Уӕлӕмхасӕн ӕрмӕг «Нӕ цард ӕмӕ нӕ лӕггад»-ы кусӕн тетрадмӕ
7–13 ЯНВАРЫ
ХУЫЦАУЫ НЫХАСЫ ХӔЗНАТӔ | ХЪУЫДДӔГТӔ 21, 22
«Йегъовӕйы куыд фӕнды, афтӕ уӕд»
(Хъуыддӕгтӕ 21:8–12) Иннӕ бон нӕ фӕндаг адарддӕр кодтам ӕмӕ ӕрцыдыстӕм Кесаримӕ. Кесарийы бацыдыстӕм авд ӕвзӕрст лӕгӕй сӕ иумӕ – хорз хабар хъусынгӕнӕг Филиппмӕ, ӕмӕ уымӕ ӕрлӕууыдыстӕм. 9 Филиппӕн уыди цыппар чызджы, уыдон пехуымпариуӕг кодтой. 10 Цасдӕр сӕм куы фестӕм, уӕд Иудейӕйӕ ӕрцыд иу пехуымпар, Агав, зӕгъгӕ, 11 ӕмӕ нӕм бацыд, Павелы рон райста, йӕ къӕхтӕ ӕмӕ дзы йӕ къухтӕ сбаста ӕмӕ загъта: «Афтӕ зӕгъы сыгъдӕг тых: „Ацы рон кӕй у, уыцы лӕджы дзуттӕгтӕ Иерусалимы раст афтӕ сбӕтдзысты ӕмӕ йӕ иннӕ адӕмты къухтӕм ратдзысты“». 12 Уый куы фехъуыстам, уӕд нӕхӕдӕг дӕр ӕмӕ, уым чи уыди, уыдон дӕр Павелӕн лӕгъстӕ кӕнын байдыдтам, зӕгъгӕ, ма ацу Иерусалиммӕ.
«Йегъовӕйы куыд фӕнды, афтӕ уӕд»
15 Павел Филипптӕм куы уыди, уӕд ма сӕм ӕрбацыд ноджыдӕр иу кадджын уазӕг, Агав, зӕгъгӕ. Филиппы хӕдзары чи ӕрӕмбырд, уыдон зыдтой, Агав пехуымпар кӕй у. Уый бирӕ раздӕр загъта, Ромы паддзах Клавдийы заман цы ӕххормаг рӕстӕг скодта, уый тыххӕй (Хъуыд. 11:27, 28). Ӕмӕ ныр, ӕвӕццӕгӕн, хъуыдытӕ кодтой: «Цымӕ Агав цӕмӕн ӕрбацыди? Ныр та цавӕр хабар ӕрбахаста?» Ӕмӕ йӕм се ’ппӕт дӕр лӕмбынӕг куыд кастысты, афтӕ Агав райста Павелы рон – ӕхцатӕ ӕмӕ-иу ӕндӕр дзауматӕ кӕм хастой ӕмӕ-иу адӕймагӕн йӕ астӕуыл баст чи уыд, ахӕм даргъ хъуымацы гӕбаз. Уыцы ронӕй Агав йӕ къӕхтӕ ӕмӕ йӕ къухтӕ сбаста. Уый фӕстӕ загъта, се ’ппӕты дӕр хъуыдытыл чи бафтыдта, ахӕм ныхӕстӕ: «Афтӕ зӕгъы сыгъдӕг тых: „Ацы рон кӕй у, уыцы лӕджы дзуттӕгтӕ Иерусалимы раст афтӕ сбӕтдзысты ӕмӕ йӕ иннӕ адӕмты къухтӕм ратдзысты“» (Хъуыд. 21:11).
16 Уӕдӕ пехуымпары ныхӕстӕй дӕр бӕрӕг уыд, Павелӕн Иерусалиммӕ ӕнӕцӕугӕ кӕй нӕ уыди. Уыцы ныхӕстӕ ма ууыл дзурӕг уыдысты, ӕмӕ Павелы дзуттӕгтӕ «иннӕ адӕмты къухтӕм» кӕй ратдзысты, хорз хабар сын кӕй хъусын кодта, уый тыххӕй. Уыцы ныхӕстӕ чи фехъуыста, уыдонӕн се ’ппӕтӕн дӕр тынг зын уыди. Лука фыссы: «Уый куы фехъуыстам, уӕд нӕхӕдӕг дӕр ӕмӕ, уым чи уыди, уыдон дӕр Павелӕн лӕгъстӕ кӕнын байдыдтам, зӕгъгӕ, ма ацу Иерусалиммӕ. Фӕлӕ нын Павел загъта: „Уый цы кусут? Цӕуыл кӕут ӕмӕ мын мӕ ныфс цӕмӕн сӕттут? Ӕз цӕттӕ дӕн, цӕмӕй мӕ Чырыстийы номы тыххӕй Иерусалимы бӕтгӕ нӕ, фӕлӕ маргӕ дӕр акӕной“» (Хъуыд. 21:12, 13).
(Хъуыддӕгтӕ 21:13) Фӕлӕ нын Павел загъта: «Уый цы кусут? Цӕуыл кӕут ӕмӕ мын мӕ ныфс цӕмӕн сӕттут? Ӕз цӕттӕ дӕн, цӕмӕй мӕ Чырыстийы номы тыххӕй Иерусалимы бӕтгӕ нӕ, фӕлӕ маргӕ дӕр акӕной».
«Йегъовӕйы куыд фӕнды, афтӕ уӕд»
17 Дӕ цӕстытыл-ма ауайын кӕн: ӕфсымӕртӕ, Лука дӕр семӕ, афтӕмӕй, Павелӕн лӕгъстӕ кӕнынц, ма ацу, зӕгъгӕ. Чидӕртӕ та сӕ кӕугӕ дӕр кӕнынц. Павел ӕй ӕмбары, афтӕ йыл уый тыххӕй кӕй тыхсынц, ӕмӕ йӕ тынг уарзынц. Ӕмӕ сын уый дӕр фӕлмӕнӕй зӕгъы, афтӕмӕй мын «мӕ ныфс... сӕттут», зӕгъгӕ, кӕнӕ мын «мӕ зӕрдӕ марут» (афтӕ йӕ ратӕлмац кодтой грекъаг ӕвзагӕй иуӕй-иутӕ). Павел ӕфсымӕртимӕ Тиры куы фембӕлд, уӕд йӕ фӕнд куыд нӕ фӕивта, афтӕ ныр дӕр, кӕд ын лӕгъстӕ кӕнынц ӕмӕ сӕ цӕссыг калынц, уӕддӕр йӕхицӕн фидарӕй загъта, кӕй ацӕудзӕн. Ӕмӕ сын ӕмбарын кӕны, йӕ фӕндаг адарддӕр кӕнын ӕй цӕмӕн хъӕуы, уый. Куыд хъӕбатыр ӕмӕ куыд фидар разынд Павел! Кӕддӕр Йесо куыд бакодта, афтӕ уый дӕр фидар ныллӕууыд, зӕгъгӕ, хъуамӕ цыфӕндыйӕ дӕр Иерусалиммӕ ацӕуон (Дзут. 12:2). Павел йӕхицӕн мӕлӕт нӕ агуырдта, фӕлӕ, Йесо Чырыстийы фӕдылдзӕуӕг кӕй уыд, уый тыххӕй йӕ амӕлын куы бахъуыдаид, уӕд ӕй йӕхицӕн стыр кадыл банымадтаид.
(Хъуыддӕгтӕ 21:14) Куы нӕ йӕ басастам, уӕд ын ницыуал дзырдтам ӕмӕ загътам: «Йегъовӕйы куыд фӕнды, афтӕ уӕд».
«Йегъовӕйы куыд фӕнды, афтӕ уӕд»
18 Ӕфсымӕртӕ куыд бакодтой? Павелы ныхасыл уӕлдай ницыуал загътой. Мах кӕсӕм: «Куы нӕ йӕ басастам, уӕд ын ницыуал дзырдтам ӕмӕ загътам: „Йегъовӕйы куыд фӕнды, афтӕ уӕд“» (Хъуыд. 21:14). Павелы Иерусалиммӕ ацӕуын чи нӕ уагъта, уыдон нӕ ныллӕууыдысты, мах куыд зӕгъӕм, хъуамӕ афтӕ бакӕнай, зӕгъгӕ. Павел сын цы дзырдта, уымӕ байхъуыстой ӕмӕ йемӕ сразы сты. Бамбӕрстой йӕ, кӕд сын тынг зын у, уӕддӕр Йегъовӕйы фӕндонмӕ гӕсгӕ бакӕнын кӕй хъӕуы. Павел равзӕрста, ӕппынфӕстаг ӕй мӕлӕтмӕ чи ’ркодта, уыцы фӕндаг. Ӕмӕ йын бирӕ ӕнцондӕр уыдаид, чи йӕ уарзта, уыдон ӕй куы нӕ къуылымпы кодтаиккой.
Цавӕр хӕзнатӕ ссардтай?
(Хъуыддӕгтӕ 21:23, 24) Гъемӕ дын куыд зӕгъӕм, афтӕ бакӕн: ам нӕм ис, Хуыцауӕн дзырд чи радта, цыппар ахӕм лӕджы. 24 Демӕ сӕ акӕн ӕмӕ Закъонмӕ гӕсгӕ семӕ дӕхи ссыгъдӕг кӕн, сӕ хӕрдзтӕ дӕр сын дӕхимӕ райс, цӕмӕй сӕ сӕртӕ адасой. Ӕмӕ йӕ уӕд алчидӕр зондзӕн, цытӕ дӕ дзурынц, уыдӕттӕ ӕцӕг кӕй не сты, фӕлӕ алцыдӕр, куыд ӕмбӕлы, афтӕ кӕй кӕныс ӕмӕ дӕхӕдӕг дӕр Закъон кӕй ӕххӕст кӕныс.
