Базонгӕ ут пилигримтимӕ

«МӔНӔН мӕ бон никуы бауыдзӕн хӕдзарӕй-хӕдзармӕ хъусын кӕнын!» Ахӕм ныхӕстӕ арӕх фӕзӕгъынц, Библи ахуыр кӕнын чи райдайы, уыдон. Ӕнӕзонгӕ адӕймагӕн хъусын кӕной, ууыл хъуыды дӕр куы акӕнынц, уӕд сӕ зӕрдӕ баризы. Фӕлӕ уыцы ныхӕстӕ фыццаг хатт чи загъта, уый зоныс? Пилигрим – раныхӕстӕ-иу арӕх кӕмӕн уыд ӕмӕ Библи арӕхстджынӕй чи амыдта, иу ахӕм фӕлтӕрд ӕфсымӕр.

Журнал «Сионы хъахъхъӕнӕн мӕсыг» чи касти, уыдонӕй бирӕтӕ сӕ аргъуантӕ ныууагътой ӕмӕ сӕ фӕндыд, уыдонау рӕстдзинад чи агуырдта, ахӕм адӕмимӕ ӕмбӕлын. Уыцы журнал йӕ кӕсджыты разӕнгард кодта, цӕмӕй, уырнындзинад кӕмӕ уыд, ахӕмты агуырдтаиккой ӕмӕ алы къуыри дӕр иумӕ Библи иртӕстаиккой. Афтӕмӕй алы рӕтты фӕзынд къордтӕ. Уыцы къордтӕ-иу Хъахъхъӕнӕн Мӕсыджы Ӕхсӕнадмӕ ныффыстой, цӕмӕй-иу сӕ бабӕрӕг кодтаиккой. Гъемӕ 1894 азӕй Ӕхсӕнад уыцы къордтӕм ӕрвитын райдыдта цӕуӕг цӕстдарджыты. Уыцы цӕстдарджыты фӕстӕдӕр хонын райдыдтой пилигримтӕ. Уыдон уыдысты фӕлтӕрд, сӕрныллӕг ӕмӕ дзырдарӕхст ӕфсымӕртӕ, сӕхиуыл нӕ ауӕрстой, Библи хорз зыдтой ӕмӕ уыдысты дӕсны ахуыргӕнджытӕ, стӕй Чырыстийы нывондыл фидарӕй ӕууӕндыдысты ӕмӕ уыцы нывондӕн стыр аргъ кодтой. Пилигрим-иу къорд куы бӕрӕг кодта, уӕд-иу дзы фӕци ӕрмӕстдӕр иу кӕнӕ дыууӕ боны. Библииртасджытӕй бирӕтӕ фыццаг хатт хъусын кӕнынмӕ рацыдысты, пилигримы раныхасмӕ-иу хуынды гӕххӕтытӕ куы уӕрстой, уӕд. Хьюго Римерӕн (фӕстӕдӕр уыди Разамонӕг советы) иухатт скъолайы изӕрӕй уыди раныхас ӕмӕ уый фӕстӕ суанг ӕмбисӕхсӕвтӕм дзуапп лӕвӕрдта, чи йӕм хъуыста, уыдоны фарстатӕн. Уыцы бон кӕд тынг бафӕллад, уӕддӕр йӕ цинӕн кӕрон нӕ уыд ӕмӕ загъта, «замманай рӕстӕг арвыстам иумӕ», зӕгъгӕ.

