Паддзах йӕ адӕмы сыгъдӕг кӕны мӕнг дины ӕгъдӕуттӕй

1–3. Йесо кувӕндонмӕ куы бацыд, уӕд цы сарӕзта?

ЙЕСО тынг аргъ кодта Иерусалимы кувӕндонӕн, уымӕн ӕмӕ йӕ зыдта, ӕнусты дӕргъы зӕххыл адӕм ӕрмӕстдӕр уыцы кувӕндоны кӕй куывтой ӕцӕг Хуыцау Йегъовӕйӕн. Фӕлӕ Йегъовӕ у сыгъдӕг Хуыцау, ӕмӕ йын чи кувы, уыдонӕн дӕр сӕ лӕггад хъуамӕ уа сыгъдӕг ӕмӕ ӕнаипп. Ӕмӕ-ма ныр ахъуыды кӕн, н. э. 33 азы 10 нисаны Йесо кувӕндонмӕ куы бацыд ӕмӕ йӕ хынджылӕггаг кӕй скодтой, уый куы федта, уӕд йӕ зӕрдӕ куыд фӕрыстаид. (Бакӕс Матфейы 21:12, 13.)

² Ӕнӕфсис базаргӕнджытӕ ӕмӕ ӕхцаивджытӕ бадтысты ӕндӕр адӕмыхӕттыты кӕрты ӕмӕ, Йегъовӕйӕн нывӕндтӕ хӕссынмӕ чи ’рцыд, уыцы адӕмы стыгътойa. Йесо кувӕндонмӕ бацыд ӕмӕ дзы «уӕйгӕнӕгӕй, ӕлхӕнӕгӕй чидӕриддӕр уыди, уыдоны се ’ппӕты дӕр ратардта» ӕмӕ «ӕхцаивджытӕн... се стъӕлттӕ» афӕлдӕхта. (Абар Неемийы 13:7–9.) Уыцы зыд адӕмӕн Йесо карзӕй бауайдзӕф кодта, йӕ Фыды хӕдзарӕй йын «абырджыты лӕгӕт» кӕй сарӕзтой, уый тыххӕй. Ӕмӕ афтӕмӕй равдыста, кувӕндонӕн ӕмӕ дзы кӕмӕн куывтой, уымӕн тынг кӕй аргъ кодта. Йӕ уӕларвон Фыдӕн кӕм куывтой, уый уыди сыгъдӕг бынат, ӕмӕ йӕ хъуамӕ хынджылӕггаг мачи кодтаид!

³ Бирӕ ӕнусты фӕстӕ Йесо уӕларвон Паддзах куы сси, уӕд ма ноджыдӕр иу кувӕндон ссыгъдӕг кодта. Ӕрмӕст уыцы кувӕндон баст у, абон Йегъовӕйӕн, йӕ зӕрдӕмӕ куыд цӕуы, афтӕ лӕггад кӕнын кӕй фӕнды, уыдонӕй алкӕимӕ дӕр. Цы у уыцы кувӕндон?

«Левийы фыртты» ссыгъдӕг кодта

4, 5. а) Йесо йӕ сӕрст фӕдылдзӕуджыты 1914 азӕй 1919 азмӕ куыд ссыгъдӕг кодта? ӕ) Хуыцау йӕ адӕмы уӕдӕй фӕстӕмӕ нал сыгъдӕг кодта? Бамбарын ӕй кӕн.

