Цӕстдарджытӕ Хуыцауы дзуг хизынц

ЙЕСО зӕххыл куы лӕггад кодта, уӕд хъуыддагӕй равдыста, «хорз фыййау» кӕй у (Иоан. 10:11). Йӕ фӕдыл дуне адӕмы цӕугӕ куы федта, «уӕд сын фӕтӕригъӕд кодта, уымӕн ӕмӕ уыдысты ӕнӕфыййау фыстау, ӕфхӕрд ӕмӕ дзӕгъӕл» (Матф. 9:36). Йесо адӕмы куыд уарзта ӕмӕ сыл куыд тыхсти, уый Петр ӕмӕ иннӕ апостолтӕ дӕр куыннӕ уыдтой. Чырысти Израилы мӕнг фыййӕутты хуызӕн нӕ уыди. Уыдон Хуыцауы дзуг ахӕм ӕдзӕллаг уавӕрмӕ ӕркодтой, ӕмӕ фыстӕ ӕххормаг ӕййӕфтой ӕмӕ алырдӕмты ныдздзӕгъӕлтӕ сты (Йез. 34:7, 8). Йесо йӕ апостолтӕн фӕзминаг уыди, йӕ фысты куыд ахуыр кодта ӕмӕ сыл куыд тыхсти, уымӕй. Суанг ма сын йӕ цард дӕр нӕ бавгъау кодта. Афтӕмӕй сахуыр сты, уырнындзинад кӕмӕ уыд, уыдонӕн Йегъовӕмӕ – «сӕ удты фыййаумӕ ӕмӕ цӕстдарӕгмӕ» – раздӕхынӕн ӕххуыс кӕнын (1 Пет. 2:25, фип.).

² Иухатт Йесо Петрӕн йӕ хъус ӕрдардта, фыстӕм кӕсын куыд ахсджиаг у, уымӕ (Иоан. 21:15–17). Петрыл уыцы ныхӕстӕ тынг фӕзындысты, ӕмӕ фӕстӕдӕр фыццаг чырыстон ӕмбырды хистӕр нӕлгоймӕгтӕн бафӕдзӕхста: «Хуыцауы дзуг, уӕ бар уын кӕй бакодтой, уыцы дзуг, хизут тыххӕй кӕнӕгау нӕ, фӕлӕ ӕнӕзивӕгӕй, уӕхицӕн дзы исты спайда кӕныны тыххӕй нӕ, фӕлӕ зӕрдиагӕй. Хуыцауы бынтӕн уӕхи хицау ма кӕнут, фӕлӕ дзугӕн фӕзминаг ут» (1 Пет. 5:1–3). Петры ныхӕстӕ хауынц, нӕ рӕстӕджы ӕмбырдты цы цӕстдарджытӕ ис, уыдонмӕ дӕр. Хистӕр нӕлгоймӕгтӕ дӕр Йесойау лӕггад кӕнынц зӕрдиагӕй ӕмӕ ӕнӕзивӕгӕй. Уыдон дзугӕн сты фӕзминаг ӕмӕ сын афтӕмӕй Йегъовӕйӕн лӕггад кӕныны хъуыддаджы разамынд дӕттынц (Дзут. 13:7).

³ Йегъовӕйӕ бузныг куыннӕ стӕм, йӕ сыгъдӕг тыхӕй кӕй сӕвӕрдта, уыцы цӕстдарджыты тыххӕй! Зӕрдиагӕй ныл кӕй тыхсынц, уый нын стыр пайда хӕссы. Зӕгъӕм, ӕмбырды алкӕмӕн дӕр рӕстӕг ссарынц ӕмӕ сын сӕ ныфсыл ныфс бафтауынц. Уыдон зӕрдиагӕй фыдӕбон кӕнынц, цӕмӕй алы къуыри дӕр фембӕлдты разамынд дӕттой ӕмӕ хотӕ ӕмӕ ӕфсымӕрты уырнындзинад фидар кӕной (Ром. 12:8). Уымӕй уӕлдай, дзуг хъахъхъӕнынц, сӕ уырнындзинадӕн тӕссаг цӕмӕйдӕриддӕр у, уыдӕттӕй, зӕгъӕм, ӕвзӕр адӕмӕй (Ис. 32:2; Тит. 1:9–11). Хъусын кӕныны хъуыддаджы фӕзминаг кӕй сты, уымӕй мах дӕр разӕнгард кӕнынц, цӕмӕй хорз хабар алы мӕй дӕр зӕрдиагӕй хъусын кӕнӕм (Дзут. 13:15–17). Уыдон сты, Йегъовӕ ӕмбырд фидар кӕнынӕн кӕй радта, уыцы «лӕвӕрттӕ» (Еф. 4:8, 11, 12).

ЦӔСТДАРӔГ ЦАВӔР ХЪУАМӔ УА

⁴ Цӕмӕй цӕстдарджытӕ ӕмбырдыл, куыд ӕмбӕлы, афтӕ тыхсой, уый тыххӕй хъуамӕ сӕ цард аразой Хуыцауы Ныхасы домӕнтӕм гӕсгӕ. Ӕрмӕстдӕр уӕд уыдзӕн зӕгъӕн, ӕмӕ сыгъдӕг тыхӕй ӕвӕрд ӕрцыдысты (Хъуыд. 20:28). Кӕй зӕгъын ӕй хъӕуы, Библи цӕстдарджытӕй гыццыл нӕ домы, уымӕн ӕмӕ, цӕстдарӕг уай, уый стыр бӕрндзинад у. Фӕлӕ, Йегъовӕйы ӕппӕт зӕрдӕйӕ чи уарзы ӕмӕ йын цыфӕнды хъуыддаджы дӕр лӕггад кӕнынмӕ цӕттӕ чи у, ахӕм нӕлгоймагмӕ уыцы домӕнтӕм гӕсгӕ цӕрын ӕгӕр зын нӕ фӕкӕсдзӕн. Алчидӕр ӕй хъуамӕ уына, цӕстдарджытӕ царды алы хъуыддаджы дӕр Библийы уынаффӕтӕм гӕсгӕ кӕй архайынц.

⁵ Цӕстдарӕг цавӕр хъуамӕ уа, уый тыххӕй апостол Павел ныффыста йӕ фыццаг фыстӕджы Тимофеймӕ ӕмӕ йӕ фыстӕджы Титмӕ. 1 Тимофеймӕ 3:1–7 фыст ис: «Цӕстдарӕг уа, уымӕ чи тырны, уый хорз хъуыддагмӕ бӕллы. Цӕстдарӕгмӕ хъуамӕ фау ӕрхӕссӕн мацӕмӕй уа, хъуамӕ йын иу ус йеддӕмӕ ма уа, хъуамӕ алцӕмӕй дӕр бӕрц зона, уа уӕззау зонды хицау, уаг ӕмӕ йӕм ӕгъдау уа, уа уазӕгуарзон, иннӕты ахуыр кӕнынмӕ арӕхса, ма уа расыггӕнаг, йӕ къух макӕмӕ иса, уа ӕмбаргӕ, ма уа загъдгӕнаг, ӕхцауарзаг, йӕ бинонтӕн уа хорз уынаффӕгӕнӕг, йӕ сывӕллӕттӕ уой коммӕгӕс ӕмӕ уӕззау зондыл хӕст (уымӕн ӕмӕ йӕхи бинонтӕн чи нӕ зоны уынаффӕ кӕнын, уый Хуыцауы ӕмбырдӕн цы хъуамӕ баххуыс кӕна?). Уый хъуамӕ ма уа, уырнӕг ӕрӕджы чи сси, ахӕм, цӕмӕй йӕ сӕр бӕрзӕндты хӕссын ма райдайа ӕмӕ йӕ ма баййафа, Хӕйрӕгӕн цы тӕрхон ӕрцыд хаст, уыцы тӕрхон. Стӕй йын хъуамӕ хорз ном уа ӕддагӕтты ’хсӕн дӕр, цӕмӕй йӕм мацы уайдзӕф ӕрхауа ӕмӕ Хӕйрӕджы къӕппӕджы ма бахауа».

⁶ Титмӕ та Павел ныффыста: «Криты дӕ уый тыххӕй ныууагътон, цӕмӕй, раст чи нӕу, уыцы хъуыддӕгтӕ сраст кӕнай ӕмӕ дын куыд бафӕдзӕхстон, афтӕ алы горӕты дӕр сӕвӕрай хистӕр нӕлгоймӕгтӕ. Уый хъуамӕ уа, фау ӕрхӕссӕн кӕмӕ нӕй, ахӕм нӕлгоймаг, хъуамӕ йын иу ус йеддӕмӕ ма уа, йӕ сывӕллӕттӕ хъуамӕ уой уырнӕг, ма сӕ зоной, ӕвзӕр митӕ чи кӕны ӕмӕ хивӕнд чи у, ахӕмтӕй. Цӕстдарӕг у Хуыцауы ӕвӕрд уынаффӕгӕнӕг, ӕмӕ йӕм хъуамӕ фау ӕрхӕссӕн мацӕмӕй уа, ма уа хивӕнд, мӕстыгӕр, расыггӕнаг, йӕ къух макӕмӕ иса, ма уа зыд ӕмӕ хи пайда ма агура, фӕлӕ хъуамӕ уа уазӕгуарзон, уарза хорздзинад, уа ӕмбаргӕ, раст адӕймаг, иузӕрдион, хиуылхӕцгӕ, иннӕты ахуыргӕнгӕйӕ фидар хӕца, ӕууӕндӕн кӕуыл ис, уыцы ныхасыл, цӕмӕй йӕ бон уа раст ахуырады фӕрцы зонд амонын дӕр ӕмӕ, ныхмӕ чи дзуры, уыдонӕн уайдзӕф бакӕнын дӕр» (Тит. 1:5–9).

