БИОГРАФИ
Мах ссардтам «зынаргъ налхъуыт»
УИНСТОН ӕмӕ Памелӕ (Пэм) Пейн лӕггад кӕнынц Австралазийы филиалы. Кӕд амондджын цард фӕкодтой, уӕддӕр зындзинӕдтӕ дӕр бавзӕрстой. Зӕгъӕм, хъуыди сӕ алыхуызон адӕмыхӕттыты ӕгъдӕуттыл ахуыр кӕнын, стӕй ма сыл ахӕм бӕллӕх дӕр ӕрцыд, ӕмӕ сывӕрджын куы уыди, уӕд февзӕр, ӕмӕ сывӕллон гуыбыны амард. Ӕмӕ сын кӕд ӕнцон нӕ уыд, уӕддӕр абоны онг цингӕнгӕйӕ лӕггад кӕнынц, стӕй Йегъовӕйы ӕмӕ хотӕ ӕмӕ ӕфсымӕрты уарзынц. Ацы интервьюйы нын сӕ хабӕрттӕ радзырдтой.
Уинстон, радзур-ма нын, Хуыцауы куыд агуырдтай.
Ӕз схъомыл дӕн, диныл хӕст чи нӕ уыд, ахӕм бинонты ’хсӕн. Мах цардыстӕм Австралийы, штат Квинсленды, зӕххы куыст кӕм кодтам, ахӕм фермӕйы. Дард ран кӕй цардыстӕм, уымӕ гӕсгӕ адӕмы арӕх нӕ уыдтон, мӕ рӕстӕг фылдӕр мӕ бинонтимӕ ӕрвыстон. Иу-12 азы мыл куы цыд, уӕд райдыдтон Хуыцауы агурын. Куывтон ӕм, цӕмӕй мын йӕхи тыххӕй рӕстдзинад раргом кодтаид. Фӕстӕдӕр цӕрынмӕ ацыдтӕн штат Хуссар Австралимӕ, горӕт Аделаидӕмӕ, ӕмӕ уым куыст ссардтон. 21 азы мыл куы цыд, уӕд отпусчы горӕт Сиднеймӕ ацыдтӕн ӕмӕ уым Пэмимӕ базонгӕ дӕн. Уый мын радзырдта англо-израилаг дины тыххӕй. Уыдон афтӕ дзурынц, зӕгъгӕ, дам, бритайнӕгтӕ сты Израилы сӕфт мыггӕгты байзӕддӕгтӕ. Сӕ хъуыдымӕ гӕсгӕ, уыцы мыггӕгтӕ сты, нӕ эрӕйы размӕ 740 азы уацары кӕй акодтой, уыцы цӕгат паддзахады дӕс мыггаджы. Фӕстӕмӕ Аделаидӕмӕ куы аздӕхтӕн, уӕд уыцы дины тыххӕй ме ’мкусӕгӕн радзырдтон. Уыцы рӕстӕг уый Йегъовӕйы Ӕвдисӕнтимӕ Библи ахуыр кодта. Нӕ ныхас цалдӕр сахаты ахаста, ӕмӕ фылдӕр дзырдтам, Ӕвдисӕнтӕ цӕуыл ӕууӕндынц, ууыл. Уӕд бамбӕрстон, Хуыцау мын мӕ кӕддӕры куывдтытӕн дзуапп кӕй радта. Афтӕмӕй ссардтон «зынаргъ налхъуыт» – не Сфӕлдисӕджы ӕмӕ йӕ Паддзахады тыххӕй рӕстдзинад! (Матф. 13:45, 46).
Пэм, ды дӕр уыцы «налхъуыт» агурын ӕрыгонӕй райдыдтай. Куыд ӕй ссардтай?