⁴ Ацы чиныджы 2-аг сӕрӕй куыд базыдтам, афтӕмӕй, Йесо 1914 азы Паддзах куы сси, уӕд йӕ Фыдимӕ иумӕ ӕрцыд, цӕмӕй ӕркастаид ӕнӕуынгӕ кувӕндоны уавӕрмӕ. Ӕнӕуынгӕ кувӕндон амоны, ӕцӕг Хуыцауӕн лӕггад кӕнын нӕ бон цӕй фӕрцы у, уымӕb. Паддзах ӕнӕуынгӕ кувӕндоны уавӕрмӕ куы ’ркаст, уӕд федта, сӕрст чырыстӕтты, ома «Левийы фыртты», цавӕрдӕр хъуыддӕгты ссыгъдӕг кӕнын кӕй хъуыди (Мал. 3:1–3). 1914 азӕй 1919 азы фыццаг мӕйты онг Йегъовӕ бауагъта, цӕмӕй йӕ адӕм алыхуызон фӕлварӕнтӕ ӕмӕ зындзинӕдтӕ бавзӕрстаиккой ӕмӕ уый фӕрцы ссыгъдӕг уыдаиккой. Ӕмӕ куыд хорз у, уыцы карз ӕмӕ уӕззау фӕлварӕнты фидар кӕй фӕлӕууыдысты! Ныр уыдон цӕттӕ уыдысты, цӕмӕй, Паддзах Йесо Чырыстийы фарс кӕй сты, уый хъуыддагӕй равдыстаиккой.

⁵ Цымӕ Хуыцау йӕ адӕмы уӕдӕй фӕстӕмӕ нал сыгъдӕг кодта? Куыннӕ. Фӕстаг бонты Йегъовӕ йе ’вӕрд Паддзахы уылты йӕ адӕмӕн дарддӕр дӕр ӕххуыс кӕны, цӕмӕй сыгъдӕг уой ӕмӕ сӕ бон уа йе ’нӕуынгӕ кувӕндоны лӕггад кӕнын. Иннӕ дыууӕ сӕрӕй базондзыстӕм, куыд сын ӕххуыс кодта, цӕмӕй сӕ уаг ӕмӕ се ’гъдау сыгъдӕг уа, стӕй организацийы алцыдӕр уа Библимӕ гӕсгӕ. Фӕлӕ уал фыццаг ӕркӕсӕм, мӕнг дины ӕгъдӕуттӕй сӕ куыд ссыгъдӕг кодта, уымӕ. Чырысти йӕ фӕдылдзӕуджыты куыд сыгъдӕг кӕны, уый кӕцыдӕр хъуыддӕгты бӕлвырдӕй ис фенӕн, кӕцыдӕрты та – нӕ. Уыцы хабӕрттӕм лӕмбынӕгдӕр куы ’ркӕсӕм, уӕд уый фӕрцы нӕ уырнындзинад тынг бафидар уыдзӕн.

«Уӕхи ма фӕчъизи кӕнут»

6. Йегъовӕ дзуттӕгтӕн цы фӕдзӕхстытӕ радта, уыдон махӕн цӕуыл дзурӕг сты?

⁶ Н. э. размӕ 537 азы Йегъовӕ дзуттӕгты Вавилоны уацарӕй ракодта. Ӕмӕ-ма ӕркӕсӕм, уый размӕ сын цы загъта, уымӕ. (Бакӕс Исайы 52:11.) Уыцы дзуттӕгтӕ сӕ райгуырӕн бӕстӕмӕ сӕйраджыдӕр уый тыххӕй хъуамӕ ӕрыздӕхтаиккой, цӕмӕй Иерусалимы кувӕндон ногӕй сарӕзтаиккой ӕмӕ раст дин йӕ къахыл слӕууын кодтаиккой (Езд. 1:2–4). Йегъовӕйы нӕ фӕндыд, цӕмӕй вавилойнӕгты дины ӕгъдӕуттӕй семӕ исты рахастаиккой. Дӕ хъус-ма ӕрдар, цы ахсджиаг фӕдзӕхстытӕ сын радта, уымӕ: «чъизи цы у, ахӕмӕй мацӕмӕ бавналут», «рацӕут уырдыгӕй» ӕмӕ «уӕхи ма фӕчъизи кӕнут». Раст динӕн мӕнг динимӕ хъуамӕ иумӕйагӕй мацы уа. Хъуамӕ нӕм мӕнг дины ахуырӕдтӕй ӕмӕ ӕгъдӕуттӕй мацы хӕццӕ кӕна.

7. Йесо йӕ фӕдылдзӕуджыты мӕнг дины ӕгъдӕуттӕй кӕй уылты ссыгъдӕг кодта?

