2 УРОК

Хуымӕтӕг ныхасы уаг

2 Коринфӕгтӕм 2:17

НЫСАН: Дзур зӕрдиагӕй ӕмӕ, ӕнӕуи куыд фӕдзурыс, афтӕ.

УЫЙ КУЫД ИС АРАЗӔН

Йегъовӕмӕ-иу скув ӕмӕ-иу дӕхи хорз бацӕттӕ кӕн. Кув, цӕмӕй дӕхиуыл нӕ, фӕлӕ цы хабар хъусын кӕныс, ууыл хъуыды кӕнай. Цы сӕйраг хъуыдытӕ хъуамӕ зӕгъай, уыдон бахъуыды кӕн. Дӕхи ныхӕстӕй дзур. Афтӕ ма дзур, цыма кӕсгӕ кӕныс.

Кӕд Библи кӕнӕ ӕндӕр публикаци кӕсдзынӕ, уӕд-иу уыцы скъуыддзаг дзӕбӕх бацӕттӕ кӕн, цӕмӕй йӕ хорз бакӕсай. Кӕд дзы цавӕрдӕр адӕймаджы ныхӕстӕ ис фыст, уӕд-иу сӕ аив бакӕс, ӕрмӕст цыма театры хъазыс, афтӕ нӕ.
Зӕрдиагӕй дзур. Ахъуыды кӕн, цы дзурыс, уый хъусджыты цӕмӕн хъӕуы зонын. Уӕд де уӕнгтӕ ӕмӕ дӕ цӕсгомы змӕлдӕй бӕрӕг уыдзӕн, кӕй сыл тыхсыс ӕмӕ сӕм хорз зӕрдӕ кӕй дарыс.

Адӕймаг аразгӕ ныхас ма кӕна, уый ууыл дзурӕг нӕу, ӕмӕ йӕ бон у куыдфӕнды дӕр ныхас кӕнын. Цы хабар хъусын кӕныс, уымӕн цӕмӕй йӕ кад дӕлӕмӕ ма кӕнай, уый тыххӕй хъуамӕ дзурай раст ӕмӕ хъуамӕ дӕ ныхас ӕнцонӕмбарӕн уа.
Чи дӕм хъусы, уыдонмӕ кӕс. Дӕ бон у, чи дӕм хъусы, уыдонмӕ кӕсын. Раныхасы рӕстӕг-иу се ’ппӕтмӕ дӕр ма кӕс, фӕлӕ-иу рӕстӕгӕй-рӕстӕгмӕ искӕмӕ бакӕс, цыма йемӕ ныхас кӕныс, афтӕ.