Нӕхи ӕфсадӕм «уырнындзинады дзырдтӕй»

¹ Цӕмӕй нӕм Хуыцауы ӕфсарм уа, уый тыххӕй нӕ хъӕуы ӕппӕт тыхтӕй архайын (1 Тим. 4:7–10). Хуыцауы фӕндагыл цӕугӕйӕ ӕрмӕст нӕхи хъаруйыл нӕ ныфс куы дарӕм, уӕд ӕрлӕмӕгъ уыдзыстӕм ӕмӕ фӕкӕлдзыстӕм (Ис. 40:29–31). Иегъовӕ нын хъару дӕтты, зӕгъӕм, нӕхи «уырнындзинады дзырдтӕй» куы ӕфсадӕм, уӕд (1 Тим. 4:6).

² Хъӕздыг монон хӕринаг. Иегъовӕ монон хӕринаг парахатӕй дӕтты йӕ Ныхас ӕмӕ «ӕууӕнкджын ӕмӕ зондджын цагъары» уылты (Матф. 24:45). Фӕлӕ нын цӕмӕй фӕахъаз уа, уый тыххӕй нӕхӕдӕг исты аразӕм? Алы бон дӕр Библи кӕсӕм? Рӕстӕг арӕм Библи ахуыр кӕнынӕн ӕмӕ хъуыды кӕнынӕн? (Пс. 1:2, 3). Ахӕм хӕрзхъӕд монон хӕринаг нӕ фидар кӕны ӕмӕ уый руаджы нӕ бон у Сайтаны дунейы зондахастӕй нӕхи хъахъхъӕнын (1 Иоан. 5:19). Кӕд нӕ зонд хорз хъуыдытӕй дзаг кӕнӕм ӕмӕ уыдонмӕ гӕсгӕ цӕрӕм, уӕд Иегъовӕ уыдзӕн немӕ (Фил. 4:8, 9).

³ Иегъовӕ ма нӕ фидар кӕны фембӕлдты дӕр (Дзут. 10:24, 25). Уыцы фембӕлдты зондамындтӕ кӕй райсӕм ӕмӕ не ’муырнджытимӕ зӕрдӕбын ныхас кӕй фӕкӕнӕм, уый нын тых дӕтты фӕлварӕнты фидар фӕлӕууынӕн (1 Пет. 5:9, 10). Иу ӕрыгон хо загъта: «Ӕз алы бон дӕр скъолайы бирӕ рӕстӕг вӕййын, ӕмӕ тынг бафӕллайын. Фӕлӕ фембӕлдтӕ сты фӕскъӕвда хур бонау, ӕмӕ мын раттынц тых дыккаг бон скъолайы бафӕразынӕн». Уӕдӕ фембӕлдтӕм цӕуынӕн нӕ хъарутӕ кӕй хардз кӕнӕм, уый тыххӕй ӕнӕмӕнг арфӕгонд ӕрцӕуӕм.

⁴ Ӕцӕгад хъусын кӕнын. Йесойӕн адӕмӕн хъусын кӕнын хӕринагӕй уӕлдай нӕ уыд. Уый йын тых лӕвӕрдта (Иоан. 4:32–34). Мах дӕр иннӕтӕн Хуыцауы диссаджы зӕрдӕвӕрдты тыххӕй куы фӕдзурӕм, уӕд нӕ тыхыл тых бафты. Уымӕй уӕлдай ма, кӕд ӕдзух хъусын кӕнӕм, уӕд нӕ зӕрдӕ ӕмӕ нӕ хъуыдытӕ здӕхт уыдзысты Хуыцауы Паддзахадмӕ ӕмӕ, тагъд рӕстӕджы цы арфӕдзинӕдтӕ ӕрхӕсдзӕн, уыдонмӕ. Ӕмӕ нын уый ӕцӕгдӕр не уӕнг рог кӕны (Матф. 11:28–30).