⁷ Йесо Паддзах куы сси, уымӕй гыццыл фӕстӕдӕр, 1919 азы, сӕвӕрдта ӕууӕнкджын ӕмӕ зондджын цагъары, цӕмӕй уый уылты йӕ фӕдылдзӕуджыты мӕнг дины ӕгъдӕуттӕй ссыгъдӕг кодтаид. Уыцы цагъар чи у, уый зын базонӕн нӕ уыд (Матф. 24:45). 1919 азы размӕ дӕр Библииртасджытӕ сӕхи бирӕ мӕнг ахуырӕдтӕй ссыгъдӕг кодтой. Фӕлӕ сӕ уӕддӕр нырма цавӕрдӕр хъуыддӕгты хъуыди сыгъдӕг кӕнын. Ӕмӕ Чырысти ӕууӕнкджын цагъары уылты йӕ фӕдылдзӕуджытӕн гыццылгай ӕргом кодта, цавӕр бӕрӕгбӕттӕ ӕмӕ ӕгъдӕуттӕ сӕ хъуыди ныууадзын, уый (Ӕмб. 4:18). Ӕркӕсӕм дзы цалдӕр цӕвиттонмӕ.

Рождество бӕрӕг кӕнын хъӕуы?

8. а) Библииртасджытӕ Рождествойы тыххӕй рагӕй фӕстӕмӕ дӕр цы зыдтой? ӕ) Уыцы рӕстӕг дзӕбӕх цы нӕма ӕмбӕрстой?

⁸ Библииртасджытӕ рагӕй фӕстӕмӕ дӕр зыдтой, Рождество мӕнг динӕй кӕй равзӕрд ӕмӕ Йесо 25 декабры кӕй нӕ райгуырд. 1881 азы декабры «Сионы хъахъхъӕнӕн мӕсыджы» фыст уыд: «Милуантӕ цалынмӕ аргъуанмӕ цӕуын нӕ райдыдтой, уӕдмӕ куывтой ӕндӕр ӕмӕ ӕндӕр хуыцӕуттӕн. Ӕмӕ, цы ӕгъдӕуттыл хӕст уыдысты ӕмӕ цы бӕрӕгбӕттӕ кодтой, уыдон дӕр, чырыстӕттӕ куы систы, уӕд семӕ ӕрбахастой, ӕрмӕст сын сӕ нӕмттӕ фӕивтой. Зӕгъӕм, сӕ дзуарылӕгтӕ систы сауджынтӕ, стӕй сӕ бӕрӕгбӕттӕн дӕр радтой чырыстон нӕмттӕ. Ӕмӕ уыцы бӕрӕгбӕттӕй сӕ иу у Рождество». 1883 азы «Хъахъхъӕнӕн мӕсыджы» рацыд статья, «Чырысти кӕд райгуырд?», зӕгъгӕ. Уыцы статьяйы ӕрхастой бӕлвырдгӕнӕнтӕ, Йесо октябры райдианты кӕй райгуырд, уымӕнc. Фӕлӕ уӕддӕр уыцы рӕстӕг Библииртасджытӕ дзӕбӕх нӕма ӕмбӕрстой, Рождествойыл сӕ сӕ къух сисын кӕй хъӕуы. Суанг ма йӕ Бруклины Вефилы дӕр бӕрӕг кодтой. Фӕлӕ 1926 азы фӕстӕ уавӕр гыццылгай фӕивта. Цӕй фӕрцы?

9. Библииртасджытӕ Рождествойы тыххӕй цы бамбӕрстой?