⁷ Ӕфсымӕр ацы ныхӕстӕ куы бакӕса, уӕд, чи зоны, ахъуыды кӕна, афтӕ цӕрын мӕ бон никуы суыдзӕн, зӕгъгӕ. Фӕлӕ хъуамӕ йӕ къухтӕ ма ’руадза. Цӕстдарджытӕм цы миниуджытӕ хъуамӕ уа, уыцы миниуджытӕ царды куы ’вдиса, уӕд ӕмбырды иннӕты дӕр фӕнддзӕн ахӕм миниуджытӕ ӕвдисын. Павелы ныхӕстӕм гӕсгӕ, Хуыцау уыцы «лӕвӕрттӕ – адӕймӕгты» ӕмбырдӕн уый тыххӕй радта, «цӕмӕй сыгъдӕджыты раст зондыл аразой, иннӕтӕн лӕггад кӕной ӕмӕ Чырыстийы буар фидар кӕной, цалынмӕ уырнындзинады ӕмӕ, Хуыцауы Фырт чи у, уый бӕлвырдӕй базоныны хъуыддаджы не ’ппӕт дӕр иу зондмӕ не ’рцӕуӕм, цалынмӕ нӕ лӕджы кары нӕ бацӕуӕм ӕмӕ алцӕмӕй дӕр Чырыстийау нӕ сырӕзӕм, уӕдмӕ» (Еф. 4:8, 12, 13).

⁸ Цӕстдарӕг хъуамӕ ма уа ӕгӕр ӕрыгон кӕнӕ, уырнӕг ӕрӕджы чи сси, ахӕм. Уый хъуамӕ уа, чырыстон фӕндагыл цасдӕр рӕстӕг чи цӕуы, Хуыцауы Ныхас хорз чи зоны ӕмӕ йӕ арф чи ӕмбары, стӕй хотӕ ӕмӕ ӕфсымӕрты тынг чи уарзы, ахӕм. Цӕстдарджытӕ йӕ куы уыной, ӕмӕ ӕмбырды чидӕр хотӕ ӕмӕ ӕфсымӕртӕй пайда кӕны, уӕд хъуамӕ сӕ ныфс хӕссой ахӕм адӕймагимӕ аныхас кӕнынмӕ ӕмӕ йын бауайдзӕф кӕнынмӕ, ӕмӕ афтӕмӕй фысты хъахъхъӕной (Ис. 32:2). Цӕстдарӕджы ӕмбырды иууылдӕр хъуамӕ зоной, уырнындзинады фӕлтӕрдджын чи у ӕмӕ Хуыцауы дзугыл зӕрдиагӕй чи тыхсы, ахӕм адӕймагӕй.

⁹ Ахӕм ӕфсымӕртӕн сӕ цардӕй хъуамӕ бӕрӕг уа, Хуыцауы зондӕй кӕй архайынц. Кӕд цӕстдарӕгӕн бинонтӕ ис, уӕд хъуамӕ цӕра, чырыстонӕн куыд ӕмбӕлы, афтӕ, ома йын хъуамӕ иу ус йеддӕмӕ ма уа ӕмӕ йӕ бинонтӕн уа хорз уынаффӕгӕнӕг. Цӕстдарӕгӕн йӕ сывӕллӕттӕ хъуамӕ уой уырнӕг, уой коммӕгӕс ӕмӕ уӕззау зондыл хӕст ӕмӕ сӕ ма зоной, ӕвзӕр митӕ чи кӕны ӕмӕ хивӕнд чи у, ахӕмтӕй. Уӕд ӕмбырды иннӕтӕн ӕнцон уыдзӕн хистӕр нӕлгоймагмӕ бацӕуын ӕмӕ дзы бинонты царды фӕдыл, стӕй чырыстон царды цыфӕнды хъуыддаджы фӕдыл дӕр уынаффӕ ракурын. Уымӕй уӕлдай, цӕстдарӕгмӕ фау ӕрхӕссӕн хъуамӕ мацӕмӕй уа ӕмӕ йын хорз ном уа суанг ӕддагӕтты ’хсӕн дӕр. Цӕмӕй ӕмбырды ном мацӕмӕй фӕчъизи кӕна, уый тыххӕй йӕ хъуамӕ макӕй бон уа фӕаххосджын кӕнын, йӕхи раст нӕ дары, зӕгъгӕ. Стӕй цӕстдарӕг хъуамӕ ма уа, ӕрӕджы цавӕрдӕр тӕригъӕды тыххӕй кӕмӕн бауайдзӕф кодтой, ахӕм. Ӕмбырды хотӕ ӕмӕ ӕфсымӕртӕн зын нӕ уыдзӕн ахӕм цӕстдарджы фӕзмын ӕмӕ йӕ фидарӕй зондзысты, цыфӕнды уавӕры дӕр сын сӕ уырнындзинадыл кӕй батыхсдзӕн (1 Кор. 11:1; 16:15, 16).

¹⁰ Ахӕм фӕлтӕрдджын ӕфсымӕртӕ чырыстон ӕмбырдӕн лӕггад кӕнынц, кӕддӕр Хуыцауы адӕмӕн израилаг хистӕр лӕгтӕ куыд лӕггад кодтой, афтӕ. Библийы фыст ис, зӕгъгӕ, уыдон уыдысты «зондджын, ӕмбаргӕ ӕмӕ фӕлтӕрд» нӕлгоймӕгтӕ (Дык. з. 1:13). Кӕд хистӕр нӕлгоймӕгтӕ ӕнӕрӕдигӕ не сты, уӕддӕр сӕ ӕмбырды дӕр ӕмӕ адӕмы ’хсӕн дӕр зонынц, ӕнӕзӕрдӕхудт чи у, Хуыцауы ’фсарм кӕмӕ ис ӕмӕ, Хуыцауы уагӕвӕрдтӕм гӕсгӕ дзӕвгар рӕстӕг чи цӕры, ахӕм адӕймӕгтӕй. Фау ӕрхӕссӕн сӕм кӕй нӕй, уый фӕрцы сӕ бон у ӕмбырды раз сӕрибарӕй дзурын (Ром. 3:23).

¹¹ Цӕстдарӕгӕй снысан кӕнынмӕ цӕттӕ чи у, уыцы ӕфсымӕртӕ алцӕмӕй дӕр бӕрц зонынц, ӕмӕ уымӕ хауы, иннӕтӕй цас домынц, уый дӕр. Уыдон фанатиктӕ не сты. Фӕлӕ сӕ цардӕй бӕрӕг у, иуырдӕм дӕр сын кӕй нӕ фегӕр вӕййы, ӕмӕ иннӕрдӕм дӕр, стӕй хиуылхӕцгӕ кӕй сты. Алы хъуыддаджы дӕр бӕрц кӕй зонынц, уый бӕрӕг вӕййы хӕрд ӕмӕ нозтӕй, стӕй, сӕ сӕрибар рӕстӕгӕй куыд фӕпайда кӕнынц ӕмӕ сӕхи куыд фӕирхӕфсынц, уымӕй дӕр. Уыдон бӕрц зонынц карз нозтӕй, цӕмӕй сӕм ахӕм азым мачи ӕрхӕсса, барасыг кӕнӕ расыггӕнаг у, зӕгъгӕ. Адӕймагӕн нозтӕй йӕ зонд куы фӕкъуырма вӕййы, уӕд ын йӕхиуыл хӕцын зындӕр вӕййы, ӕмӕ уымӕ гӕсгӕ ахӕм адӕймагӕн йӕ бон нӕу ӕмбырды хотӕ ӕмӕ ӕфсымӕрты уырнындзинадыл тыхсын.

¹² Цӕмӕй адӕймаг ӕмбырды цӕстдарӕгӕй лӕггад кӕна, уый тыххӕй йӕм хъуамӕ уа уаг ӕмӕ ӕгъдау. Уый бӕрӕг вӕййы йе ’ддаг бакастӕй, йӕ хӕдзар цы уавӕры ис, уымӕй ӕмӕ бирӕ ӕндӕр хъуыддӕгтӕй дӕр. Ахӕм адӕймаг абон-райсом нӕ фӕкӕны. Цы аразын ӕй хъӕуы, уый бӕлвырд фӕзоны ӕмӕ йӕ хабӕрттӕ уымӕ гӕсгӕ спълан кӕны. Уый Библийы уагӕвӕрдтыл фидар хӕцы.

