Ирвӕзын кӕнын нӕ цӕмӕн хъӕуы?

Рагӕй фӕстӕмӕ дӕр адӕм бӕллынц ахӕм цардмӕ, цӕмӕй макуы базӕронд уой, макуы фӕрынчын уой ӕмӕ макуы амӕлой. Фӕлӕ, хъыгагӕн, адӕм иууылдӕр мӕлынц. Иов ацы ныхӕстӕ куы загъта, уӕдӕй нырмӕ рацыд 3 мин азӕй фылдӕр, фӕлӕ абон дӕр раст сты.

Алы адӕймаджы дӕр тынг фӕнды ӕнустӕм цӕрын. Библийы фыст ис, Хуыцау нын нӕ зӕрдӕты ахӕм фӕндон кӕй нывӕрдта, цӕмӕй ӕнустӕм цӕрӕм ӕмӕ, уый цы нысан кӕны, уый бамбарӕм (Екклесиаст 3:11). Уӕдӕ цымӕ уымӕн гӕнӕн куы нӕ уыдаид, уӕд нын нӕ уарзӕгой Хуыцау нӕ зӕрдӕты ахӕм фӕндон нывӕрдтаид? Кӕд «нӕ» зӕгъыс, уӕд раст дӕ. Хуыцауы Ныхас мӕлӕт хоны знаг ӕмӕ нын ныфс ӕвӕры, уыцы знаг «сӕфт [кӕй] ӕрцӕудзӕн» (1 Коринфӕгтӕм 15:26).

Махӕй алчидӕр сразы уыдзӕн, мӕлӕт знаг кӕй у, уыимӕ. Адӕймагӕн йӕ зонд йӕхимӕ уӕд, ӕндӕр ӕй мӕлын никуы бафӕнддзӕн. Истӕмӕй нын тӕссаг куы вӕййы, уӕд амбӕхсӕм кӕнӕ алидзӕм. Куы фӕрынчын вӕййӕм, уӕд нӕхи адзӕбӕх кӕныныл фӕархайӕм. Мах алцыдӕр фӕаразӕм, цӕмӕй нӕ цард бахъахъхъӕнӕм.

Ацы рагон знаг сӕфт кӕй ӕрцӕудзӕн, ууыл цымӕ ӕууӕндӕн ис? Ис. Йегъовӕ, не Сфӕлдисӕг Хуыцау, адӕмы уый тыххӕй не сфӕлдыста, цӕмӕй цалдӕр дӕсазы ацӕрой ӕмӕ стӕй амӕлой. Хуыцауы уый нӕ фӕндыд, цӕмӕй, кӕй сфӕлдыста, уыцы адӕм мардаиккой, фӕлӕ цӕмӕй ӕнустӕм зӕххыл цардаиккой. Ӕмӕ йӕ фӕндон ӕнӕмӕнгӕй сӕххӕст кӕндзӕн (Исай 55:11).

Уӕдӕ мӕлӕт сӕфт куыд ӕрцӕудзӕн? Адӕм ӕнусты дӕргъы мӕлӕты ныхмӕ хос агуырдтой, фӕлӕ не ссардтой. Ӕмӕ йын абоны онг дӕр агурынц. Ахуыргӕндтӕ ӕрхъуыды кодтой алыхуызон хостӕ ӕмӕ вакцинӕтӕ ӕмӕ уыдоны фӕрцы иуӕй-иу низтӕ дзӕбӕх кӕнынц. Сӕ бон баци цӕрӕгойты ӕмӕ зайӕгойты генетикон структурӕ раиртасын. Абон бирӕ бӕстӕты адӕм, рӕстӕмбис нымадӕй, цӕрынц, сӕдӕ азы размӕ цас цардысты, уымӕй фылдӕр. Фӕлӕ мӕлӕтыл фӕуӕлахиз уой, уымӕ сӕ нырма тынг бирӕ хъӕуы. Библи куыд зӕгъы, афтӕмӕй «иууылдӕр фӕстӕмӕ сыджытмӕ аздӕхынц» (Екклесиаст 3:20).

Фӕлӕ ис иу хорз хабар: мӕлӕтӕй фервӕздзыстӕм, ӕмӕ уый адӕмы ӕнтыстытӕй кӕнгӕ нӕу. Йегъовӕ Хуыцау батыхсти, цӕмӕй нӕ мӕлӕтӕй фервӕзын кӕна, ӕмӕ уыцы хъуыддаджы сӕйраг бынат ис Йесо Чырыстийӕн.