Журналтӕ кӕмӕн раттӕм, уыдонимӕ Библи ахуыр кӕнын куыд райдайӕм

1. Журналтӕ парахат кӕнгӕйӕ нӕ нысан цы у?

¹ Алы сабат дӕр уацамынды сӕйраджыдӕр парахат кӕнӕм журналтӕ «Хъахъхъӕнӕн мӕсыг» ӕмӕ «Райхъал ут!». Фӕлӕ уый ӕрмӕстдӕр иу къахдзӕф у нӕ нысанмӕ – сыгъдӕгзӕрдӕ адӕмӕн Хуыцауы ныхас амонын. Дӕлдӕр ис цалдӕр цӕвиттоны, адӕймагмӕ ногӕй куы бацӕуӕм, уӕд нӕ бон куыд у йемӕ чиныгӕй «Библи цы дзуры» ахуыр кӕнын райдайын. Цы цӕвиттонтӕ дзы ис, уыдон дӕ бон у уавӕртӕм гӕсгӕ фӕивын ӕмӕ сӕ хи ныхӕстӕй дзурын. Кӕд хуыздӕр уыдзӕн дӕ ныхас ӕндӕрхуызон райдайын, уӕд табуафси.

2. Чиныг «Библи цы дзуры»-йы фыццаг фӕрстӕй нӕ бон куыд у пайда кӕнын, цӕмӕй адӕймагимӕ Библи ахуыр кӕнын райдайӕм?

² Пайда кӕн чиныджы фыццаг фӕрстӕй. Дыккаг хатт бацӕугӕйӕ дӕ бон у зӕгъын: «Цы журнал дын ныууагътон, уым фыст ис Библийы тыххӕй. Дӕ хъус ма ӕрдар, Библи кӕсын цӕмӕн хъӕуы, уымӕ». Бакӕс Исайы 48:17, 18; Иоанны 17:3, кӕнӕ ӕндӕр стих. Стӕй йын чиныг «Библи цы дзуры» ратт ӕмӕ зӕгъ, дӕлдӕр куыд фыст у, афтӕ.

◼ «Библи нын дӕтты фидар ныфс». Адӕймагӕн чиныгӕй равдис 4 ӕмӕ 5 фӕрстӕ ӕмӕ йӕ бафӕрс: «Нывы цы хабӕрттӕ ис, уыдӕттӕй дӕ цы фӕндид фенын?» Равдис ын, нывы бын цы стих ис, ууыл ныхас кӕцы сӕры цӕуы, уый, ӕмӕ йӕ кӕд фӕнды, уӕд цыбыртӕй аныхас кӕн иу кӕнӕ дыууӕ абзацыл.

◼ Кӕнӕ та зӕгъ: «Библи ӕмбарын кӕны царды тӕккӕ ахсджиагдӕр фарстатӕ». Равдис 6 фарсыл бынӕй цы фарстатӕ ис, уыдон ӕмӕ йӕ бафӕрс, искуы хъуыды кодтай ахӕм фарстатыл, зӕгъгӕ. Стӕй чиныджы байгом кӕн, йӕ фарстӕн ын дзуапп чи дӕтты, уыцы сӕр ӕмӕ цыбыртӕй аныхас кӕн иу кӕнӕ дыууӕ абзацыл.

◼ Кӕнӕ та дӕ бон у адӕймагӕн чиныгӕй цалдӕр сӕргонды равдисын ӕмӕ йӕ бафӕрсын, цавӕр фарста дӕ фӕндид базонын, зӕгъгӕ. Стӕй уыцы сӕр байгом кӕн ӕмӕ йын цыбыртӕй равдис, Библи ахуыр кӕнӕн куыд ис, уый.

3. Нӕ бон куыд у искӕимӕ Библи ахуыр кӕнын райдайын, кӕд ын журнал ныууагътам, а) царды уавӕртӕ фыддӕр кӕй кӕнынц, уый тыххӕй? ӕ) бинонты тыххӕй? б) Библийыл ӕууӕндӕн кӕй ис, уый тыххӕй?