¹³ Цӕстдарӕг хъуамӕ уа ӕмбаргӕ. Хъуамӕ йӕ бон уа иннӕ хистӕр нӕлгоймӕгтимӕ ӕмгуыст кӕнын ӕмӕ семӕ ӕмвӕнд-ӕмзондӕй архайын. Хъуамӕ йӕхимӕ раст цӕстӕй кӕса, стӕй иннӕтӕй ӕгӕр бирӕ ма дома. Ӕмбаргӕ адӕймаг кӕй у, уымӕ гӕсгӕ йӕхиуыл нӕ фервӕссы, ӕмӕ йӕхи хъуыды иннӕ хистӕр нӕлгоймӕгты хъуыдыйӕ хуыздӕрыл нӕ фӕнымайы. Чи зоны, иннӕтӕн хуыздӕр уайы цавӕрдӕр миниуджытӕ ӕвдисын кӕнӕ цыдӕр хъуыддӕгты уымӕй хуыздӕр арӕхсынц. Хистӕр нӕлгоймаг ӕмбаргӕ кӕй у, уый уымӕй бӕрӕг вӕййы, ӕмӕ Хуыцауы Ныхасыл фидар хӕцы ӕмӕ Йесо Чырыстийы фӕзмыныл ӕппӕт хъарутӕй архайы (Фил. 2:2–8). Хистӕр нӕлгоймаг хъуамӕ ма уа загъдгӕнаг кӕнӕ йӕ къух макӕмӕ иса, фӕлӕ иннӕтӕн кад кӕна ӕмӕ сӕ йӕхицӕй уӕлдӕр ӕвӕра. Цӕстдарӕг хъуамӕ ма уа хивӕнд дӕр, ӕмӕ-иу алы хатт, йӕхимӕ растдӕр куыд кӕсы, ууыл ма ныллӕууа. Хъуамӕ ма уа мӕстыгӕр дӕр, фӕлӕ иннӕтимӕ хӕларӕй цӕрын зона.

¹⁴ Стӕй ма цӕстдарӕг хъуамӕ уа уӕззау зонды хицау. Уый ууыл дзурӕг у, ӕмӕ уал исты зӕгъыны размӕ хъуамӕ ахъуыды кӕна. Хъуамӕ хорз ӕмбара Йегъовӕйы уагӕвӕрдтӕ ӕмӕ сӕ царды куыд пайда кӕнын хъӕуы, уый. Уӕззаузонд адӕймагӕн уынаффӕмӕ ӕмӕ разамындмӕ байхъусын зын нӕ вӕййы. Цӕстмӕ митӕ йӕм нӕй.

¹⁵ Павел ма Титӕн йӕ зӕрдыл ӕрлӕууын кодта, зӕгъгӕ, цӕстдарӕг хъуамӕ уарза хорздзинад. Уый хъуамӕ уа иузӕрдион ӕмӕ раст адӕймаг. Уыцы миниуджытӕ бӕрӕг вӕййынц, йӕхи иннӕтимӕ куыд дары, уымӕй, стӕй, раст ӕмӕ хорз цы у, ууыл фидар кӕй хӕцы, уымӕй дӕр. Алы хъуыддаджы дӕр у Йегъовӕйыл иузӕрдион ӕмӕ алкӕддӕр архайы Библийы рӕстаг уагӕвӕрдтӕм гӕсгӕ. Уый сусӕг ныхас никӕмӕн радзуры. Стӕй у уазӕгуарзон ӕмӕ иннӕтӕн йӕ рӕстӕг, йӕ хъарутӕ ӕмӕ йӕм цы ис, уый не ’вгъау кӕны (Хъуыд. 20:33–35).

¹⁶ Цӕмӕй цӕстдарӕг йӕ лӕггады ӕнтыстджын уа, уый тыххӕй хъуамӕ иннӕты ахуыр кӕнынмӕ арӕхса. Павел Титмӕ цы ныффыста, уымӕ гӕсгӕ цӕстдарӕг хъуамӕ «иннӕты ахуыргӕнгӕйӕ фидар хӕца, ӕууӕндӕн кӕуыл ис, уыцы ныхасыл, цӕмӕй йӕ бон уа раст ахуырады фӕрцы зонд амонын дӕр ӕмӕ, ныхмӕ чи дзуры, уыдонӕн уайдзӕф бакӕнын дӕр» (Тит. 1:9). Хъуамӕ йӕ бон уа ӕмбарын кӕнын ӕмӕ бӕлвырдгӕнӕнтӕ хӕссын. Стӕй хъуамӕ зона, ныхмӕ чи дзуры, уыимӕ ныхас кӕнын куыд хъӕуы, уый. Хъуамӕ арӕхса Хуыцауы Ныхасы фӕрцы иннӕты, раст цы у, ууыл баууӕндын кӕнынмӕ ӕмӕ сын сӕ уырнындзинад бафидар кӕнынмӕ. Цӕстдарӕг хъуамӕ иннӕты ахуыр кӕнынмӕ арӕхса, ӕнцон куы уа, уӕд дӕр ӕмӕ, зын куы уа, уӕд дӕр (2 Тим. 4:2). Хъуамӕ йӕм уа фӕразондзинад, цӕмӕй йӕ бон уа, рӕдыд къахдзӕф чи сарӕзта, ахӕм адӕймагӕн фӕлмӕнӕй бауайдзӕф кӕнын йе та, дызӕрдыг чи кӕны, ахӕм адӕймагӕн йӕ дызӕрдыг хъуыдытӕ фӕсурынӕн бӕлвырдгӕнӕнтӕ ӕрхӕссын ӕмӕ йын баххуыс кӕнын, йӕ уырнындзинад ӕй кӕмӕ разӕнгард кӕны, ахӕм хорз хъуыддӕгтӕ аразынӕн. Ӕфсымӕр сценӕйӕ кӕнӕ лӕгӕй-лӕгмӕ иннӕты ахуыр кӕнынмӕ куы арӕхса, уӕд уымӕй дӕр бӕрӕг уыдзӕн, цӕстдарӕджы хӕстӕ ӕххӕст кӕнынмӕ цӕттӕ кӕй у.

¹⁷ Хистӕр нӕлгоймӕгтӕ хъуамӕ уацамынды зынгзӕрдӕйӕ архайой. Хъуамӕ бӕрӕг уа, Йесойы уыцы хъуыддаджы дӕр кӕй фӕзмынц. Йесойӕн царды хорз хабар хъусын кӕнынӕй сӕйрагдӕр ницы уыди, ӕмӕ йӕ ахуыргӕнинӕгтӕн дӕр ӕххуыс кодта, цӕмӕй уацамынды ӕнтыстджын уыдаиккой (Мар. 1:38; Лук. 8:1). Хистӕр нӕлгоймӕгтӕн бирӕ хъуыддӕгтӕ вӕййы, фӕлӕ уӕддӕр хъусын кӕнынӕн рӕстӕг куы не ’вгъау кӕной, уӕд ӕнӕхъӕн ӕмбырд дӕр зынгзӕрдӕйӕ лӕггад кӕндзӕн. Хистӕр нӕлгоймӕгтӕ сӕ бинонтимӕ, стӕй ӕмбырды иннӕтимӕ дӕр куы хъусын кӕной, уӕд-иу афтӕмӕй «кӕрӕдзийы уырнындзинадӕй бафидар уыдзысты» (Ром. 1:11, 12).

¹⁸ Уыцы домӕнтӕ, чи зоны, искӕмӕ ӕгӕр бирӕ фӕкӕсой. Кӕй зӕгъын ӕй хъӕуы, Библи цы миниуджыты кой кӕны, уыдон иу цӕстдарӕгӕн дӕр йӕ бон нӕу йӕ царды ӕххӕстӕй ӕвдисын. Фӕлӕ хистӕр нӕлгоймагӕн йӕ удыхъӕд уыцы миниуджытӕй иуӕй дӕр афтӕ мӕгуыр хъуамӕ ма уа, ӕмӕ уый иннӕты цӕсты хауа. Хистӕр нӕлгоймӕгтӕ се ’ппӕт дӕр алыхуызон сты. Иуӕн дзы иу цавӕрдӕр миниуӕг фӕуайы хуыздӕр ӕвдисын, иннӕмӕн та – ӕндӕр. Ӕмӕ уый фӕрцы хистӕр нӕлгоймӕгты советмӕ вӕййы, Хуыцауы ӕмбырдӕн хорз разамынд дӕттынӕн цы миниуджытӕ хъӕуы, уыдон иууылдӕр.

¹⁹ Хистӕр нӕлгоймӕгтӕ ӕфсымӕртӕй искӕй тыххӕй рекомендаци куы фӕдӕттынц, цӕстдарӕгӕй йӕ ис снысан кӕнӕн, зӕгъгӕ, уӕд хъуамӕ сӕ зӕрдыл дарой апостол Павелы ныхӕстӕ: «Алкӕмӕн дӕр [уӕ] дзурын: цы стут, уӕхицӕй уымӕй фылдӕр ӕнхъӕл ма ут, фӕлӕ уӕ алчидӕр хъуыды кӕнӕд, Хуыцау ын цы уырнындзинад радта, уымӕ гӕсгӕ, цӕмӕй ӕмбаргӕ уат» (Ром. 12:3). Хистӕр нӕлгоймӕгтӕй алчидӕр йӕхи хъуамӕ ӕвӕра иннӕтӕй дӕлдӕр. Кӕцыдӕр ӕфсымӕр цӕстдарӕджы хӕстӕ ӕххӕст кӕнынмӕ цӕттӕ у ӕви нӕ, ууыл дзырд куы цӕуа, уӕд сӕ иу дӕр хъуамӕ «ӕгӕр раст ма у» (Еккл. 7:16). Хистӕр нӕлгоймӕгтӕ хъуамӕ сӕ зӕрдыл дарой, Библимӕ гӕсгӕ цӕстдарӕг цавӕр хъуамӕ уа, уый. Ӕмӕ хъуамӕ сбӕлвырд кӕной, цы ӕфсымӕрыл хъуыды кӕнынц, уый уыцы миниуджытӕ йӕ царды ӕвдисы ӕви нӕ. Искӕй тыххӕй рекомендаци дӕтгӕйӕ хистӕр нӕлгоймӕгтӕй хъуамӕ рох ма уа, зӕххыл иу ӕххӕст адӕймаг дӕр кӕй нӕй. Стӕй хъуамӕ макӕй хъулон кӕной ӕмӕ сӕм цӕстмӕ митӕ дӕр ма уа. Уӕд бӕрӕг уыдзӕн, Йегъовӕйы рӕстаг уагӕвӕрдтӕн кӕй аргъ кӕнынц ӕмӕ ӕмбырдыл зӕрдиагӕй кӕй тыхсынц. Алкӕцы ӕфсымӕры тыххӕй дӕр-иу Йегъовӕмӕ скувдзысты, хъуыддагмӕ-иу лӕмбынӕг ӕркӕсдзысты ӕмӕ сыгъдӕг тыхы разамындмӕ гӕсгӕ архайдзысты. Хуыцау хистӕр нӕлгоймӕгты бӕрны ахӕм ахсджиаг хъуыддаг кӕй бакодта, уымӕ гӕсгӕ хъуамӕ архайой Павелы ныхӕстӕм гӕсгӕ: «Искӕуыл дӕ къухтӕ ӕрӕвӕрынмӕ тагъд ма кӕн» (1 Тим. 5:21, 22).

