Хуыцау алы куывдӕн дзуапп цӕуылнӕ ратты?

Нӕ уӕларвон Фыд Йегъовӕ Хуыцау нӕ зӕрдӕбын куывдтытӕм ӕхсызгонӕй фӕхъусы. Фӕлӕ алы куывдӕн дзуапп нӕ ратты. Цымӕ цӕуылнӕ? Стӕй куы фӕкувӕм, уӕд нӕ зӕрдыл цы хъуамӕ дарӕм? Ӕркӕсӕм, Библийы уый фӕдыл цы фыст ис, уымӕ.

Аргъуаны чидӕртӕ куывдтыты чиныгӕй куывды ныхӕстӕ кӕсынц

«Куы кувай, уӕд-иу... уыцы иу ныхӕстӕ ногӕй ӕмӕ ногӕй ма дзур» (Матфейы 6:7).

Йегъовӕйы нӕ фӕнды, цӕмӕй куывды ныхӕстӕ сахуыр кӕнӕм ӕмӕ ӕдзух уыцы иу ныхӕстӕ дзурӕм кӕнӕ сӕ куывдтыты чиныгӕй кӕсӕм. Уый фӕнды, цӕмӕй йын, нӕ зӕрдӕйы цы ис, уый дзурӕм. Ахъуыды-ма кӕн, де ’мбал дын алы бон дӕр уыцы иу ныхӕстӕ куы кӕнид, уӕд дын ӕхсызгон уаид? Хорз ӕмбӕлттӕ кӕрӕдзийӕн ӕргом фӕдзурынц, сӕ зӕрдӕйы цы ис, уый. Нӕ уӕларвон Фыдмӕ нӕхи ныхӕстӕй куы фӕкувӕм, уӕд афтӕмӕй равдисӕм, нӕ хӕларыл ӕй кӕй нымайӕм.

Нӕлгоймаг хӕрдмӕ кӕсы ӕмӕ лотерейӕйы билет хафы, цӕмӕй йӕ нымӕцтӕ разыной

«Цы курут, уый... нӕ райсут, уымӕн ӕмӕ курут ӕвзӕр хъуыддагӕн» (Иаковы 4:3).

Хуыцауы зӕрдӕмӕ цы нӕ цӕуы кӕнӕ ӕвзӕрыл цы нымайы, ахӕм исты дзы куы курӕм, уӕд нын нӕ куывдтытӕн дзуапп нӕ дӕтдзӕн. Зӕгъӕм, ӕхцайыл чи хъазы, ахӕм адӕймаг Хуыцаумӕ куы кува, цӕмӕй йӕм амонд бахуда ӕмӕ ӕхца рамбула, уӕд ын цымӕ йӕ куывд фехъусдзӕн? Хуыцау нӕ фӕдзӕхсгӕ кӕны, цӕмӕй зыдгӕнаг ма уӕм ӕмӕ ӕрымысгӕ цӕуылдӕрты ма ӕууӕндӕм, зӕгъӕм, алцыдӕр амондӕй кӕнгӕ кӕй у, ууыл (Исай 65:11; Лукайы 12:15). Хъуамӕ ӕмбарӕм, Йегъовӕ ахӕм куывдтытӕн дзуапп кӕй нӕ дӕтдзӕн. Хуыцау нын нӕ куывдтытӕн дзуапп дӕтдзӕн, цы дзы курӕм, уый йӕ фӕндонмӕ гӕсгӕ куы уа, уӕд. Йӕ фӕндон та фыст ис Библийы.

«Йӕхи иннӕрдӕм чи аздахы, цӕмӕй закъонмӕ ма хъуса, уымӕн йӕ куывдтытӕ дӕр ӕнад сты» (Ӕмбисӕндтӕ 28:9).

Раджы заманты-иу Хуыцау дзуапп нӕ лӕвӕрдта, йӕ рӕстаг закъӕттӕ йын чи не ’ххӕст кодта, уыдоны куывдтытӕн (Исай 1:15, 16). Ӕмӕ Хуыцау нӕ фӕивта (Малахи 3:6). Кӕд нӕ фӕнды, цӕмӕй нын Хуыцау нӕ куывдтытӕн дзуапп дӕтта, уӕд хъуамӕ, нӕ бон цы у, уый аразӕм, цӕмӕй йын йӕ закъӕттӕм гӕсгӕ цӕрӕм. Фӕлӕ кӕд раздӕр ӕвзӕр хъуыддӕгтӕ арӕзтам, уӕд та? Цымӕ нын уый тыххӕй Йегъовӕ нӕ куывдтытӕм никуы хъусдзӕн? Нӕ, уый афтӕ нӕу! Хуыцау нын зӕрдӕйӕ ныххатыр кӕндзӕн, нӕ цард куы аивӕм ӕмӕ йын йӕ зӕрдӕ рухс кӕныныл ӕппӕт тыхтӕй куы архайӕм, уӕд (Хъуыддӕгтӕ 3:19).

«Хуыцауӕн кувӕг адӕймаджы хъуамӕ уырна, Хуыцау кӕй ис ӕмӕ йӕ зӕрдиагӕй чи агуры, уыдонӕн кӕй арфӕ кӕны» (Дзуттӕгтӕм 11:6).

Истӕуыл тынг куы мӕт кӕнӕм, уӕд Хуыцаумӕ ӕрмӕст уый тыххӕй хъуамӕ ма кувӕм, цӕмӕй нын фенцондӕр уа. Куы йӕм кувӕм, уӕд хъуамӕ бӕрӕг уа, кӕй йыл ӕууӕндӕм, кӕй йын кад кӕнӕм ӕмӕ йӕ кӕй уарзӕм. Чырыстийы ахуыргӕнинаг Иаков загъта, зӕгъгӕ, адӕймаг «уырнӕгзӕрдӕйӕ» куы нӕ кува, уӕд «Йегъовӕмӕ мацӕмӕ ӕнхъӕлмӕ кӕсӕд» (Иаковы 1:6, 7). Цӕмӕй Хуыцауыл баууӕндӕм, уый тыххӕй йӕ хъуамӕ базонӕм. Уый нӕ къухы бафтдзӕн, Библи куы ахуыр кӕнӕм, уӕд. Ӕмӕ уымӕн та фӕхъӕуы рӕстӕг ӕмӕ тыхтӕ. Афтӕ куы кӕнӕм, уӕд Хуыцауӕн йӕ фӕндон базондзыстӕм ӕмӕ нӕ дызӕрдыг кӕндзыстӕм, нӕ куывдтытӕм нын кӕй хъусы.