7 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Ахуыры рӕстӕджы кувын

1. а) Библийы ахуыр куывдӕй райдайын ӕмӕ фӕуын хорз цӕмӕн у? ӕ) Ахуыр куывдӕй райдайӕн куыд ис?

¹ Библи кӕимӕ ахуыр кӕнӕм, уымӕн цӕмӕй йӕ уырнындзинад фидар кӕна, уый тыххӕй ӕнӕмӕнг хъӕуы Иегъовӕйы арфӕдзинад (1 Кор. 3:6). Уымӕ гӕсгӕ хорз у ахуыр куывдӕй райдайын ӕмӕ фӕуын. Адӕймаг уырнӕг куы уа, уӕд нӕ бон у фыццаг ахуыр дӕр куывдӕй райдайын. Ӕндӕр ахуыргӕнинӕгтимӕ та, чи зоны, бахъӕуа ахъуыды кӕнын, хуыздӕр кӕд у ахуыр куывдӕй райдайын. Псалом 24:4, 5 ӕмӕ 1 Иоанны 5:14 стихты руаджы дӕ бон у ахуыргӕнинагӕн равдисын, цӕмӕн хъӕуы кувын, стӕй ма Иоанны 15:16 ӕрхӕссын ӕмӕ бамбарын кӕнын, Иегъовӕмӕ Йесо Чырыстийы уылты кувын цӕмӕн хъӕуы, уый.

2. Библийы ахуыры рӕстӕджы, хоимӕ аргъуыд ӕфсымӕр кӕнӕ ӕнӕаргъуыд нӕлгоймаг-хъусынгӕнӕг куы уа, уӕд хъуамӕ чи кува?

² Библийы ахуыры рӕстӕг чи хъуамӕ кува? Хоимӕ аргъуыд ӕфсымӕр куы уа, уӕд кувгӕ уый фӕкӕны. Хойӕн йӕ бон у ахуыр уадзын, ӕрмӕст йӕ сӕрыл исты куы ныккӕна, уӕд (1 Кор. 11:5, 10). Уыйхыгъд, хоимӕ ӕнӕаргъуыд нӕлгоймаг-хъусынгӕнӕг куы уа, уӕд кувгӕ кӕны хо, фӕлӕ йӕ сӕр хъуамӕ ӕмбӕрзт уа кувгӕйӕ дӕр ӕмӕ ахуыр уадзгӕйӕ дӕр.

3. Цӕй тыххӕй ис кувӕн Библийы ахуыры рӕстӕджы?

³ Цӕй тыххӕй ис кувӕн. Ахуыры рӕстӕг куывдтытӕ хъуамӕ уой цыбыр, фӕлӕ хъуыддагыл. Нӕ куывдтыты нӕ бон у Хуыцауӕй нӕ ахуырӕн ӕххуыс курын ӕмӕ, цы базонӕм, уый тыххӕй бузныг дзурын. Стӕй ма Иегъовӕйы, ӕппӕты хуыздӕр Зондамонӕджы, кадджын кӕнын дӕр (Ис. 54:13). Кувгӕйӕ ма ис дзурӕн, нӕ ахуыргӕнинагыл сыгъдӕгзӕрдӕйӕ кӕй тыхсӕм ӕмӕ Иегъовӕйы организацийӕ бузныг кӕй стӕм, уый тыххӕй дӕр (1 Фес. 1:2, 3; 2:7, 8). Цӕмӕй ахуыргӕнинаг цы базоны, уымӕ гӕсгӕ цӕра, уый тыххӕй Иегъовӕмӕ куы кувӕм, уӕд ӕмбардзӕн, куыд ахсджиаг у дзырд ӕххӕст кӕнын (Иак. 1:22).

4. Библийы ахуыр куывдӕй райдайын ӕмӕ фӕуын цы арфӕдзинӕдтӕ хӕссы?

⁴ Куывд бирӕ цӕмӕндӕрты ахъаз кӕны. Уый хӕссы Хуыцауы арфӕдзинад (Лук. 11:13). Куывдӕй бӕрӕг кӕны, Хуыцауы Ныхас ахуыр кӕнын ахсджиаг хъуыддаг кӕй у. Ахуыргӕнинаг нӕ куывдтытӕм куы хъуса, уӕд ахуыр кӕны кувын (Лук. 6:40). Уымӕй уӕлдай ма, нӕ зӕрдӕбын куывдтытӕй, Хуыцауы кӕй уарзӕм ӕмӕ йӕ диссаджы миниуджытӕй бузныг кӕй стӕм, уый бӕрӕг куы уа, уӕд ахуыргӕнинаг Иегъовӕмӕ ӕввахсдӕр кӕндзӕн.

Журнал дӕтгӕйӕ цы ис зӕгъӕн

Хъахъхъӕнӕн мӕсыг, 1 апр.

«Адӕм зӕххы къорийыл алы ран дӕр Йесойы ахуырӕдтӕн аргъ кӕнынц. [Бакӕс 3 фарсыл 1 абзацы ныхӕстӕ.] Дӕумӕ гӕсгӕ уыцы ахуырӕдтӕ абон дӕр ахадынц, зӕгъӕм, ацы стихты цы цӕвиттон ис, уый? [Бакӕс Матфейы 5:21, 22а. Уый фӕстӕ йӕ бауадз йӕ хъуыды зӕгъын.] Ацы журналы дзырдӕуы, Йесо цӕуыл ахуыр кодта ӕмӕ нын уый куыд баххуыс кӕндзӕн».