Ӕз схъомыл дӕн штат Ног Хуссар Уэльсы, горӕт Кофс-Харборы. Мӕ ныййарджытӕ ӕмӕ мӕ мады ныййарджытӕ англо-израилаг дины ахуырӕдтыл хӕст уыдысты, ӕмӕ мӕ кӕстӕр ӕфсымӕрӕн, мӕ хистӕр хойӕн ӕмӕ мӕнӕн нӕ гыццылӕй фӕстӕмӕ дзырдтой, зӕгъгӕ, дам, сӕ фыдӕлтӕ бритайнӕгтӕ кӕмӕн сты, уыдон Хуыцауы ӕвзӕрст адӕм сты. Стӕй мӕ мады хойы ӕмӕ мӕ мады ӕфсымӕры цотӕн дӕр уый амыдтой. Фӕлӕ ӕз уыцы ахуырӕдтимӕ разы нӕ уыдтӕн, стӕй мӕ бон афтӕ зӕгъын нӕ уыд, ӕмӕ Хуыцаумӕ ӕввахс дӕн. 14 азы мыл куы цыди, уӕд алыхуызон аргъуантӕм цыдтӕн. Уыдтӕн англиканон аргъуаны, стӕй баптисттӕм ӕмӕ адвентисттӕм дӕр. Фӕлӕ мын уый уӕддӕр Хуыцауы базонынӕн ницы ӕххуыс фӕци.
Фӕстӕдӕр мӕ бинонтимӕ алыгътӕн Сиднеймӕ. Ӕмӕ уым Уинстонимӕ базонгӕ дӕн, отпусчы куы уыд, уӕд. Гыццыл раздӕр куыд ской кодта, афтӕмӕй-иу дины тыххӕй кӕй ныхас кодтам, уый фӕрцы Йегъовӕйы Ӕвдисӕнтимӕ Библи ахуыр кӕнын райдыдта. Фӕстӕдӕр кӕрӕдзимӕ фыссын райдыдтам, ӕмӕ-иу йӕ писмоты Библийӕ дуне стихтӕ ныффыста. Раст зӕгъгӕйӕ фыццаг уый мӕ зӕрдӕмӕ нӕ цыд, суанг ма мӕсты дӕр кодтон. Фӕлӕ сабыргай ӕмбарын райдыдтон, цы фыссы, уыдӕттӕ раст кӕй сты.
1962 азы ӕрцардтӕн Аделаидӕйы, цӕмӕй Уинстонмӕ хӕстӕгдӕр уыдаин. Уинстон ууыл батыхст, цӕмӕй иу бинонтӕм баззадаин. Уыдон уыдысты Томас ӕмӕ Джанис Слоуман ӕмӕ раздӕр лӕггад кодтой миссионертӕй Папуӕ – Ног Гвинейы. Тынг хӕларзӕрдӕ уыдысты. Уӕд мыл 18 азы йеддӕмӕ нӕ цыд, ӕмӕ мын баххуыс кодтой Йегъовӕйы тыххӕй фылдӕр базонынӕн. Ӕз дӕр Уинстонау Библи ахуыр кӕнын райдыдтон, ӕмӕ, бирӕ нӕ рацыд, афтӕ бамбӕрстон, рӕстдзинад кӕй ссардтон. Фӕстӕдӕр Уинстонимӕ нӕ цард баиу кодтам ӕмӕ Йегъовӕйӕн ӕххӕстрӕстӕг лӕггад кӕнын райдыдтам. Ӕмӕ кӕд зындзинӕдтыл ӕмбӕлдыстӕм, уӕддӕр бирӕ арфӕдзинӕдтӕй хайджын уыдыстӕм, ӕмӕ уый фӕрцы, цы хӕзна ссардтам, уымӕн ноджы тынгдӕр аргъ кӕнын райдыдтам.
Уинстон, радзур-ма нын, Йегъовӕйӕн райдианты куыд лӕггад кодтат, уый тыххӕй.