«Байхъусут-ма, цы мыл ӕрцыд, уый уын бамбарын кӕнон»
10 Фӕлӕ Павел ӕмбӕрста, дзуттаг ӕгъдӕуттӕ ӕвзӕр кӕмӕ нӕ кастысты, уыдоны дӕр. Уыцы ӕгъдӕуттӕй иуӕй-иутӕ уыдысты, зӕгъӕм, сабатбон кӕй ницы кусӕн уыд кӕнӕ цавӕрдӕр хӕринӕгтӕ хӕрӕн кӕй нӕ уыд, ахӕмтӕ (Ром. 14:1–6). Стӕй сунӕт кӕныны тыххӕй дӕр бӕлвырд фӕтк не ’рӕвӕрдта. Раст у, Павел Тимофейӕн сунӕт скодта, цӕмӕй, йӕ фыд грекъаг кӕй уыд, уый тыххӕй йӕм дзуттӕгтӕ зул цӕстӕй ма кастаиккой (Хъуыд. 16:3). Адӕймаг сунӕт скодтаид ӕви нӕ, уый йӕхи хъуыддаг уыд. Павел галатӕгтӕн загъта: «Йесо Чырыстиимӕ иудзинады чи ис, уыдон сунӕтгонд сты ӕви нӕ, уый уӕлдай нӕу – сӕйраг у, цӕмӕй сӕм уа, уарзондзинадӕй чи цӕуы, ахӕм уырнындзинад» (Гал. 5:6). Фӕлӕ адӕймаг сунӕт уый тыххӕй куы скодтаид, цӕмӕй Закъоны дӕлбар уыдаид кӕнӕ афтӕ куы хъуыды кодтаид, ӕмӕ ӕнӕ уымӕй Йегъовӕйы хорзӕх ссарӕн нӕй, уӕд уый ууыл дзурӕг уыдаид, ӕмӕ йын уырнындзинад нӕ фаг кӕны.
11 Кӕд, Павелӕй цытӕ дзырдтой, уыдон раст нӕ уыдысты, уӕддӕр уыцы ныхӕстӕ, дзуттӕгтӕй чырыстӕттӕ чи сси, уыдоны тынг тыхсын кодтой. Уымӕ гӕсгӕ хистӕр нӕлгоймӕгтӕ Павелӕн бауынаффӕ кодтой: «Ам нӕм ис, Хуыцауӕн дзырд чи радта, цыппар ахӕм лӕджы. Демӕ сӕ акӕн ӕмӕ Закъонмӕ гӕсгӕ семӕ дӕхи ссыгъдӕг кӕн, сӕ хӕрдзтӕ дӕр сын дӕхимӕ райс, цӕмӕй сӕ сӕртӕ адасой. Ӕмӕ йӕ уӕд алчидӕр зондзӕн, цытӕ дӕ дзурынц, уыдӕттӕ ӕцӕг кӕй не сты, фӕлӕ алцыдӕр, куыд ӕмбӕлы, афтӕ кӕй кӕныс ӕмӕ дӕхӕдӕг дӕр Закъон кӕй ӕххӕст кӕныс» (Хъуыд. 21:23, 24).
12 Павелӕн йӕ бон уыд, ӕмӕ семӕ ма сразы уыдаид, зӕгъгӕ, хъуыддаг, мӕнӕй цы дзурынц, уый мидӕг нӕй, фӕлӕ чырыстӕттӕй чидӕртӕ нырма дӕр Моисейы закъоныл ӕнувыд кӕй сты, уый мидӕг. Фӕлӕ Павел архайдта уавӕртӕм гӕсгӕ ӕмӕ цӕттӕ уыд, хистӕр нӕлгоймӕгтӕ йын цыдӕриддӕр загътой, уый бакӕнынмӕ, цы йын аразын кодтой, уый-иу Хуыцауы уагӕвӕрдты ныхмӕ куы нӕ уыд, уӕд. Уый размӕ ахӕм ныхӕстӕ ныффыста: «Закъоны дӕлбар чи у, уыдонӕн сдӕн, цыма закъоны дӕлбар дӕн, афтӕ,– кӕд мӕхӕдӕг закъоны дӕлбар нӕ дӕн, уӕддӕр,– цӕмӕй чырыстон фӕндагыл слӕууынӕн баххуыс кӕнон, закъоны дӕлбар чи у, уыдонӕн» (1 Кор. 9:20). Ацы ныхӕстӕм гӕсгӕ Павел Иерусалимы хистӕр нӕлгоймӕгтӕм байхъуыста ӕмӕ сси, «цыма закъоны дӕлбар уыд, афтӕ». Ӕмӕ уымӕй махӕн дӕр у фӕзминаг, цӕмӕй не ’мбырды хистӕр нӕлгоймӕгтӕм хъусӕм ӕмӕ, нӕхимӕ растдӕр куыд кӕсы, ууыл-иу ма ныллӕууӕм (Дзут. 13:17).
(Хъуыддӕгтӕ 22:16) Уӕдӕ ма цы фӕстиат кӕныс? Сыст, донаргъуыд райс, йӕ номыл ын дӕ ныфс сӕвӕр, ӕмӕ дӕ тӕригъӕдтӕй ссыгъдӕг уыдзынӕ“.
nwtsty, уӕлӕмхасӕн ӕрмӕг Хъд 22:16 стихмӕ (фип.)
йӕ ном ын ссар, ӕмӕ дӕ тӕригъӕдтӕй ссыгъдӕг уыдзынӕ Адӕймаг йӕ тӕригъӕдтӕй ссыгъдӕг уыдзӕн, донаргъуыд куы райса, уӕд нӕ, фӕлӕ Чырыстийы ном куы ссара, уӕд. Адӕймаг Чырыстийы ном ссары, куы йыл баууӕнды ӕмӕ уый йӕ хъуыддӕгтӕй куы февдисы, уӕд (Хъд 10:43; Иак 2:14, 18).
Библийӕ бакӕсинаг
(Хъуыддӕгтӕ 21:1–19) Ӕппынфӕстаг сӕ куы фӕхицӕн стӕм, уӕд науыл сбадтыстӕм ӕмӕ аленк кодтам Космӕ. Иннӕ бон Косӕй ацыдыстӕм Родосмӕ, уырдыгӕй та – Патарӕмӕ. 2 Уым ссардтам, Финикимӕ чи цыд, ахӕм нау, сбадтыстӕм ыл ӕмӕ уырдыгӕй араст стӕм. 3 Сакъадах Кипрмӕ куы баввахс стӕм, уӕд ӕй галиуырдыгӕй фӕуагътам ӕмӕ дарддӕр ацыдыстӕм Сиримӕ. Бахӕццӕ стӕм Тирмӕ ӕмӕ уым рахызтыстӕм, уымӕн ӕмӕ ам хъуамӕ нау равдӕлон кодтаиккой. 4 Тиры ссардтам ахуыргӕнинӕгты ӕмӕ авд боны уым фестӕм. Уыдон, Хуыцауы сыгъдӕг тых сын цы раргом кодта, уымӕ гӕсгӕ Павелӕн дзырдтой, Иерусалиммӕ ма ацу, зӕгъгӕ. 5 Авд боны фӕстӕ уырдыгӕй рацыдыстӕм ӕмӕ нӕ фӕндаг адарддӕр кодтам. Ӕмӕ нӕ се ’ппӕт дӕр, сылгоймӕгтимӕ ӕмӕ сывӕллӕттимӕ, суанг денджызы былмӕ ахизын кодтой. Денджызы былмӕ куы бахӕццӕ стӕм, уӕд нӕ зонгуытыл ӕрлӕууыдыстӕм ӕмӕ скуывтам. 6 Стӕй кӕрӕдзийӕн хӕрзбон загътам, ӕмӕ мах науыл сбадтыстӕм, уыдон та сӕ хӕдзӕрттӕм аздӕхтысты. 7 Тирӕй науыл ӕрцыдыстӕм Птолемаидӕмӕ. Уым фембӕлдыстӕм ӕфсымӕртимӕ ӕмӕ сӕм иу бон баззадыстӕм. 8 Иннӕ бон нӕ фӕндаг адарддӕр кодтам ӕмӕ ӕрцыдыстӕм Кесаримӕ. Кесарийы бацыдыстӕм авд ӕвзӕрст лӕгӕй сӕ иумӕ – хорз хабар хъусынгӕнӕг Филиппмӕ, ӕмӕ уымӕ ӕрлӕууыдыстӕм. 9 Филиппӕн уыди цыппар чызджы, уыдон пехуымпариуӕг кодтой. 10 Цасдӕр сӕм куы фестӕм, уӕд Иудейӕйӕ ӕрцыд иу пехуымпар, Агав, зӕгъгӕ, 11 ӕмӕ нӕм бацыд, Павелы рон райста, йӕ къӕхтӕ ӕмӕ дзы йӕ къухтӕ сбаста ӕмӕ загъта: «Афтӕ зӕгъы сыгъдӕг тых: „Ацы рон кӕй у, уыцы лӕджы дзуттӕгтӕ Иерусалимы раст афтӕ сбӕтдзысты ӕмӕ йӕ иннӕ адӕмты къухтӕм ратдзысты“». 12 Уый куы фехъуыстам, уӕд нӕхӕдӕг дӕр ӕмӕ, уым чи уыди, уыдон дӕр Павелӕн лӕгъстӕ кӕнын байдыдтам, зӕгъгӕ, ма ацу Иерусалиммӕ. 13 Фӕлӕ нын Павел загъта: «Уый цы кусут? Цӕуыл кӕут ӕмӕ мын мӕ ныфс цӕмӕн сӕттут? Ӕз цӕттӕ дӕн, цӕмӕй мӕ Чырыстийы номы тыххӕй Иерусалимы бӕтгӕ нӕ, фӕлӕ маргӕ дӕр акӕной». 14 Куы нӕ йӕ басастам, уӕд ын ницыуал дзырдтам ӕмӕ загътам: «Йегъовӕйы куыд фӕнды, афтӕ уӕд». 15 Уыцы хабӕртты фӕстӕ нӕхи фӕндагмӕ срӕвдз кодтам ӕмӕ Иерусалиммӕ араст стӕм. 16 Немӕ ма рацыд цалдӕр ахуыргӕнинаджы Кесарийӕ, цӕмӕй нӕ фӕхӕццӕ кодтаиккой, кӕй хӕдзары хъуамӕ ӕрфысым кодтаиккам, уымӕ – кипраг Мнасонмӕ, фыццаг ахуыргӕнинӕгтӕй сӕ иумӕ. 17 Иерусалиммӕ куы бахӕццӕ стӕм, уӕд ныл ӕфсымӕртӕ тынг бацин кодтой. 18 Дыккаг бон та Павел немӕ бацыд Иаковмӕ. Уым ӕрӕмбырд сты хистӕр нӕлгоймӕгтӕ иууылдӕр. 19 Павел сын салам радта ӕмӕ сын лӕмбынӕг дзурын райдыдта, Хуыцау йӕ лӕггады фӕрцы иннӕ адӕмты ’хсӕн цы хъуыддӕгтӕ сарӕзта, уый тыххӕй.
