1, 2. Районон цӕстдарджытӕ бирӕ ӕмбырдты цы бафиппайынц?

РАЙОНОН цӕстдарӕгӕн ӕмбырды хистӕр нӕлгоймӕгтимӕ цы фембӕлд уыд, уый фӕуд кодта. Ӕфсымӕртыл йӕ цӕст ахаста,– чидӕртӕ йын дзы фыдӕн дӕр бӕззыдысты,– ӕмӕ йӕхинымӕр загъта, куыд бирӕ фыдӕбон кӕнынц, ӕмӕ сӕ адӕймаг куыннӕ хъуамӕ уарза, зӕгъгӕ. Фӕлӕ иу ахсджиаг хъуыддагыл тыхсти, ӕмӕ сӕ бафарста: «Ӕфсымӕртӕ, зӕгъут-ма, цы сарӕзтат, цӕмӕй иннӕ ӕфсымӕртӕн дӕр сӕ бон уа ӕмбырды сӕхимӕ фылдӕр хӕстӕ райсын?» Хистӕр нӕлгоймӕгтӕй рох нӕ уыд, районон цӕстдарӕг сӕ уымӕй размӕ куы бӕрӕг кодта, уӕд сӕ кӕй баразӕнгард кодта, цӕмӕй иннӕ ӕфсымӕрты ахуыр кӕнынӕн сӕ рӕстӕг ма ’вгъау кӕной. Ӕппынфӕстаг хистӕр нӕлгоймӕгтӕй иу загъта: «Раст зӕгъгӕйӕ, уыцы хъуыддаджы тынг гыццыл сарӕзтам». Иннӕ хистӕр нӕлгоймӕгтӕ дӕр йӕ ныхӕстимӕ сразы сты.

² Кӕд ды дӕр хистӕр нӕлгоймаг дӕ, уӕд, чи зоны, ды дӕр ахӕм дзуапп раттис. Районон цӕстдарджытӕ бафиппайынц, бирӕ ӕмбырдты хистӕр нӕлгоймӕгтӕ фылдӕр рӕстӕг кӕй хъуамӕ хицӕн кӕной, цӕмӕй ӕфсымӕрты – ӕрыгӕтты дӕр ӕмӕ ацӕргӕты дӕр – ахуыр кӕной, ӕмӕ уыдон дӕр ӕмбырды хъуыддӕгты фылдӕр архайой. Фӕлӕ уыцы хъуыддаг иуӕй-иу хатт зын вӕййы. Цымӕ цӕмӕн?

3. а) Библийӕ куыд зыны, ӕфсымӕрты ахуыр кӕнын ӕнӕмӕнг кӕй у? Махӕй алчидӕр уыцы хъуыддаг ахсджиагыл цӕмӕн хъуамӕ нымайа? (Кӕс фиппаинаг.) б) Иуӕй-иу хистӕр нӕлгоймӕгтӕн ӕфсымӕрты ахуыр кӕнын ӕнцон цӕуылнӕ вӕййы?

³ Хистӕр нӕлгоймаг уӕвгӕйӕ ды дӕр куыннӕ ӕмбардзынӕ, иннӕ ӕфсымӕрты ахуыр кӕнын тынг ахсджиаг кӕй у, уыйa. Ды зоныс, фылдӕр ӕфсымӕртӕ кӕй хъӕуы, цӕмӕй, абон цы ӕмбырдтӕ ис ӕмӕ ма фидӕны цы ног ӕмбырдтӕ фӕзындзӕн, уыдон фидар кӕной. (Бакӕс Исайы 60:22.) Зоныс ма уый дӕр, ӕмӕ Библи хистӕр нӕлгоймӕгтӕн зӕгъы, цӕмӕй иннӕ ӕфсымӕрты дӕр ахуыр кӕной. (Бакӕс 2 Тимофеймӕ 2:2.) Фӕлӕ, райдианы цы хистӕр нӕлгоймӕгты кой уыд, уыдонау, чи зоны, дӕуӕн дӕр зын вӕййы уыцы хъуыддагӕн рӕстӕг ссарын. Дӕу хъӕуы дӕ бинонтыл тыхсын ӕмӕ кусын. Уымӕй уӕлдай ма дӕ хъӕуы ӕмбырдыл тыхсын ӕмӕ ма ӕндӕр ахсджиаг хъуыддӕгтӕ дӕр кӕнын. Иудзырдӕй, тынг ӕнӕвдӕлон вӕййыс. Уӕдӕ аныхас кӕнӕм, ӕмбырды ӕфсымӕрты ахуыр кӕнынӕн рӕстӕг арын ӕнӕмӕнг хъуыддаг цӕмӕн у, ууыл.

ӔФСЫМӔРТЫ АХУЫР КӔНЫН ТЫНГ АХСДЖИАГ У

4. Иуӕй-иу хистӕр нӕлгоймӕгтӕ ӕмбырды ӕфсымӕрты ахуыр кӕныныл фӕстӕ цӕмӕн фӕкӕнынц?

⁴ Цымӕ иуӕй-иу хистӕр нӕлгоймӕгтӕн зын цӕмӕн вӕййы ӕмбырды ӕфсымӕрты ахуыр кӕнынӕн рӕстӕг ссарын? Чидӕртӕ сӕ, чи зоны, фӕхъуыды кӕнынц: «Ӕмбырды ис, бирӕ ахсджиагдӕр чи у ӕмӕ ӕвӕстиатӕй бакӕнын кӕй хъӕуы, ахӕм хъуыддӕгтӕ. Ӕфсымӕрты ахуыр кӕнын фӕстӕдӕр куы райдайон, уӕддӕр уый ӕмбырдӕн ницы зиан ӕрхӕсдзӕн». Фӕлӕ цымӕ раст хъуыды кӕнынц? Кӕй зӕгъын ӕй хъӕуы, ӕмбырды вӕййы, ӕвӕстиатӕй ӕркӕсын кӕмӕ фӕхъӕуы, ахӕм хъуыддӕгтӕ. Фӕлӕ ӕфсымӕрты ахуыр кӕныныл куы фӕстӕ кӕнай, уӕд уый, чи зоны, ӕмбырды уырнындзинадыл ӕвзӕрырдӕм фӕзына.

5, 6. Шофыр йӕ машинӕмӕ куыд хъуамӕ зила, уыцы хъуыддаг ӕмбырды ӕфсымӕрты ахуыр кӕнынимӕ куыд ис абарӕн?

⁵ Иу цӕвиттоныл-ма ахъуыды кӕн. Шофыр зоны, цӕмӕй йӕ машинӕ хорз куса, уый тыххӕй йын ӕдзухдӕр йӕ маслӕ ивын кӕй хъӕуы. Фӕлӕ йӕм, чи зоны, афтӕ кӕса, ӕмӕ машинӕйы бензин ныккӕнын ахсджиагдӕр у, уымӕн ӕмӕ ӕнӕ уымӕй бынтондӕр нал скусдзӕн. Чи зоны ма афтӕ дӕр хъуыды кӕна, ӕмӕ, ныртӕккӕ ӕнӕвдӕлон кӕй у, уымӕ гӕсгӕ йӕ бон у, ӕмӕ йын йӕ маслӕ фӕстӕдӕр раива. Кӕй зӕгъын ӕй хъӕуы, машинӕ афтӕмӕй дӕр иуцасдӕр акусдзӕн. Фӕлӕ йын шофыр йӕ маслӕ афойнадыл куы нӕ раива, уӕд, абон уа ӕви райсом – машинӕ фехӕлдзӕн. Ӕмӕ йӕ уӕд фылдӕр рӕстӕг ӕмӕ фылдӕр ӕхца бахъӕудзӕн, цӕмӕй йӕ сцалцӕг кӕна. Ацы цӕвиттонӕй цӕуыл ахуыр кӕнӕм?

