ПАВЕЛ чырыстон дин куы райста, уӕд зӕрдиагӕй райдыдта хъусын кӕнын Хуыцауы Паддзахады тыххӕй хорз хабар. Кӕд раздӕр йӕхӕдӕг чырыстӕтты ӕфхӕрдта, уӕд ын ныр та йӕхи карзӕй ӕфхӕрдтой. Апостол Павел йӕхиуыл нӕ ауӕрста – цалдӕр хатты дард балцы ацыд, цӕмӕй Хуыцауы Паддзахады тыххӕй хъусын кодтаид. Уыцы Паддзахады фӕрцы Хуыцау сӕххӕст кӕндзӕн, адӕмы тыххӕй йӕм райдианы цы фӕнд уыди, уый.

Йӕ фыццаг балцы рӕстӕг Павел Листрӕйы сдзӕбӕх кодта, йӕ райгуырдӕй фӕстӕмӕ къуылых чи уыд, ахӕм нӕлгоймаджы. Адӕм уый куы федтой, уӕд хъӕр кӕнын райдыдтой, Павел ӕмӕ йе ’мбал Варнавӕ хуыцӕуттӕ сты, зӕгъгӕ. Нывӕндтӕ ӕрхӕссынмӕ дӕр сын хъавыдысты, фӕлӕ сӕ Павел ӕмӕ Варнавӕ тыххӕйты баурӕдтой. Фӕстӕдӕр знӕгты ардыдӕй уыцы адӕм Павелы дуртӕй фӕхостой ӕмӕ йӕ горӕтӕй мардӕнхъӕлӕй рахастой. Фӕлӕ Павел нӕ амард ӕмӕ та фӕстӕдӕр Листрӕмӕ ӕрыздӕхт, цӕмӕй ахуыргӕнинӕгты бафидар кодтаид.

Дзуттӕгтӕй чырыстӕттӕ чи сси, уыдонӕй иуӕй-иутӕ дзырдтой, зӕгъгӕ, ӕндӕр адӕмыхӕттытӕй чырыстон дин чи райста, уыдон хъуамӕ Моисейы Закъонӕй иуӕй-иу фӕдзӕхстытӕ ӕххӕст кӕной. Апостол Павел ацыд Иерусалиммӕ, цӕмӕй апостолтӕн ӕмӕ хистӕр нӕлгоймӕгтӕн хъуыддаг бамбарын кодтаид. Хуыцауы сыгъдӕг тыхы ’ххуысӕй ӕмӕ, Сыгъдӕг Фыстад цы дзуры, уымӕ лӕмбынӕг ӕркӕсгӕйӕ, уыцы нӕлгоймӕгтӕ ӕмбырдтӕм писмотӕ ныффыстой ӕмӕ сын ныффӕдзӕхстой, цӕмӕй мӕнгхуыцӕуттӕн ма куывтаиккой, ма хордтаиккой туг ӕмӕ хӕдмӕл фосы дзидза, стӕй сӕхи хызтаиккой хӕтындзинадӕй. Уыцы фӕдзӕхстытӕ «ахсджиаг» уыдысты, фӕлӕ уӕддӕр чырыстӕтты Моисейы Закъон ӕххӕст кӕнын нӕ хъуыди (Хъуыддӕгтӕ 15:28, 29).

Йӕ дыккаг балцы рӕстӕг Павел уыди горӕт Верийы (ныртӕккӕ ис Грецийы). Цы дзуттӕгтӕ дзы царди, уыдон зӕрдиагӕй байхъуыстой Хуыцауы ныхасмӕ ӕмӕ алы бон Фыстад лӕмбынӕг иртӕстой, зӕгъгӕ нын цы дзуры, уыдӕттӕ раст сты ӕви нӕ. Фӕлӕ та ацы хатт дӕр знӕгтӕ Павелы ныхмӕ карзӕй рацыдысты ӕмӕ йӕ бахъуыд Афинтӕм алидзын. Уым хъусын кодта ахуыргонд адӕмӕн. Павел афинӕгтӕн куыд уӕзданӕй ӕмӕ ӕмбаргӕйӕ хъусын кодта, стӕй куыд дзырдарӕхст уыд, уымӕй фӕзминаг у.

