Хуыцаумӕ куы кувай, уӕд дын уый куыд баххуыс кӕндзӕн?
Памелӕ уӕззау низӕй фӕрынчын, ӕмӕ дохтыртӕй ӕххуыс бацагуырдта. Фӕлӕ ма Хуыцауӕй дӕр хъарутӕ куырдта, цӕмӕй уыцы тыхст уавӕры фидар фӕлӕууыдаид. Цымӕ йын уый исты ӕххуыс фӕци?
«Ракӕй рынчын дӕн, ӕмӕ-иу мӕхи куы дзӕбӕх кодтон, уӕд-иу тынг тарстӕн,– загъта Памелӕ.– Фӕлӕ-иу Йегъовӕ Хуыцаумӕ куы куывтон, уӕд-иу ӕрсабыр дӕн ӕмӕ-иу мӕ зӕрдӕйы тас нал уыд. Ныр дӕр ма рыстытӕ февзарын, фӕлӕ, Хуыцаумӕ кӕй фӕкувын, уый фӕрцы мӕ уавӕрмӕ раст цӕстӕй кӕсын. Куыд дӕн, уымӕй мӕ куы бафӕрсынц, уӕд фӕзӕгъын, хуыздӕр хъуаг, фӕлӕ уӕддӕр амондджын дӕн, зӕгъгӕ».
Кӕй зӕгъын ӕй хъӕуы, цӕмӕй Хуыцаумӕ кувын райдайӕм, уый тыххӕй нӕ ӕнхъӕлмӕ кӕсын нӕ хъӕуы, уӕззау низӕй кӕд фӕрынчын уыдзыстӕм кӕнӕ ӕндӕр фыдӕвзарӕнты кӕд бахаудзыстӕм, уымӕ. Не ’ппӕт дӕр ӕмбӕлӕм зындзинӕдтыл, стыр зындзинӕдтыл дӕр ӕмӕ гыццыл зындзинӕдтыл дӕр. Ӕмӕ нӕ арӕх фӕхъӕуы ӕххуыс, цӕмӕй-иу сӕ сӕрты ахизӕм. Куы кувӕм, уӕд нын цымӕ уый исты ӕххуыс фӕуыдзӕн?
Библийы фыст ис: «Дӕ уаргъ Йегъовӕйыл сӕвӕр, ӕмӕ дын уый баххуыс кӕндзӕн. Никуы бауадздзӕн рӕстгӕнӕджы фӕцудын» (Псалом 55:22). Ацы ныхӕстӕ нӕ цӕй стыр ныфс уадзынц! Уӕдӕ Хуыцаумӕ куы кувай, уӕд дын уый цы ’ххуыс фӕуыдзӕн? Куыд ӕмбӕлы, афтӕ йӕм куы кувай, уӕд дын ратдзӕн, дӕ зындзинӕдтимӕ тох кӕнынӕн дӕ цы хъӕуы, уый. (Кӕс рамкӕ «Кувын цы пайда у?».)