14–20 ЯНВАРЫ
ХУЫЦАУЫ НЫХАСЫ ХӔЗНАТӔ | ХЪУЫДДӔГТӔ 23, 24
«Дзуттӕгтӕ Павелы фӕаххосджын кодтой, зӕгъгӕ, хӕцгӕ низӕй уӕлдай нӕу ӕмӕ адӕмы змӕнты»
(Хъуыддӕгтӕ 23:12) Куы сбон, уӕд дзуттӕгтӕ сусӕгвӕнд скодтой ӕмӕ расомы кодтой, зӕгъгӕ, цалынмӕ Павелы нӕ амарӕм, уӕдмӕ нӕдӕр хӕргӕ бакӕндзыстӕм, нӕдӕр нуазгӕ.
(Хъуыддӕгтӕ 23:16) Фӕлӕ сын сӕ сусӕгвӕнды тыххӕй фехъуыста Павелӕн йӕ хойы лӕппу. Ӕмӕ ӕфсӕддонты хӕдзармӕ бацыд ӕмӕ йӕ Павелӕн радзырдта.
«Фидар лӕуу!»
5 Йесо Павелы бафидар кодта раст йӕ афоныл. Иннӕ бон дзуттӕгтӕ – 40 адӕймагӕй фылдӕр – «сусӕгвӕнд скодтой ӕмӕ расомы кодтой, зӕгъгӕ, цалынмӕ Павелы нӕ амарӕм, уӕдмӕ нӕдӕр хӕргӕ бакӕндзыстӕм, нӕдӕр нуазгӕ». Кӕй «расомы кодтой», уымӕй зыны, апостолы цыфӕндыйӕ дӕр кӕй хъавыдысты амарынмӕ. Афтӕ хъуыды кодтой, ӕмӕ сын сӕ сусӕгвӕндӕй куы ницы рауайа, уӕд сӕ ӕлгъыст, кӕнӕ исты бӕллӕх, баййафдзӕн (Хъуыд. 23:12–15). Сӕ фӕнд уыд ахӕм: хъуамӕ Павелы фӕстӕмӕ Синедрионмӕ ӕрбакӕнын кодтаиккой, цыма сӕ хъуыддаг бӕлвырддӕр равзарын фӕндыд, уыйау, фӕлӕ фӕндагыл хъуамӕ йӕ размӕ бабадтаиккой ӕмӕ йӕ амардтаиккой. Уыцы сусӕгвӕндыл сӕ къух бафыстой сауджынты хистӕртӕ ӕмӕ хистӕр лӕгтӕ дӕр.
6 Фӕлӕ уыцы сусӕгвӕнды тыххӕй фехъуыста Павелӕн йӕ хойы лӕппу ӕмӕ йӕ Павелӕн радзырдта. Павел та йын бафӕдзӕхста, цӕмӕй уый тыххӕй ромаг ӕфсады сӕргълӕууӕг Клавдий Лисийӕн фӕхабар кодтаид (Хъуыд. 23:16–22). Йегъовӕйӕн тынг зынаргъ сты, ацы лӕппуйау, йӕ ном дӕр кӕмӕн нӕ зонӕм, уыйау, иузӕрдион ӕмӕ хъӕбатыр чи у, уыцы ӕрыгӕттӕ. Уыдон сӕхицӕй фылдӕр тыхсынц Хуыцауы адӕмыл ӕмӕ, сӕ бон цыдӕриддӕр у, уый аразынц, цӕмӕй хъусын кӕныны хъуыддаг размӕ цӕуа.
(Хъуыддӕгтӕ 24:2) Тертуллӕн дзурыны бар куы радтой, уӕд райдыдта Павелы аххосджын кӕнын ӕмӕ загъта: «Цытджын Феликс, дӕ фӕрцы фӕрнӕй ӕмӕ сабырӕй цӕрӕм, ӕмӕ дӕ зондджын разамынды руаджы ацы адӕмы ’хсӕн ивындзинӕдтӕ цӕуы,
(Хъуыддӕгтӕ 24:5, 6) Мах ӕй базыдтам, ацы лӕг хӕцгӕ низӕй уӕлдай кӕй нӕу, ӕгас дунейы дзуттӕгты кӕй змӕнты ӕмӕ кӕй у назаретӕгты сектӕйы хистӕр. 6 Уый ма хъавыд кувӕндонӕй фӕхынджылӕг кӕнынмӕ дӕр, фӕлӕ йӕ мах ӕрцахстам.
«Фидар лӕуу!»
10 Павелы Кесарийы «Ироды галуаны бакодтой ӕмӕ йӕ хъахъхъӕдтой», цалынмӕ, чи йӕ аххосджын кодта, уыдон Иерусалимӕй не ’рцыдысты, уӕдмӕ (Хъуыд. 23:35). Фондз боны фӕстӕ уыдон дӕр ӕрхӕццӕ сты. Уыдон уыдысты хистӕр сауджын Анани, дзырдарӕхст лӕг Тертулл ӕмӕ цалдӕр хистӕр лӕджы. Фыццаг уал Тертулл Феликсӕй раппӕлыд, дзуттӕгтӕн цы хорздзинӕдтӕ сарӕзта, уый тыххӕй – ӕвӕццӕгӕн ӕй фӕндыд хицауы зӕрдӕ балхӕнын. Уый фӕстӕ, цы хъуыддаджы фӕдыл ӕрӕмбырд сты, уымӕ рахызт. Ӕмӕ Павелы тыххӕй загъта, зӕгъгӕ, «мах ӕй базыдтам, ацы лӕг хӕцгӕ низӕй уӕлдай кӕй нӕу, ӕгас дунейы дзуттӕгты кӕй змӕнты ӕмӕ кӕй у назаретӕгты сектӕйы хистӕр. Уый ма хъавыд кувӕндонӕй фӕхынджылӕг кӕнынмӕ дӕр, фӕлӕ йӕ мах ӕрцахстам». Тертулл ацы ныхӕстӕ куы загъта, уӕд иннӕ дзуттӕгтӕ дӕр Павелы «ныхмӕ дзурын байдыдтой, ӕцӕгдӕр афтӕ уыди, зӕгъгӕ» (Хъуыд. 24:5, 6, 9). Ахӕм хъуыддӕгты йӕ кӕй фӕаххосджын кодтой, зӕгъгӕ, адӕмы змӕнты, тӕссаг сектӕйы хистӕр у ӕмӕ кувӕндонӕй фӕхынджылӕг кодта, уый тыххӕй йын мӕлӕты тӕрхон дӕр рахастаиккой, уымӕн ӕмӕ ахӕм хъуыддӕгтӕ стыр фыдракӕндтыл нымад уыдысты.
(Хъуыддӕгтӕ 24:10–21) Ӕмӕ Павел, бӕстӕйы хицау йӕ сӕр куы батылдта, дзур, зӕгъгӕ, уӕд загъта: «Ӕз зонын, ды ацы адӕмӕн бирӕ азты дӕргъы кӕй уыдтӕ тӕрхонгӕнӕг, ӕмӕ уымӕ гӕсгӕ мӕхи сӕрыл ӕхсызгонӕй дзурдзынӕн. 11 Дӕхи бон дӕр ӕй у базонын, ӕз Иерусалиммӕ кувынмӕ куы ссыдтӕн, уӕдӕй дыууадӕс бонӕй фылдӕр кӕй нӕ рацыди, 12 ӕмӕ мӕ нӕдӕр кувӕндоны искӕимӕ быцӕугӕнгӕйӕ федтой, нӕдӕр адӕмы змӕнтгӕйӕ, ӕмбырдгӕнӕнты уа ӕви горӕты. 13 Ӕмӕ мӕ ныртӕккӕ цӕмӕй аххосджын кӕнынц, уый дӕр сӕ бон ницӕмӕй у сбӕлвырд кӕнын. 14 Фӕлӕ дын уый ӕргом зӕгъдзынӕн, ӕмӕ адон „сектӕ“ кӕй хонынц, уыцы фӕндагыл лӕуд кӕй дӕн, ӕмӕ афтӕмӕй лӕггад кӕнын мӕ фыдӕлты Хуыцауӕн, уымӕн ӕмӕ ӕз ӕууӕндын, Закъон цы дзуры ӕмӕ Пехуымпарты чингуыты цы фыст ис, ӕппӕт уыдӕттыл. 15 Ӕмӕ ӕз мӕ ныфс дарын Хуыцауыл, адон сӕхӕдӕг дӕр сӕ ныфс куыд дарынц, афтӕ, кӕй райгас уыдзысты рӕстгӕнджытӕ дӕр ӕмӕ фыдгӕнджытӕ дӕр. 16 Уымӕ гӕсгӕ ӕз ӕдзухдӕр архайын, цӕмӕй Хуыцауы раз дӕр ӕмӕ адӕмы раз дӕр мӕ цӕсгом сыгъдӕг уа. 17 Иерусалиммӕ ӕз бирӕ азты фӕстӕ ӕрцыдтӕн, цӕмӕй мӕ адӕмӕн ӕхцайӕ баххуыс кодтаин ӕмӕ Хуыцауӕн нывӕндтӕ ӕрхастаин. 18 Ӕмӕ мӕ кувӕндоны баййӕфтой, Закъонмӕ гӕсгӕ мӕхи куы ссыгъдӕг кодтон, уӕд. Ӕмӕ дзы бирӕ адӕм дӕр нӕ уыди, стӕй змӕнтгӕ дӕр ничи кодта. Уыди дзы ӕрмӕст цалдӕр дзуттаджы Азийӕ, 19 ӕмӕ сӕм кӕд мӕ ныхмӕ исты ис, уӕд хъуамӕ дӕ разы лӕууиккой ӕмӕ мӕ аххосджын кӕниккой. 20 Кӕнӕ, ам чи ис, уыдон зӕгъӕнт, Сӕйраг тӕрхондоны раз куы лӕууыдтӕн, уӕд мӕм цавӕр аххос ссардтой. 21 Кӕд ӕрмӕст уый у мӕ аххос, ӕмӕ тӕрхондоны афтӕ загътон: „Абон мын уӕ разы тӕрхон кӕнынц, мӕрдтӕ кӕй райгас уыдзысты, уый мӕ кӕй уырны, уый тыххӕй!“».
«Фидар лӕуу!»