⁹ Библииртасджытӕ ацы фарста бӕстондӕр раиртӕстой ӕмӕ бамбӕрстой, Рождествойӕн йӕ равзӕрд дӕр ӕмӕ йе ’гъдӕуттӕ дӕр Хуыцауы кӕй худинаг кӕнынц. 1927 азы 14 декабры «Сызгъӕрин ӕнус»-ы мыхуыргонд ӕрцыд статья «Рождество кӕцӕй равзӕрд?». Дзырд дзы цыди, уыцы бӕрӕгбон мӕнг динӕй кӕй рацыд, адӕмӕн дзы сӕйрагдӕр кӕй вӕййы сӕ буары монцтӕ бафсадын ӕмӕ дзы мӕнг хуыцӕуттӕн кӕй фӕкувынц. Статья бӕлвырд ӕмбарын кодта, Чырысти уыцы бӕрӕгбон кӕнын кӕй нӕ бафӕдзӕхста. Ӕмӕ дзы кӕронбӕттӕны фыст уыд: «Ацы бӕрӕгбон бӕрӕг кӕнынмӕ разӕнгард кӕнынц ацы дуне, тӕригъӕдджын буары монцтӕ ӕмӕ Хӕйрӕг. Ӕмӕ уый у ӕппӕты фидардӕр бӕлвырдгӕнӕн, йӕ цард ӕнӕхъӕнӕй дӕр Йегъовӕйы фӕндон ӕххӕст кӕнынӕн чи радта, уыдонӕн ӕй бӕрӕг кӕнын кӕй не ’мбӕлы, уымӕн». Ӕмӕ, кӕй зӕгъын ӕй хъӕуы, Вефилы Рождество уыцы аз дӕр нал сбӕрӕг кодтой, ӕмӕ уый фӕстӕ дӕр никуыуал.

10. а) 1928 азы декабры Библииртасджытӕ Рождествойы хабӕрттӕ хуыздӕр цӕй фӕрцы бамбӕрстой? (Ноджыдӕр кӕс рамкӕ «Рождество – куыд фӕзынд ӕмӕ йӕ нысан цы у?».) ӕ) Хуыцауы адӕм куыд бамбӕрстой, сӕ къух ноджыдӕр цавӕр бӕрӕгбӕттыл хъуамӕ систаиккой, уый? (Кӕс рамкӕ «Ӕндӕр бӕрӕгбӕттӕ дӕр хурмӕ рахастой».)

¹⁰ 1928 азы Библииртасджытӕ ноджы фылдӕр базыдтой Рождествойы тыххӕй. 12 декабры ӕфсымӕр Ричард Барберӕн (лӕггад кодта сӕйраг хайады) уыди раныхас радиойӕ. Йӕ раныхасы дзырдта, уыцы бӕрӕгбон цы чъизи ӕгъдӕуттӕй равзӕрд, уый тыххӕй. Хуыцауы адӕм, сӕйраг хайадӕй цы бӕлвырд разамынд райстой, уымӕ цы цӕстӕй ракастысты? Ӕфсымӕр Чарлз Брандлин радзырдта, йӕхӕдӕг дӕр ӕмӕ йӕ бинонтӕ дӕр Рождествойыл сӕ къух куыд систой, уый тыххӕй: «Ӕппындӕр нӕ рахъуыды-бахъуыды кодтам, мӕнг динимӕ баст бӕрӕгбоныл нӕ къух сисӕм ӕви нӕ. [...] Уый уыди, дӕ чъизи дзаумӕттӕ куыд раласай ӕмӕ сӕ куыд аппарай, афтӕ». Уыцы хъуыддагмӕ ахӕм цӕстӕй каст Хенри Кантуэлл дӕр (фӕстӕдӕр лӕггад кодта цӕуӕг цӕстдарӕгӕй). Уый загъта: «Уыцы бӕрӕгбон ныууадзын нын тынг ӕхсызгон уыди, уымӕн ӕмӕ нын фадат фӕзынд, цӕмӕй, Йегъовӕйы кӕй уарзӕм, уый тыххӕй цӕуылдӕр нӕ къух систаиккам». Чырыстийы иузӕрдион фӕдылдзӕуджытӕ цӕттӕ уыдысты, цӕмӕй, кӕм хъуыди, уым ивындзинӕдтӕ скодтаиккой ӕмӕ сын, мӕнг динӕй чи рацыд, уыцы бӕрӕгбонимӕ иумӕйагӕй мацы уыдаидd (Иоан. 15:19; 17:14).