1. Районон цӕстдарӕгӕй куы лӕггад кодтон, уӕд кӕй бабӕрӕг кодтам, уыцы бӕстӕтӕ картӕйыл
2. Маркӕтӕ иуӕй-иу сакъадӕхтӕй. Кирибати ӕмӕ Тувалу раздӕр хуыдтой Гилберт ӕмӕ Эллисы сакъадӕхтӕ
3. Рӕсугъд сакъадах Фунафути, хауы Тувалуйы бӕстӕмӕ. Фунафути у, миссионерты ӕрцыды размӕ кӕм лӕггад кодтам, уыцы сакъадӕхтӕй иу
Пэмимӕ нӕ цард куы баиу кодтам, уымӕй бирӕ нӕ рацыд, афтӕ нын Йегъовӕ фылдӕр лӕггад кӕнынӕн дуӕрттӕ гом кӕнын райдыдта (1 Кор. 16:9). Фыццаг дуармӕ нын Йегъовӕ бацамыдта ӕфсымӕр Джек Портеры руаджы. Уый лӕггад кодта районон цӕстдарӕгӕй ӕмӕ-иу нын нӕ гыццыл ӕмбырд дӕр бӕрӕг кодта. (Ныр Джекимӕ иумӕ лӕггад кӕнӕм Австралазийы Филиалы комитеты.) Джек ӕмӕ нӕ йӕ бинойнаг, Розлин, разӕнгард кодтой пионертӕй лӕггад кӕнынмӕ. Гъемӕ мах дӕр пионертӕй лӕггад кӕнын райдыдтам, ӕмӕ фондз азы дӕргъы лӕггад кодтам. 29 азы мыл куы цыд, уӕд та мӕ снысан кодтой районон цӕстдарӕгӕй. Бӕрӕг-иу кодтам, Сабыр океаны хуссар хайы цы сакъадӕхтӕ ис, уыдон: Америкаг Самоа, Вануату, Кирибати, Науру, Ниуэ, Самоа, Токелау, Тонгӕ ӕмӕ Тувалу. Уӕд уыцы сакъадӕхтӕн разамынд лӕвӕрдта Фиджийы филиал.
Уыцы рӕстӕг хабар афтӕ уыд, ӕмӕ, дард чи уыд, уыцы сакъадӕхты цӕрджытӕй иуӕй-иутӕ Йегъовӕйы Ӕвдисӕнтыл ӕнӕууӕнк кодтой, ӕмӕ нӕ уымӕ гӕсгӕ хъуыди арӕхстгай ӕмӕ ӕмбаргӕйӕ архайын. Ӕмбырдты хотӕ ӕмӕ ӕфсымӕртӕ бирӕ нӕ уыд, ӕмӕ се ’ппӕтӕн сӕ бон нӕ уыд мах суазӕг кӕнын. Ӕмӕ-иу хъӕуы цӕрджытӕн загътам, цӕмӕй-иу уыдонмӕ баззадаиккам. Ӕмӕ кӕд Ӕвдисӕнтыл ӕнӕууӕнк кодтой, уӕддӕр-иу хӕларзӕрдӕ разындысты ӕмӕ-иу нӕ суазӕг кодтой.
Уинстон, ды зӕрдиагӕй ууыл тыхсыс, цӕмӕй тӕлмац кӕныны куыст размӕ цӕуа. Хабар афтӕ куыд рауад, уый-ма нын радзур.
Уинстон уадзы скъола хистӕр нӕлгоймӕгтӕн (сакъадах Самоа)
Уыцы рӕстӕг Тонгӕйы цӕрӕг ӕфсымӕртӕм тонгайнаг ӕвзагыл цалдӕр буклеты ӕмӕ брошюрӕйы йеддӕмӕ нӕ уыд. Адӕмимӕ-иу Библи ахуыр кӕнгӕйӕ пайда кодтой чиныгӕй «Ӕнусон цардмӕ кӕнӕг ӕцӕгдзинад», уыди англисаг ӕвзагыл. Ӕмӕ хистӕр нӕлгоймӕгтӕн цыппар къуырийы дӕргъы скъола куы цыди, уӕд ӕртӕ бынӕттон хистӕр нӕлгоймагӕн загътой, цӕмӕй уыцы чиныг тонгайнаг ӕвзагмӕ ратӕлмац кодтаиккой. Уыдон англисаг ӕвзаг бынтон хорз нӕ зыдтой, фӕлӕ уӕддӕр сразы сты. Куы йӕ ратӕлмац кодтой, уӕд Пэм уыцы текст ныммыхуыр кодта, ӕмӕ йӕ Иугонд Штатты филиалмӕ арвыстам, цӕмӕй уым чиныг ныммыхуыр кодтаиккой. Тӕлмац кӕныныл ацыд аст къуырийы бӕрц. Кӕд сӕ тӕлмац бынтон хӕрзхъӕд нӕ рауад, уӕддӕр уыцы чиныг тонгайнаг ӕвзагыл дзурӕг адӕмӕй бирӕтӕн баххуыс кодта рӕстдзинад базонынӕн. Мах Пэмимӕ тӕлмацгӕнджытӕ не стӕм, фӕлӕ ныл уӕддӕр уыцы хабар афтӕ фӕзынд, ӕмӕ уӕдӕй фӕстӕмӕ зӕрдиагӕй ууыл тыхсӕм, цӕмӕй тӕлмац кӕныны куыст размӕ цӕуа.