СЫГЪДӔГ ТЫХЫ ДЫРГЪ

²⁰ Уырнындзинады фӕлтӕрдджын нӕлгоймӕгтӕн сӕ цардӕй бӕрӕг вӕййы, сыгъдӕг тыхы разамындмӕ гӕсгӕ кӕй архайынц ӕмӕ, уыцы тых цы дыргъ дӕтты, уый сӕм кӕй ис. Павел ранымадта, адӕймагмӕ сыгъдӕг тыхы фӕрцы цы фараст миниуӕджы фӕзыны, уыдон: «уарзондзинад, цин, фарн, бирӕфӕразондзинад, хӕларзӕрдӕдзинад, хорздзинад, уырнындзинад, фӕлмӕн удыхъӕд, хиуыл хӕцын» (Гал. 5:22, 23). Ахӕм цӕстдарджытӕ ӕфсымӕртӕн ӕмӕ хотӕн сты ныфсы хос ӕмӕ фӕархайынц, цӕмӕй ӕмбырды адӕм Хуыцауӕн ӕмвӕнд-ӕмзондӕй лӕггад кӕной. Сӕ цард куыд аразынц ӕмӕ сӕ фыдӕбон цы тыллӕг хӕссы, уымӕй бӕрӕг вӕййы, цӕстдарджытӕй сӕ ӕцӕгдӕр сыгъдӕг тых кӕй сӕвӕрдта (Хъуыд. 20:28).

ӔМБЫРД КӔРӔДЗИЙЫЛ БӔТТЫНЦ

²¹ Хистӕр нӕлгоймӕгтӕ хъуамӕ иумӕ архайой, цӕмӕй ӕмбырды иудзинад уа. Уый тынг ахсджиаг у. Алчидӕр сӕ йӕ удыхъӕдӕй, кӕй зӕгъын ӕй хъӕуы, иннӕтӕй тынг хицӕн кӕны. Фӕлӕ кӕрӕдзийӕн куы аргъ кӕной ӕмӕ кӕрӕдзимӕ лӕмбынӕг куы хъусой, уӕд се ’хсӕн уыдзӕн иудзинад, кӕд алы фарстайы фӕдыл иухуызон нӕ хъуыды кӕндзысты, уӕддӕр. Хистӕр нӕлгоймӕгтӕ иумӕ цы уынаффӕ рахӕссой, уый Библийы уагӕвӕрдты ныхмӕ куы нӕ уа, уӕд сӕ алчидӕр хъуамӕ уыцы уынаффӕйыл сразы уа ӕмӕ уымӕ гӕсгӕ архайа. Адӕймаг ӕнцондзырд куы уа, уӕд уый ууыл дзурӕг у, ӕмӕ йӕм ис «уӕлейӕ ӕрцӕугӕ зонд». Уыцы зонд та у «фарнуарзаг» ӕмӕ «ӕмбаргӕ» (Иак. 3:17, 18). Хистӕр нӕлгоймӕгтӕй афтӕ хъуамӕ мачи хъуыды кӕна, ӕмӕ иннӕтӕй уӕлдӕр у. Стӕй хъуамӕ йӕхи иннӕтӕн хицау ма кӕна. Хистӕр нӕлгоймӕгтӕ ӕмбырдыл иумӕ куы фӕтыхсынц ӕмӕ кӕрӕдзиимӕ ӕмгуыст куы фӕкӕнынц, уӕд ӕмгуыст фӕкӕнынц Йегъовӕимӕ (1 Кор., 12 сӕр; Кол. 2:19).

ЦӔСТДАРӔДЖЫ ХӔСТӔМ ТЫРН

²² Фӕлтӕрдджын ӕфсымӕртӕй алкӕй дӕр хъуамӕ фӕнда, цӕстдарӕг суа, уый (1 Тим. 3:1). Фӕлӕ сӕ зӕрдыл хъуамӕ дарой, хистӕр нӕлгоймӕгты кӕй фӕхъӕуы бирӕ фыдӕбон кӕнын ӕмӕ удуӕлдайӕ лӕггад кӕнын. Уыдон хъуамӕ цӕттӕ уой хотӕ ӕмӕ ӕфсымӕртӕн лӕггад кӕнынмӕ, цӕмӕй сын сӕ уырнындзинад фидар кӕной. Цӕстдарӕг уа, уымӕ чи тырны, уый хъуамӕ йӕхиуыл ӕппӕт хъарутӕй куса ӕмӕ йӕ удыхъӕды фидар кӕна, Библимӕ гӕсгӕ цӕстдарӕгмӕ цы миниуджытӕ хъуамӕ уа, уыдон.

АДӔЙМАГӔН ЙӔ УАВӔРТӔ КУЫ ФӔИВОЙ

²³ Афтӕ вӕййы, ӕмӕ, бирӕ азты дӕргъы иузӕрдионӕй чи фӕлӕггад кодта, ахӕм ӕфсымӕр фӕрынчын кӕнӕ та ӕндӕр цӕйдӕр тыххӕй йӕ бон нал у хистӕр нӕлгоймагӕй лӕггад кӕнын. Чи зоны йыл азтӕ сӕ уӕз кӕй ӕруагътой, уый тыххӕй йӕ бон нал у цӕстдарӕджы хӕстӕ ӕххӕст кӕнын. Фӕлӕ уӕддӕр, цалынмӕ хистӕр нӕлгоймагӕй ӕвӕрд у, уӕдмӕ йын иннӕтӕ хъуамӕ аргъ кӕной ӕмӕ йӕ нымайой. Йӕ бон раздӕры хуызӕн бирӕ кӕй нал у аразын, уый тыххӕй йӕ йӕ хӕстӕ уадзын нӕ хъӕуы. Хъуамӕ йӕ дарддӕр дӕр нымайой уӕлдай кады аккагыл. Ахӕм кады аккаг сты, Хуыцауы дзуг хизгӕйӕ бирӕ чи фыдӕбон кӕны ӕмӕ ӕппӕт хъарутӕй чи архайы, уыцы хистӕр нӕлгоймӕгтӕ се ’ппӕт дӕр.

²⁴ Фӕлӕ кӕд уӕддӕр ӕфсымӕрмӕ афтӕ кӕсы, ӕмӕ, йӕ бон раздӕрау бирӕ аразын кӕй нал у, уымӕ гӕсгӕ йын хуыздӕр уыдзӕн цӕстдарӕджы хӕстӕ ныууадзын, уӕд уый йӕхи бар у (1 Пет. 5:2). Уӕддӕр ын иннӕтӕ хъуамӕ аргъ кӕной. Кӕд хистӕр нӕлгоймаджы хӕстӕ нал ӕххӕст кӕндзӕн ӕмӕ-иу ын цавӕрдӕр хъуыддӕгтӕ нал бахӕс кӕндзысты, уӕддӕр ӕмбырды йӕ бон бирӕ хорз хъуыддӕгтӕ уыдзӕн аразын.

ӔМБЫРДЫ СЫЛ ЦАВӔР ХӔСТӔ ИС

²⁵ Хистӕр нӕлгоймӕгтыл ӕмбырды ис алыхуызон хӕстӕ. Ис хистӕр нӕлгоймӕгты советы координатор, ис ӕмбырды секретарь, уацамындӕн дзуапдӕттӕг цӕстдарӕг, «Хъахъхъӕнӕн мӕсыджы» ахуыр чи фӕуадзы, уый, стӕй, «Нӕ чырыстон цард ӕмӕ нӕ лӕггад» чи хуыйны, уыцы фембӕлды цӕстдарӕг. Уымӕй уӕлдай, хистӕр нӕлгоймӕгтӕй бирӕтӕ вӕййынц уацамындон къордты цӕстдарджытӕ. Уыцы хӕстӕ арӕх нӕ фӕраив-баив кӕнынц. Фӕлӕ ӕфсымӕр ӕндӕр ранмӕ цӕрынмӕ куы алидза, йе ’нӕниздзинад кӕй фӕцудыдта, уый тыххӕй йӕ бон йӕ хӕстӕ ӕххӕст кӕнын куы нал уа кӕнӕ цавӕрдӕр аххосӕгтӕм гӕсгӕ хистӕр нӕлгоймаг куы нал уа, уӕд ын йӕ хӕстӕ ӕндӕр хистӕр нӕлгоймагӕн бахъӕудзӕн бахӕс кӕнын. Цӕстдарджытӕ кӕм нӕ фаг кӕны, ахӕм ӕмбырды иу хистӕр нӕлгоймаджы ӕххӕст кӕнын бахъӕуы цалдӕр хӕсы дӕр, цалынмӕ ӕмбырды ӕндӕр ӕфсымӕрты не снысан кӕной хистӕр нӕлгоймӕгтӕй, уӕдмӕ.