³ Фыццаг фембӕлды-иу фарст ратт, ӕмӕ-иу зӕгъ, иннӕ хатт ыл кӕй аныхас кӕндзыстут. Цӕмӕй адӕймагимӕ Библи ахуыр кӕнын райдайӕм, уый тыххӕй йӕ хъӕуы фыццаг фембӕлды рӕстӕг дыккаг бацыдмӕ бацӕттӕ кӕнын. Адӕймаг дӕ журналтӕ куы айса, уӕд ӕм исты фарст ратт ӕмӕ йын зӕгъ, ууыл иннӕ хатт кӕй аныхас кӕндзыстут. Бацархай йемӕ ногӕй фембӕлыныл ӕмӕ-иу дӕ ныхас ма фӕсай (Матф. 5:37). Адӕймагмӕ куы бацӕуай, уӕд ын йӕ зӕрдыл ӕрлӕууын кӕн уыцы фарст. Стӕй йын чиныгӕй «Библи цы дзуры» дзуапп бакӕс ӕмӕ йыл цыбыртӕй аныхас кӕн. Йӕхицӕн дӕр ын чиныг ратт, цӕмӕй, кӕм кӕсыс, уый уына. Дӕлдӕр ис цалдӕр цӕвиттоны.

◼ Кӕд дӕ фӕнды, дунейы уавӕртӕ фыддӕр кӕй кӕнынц, уый фӕдыл журнал раттын, уӕд дӕ бон у зӕгъын: «Иннӕ хатт аныхас кӕндзыстӕм, Хуыцау цард куыд фӕивдзӕн, уый тыххӕй Библи цы дзуры, ууыл». Дыккаг хатт куы бацӕуай, уӕд-иу аныхас кӕн, 4 ӕмӕ 5 фӕрстыл цы хъуыдытӕ ис, уыдоныл. Кӕнӕ та дӕ бон у бафӕрсын: «Бӕллӕхтӕ Хуыцауы фӕндӕй цӕуынц?» Ӕндӕр хатт та-иу йемӕ равзар 1 сӕрӕй 7 ӕмӕ 8 абзацтӕ.

◼ Кӕд дӕ зӕрды ис бинонты царды тыххӕй журнал ныууадзын, уӕд-иу дӕ ныхасы кӕрон бафӕрс: «Бинонтӕй алкӕмӕндӕр йӕ бон цы у аразын, цӕмӕй амондджындӕр уой?» Иннӕ хатт-иу йемӕ аныхас кӕн 14 сӕрӕй 4 абзацыл.

◼ Кӕд ын дӕттыс, Библийыл ӕууӕндӕн кӕй ис, уый тыххӕй журнал, уӕд та дӕ бон у бафӕрсын: «Цымӕ наукӕмӕ гӕсгӕ, Библи раст у?» Ногӕй йӕм куы бацӕуай, уӕд аныхас кӕн 2 сӕрӕй 8 абзацыл.

4. Цы кӕнгӕ у, адӕймаджы чиныг «Библи цы дзуры» куы нӕ хъӕуа, уӕд?

⁴ Алыхатт дӕр-иу дӕ ныхас фӕу ног фарстӕй, цӕмӕй йыл ӕндӕр хатт аныхас кӕнат. Уӕ ахуыр куы ӕрбӕстон уа, уӕд чиныг райдианӕй ахуыр кӕнын райдайут. Фӕлӕ зӕгъӕм, адӕймаджы нӕ хъӕуы чиныг «Библи цы дзуры»? Уӕддӕр ӕм журналтӕ хӕсс ӕмӕ-иу Библийӕ йемӕ истӕуыл аныхас кӕн. Ӕмӕ афтӕмӕй, чи зоны, фӕстӕдӕр Библи ахуыр кӕныныл дӕр сразы уа.

5. Ӕрмӕст журналтӕ дӕттыныл цӕуылнӕ хъуамӕ архайӕм?

⁵ Журналтӕ «Хъахъхъӕнӕн мӕсыг» ӕмӕ «Райхъал ут!»-ы руаджы, гӕнӕн ис, адӕймаджы бафӕнда базонын, Библи бӕлвырдӕй цы дзуры, уый. Уӕдӕ ӕппӕт хъарутӕй архай, цӕмӕй Библи ахуыр кӕнын райдайай, журналтӕ кӕмӕн хӕссыс, уыдонимӕ. Афтӕмӕй ӕххӕст кӕндзыстӕм Чырыстийы фӕдзӕхст, «цӕттӕ кӕнут ахуыргӕнинӕгтӕ... ӕмӕ сын амонут», зӕгъгӕ (Матф. 28:19, 20).