Пэм, сакъадӕхтыл цы цард уыд, уый, Австралийы цы цард уыди, уымӕй куыд хицӕн кодта?
Районон цӕстдарӕгӕй куы лӕггад кодтон, уӕд цасдӕр рӕстӕг ацы автобус уыд нӕ цӕрӕнбынат
Сакъадӕхтыл цард бынтон ӕндӕрхуызон уыд! Кӕмдӕрты уыд тынг тӕвд ӕмӕ дзы уӕлдӕф тынг уымӕл уыди, кӕмдӕрты уыди дуне къогъотӕ ӕмӕ уырытӕ, цалдӕр хатты фӕрынчын стӕм, стӕй-иу нӕм хатгай фаг хӕринаг нӕ уыд. Фӕлӕ-иу нын уды хос уыдысты, изӕрыгӕтты-иу цы рӕсугъд нывтӕ уыдтам, уыдон. Мах цардыстӕм, самоайнагау фале кӕй хонынц, ахӕм полинезиаг хӕдзары, йӕ сӕр уыд хъӕмпӕй ӕмбӕрзт ӕмӕ йын къултӕ нӕ уыд. Нӕ хӕдзарӕй нӕм зынди океан. Мӕйрухс ӕхсӕв та-иу кокосты пальмӕтӕ разындысты ӕмӕ-иу мӕй йӕхи океаны надта. Уыцы диссаджы нывтӕм кӕсгӕйӕ-иу бирӕ цӕуылдӕрты хъуыды кодтам, стӕй-иу Йегъовӕмӕ куывтам. Ӕмӕ-иу уый фӕрцы нӕ хъуыдытӕ сарӕзтам, нӕ царды хорзӕй цы уыд, уымӕ.
Уыцы сакъадӕхтыл цы сывӕллӕттӕ цард, уыдоны тынг бауарзтам. Худӕг уыдысты, стӕй-иу махмӕ, урсцъар фӕсарӕйнаг адӕммӕ, диссагмӕ кӕсӕгау кастысты. Иухатт сакъадах Ниуэйыл куы уыдыстӕм, уӕд иу гыццыл лӕппу Уинстоны къухмӕ бавнӕлдта ӕмӕ йын афтӕ: «Дӕ бумбулитӕ мӕ зӕрдӕмӕ цӕуынц». Уый размӕ къухтыл хъуынтӕ никуы федта, ӕмӕ сӕ куыд схуыдтаид, уый нӕ зыдта!
Бирӕтӕ ахӕм мӕгуыр цард кодтой, ӕмӕ-иу сыл нӕ зӕрдӕ фӕрыст. Сӕ алыварс ӕрдз бӕргӕ рӕсугъд уыд, фӕлӕ сӕ царды уавӕртӕ та хӕрзтӕй нӕ уыдысты. Зӕгъӕм-иу дохтырмӕ бахауын тынг зын уыд, стӕй-иу сӕм нуазыны дон дӕр фаг нӕ уыд. Фӕлӕ не ’фсымӕртӕ уыдӕттыл ӕгӕр нӕ мӕт кодтой. Ахӕм уавӕрты цӕрын ахуыр уыдысты. Уыдон уыдысты амондджын – сӕ бинонтӕ уыдысты сӕ фарсмӕ, ӕмбырдтӕ кӕм уагътаиккой, ахӕм бынӕттӕ сын уыд ӕмӕ сӕ бон уыд Йегъовӕйы кадджын кӕнын. Сӕ цӕвиттон нын ӕххуыс кодта, цӕмӕй Хуыцауы хъуыддаг фыццаг бынаты ӕвӕрдтаиккам ӕмӕ хуымӕтӕг цард кодтаиккам.