⁶ Хистӕр нӕлгоймӕгтӕ-иу хъуамӕ ахсджиаг хъуыддӕгтӕ ӕвӕстиатӕй бакӕной. Афтӕ куы нӕ кӕной, уӕд уый ӕмбырдыл ӕвзӕрырдӕм фӕзындзӕн. Йӕ машинӕйы ӕдзухдӕр бензин чи хъуамӕ кӕна, уыцы шофырау-иу хистӕр нӕлгоймӕгтӕ дӕр хъуамӕ, «ахсджиагдӕр цы у, уый сбӕлвырд кӕной» (Фил. 1:10). Фӕлӕ иуӕй-иу хистӕр нӕлгоймӕгтӕн уыйбӕрц ахсджиаг хъуыддӕгтӕ вӕййы, ӕмӕ ӕмбырды ӕфсымӕрты ахуыр кӕнынӕн рӕстӕг нал фӕхицӕн кӕнынц. Ӕмӕ уый абарӕн ис, шофыр йӕ машинӕйы маслӕ раивыныл куыд фӕфӕстиат кӕны, уыимӕ. Хистӕр нӕлгоймӕгтӕ ӕфсымӕрты ахуыр кӕныныл куы фӕстӕ кӕной, уӕд, абон уа ӕви райсом, ӕмбырдыл чи тыхса, ахӕм фӕлтӕрдджын ӕфсымӕртӕ нӕ фаг кӕндзӕн.

7. Ӕфсымӕрты ахуыр кӕнынӕн рӕстӕг чи ссары, уыцы хистӕр нӕлгоймӕгтӕм цы цӕстӕй хъуамӕ кӕсӕм?

⁷ Уӕдӕ ӕфсымӕрты ахуыр кӕнынмӕ куыдфӕндыйы цӕстӕй макуы кӕс. Йе ’мбырды сомбоныл чи тыхсы ӕмӕ иннӕ ӕфсымӕрты ахуыр кӕнынӕн рӕстӕг чи ссары, уыцы хистӕр нӕлгоймӕгты схонӕн ис зондджын лӕггадгӕнджытӕ. Уыдон ӕнӕхъӕн ӕмбырдӕн дӕр стыр арфӕдзинад сты. (Бакӕс 1 Петры 4:10.) Цымӕ афтӕ кӕй архайынц, уый ӕмбырдӕн цы пайда хӕссы?

РӔСТӔГӔЙ РАСТ ПАЙДА КӔН

8. а) Хистӕр нӕлгоймӕгты иннӕты ахуыр кӕнынмӕ цы разӕнгард кӕны? б) Ӕххуыс кӕм хъӕуы, ахӕм рӕтты чи лӕггад кӕны, уыцы хистӕр нӕлгоймӕгтыл цавӕр ахсджиаг хӕс ис? (Кӕс рамкӕ «Ахсджиаг хӕс».)

⁸ Хистӕр нӕлгоймӕгтӕ цыфӕнды фӕлтӕрдджын куы уой, уӕддӕр хъуамӕ уой бонзонгӕ ӕмӕ ӕмбарой, азтӕ сыл сӕ уӕз куы ’руадзой, уӕд сӕ бон кӕй нал уыдзӕн ӕмбырдӕн раздӕрау лӕггад кӕнын (Мих. 6:8). Стӕй ма хъуамӕ сӕ зӕрдыл дарой уый дӕр, ӕмӕ, «кӕд кӕуыл цы ’рцӕудзӕн, уымӕн ничи ницы зоны». Ӕмӕ сын ӕнӕнхъӕлӕджы хабары тыххӕй дӕр, чи зоны, ӕмбырды сӕ хӕстӕ ӕххӕст кӕнын фӕзын уа (Еккл. 9:11, 12; Иак. 4:13, 14). Уымӕ гӕсгӕ хистӕр нӕлгоймӕгтӕ, Йегъовӕйы адӕмы кӕй уарзынц ӕмӕ сыл кӕй тыхсынц, уый тыххӕй зӕрдиагӕй архайынц, цӕмӕй ӕрыгондӕр ӕфсымӕртӕн амоной, Хуыцауӕн бирӕ азты дӕргъы лӕггад кӕнгӕйӕ сӕхӕдӕг цӕуыл сахуыр сты, уыдӕттӕ. (Бакӕс Псалом 71:17, 18.)

9. Фидӕны цавӕр хабар хъуамӕ ӕрцӕуа ӕмӕ уый тыххӕй ӕмбырды ӕфсымӕрты ахуыр кӕнын уӕлдай ахсджиаг цӕмӕн у?

⁹ Иннӕ ӕфсымӕрты чи ахуыр кӕны, уыцы хистӕр нӕлгоймӕгтӕ ма ӕмбырдӕн стыр арфӕдзинад уымӕн сты, ӕмӕ сӕ фыдӕбоны руаджы ӕмбырд фидар кӕны. Уыдоны фӕрцы фылдӕр ӕфсымӕртӕ цӕттӕ вӕййынц хотӕ ӕмӕ ӕфсымӕртӕн ӕххуыс кӕнынмӕ, цӕмӕй се ’хсӕн иудзинад уа ӕмӕ Хуыцауыл иузӕрдион уой. Ацы фӕстаг бонты уый тынг ахсджиаг у, ӕмӕ ноджы ахсджиагдӕр та уыдзӕн, тагъд чи райдайдзӕн, уыцы стыр бӕллӕхы рӕстӕг (Йез. 38:10–12; Мих. 5:5, 6). Уӕдӕ, нӕ зынаргъ хистӕр нӕлгоймӕгтӕ, абонӕй фӕстӕмӕ ӕдзухдӕр рӕстӕг арут, цӕмӕй ӕфсымӕрты ахуыр кӕнат.

10. Хистӕр нӕлгоймӕгтӕн сӕ бон куыд у ӕфсымӕрты ахуыр кӕнынӕн рӕстӕг арын?

¹⁰ Мах ӕмбарӕм, ӕмбырды ахсджиаг хъуыддӕгтыл уын бирӕ рӕстӕг кӕй цӕуы ӕмӕ уый тыххӕй ӕнӕвдӕлон кӕй вӕййут. Уӕдӕ уӕ, чи зоны, бахъӕуа, уыцы хъуыддӕгтӕн цы рӕстӕг рахицӕн кӕнут, уымӕй ратонын, цӕмӕй ӕфсымӕрты ахуыр кӕнат (Еккл. 3:1). Афтӕ куы кӕнат, уӕд уӕ рӕстӕгӕй раст пайда кӕндзыстут ӕмӕ уый ӕмбырдӕн фидӕны стыр ӕххуыс фӕуыдзӕн.