«Сионы хъахъхъӕнӕн мӕсыджы» куыд фыст уыд, афтӕмӕй пилигримӕн йӕ «сӕйраг нысан» уыди, «уырнындзинад кӕй баиу кодта, уыдоны» фидар кӕнын. Фембӕлдтӕ-иу уагътой уырнджытӕй искӕй хӕдзары ӕмӕ-иу уырдӕм ӕрбацыдысты, Библииртасджытӕй хӕстӕг чи цард, уыдон. Фыццаг-иу пилигримы раныхасмӕ байхъуыстой, ӕмӕ-иу сын стӕй пилигрим сӕ фарстатӕн дзуапп радта. Фембӕлды фӕстӕ-иу уырнджытӕн хорз фадат уыди уазӕгуарзондзинад равдисынӕн. Нӕ хо Мод Эббот радзырдта, гыццыл ма куы уыди, уӕд иухатт райсомӕй кӕй ӕрбацыд пилигримы раныхасмӕ ӕмӕ раныхасы фӕстӕ иууылдӕр кӕрты дӕргъӕй-дӕргъмӕ фынгыл кӕй ӕрбадтысты. Мод загъта: «Уыйбӕрц хӕрзад хӕринӕгтӕ дзы уыд, ӕмӕ диссаг: цӕхджын хуыйыфыд, карчыфыд, алыхуызон дзултӕ, гуылтӕ, адджинӕгтӕ! Не ’ппӕт дӕр нӕхи дзӕбӕх федтам, ӕмӕ стӕй дыууӕ сахатыл ногӕй ӕрӕмбырд стӕм, цӕмӕй иннӕ раныхасмӕ байхъуыстаиккам». Фӕлӕ ма йӕ ныхӕстӕм бафтыдта: «Фырӕфсӕстӕй нӕ хуыссӕг йӕ быны скодта, ӕмӕ ма раныхасмӕ чи хъуыста». Пилигримӕй бирӕ чи фӕлӕггад кодта, иу ахӕм ӕфсымӕр, Бенджамин Бартон, загъта: «Фынгыл-иу цы диссӕгтӕ уыди, уыдон-иу иууылдӕр куы хордтаин, уӕд мӕ афонмӕ стӕгдар дӕр нал баззадаид». Цасдӕры фӕстӕ сӕйраг хайадӕй, Бруклинӕй, къордтӕм писмо арвыстой ӕмӕ дзы уыди ахӕм уынаффӕ, зӕгъгӕ, хуыздӕр уаид, хотӕ-иу пилигримӕн «хуымӕтӕг хӕринӕгтӕ» куы кӕниккой ӕмӕ-иу ууыл дӕр куы батыхсиккой, цӕмӕй-иу «ӕхсӕв дзӕбӕх баулӕфа».

Пилигримтӕ уыдысты хорз ахуыргӕнджытӕ. Уыдон арӕхстджынӕй пайда кодтой алыхуызон схемӕтӕй, таблицӕтӕй, нывтӕй, ӕмӕ-иу уый фӕрцы адӕмӕн сӕ бон уыд, дзырд цы хабӕрттыл цыди, уыдон сӕ цӕстытыл ауайын кӕнын. Ричард Барберы раныхӕстӕ-иу «ахӕм дзаджджын уыдысты, ӕмӕ-иу сӕм адӕймаг хъусынӕй не ’фсӕст». Уолтер Торн та-иу фыдау фӕлмӕн ныхас кодта, ӕмӕ-иу ӕм чи хъуыста, уыдонмӕ-иу афтӕ каст, цыма семӕ «рагзаманты мыггаджы хистӕртӕй сӕ иу» ныхас кӕны. Шилд Туджиян дӕр уыди пилигрим. Иухатт ӕфсымӕртимӕ «Форд»-ыл (модель А) кӕдӕмдӕр фӕцӕйцыди ӕмӕ иуафон ӕвиппайды фӕхъӕр кодта, фӕуром-ма, зӕгъгӕ. Ӕмӕ машинӕйӕ рагӕпп кодта, фӕндаггӕрон цалдӕр дидинӕджы ратыдта ӕмӕ йе ’мбӕлттӕн сӕ зӕрдыл ӕрлӕууын кодта, Йегъовӕйы сконд хъуыддӕгтӕ куыд диссаг сты, уый.

Пилигримӕй лӕггад кӕнын ӕнцон нӕ уыд, уӕлдайдӕр та, хистӕр кары чи уыд, уыдонӕн. Фӕлӕ дзы кӕмӕндӕрты ӕппӕты зындӕр уыди, ныр сын сӕйрагдӕр хӕдзарӕй-хӕдзармӕ хъусын кӕнын кӕй хъуамӕ уыдаид ӕмӕ уыцы хъуыддаджы иннӕтӕн фӕзминаг кӕй хъуамӕ уыдаиккой, уый. 1924 азы 15 мартъийы «Сионы хъахъхъӕнӕн мӕсыджы» фыст уыд, зӕгъгӕ, ӕцӕг чырыстӕттӕн сӕ «сӕйрагдӕр хӕстӕй иу у Хуыцауы паддзахады тыххӕй хъусын кӕнын. Ӕмӕ пилигримтӕ дӕр уый тыххӕй ӕрвыст цӕуынц».