Пэм, хатгай-иу дӕ дӕхи хъуыди дон амал кӕнын, стӕй хӕринаг ног уавӕрты кӕнын. Радзур-ма нын, куыдтӕтӕ-иу кодтай.
Пэм гӕрзтӕ ӕхсы (сакъадах Тонгӕ)
Мӕ фыд мӕ бирӕ цӕуылдӕрты сахуыр кодта, ӕмӕ дзы уый тыххӕй тынг бузныг дӕн. Зӕгъӕм, сахуыр мӕ кодта арт ӕндзарын ӕмӕ артыл хӕринаг кӕнын. Бацамыдта мын, бирӕ дӕм куы ницы уа, уӕд куыд ис фӕцӕрӕн, уый дӕр. Иухатт Уинстонимӕ сакъадах Кирибатийы куы уыдыстӕм, уӕд ӕрлӕууыдыстӕм иу гыццыл хӕдзары. Йӕ сӕр уыди хъӕмпӕй ӕмбӕрзт, йӕ къултӕ уыдысты бамбукӕй конд ӕмӕ дзы уыди коралты хуырӕй конд пъол. Цӕмӕй мӕ бон хуымӕтӕг хӕринаг кӕнын уыдаид, уый тыххӕй пъолы дзыхъхъ скъахтон ӕмӕ-иу дзы арт скодтон, сугӕн та-иу мын кокосы цъӕрттӕ уыдысты. Донмӕ та-иу бынӕттон сылгоймӕгтау цыдтӕн цъаймӕ. Дон-иу истой, йӕ дӕргъ иу-2 метры кӕмӕн уыд ӕмӕ йӕ кӕроныл бӕндӕн баст кӕмӕн уыд, ахӕм лӕдзӕджы руаджы. Уыди кӕсагахсӕн кусӕнгарзы хуызӕн, ӕрмӕст бӕндӕныл ӕнгуыр нӕ, фӕлӕ зестын банкӕ уыд фидаргонд. Кӕй рад-иу уыд, уыцы сылгоймаг-иу банкӕ цъаймӕ куы ’руагъта, уӕд-иу стӕй лӕдзӕг афтӕ фезмӕлын кодта, цӕмӕй-иу банкӕ афӕлдӕхтаид ӕмӕ-иу донӕй байдзаг уыдаид. Мӕнмӕ афтӕ каст, ӕмӕ уый тынг ӕнцон у, цалынмӕ мӕхӕдӕг нӕ афӕлвӕрдтон, уӕдмӕ. Мӕ банкӕ цъаймӕ ӕруагътон, фӕлӕ уый ӕнцад йӕхицӕн доны ленк кодта, ӕмӕ афтӕ цалдӕр хатты! Сылгоймӕгтӕ та мыл худӕгӕй мардысты. Ӕппынфӕстаг мын иу сылгоймаг баххуыс кодта. Бынӕттон цӕрджытӕ тынг хӕларзӕрдӕ уыдысты ӕмӕ нын се ’ххуыс никуы ӕвгъау кодтой!
Уӕ дыууӕ дӕр сакъадӕхтыл лӕггад кӕнын уарзтат. Исты цымыдисаг хабӕрттӕ-ма нын радзурут.
Уинстон: Цасдӕр рӕстӕг-иу нӕ бахъуыд, цӕмӕй-иу бынӕттон ӕгъдӕуттыл сахуыр уыдаиккам. Зӕгъӕм, ӕфсымӕртӕм-иу уазӕгуаты куы уыдыстӕм, уӕд-иу фынгыл ӕрӕвӕрдтой, хӕринаг-иу сӕм цыдӕриддӕр уыд, уый. Мах нӕ зыдтам, фысымтӕн дӕр-иу дзы ныууадзын кӕй хъуыди. Гъемӕ-иу нын нӕ разы цыдӕриддӕр ӕрӕвӕрдтой, уый-иу бахордтам. Фӕстӕдӕр базыдтам, хабар куыд у, уый, ӕмӕ-иу уӕдӕй фӕстӕмӕ фысымтӕн дӕр хӕринагӕй ныууагътам. Кӕд райдианы алцы раст нӕ кодтам, уӕддӕр-иу нӕ ӕфсымӕртӕ ӕмбӕрстой. Ӕхсӕз мӕйы сӕ иу хатт бӕрӕг кодтам, ӕмӕ-иу тынг цин кодтой. Уыцы рӕстӕджы мах йеддӕмӕ ӕмӕ се ’мбырды хотӕ ӕмӕ ӕфсымӕрты йеддӕмӕ Ӕвдисӕнтӕй ӕндӕр никӕй уыдтой.