11. Нӕ Паддзахы коммӕ кӕй кӕсӕм, уый нӕ бон куыд у равдисын?

¹¹ Уыцы иузӕрдион Библииртасджытӕ махӕн сты фӕзминаг. Хорз уаид, алчидӕр куы ахъуыды кӕнид: «Ӕууӕнкджын цагъар нын цы разамынд дӕтты, уымӕ цы цӕстӕй кӕсын? Уыцы разамынды тыххӕй бузныг вӕййын ӕмӕ уымӕ гӕсгӕ фӕархайын?» Афтӕ куы кӕнӕм, уӕд уымӕй ӕвдисдзыстӕм, нӕ Паддзахы коммӕ кӕй кӕсӕм. Цӕмӕн ис афтӕ зӕгъӕн? Уымӕн, ӕмӕ ӕууӕнкджын цагъары уый сӕвӕрдта, цӕмӕй нын уырнындзинад фидаргӕнӕн хӕринаг афоныл дӕтта (Хъуыд. 16:4, 5).

Крестӕн табу кӕнын хъӕуы?

12. Библииртасджытӕ бирӕ азты дӕргъы крестмӕ цы цӕстӕй кастысты?

¹² Библииртасджытӕ бирӕ азты дӕргъы крест нымадтой чырыстон дины бӕрӕггӕнӕг нысаныл. Кӕй зӕгъын ӕй хъӕуы, афтӕ нӕ хъуыды кодтой, ӕмӕ крестӕн табу кӕнын хъӕуы, уымӕн ӕмӕ йӕ ӕмбӕрстой, мӕнгхуыцӕуттӕн кувын раст кӕй нӕу (1 Кор. 10:14; 1 Иоан. 5:21). Суанг ма 1883 азы «Хъахъхъӕнӕн мӕсыджы» комкоммӕ фыст уыд, зӕгъгӕ, «мӕнгхуыцӕуттӕн кувыныл нымад цыдӕриддӕр у, уый Хуыцауы цӕсты ӕлгъаг у». Фӕлӕ райдианты Библииртасджытӕ крестмӕ ӕвзӕр цӕстӕй нӕ кастысты. Зӕгъӕм, сӕрыстырӕй дардтой значоктӕ крест ӕмӕ кадыхудимӕ. Уыцы значоктӕ сын сӕ зӕрдыл лӕууын кодтой, мӕлӕты онг Хуыцауыл иузӕрдионӕй куы баззайой, уӕд сын лӕвӕрд кӕй ӕрцӕудзӕн кадыхуд, ома цард. 1891 азӕй фӕстӕмӕ та крест ӕмӕ кадыхуды ныв уыди «Хъахъхъӕнӕн мӕсыджы» ӕддаг цъарыл дӕр.

13. Чырысти йӕ фӕдылдзӕуджытӕн куыд раргом кодта, крестмӕ цы цӕстӕй хъуамӕ кӕсой, уый? (Ноджыдӕр кӕс рамкӕ «Гыццылгай бамбӕрстой, крестӕн табу кӕнын раст кӕй нӕу».)

¹³ Библииртасджытӕ крест ӕмӕ кадыхуды нывӕн тынг аргъ кодтой. Фӕлӕ 1920-ӕм азты кӕрон Чырысти йӕ фӕдылдзӕуджытӕн гыццылгай ӕргом кӕнын райдыдта, крестмӕ цы цӕстӕй хъуамӕ кӕсой, уый. 1928 азы Детройты (штат Мичиган, АИШ) цы конгресс ацыд, уый тыххӕй ӕфсымӕр Грант Сьютер (фӕстӕдӕр лӕггад кодта Разамонӕг советы) афтӕ загъта: «Конгрессы нын бамбарын кодтой, крест ӕмӕ кадыхуды нывтӕ хъӕугӕ дӕр кӕй ницӕмӕн кӕнынц ӕмӕ ма уымӕй уӕлдай раст дӕр кӕй нӕу, кӕй сӕ пайда кӕнӕм, уый». Иннӕ цалдӕр азы дӕргъы сын Чырысти кресты тыххӕй ноджы фылдӕр цыдӕртӕ раргом кодта. Бӕлвырд бамбӕрстой, крестӕн сыгъдӕг дины бынат кӕй нӕй.

