Хуымӕтӕг цард хӕссы циндзинад

ДАНИЕЛЬ ӔМӔ МИРИАМ сӕ цард баиу кодтой 2000 азы сентябры ӕмӕ ӕрцардысты Барселонӕйы (Испани). Куыд зӕгъынц, афтӕмӕй хорз цардысты, ӕппындӕр ницы цух уыдысты. Даниель зӕгъы: «Нӕ мызд уыйбӕрц уыд, ӕмӕ нӕ бон уыди хорз ресторантӕм цӕуын, фӕсарӕнты улӕфын ӕмӕ зынаргъ дзаумӕттӕ ӕлхӕнын». Фӕлӕ стӕй сӕ царды цыдӕр фӕивта.

2006 азы конгрессы иу раныхасы Даниель фехъуыста ахӕм фарста: «Цымӕ ӕппӕт дӕр аразӕм, цӕмӕй, „сӕрсӕфӕны был чи лӕууы“, уыдон ӕнусон цардмӕ кӕнӕг фӕндагыл слӕууой?» (Ӕмб. 24:11). Раныхасы дзырд цыди, хъусын кӕнын нӕ хӕс кӕй у, уымӕн ӕмӕ адӕмы цард уымӕй аразгӕ у (Хъуыд. 20:26, 27). Даниель загъта: «Афтӕ мӕм каст, цыма Йегъовӕ уыцы ныхӕстӕ мӕнӕн дзырдта». Раныхасы ма ноджыдӕр дзырд цыди, Йегъовӕйӕн цас фылдӕр лӕггад кӕнӕм, уыйас амондджындӕр кӕй вӕййӕм. Даниель уый зыдта, уымӕн ӕмӕ Мириам уӕдмӕ дӕр пионерӕй лӕггад кӕнын райдыдта, ӕмӕ уыд тынг амондджын.

Уыцы раныхас Даниелы зӕрдӕмӕ афтӕ тынг бахъардта, ӕмӕ сфӕнд кодта йӕ цард цӕхгӕр фӕивын. Къаддӕр кусын райдыдта ӕмӕ сси пионер. Стӕй ма хъуыды кодта, гъеныр Мириамимӕ, хъусынгӕнджытӕ кӕм нӕ фаг кӕны, уырдӕм куы ацӕуиккам, уӕд нын уый стыр циндзинад хӕссид, зӕгъгӕ.

ЗЫНДЗИНӔДТӔ ӔМӔ АРФӔДЗИНӔДТӔ

2007 азы майы Даниель ӕмӕ Мириам сӕ куыст ныууагътой ӕмӕ ацыдысты Панамӕмӕ, уыцы бӕстӕйы ма уый размӕ дӕр уыдысты. Сӕ ног территоримӕ хауди Карибы денджызы архипелаг Бокас-дель-Торойӕ цалдӕр сакъадахы. Цы адӕм дзы цӕры, уыдонӕн сӕ фылдӕр сты, нгабе чи хуыйны, уыцы адӕмыхаттӕй. Даниель ӕмӕ Мириам банымадтой, цы ӕхца ӕрӕмбырд кодтой, уыдон сын Панамӕйы аст мӕйы фаг кӕй уыдзысты.

Иу сакъадахӕй-иу иннӕмӕ цыдысты лодкӕйыл, уырдӕм-иу куы бахӕццӕ сты, уӕд та – велосипедтыл. Ныр дӕр ма хъуыды кӕнынц, фыццаг хатт велосипедтыл 32 километры куыд фӕцыдысты, уый. Цӕуын сӕ хъуыди къуыбыртыл хӕрдмӕ, ӕмӕ уыди тынг тӕвд. Даниель афтӕ бафӕллад, ӕмӕ йӕ зӕрдӕ фӕцӕйхъарм кодта. Фӕлӕ, фӕндагыл цы хӕдзӕртты хъусын кодтой, уым-иу сӕ хорз суазӕг кодтой, уӕлдайдӕр та Даниель ӕмӕ Мириам ӕвзаг нгабейыл цалдӕр ныхасы куы сахуыр кодтой, уый фӕстӕ. Бирӕ нӕ рацыд, афтӕ сын фӕзынд 23 Библийы ахуыры.

Фӕлӕ Даниель ӕмӕ Мириамӕн се ’хца куы фесты, уӕд афтӕ тынг нал цин кодтой. Даниель дзуры: «Фӕстӕмӕ нӕ Испанимӕ аздӕхын кӕй хъуыди, ууыл хъуыды кӕнгӕйӕ-иу нӕ цӕссыг тыххӕй урӕдтам. Библи кӕимӕ ахуыр кодтам, уыдоны нӕ ныууадзын нӕ фӕндыд». Фӕлӕ иу мӕйы фӕстӕ иу хорз хабар базыдтой – снысан сӕ кодтой сӕрмагонд пионертӕй. Мириам загъта: «Нӕ бон уым баззайын кӕй уыди, ууыл тынг фӕцин кодтам!»

СЕ СТЫРДӔР ЦИН

Нӕ организацийы ивындзинӕдтӕ кӕй ӕрцыд, уымӕ гӕсгӕ 2015 азы Даниель ӕмӕ Мириамӕн загътой, сӕрмагонд пионертӕ кӕй нал уыдзысты, фӕлӕ кӕд сӕ бон у, уӕд хорз кӕй уаид, дарддӕр пионертӕй куы лӕггад кӕниккой. Ӕмӕ куыд бакодтой? Уыдон сӕ зӕрдыл дардтой 37-ӕм псаломы 5-ӕм стихы ныхӕстӕ: «Дӕ фӕндаг Йегъовӕйы бар бакӕн, дӕ зӕрдӕ йыл дар, ӕмӕ уый йӕхӕдӕг архайдзӕн». Гъемӕ куыст ссардтой, цӕмӕй сӕ бон уыдаид пионертӕй лӕггад кӕнын, ӕмӕ абон дӕр лӕггад кӕнынц иу ӕмбырды провинци Верагуасы (Панамӕ).

Даниель зӕгъы: «Испанийӕ ардӕм куы цыдыстӕм, уӕд ӕй нӕ зыдтам, нӕ бон хуымӕтӕг цард кӕнын бауыдзӕн ӕви нӕ. Фӕлӕ нын уый рауад, ӕмӕ нӕ ӕцӕгдӕр цы хъӕуы, уый цух никуы вӕййӕм». Се стырдӕр цин та цы у? Мӕнӕ цы зӕгъынц: «Сӕрныллӕг адӕмӕн Йегъовӕйы базонынӕн кӕй ӕххуыс кӕнӕм, уый нын ахӕм циндзинад хӕссы, ӕмӕ йын зӕгъӕн дӕр нӕй!»