13 Павел нын диссаджы цӕвиттон ныууагъта. Хуыцауӕн кӕй лӕггад кӕнӕм, уый тыххӕй нӕ хицӕутты раз куы ӕрлӕууын кӕной ӕмӕ нӕ ахӕм хъуыддӕгты куы аххосджын кӕной, зӕгъгӕ, адӕмы змӕнтӕм, хицауады ныхмӕ сӕ ардауӕм кӕнӕ та «тӕссаг сектӕйӕ» стӕм, уӕд махӕн дӕр нӕ бон у Павелау архайын. Павел Тертуллау бӕстӕйы хицауы зӕрдӕ балхӕныныл нӕ архайдта. Уый ныхас кодта сабырӕй ӕмӕ уӕзданӕй. Цы зӕгъдзӕн, ууыл лӕмбынӕг хъуыды кодта ӕмӕ хабӕрттӕ ӕмбарын кодта бӕлвырдӕй, стӕй, куыд уыдысты, афтӕ. Павел загъта, Азийӕ чи уыд ӕмӕ йӕ чи аххосджын кодта, кувӕндонӕй фӕхынджылӕг кодта, зӕгъгӕ, уыцы дзуттӕгтӕй уым кӕй ничи уыд, ӕмӕ закъонмӕ гӕсгӕ та хъуамӕ йӕ разы лӕууыдаиккой ӕмӕ йӕ цы хъуыддӕгты аххосджын кодтой, уыдонмӕ хъуамӕ йӕхӕдӕг байхъуыстаид (Хъуыд. 24:18, 19).
14 Сӕйраджыдӕр та зӕгъын хъӕуы уый, ӕмӕ Павел фидарӕй дзырдта, цӕуыл ӕууӕндыд, уый тыххӕй. Ногӕй та хъӕбатырӕй загъта, мӕрдтӕ кӕй райгас уыдзысты, уый йӕ фидарӕй кӕй уырны, кӕд уый размӕ, Синедрионы раз куы лӕууыд, уӕд адӕм раст уый тыххӕй сызмӕстой, уӕддӕр (Хъуыд. 23:6–10). Павел йӕхи сӕрыл кӕй разы дзырдта, уыдонӕн сӕ хъус уӕлдай тынгдӕр цӕмӕн ӕрдардта, мӕрдтӕ кӕй райгас уыдзысты, уымӕ? Уымӕн ӕмӕ Павел хъусын кодта Йесойы тыххӕй ӕмӕ, мӕрдтӕй кӕй райгас, уый тыххӕй. Ӕмӕ йӕ ныхмӕлӕуджыты та уый нӕ уырныдта (Хъуыд. 26:6–8, 22, 23). Уӕдӕ дзырд сӕйраджыдӕр ууыл цыди, ӕмӕ мӕрдтӕ райгас уой, уымӕн гӕнӕн ис ӕви нӕ, бӕлвырдӕй та – Йесойӕн йӕхиуыл ӕмӕ кӕй райгас, ууыл ӕууӕндӕн ис ӕви нӕ.
Цавӕр хӕзнатӕ ссардтай?
(Хъуыддӕгтӕ 23:6) Павел уый куы бамбӕрста, ӕмӕ Сӕйраг тӕрхондонӕн йӕ иу хай саддукейтӕ сты, иннӕ хай та – фарисейтӕ, уӕд сын хъӕрӕй загъта: «Ӕфсымӕртӕ, ӕз дӕн фарисей, фарисейты фырт! Ӕмӕ мын тӕрхон кӕнынц, мӕрдтӕ кӕй райгас уыдзысты, уый мӕ кӕй уырны, уый тыххӕй!»
nwtsty, уӕлӕмхасӕн ӕрмӕг Хъд 23:6 стихмӕ
ӕз дӕн фарисей Павел кӕимӕ ныхас кодта, уыдонӕй йӕ иуӕй-иутӕ зыдтой (Хъд 22:5). Павел йӕхи фарисейы фырт куы схуыдта, уӕд Синедрионы фарисейтӕ бамбӕрстой, Павел йӕ раздӕры царды кой кӕй кодта, уымӕн ӕмӕ ныр сси зынгзӕрдӕ чырыстон. Йӕ диныл йӕ къух систаид, ууыл хъуыды дӕр нӕ кодта. Уӕдӕ йӕ ныхӕстӕ куыд ӕмбаргӕ сты? Павел йӕхи фарисей уымӕн схуыдта, ӕмӕ уыдон саддукейтӕй уӕлдай райгасдзинадыл ӕууӕндыдысты. Афтӕмӕй равдыста, иумӕйагӕй сын цыдӕр кӕй уыд. Ӕвӕццӕгӕн ӕй ныфс уыд, уыцы фарстайыл ныхас кӕнын куы райдайа, уӕд Синедрионы тӕрхонгӕнджытӕй иуӕй-иутӕ йӕ фарс кӕй уыдзысты. Ӕмӕ хабар ӕцӕгдӕр афтӕ рауад (Хъд 23:7–9). Хъд 23:6 стихӕй бӕрӕг у, Павел кӕй нӕ сусӕг кодта, чи уыд, уый, фӕстӕдӕр йӕхи сӕрыл паддзах Ирод Агриппӕйы раз куы дзырдта, уӕд дӕр (Хъд 26:5). Ромы куы уыд ӕмӕ йе ’мчырыстӕттӕм Филипптӕм куы фыста, уӕд дӕр та сӕм ныффыста, фарисей кӕй уыд, уый тыххӕй (Фп 3:5). Хъд 15:5 стихӕй дӕр зыны, чырыстон чи сси, уыдонӕй чидӕртӕ фарисейтӕ кӕй уыдысты.
(Хъуыддӕгтӕ 24:24) Цалдӕр боны фӕстӕ Феликс ӕрбацыд йӕ ус Друзиллӕимӕ,– Друзиллӕ уыди дзуттаг. Ӕмӕ Павелы ӕрбакӕнын кодта ӕмӕ хъуыста, Йесо Чырыстийыл ӕууӕндыны тыххӕй йын цы дзырдта, уымӕ.
(Хъуыддӕгтӕ 24:27) Фӕлӕ рацыд дыууӕ азы, ӕмӕ Феликсы раивта Порций Фест. Феликсы та дзуттӕгты зӕрдӕ балхӕнын кӕй фӕндыд, уымӕ гӕсгӕ Павелы ахӕстоны ныууагъта.
nwtsty, уӕлӕмхасӕн ӕрмӕг Хъд 24:24 стихмӕ
Друзиллӕ уыди, Хъд 12:1 стихы цы Ироды кой ис, ома Ирод Агриппӕ Фыццаджы, ӕртӕ чызгӕй ӕппӕты кӕстӕр. Райгуырд нӕ эрӕйы 38 азмӕ ’ввахс ӕмӕ уыд Ирод Агриппӕ Дыккаджы, Вереникӕ ӕмӕ Мариамнӕ Ӕртыккаджы хо. Паддзах Феликс уыд йӕ дыккаг лӕг. Йӕ фыццаг лӕг уыд Азиз – сириаг горӕт Эмесы паддзах. Фӕлӕ дзы ахицӕн ӕмӕ нӕ эрӕйы 54 азмӕ ’ввахс, 16 азы бӕрц ыл куы цыд, уӕд Феликсмӕ смой кодта. Павел Феликсы раз куы лӕууыд ӕмӕ, «рӕстӕй цӕрыны, хиуыл хӕцыны ӕмӕ ӕрцӕуинаг тӕрхоны тыххӕй» куы дзырдта, уӕд, чи зоны, Друзиллӕ дӕр уыцы ныхӕстӕ фехъуыста (Хъд 24:25). Феликс паддзахы бартӕ Фестӕн куы радта, уӕд Феликс Павелы ахӕстоны ныууагъта, «дзуттӕгты зӕрдӕ балхӕнын ӕй кӕй фӕндыд», уый тыххӕй. Иуӕй-иуты хъуыдымӕ гӕсгӕ, афтӕ уымӕн бакодта, ӕмӕ йӕ фӕндыд йе ’рыгон усы зӕрдӕ балхӕнын, дзуттаг кӕй уыд, уымӕ гӕсгӕ (Хъд 24:27).