Уинстон хотӕ ӕмӕ ӕфсымӕртимӕ хъусын кӕнынмӕ фӕцӕуы (сакъадах Ниуэ)
Ӕфсымӕрты-иу кӕй бабӕрӕг кодтам, уый фӕрцы-иу бынӕттон цӕрджытӕ Йегъовӕйы Ӕвдисӕнтӕм ӕндӕр цӕстӕй ракастысты. Хъӕуты цӕрджытӕй бирӕтӕ афтӕ хъуыды кодтой, ӕмӕ ӕфсымӕртӕ сӕ дин сӕхӕдӕг ӕрымысыдысты. Фӕлӕ-иу мах, дыууӕ ӕндӕрбӕстаджы, не ’фсымӕртӕм ӕрцӕугӕ куы федтой, уӕд-иу бамбӕрстой, уый ӕцӕг организаци кӕй у ӕмӕ кӕрӕдзийыл кӕй тыхсӕм, ӕмӕ-иу дисы бафтыдысты.
Пэм: Ӕхсызгонӕй ӕрымысын, Кирибатийы куы лӕггад кодтам, уыцы рӕстӕджытӕ. Уым ӕмбырды лӕггад кодта ӕрмӕстдӕр цалдӕр хо ӕмӕ ӕфсымӕры ӕмӕ дзы уыд ӕрмӕстдӕр иу хистӕр нӕлгоймаг, Синикай Матера. Уыцы ӕфсымӕр-иу ныл тынг батыхст. Иухатт нын чыргъӕды иу айк ӕрбахаста ӕмӕ нын загъта: «Ацы айк сымахӕн». Уыцы рӕстӕджы айк зын ссарӕн уыд, ӕмӕ йыл бацин кодтам. Уыцы гыццыл, фӕлӕ рӕдау лӕвары тыххӕй Синикайӕ тынг бузныг уыдыстӕм.
Пэм, цалдӕр азы фӕстӕ уыл ахӕм бӕллӕх ӕрцыд, ӕмӕ, сывӕрджын куы уыдтӕ, уӕд февзӕр дӕ. Уыцы зындзинад цӕй фӕрцы сфӕрӕзтай?
Лӕггад кодтам Сабыр океаны хуссар хайы, ӕмӕ нын сывӕллон кӕй уыдзӕн, уый куы базыдтам, уӕд Австралимӕ аздӕхтыстӕм. Уый уыд 1973 азы. Фӕлӕ цыппар мӕйы фӕстӕ февзӕр дӕн, ӕмӕ сывӕллон гуыбыны амард. Нӕ дыууӕйӕн дӕр тынг зын уыд. Рӕстӕг куы рацыд, уӕд тынг нал маст кодтон. Фӕлӕ уӕддӕр мӕ зӕрдӕйы рыст бынтон не ’рсабыр, цалынмӕ 2009 азы 15 апрелы «Хъахъхъӕнӕн мӕсыг» нӕ рацыд, уӕдмӕ. Уым рубрикӕйы «Кӕсджыты фарстатӕ» уыд статья, «Йӕ мады гуыбыны цы сывӕллон амард, уый ма райгас уыдзӕн?», зӕгъгӕ, ӕмӕ дзы фыст уыди, алцыдӕр Йегъовӕйы къухы кӕй ис ӕмӕ алкӕддӕр рӕстӕй кӕй фӕархайы. Ӕмӕ нӕ уыцы хъуыды стыр ныфс бауагъта. Ацы фыддуне нын цы бирӕ хъӕдгӕмттӕ скодта, уыдон нын Йегъовӕ иууылдӕр сдзӕбӕх кӕндзӕн, йӕ Фыртӕн «Хӕйрӕджы хъуыддӕгтӕ фехалын» куы бафӕдзӕхса, уӕд (1 Иоан. 3:8). Уыцы статьяйы фӕрцы ма ноджы тынгдӕр аргъ кӕнын райдыдтам, кӕддӕр цы «зынаргъ налхъуыт» ссардтам, уымӕн! Хуыцауы Паддзахад нын цы ныфс дӕтты, уый нын куы нӕ уыдаид, уӕд цытӕ кодтаиккам!