²⁶ Хистӕр нӕлгоймӕгты советы координатор фӕуадзы хистӕр нӕлгоймӕгты фембӕлдтӕ. Ӕмӕ иннӕ хистӕр нӕлгоймӕгтимӕ сӕрныллӕгӕй ӕмгуыст кӕны, цӕмӕй Хуыцауы дзугыл хуыздӕр тыхсой (Ром. 12:10; 1 Пет. 5:2, 3). Уый хъуамӕ хорз арӕхса хъуыддӕгтӕ пълан кӕнынмӕ ӕмӕ разамынд дӕттынмӕ ӕмӕ йӕ хӕстӕ зӕрдиагӕй ӕххӕст кӕна (Ром. 12:8).

²⁷ Секретарь йӕ хъус дары ӕмбырды документтӕм ӕмӕ хистӕр нӕлгоймӕгтӕн ахсджиаг информаци фӕхабар кӕны. Кӕд хъӕуа, уӕд ӕндӕр хистӕр нӕлгоймагӕн кӕнӕ арӕхстджын кӕстӕриуӕггӕнӕг ӕфсымӕрӕн бахӕс кӕндзысты, цӕмӕй йын ӕххуыс кӕна.

²⁸ Уацамындӕн дзуапдӕттӕг цӕстдарӕг йӕ хъус дары, хъусын кӕныны хъуыддагимӕ цыдӕриддӕр баст у, уымӕ. Фӕхъӕуы йӕ уацамындон къордтӕ се ’ппӕт дӕр бабӕрӕг кӕнын, ӕмӕ график афтӕ скӕны, цӕмӕй-иу алы мӕйы дӕр иу сабат-хуыцаубон къордтӕй искӕцыимӕ балӕггад кӕна. Цалдӕр уацамындон къорды йеддӕмӕ кӕм нӕ вӕййы, ахӕм гыццыл ӕмбырдты йӕ бон вӕййы алы къорд дӕр афӕдз дыууӕ хатты бӕрӕг кӕнын. Къорд куы бӕрӕг кӕна, уӕд уацамындон фембӕлд ауадздзӕн, стӕй семӕ балӕггад кӕндзӕн ӕмӕ сын баххуыс кӕндзӕн, ногӕй бацӕуын кӕмӕ хъӕуы, ахӕм адӕмимӕ аныхас кӕнынӕн ӕмӕ искӕимӕ Библи ахуыр кӕнынӕн.

УАЦАМЫНДОН КЪОРДТЫ ЦӔСТДАРДЖЫТӔ

²⁹ Ӕмбырды кадджындӕр хӕстӕй иу у уацамындон къорды цӕстдарӕгӕй лӕггад кӕнын. Йӕ хӕстӕм хауы ахӕм хъуыддӕгтӕ: 1) тыхсы, йӕ уацамындон къорды алы адӕймагӕн дӕр йӕ уырнындзинад цы уавӕры ис, ууыл; 2) ӕххуыс сын кӕны, цӕмӕй хъусын кӕныны хъуыддаджы ӕдзухдӕр зӕрдиагӕй архайой ӕмӕ сын уый циндзинад хӕсса; 3) йӕ къорды цы кӕстӕриуӕггӕнӕг ӕфсымӕртӕ ис, уыдонӕн ӕххуыс кӕны ӕмӕ сӕ ахуыр кӕны, цӕмӕй сӕхиуыл кусой ӕмӕ сӕ бон уа ӕмбырды кадджын хӕстӕ ӕххӕст кӕнын. Хистӕр нӕлгоймӕгтӕ иумӕ аскъуыддзаг кӕнынц, ӕфсымӕртӕй ӕппӕт уыцы хӕстӕ ӕххӕст кӕнынмӕ хуыздӕр чи сарӕхсдзӕн, уый.

³⁰ Уацамындон къорды цӕстдарджытыл ахӕм стыр хӕстӕ кӕй ис, уымӕ гӕсгӕ, гӕнӕн уӕвгӕйӕ, хъуамӕ уой хистӕр нӕлгоймӕгтӕ. Кӕнӕ, цалынмӕ ӕмбырды фылдӕр хистӕр нӕлгоймӕгтӕ нӕ фӕзына, уӕдмӕ уыцы хъуыддаг бахӕс кӕнӕн ис, хорз чи сарӕхсдзӕн, ахӕм кӕстӕриуӕггӕнӕг ӕфсымӕрӕн. Уыцы хӕс кӕстӕриуӕггӕнӕг ӕфсымӕр куы феххӕст кӕны, уӕд ӕй фӕхонынц уацамындон къорды лӕггадгӕнӕг, ӕмбырды цӕстдарӕг кӕй нӕу, уымӕ гӕсгӕ. Ӕмбырды хистӕр нӕлгоймӕгтӕ йӕм сӕ хъус фӕдарынц, ӕмӕ йын цы амындтӕ раттынц, уыдонмӕ гӕсгӕ фӕархайы.

³¹ Уацамындон къорды цӕстдарӕджы сӕйрагдӕр хӕстӕй иу у, цӕмӕй йӕ къордӕн уацамынды хорз разамынд дӕтта ӕмӕ сын уыцы хъуыддаджы фӕзминаг уа. Йӕ къорды хъусынгӕнджытӕ куы уыной, ӕмӕ алы къуыри дӕр хъусын кӕныны хъуыддаджы зынгзӕрдӕйӕ архайы ӕмӕ уый ӕрмӕст йӕ хӕсыл нӕ нымайы, фӕлӕ йӕ зӕрдӕмӕ дӕр цӕуы, уӕд уыдон дӕр зынгзӕрдӕйӕ хъусын кӕндзысты. Хотӕ ӕмӕ ӕфсымӕртӕ иумӕ куы фӕхъусын кӕнынц, уӕд сӕ уый тынг бафидар кӕны ӕмӕ сын стыр пайда ӕрхӕссы, ӕмӕ уымӕ гӕсгӕ хорз уаид къордӕй хъусын кӕнынӕн ахӕм рӕстӕг равзарын, цӕмӕй-иу сӕ фылдӕрӕн сӕ бон уа ӕрбацӕуын (Лук. 10:1–16). Къорды цӕстдарӕг ӕдзухдӕр хъуамӕ йӕ хъус дара, цӕмӕй алкӕмӕн дӕр, кӕм хъусын кӕна, уый уа. Уацамындон фембӕлдтӕ дӕр-иу йӕхӕдӕг ауадздзӕн ӕмӕ, уыцы бон чи кӕимӕ ӕмӕ кӕдӕм ацӕудзӕн, уый дӕр спълан кӕндзӕн. Кӕд йӕ бон нӕ уа уацамындон фембӕлдмӕ ӕрбацӕуын, уӕд фембӕлд ауадзын бахӕс кӕндзӕн ӕндӕр хистӕр нӕлгоймагӕн кӕнӕ кӕстӕриуӕггӕнӕг ӕфсымӕрӕн, кӕд уыдонӕй йӕ бон никӕмӕн уа, уӕд та – фӕлтӕрдджын хъусынгӕнджытӕй искӕмӕн. Афтӕмӕй хъусынгӕнджытӕ, цы кӕнын сӕ хъӕуы, уый зондзысты.

³² Къорды цӕстдарӕг-иу хъуамӕ йӕ къорд рагацау бацӕттӕ кӕна, уацамындӕн дзуапдӕттӕг цӕстдарӕг сӕ кӕй бӕрӕг кӕндзӕн, уымӕ. Хъуамӕ сын уый тыххӕй фехъусын кӕна ӕмӕ сын цы пайда ӕрхӕсдзӕн, уый сын бамбарын кӕна, цӕмӕй йӕм се ’ппӕт дӕр ӕнхъӕлмӕ кӕсой ӕмӕ иумӕ зӕрдиагӕй балӕггад кӕной.

³³ Ӕфсымӕртӕ афтӕ спълан кӕнынц, цӕмӕй уацамындон къордтӕ стыр ма уой. Уый фӕрцы къорды цӕстдарӕг хорз базонгӕ вӕййы йӕ къорды алкӕимӕ дӕр ӕмӕ сӕ алкӕуыл дӕр фӕтыхсы, хорз фыййау йӕ фыстыл куыд фӕтыхсы, афтӕ. Алкӕмӕн дӕр сӕ феххуыс кӕны ӕмӕ сӕ фӕразӕнгард кӕны, цӕмӕй зӕрдиагӕй хъусын кӕной, ӕмбырды фембӕлдтӕ ма цух кӕной ӕмӕ дзы архайой. Стӕй ма сын, сӕ уырнындзинад фидар цӕй фӕрцы уыдзӕн, ӕндӕр ахӕм хъуыддӕгты дӕр феххуыс кӕны. Уымӕй уӕлдай, рынчын чи у кӕнӕ йӕхимӕ чи ныхъхъуыста, уыдоны бабӕрӕг кӕны ӕмӕ сӕ бафидар кӕны. Йӕ ныфсы ныхас кӕнӕ йӕ хорз уынаффӕ, чи зоны, кӕйдӕрты баразӕнгард кӕна, цӕмӕй ӕмбырды фылдӕр хӕстӕм тырной ӕмӕ хотӕ ӕмӕ ӕфсымӕртӕн фылдӕр ӕххуыс кӕной. Кӕй зӕгъын ӕй хъӕуы, алы къорды цӕстдарӕг дӕр сӕйраджыдӕр йӕхи къордӕн феххуыс кӕны. Фӕлӕ ӕмбырды хистӕр нӕлгоймаг ӕмӕ фыййау кӕй у, уымӕ гӕсгӕ алкӕуыл дӕр тыхсы ӕмӕ цӕттӕ у, ӕххуыс кӕйдӕриддӕр бахъӕуа, уымӕн йӕ фарсмӕ балӕууынмӕ (Хъуыд. 20:17, 28).