АХУЫРГӔНИНАДЖЫ ЗӔРДӔ БАЦӔТТӔ КӔН

11. а) Иннӕты ахуыр кӕныны тыххӕй алыхуызон бӕстӕты цӕрӕг хистӕр нӕлгоймӕгтӕ цы загътой, уый цӕуыл дзурӕг у? б) Ӕмбисӕндты 15:22 стихы цы фыст ис, уымӕ гӕсгӕ уыцы хистӕр нӕлгоймӕгты уынаффӕтӕм ӕркӕсын хорз цӕмӕн уыдзӕн?

¹¹ Ӕфсымӕрты ахуыр кӕнынмӕ хорз чи арӕхсы, уыцы хистӕр нӕлгоймӕгтӕй иуӕй-иуты ӕрӕджы бафарстой, уыцы хъуыддаг сын цӕй фӕрцы ӕнтысы, уымӕйb. Кӕд уыцы ӕфсымӕртӕ алыхуызон уавӕрты цӕрынц, уӕддӕр се ’ппӕт дӕр радтой иухуызон дзуапп. Цымӕ уый цӕуыл дзурӕг у? Уый ууыл дзурӕг у, ӕмӕ Библийы цы уынаффӕтӕ ис, уыдонмӕ гӕсгӕ ахуыр кӕнӕн ис «алы ран дӕр, алы ӕмбырды дӕр» (1 Кор. 4:17). Уӕдӕ ацы ӕмӕ иннӕ статьяйы ӕркӕсдзыстӕм уыцы ӕфсымӕрты уынаффӕтӕй иуӕй-иутӕм (Ӕмб. 15:22). Цӕмӕй нын ӕнцондӕр уа, уый тыххӕй хистӕр нӕлгоймӕгты хондзыстӕм «ахуыргӕнджытӕ», кӕй ахуыр кӕнынц, уыцы ӕфсымӕрты та – «ахуыргӕнинӕгтӕ».

12. Ахуыргӕнӕг фыццаджыдӕр цы хъуамӕ сараза ӕмӕ цӕмӕн?

¹² Фыццаджыдӕр ахуыргӕнӕг хъуамӕ йӕ ахуыргӕнинаджы зӕрдӕ бацӕттӕ кӕна. Цымӕ уый ахсджиаг цӕмӕн у? Зӕхкусӕг зайӕгойтӕ ныссадзыны размӕ зӕхх куыд бацӕттӕ кӕны, афтӕ ахуыргӕнӕг дӕр хъуамӕ фыццаг йӕ ахуыргӕнинаджы зӕрдӕ бацӕттӕ кӕна, ӕмӕ йын уый фӕстӕ ног цыдӕртӕ бацамона. Ӕмӕ цымӕ ахуыргӕнӕгӕн йӕ бон куыд у ахуыргӕнинаджы зӕрдӕ бацӕттӕ кӕнын? Зӕгъӕм, йӕ бон у пехуымпар Самуилы, дӕсны ахуыргӕнӕджы, бафӕзмын.

13–15. а) Хуыцау Самуилӕн цавӕр хъуыддаг бахӕс кодта? б) Самуил йӕ хӕс куыд сӕххӕст кодта? (Кӕс нывмӕ статьяйы райдианы.) в) Самуилы цӕвиттон нӕ рӕстӕджы хистӕр нӕлгоймӕгтӕн куыд ӕххуыс кӕны?

¹³ Иухатт, 3 000 азӕй фылдӕры размӕ, Йегъовӕ ацӕргӕ пехуымпар Самуилӕн загъта: «Райсом дӕм иу-ацафон ӕрбарвитдзынӕн иу адӕймаджы Вениамины зӕххӕй, ӕмӕ йӕ ды сойӕ байсӕрддзынӕ, цӕмӕй мӕ адӕм Израилӕн уа разамонӕг» (1 Сам. 9:15, 16). Самуил бамбӕрста, ныр Израилы адӕмӕн разамонӕг уый кӕй нал уыдзӕн ӕмӕ Йегъовӕйы кӕй фӕнды, цӕмӕй сын ӕндӕр разамонӕджы сӕвӕра. Гъемӕ спълан кодта, уыцы адӕймаджы йӕ ног хӕстӕ ӕххӕст кӕнынмӕ куыд бацӕттӕ кӕндзӕн, уый.

¹⁴ Дыккаг бон, Самуил Саулы куы федта, уӕд, Йегъовӕ йӕ пехуымпарӕн загъта: «Ацы адӕймагӕй дын дзырдтон». Самуил ӕвӕстиатӕй райдыдта, цы спълан кодта, уымӕ гӕсгӕ архайын: Саулы ӕмӕ йын йӕ лӕггадгӕнӕджы минас кӕнынмӕ фӕхуыдта. Фынгыл сӕ ӕппӕты кадджындӕр бынӕтты сбадын кодта ӕмӕ сын сӕ разы дзидзайы ӕппӕты хуыздӕр хай ӕрӕвӕрдта. Самуил Саулӕн загъта: «Айс ӕй ӕмӕ хӕр, уымӕн ӕмӕ ацы хабарӕн ӕвӕрд уыд». Уый фӕстӕ Самуил Саулы йӕ хӕдзармӕ фӕхуыдта. Фӕндагыл ӕхсызгонӕй фӕныхӕстӕ кодтой. Хӕдзармӕ куы бахӕццӕ сты, уӕд Самуил «Саулимӕ хӕдзары сӕр йӕ ныхас адарддӕр кодта», цалынмӕ фынӕй кӕнынмӕ нӕ ацыдысты, уӕдмӕ. Иннӕ бон Самуил Саулы сойӕ байсӕрста, апъа йын кодта ӕмӕ йын уынаффӕтӕ радта. Ӕмӕ стӕй Саул ацыд. Афтӕмӕй Самуил Саулы фидӕны хабӕрттӕм бацӕттӕ кодта (1 Сам. 9:17–27; 10:1).

¹⁵ Кӕй зӕгъын ӕй хъӕуы, адӕймаджы ӕнӕхъӕн адӕмӕн разамонӕгӕй сӕвӕрай ӕмӕ ӕфсымӕры хистӕр нӕлгоймагӕй кӕнӕ кӕстӕриуӕггӕнӕг ӕфсымӕрӕй лӕггад кӕнынмӕ бацӕттӕ кӕнай, уыдон иу не сты. Фӕлӕ уӕддӕр, Самуил Саулы зӕрдӕ куыд бацӕттӕ кодта, уымӕй абон хистӕр нӕлгоймӕгтӕ бирӕ цӕуылдӕрты ахуыр кӕнынц. Уыцы хъуыддӕгтӕй дыууӕйыл лӕмбынӕгдӕр аныхас кӕнӕм.

ӔНӔЗИВӔГ АХУЫРГӔНДЖЫТӔ ӔМӔ ХОРЗ ХӔЛӔРТТӔ

16. а) Израилӕгтӕ сӕхицӕн паддзах кӕй ӕрдомдтой, уымӕ Самуил цы цӕстӕй ракаст? б) Йегъовӕ Саулы паддзахӕй куы ӕвӕрын кодта, уӕд Самуил куыд бакодта?