Нӕ сывӕллон куы амард, уый фӕстӕ та фӕстӕмӕ ӕххӕстрӕстӕг лӕггад кӕнын райдыдтам. Цалдӕр мӕйы лӕггад кодтам Австралийы Вефилы, фӕлӕ та фӕстӕдӕр Уинстон районон цӕстдарӕгӕй лӕггад кӕнын райдыдта. Цыппар азы фӕлӕггад кодтам Ног Хуссар Уэльсы хъӕуты, стӕй Сиднейы. Фӕлӕ нӕ 1981 азы фӕхуыдтой Австралийы филиалмӕ (уӕд афтӕ хуынди), ӕмӕ уӕдӕй нырмӕ уым лӕггад кӕнӕм.
Уинстон, Сабыр океаны хуссар хайы сакъадӕхтыл кӕй лӕггад кодтат, уый дын ныр исты ӕххуыс у Австралазийы Филиалы комитеты лӕггад кӕнгӕйӕ?
О, куыннӕ. Фыццаг уал Австралийы филиалӕн бахӕс кодтой, цӕмӕй йӕ хъус дардтаид Америкаг Самоамӕ ӕмӕ Самоамӕ. Фӕстӕдӕр Ног Зеландийы филиал баиу кодтой Австралийы филиалимӕ, ӕмӕ сси Австралазийы филиал. Ныр уыцы филиал йӕ хъус дары Австрали, Америкаг Самоа, Кукы сакъадӕхтӕ, Ниуэ, Ног Зеланди, Самоа, Скӕсӕн Тимор, Токелау ӕмӕ Тонгӕмӕ. Уыцы бӕстӕтӕй бирӕтӕ филиалы номӕй бабӕрӕг кодтон, цӕмӕй-иу раныхӕстӕ радзырдтаин. Уыцы сакъадӕхтыл иузӕрдион хотӕ ӕмӕ ӕфсымӕртимӕ кӕй лӕггад кодтон, уый мын стыр пайда фӕци. Уый фӕрцы сын ныр филиалы лӕггад кӕнгӕйӕ мӕ бон у, хуыздӕр куыд у, афтӕ ӕххуыс кӕнын.
Уинстон ӕмӕ Пэм Австралазийы филиалы
Фӕстагмӕ ма зӕгъдзынӕн уый, ӕмӕ, хистӕр кары чи ис, ӕрмӕст уыдон нӕ агурынц Хуыцауы. Уый мах Пэмимӕ бирӕ азты дӕргъы нӕхи цӕстӕй уыдтам, стӕй йӕ нӕхицӕй дӕр зонӕм. Ӕрыгӕтты дӕр фӕфӕнды уыцы «зынаргъ налхъуыт» ссарын, йӕ бинонтӕ рӕстдзинадмӕ уазал цӕстӕй кӕмӕн кӕсынц, суанг уыдоны дӕр (2 Пад. 5:2, 3; 2 Аз. 34:1–3). Йегъовӕ у уарзӕгой Хуыцау, ӕмӕ йӕ фӕнды, цӕмӕй иууылдӕр, стырӕй-чысылӕй, ӕнусон цардӕй схайджын уой!
Пэмимӕ Хуыцауы агурын куы райдыдтам, уымӕй 50 азӕй фылдӕр рацыд. Ахӕм цардӕй фӕцӕрдзыстӕм, уый ӕнхъӕл дӕр нӕ уыдыстӕм. Паддзахады тыххӕй рӕстдзинад ӕцӕгдӕр у «зынаргъ налхъуыт», ӕмӕ нӕ фӕнды, цӕмӕй йыл фидар хӕцӕм!