³⁴ Къорды цӕстдарӕджы хӕс ма у, йӕ къорды чи ис, уыдоны уацамындон хыгъдтӕ ӕмбырд кӕнын дӕр. Уыцы хыгъдтӕ стӕй ратты ӕмбырды секретармӕ. Алы хъусынгӕнӕг дӕр-иу йӕ хыгъд афоныл куы ратта, уӕд уый стыр ӕххуыс уыдзӕн къорды цӕстдарӕгӕн. Алы мӕйы кӕрон дӕр хыгъд раттӕн вӕййы къорды цӕстдарӕгмӕ кӕнӕ та йӕ ныппарӕн вӕййы, Паддзахады залы уацамындон хыгъдтӕн цы асыкк вӕййы, уым.

ӔМБЫРДЫ КОМИТЕТ

³⁵ Ӕмбырды комитетыл ис бӕлвырд хӕстӕ. Уыцы комитеты вӕййы хистӕр нӕлгоймӕгты советы координатор, секретарь ӕмӕ уацамындӕн дзуапдӕттӕг цӕстдарӕг. Зӕгъӕм, ӕмбырды комитет бар ратты, цӕмӕй Паддзахады залы чындзӕхсӕвы кӕнӕ зианы фӕдыл раныхас скӕной. Стӕй, хъусынгӕнджытӕй чи кӕцы уацамындон къорды уыдзӕн, уый дӕр уыдон спълан кӕнынц. Ӕххӕстрӕстӕг пионерӕй, ӕххуысгӕнӕг пионерӕй кӕнӕ ӕндӕр хуызы лӕггад кӕнын кӕй фӕфӕнды, уыцы хъусынгӕнджыты анкетӕтӕм ӕркӕсынц ӕмӕ сыл сӕ къухтӕ ӕрфыссынц. Ӕмбырды комитет фӕархайы ӕмбырды хистӕр нӕлгоймӕгты советы разамындмӕ гӕсгӕ.

³⁶ Ӕмбырды комитеты чи ис, уыцы ӕфсымӕрты хӕстӕм, стӕй, «Хъахъхъӕнӕн мӕсыджы» ахуыр чи фӕуадзы, уыцы ӕфсымӕры хӕстӕм ӕмӕ «Нӕ чырыстон цард ӕмӕ нӕ лӕггад» чи хуыйны, уыцы фембӕлды цӕстдарӕджы ӕмӕ иннӕ хистӕр нӕлгоймӕгты хӕстӕм цы хауы, уый фӕдыл разамынд ратты филиал.

³⁷ Алы ӕмбырды дӕр хистӕр нӕлгоймӕгтӕ рӕстӕгӕй-рӕстӕгмӕ фембӕлынц ӕмӕ аныхас кӕнынц, хотӕ ӕмӕ ӕфсымӕртӕн сӕ уырнындзинад цы уавӕры ис, ууыл. Ахӕм фембӕлд сын вӕййы, районон цӕстдарӕг се ’мбырд куы фӕбӕрӕг кӕны, уӕд. Стӕй ма ноджыдӕр иу фембӕлд скӕнынц, районон цӕстдарӕг сӕ куы бабӕрӕг кӕны, уымӕй иу-ӕртӕ мӕйы фӕстӕ. Кӕй зӕгъын ӕй хъӕуы, уавӕр куы дома, уӕд сӕ бон у кӕдфӕнды дӕр фембӕлын.

СӔ КОММӔ КӔСУТ

³⁸ Кӕд цӕстдарджытӕ дӕр ӕнӕххӕст адӕймӕгтӕ сты, уӕддӕр ӕмбырды алчидӕр хъуамӕ сӕ коммӕ кӕса, уымӕн ӕмӕ Йегъовӕйы афтӕ фӕнды. Цӕстдарджытӕ сӕ хъуыддӕгты тыххӕй йӕ разы дзуапп ратдзысты. Хистӕр нӕлгоймӕгтӕ сты Хуыцауы минӕвӕрттӕ, ӕмӕ йӕ адӕмӕн разамынд уыдоны уылты дӕтты. Дзуттӕгтӕм 13:17 фыст ис: «Разамынд уын чи дӕтты, уыдон ӕдзухдӕр сымахыл тыхсынц, уымӕн ӕмӕ сӕ сымах тыххӕй дзуапп раттын хъӕудзӕн. Ӕмӕ сӕм уӕдӕ хъусут ӕмӕ сӕ коммӕ кӕсут, цӕмӕй уыцы хъуыддаг ӕвӕндонӕй ма кӕной, фӕлӕ зӕрдиагӕй. Ӕвӕндонӕй йӕ куы кӕной, уӕд уый сымахӕн хорз нӕу». Алы цӕстдарӕджы дӕр Йегъовӕ йӕ сыгъдӕг тыхӕй снысан кӕны, ӕмӕ, куы хъӕуа, уӕд ӕй уыцы сыгъдӕг тыхы фӕрцы йӕ хӕстӕй сӕрибар дӕр скӕндзӕн. Афтӕ бакӕнын хъӕудзӕн, зӕгъӕм, сыгъдӕг тыхӕй цы миниуджытӕ гуыры, уыдон йӕ царды куы нал ӕвдиса ӕмӕ йӕ цард Библийы домӕнтӕм гӕсгӕ куы нал араза, уӕд.

³⁹ Ӕмбырды цӕстдарджытӕ мах тыххӕй афтӕ бирӕ кӕй фыдӕбон кӕнынц ӕмӕ нын фӕзминаг кӕй сты, уый тыххӕй сӕ бузныг не стӕм? Павел Фессалоникӕйы ӕмбырдмӕ куы фыста, уӕд ӕфсымӕрты баразӕнгард кодта: «Курӕг уӕ стӕм, не ’фсымӕртӕ: чи уӕм фыдӕбон кӕны, Хицауы хъуыддаджы уын разамынд чи дӕтты ӕмӕ уын зонд чи амоны, уыдоны нымайут. Сӕ фыдӕбоны тыххӕй сын стыр аргъ кӕнут ӕмӕ сӕ уарзут. Уӕ кӕрӕдзиимӕ хӕларӕй цӕрут» (1 Фес. 5:12, 13). Цӕстдарджыты фыдӕбоны фӕрцы нын Хуыцауӕн лӕггад кӕнын бирӕ ӕнцондӕр ӕмӕ ӕхсызгондӕр у. Стӕй ма Павел Тимофеймӕ йӕ фыццаг фыстӕджы дӕр дзырдта, ӕмбырды хотӕ ӕмӕ ӕфсымӕртӕ цӕстдарджытӕм цы цӕстӕй хъуамӕ кӕсой, уый тыххӕй: «Хистӕр нӕлгоймӕгтӕ дӕттынц хорз разамынд, ӕмӕ сӕ уымӕ гӕсгӕ нымайӕнт уӕлдай кады аккагыл, уӕлдайдӕр та, Хуыцауы ныхас дзурын ӕмӕ амоныны хъуыддаджы чи фыдӕбон кӕны, уыдоны» (1 Тим. 5:17).

ӔНДӔР ХӔСТӔ

⁴⁰ Иуӕй-иу хатт хистӕр нӕлгоймӕгтӕй кӕйдӕрты равзарынц, рынчынты чи бӕрӕг кӕны, уыцы къордты лӕггад кӕнынмӕ. Чидӕртӕ та сӕ фӕлӕггад кӕнынц рынчындӕттимӕ ӕмгуыстгӕнӕг комитетты. Уыдон рынчындӕттӕм бацӕуынц ӕмӕ дохтырты разӕнгард кӕнынц, цӕмӕй Йегъовӕйы Ӕвдисӕнтӕн ӕнӕ тугӕй хос кӕной. Бахӕссынц сын, туг уадзыны бӕсты цавӕр мадзӕлттӕ ис, уый фӕдыл алыхуызон информаци. Цӕстдарджытӕй иуӕй-иутӕ та феххуыс кӕнынц Паддзахады залтӕ ӕмӕ Конгрессты залтӕ аразынӕн ӕмӕ сӕм зилынӕн, кӕнӕ та фӕлӕггад кӕнынц регионалон конгрессты комитетты. Уыцы ӕфсымӕртӕ бирӕ кӕй фыдӕбон кӕнынц ӕмӕ сӕ рӕстӕг ӕмӕ сӕ хъарутӕ кӕй не ’вгъау кӕнынц, уый тыххӕй сӕ Хуыцауы адӕм се ’ппӕт дӕр бузныг сты. Мах ахӕм адӕймӕгтӕн тынг аргъ кӕнӕм (Фил. 2:29).