⁵ Куыд амондджын стӕм, абон Хуыцау йӕ адӕмы цы хъӕздыг монон хӕринагӕй ӕфсады, уый нын кӕй ахъаз кӕны! Цӕй уӕдӕ дарддӕр дӕр Хуыцауы кадджын кӕнгӕйӕ, фырцинӕй зарӕм! (Ис. 65:13, 14).

5 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Куыд сбӕрӕг кӕнӕм, иу хаттӕн цас ӕрмӕг ис рацӕуӕн

¹ Йесо иннӕты куы ахуыр кодта, уӕд йӕ зӕрдыл дардта, йӕ ахуыргӕнинӕгтӕ цас бамбӕрстаиккой, уый, ӕмӕ сын дзырдта «сӕ бон хъусын цас уыд, уый бӕрц» (Маркы 4:33; Иоан. 16:12). Раст афтӕ, абон Хуыцауы Ныхас ахуыргӕнджытӕ дӕр хъуамӕ хъуыды кӕной, иу хаттӕн цас ӕрмӕг рацӕудзысты, ууыл. Цас сахуыр кӕндзысты, уый баст уыдзӕн, куыд ахуыргӕнӕджы, афтӕ ахуыргӕнинаджы курдиат ӕмӕ уавӕртыл.

² Сӕ уырнындзинад сын фидар кӕн. Уыцы иу ӕрмӕг бамбарынӕн иуӕй-иу ахуыргӕнинӕгтимӕ фӕхъӕуы дыууӕ-ӕртӕ хатт фембӕлын, иннӕтимӕ та иу хатт. Сӕйрагдӕр у, цы ахуыр кӕнӕм, уый тагъд рацӕуын нӕ, фӕлӕ йӕ цӕмӕй адӕймаг хорз бамбара. Алы ахуыргӕнинаджы дӕр хъӕуы фидар бындур Хуыцауы Ныхасыл ӕууӕндынӕн (Ӕмб. 4:7; Ром. 12:2).

³ Адӕймагимӕ алы къуыри ахуыр кӕнгӕйӕ уыйбӕрц рӕстӕг хицӕн кӕн, цӕмӕй Хуыцауы Ныхасӕй цы базона, уый бамбара ӕмӕ йӕ йӕ зӕрдӕмӕ айса. Тагъд ма кӕн. Цы ӕцӕгад ын амоныс, уый йын куыд тынгдӕр фӕахъаз уа, ууыл архай. Сӕйраг хъуыдытӕм ӕркӕсынӕн ӕмӕ, Библийы ахуырӕдтӕ цы стихтӕ бӕлвырд кӕнынц, уыдоныл ӕрдзурынӕн фаг рӕстӕг ар (2 Тим. 3:16, 17).

⁴ Хъуыддагыл дзур, ныхӕстыл ма фӕу. Кӕд тагъд кӕнын нӕ хъӕуы, уӕддӕр нӕ хъус дарӕм, нӕ ныхасы сӕр цы у, уымӕ. Кӕимӕ ахуыр кӕнӕм, уый йӕ зӕрдӕйы сагъӕстыл дзураг куы уа, уӕд хуыздӕр у ахуыры фӕстӕ аныхӕстӕ кӕнын (Еккл. 3:1).

⁵ Арӕх ма, гӕнӕн ис, нӕ ныхасы сӕр цы у, уый нӕ айрох уа, нӕхӕдӕг ӕцӕгад тынг кӕй уарзӕм, уый тыххӕй дӕр (Пс. 144:6, 7). Уӕлӕмхасӕн хъуыдытӕ ӕмӕ цаутӕ, кӕй зӕгъын ӕй хъӕуы, ахуыр цымыдисагдӕр кӕнынц. Фӕлӕ сыл бирӕ рӕстӕг хардз кӕнӕн нӕй, уӕд ахуыргӕнинаг, гӕнӕн ис, Библийы сӕйраг ахуырӕдтӕ хорз ма бамбара.

⁶ Иу хаттӕн ахуыргӕнинаджы бон цас у бамбарын, уыйбӕрц ӕрмӕг куы рацӕуӕм, уӕд ын баххуыс кӕндзыстӕм «цӕуын Иегъовӕйы рухсы» (Ис. 2:5).