¹⁶ Ӕнӕзивӕг у. Израилӕгтӕ Самуилӕн фыццаг хатт куы загътой, адӕмӕй нын искӕй паддзахӕй сӕвӕр, зӕгъгӕ, уӕд уый йӕ зӕрдӕмӕ нӕ фӕцыд, стӕй йӕм афтӕ фӕкаст, цыма йыл адӕм сӕ къух систой (1 Сам. 8:4–8). Самуилы нӕ фӕндыд, цӕмӕй сын паддзах сӕвӕрдтаид, ӕмӕ Йегъовӕйы ӕртӕ хатты бахъуыд Самуилӕн зӕгъын, цӕмӕй адӕммӕ байхъуыстаид (1 Сам. 8:7, 9, 22). Фӕлӕ кӕд Самуилмӕ ахӕм ӕнкъарӕнтӕ уыд, уӕддӕр, йӕ бӕсты разамонӕг чи хъуамӕ уыдаид, уыцы адӕймагмӕ нӕ хӕлӕг кодта ӕмӕ йӕм знаджы цӕстӕй дӕр нӕ касти. Йегъовӕ йын куы загъта, цӕмӕй Саулы байсӕрстаид, уӕд уыцы хъуыддаг ӕнӕзивӕгӕй бакодта. Самуил Йегъовӕйы коммӕ бакаст, уый йӕ хӕс кӕй уыд, уый тыххӕй нӕ, фӕлӕ йӕ уарзгӕ кӕй кодта, уый тыххӕй.

17. Абон хистӕр нӕлгоймӕгтӕ Самуилы куыд фӕзмынц ӕмӕ сын уый ӕхсызгон цӕмӕн вӕййы?

¹⁷ Абон дӕр бирӕ фӕлтӕрдджын хистӕр нӕлгоймӕгтӕ Самуилы фӕзмынц ӕмӕ ӕфсымӕрты хӕларзӕрдӕйӕ ахуыр кӕнынц (1 Пет. 5:2). Уыцы хистӕр нӕлгоймӕгтӕ иннӕ ӕфсымӕрты ӕнӕзивӕгӕй ахуыр кӕнынц ӕмӕ нӕ тӕрсынц, сӕ бӕрны цы хъуыддӕгтӕ ис, уыдонӕй кӕцыдӕртӕ уыцы ӕфсымӕрты бар бакӕнын кӕй хъӕудзӕн, уымӕй. Уыдон ӕмбарынц, уыцы ӕфсымӕртӕ сын хорз «ӕмкусджытӕ» кӕй уыдзысты ӕмӕ сын ӕмбырды хъуыддӕгты кӕй ӕххуыс кӕндзысты (2 Кор. 1:24; Дзут. 13:16). Уыцы хистӕр нӕлгоймӕгтӕ сӕхиуыл нӕ ауӕрдынц ӕмӕ сын тынг ӕхсызгон вӕййы, сӕ ахуыргӕнинӕгтӕ сӕ курдиӕттӕй куы фӕпайда кӕнынц, цӕмӕй Йегъовӕйы адӕмӕн ӕххуыс кӕной (Хъуыд. 20:35).

18, 19. Хистӕр нӕлгоймагӕн йӕ бон куыд у йӕ ахуыргӕнинаджы зӕрдӕ бацӕттӕ кӕнын ӕмӕ уый ахсджиаг цӕмӕн у?

¹⁸ Ӕрмӕст ахуыргӕнӕг ма у, фӕлӕ хорз хӕлар дӕр. Самуил Саулыл куы фембӕлд, уӕд йӕ бон уыд, ӕмӕ йын уайтагъд йӕ сӕрыл сой рауагътаид ӕмӕ йӕ паддзахӕй сӕвӕрдтаид. Фӕлӕ уӕд ног паддзах Хуыцауы адӕмӕн разамынд дӕттынмӕ цӕттӕ нӕ уыдаид. Уымӕ гӕсгӕ Самуил рӕстӕг рахицӕн кодта, цӕмӕй уал Саулы зӕрдӕ уыцы ног хӕслӕвӕрдмӕ бацӕттӕ кодтаид. Цалынмӕ Саулы сойӕ нӕ байсӕрста, уӕдмӕ уал фӕминас кодтой, иумӕ фӕтезгъо кодтой, бирӕ рӕстӕг фӕныхӕстӕ кодтой ӕмӕ уый фӕстӕ улӕфгӕ дӕр бакодтой. Самуил банхъӕлмӕ каст, Саулы паддзахӕй сӕвӕрын хуыздӕр кӕд уыдзӕн, уымӕ.

¹⁹ Абон дӕр хабар афтӕ у. Цалынмӕ хистӕр нӕлгоймаг йӕ ахуыргӕнинаджы ахуыр кӕнын нӕ райдайа, уӕдмӕ уал хъуамӕ йемӕ балымӕн уа. Уый тыххӕй хистӕр нӕлгоймаг цы араздзӕн, уый кӕнгӕ уыдзӕн, сӕ бӕстӕйы цы ’гъдӕуттӕ ӕмӕ цы уавӕртӕ ис, уымӕй. Фӕлӕ кӕмфӕнды ма цӕрай ӕмӕ цыфӕнды ӕнӕвдӕлон ма уай, уӕддӕр-иу дӕ ахуыргӕнинагӕн рӕстӕг ссар, ӕмӕ уӕд зондзӕн, кӕй йын аргъ кӕныс, уый. (Бакӕс Ромӕгтӕм 12:10.) Дзырд дӕр ыл нӕй, дӕ ахуыргӕнинаг дӕ тынг бузныг уыдзӕн, зӕрдиагӕй йыл кӕй тыхсыс ӕмӕ йын дӕ рӕстӕг кӕй не ’вгъау кӕныс, уый тыххӕй.

20, 21. а) Ӕнтыстджын ахуыргӕнӕг схонӕн кӕй ис? б) Иннӕ статьяйы дзырд цӕуыл цӕудзӕн?

²⁰ Хистӕр нӕлгоймӕгтӕ, рох уӕ ма уӕд: хорз ахуыргӕнӕг фӕуарзы ӕрмӕст амонын нӕ, фӕлӕ ма, кӕй ахуыр кӕны, уыцы адӕймаджы дӕр. (Абар Иоанны 5:20.) Цымӕ уый ахсджиаг цӕмӕн у? Уымӕн ӕмӕ ахуыргӕнинаг куы ’мбара, ӕцӕгӕй йыл кӕй тыхсыс, уӕд зӕрдиагдӕрӕй ахуыр кӕндзӕн. Уӕдӕ нӕ зынаргъ хистӕр нӕлгоймӕгтӕ, ӕппӕт тыхтӕй архайут, цӕмӕй уӕ ахуыргӕнинӕгты ӕрмӕст ахуыр ма кӕнат, фӕлӕ ма сын хорз хӕлӕрттӕ дӕр уат (Ӕмб. 17:17; Иоан. 15:15).

²¹ Хистӕр нӕлгоймаг йӕ ахуыргӕнинаджы зӕрдӕ куы бацӕттӕ кӕна, уӕд йӕ бон у, ӕмӕ йӕ ахуыр кӕнын дӕр райдайа. Цавӕр мадзӕлттӕй у йӕ бон пайда кӕнын? Ууыл дзырд цӕудзӕн иннӕ статьяйы.

1. а) Хуыцауы адӕм ахуыр кӕныны тыххӕй алкӕддӕр цы зыдтой ӕмӕ уый абон махӕн цӕуыл дзурӕг у? б) Ацы статьяйы цӕмӕ ӕркӕсдзыстӕм?

