынг хъӕуы

¹ «Бузныг уын, нӕ хӕрзӕбонӕн цыдӕриддӕр аразут, уый тыххӕй. Стыр ӕххуыс нын стут». Ацы ныхӕстӕ хорз ӕвдисынц, куыд бузныг стӕм нӕ хистӕр нӕлгоймӕгтӕй ӕмӕ кӕстӕриуӕггӕнӕг ӕфсымӕртӕй. Хуыцауы организаци ӕдзух дӕр рӕзы, ӕмӕ ӕппӕт дунейыл цы 100 мины бӕрц ӕмбырды ис, уым лӕггад кӕнынӕн хъӕуы фылдӕрӕй-фылдӕр фӕлтӕрд нӕлгоймӕгтӕ. Кӕд ды дӕр аргъуыд ӕфсымӕр дӕ, уӕд де ’ххуыс тынг хъӕуы.

² Фылдӕр лӕггад кӕнынмӕ тырн. Цы кӕнын дӕ хъӕуы, фылдӕр лӕггад кӕнын дӕ куы фӕнда, уӕд? (1 Тим. 3:1). Сӕйраджыдӕр, дӕ алыварс адӕмӕн царды алы хъуыддаджы дӕр фӕзминаг у (1 Тим. 4:12; Тит. 2:6–8; 1 Пет. 5:3). Хъусын кӕныны куыст зӕрдӕбынӕй ӕххӕст кӕн ӕмӕ иннӕтӕн дӕр уыцы хъуыддаджы ӕххуыс кӕн (2 Тим. 4:5). Де ’мчырыстӕттыл зӕрдиагӕй тыхс (Ром. 12:13). Хуыцауы Ныхас хорз ахуыр кӕн ӕмӕ архай ахуыргӕнӕджы дӕсныйад фӕхуыздӕр кӕныныл (Тит. 1:9; 1 Тим. 4:13). Хистӕр нӕлгоймӕгтӕ дын цы бахӕс кӕнынц, уый зӕрдиагӕй араз (1 Тим. 3:10). Кӕд бинонты хистӕр дӕ, уӕд дӕ «хӕдзарӕн хорз уынаффӕгӕнӕг» у (1 Тим. 3:4, 5, 12).

³ Фылдӕр хӕстӕм чи тырны, уый хъуамӕ йӕ хъарутыл ма ауӕрда, иннӕтыл йӕхицӕй тынгдӕр тыхса (1 Тим. 5:17). Уымӕ гӕсгӕ, архай иннӕтӕн сӕрныллӕгӕй лӕггад кӕнын (Матф. 20:25–28; Иоан. 13:3–5, 12–17). Хъуыды кӕн Тимофейы цӕвиттоныл ӕмӕ йӕ фӕзм (Фил. 2:20–22). Ды дӕр уыйау дӕ хорз уагахастӕй бӕрӕг дар (Ап. к. 16:1, 2). Фылдӕр хӕстӕ райсынӕн дӕ ӕнӕмӕнг цы чырыстон миниуджытӕ хъӕуы, уыдоныл куы кусай ӕмӕ иннӕты уынаффӕтӕм куы хъусай, уӕд «дӕ ӕнтыстдзинад ӕппӕтӕн дӕр уыдзӕн ӕргом» (1 Тим. 4:15).

⁴ Ныййарджытӕ, ӕрыгӕтты ахуыр кӕнут иннӕтӕн ӕххуыс кӕнын. Сывӕллӕтты иннӕтӕн ӕххуыс кӕнын ахуыр кӕнын райдайӕн ис хӕрз гыццылӕй дӕр. Ахуыр сӕ кӕнут фембӕлдты хъусын, хъусын кӕнын, стӕй се ’гъдауӕй фӕзминаг куыд уой Паддзахады залы дӕр ӕмӕ скъолайы дӕр. Амонут сын иннӕтӕн лӕггад кӕнын, зӕгъӕм, Паддзахады зал ӕфснайын, хистӕр нӕлгоймӕгтӕн ӕххуыс кӕнын ӕмӕ ӕндӕр хъуыддӕгтӕ кӕнын. Уадз ӕмӕ, дӕттын куыд ӕхсызгон у, уый банкъарой (Ап. к. 20:35). Афтӕ сӕ куы ахуыр кӕнӕм, уӕд сын баххуыс кӕндзыстӕм, цӕмӕй фидӕны суой пионертӕ, кӕстӕриуӕггӕнӕг ӕфсымӕртӕ ӕмӕ хистӕр нӕлгоймӕгтӕ.