Библийӕ бакӕсинаг
(Хъуыддӕгтӕ 23:1–15) Павел йе ’ргом аздӕхта Сӕйраг тӕрхондоны лӕгтӕм ӕмӕ загъта: «Ӕфсымӕртӕ, мӕ цард абоны онг куыд ӕрвыстон, уымӕй мыл Хуыцауы раз мӕ зӕрдӕ ницӕмӕй худы». 2 Хистӕр сауджын Анани уый куы фехъуыста, уӕд, йӕ фарсмӕ чи лӕууыд, уыдонӕн бардзырд радта, йӕ былтӕ йын цӕвут, зӕгъгӕ. 3 Уӕд ын Павел загъта: «Хуыцау дӕ цӕвдзӕн, чъырӕйцагъд къул! Ам уый тыххӕй бадыс, цӕмӕй мын Закъонмӕ гӕсгӕ тӕрхон кӕнай, ӕмӕ афтӕмӕй та Закъоны сӕрты хизыс ӕмӕ мӕ нӕмын кӕныс?» 4 Йӕ фарсмӕ чи лӕууыд, уыдон ын загътой: «Хуыцауы хистӕр сауджыны ӕфхӕрыс?!» 5 Уӕд Павел загъта: «Ӕфсымӕртӕ, хистӕр сауджын у, уый нӕ зыдтон, уымӕн ӕмӕ афтӕ фыст у: „Дӕ адӕмы сӕргъы чи лӕууы, уыдоны ма фау“». 6 Павел уый куы бамбӕрста, ӕмӕ Сӕйраг тӕрхондонӕн йӕ иу хай саддукейтӕ сты, иннӕ хай та – фарисейтӕ, уӕд сын хъӕрӕй загъта: «Ӕфсымӕртӕ, ӕз дӕн фарисей, фарисейты фырт! Ӕмӕ мын тӕрхон кӕнынц, мӕрдтӕ кӕй райгас уыдзысты, уый мӕ кӕй уырны, уый тыххӕй!» 7 Афтӕ куы загъта, уӕд фарисейтӕ ӕмӕ саддукейтӕ фӕбыцӕу сты, ӕмӕ дыууӕ дихы фесты. 8 Уымӕн ӕмӕ саддукейтӕ дзурынц, мӕрдтӕ, дам, нӕ райгас уыдзысты, стӕй, дам, нӕдӕр зӕдтӕ ис, нӕдӕр ӕнӕуынгӕ тыхтӕ. Фарисейтӕ та ӕппӕт уыдӕттыл ӕууӕндынц. 9 Гъемӕ бӕстӕ хъӕр-хъӕлӕба сси, ӕмӕ, фарисейты къордӕй чи уыд, уыцы чиныджыдӕснытӕй чидӕртӕ сыстадысты ӕмӕ фидар ныллӕууыдысты: «Мах ацы лӕгмӕ ӕвзӕрӕй ницы уынӕм. Уӕдта ма йемӕ ӕнӕуынгӕ тых кӕнӕ зӕд дзырдта...». 10 Ӕмӕ хъӕлӕба куы стынг, уӕд ӕфсады сӕргълӕууӕг фӕтарст, Павелы куы акъабӕзтӕ кӕной, ӕмӕ ӕфсӕддонтӕн бардзырд радта, зӕгъгӕ, ныххизут, сӕ къухтӕй йӕ байсут ӕмӕ йӕ ӕфсӕддонты хӕдзармӕ акӕнут. 11 Уыцы ӕхсӕв Павелмӕ фӕзынд Хицау ӕмӕ йын загъта: «Фидар лӕуу! Мӕн тыххӕй Иерусалимы куыд бӕстон хъусын кодтай, афтӕ хъуамӕ хъусын кӕнай Ромы дӕр». 12 Куы сбон, уӕд дзуттӕгтӕ сусӕгвӕнд скодтой ӕмӕ расомы кодтой, зӕгъгӕ, цалынмӕ Павелы нӕ амарӕм, уӕдмӕ нӕдӕр хӕргӕ бакӕндзыстӕм, нӕдӕр нуазгӕ. 13 Чи расомы кодта, уыдон уыдысты цыппор лӕгӕй фылдӕр. 14 Уыцы лӕгтӕ бацыдысты сауджынты хистӕртӕм ӕмӕ хистӕр лӕгтӕм ӕмӕ сын загътой: «Мах расомы кодтам, цалынмӕ Павелы нӕ амарӕм, уӕдмӕ нӕхи хӕринаджы хъӕстӕ кӕй нӕ фӕкӕндзыстӕм. 15 Уӕдӕ сымах Сӕйраг тӕрхондонимӕ иумӕ ӕфсады сӕргълӕууӕгӕн зӕгъут, цӕмӕй уӕм Павелы ӕркӕна, цыма уӕ йӕ хъуыддаг бӕстондӕр равзарын фӕнды, афтӕ. Мах та цӕттӕйӕ лӕудзыстӕм ӕмӕ уӕм нӕма бахӕццӕ уыдзӕн, афтӕ йӕ амардзыстӕм».
21–27 ЯНВАРЫ
ХУЫЦАУЫ НЫХАСЫ ХӔЗНАТӔ | ХЪУЫДДӔГТӔ 25, 26
«Апостол Павел ӕрдомдта Ромы паддзахы тӕрхон ӕмӕ уый фӕстӕ Ирод Агриппӕйӕн хорз хабар хъусын кодта»
(Хъуыддӕгтӕ 25:11) Кӕд ӕз ӕцӕгдӕр фыдгӕнӕг дӕн ӕмӕ мын мӕлӕты тӕрхон цӕй тыххӕй рахӕссой, ахӕмӕй исты сарӕзтон, уӕд разы дӕн мӕлӕтыл. Фӕлӕ кӕд, ацы адӕм мӕ ныхмӕ цытӕ дзурынц, уыдӕттӕ ӕцӕг не сты, уӕд никӕмӕн ис уый бар, ӕмӕ мӕ сӕ къухмӕ ратта. Ӕз домын Ромы паддзахы тӕрхон!»
«Ӕз домын Ромы паддзахы тӕрхон!»
6 Зӕгъгӕ, Фест дзуттӕгтӕм байхъуыста, уӕд Павелмӕ ӕнӕмӕнгдӕр ӕнхъӕлмӕ каст мӕлӕт. Ӕмӕ Павел дӕр спайда кодта, ромаг кӕй уыд, уымӕ гӕсгӕ йын цы бартӕ уыди, уыдонӕй. Фестӕн загъта: «Ӕз лӕууын Ромы паддзахы тӕрхоны бадӕны раз, ӕмӕ мын тӕрхон дӕр ам хъуамӕ кӕной. Ӕз дзуттӕгтӕн ӕвзӕрӕй ницы сарӕзтон, ӕмӕ уый дӕхӕдӕг дӕр хорз зоныс... Ӕз домын Ромы паддзахы тӕрхон!» Адӕймаг-иу Ромы паддзахы тӕрхон куы ’рдомдта, уӕд-иу хъуыддаг фӕивӕн нал уыди. Ӕмӕ ууыл дзурӕг сты Фесты ныхӕстӕ дӕр: «Ромы паддзахы тӕрхон домыс, ӕмӕ Ромы паддзахмӕ ацӕудзынӕ» (Хъуыд. 25:10–12). Павел уӕлдӕр хицауы тӕрхон кӕй ӕрдомдта, уымӕй абоны ӕцӕг чырыстӕттӕн равдыста, куыд хъуамӕ архайой, уый. Йегъовӕйы Ӕвдисӕнты ныхмӕ «закъоны фӕрцы фыдхъуыддӕгтӕ аразынвӕнд» куы фӕкӕнынц, уӕд уыдон дӕр спайда кӕнынц, хорз хабары сӕрыл тох кӕнгӕйӕ сын закъонмӕ гӕсгӕ цы бартӕ ис, уыдонӕй (Пс. 94:20).
(Хъуыддӕгтӕ 26:1–3) Агриппӕ Павелӕн загъта: «Дӕ бон у дӕ сӕрыл дзурын». Уӕд Павел йӕ къух размӕ радардта ӕмӕ дзурын райдыдта: 2 «Паддзах Агриппӕ, дзуттӕгтӕ мӕ цӕмӕй аххосджын кӕнынц, ӕппӕт уыдӕтты тыххӕй абон мӕ сӕрыл дӕ разы кӕй дзурдзынӕн, уый тыххӕй ӕз мӕхи амондджын хонын, 3 уӕлдайдӕр та уымӕн, ӕмӕ ды хорз зоныс дзуттӕгты ӕгъдӕуттӕ ӕмӕ, цӕуыл быцӕу кӕнынц, уыдӕттӕ иууылдӕр. Уымӕ гӕсгӕ дӕ курын, байхъус мӕм».
«Ӕз домын Ромы паддзахы тӕрхон!»
10 Павел паддзах Агриппӕимӕ ныхас кодта уӕзданӕй. Загъта йын, зӕгъгӕ, ды зоныс дзуттӕгты ӕгъдӕуттӕ ӕмӕ, цӕуыл быцӕу кӕнынц, уыдӕттӕ иууылдӕр, ӕмӕ уымӕ гӕсгӕ бузныг дӕн, мӕ бон кӕй у мӕхи сӕрыл дӕ разы дзурын. Ӕмӕ йын уый фӕстӕ радзырдта, раздӕр куыд цард, уый тыххӕй: «Ӕз... уыдтӕн фарисей ӕмӕ нӕ дины тӕккӕ карздӕр къорды ахуырӕдтӕм гӕсгӕ... цардтӕн» (Хъуыд. 26:5). Павел раздӕр фарисей кӕй уыди, уымӕ гӕсгӕ ӕнхъӕлмӕ каст Мессийӕйы ӕрцыдмӕ. Ныр та сси чырыстон, ӕмӕ хъӕбатырӕй дзырдта, дзуттӕгтӕ рагӕй кӕмӕ ӕнхъӕлмӕ кастысты, уыцы Мессийӕ Йесо Чырысти кӕй у. Уый дӕр ӕууӕндыд, йӕ ныхмӕлӕуджытӕ цӕуыл ӕууӕндыдысты, ууыл – Хуыцау йӕ фыдӕлтӕн зӕрдӕ цӕмӕй бавӕрдта, уый кӕй сӕххӕст уыдзӕн. Ӕмӕ уыцы бон растдӕр уый тыххӕй лӕууыд тӕрхоны раз. Агриппӕ уыдӕттӕ куы фехъуыста, уӕд ноджы тынгдӕр бацымыдис, цымӕ ацы лӕг дарддӕр та цы зӕгъдзӕн, зӕгъгӕ.
11 Павел, раздӕр чырыстӕтты куыд ӕгъатырӕй ӕфхӕрдта, уый тыххӕй загъта: «Раст зӕгъгӕйӕ, ӕз дӕр афтӕ хъуыды кодтон, ӕмӕ мӕ тых, мӕ бонӕй кӕй хъуамӕ тох кӕнон назаретаг Йесойы ныхмӕ. [...] Мӕ маст сӕм [ома Чырыстийы фӕдылдзӕуджытӕм] афтӕ тынг фыхти, ӕмӕ сӕ фӕдыл зылдтӕн ӕндӕр горӕтты дӕр» (Хъуыд. 26:9–11). Павел, ӕцӕг цы хабӕрттӕ ӕрцыд, уыдонӕй уӕлдай ницы загъта. Чырыстӕттӕн цы фыдмитӕ кодта, уый тыххӕй бирӕтӕ зыдтой (Гал. 1:13, 23). Ӕмӕ уӕдӕ Агриппӕмӕ фарста куыннӕ фӕзындаид, ахӕм адӕймаг куыд фӕивта, зӕгъгӕ.
12 Агриппӕ йӕ фарстайӕн дзуапп базыдта, Павел дарддӕр цы загъта, уымӕй: «[Ӕз] араст дӕн Дамаскмӕ, сауджынты хистӕртӕ мын радтой ӕппӕт бартӕ дӕр. Ӕмӕ ӕмбисбон, о паддзах, ӕз фӕндагыл федтон хуры рухсӕй ирддӕр рухс – уыцы рухсӕй мӕн ӕмӕ ме ’мбӕлтты алыварс ныррухс. Иууылдӕр зӕххыл ӕрхаудтам, ӕмӕ ӕз фехъуыстон хъӕлӕс, дзырдта мӕм дзуттагау: „Савл, Савл, цӕмӕн зилыс мӕ фӕдыл? Зын дын у цыргъ хъилы ныхмӕ бырсын!“ Уӕд ӕй ӕз бафарстон: „Чи дӕ, мӕ буц хицау?“ Уый мын загъта: „Ӕз дӕн Йесо, ды кӕй фӕдыл зилыс, уый“» (Хъуыд. 26:12–15).