14. Хуыцауы адӕм кресты тыххӕй цы бамбӕрстой, уымӕ цы цӕстӕй ракастысты?

¹⁴ Хуыцауы адӕм кресты тыххӕй гыццылгай цы бамбӕрстой, уымӕ цы цӕстӕй ракастысты? Цымӕ сын зын уыди крест ӕмӕ кадыхуды нывыл сӕ къух сисын? Йегъовӕйӕн бирӕ азты дӕргъы чи лӕггад кӕны, иу ахӕм хо, Лилӕ Робертс, загъта: «Уыцы нывӕн цы нысаниуӕг уыди, уый куы бамбӕрстам, уӕд ыл нӕ къух ӕнцонтӕй систам». Ноджыдӕр ма иу иузӕрдион хо Урсулӕ Серенко та загъта: «Мах ӕнхъӕлдтам, крест ӕмӕ кадыхуд ӕвдисынц, нӕ Хицауы мӕлӕтӕн кӕй аргъ кӕнӕм ӕмӕ иузӕрдион кӕй стӕм, уый. Фӕлӕ йӕ бамбӕрстам, уый кӕй у мӕнг дины бӕрӕггӕнӕг нысан. Ӕмбисӕндты 4:18 стихы куыд фыст ис, афтӕ нӕ фӕндаг рухсӕй-рухсдӕр кодта, ӕмӕ уый тыххӕй бузныг уыдыстӕм». Чырыстийы иузӕрдион фӕдылдзӕуджыты нӕ фӕндыд, цӕмӕй сын мӕнг дины чъизи ӕгъдӕуттимӕ иумӕйагӕй исты уыдаид.

15, 16. Цӕмӕй бӕрӕг уыдзӕн, Йегъовӕйы ӕнӕуынгӕ кувӕндоны зӕххон кӕртытӕ фӕчъизи кӕнын кӕй нӕ уадзӕм?

¹⁵ Абон мах дӕр нӕ фӕнды, цӕмӕй раст дин истӕмӕй фӕчъизи уа. Мах ӕй зонӕм, Паддзах Йесо Чырысти йӕ адӕмӕн ӕууӕнкджын ӕмӕ зондджын цагъары уылты кӕй ӕххуыс кӕны, цӕмӕй мӕнг динӕй сӕхи ма фӕчъизи кӕной. Уымӕ гӕсгӕ нӕ литературӕйы мӕнг динимӕ баст бӕрӕгбӕттӕ ӕмӕ ӕгъдӕутты тыххӕй дзырд куы фӕцӕуы, уӕд уайтагъд уыцы разамындмӕ гӕсгӕ архайын райдайӕм. Чырысти Паддзах куы сси, уыцы рӕстӕг цы ӕфсымӕртӕ ӕмӕ хотӕ цард, уыдонау мах дӕр ӕппӕт хъарутӕй архайдзыстӕм, цӕмӕй Йегъовӕйы ӕнӕуынгӕ кувӕндоны зӕххон кӕртытӕ фӕчъизи кӕнын ма бауадзӕм.

¹⁶ Фӕлӕ ма фӕстаг бонты дӕргъы Чырысти аразы, бӕлвырдӕй кӕй нӕй фенӕн, бирӕ ахӕм хъуыддӕгтӕ дӕр. Зӕгъӕм, ӕмбырдтӕ хъахъхъӕны, мӕнг динты ахуырӕдтӕ ӕмӕ ӕгъдӕуттӕ чи парахат кӕны, ахӕм адӕмӕй. Чырысти уыцы хъуыддаг куыд аразы? Ӕркӕсӕм ӕм.