Дохтырты ӕххуыс дӕ куы бахъӕуа, уӕд фидар фӕлӕудзынӕ?

Ацы гӕххӕтт афтӕ бафснай, цӕмӕй дӕ куы бахъӕуа, уӕд ӕй тагъд ссарай

¹ Махӕй ничи фӕхъуыды кӕны, абон кӕнӕ райсом рынчындонмӕ кӕй бахаудзӕн, ууыл. Фӕлӕ, кӕд кӕуыл цы ӕрцӕудзӕн, уымӕн ничи ницы зоны (Еккл. 9:11). Кӕд дӕ дохтырты ӕххуыс нӕ фӕхъӕуы, уӕддӕр дӕ бон цы у саразын, цӕмӕй дын туг ма ауадзой, ӕнӕнхъӕлӕджы дыл исты куы ӕрцӕуа, ӕмӕ, дӕхи куы не ’мбарай, афтӕмӕй дӕ рынчындонмӕ куы аласой, уӕд? Ӕнӕнхъӕлӕджы дыл исты куы ӕрцӕуа йе та дӕ ӕвӕстиатӕй дохтырты ӕххуыс куы бахъӕуа, уӕд дӕ уырнындзинад фӕлвӕрд ӕрцӕудзӕн.

² Рынчындонмӕ куы бахауай ӕмӕ дын дохтыртӕ куы дзурой, зӕгъгӕ, туг куы нӕ ауадзай, уӕд амӕлдзынӕ, уӕд цы сараздзынӕ, цӕмӕй Хуыцауы раз ӕнаиппӕй баззайай? Дӕ уавӕр тынг ӕвзӕр у, зӕгъгӕ, уыцы ныхӕстыл уайтагъд сразы уыдзынӕ? Фидарӕй дӕ уырны, туг уадзын дӕ кӕй нӕ фӕнды, уый? Цӕттӕ дӕ ахӕм фӕлварӕнмӕ ӕмӕ туг ауадзын нӕ бауадздзынӕ? (Хъуыд. 15:28, 29).

³ Цӕмӕй дын туг ма ауадзой, уый тыххӕй фыццаджыдӕр хъуамӕ дӕхи фидарӕй уырна, уыцы хъуыддаг Хуыцауы цӕсты раст кӕй нӕу ӕмӕ дын дӕ уырнындзинадӕн стыр зиан кӕй ӕрхӕсдзӕн. Уымӕ гӕсгӕ хъуамӕ хорз зонай, Библийы туджы тыххӕй цы фыст ис, уый. Афтӕ куы нӕ уа, уӕд дӕ тыхст уавӕры ӕнцонтӕй фӕтӕрсын кӕндзысты, афтӕ дын куы дзурой, зӕгъгӕ, мах хабар дӕуӕй хуыздӕр зонӕм, уӕд. Афтӕ дӕм нӕ фӕкӕсдзӕн, ӕмӕ дохтыртӕ туджы тыххӕй Хуыцауӕй фылдӕр зонынц? Кӕй зӕгъын ӕй хъӕуы, ахӕм уавӕрты дын адӕм цыфӕнды куы дзурой, уӕддӕр ды фидар лӕудзынӕ ӕмӕ «Йегъовӕйы цӕсты раст цы у, уый» араздзынӕ (Дык. з. 12:23–25). Фӕлӕ уыцы фӕлварӕны иунӕг уыдзынӕ? (Еккл. 4:9–12).

РЫНЧЫНДӔТТӔН ИНФОРМАЦИДӔТТӔГ ХАЙАД ӔМӔ РЫНЧЫНДӔТТИМӔ ӔМГУЫСТГӔНӔГ КОМИТЕТ

⁴ Туг уадзыныл чи нӕ разы кӕны, уыдонӕн баххуыс кӕныны тыххӕй нӕ организаци скодта Рынчындӕттӕн информацидӕттӕг хайад. Стыр горӕтты ма арӕзт ӕрцыд Рынчындӕттимӕ ӕмгуыстгӕнӕг комитет дӕр. Алы комитеты дӕр ис цалдӕр хистӕр нӕлгоймаджы ӕмӕ сӕ уыцы хъуыддагыл сахуыр кодтой.