13 Цалынмӕ Павелмӕ цӕстылуайӕны Йесо нӕ фӕзынд, уӕдмӕ, зӕгъӕн ис, ӕмӕ бырста «цыргъ хъилы ныхмӕ». Зӕгъӕм, гал кӕнӕ-иу хӕрӕг, фос кӕмӕй тардтой, ахӕм цыргъ хъилы ныхмӕ куы цыдаид, уӕд йӕхицӕн зиан кодтаид. Раст афтӕ Павел дӕр, Хуыцауы фӕндоны ныхмӕ кӕй цыди, уымӕй йӕхицӕн ӕвзӕрдӕр кодта – йӕхи дард кодта Хуыцауӕй. Павел Хуыцауыл ӕнувыд уыди, ӕрмӕст, куыд ын лӕггад кӕнын хъӕуы, уый раст не ’мбӕрста. Фӕлӕ Дамаскмӕ куы фӕцӕйцыд, уӕд ӕм фӕзынд, чи райгас, уыцы Йесо, ӕмӕ уый фӕрцы йӕ зондахаст аивта (Иоан. 16:1, 2).
14 Павел йӕ царды ӕцӕгдӕр стыр ивындзинӕдтӕ скодта. Агриппӕйы раз лӕугӕйӕ загъта: «Ӕз бакодтон, уӕларвӕй чи уыд, уыцы цӕстылуайӕны цы фехъуыстон, уымӕ гӕсгӕ. Ӕмӕ уыцы хабар хъусын кодтон фыццаг Дамаскы, уый фӕстӕ Иерусалимы ӕмӕ ӕгас Иудейӕйы, стӕй иннӕ адӕмтӕн, цӕмӕй ӕрфӕсмон кӕной, Хуыцаумӕ раздӕхой ӕмӕ, кӕй ӕрфӕсмон кодтой, уый хъуыддагӕй равдисой» (Хъуыд. 26:19, 20). Павел бирӕ азты дӕргъы ӕххӕст кодта, Йесо Чырысти йӕм ӕмбисбон цӕстылуайӕны куы фӕзынд, уӕд ын цы хъуыддаг бахӕс кодта, уый. Ӕмӕ уый цавӕр хорз хъуыддӕгтӕм ӕркодта? Павел цы хорз хабар хъусын кодта, уымӕ-иу чи байхъуыста, уыдон-иу се ’нӕгъдау цард ӕмӕ сӕ фӕлывд митӕ ныууагътой ӕмӕ-иу Хуыцаумӕ раздӕхтысты. Уыдон-иу систы хорз адӕймӕгтӕ ӕмӕ закъонӕн аргъ кодтой ӕмӕ хицӕутты ныхмӕ никуы цыдысты.
15 Фӕлӕ уыдӕттӕ, Павелы ныхмӕ чи цыд, уыцы дзуттӕгтӕм нымады дӕр нӕ уыдысты. Павел загъта: «Уый тыххӕй [мӕ] ӕрцахстой дзуттӕгтӕ кувӕндоны ӕмӕ мӕ хъавыдысты амарынмӕ. Фӕлӕ мын Хуыцау баххуыс кодта, ӕмӕ уый фӕрцы абоны онг дӕр хъусын кӕнын хорз хабар хуымӕтӕг адӕмӕн дӕр ӕмӕ номдзыд адӕмӕн дӕр» (Хъуыд. 26:21, 22).
16 Ӕцӕг чырыстӕттӕ кӕй стӕм, уымӕ гӕсгӕ хъуамӕ «алкӕддӕр цӕттӕ уӕм» нӕ уырнындзинады сӕрыл дзурынмӕ (1 Пет. 3:15). Цӕуыл ӕууӕндӕм, уый тыххӕй тӕрхонгӕнджытимӕ ӕмӕ хицӕуттимӕ куы ныхас кӕнӕм, уӕд махӕн дӕр нӕ бон у, Павел Агриппӕимӕ ӕмӕ Фестимӕ ныхас кӕнгӕйӕ куыд бакодта, афтӕ бакӕнын. Рӕстдзинад кӕй базыдтам, уый фӕрцы нӕхи цард дӕр ӕмӕ, хорз хабармӕ чи байхъуыста, уыдоны цард дӕр хуыздӕрырдӕм куыд аивта, уый тыххӕй уыцы тӕрхонгӕнджытӕн ӕмӕ хицӕуттӕн уӕзданӕй куы радзурӕм, уӕд сын, чи зоны, сӕ зӕрдӕтӕ бацагайӕм.
(Хъуыддӕгтӕ 26:28) Уӕд Агриппӕ Павелӕн загъта: «Иу гыццыл ма, ӕмӕ мӕнӕй дӕр чырыстон сараздзынӕ».
«Ӕз домын Ромы паддзахы тӕрхон!»
18 Павел Фестӕн дзуапп радта: «Нӕ, цытджын Фест, ӕз ӕрра не сдӕн. Ӕз дзурын, ӕцӕг цы у, уый, стӕй уыцы ныхӕсты ӕнӕзондӕй ницы ис. Ӕз ацы хабӕртты тыххӕй паддзахӕн сӕрибарӕй дзурын, уымӕн ӕмӕ сӕ йӕхӕдӕг дӕр хорз зоны... Паддзах Агриппӕ, Пехуымпартыл ӕууӕндыс? Зонын ӕй, кӕй сыл ӕууӕндыс». Ӕмӕ уӕд Агриппӕ загъта: «Иу гыццыл ма, ӕмӕ мӕнӕй дӕр чырыстон сараздзынӕ» (Хъуыд. 26:25–28). Ацы ныхӕстӕ паддзах Агриппӕ сыгъдӕгзӕрдӕйӕ загъта ӕви нӕ, уый нӕ зонӕм, фӕлӕ, Павелы ныхӕстӕ йӕ зӕрдӕйы кӕй ахызтысты, уый бӕлвырд у.
Цавӕр хӕзнатӕ ссардтай?
(Хъуыддӕгтӕ 26:14) Иууылдӕр зӕххыл ӕрхаудтам, ӕмӕ ӕз фехъуыстон хъӕлӕс, дзырдта мӕм дзуттагау: «Савл, Савл, цӕмӕн зилыс мӕ фӕдыл? Зын дын у цыргъ хъилы ныхмӕ бырсын!»
nwtsty, уӕлӕмхасӕн ӕрмӕг Хъд 26:14 стихмӕ
цыргъ хъилы ныхмӕ бырсын Цыргъ хъилӕй-иу тардтой фос (Трх 3:31). Дзырдбаст «цыргъ хъилы ныхмӕ бырсын» арӕх ӕмбӕлы грекъаг литературӕйы. Ацы ныхӕстӕ кӕсгӕйӕ адӕймаджы цӕстытыл ауайы, йӕ хицауы коммӕ чи нӕ кӕсы, ахӕм гал. Гал-иу, йӕ хицау ӕй кӕцырдӕм здӕхта, уыцырдӕм куы нӕ цыди, уӕд-иу йӕхи хъилы бырынкъыл бацавта. Савл дӕр уыд ахӕм галы хуызӕн, цалынмӕ чырыстон не сси, уӕдмӕ. Чырыстийы фӕдылдзӕуджыты ныхмӕ кӕй цыд, уымӕ гӕсгӕ йӕхи тӕссаг уавӕры ӕппӕрста. (Абар Хъд 5:38, 39; 1Тм 1:13, 14.) Ек 12:11 стихы дзырдбастӕй «галты кӕмӕй фӕтӕрынц, ахӕм цыргъ хъил» спайда кодтой ахӕсгӕ хуызы ӕмӕ амоны, уынаффӕмӕ хъусынмӕ чи разӕнгард кӕнынц, ахӕм зондджын адӕймаджы ныхӕстӕм.
it-U «Рожон»
Хъил
Зӕхкусджытӕ галтӕ кӕмӕй фӕтӕрынц, ахӕм даргъ цыргъ хъил (йӕ дӕргъ вӕййы 2 метры ӕмӕ ’рдӕджы бӕрц). Хъилӕн йӕ иу кӕроныл конд вӕййы ӕфсӕйнаг цыргъ бырынкъ ӕмӕ дзы фос фӕтӕрынц. Йӕ иннӕ кӕрон та вӕййы, сарты бырынчъы хуызӕн, ӕмӕ дзы фӕсыгъдӕг кӕнынц, гутоныл цы цъыф, ӕлыг кӕнӕ кӕрдӕг ныххӕцы, уый.
Самегар «цыргъ хъилӕй» амардта 600 филистимаджы (Трх 3:31). «Хъил» цы дзуттаг дзырдӕй ратӕлмац кодтой (малма́д), уымӕн йӕ уидаг у лама́д (нысан кӕны «ахуыр кӕнын; иннӕты ахуыр кӕнын»).
Библийы куыд фыст ис, афтӕмӕй Израилы паддзах Саул куы уыд, уӕд филистӕмӕгтӕ израилӕгты хӕрдмӕ скӕсын нӕ уагътой ӕмӕ сын уый бар нӕ лӕвӕрдтой, цӕмӕй сын сӕхи куырдтӕ уыдаид. Ӕмӕ уымӕ гӕсгӕ израилӕгтӕ сӕ кусӕнгӕрзтӕ цыргъ кӕнынмӕ кӕнӕ сӕ хъилтӕ цалцӕг кӕнынмӕ (ӕфсӕйнаг бырынкъ бафидар кӕнынмӕ) цыдысты филистимӕгтӕм (1См 13:19–21).
Хъилимӕ барст цӕуынц, уынаффӕмӕ хъусынмӕ чи разӕнгард кӕнынц, ахӕм зондджын адӕймаджы ныхӕстӕ (Ек 12:11). Ныхӕстӕ «цыргъ хъилы ныхмӕ бырсын» кӕсгӕйӕ адӕймаджы цӕстытыл ауайы, йӕ хицауы коммӕ чи нӕ кӕсы, ахӕм гал. Ахӕм гал-иу хъилы бырынкъыл йӕхи бацавта. Уӕдӕ ацы ныхӕстӕ амонынц, адӕймаг хицауады ныхмӕ куы фӕцӕуы, уӕд уый йӕхицӕн зиан кӕй ӕрхӕссы, уымӕ. Афтӕ кодта Савл дӕр, цалынмӕ чырыстон не сси, уӕдмӕ: Чырыстийы фӕдылдзӕуджыты фӕстӕ зылди (Хъд 26:14; абар Хъд 5:38, 39).