ХУЫЦАУЫ адӕм алкӕддӕр зыдтой: цӕмӕй адӕймаг цавӕрдӕр хъуыддаджы ӕнтыстджын уа, уый тыххӕй хъуамӕ ахуыр кӕна. Зӕгъӕм, Лоты уацары куы акодтой, уӕд Аврам амбырд кодта, «йӕ адӕмӕй хӕцынмӕ дӕсны чи уыди, уыдоны», ӕмӕ йӕ ссӕрибар кодтой (Райд. 14:14–16). Паддзах Давиды рӕстӕджы та зарӕггӕнджыты «сахуыр кодтой», Йегъовӕйы кӕй фӕрцы кадджын кодтаиккой, уыцы зарджытӕ зарын (1 Аз. 25:7). Нӕ рӕстӕджы кой куы кӕнӕм, уӕд мах та хъӕуы Хӕйрӕг ӕмӕ йӕ дунейы ныхмӕ тох кӕнын (Еф. 6:11–13). Стӕй нӕ хъӕуы зӕрдиагӕй архайын, цӕмӕй Йегъовӕйы кадджын кӕнӕм – адӕмӕн йӕ номы тыххӕй дзурӕм (Дзут. 13:15, 16). Хуыцауы рагон лӕггадгӕнджытау мах дӕр хъӕуы ахуыр кӕнын, цӕмӕй ӕнтыстджын уӕм. Йегъовӕ ӕмбырды хистӕр нӕлгоймӕгтӕн бахӕс кодта, цӕмӕй иннӕ ӕфсымӕрты ахуыр кӕной (2 Тим. 2:2). Цымӕ иуӕй-иу хистӕр нӕлгоймӕгтӕ цавӕр мадзӕлттӕй пайда кӕнынц, цӕмӕй ӕфсымӕрты Хуыцауы дзуг хизын ахуыр кӕной?

ӔХХУЫС СЫН КӔНУТ, ЦӔМӔЙ ЙЕГЪОВӔЙЫ ТЫНГДӔР УАРЗОЙ

2. Ӕфсымӕрӕн ног цыдӕртӕ бацамоныны размӕ хистӕр нӕлгоймаджы, чи зоны, цы бахъӕуа саразын ӕмӕ цӕмӕн?

² Хистӕр нӕлгоймаджы абарӕн ис зӕхкусӕгимӕ. Зӕхкусӕг цалынмӕ мыггӕгтӕ нӕ байтауа, уӕдмӕ йӕ, чи зоны, сыджытыл хъацӕнтӕ ныккӕнын дӕр бахъӕуа, цӕмӕй йӕ тауинӕгтӕ сырӕзой ӕмӕ хорз тыллӕг раттой. Раст афтӕ, цалынмӕ хистӕр нӕлгоймаг ӕфсымӕрӕн ног цыдӕртӕ бацамона, уӕдмӕ уал ӕй, чи зоны, бахъӕуа йемӕ Библийӕ иуӕй-иу уагӕвӕрдтыл аныхас кӕнын. Уый фӕрцы ӕфсымӕр, цы базона, уымӕ гӕсгӕ зӕрдиагдӕрӕй архайдзӕн (1 Тим. 4:6).

3. а) Ӕфсымӕримӕ ныхас кӕнгӕйӕ Марчы 12:29, 30 стихты фыст Йесойы ныхӕстӕй куыд ис спайда кӕнӕн? б) Хистӕр нӕлгоймаджы куывд ӕфсымӕрыл куыд фӕзындзӕн?

³ Ӕфсымӕры зӕрдӕйы ӕмӕ зонды рӕстдзинад уидӕгтӕ куыд арф ауагъта, уый базоныны тыххӕй йӕ дӕ бон у бафӕрсын: «Дӕхи Йегъовӕйӕн кӕй снывонд кодтай, уый дӕ цардыл куыд фӕзынд?» Ахӕм фарстайы фӕрцы уын, чи зоны, хорз ныхас рауайа, Йегъовӕйӕн ӕппӕт зӕрдӕйӕ лӕггад кӕнын нӕ бон куыд у, уый фӕдыл. (Бакӕс Марчы 12:29, 30.) Уӕ ныхасы кӕрон дӕ бон у ӕфсымӕримӕ Йегъовӕмӕ скувын ӕмӕ дзы йӕ сыгъдӕг тых ракурын, цӕмӕй йын ахуыр кӕнынӕн ӕххуыс кӕна. Ӕфсымӕр куы фехъуса, уый тыххӕй кӕй кувыс, уӕд ӕй фылдӕр аразын куыннӕ бафӕнддзӕн!

4. а) Хистӕр нӕлгоймагӕн Библийӕ йӕ бон цавӕр цӕвиттонтӕ у ӕрхӕссын, цӕмӕй ӕфсымӕрӕн йӕ уырнындзинад фидар кӕнынӕн баххуыс кӕна? б) Ӕфсымӕрты ахуыр кӕнгӕйӕ хистӕр нӕлгоймагӕн йӕ нысан цы хъуамӕ уа?

⁴ Хистӕр нӕлгоймаг ӕфсымӕры ахуыр кӕнын куы райдайа, уӕд уал хорз уыдзӕн, йемӕ Библийӕ цалдӕр цӕвиттоныл куы аныхас кӕна, цӕмӕй уыцы цӕвиттонты фӕрцы ӕфсымӕр бамбара, адӕймаг ӕнӕзивӕг, ӕууӕнкджын ӕмӕ сӕрныллӕг уа, уый ахсджиаг кӕй у (1 Пад. 19:19–21; Неем. 7:2; 13:13; Хъуыд. 18:24–26). Сыджытыл хъацӕнтӕ кӕнын куыд ахсджиаг у, афтӕ ахсджиаг у, цӕмӕй ӕфсымӕрмӕ ацы миниуджытӕ уой. Уыдоны фӕрцы тагъддӕр рӕздзӕн. Францийӕ иу хистӕр нӕлгоймаг, Жан-Клод, зӕгъгӕ, загъта: «Ӕфсымӕртӕй искӕй куы фӕахуыр кӕнын, уӕд мӕ нысан вӕййы, цӕмӕй Библийы уагӕвӕрдтӕм гӕсгӕ раст уынаффӕтӕ хӕссын сахуыр уа. Фадат фӕагурын, цӕмӕй Библийӕ иумӕ бакӕсӕм, йӕ цӕстытӕ йын чи „байгом кӕна“ ӕмӕ, Хуыцауы Ныхасы цы диссаджы хъуыдытӕ ис, уыдон кӕй фӕрцы фена, ахӕм стих» (Пс. 119:18). Куыд ма ис ӕфсымӕртӕн ӕххуыс кӕнӕн?

ЦАВӔР НЫСӔНТТӔМ ХЪУАМӔ ТЫРНОЙ ӔМӔ ЦӔМӔН

5. а) Йегъовӕйӕн лӕггад кӕнгӕйӕ нысӕнттӕ ӕвӕрын кӕй хъӕуы, уый тыххӕй ӕфсымӕримӕ аныхас кӕнын ахсджиаг цӕмӕн у? б) Хистӕр нӕлгоймӕгтӕ, нырма ӕрыгон чи у, уыцы ӕфсымӕрты дӕр цӕмӕн хъуамӕ ахуыр кӕной? (Кӕс фиппаинаг.)