Паддзах «фыдгӕнджыты рӕстгӕнджытӕй» хицӕн кӕны

17, 18. Хызы тыххӕй фӕсномыг ныхасы цы нысан кӕны: а) хыз денджызы кӕй баппӕрстой? ӕ) «алыхуызон кӕсӕгтӕй» кӕй байдзаг? б) кӕсаг мигӕнӕнты кӕй ӕмбырд кӕнынц? ӕмӕ в) чи нӕ бӕззы, уыцы кӕсаг кӕй акалдтой?

¹⁷ Паддзах Йесо Чырысти лӕмбынӕг кӕсы, Хуыцауы адӕм ӕгас зӕххыл дӕр цы ӕмбырдты сты, уыдонмӕ. Чырысти ӕмӕ зӕдтӕ адӕмы кӕрӕдзийӕ хицӕн кӕнынц, фӕлӕ куыд, уый махӕн нӕ бон кӕронмӕ бамбарын нӕу. Йесо ацы хабар бамбарын кодта хызы тыххӕй фӕсномыг ныхасӕй. (Бакӕс Матфейы 13:47–50.) Цы нысан кӕны уыцы фӕсномыг ныхас?

¹⁸ Хыз «денджызы... баппӕрстой». Хыз амоны Хуыцауы Паддзахады тыххӕй хъусын кӕныны хъуыддагмӕ. Хорз хабар хъуыстгонд кӕмӕн цӕуы, уыцы адӕмы та Йесо абарста денджызимӕ. «Алыхуызон кӕсӕгтӕ» ӕрцахстой. Хорз хабар алыхуызон адӕймӕгты зӕрдӕтӕ бацагайы. Уыдонӕй чидӕртӕ бӕлвырд къахдзӕфтӕ саразынц, цӕмӕй ӕцӕг чырыстӕттӕ суой. Бирӕтӕ та, кӕд райдианты зӕрдиагӕй фӕхъусынц, уӕддӕр раст дины фарс не слӕууынцe. «Хорз кӕсаг мигӕнӕнты» ӕмбырд кӕнынц. Ӕмбырдтӕ абарӕн ис мигӕнӕнтимӕ, ӕмӕ сыгъдӕгзӕрдӕ адӕм уырдӕм ӕмбырдгонд цӕуынц. «Чи нӕ бӕззы», уыцы кӕсаг акалынц. Чырысти ӕмӕ зӕдтӕ «ацы цардӕвӕрды кӕрон», ома фӕстаг бонты дӕргъы, «фыдгӕнджыты рӕстгӕнджытӕй» хицӕн кӕнынцf. Ӕмӕ уый фӕрцы, раст зӕрдӕйы уаг кӕмӕн нӕй,– ӕвӕццӕгӕн, мӕнг дины ахуырӕдтӕ ӕмӕ ӕвзӕр хъуыддӕгтӕ ныууадзын кӕй нӕ фӕнды,– уыдонӕн сӕ бон нӕу, цӕмӕй ӕмбырдтӕ чъизи кӕнойg.

19. Чырысти Хуыцауы адӕмы дӕр ӕмӕ раст дин дӕр мӕнг дины ӕгъдӕуттӕй кӕй хъахъхъӕны, уый тыххӕй цы хъуыды кӕныс?

¹⁹ Куыд федтам, афтӕмӕй Паддзах Йесо Чырысти хъахъхъӕны, йӕ дӕлбар чи ис, уыдоны. Н. э. 1 ӕнусы кувӕндон куы ссыгъдӕг кодта, уӕд куыд зынгзӕрдӕйӕ архайдта раст дины сӕрыл ӕмӕ, раст диныл хӕст чи у, уыдоны тыххӕй, афтӕ зынгзӕрдӕйӕ архайы абон дӕр. Уый дын дӕ ныфсыл ныфс не ’фтауы? Мах тынг бузныг стӕм, Чырысти Хуыцауы адӕмы мӕнг дины ахуырӕдтӕ ӕмӕ ӕгъдӕуттӕй кӕй хъахъхъӕны, уый тыххӕй. Уӕдӕ нын мӕнг динимӕ иумӕйагӕй куы ницы уа, уӕд уымӕй равдисдзыстӕм, Паддзахы ӕмӕ йӕ Паддзахады фарс кӕй стӕм.