Пилигримтӕй кӕмӕндӕрты уыцы ивындзинад сӕ зӕрдӕмӕ нӕ фӕцыд, ӕмӕ уый тыххӕй цӕуӕг цӕстдарджытӕй нал лӕггад кодтой. Чидӕртӕ та дзы иннӕты дӕр сӕ фӕдыл акодтой ӕмӕ сӕхӕдӕг хицӕнӕй ӕмбырд кӕнын райдыдтой. Ӕфсымӕр Роби Эдкинс радзырдта, иу дзырдарӕхст пилигрим йӕ фыртыхстӕй афтӕ кӕй загъта: «Ӕз сценӕйӕ дзурын йеддӕмӕ ӕндӕр куы ницӕмӕ арӕхсын, уӕд куыд кӕндзынӕн? Мӕнӕн мӕ бон никуы бауыдзӕн хӕдзарӕй-хӕдзармӕ хъусын кӕнын!» Уыцы пилигрим цы баци, уый тыххӕй ӕфсымӕр Эдкинс мӕнӕ цы загъта: «Уый фӕстӕ ма йӕ федтон 1924 азы конгрессы Колумбусы, штат Огайойы. Лӕджы зӕрдӕ йӕ уындӕй мӕгуыр кодта. Йӕ алыварс дуне хотӕ ӕмӕ ӕфсымӕртӕ уыцы хъӕлдзӕг уыдысты, уый та гыццыл бӕласы аууон иунӕгӕй лӕууыд. Уӕдӕй фӕстӕмӕ йӕ никуыуал федтон. Цасдӕры фӕстӕ организаци бынтондӕр ныууагъта». Фӕлӕ иннӕ ӕфсымӕрты тыххӕй та Роби Эдкинс загъта, зӕгъгӕ, дам, «бирӕтӕ конгрессӕй цингӕнгӕйӕ цыдысты ӕмӕ чингуытӕ сӕ машинӕтӕм хастой». Уыдон цӕттӕ уыдысты хӕдзарӕй-хӕдзармӕ хъусын кӕнынмӕ (Хъуыд. 20:20, 21).

Кӕд пилигримтӕй бирӕтӕ хӕдзарӕй-хӕдзармӕ хъусын кӕнынмӕ сӕ ныфс нӕ хастой ӕмӕ сӕхӕдӕг дӕр, кӕй хъуамӕ ахуыр кодтаиккой, уыцы ӕфсымӕртау тыхстысты, уӕддӕр уыцы куыстмӕ зӕрдиагӕй бавнӕлдтой. Немыцагау чи дзырдта, иу ахӕм пилигрим, Максвелл Френд, фыста: «Пилигримтӕ хӕдзарӕй-хӕдзармӕ хъусын кӕнын кӕй райдыдтой, уый фӕрцы сын сӕ лӕггад ноджы фылдӕр арфӕдзинӕдтӕ хаста». Ӕндӕр пилигрим та, Джон Бонет, радзырдта, ӕфсымӕртӕ, иуӕй-иутӕй фӕстӕмӕ, раст цӕстӕй кӕй ракастысты, ныр сӕ хъарутӕ иууылдӕр хъусын кӕнынмӕ кӕй хъуамӕ сарӕзтаиккой, уымӕ. Уый загъта, зӕгъгӕ, ӕфсымӕртӕн «сӕ зӕрдӕты зынг сыгъди ӕмӕ хъусын кӕныны хъуыддаджы разӕй цыдысты».

Бирӕ азты дӕргъы уыцы иузӕрдион цӕуӕг цӕстдарджытӕ хотӕн ӕмӕ ӕфсымӕртӕн уыдысты стыр ӕххуыс. Йегъовӕйӕн рагӕй чи лӕггад кӕны, иу ахӕм ӕфсымӕр, Норман Ларсон, загъта: «Уӕд нырма гыццыл лӕппу уыдтӕн, фӕлӕ, пилигримтӕ куыд фыдӕбон кӕнынц ӕмӕ куыд стыр ӕххуыс сты, уый хорз ӕмбӕрстон... Пилигримтӕ мын тынг баххуыс кодтой, цӕмӕй рӕстдзинады фӕндагыл фидар слӕууыдаин». Абоны онг дӕр цӕуӕг цӕстдарджытӕ удуӕлдайӕ ӕмӕ иузӕрдионӕй лӕггад кӕнынц ӕмӕ нын ӕххуыс кӕнынц, цӕмӕй нӕ алчидӕр фидарӕй зӕгъа: «Мӕ бон у хӕдзарӕй-хӕдзармӕ хъусын кӕнын!»

[Хицӕнгонд текст 32 фарсыл]

Пилигримы ӕрцыд-иу уыди бӕрӕгбоны хуызӕн

[Ныв 31 фарсыл]

Бенджамин Бартон 1905 азы, пъланмӕ гӕсгӕ, хъуамӕ ӕрлӕууыдаид иу-170 раны

[Ныв 32 фарсыл]

Уолтер Торн лӕггад кодта пилигримӕй; уыди фӕлмӕн адӕймаг, ӕмӕ йӕ уый тыххӕй хуыдтой «дада»

[Ныв 32 фарсыл]

Дж. Браун уыди пилигрим; 1902 азы йӕ арвыстой Ямайкӕмӕ, цӕмӕй уым бафидар кодтаид 14 гыццыл къорды

[Ныв 32 фарсыл]

Пилигримты лӕггады фӕрцы ӕфсымӕртӕн сӕ уырнындзинад фидар кодта, кӕрӕдзимӕ ӕнгомдӕр кодтой ӕмӕ сӕхи организацийыл бастой