⁵ Кӕй ахуыр кӕныс, уыцы ӕфсымӕры бафӕрс: «Хуыцауы хъуыддаджы дӕ разы цавӕр нысӕнттӕ сӕвӕрдтай?» Кӕд ын нысӕнттӕ нӕма ис, уӕд ын баххуыс кӕн, цӕмӕй йӕ разы сӕвӕра, йӕ къухы чи бафтдзӕн, ахӕм нысан. Зӕрдиагӕй йын радзур, кӕддӕр дӕхӕдӕг дӕ разы цы нысан сӕвӕрдтай ӕмӕ, дӕ къухы куы бафтыд, уӕд куыд цин кодтай, уый тыххӕй. Ацы мадзал хуымӕтӕг у, фӕлӕ адӕймагӕн баххуыс кӕны. Пионерӕй чи лӕггад кӕны, иу ахӕм хистӕр нӕлгоймаг Африкӕйӕ, Виктор, зӕгъгӕ, загъта: «Ӕрыгон ма куы уыдтӕн, уӕд мӕм иухатт хистӕр нӕлгоймаг цалдӕр фарстайы радта, мӕ разы цы нысӕнттӕ ӕвӕрын, уый фӕдыл. Уыцы фарстатӕ мын баххуыс кодтой, цӕмӕй мӕ лӕггадыл лӕмбынӕг хъуыды кӕнын райдыдтаин». Фӕлтӕрдджын хистӕр нӕлгоймӕгтӕ куыд зӕгъынц, афтӕмӕй ахсджиаг у ӕфсымӕрты суанг хӕрзӕрыгонӕй ахуыр кӕнын. Уӕдӕ сын дӕ бон у бахӕс кӕнын, сӕ кармӕ гӕсгӕ сӕ бон саразын кӕй бауыдзӕн, ахӕм хъуыддаг. Ӕфсымӕры йе ’рыгонӕй куы ахуыр кӕнай, уӕд ын баххуыс кӕндзынӕ, цӕмӕй, куы фестырдӕр уа ӕмӕ бирӕ цӕлхдуртыл куы ’мбӕла, уӕд дӕр йӕ нысӕнттӕм тырнаa. (Бакӕс Псалом 71:5, 17.)

6. Йесо иннӕты куыд ахуыр кодта?

⁶ Цӕмӕй ӕфсымӕры лӕггад кӕнынмӕ сразӕнгард кӕнай, уый тыххӕй фаг нӕу, цы аразын ӕй хъӕуы, уый тыххӕй йын дзурын. Хъуамӕ ма йын бамбарын кӕнай, афтӕ кӕнын ахсджиаг цӕмӕн у, уый дӕр. Ӕппӕты хуыздӕр Ахуыргӕнӕг, Йесо, йӕ апостолтӕн бахӕс кодта хъусын кӕнын. Фӕлӕ уал сын фыццаджыдӕр бамбарын кодта, хъусын кӕнын цӕмӕн хъӕуы, уый. Йесо загъта: «Лӕвӕрд мын сты ӕппӕт бартӕ уӕларвыл дӕр ӕмӕ зӕххыл дӕр. Гъемӕ уӕдӕ ацӕут ӕмӕ мын ӕппӕт адӕмтӕй дӕр цӕттӕ кӕнут ахуыргӕнинӕгтӕ» (Матф. 28:18, 19). Дӕ бон куыд у иннӕты ахуыр кӕнгӕйӕ Йесойы фӕзмын?

7, 8. а) Ахуыр кӕныны хъуыддаджы хистӕр нӕлгоймӕгтӕн сӕ бон куыд у Йесойы фӕзмын? б) Ӕфсымӕрӕй ӕппӕлын ахсджиаг цӕмӕн у? в) Хистӕр нӕлгоймӕгтӕн ӕфсымӕрты ахуыр кӕнынӕн цавӕр уынаффӕтӕ баххуыс кӕндзысты? (Кӕс рамкӕ «Куыд ис ӕфсымӕрты ахуыр кӕнӕн».)

⁷ Ӕфсымӕрӕн исты хъуыддаг куы бахӕс кӕнай, уӕд ын Библимӕ гӕсгӕ бамбарын кӕн, уыцы хъуыддаг ахсджиаг цӕмӕн у, уый. Уый фӕрцы цыфӕнды хъуыддаг дӕр араздзӕн цавӕрдӕр уагӕвӕрдты тыххӕй нӕ, фӕлӕ, Библимӕ гӕсгӕ афтӕ раст кӕй уыдзӕн, уый тыххӕй. Зӕгъӕм, ӕфсымӕрӕн куы бахӕс кӕнай, цӕмӕй йӕ хъус дара, залмӕ бахизӕн сыгъдӕг ӕмӕ ӕдас куыд уа, уымӕ, уӕд ын дӕ бон у Титмӕ 2:10 стих равдисын ӕмӕ йын бамбарын кӕнын, йӕ фыдӕбоны фӕрцы «нӕ Ирвӕзынгӕнӕг Хуыцауы ахуырад [куыд] рӕсугъд кӕндзӕн», уый. Стӕй ма ӕфсымӕры баразӕнгард кӕн, цӕмӕй ахъуыды кӕна ӕмбырды ацӕргӕтыл ӕмӕ сын уыцы хъуыддаг цы ’ххуыс уыдзӕн, ууыл. Афтӕ йӕ куы ахуыр кӕнай, уӕд фылдӕр хъуыды кӕндзӕн цавӕрдӕр уагӕвӕрдтыл нӕ, фӕлӕ адӕмыл. Ӕмӕ куы уына, йӕ фыдӕбон хотӕ ӕмӕ ’фсымӕртӕн цы пайда хӕссы, уый, уӕд ын иннӕтӕн лӕггад кӕнын ӕхсызгондӕр уыдзӕн.

⁸ Уымӕй уӕлдай ма ахсджиаг у, цӕмӕй-иу ӕфсымӕрӕй раппӕлай, дӕ уынаффӕтӕм дын кӕй хъусы, уый тыххӕй. Цӕмӕй зайӕгой рӕза, уый тыххӕй йыл хъӕуы дон кӕнын. Раст афтӕ ӕфсымӕрӕй дӕр хъӕуы ӕппӕлын, цӕмӕй рӕза ӕмӕ йын фылдӕр ӕнтыса. (Абар Матфейы 3:17.)

НОДЖЫДӔР МА ЗЫН ЦӔМӔН ВӔЙЙЫ

9. а) Иуӕй-иу хъӕздыг бӕстӕты хистӕр нӕлгоймӕгтӕн арӕх зын цы вӕййы? б) Ӕрыгон ӕфсымӕртӕй кӕмӕндӕрты Хуыцауӕн лӕггад кӕнын царды фыццаг бынаты цӕуылнӕ вӕййы?