Апостол Павел йе ’ртыккаг балцы фӕстӕ ӕрцыд Иерусалиммӕ. Кувӕндонмӕ куы бацыд, уӕд дзуттӕгтӕй иуӕй-иутӕ адӕмы сызмӕстой, цӕмӕй йӕ амардтаиккой. Фӕлӕ йӕ ромаг ӕфсӕддонтӕ сӕ къухӕй фервӕзын кодтой. Уый фӕстӕ сбӕрӕг, Павел Ромы паддзахады цӕрӕг кӕй уыд, ӕмӕ йын уый фӕрцы фӕстӕдӕр фадат фӕци, цӕмӕй йӕ хъуыддаг равзарыны тыххӕй ромаг хицау Феликсы раз ӕрлӕууыдаид. Дзуттӕгтӕн сӕ бон не сси Павелы ныхмӕ иу бӕлвырдгӕнӕн дӕр ӕрхӕссын. Цӕмӕй йӕ йе знӕгты къухмӕ ма радтаиккой, уый тыххӕй Павел ӕндӕр ромаг хицау Фестӕн загъта: «Ӕз домын кесӕры тӕрхон!» Уӕд ын Фест загъта: «Кесӕрмӕ ацӕудзынӕ» (Хъуыддӕгтӕ 25:11, 12).

Павелы науыл арвыстой Италимӕ, цӕмӕй йын уым стӕрхон кодтаиккой. Фӕлӕ фӕндагыл тыхджын дымгӕ сыстад ӕмӕ сӕ нау ныппырх. Уый тыххӕй Павелы бахъуыд зымӕг Мальтӕйы арвитын. Ӕппынфӕстаг Роммӕ куы ныххӕццӕ, уӕд уым хӕдзар баххуырста ӕмӕ дзы царди дыууӕ азы. Кӕд Павел ахст уыд, уӕддӕр зӕрдиагӕй хъусын кодта Хуыцауы Паддзахады тыххӕй, чидӕриддӕр ӕм цыд, уыдонӕн.

Хъуыддӕгты чиныг 11:22–28:31.

ФЫЦЦАГ чырыстон ӕмбырд куы фӕзынд, уӕдӕй фӕстӕмӕ Йегъовӕ йӕ фӕндтӕ ӕххӕст кӕны ӕмбырды уылты. Фӕлӕ фыццаг ӕнусы чырыстӕттӕ сӕмбӕлдысты карз ӕфхӕрдыл. Цымӕ Хуыцауыл иузӕрдионӕй баззадысты, кӕд сӕ ’фхӕрдтой ӕмӕ ӕмбырды дӕр зындзинӕдтӕ ӕййӕфтой, уӕддӕр? Чырыстон Грекъаг Фыстыты цы 21 фыстӕджы ис, уыдоны фӕрцы чырыстӕттӕ уынаффӕтӕ истой ӕмӕ сӕ уырнындзинад фидар кодтой.

Уыцы фыстӕджытӕй 14 (Ромӕгтӕм–Дзуттӕгтӕм) ныффыста апостол Павел. Фыстӕджытӕ хӕссынц, цы ӕмбырдтӕм кӕнӕ цы адӕммӕ фыст уыдысты, уыдоны нӕмттӕ. Ӕркӕсӕм, Павел цы хъуыддӕгты тыххӕй фыста, уыдонӕй иуӕй-иутӕм.

Уаг ӕмӕ ӕгъдау. Хӕтгӕ чи кӕны ӕмӕ ӕндӕр уӕззау тӕригъӕдтӕ чи аразы, уыдон «Хуыцауы паддзахадмӕ нӕ бацӕудзысты» (Галатӕгтӕм 5:19–21; 1 Коринфӕгтӕм 6:9–11). Хуыцауы лӕггадгӕнджыты ’хсӕн хъуамӕ уа иудзинад, кӕд алыхуызон адӕмыхӕттытӕй сты, уӕддӕр (Ромӕгтӕм 2:11; Ефесӕгтӕм 4:1–6). Хъуамӕ зӕрдиагӕй ӕххуыс кӕной, се ’мчырыстӕттӕй фӕкӕсынхъуаг чи у, уыдонӕн (2 Коринфӕгтӕм 9:7). Павел чырыстӕтты разӕнгард кодта, цӕмӕй Йегъовӕмӕ «ӕппынӕдзух куывтаиккой» ӕмӕ йын ӕргом кодтаиккой, сӕ зӕрдӕйы цыдӕриддӕр ис, уый (1 Фессалоникӕгтӕм 5:17; 2 Фессалоникӕгтӕм 3:1; Филиппӕгтӕм 4:6, 7). Цӕмӕй сын Хуыцау сӕ куывдтытӕм хъуыстаид, уый тыххӕй хъуамӕ ӕууӕндыдаиккой, Хуыцау кӕй ис ӕмӕ йӕ зӕрдиагӕй чи агуры, уыдонӕн кӕй арфӕ кӕны (Дзуттӕгтӕм 11:6).