РАЙОНОН ЦӔСТДАРӔГ

⁴¹ Разамонӕг совет йӕ хъус дары, цӕмӕй-иу фӕлтӕрдджын хистӕр нӕлгоймӕгты снысан кӕной районон цӕстдарджытӕй. Филиал сын бахӕс кӕны, цӕмӕй, сӕ районы цы ӕмбырдтӕ ис, уыдон бӕрӕг кӕной, арӕхдӕр – афӕдз дыууӕ хатты. Рӕстӕгӕй-рӕстӕгмӕ ма бабӕрӕг кӕнынц, дард рӕтты чи лӕггад кӕны, уыцы пионерты дӕр. Кӕд кӕцы ӕмбырд бӕрӕг кӕндзысты, уый спълан кӕнынц ӕмӕ уый тыххӕй алы ӕмбырдӕн дӕр рагацау фӕхабар кӕнынц, цӕмӕй сын йе ’рбацыд фылдӕр пайда ӕрхӕсса.

⁴² Хистӕр нӕлгоймӕгты советы координатор йӕхимӕ разамынд райсы, цӕмӕй районон цӕстдарӕджы ӕрбацыдмӕ алцыдӕр цӕттӕ уа. Афтӕмӕй уыцы рӕстӕг се ’ппӕтӕн дӕр сӕ уырнындзинад бафидар вӕййы (Ром. 1:11, 12). Районон цӕстдарӕг сӕ кӕд бӕрӕг кӕндзӕн ӕмӕ йӕхимӕ дӕр ӕмӕ йӕ бинойнагмӕ дӕр (кӕд ын ис, уӕд) цӕмӕй хъӕуы фӕкӕсын, уый тыххӕй куыддӕр фехъусын кӕна, афтӕ координатор ӕфсымӕрты уылты цӕрӕнбынат бацагурдзӕн ӕмӕ ма ноджыдӕр цы хъӕуа, уыдӕттыл дӕр батыхсдзӕн. Стӕй сбӕлвырд кӕндзӕн, цы хабӕрттӕ спълан кодтой, уыдӕтты тыххӕй алчидӕр зоны ӕви нӕ, уыимӕ районон цӕстдарӕг йӕхӕдӕг дӕр.

⁴³ Районон цӕстдарӕг хистӕр нӕлгоймӕгты советы координаторимӕ аныхас кӕндзӕн, ӕмбырды фембӕлдтӕ ӕмӕ уацамындон фембӕлдтӕ кӕд ӕмӕ цафон уыдзысты, уый фӕдыл. Фембӕлдтӕ спълан кӕнын хъӕудзӕн районон цӕстдарӕджы амындтӕм гӕсгӕ ӕмӕ сын филиал цы разамынд ратты, уымӕ гӕсгӕ. Се ’ппӕтӕн дӕр рагацау фехъусын кӕнын хъӕудзӕн, ӕмбырды фембӕлдтӕ, пионертимӕ фембӕлд, хистӕр нӕлгоймӕгтимӕ ӕмӕ кӕстӕриуӕггӕнӕг ӕфсымӕртимӕ фембӕлд, стӕй уацамындон фембӕлдтӕ кӕд ӕмӕ кӕм уыдзысты, уый тыххӕй.

⁴⁴ Дыццӕджы фӕссихор районон цӕстдарӕг ӕркӕсы ӕмбырды хъусынгӕнджыты карточкӕтӕм, фембӕлдты цал адӕймаджы вӕййы ӕмӕ участоктыл куыд арӕх ӕрзилынц, уымӕ, стӕй ӕхцайы хыгъдтӕм дӕр. Уый фӕрцы фены, ӕмбырды хъус ӕрдарын фылдӕр цӕмӕ хъӕуы ӕмӕ бӕрнон ӕфсымӕртӕм йӕ бон фӕкӕсын цӕмӕй у, уый. Хистӕр нӕлгоймӕгты советы координаторы хъӕуы батыхсын, цӕмӕй районон цӕстдарӕгмӕ ӕмбырды гӕххӕтыттӕ афоныл фӕхӕццӕ кӕной.

⁴⁵ Районон цӕстдарӕг ӕмбырд куы фӕбӕрӕг кӕны, уӕд фӕархайы, гӕнӕн ӕмӕ амалӕй, фылдӕр хъусынгӕнджытимӕ аныхас кӕныныл, зӕгъӕм, фембӕлдты рӕстӕг, хъусынгӕнгӕйӕ, сихорафон ӕмӕ ӕндӕр уавӕрты дӕр. Уымӕй уӕлдай ма йын вӕййы фембӕлд хистӕр нӕлгоймӕгтимӕ ӕмӕ кӕстӕриуӕггӕнӕг ӕфсымӕртимӕ, ӕмӕ сын, кӕм хъӕуы, уым Фыстадӕй уынаффӕтӕ ратты, фӕхуыздӕр кӕнын цы хъӕуы, уый сын фӕзӕгъы ӕмӕ сын сӕ ныфсыл ныфс бафтауы, цӕмӕй сӕ хӕстӕ ӕххӕст кӕной ӕмӕ сын Хуыцау сӕ бар кӕй бакодта, уыцы дзугӕн хорз фыййӕуттӕ уой (Ӕмб. 27:23; Хъуыд. 20:26–32; 1 Тим. 4:11–16). Фембӕлд ма йын вӕййы пионертимӕ дӕр. Бафидар сӕ кӕны ӕмӕ, сӕ лӕггады цы зындзинӕдтыл ӕмбӕлынц, уыдоны сӕрты ахизынӕн сын хорз уынаффӕтӕ ратты.

⁴⁶ Кӕд ма ӕмбырды ӕндӕр фарстатӕм дӕр хъӕуа ӕркӕсын, уӕд сӕм районон цӕстдарӕг, гӕнӕн уӕвгӕйӕ, уыцы къуыри ӕркӕсдзӕн. Цавӕрдӕр фарста къуырийы кӕронмӕ куы нӕ аскъуыддзаг уа, уӕд районон цӕстдарӕгӕн йӕ бон у хистӕр нӕлгоймӕгтӕн кӕнӕ, уыцы фарста кӕмӕ хауы, уыдонӕн баххуыс кӕнын, цӕмӕй уый фӕдыл Библийы разамынд ссарой. Ахӕм хабар кӕй ӕрцыд, уымӕ гӕсгӕ кӕд филиалы исты бакӕнын хъӕуа, уӕд районон цӕстдарӕг хистӕр нӕлгоймӕгтимӕ иумӕ уый тыххӕй филиалмӕ писмойы бӕстон ныффысдзӕн.

⁴⁷ Районон цӕстдарӕг фӕцӕуы, цы ӕмбырд фӕбӕрӕг кӕны, уыцы ӕмбырды фембӕлдтӕм. Хатт ӕмбырды фембӕлдты график ивд ӕрцӕуы, филиалӕй цы разамынд ӕрцӕуы, уымӕ гӕсгӕ. Районон цӕстдарӕгӕн вӕййы раныхӕстӕ ӕмӕ, цы хъуыдытӕ бацӕттӕ кӕны, уыдоны фӕрцы ӕмбырды ныфсыл ныфс бафтауы, ахсджиаг хъуыддӕгтӕм сӕ сразӕнгард кӕны, зонд сын бацамоны ӕмӕ сын сӕ уырнындзинад бафидар кӕны. Районон цӕстдарӕг зӕрдиагӕй фӕархайы, цӕмӕй хотӕ ӕмӕ ӕфсымӕртӕ Йегъовӕйы ӕмӕ Йесо Чырыстийы, стӕй организаци дӕр ноджы тынгдӕр уарзой.

⁴⁸ Ӕмбырд бӕрӕг кӕнгӕйӕ ма районон цӕстдарӕгӕн йӕ нысан вӕййы, цӕмӕй хотӕ ӕмӕ ӕфсымӕрты зӕрдиагӕй хъусын кӕнынмӕ сразӕнгард кӕна ӕмӕ сын хорз уынаффӕтӕ ратта. Ӕмбырды бирӕтӕн сӕ бон уыдзӕн сӕ хъуыддӕгтӕ афтӕ спълан кӕнын, цӕмӕй уыцы къуыри уацамынды фылдӕр архайой, чи зоны, уыцы мӕй ӕххуысгӕнӕг пионертӕй дӕр балӕггад кӕной. Йемӕ кӕнӕ йӕ бинойнагимӕ балӕггад кӕнын кӕй фӕнда, уыдонӕн сӕ бон уыдзӕн сӕхи ныффыссын. Библи кӕимӕ ахуыр кӕнынц кӕнӕ ногӕй бацӕуинаг кӕмӕ сты, ахӕм адӕймагмӕ сӕ куы акӕной, уӕд уый фылдӕр пайда ӕрхӕсдзӕн. Уыцы къуыри ӕппӕт хъарутӕй куы балӕггад кӕнай, уӕд уый дӕхицӕн дӕр ӕмӕ иннӕтӕн дӕр стыр пайда ӕрхӕсдзӕн (Ӕмб. 27:17).