(Хъуыддӕгтӕ 26:27) Паддзах Агриппӕ, Пехуымпартыл ӕууӕндыс? Зонын ӕй, кӕй сыл ӕууӕндыс.
Адӕмӕн ӕххуыс кӕн Паддзахады хабар сӕ зӕрдӕмӕ айсынӕн
14 Павел зыдта, Агриппӕ йӕхи иудейты диныл хӕст лӕгыл кӕй нымадта. Агриппӕ иудаизмы тыххӕй цы зыдта, уый хынцгӕйӕ йын Павел Миссиайы мӕлӕт ӕмӕ райгасы тыххӕй загъта: «Раздӕр пехуымпартӕ ӕмӕ Моисей цы дзырдтой, ӕз дӕр уымӕй уӕлдай куы ницы зӕгъын,– ома адӕттӕн ӕнӕрцӕугӕ кӕй нӕ уыдис» (Куыстытӕ 26:22, 23, НФ). Павел Агриппӕйы комкоммӕ бафарста: «Ӕууӕндыс, мыййаг, паддзах Агриппӕ, пехуымпартыл?» Агриппӕ цы загътаид, уый нӕ зыдта. Куы зӕгъа, зӕгъгӕ, пехуымпартыл не ’ууӕндын, уӕд иудейты цӕсты йӕ кад ӕрхаудзӕн. «О» куы зӕгъа, уӕд уый та дзурӕг уыдзӕн, апостол Павелы ныхӕстыл разы кӕй у, ӕмӕ йӕ уӕд адӕм чырыстон рахондзысты. Павел йӕхи фарстӕн раст дзуапп радта: «Зонын, кӕй ӕууӕндыс». Уымӕн ын Агриппӕ цы загъта? «Басастай мӕ, бирӕ нал хъӕуы, цӕмӕй ӕз дӕр счырыстон уон!» (НФ) (Куыстытӕ 26:27, 28). Агриппӕ кӕд чырыстон не сси, уӕддӕр куыд зыны, афтӕмӕй Павелы ныхӕстӕ йӕ зӕрдӕйы ахызтысты (Дзуттытӕм 4:12).
Библийӕ бакӕсинаг
(Хъуыддӕгтӕ 25:1–12) Фест бӕстӕйы хицау куы сси, уӕд ӕртӕ боны фӕстӕ Кесарийӕ ссыд Иерусалиммӕ. 2 Уым ӕм сауджынты хистӕртӕ ӕмӕ дзуттӕгты дзырддзӕугӕ лӕгтӕ Павелыл хъаст бахастой ӕмӕ йын лӕгъстӕ кӕнын райдыдтой, 3 цӕмӕй сын ахӕм хорзӕх ракӕна, ӕмӕ Павелы Иерусалиммӕ ӕркӕнын кӕна. Сӕхӕдӕг та хъавыдысты фӕндагыл йӕ размӕ бабадынмӕ ӕмӕ йӕ амарынмӕ. 4 Фӕлӕ сын Фест загъта, Павел хъуамӕ уа Кесарийы ӕмӕ мӕхӕдӕг дӕр тагъд уырдӕм цӕудзынӕн, зӕгъгӕ. 5 «Гъемӕ сымахӕй бартӕ кӕй къухы сты,– загъта уый,– уыдон мемӕ рацӕуӕнт, ӕмӕ кӕд уыцы лӕг ӕвзӕрӕй исты сарӕзта, уӕд йӕ ныхмӕ дзурӕнт». 6 Фест уым аст кӕнӕ дӕс бонӕй фылдӕр нӕ фӕци, стӕй Кесаримӕ ӕрыздӕхт. Дыккаг бон ӕрбадт тӕрхоны бадӕныл ӕмӕ бардзырд радта, цӕмӕй Павелы ӕрбакӕной. 7 Павел куы ’рбацыд, уӕд ыл Иерусалимӕй ӕрцӕуӕг дзуттӕгтӕ амбырд сты ӕмӕ йӕ райдыдтой бирӕ уӕззау фыдракӕндты аххосджын кӕнын, бӕлвырдгӕнӕнтӕ ӕрхӕссын та сӕ бон нӕ уыди. 8 Уӕд Павел загъта: «Ӕз ницы тӕригъӕд сарӕзтон нӕдӕр дзуттӕгты Закъоны раз, нӕдӕр кувӕндоны раз ӕмӕ нӕдӕр Ромы паддзахы раз». 9 Фесты та дзуттӕгты зӕрдӕ балхӕнын кӕй фӕндыд, уымӕ гӕсгӕ Павелӕн загъта: «Фӕнды дӕ Иерусалиммӕ ацӕуын, цӕмӕй дын ацы хъуыддӕгты тыххӕй мӕ разы уым тӕрхон кӕной?» 10 Фӕлӕ йын Павел загъта: «Ӕз лӕууын Ромы паддзахы тӕрхоны бадӕны раз, ӕмӕ мын тӕрхон дӕр ам хъуамӕ кӕной. Ӕз дзуттӕгтӕн ӕвзӕрӕй ницы сарӕзтон, ӕмӕ уый дӕхӕдӕг дӕр хорз зоныс. 11 Кӕд ӕз ӕцӕгдӕр фыдгӕнӕг дӕн ӕмӕ мын мӕлӕты тӕрхон цӕй тыххӕй рахӕссой, ахӕмӕй исты сарӕзтон, уӕд разы дӕн мӕлӕтыл. Фӕлӕ кӕд, ацы адӕм мӕ ныхмӕ цытӕ дзурынц, уыдӕттӕ ӕцӕг не сты, уӕд никӕмӕн ис уый бар, ӕмӕ мӕ сӕ къухмӕ ратта. Ӕз домын Ромы паддзахы тӕрхон!» 12 Уӕд Фест йӕ уынаффӕгӕнджытимӕ аныхас кодта ӕмӕ загъта: «Ромы паддзахы тӕрхон домыс, ӕмӕ Ромы паддзахмӕ ацӕудзынӕ».
28 ЯНВАРЫ – 3 ФЕВРАЛЫ
ХУЫЦАУЫ НЫХАСЫ ХӔЗНАТӔ | ХЪУЫДДӔГТӔ 27, 28
«Павел Роммӕ науыл ацыд»
(Хъуыддӕгтӕ 27:23, 24) Уымӕн ӕмӕ, ӕз кӕй цагъар дӕн ӕмӕ кӕмӕн лӕггад кӕнын, уыцы Хуыцауы зӕд ӕхсӕвы мӕ разы ӕрлӕууыд 24 ӕмӕ мын загъта: „Ма тӕрс, Павел. Ды хъуамӕ ӕрлӕууай Ромы паддзахы раз, ӕмӕ, науыл демӕ чи ис, уыдоны се ’ппӕты дӕр Хуыцау фервӕзын кӕндзӕн“.
«Сымахӕй иу адӕймаг дӕр нӕ фесӕфдзӕн»
15 Науыл чи уыд, уыдонӕй Павел, ӕвӕццӕгӕн, бирӕтӕн радзырдта, Хуыцау «зӕрдӕ цӕмӕй бавӕрдта», уый тыххӕй – адӕмӕн се ’ппӕтӕн дӕр цы ныфс ис, уый тыххӕй (Хъуыд. 26:6; Кол. 1:5). Фӕлӕ сӕ ныр та Павел ныфс бауагъта, нау куы ныппырх уа, уӕддӕр сӕ цардӕн тӕссаг кӕй нӕу, уымӕй. Загъта сын: «Хуыцауы зӕд ӕхсӕвы мӕ разы ӕрлӕууыд ӕмӕ мын загъта: „Ма тӕрс, Павел. Ды хъуамӕ ӕрлӕууай Ромы паддзахы раз, ӕмӕ, науыл демӕ чи ис, уыдоны се ’ппӕты дӕр Хуыцау фервӕзын кӕндзӕн“». Ӕмӕ сын стӕй Павел ахӕм ныфсдӕттӕг ныхӕстӕ загъта: «Уӕдӕ уӕ ныфс ма асӕттӕд, ӕз ӕууӕндын Хуыцауыл, алцыдӕр уыдзӕн, зӕд мын куыддӕриддӕр загъта, афтӕ. Ӕрмӕст нӕ хъуамӕ цавӕрдӕр сакъадахмӕ рахӕсса» (Хъуыд. 27:23–26).
(Хъуыддӕгтӕ 28:1, 2) Былмӕ дзӕбӕхӕй куы рахызтыстӕм, уӕд базыдтам, уыцы сакъадах Мальтӕ кӕй хуыйны. 2 Бынӕттон цӕрджытӕ диссаджы хӕларзӕрдӕ разындысты: арт скодтой ӕмӕ не ’ппӕтмӕ дӕр фӕдзырдтой, уымӕн ӕмӕ уаргӕ кодта ӕмӕ уыди уазал.
«Сымахӕй иу адӕймаг дӕр нӕ фесӕфдзӕн»
18 Чи аирвӕзт, уыдон, куыд рабӕрӕг, афтӕмӕй ныр уыдысты Мальтӕйы сакъадахыл, Сицилийӕ хуссарырдӕм. Бынӕттон цӕрджытӕ сӕм «диссаджы хӕларзӕрдӕ разындысты» (Хъуыд. 28:2). Ӕнӕзонгӕ адӕм былмӕ сӕрӕй къӕхты бынмӕ хуылыдзӕй ӕмӕ уазалӕй гӕв-гӕв кӕнгӕйӕ кӕй рахызтысты, уый куы федтой, уӕд сын арт скодтой. Ӕмӕ кӕд уазал уыд ӕмӕ къӕвда дӕр уарыд, уӕддӕр бӕлццӕттӕ схъарм сты. Раст уыцы рӕстӕг арты раз ӕрцыд иу диссаг.