4 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Ахуыргӕнинӕгтӕн амонӕм, ахуырмӕ куыд цӕттӕ кӕнын хъӕуы

¹ Ахуыргӕнинаг йӕ урок рагацау куы кӕса, дзуаппытӕ-иу куы бахахх кӕна ӕмӕ сӕ йӕхи ныхӕстӕй куыд зӕгъдзӕн, ууыл куы хъуыды кӕна, уӕд уырнындзинады тагъд рӕздзӕн. Искӕимӕ иудадзыг Библи ахуыр кӕнын куы райдайай, уӕд иу хатт урок йемӕ бацӕттӕ кӕн, цӕмӕй фена, куыд цӕттӕ кӕнын хъӕуы. Фылдӕр хатт хуыздӕр вӕййы иумӕ ӕнӕхъӕн сӕр кӕнӕ урок бацӕттӕ кӕнын.

² Дзуаппы бын хахх кӕнын ӕмӕ хъуыдытӕ цыбыртӕй фыссын. Ахуыргӕнинагӕн бацамон, мыхуыр фарстӕн тексты комкоммӕ дзуапп ссарӕн куыд ис, уый. Равдис ын, цы чиныг кӕнӕ брошюрӕйӕ ахуыр кӕнут, уым дӕхӕдӕг ӕрмӕст сӕйраг дзырдтӕ ӕмӕ дзырдбӕстытӕ куыд бахахх кодтай. Чи зоны йӕ бафӕнда дӕу бафӕзмын, ӕмӕ ӕрмӕг куы ӕвзарат, уӕд йӕ чиныджы хахх кӕндзӕн, дзуапп ӕрхъуыды кӕнынӕн ӕй цы хъӕуы, ӕрмӕстдӕр уый (Лук. 6:40). Стӕй йын зӕгъ, цӕмӕй дзуапп йӕхи ныхӕстӕй ратта. Афтӕмӕй фендзынӕ, ӕрмӕг куыд бамбӕрста.

³ Ахуырмӕ бацӕттӕ кӕнынӕн ма ахуыргӕнинаджы хъӕуы, къӕлӕтты цы стихтӕ ис, уыдон лӕмбынӕг равзарын (Ап. к. 17:11). Баххуыс ын кӕн бамбарын, уыцы стихтӕй алкӕцыдӕр абзацы цавӕрдӕр хъуыдымӕ куыд хауы. Равдис ын, йӕ бон куыд у хъуыдытӕ цыбыртӕй йӕ чиныг кӕнӕ брошюрӕйы кӕрӕттыл фыссын. Йӕ хъус ын ӕрдар, цы ахуыр кӕны, уый Библийы бындурыл кӕй у. Разӕнгард ӕй кӕн, цӕмӕй ахуыры рӕстӕджы дзуапп дӕтгӕйӕ Библийы стихтыл арӕхдӕр дзура.

⁴ Ӕрмӕгыл раздӕр цӕст ахӕссын ӕмӕ йӕ кӕроны сфӕлхат кӕнын. Цалынмӕ ахуыргӕнинаг ӕрмӕг лӕмбынӕг цӕттӕ кӕнын нӕ райдайа, уӕдмӕ уал хорз уаид, йӕ цӕст ыл куы ахӕссид. Зӕгъ ын, цӕмӕй уал-иу ӕркӕса ӕрмӕгӕн йӕ сӕргондмӕ, дӕлсӕргӕндтӕм ӕмӕ нывтӕм. Стӕй ма йын зӕгъ, урок куы бацӕттӕ кӕна, уӕд ма йын йӕ сӕйраг хъуыдытыл иу гыццыл ахъуыды кӕна; кӕд дзы фӕлхат кӕнынӕн фӕлгӕт ис, уӕд уымӕй дӕр спайда кӕнӕд. Афтӕмӕй цы ахуыр кодта, уый дзӕбӕх бахъуыды кӕндзӕн.

⁵ Ахуыргӕнинаг хорз куы цӕттӕ кӕна, уӕд ын уый фӕстӕ ӕмбырды фембӕлдты мидисджын дзуапп дӕттын ӕнцон уыдзӕн. Афтӕ цӕттӕ кӕнын куы сахуыр уа, уӕд ын уый ахъаз уыдзӕн, йемӕ Библи ахуыр куы фӕуай, уӕд дӕр.