⁹ Хъӕздыг бӕстӕты чи цӕры, уыцы хистӕр нӕлгоймӕгтӕн арӕх зын вӕййы ӕфсымӕрты фылдӕр хӕстӕ ӕххӕст кӕнынмӕ баразӕнгард кӕнын. Иуӕй-иу ӕрыгон ӕфсымӕрты ӕмбырды фылдӕр аразын цӕуылнӕ фӕфӕнды, уый фӕдыл сӕ хъуыды загътой фӕлтӕрдджын хистӕр нӕлгоймӕгтӕ иу-20 бӕстӕйӕ. Сӕ фылдӕр куыд зӕгъынц, афтӕмӕй, иуӕй-иу ӕфсымӕрты, ӕрыгондӕр ма куы уыдысты, уӕд ничи разӕнгард кодта, цӕмӕй сӕ разы Хуыцауы хъуыддагимӕ баст нысӕнттӕ ӕвӕрдтаиккой. Ӕмӕ-иу сӕ кӕд кӕйдӕрты фӕндыди фылдӕр аразын, уӕд-иу сын сӕ ныййарджытӕ та дзырдтой, цӕмӕй уӕлдӕр ахуырад райсой кӕнӕ хорз куыстмӕ бацӕуой! Уымӕ гӕсгӕ Хуыцауӕн лӕггад кӕнын сӕ царды фыццаг бынаты никуы уыди (Матф. 10:24).

10, 11. а) Хистӕр нӕлгоймагӕн йӕ бон куыд у ӕфсымӕрӕн йӕ зондахаст аивынӕн баххуыс кӕнын? б) Хистӕр нӕлгоймагӕн йӕ бон цавӕр стихтӕй у спайда кӕнын, цӕмӕй ӕфсымӕр фылдӕр хӕстӕм тырна, ӕмӕ цӕмӕн? (Кӕс фиппаинаг.)

¹⁰ Ӕфсымӕр ӕмбырды хъуыддӕгты фылдӕр архайынмӕ куы нӕ тырна, уӕд дӕ хъӕудзӕн бирӕ фыдӕбон кӕнын ӕмӕ фӕразонӕй архайын, цӕмӕй йӕ зондахаст аива. Фӕлӕ уӕддӕр уымӕн гӕнӕн ис. Цӕмӕй тала раст рӕза, уый тыххӕй йын зӕхкусӕг йӕ хъӕд сабыргай фӕраст кӕны. Раст афтӕ хъуамӕ ӕфсымӕрӕн сабыргай ӕххуыс кӕнай, цӕмӕй фена, йӕ зондахаст кӕй хъуамӕ аива ӕмӕ ӕмбырды фылдӕр хӕстӕм кӕй хъуамӕ тырна. Фӕлӕ уый куыд аразӕн ис?

¹¹ Бацархай, цӕмӕй ӕфсымӕримӕ балымӕн уай. Бамбарын ын кӕн, ӕмбырды йе ’ххуыс кӕй хъӕуы, уый. Стӕй уын фадат куы уа, уӕд-иу Библийӕ ахӕм стихтыл аныхас кӕнут, цӕмӕй лӕмбынӕгдӕр ахъуыды кӕна, йӕ цард Йегъовӕйӕн кӕй снывонд кодта, ууыл (Еккл. 5:4; Ис. 6:8; Матф. 6:24, 33; Лук. 9:57–62; 1 Кор. 15:58; 2 Кор. 5:15; 13:5). Дӕ бон ӕй у бафӕрсын: «Дӕхи Йегъовӕйӕн куы снывонд кодтай, уӕд ын цавӕр дзырд радтай?» Цӕмӕй йын йӕ зӕрдӕ бацагайай, уый тыххӕй йӕм ахӕм фарста ратт: «Цымӕ, донаргъуыд куы райстай, уӕд Йегъовӕ цы хъуыды кодта?» (Ӕмб. 27:11). Стӕй ма йӕ бафӕрс: «Ӕмӕ Хӕйрӕг та цы хъуыды кодтаид?» (1 Пет. 5:8). Ахӕм стихты стыр тых ис ӕмӕ ӕфсымӕры зӕрдӕмӕ арф бахъардзыстыb. (Бакӕс Дзуттӕгтӕм 4:12.)

ӔФСЫМӔРТӔ, ӔУУӔНКДЖЫН УТ

12, 13. а) Елисейӕн цавӕр зондахаст уыд? б) Йегъовӕ Елисейы йӕ иузӕрдиондзинады тыххӕй цавӕр кады аккаг скодта?

¹² Ӕрыгон ӕфсымӕртӕ, ӕмбырды уе ’ххуыс тынг хъӕуы! Цымӕ уын цавӕр зондахаст хъуамӕ уа, цӕмӕй уӕ лӕггады ӕнтыстджын уат? Ацы фарстайӕн дзуапп базондзыстӕм, раджы заманты Хуыцауы пехуымпар кӕй ахуыр кодта, уыцы адӕймаджы царды хабӕрттӕй иуӕй-иутӕй. Уыцы адӕймаг уыд Елисей.

¹³ Иу-3 000 азы размӕ пехуымпар Илийа ӕрыгон Елисейӕн загъта, цӕмӕй йе ’ххуысгӕнӕг суыдаид. Елисей уайтагъд сразы ӕмӕ ацӕргӕ пехуымпарӕн иузӕрдионӕй лӕггад кӕнын райдыдта – кадджыныл нымад чи нӕ уыд, ахӕм куыстытӕ йын кодта (2 Пад. 3:11). Илийа Елисейы ахуыр кодта ӕхсӕз азы бӕрц. Израилы йӕ лӕггад куы фӕуд кодта, уӕд Елисейӕн загъта, цӕмӕй йӕ ныууагътаид ӕмӕ ацыдаид. Фӕлӕ йын уый ӕртӕ хатты загъта: «Нӕ дӕ ныууадздзынӕн». Тынг ӕй фӕндыд йӕ ахуыргӕнӕгимӕ, гӕнӕн ӕмӕ амалӕй, фылдӕр рӕстӕг баззайын. Елисей афтӕ иузӕрдион ӕмӕ ӕууӕнкджын кӕй уыд, уый тыххӕй йӕ Йегъовӕ стыр кады аккаг скодта – Илийайы тыхдымгӕ уӕлӕрвтӕм куыд ахаста, уый феныны бар ын радта (2 Пад. 2:1–12).

14. а) Ӕфсымӕртӕн сӕ бон куыд у Елисейы фӕзмын? б) Ӕфсымӕр ӕууӕнкджын уа, уый ахсджиаг цӕмӕн у?

¹⁴ Кӕд дӕу дӕр хистӕр нӕлгоймаг ахуыр кӕны, уӕд дӕ бон куыд у Елисейы фӕзмын? Исты дын куы бахӕс кӕны, уӕд-иу ӕй ӕнӕзивӕгӕй бакӕн, цыфӕнды хуымӕтӕг хъуыддаг куы уа, уӕддӕр. Дӕ зӕрдыл дар, дӕ ахуыргӕнӕг дӕ хӕлар кӕй у. Кӕй дын ӕххуыс кӕны, уый тыххӕй-иу ын бузныг зӕгъ, стӕй бӕрӕг уӕд, кӕй дӕ фӕнды, цӕмӕй дӕ дарддӕр дӕр ахуыр кӕна. Сӕйраджыдӕр та, дӕ хӕслӕвӕрдтӕ ӕххӕст кӕнгӕйӕ ӕууӕнкджын у. Уый ахсджиаг цӕмӕн у? Иузӕрдион ӕмӕ ӕууӕнчы аккаг кӕй дӕ, уый хъуыддагӕй куы равдисай, уӕд хистӕр нӕлгоймӕгтӕ бамбардзысты, Йегъовӕйы кӕй фӕнды, цӕмӕй дын ӕмбырды дӕ бар фылдӕр хъуыддӕгтӕ бакӕна (Пс. 101:6; бакӕс 2 Тимофеймӕ 2:2).