«Сымахӕй иу адӕймаг дӕр нӕ фесӕфдзӕн»
21 Уыцы сакъадахыл цард, бирӕ зӕххытӕ кӕмӕн уыд, ахӕм хъӕздыг лӕг, Публий, зӕгъгӕ. Ӕвӕццӕгӕн ӕй Ромы хицауад сӕвӕрдта Мальтӕйы сӕргъы. Лука Публийы хоны «сакъадахы хицау», ӕмӕ раст ахӕм дзырд ӕмбӕлы, Мальтӕйы цы фыстытӕ ссардтой, уыдонӕй дыууӕйы. Публий Павелы ӕмӕ йе ’мбӕлтты суазӕг кодта ӕмӕ сын ӕртӕ боны рӕдау фысым уыди. Уыцы рӕстӕг Публийы фыд уыди рынчын. Ӕмӕ та ацы хатт дӕр Лука бӕлвырд ныффыста, уыцы лӕгӕн йӕ низыхатт цы уыд, уый, «йӕ тӕвд нӕ хауд ӕмӕ хъӕрзыд гуыбыннизӕй», зӕгъгӕ. Уӕд Павел Хуыцаумӕ скуывта, рынчыныл йӕ къухтӕ ӕрӕвӕрдта ӕмӕ йӕ адзӕбӕх кодта. Бынӕттон цӕрджытӕ дисы бафтыдысты, ӕмӕ йӕм ӕндӕр рынчынты дӕр ӕрбакодтой, цӕмӕй уыдоны дӕр сдзӕбӕх кодтаид. Стӕй Павел ӕмӕ йе ’мбӕлттӕн лӕвӕрттӕ скодтой ӕмӕ сӕ фӕндагмӕ цыдӕриддӕр хъуыди, уымӕй сӕ срӕвдз кодтой (Хъуыд. 28:7–10).
(Хъуыддӕгтӕ 28:16, 17) Ӕппынфӕстаг Роммӕ куы бахӕццӕ стӕм, уӕд Павелӕн радтой хицӕн хӕдзары цӕрыны бар, ӕфсӕддон ӕй хъахъхъӕдта, афтӕмӕй. 17 Ӕртӕ боны фӕстӕ Павел фӕдзырдта дзуттӕгты дзырддзӕугӕ лӕгтӕм. Куы ӕрӕмбырд сты, уӕд сын загъта: «Ӕфсымӕртӕ, ӕз нӕ адӕмӕн ӕвзӕрӕй ницы ракодтон, нӕ фыдӕлты ӕгъдӕутты сӕрты дӕр нӕ ахызтӕн, фӕлӕ мӕ Иерусалимы ӕрцахстой ӕмӕ мӕ ромӕгты къухтӕм радтой.
Павел «бӕстон... хъусын кодта»
10 Ӕппынфӕстаг бӕлццӕттӕ Роммӕ куы бахӕццӕ сты, уӕд «Павелӕн радтой хицӕн хӕдзары цӕрыны бар, ӕфсӕддон ӕй хъахъхъӕдта, афтӕмӕй» (Хъуыд. 28:16). Хицӕн хӕдзары-иу ахстӕй кӕй дардтой, уый-иу цӕмӕй ма алыгъдаид, уый тыххӕй-иу ӕй хъахъхъӕнӕгмӕ рӕхыстӕй бабастой. Ӕмӕ кӕд Павелӕн йӕ хабар афтӕ уыд, уӕддӕр хорз хабар хъусын кодта, ӕмӕ йӕ рӕхыстӕ дӕр нӕ хъыгдардтой. Гъемӕ уыцы дард балцы фӕстӕ ӕртӕ боны йеддӕмӕ нӕ баулӕфыд, афтӕ, Ромы чи цард, уыцы дзырддзӕугӕ дзуттӕгтӕм фӕдзырдта, цӕмӕй семӕ базонгӕ уыдаид ӕмӕ сын хорз хабар фехъусын кодтаид.
Цавӕр хӕзнатӕ ссардтай?
(Хъуыддӕгтӕ 27:9) Уӕдмӕ рацыд бирӕ рӕстӕг, фесты Сыгъдӕггӕнӕн боны комдарӕнтӕ дӕр, ӕмӕ науыл цӕуын ӕдас нал уыди. Уымӕ гӕсгӕ сын Павел бауынаффӕ кодта:
nwtsty, уӕлӕмхасӕн ӕрмӕг Хъд 27:9 стихмӕ
Сыгъдӕггӕнӕн боны комдарӕнтӕ Кӕнӕ «фӕззыгон комдарӕнтӕ». Ком. «комдарӕнтӕ». Ам цы грекъаг дзырдӕй спайда кодтой, уый амоны, Моисейы закъонмӕ гӕсгӕ кӕй хъуамӕ бӕрӕг кодтаиккой, ӕрмӕстдӕр уыцы комдарӕнтӕм, ӕмӕ йӕ бӕрӕг кодтой Сыгъдӕггӕнӕн боны. Хуыдтой ма йӕ Йом Киппур (дзуттагау йом хаккиппури́м, «[тӕригъӕдтӕ] ӕмбӕрзӕн бон») (Лв 16:29–31; 23:26–32; Нм 29:7). Сыгъдӕггӕнӕн бон хи «ӕрныллӕг кӕнын» арӕхдӕр нысан кодта, адӕймаг-иу йӕхи цӕмӕйдӕр кӕй фӕцух кодта, зӕгъӕм, нӕ-иу хордта ӕмӕ-иу ком дардта (Лв 16:29, фип.). Хъд 27:9 стихы цы «комдарӕнты» кой ис, уымӕй бӕрӕг у, Сыгъдӕггӕнӕн боны-иу адӕм сӕйраджыдӕр ком кӕй дардтой. Сыгъдӕггӕнӕн бон-иу бӕрӕг кодтой сентябры кӕрон кӕнӕ октябры райдиан.
(Хъуыддӕгтӕ 28:11) Ӕртӕ мӕйы фӕстӕ ацыдыстӕм, Александрийӕ чи цыд, уыцы науыл, йӕ бырынкъыл уыди нывӕфтыд «Зевсы фырттӕ». Уыцы нау зымӕджы дӕргъы лӕууыди сакъадахы наулӕууӕны.
nwtsty, уӕлӕмхасӕн ӕрмӕг Хъд 28:11 стихмӕ
Зевсы фырттӕ Грекъагау Диоскуртӕ. Грекъӕгты ӕмӕ ромӕгты мифологимӕ гӕсгӕ, Кастор ӕмӕ Поллукс уыдысты хуыцау Зевсы (Юпитеры) ӕмӕ спартайнаг ус-паддзах Ледӕйы фаззон лӕппутӕ. Нымадтой ма сӕ денджыздзауты бардуӕгтыл. Адӕмы уырныдта, денджызы-иу бӕллӕхы чи бахауд, уыдонӕн-иу сӕ бон баххуыс кӕнын кӕй уыд. Науы бырынкъыл цы нывӕфтыд уыд, уый тыххӕй ацы стихы кӕй ис фыст, уый ууыл дзурӕг у, ӕмӕ Хъуыддӕгты чиныджы цы хабӕртты кой ис, уыдӕттӕ кӕй ныффыста, йӕхи цӕстӕй сӕ чи федта, уый.
Библийӕ бакӕсинаг
(Хъуыддӕгтӕ 27:1–12) Италимӕ кӕй цӕудзыстӕм, уыцы уынаффӕ куы рахастой, уӕд Павелы ӕмӕ ма ӕндӕр ахст адӕмы бакодтой ӕфсӕддон хицау Юлийы бар – уый уыд Августы ӕфсӕддон къордӕй. 2 Сбадтыстӕм, Адрамитӕй чи цыд, ахӕм науыл ӕмӕ араст стӕм,– нау цыди, Азийы былгӕрӕтты цы наулӕууӕнтӕ уыд, уыдонмӕ. Немӕ ма уыдис македойнаг Аристарх дӕр, Фессалоникӕйӕ. 3 Дыккаг бон рахызтыстӕм Сидоны. Ӕмӕ Юлий Павелӕн ахӕм хорздзинад ракодта, ӕмӕ йӕ йе ’мбӕлттӕм ауагъта, цӕмӕй йӕм фӕкастаиккой. 4 Уырдыгӕй дарддӕр араст стӕм ӕмӕ цыдыстӕм Кипрмӕ хӕстӕг ӕмӕ афтӕмӕй нӕхи ӕмбӕхстам, нӕ ныхмӕ чи дымдта, уыцы дымгӕйӕ. 5 Стӕй ахызтыстӕм Килики ӕмӕ Памфилийы рӕзты ӕмӕ бацыдыстӕм ликиаг горӕт Мирӕйы наулӕууӕнмӕ. 6 Уым ӕфсӕддон хицау ссардта, Александрийӕ Италимӕ чи цыд, ахӕм нау ӕмӕ нӕ ууыл сбадын кодта. 7 Уырдыгӕй куы рараст стӕм, уӕд бирӕ бонтӕ сабыргай фӕцыдыстӕм ӕмӕ тыххӕй-фыдӕй бахӕццӕ стӕм Книды онг, уымӕн ӕмӕ нӕ дымгӕ размӕ цӕуын нӕ уагъта. Ӕмӕ уый фӕстӕ цыдыстӕм Критмӕ хӕстӕг ӕмӕ афтӕмӕй нӕхи дымгӕйӕ ӕмбӕхстам. Уым ахызтыстӕм Салмоны рӕзты, 8 ӕмӕ былгӕрӕтты тыххӕйты цӕугӕйӕ бахӕццӕ стӕм, Хорз Наулӕууӕнтӕ кӕй хонынц, уыцы бынатмӕ,– уырдӕм хӕстӕг уыд горӕт Ласейӕ. 9 Уӕдмӕ рацыд бирӕ рӕстӕг, фесты Сыгъдӕггӕнӕн боны комдарӕнтӕ дӕр, ӕмӕ науыл цӕуын ӕдас нал уыди. Уымӕ гӕсгӕ сын Павел бауынаффӕ кодта: 10 «Хорз адӕм, куыд кӕсын, афтӕмӕй ныл фӕндагыл исты бӕллӕх ӕрцӕудзӕн ӕмӕ ӕрмӕст ласинӕгтӕн ӕмӕ науӕн нӕ, фӕлӕ нӕхицӕн дӕр стыр зиан ракӕндзӕн». 11 Фӕлӕ ӕфсӕддон хицау, Павел цы дзырдта, уымӕ нӕ байхъуыста, фӕлӕ наутӕрӕг ӕмӕ науы хицаумӕ. 12 Уыцы наулӕууӕн зымӕг арвитынӕн кӕй нӕ бӕззыд, уымӕ гӕсгӕ сӕ фылдӕр дзырдтой, зӕгъгӕ, дарддӕр ацӕуӕм, кӕд исты хуызты Криты наулӕууӕн Финикмӕ бахӕццӕ уаиккам, цӕмӕй зымӕг уым арвитӕм. Уыцы наулӕууӕн та кӕсы цӕгат-ныгуылӕнмӕ ӕмӕ хуссар-ныгуылӕнмӕ.