⁴⁹ Алы районӕн дӕр афӕдз вӕййы дыууӕ районон конгрессы. Уыцы конгресстӕ куыд ацӕудзысты, уымӕн дзуапп дӕтты районон цӕстдарӕг. Уый снысан кӕны конгрессы цӕстдарӕджы ӕмӕ конгрессы цӕстдарӕджы ӕххуысгӕнӕджы. Уыдон, районон цӕстдарӕгимӕ ӕмгуыст кӕнгӕйӕ, конгресмӕ цыдӕриддӕр хъӕуы, уыдӕттӕ бацӕттӕ кӕнынц. Ӕмӕ уый фӕрцы районон цӕстдарӕгӕн йӕ бон вӕййы йӕ хъарутӕ сӕйраджыдӕр конгрессы программӕмӕ саразын. Стӕй ма, хорз чи арӕхсы, ахӕм ӕфсымӕртӕн бахӕс кӕны, цӕмӕй конгрессы алыхуызон хайӕдтӕн дзуапп дӕттой. Уымӕй уӕлдай ма батыхсы, цӕмӕй алы конгрессы фӕстӕ дӕр районы ӕхцайы хыгъдтӕм ӕркӕсой. Алы аз дӕр районон конгресстӕй иуы раныхӕстӕ вӕййы филиалӕй ӕрвыст ӕфсымӕрӕн. Ӕмбырдтӕ кӕрӕдзийӕ тынг дард куы вӕййынц кӕнӕ, конгресс кӕм фӕцӕуы, уым фаг бынат куы нӕ вӕййы, уӕд иуӕй-иу районтӕ дыууӕ дихы дӕр фӕкӕнынц ӕмӕ конгресс дыууӕ хатты ауадзынц.

⁵⁰ Районон цӕстдарӕг алы мӕйы кӕрон дӕр йӕ уацамынды хыгъд арвиты комкоммӕ филиалмӕ. Ӕмбырдтӕ бӕрӕг кӕнгӕйӕ йӕ цыдӕр хӕрдзтӕ скӕнын дӕр бахъӕуы, зӕгъӕм, фӕндаггагӕн, хӕринагӕн, цӕрӕнбынатӕн ӕмӕ ма йӕ лӕггадимӕ баст чи у, ӕндӕр ахӕм хабӕрттӕн. Ӕмӕ кӕд, цы ӕмбырдимӕ лӕггад кодта, уыцы ӕмбырд ын ӕхцайӕ нӕ баххуыс кодта, уӕд йӕ бон у ӕххуыс филиалӕй ракурын. Цӕуӕг цӕстдарджытӕ нӕ дызӕрдыг кӕнынц, Йегъовӕйы Паддзахады хъуыддӕгтӕ фыццаг бынаты куы ’вӕрой, уӕд цух кӕй ницӕмӕй уыдзысты – Йесо куыддӕриддӕр загъта, афтӕ (Лук. 12:31). Ӕмбырдтӕ сӕхицӕн стыр кадыл нымайынц, уыдоны тыххӕй чи фыдӕбон кӕны, уыцы иузӕрдион хистӕр нӕлгоймӕгты суазӕг кӕнын (3 Иоан. 5–8).

ФИЛИАЛЫ КОМИТЕТ

⁵¹ Йегъовӕйы Ӕвдисӕнтӕн ӕгас зӕххыл дӕр цы филиалтӕ ис, уыдонӕй алкӕцыйы дӕр ис филиалы комитет. Комитеты вӕййы, уырнындзинады фидар чи у, ахӕм фӕлтӕрдджын ӕфсымӕртӕ ӕртӕйӕ кӕнӕ фылдӕрӕй. Уыдон сӕ хъус дарынц, дзуапп цы бӕстӕйӕн кӕнӕ цы бӕстӕтӕн фӕдӕттынц, уыдоны хъусын кӕныны хъуыддаг куыд цӕуы, уымӕ. Уыцы ӕфсымӕртӕй сӕ иу вӕййы филиалы комитеты координатор.

⁵² Филиалы комитеты чи лӕггад кӕны, уыцы ӕфсымӕртӕ скъуыддзаг кӕнынц, сӕ филиалы территорийы ӕппӕт ӕмбырдтӕм дӕр чи хауы, уыцы фарстатӕ. Филиалы комитет йӕ хъус дары, филиалы территорийы хорз хабар хъуыстгонд куыд цӕуы, уымӕ. Стӕй, кӕм хъӕуы, уым ног ӕмбырдтӕ ӕмӕ районтӕ дӕр скӕны, цӕмӕй хъусын кӕныны хъуыддаг размӕ ӕнӕкъуылымпыйӕ цӕуа. Филиалы комитет ма йӕ хъус дары, миссионертӕ, сӕрмагонд пионертӕ, ӕххӕстрӕстӕг пионертӕ ӕмӕ ӕххуысгӕнӕг пионертӕ куыд лӕггад кӕнынц, уымӕ дӕр. Уымӕй уӕлдай, районон ӕмӕ регионалон конгресстӕ куы вӕййы, уӕд алцыдӕр спълан кӕны, уыимӕ, ӕфсымӕртӕй чи цы кусдзӕн, уый дӕр, цӕмӕй алцыдӕр «уаг ӕмӕ ӕгъдауыл» уа (1 Кор. 14:40).

⁵³ Хатт филиал, цы бӕстӕйы ис, уымӕй уӕлдай ма йӕ хъус фӕдары ӕндӕр бӕстӕмӕ кӕнӕ бӕстӕтӕм дӕр. Уыцы бӕстӕты снысан кӕнынц бӕстӕйы комитет. Уый фӕрцы ӕнцондӕр вӕййы ахӕм бӕстӕты Хуыцауы Паддзахады хъуыддагмӕ лӕмбынӕгдӕр хъус дарын. Бӕстӕйы комитет йӕ хъус фӕдары, Вефилы куыст куыд цӕуы, уымӕ ӕмӕ сӕ бӕстӕйы хъусын кӕныны хъуыддагмӕ. Бӕстӕйы комитеты чи ис, уыцы ӕфсымӕрты ма фӕхъӕуы алыхуызон писмотӕ фыссын кӕнӕ дзуапп дӕттын. Бӕстӕйы комитет ӕмгуыст кӕны филиалы комитетимӕ, ӕмӕ афтӕмӕй размӕ кӕнынц Хуыцауы Паддзахады хъуыддаг.

⁵⁴ Филиалты комитетты ӕмӕ бӕстӕты комитетты чи ис, уыцы ӕфсымӕртӕй алкӕй дӕр снысан кӕны Разамонӕг совет.

СӔЙРАГ ХАЙАДЫ МИНӔВӔРТТӔ

⁵⁵ Разамонӕг совет рӕстӕгӕй-рӕстӕгмӕ фӕлтӕрдджын ӕфсымӕрты снысан кӕны, цӕмӕй, ӕгас зӕххыл цы филиалтӕ ис, уыдонӕй алкӕцы дӕр бабӕрӕг кӕной. Филиал чи фӕбӕрӕг кӕны, уыцы ӕфсымӕры хонынц сӕйраг хайады минӕвар. Йӕ сӕйраг нысан вӕййы, Вефилы чи лӕггад кӕны, уыдоны бафидар кӕнын ӕмӕ филиалы комитетӕн баххуыс кӕнын, хъусын кӕныны ӕмӕ ахуыргӕнинӕгтӕ цӕттӕ кӕныны хъуыддаджы цы зындзинӕдтӕ кӕнӕ цы фарстатӕ фӕзыны, уыдон аскъуыддзаг кӕнынӕн. Уыцы ӕфсымӕр фембӕлы районон цӕстдарджытӕй иуӕй-иутимӕ ӕмӕ хатт та – миссионертимӕ дӕр. Семӕ аныхас кӕны, цы зындзинӕдтыл ӕмбӕлынц ӕмӕ цӕмӕй тыхсынц, уыдӕттыл ӕмӕ сӕ баразӕнгард кӕны, цӕмӕй дарддӕр дӕр сӕ хъарутӕ аразой ӕппӕты ахсджиагдӕр хъуыддагмӕ – хъусын кӕнын ӕмӕ ахуыргӕнинӕгтӕ цӕттӕ кӕныны хъуыддагмӕ.

⁵⁶ Сӕйраг хайады минӕвары уӕлдай тынгдӕр фӕфӕнды, филиалӕн хъусын кӕныны хъуыддаджы ӕмӕ ӕмбырдтимӕ баст ӕндӕр хъуыддӕгты цы бантыст, уый базонын. Рӕстӕг куы фӕамоны, уӕд ма бабӕрӕг кӕны тӕлмацгӕнджыты офистӕ дӕр. Сӕйраг хайады минӕвар филиал куы фӕбӕрӕг кӕны, уӕд, гӕнӕн ӕмӕ амалӕй, йӕхӕдӕг дӕр хъусын кӕнынмӕ ацӕуы.

УАРЗӔГОЙ ЦӔСТДАРДЖЫТӔ

⁵⁷ Йегъовӕ йӕ дзуг кӕй бар бакодта, уыцы цӕстдарджытӕ ныл фыдау тыхсынц. Уыцы фӕлтӕрдджын ӕфсымӕрты фыдӕбон нын стыр пайда хӕссы. Сӕ коммӕ кӕй кӕсӕм, уый фӕрцы иудзинады стӕм ӕмбырды Хистӕр Йесо Чырыстиимӕ (1 Кор. 16:15–18; Еф. 1:22, 23). Хуыцауы сыгъдӕг тыхӕн къуылымпыйы хос не стӕм, ӕмӕ дунейы ӕппӕт ӕмбырдты дӕр йӕ куыст кӕны. Стӕй ӕвдисӕм, нӕ цард Библийы уагӕвӕрдтӕм гӕсгӕ кӕй аразӕм (Пс. 119:105).