⁵ Рынчындӕттӕн информацидӕттӕг хайадӕн уый фадат ис, цӕмӕй ӕгас дунейы дӕр цы медицинон журналтӕ цӕуы, уыдонӕй 3 600 журналӕй фылдӕр кӕсой, ӕмӕ информаци агурой, ӕнӕ тугӕй операцитӕ ӕмӕ хос кӕныны мадзӕлттӕй хуыздӕр кӕцытӕ сты, уый тыххӕй. Уый фӕстӕ ацы Хайад медицинӕйы ӕнтыстыты тыххӕй информаци фӕхӕццӕ кӕны Рынчындӕттимӕ ӕмгуыстгӕнӕг комитетмӕ ӕмӕ ма иуӕй-иу дохтыртӕм. (Хатт-иу рынчындоны дохтыртӕ куы нӕ разы кодтой ӕнӕ тугӕй хос кӕныныл, уӕд-иу сӕм Рынчындӕттӕн информацидӕттӕг хайад арвыста, ӕнӕ тугӕй хос кӕныны тыххӕй медицинон статьятӕ, ӕмӕ-иу уавӕр фӕхуыздӕр.) Ацы Хайад Комитеттӕн фехъусын кӕны, тӕрхондӕтты нӕ пайдайӕн цы уынаффӕтӕ рахастой, уыцы хабӕрттӕ. Уыцы уынаффӕтӕ иннӕ тӕрхонгӕнджытӕн баххуыс кӕндзысты, цӕмӕй-иу нын нӕ хъуыддӕгтӕ лӕмбынӕгдӕр ӕвзарой. Ацы Хайадмӕ ма ис, ӕнӕ тугӕй чи дзӕбӕх кӕны ӕмӕ махӕн ӕнӕзивӕгӕй чи ӕххуыс кӕны, уыцы дохтырты номхыгъд. Уымӕ гӕсгӕ туг уадзыныл чи нӕ фӕразы кӕны, уыдоны ӕххуыс куы фӕхъӕуы, уӕд Комитеттӕн сӕ бон вӕййы ногдӕр номхыгъдтӕй пайда кӕнын.

⁶ Рынчындӕттӕн информацидӕттӕг хайад йӕ хъус дары, Рынчындӕттимӕ ӕмгуыстгӕнӕг комитетты чи ис, уыдоны куыд цӕттӕ кӕнынц ӕмӕ куыд кусынц, уымӕ. Комитеттӕ кӕм ис, уыцы горӕтты рынчындӕтты кусджытӕм ӕфсымӕртӕ арӕх фӕхӕццӕ кӕнынц ног информаци, цӕмӕй Комитеттимӕ кӕрӕдзи хуыздӕр ӕмбарой. Уыдон ма фӕагурынц, ӕнӕ тугӕй нын чи хос кӕна, ахӕм дохтырты. Уыцы ӕфсымӕртӕ кӕддӕриддӕр цӕттӕ сты, цӕмӕй дын баххуыс кӕной. Фӕлӕ уый тыххӕй дӕхӕдӕг дӕр хъуамӕ ахсджиаг къахдзӕфтӕ скӕнай.

АХСДЖИАГ КЪАХДЗӔФТӔ СКОДТАЙ?

⁷ Фыццаджыдӕр уал базон, дӕ бинонтӕй йӕ туджы гӕххӕтт алчидӕр кӕронмӕ байдзаг кодта: бон дзы амынд ис, къухфыст дзы ис ӕмӕ ӕвдисӕнты нӕмттӕ фыст сты? Ӕфсымӕртӕй-иу исчи рынчындонмӕ куы ӕрбацыд ӕмӕ-иу йӕ гӕххӕттыл къухфыст куы нӕ уыди ӕмӕ\йе та йӕ кӕд байдзаг кодта, уый амынд куы нӕ уыд, уӕд-иу дохтыртӕ гӕххӕттыл фӕдызӕрдыг сты. Дӕ ӕнаргъуыд сывӕллӕттӕй алкӕмӕндӕр «Удостоверение личности» ис? Кӕд нӕ, уӕд ӕнӕнхъӕлӕджы исты куы ӕрцӕуа, уӕд рынчындоны кусджытӕ кӕцӕй базондзысты, телефонӕй кӕмӕ хъӕуы дзурын ӕмӕ тугмӕ цы цӕстӕй кӕсут, уый?