ФӔЛТӔРДДЖЫН ХИСТӔР НӔЛГОЙМӔГТӔН АРГЪ КӔН

15, 16. а) Елисей йӕ ахуыргӕнӕгӕн кӕй аргъ кодта, уый куыд равдыста? (Кӕс нывмӕ статьяйы райдианы.) б) Иннӕ пехуымпартӕ Елисейыл цӕй фӕрцы баууӕндыдысты?

¹⁵ Елисейы хабарӕй ма бӕрӕг у, абон ӕфсымӕртӕ фӕлтӕрдджын хистӕр нӕлгоймӕгтӕн кӕй хъуамӕ аргъ кӕной, уый дӕр. Илийа ӕмӕ Елисей Иерихоны пехуымпарты куы бабӕрӕг кодтой, уый фӕстӕ Иорданы цӕугӕдоны ’рдӕм ацыдысты. Доны былмӕ куы бахӕццӕ сты, уӕд «Илийа йӕ уӕлӕдарӕс райста, стыхта йӕ ӕмӕ дзы дон ӕрцавта, ӕмӕ дон дыууӕ дихы фӕци». Стӕй Иорданыл иннӕ фарсмӕ хус зӕххыл ахызтысты ӕмӕ «фӕндагыл ныхӕстӕгӕнгӕ... ацыдысты». Елисей лӕмбынӕг хъуыста, йӕ ахуыргӕнӕг цыдӕриддӕр дзырдта, уымӕ. Афтӕ никуы хъуыды кодта, ӕмӕ алцыдӕр зоны. Уый фӕстӕ Илийайы тыхдымгӕ ахаста ӕмӕ Елисей фӕстӕмӕ Иорданы цӕугӕдоны былмӕ араст. Уым Илийайы уӕлӕдарӕсӕй дон ӕрцавта ӕмӕ загъта: «Кӕм ис Илийайы Хуыцау Йегъовӕ?» Ӕмӕ та дон дыууӕ дихы фӕци (2 Пад. 2:8–14).

¹⁶ Ӕвӕццӕгӕн, дӕ хъус ӕрдардтай, Елисей фыццаг хатт цы диссаг сарӕзта, уый кӕй уыд, Илийа фӕстаг хатт цы диссаг сарӕзта, растдӕр уый хуызӕн. Уымӕй цӕуыл ахуыр кӕнӕм? Елисей афтӕ нӕ хъуыды кодта, ӕмӕ ныр, пехуымпар йӕхӕдӕг кӕй у, уымӕ гӕсгӕ, Илийа куыд архайдта, афтӕ нӕ, фӕлӕ йӕхимӕ растдӕр куыд кӕсы, афтӕ хъуамӕ архайа. Елисей алцӕмӕй дӕр Илиайы кӕй фӕзмыдта, уымӕй равдыста, йӕ ахуыргӕнӕгӕн кӕй аргъ кодта, уый. Ӕмӕ йыл уый руаджы иннӕ пехуымпартӕ дӕр баууӕндыдысты (2 Пад. 2:15). Елисей пехуымпарӕй фӕлӕггад кодта 60 азы, ӕмӕ йын Йегъовӕ ахӕм хъарутӕ радта, цӕмӕй Илийайӕ бирӕ фылдӕр диссӕгтӕ сарӕзтаид. Цымӕ, хистӕр нӕлгоймӕгтӕ кӕмӕн ӕххуыс кӕнынц, уыцы ӕфсымӕртӕ ацы хабарӕй цӕуыл ахуыр кӕнынц?

17. а) Хистӕр нӕлгоймӕгтӕ кӕмӕн ӕххуыс кӕнынц, уыцы ӕфсымӕртӕн сӕ бон куыд у Елисейы фӕзмын? б) Йӕ афоныл Йегъовӕйӕн иузӕрдион ӕфсымӕрты фӕрцы йӕ бон цы у саразын?

¹⁷ Ӕмбырды дын фылдӕр хӕстӕ куы бахӕс кӕной, уӕд-иу афтӕ ма хъуыды кӕн, ӕмӕ сӕ ныр, уый размӕ сӕ куыд арӕзтой, афтӕ нӕ, фӕлӕ бынтон ӕндӕрхуызон хъуамӕ аразай. Дӕ зӕрдыл дар: ӕмбырды хъуыддӕгтӕ куыд аразын хъӕуы, уым исты фӕивӕн ис, уый ӕнӕмӕнг куы уа кӕнӕ Йегъовӕйы организаци ахӕм разамынд куы ратта, ӕрмӕстдӕр уӕд. Хъуамӕ цавӕрдӕр ивындзинӕдтӕ уый тыххӕй ма аразай, ӕмӕ дӕу афтӕ фӕнды. Илийа цы мадзӕлттӕй архайдта, Елисей дӕр уыдонӕй кӕй пайда кодта, уый фӕрцы йыл иннӕ пехуымпартӕ ӕууӕндыдысты, стӕй бӕрӕг уыд, йӕ ахуыргӕнӕгӕн кӕй аргъ кодта. Раст афтӕ ды дӕр, цы мадзӕлттӕ дын бацамыдтой, уыдонӕй куы пайда кӕнай, уӕд равдисдзынӕ, фӕлтӕрдджын хистӕр нӕлгоймӕгтӕн кӕй аргъ кӕныс, ӕмӕ дыл хотӕ ӕмӕ ӕфсымӕртӕ дӕр ӕууӕнддзысты. (Бакӕс 1 Коринфӕгтӕм 4:17.) Фӕлтӕрдджындӕр куы суай, уӕд дӕуӕн дӕр дӕ бон уыдзӕн Йегъовӕйы организацийы разамындмӕ гӕсгӕ цавӕрдӕр ивындзинӕдтӕ аразын, цӕмӕй уе ’мбырд размӕ цӕуа. Ӕмӕ, чи зоны, йӕ афоныл ды дӕр Йегъовӕйы фӕрцы, Елисейау, дӕ ахуыргӕнджытӕ цы хъуыддӕгтӕ сарӕзтой, уыдонӕй стырдӕр хъуыддӕгтӕ саразай (Иоан. 14:12).

18. Ӕфсымӕрты ахуыр кӕныныл фӕстиат кӕнын цӕуылнӕ хъӕуы?

¹⁸ Ныфс нӕ ис, ацы дыууӕ статьяйы фылдӕр хистӕр нӕлгоймӕгты кӕй сразӕнгард кӕндзысты, цӕмӕй ӕфсымӕрты ахуыр кӕнынӕн сӕ рӕстӕг ма ’вгъау кӕной. Стӕй ма кувӕм, цӕмӕй ӕфсымӕртӕ ӕнӕзивӕгӕй ахуыр кӕной ӕмӕ, цы базоной, уымӕ гӕсгӕ Йегъовӕйы адӕмӕн ӕххуыс кӕной. Уый фӕрцы ӕгас дунейы ӕмбырдтӕ дӕр фидардӕр уыдзысты ӕмӕ уый махӕй алкӕмӕн дӕр баххуыс кӕндзӕн, цӕмӕй, разӕй нӕм цы ахсджиаг хабӕрттӕ ӕнхъӕлмӕ кӕсы, уыдоны рӕстӕг иузӕрдионӕй баззайӕм.