Цымӕ бинонтӕн та цы баххуыс кӕндзӕн, цӕмӕй амондджын уой? Лӕгтӕ хъуамӕ сӕ устыты уарзой, сӕхи куыд уарзынц, афтӕ, сылгоймӕгтӕ та сӕ лӕгтӕн кад кӕной. Сывӕллӕттӕ хъуамӕ сӕ ныййарджыты коммӕ кӕсой, уымӕн ӕмӕ уый Хуыцауӕн ӕхсызгон у. Ныййарджытӕ та хъуамӕ сӕ сывӕллӕтты ахуыр кӕной ӕмӕ сын фӕлмӕнӕй зонд амоной, Хуыцау куыд фӕдзӕхсы, афтӕ (Ефесӕгтӕм 5:22–6:4; Колоссӕгтӕм 3:18–21).

Хуыцау ӕргом кодта йӕ фӕндтӕ. Моисейы Закъон дзуттӕгты цӕттӕ кодта Чырыстийы ӕрцыдмӕ (Галатӕгтӕм 3:24). Фӕлӕ уыцы Закъон чырыстӕтты ӕххӕст кӕнын нӕ хъӕуы. Дзуттӕгтӕй чырыстон дин чи райста, уыдонӕн Павел йӕ фыстӕджы бамбарын кодта, Закъон цӕй тыххӕй ӕрцыд лӕвӕрд ӕмӕ Хуыцау йӕ фӕндон Чырыстийы уылты куыд ӕххӕст кӕны, уый. Павел ма бамбарын кодта, уыцы Закъоны алыхуызон уагӕвӕрдтӕ фидӕны хабӕрттӕм кӕй амыдтой. Зӕгъӕм, фос нывондӕн кӕй хастой, уый амыдта, Чырысти йӕ цард нывондӕн кӕй ӕрхаста ӕмӕ уый фӕрцы нӕ тӕригъӕдтӕ хатыргонд кӕй цӕуынц, уымӕ (Дзуттӕгтӕм 10:1–4). Чырыстийы мӕлӕты фӕстӕ Хуыцау уыцы Закъон ӕххӕст кӕнын нал домдта (Колоссӕгтӕм 2:13–17; Дзуттӕгтӕм 8:13).

Чырыстон ӕмбырд. Нӕлгоймӕгтӕй ӕмбырды фылдӕр хӕстӕ ӕххӕст кӕнын кӕй фӕнды, уыдон хъуамӕ уой хӕрзӕгъдау ӕмӕ сӕм уа, Библи кӕй кой кӕны, уыцы миниуджытӕ (1 Тимофеймӕ 3:1–10, 12, 13; Титмӕ 1:5–9). Йегъовӕйы лӕггадгӕнджытӕ хъуамӕ ӕдзух иумӕ ӕмбырд кӕной, цӕмӕй кӕрӕдзи фидар кӕной (Дзуттӕгтӕм 10:24, 25). Уыцы фембӕлдты хъуамӕ сӕ ныфсыл ныфс ӕфта ӕмӕ дзы Хуыцауы закъӕттыл ахуыр кӕной (1 Коринфӕгтӕм 14:26, 31).

Павел Тимофеймӕ йӕ дыккаг фыстӕг ныффыста, Ромы ахст куы уыд ӕмӕ тӕрхонмӕ куы ӕнхъӕлмӕ каст, уӕд. Йе ’мбӕлттӕй ӕрмӕстдӕр цалдӕрӕй бахастой сӕ ныфс, цӕмӕй йӕ бабӕрӕг кодтаиккой, кӕд сын тӕссаг уыд, уӕддӕр. Павел ӕмбӕрста, бирӕ йын кӕй нал баззад ӕмӕ загъта: «Ӕз хъӕбатырӕй тох кодтон, мӕ фӕндагыл кӕронмӕ азгъордтон, мӕ уырнындзинад бахъахъхъӕдтон» (2 Тимофеймӕ 4:7). Ӕвӕццӕгӕн, уымӕй бирӕ нӕ рацыд, афтӕ йӕ амардтой. Фӕлӕ йӕ фыстӕджытӕ Хуыцауы лӕггадгӕнджытӕн абон дӕр сты фӕндагамонӕг.

Ромӕгтӕм; 1 Коринфӕгтӕм; 2 Коринфӕгтӕм; Галатӕгтӕм; Ефесӕгтӕм; Филиппӕгтӕм; Колоссӕгтӕм; 1 Фессалоникӕгтӕм; 2 Фессалоникӕгтӕм; 1 Тимофеймӕ; 2 Тимофеймӕ; Титмӕ; Филимонмӕ ӕмӕ Дзуттӕгтӕм.

35. н. э. 60 аз Павел Ромы ахӕстоны ныффыста фыстӕджытӕ

36. н. э. 62 азмӕ ’ввахс Чырыстийы ӕфсымӕр Иаков ныффыста йӕ фыстӕг