Саррӕйы ӕцӕг чызг

МӔ МАД уыд фӕлмӕн ӕмӕ хӕларзӕрдӕ адӕймаг ӕмӕ тынг уарзта Библи. Манадойы (Цӕгат Сулавеси) миссионерӕй чи лӕггад кодта, уыцы хо Гертруд Оттимӕ куы базонгӕ, уӕд Библи ахуыр кӕныныл сразы ӕмӕ рӕстдзинад уайтагъд йӕ зӕрдӕмӕ айста. Фӕлӕ мӕ фыд Эруин уыд зынгонд адӕймаг – банчы стыр бынат ахста, фӕстӕдӕр та уыд, акцитӕ кӕм фӕуӕй кӕнынц ӕмӕ кӕм фелхӕнынц, ахӕм биржӕйы сӕрдар Джакартӕйы. Мӕ фыд мӕ мады ныхмӕ тынг цыди йӕ ног дины тыххӕй.

Иу бон мӕ фыд фарста цӕхгӕр ӕрӕвӕрдта:

– Равзар: дӕ дин кӕнӕ дӕ лӕг!

Мӕ мад бирӕ фӕхъуыды кодта, ӕмӕ йын стӕй фӕлмӕнӕй загъта:

– Дыууӕ дӕр мӕ хъӕуынц – мӕ лӕг дӕр ӕмӕ Йегъовӕ дӕр.

Мӕ фыдӕн йӕ бон сдзурын ницыуал баци, ӕмӕ ӕрсабыр.

Фӕстӕдӕр мӕ фыд фӕфӕлмӕндӕр ис, уымӕн ӕмӕ мӕ мады бирӕ уарзта ӕмӕ йын тынг аргъ кодта, ӕмбаргӕ ӕмӕ ӕрхъуыдыджын сылгоймаг кӕй уыди, уый тыххӕй.

Фӕлӕ мӕ мады фӕндыд, цӕмӕй йӕ цардӕмбал дӕр йемӕ Хуыцауӕн лӕггад кодтаид. Уый тыххӕй зӕрдиагӕй куы скуывта, уӕд йӕ зӕрдыл ӕрлӕууыд, мӕ фыд ӕндӕр ӕвзӕгтӕ ахуыр кӕнын кӕй уарзта. Ӕмӕ уӕд хӕдзары алы рӕтты ӕрцауыгъта Библийы стихтӕ англисаг ӕвзагыл, ӕмӕ йын загъта, англисаг ӕвзаг мӕ хуыздӕр базонын фӕнды, зӕгъгӕ. Мӕ фыд ма уарзта раныхӕстӕм хъусын дӕр. Ӕмӕ мӕ мад уымӕй дӕр спайда кодта, ӕмӕ йӕ бафарста, Хуыцауы Ныхас хъусынгӕнджыты скъолайы мын цы хӕслӕвӕрдтӕ раттынц, уыдон куыд бацӕттӕ кӕнын, уымӕ-иу нӕ байхъусис, зӕгъгӕ. Ӕмӕ йын уый дӕр сразы. Мӕ фыд уазӕгуарзон кӕй уыди, уымӕ гӕсгӕ йын мӕ мад загъта, зӕгъгӕ, дам, нын не ’мбырд районон цӕстдарӕг куы бӕрӕг кӕна, уӕд ӕй нӕхимӕ куы суазӕг кӕниккам. Ӕмӕ та ацы хатт дӕр сразы. Мӕ фыд йӕ бинонтыл тынг ӕнувыд уыди. Ӕмӕ йын иухатт мӕ мад уӕзданӕй загъта, чи зоны дӕ бафӕндид, конгрессты-иу нӕ фарсмӕ куы бадис, уый, зӕгъгӕ. Ӕмӕ уый дӕр афтӕ бакодта.

Мӕ мадмӕ уыйбӕрц фӕразондзинад ӕмӕ ӕмбаргӕдзинад кӕй разынд, уый фӕрцы мӕ фыды зӕрдӕ ӕрфӕлмӕн. Фӕстӕдӕр мах цардыстӕм Английы. Уым мӕ фыд ӕмбырдтӕм цӕуын райдыдта ӕмӕ балымӕн Джон Барримӕ, уый фӕстӕ Разамонӕг советы чи лӕггад кодта, уыимӕ. Уыцы аз донаргъуыд райста, ӕмӕ мӕ мад фырцинӕй зӕххыл дӕр нал хӕцыд. Уӕдӕй фӕстӕмӕ мӕ фыд мӕ мады йӕ уарзондзинадӕй куыд тынг рӕвдыдта, уымӕн зӕгъӕн дӕр нӕй.

Не ’мбӕлттӕй чидӕртӕ мӕ мады фӕбарынц, фыццаг ӕнусы чи цард ӕмӕ йӕ уазӕгуарзондзинадӕй зындгонд чи уыд, уыцы чырыстон сылгоймаг Лидийӕимӕ (Хъуыд. 16:14, 15). Фӕлӕ мӕнмӕ гӕсгӕ мӕ мад тынгдӕр у, йӕ сӕрыхицау Авраамы коммӕ ӕхсызгонӕй чи каст, уыцы сылгоймаг Саррӕйы хуызӕн (1 Пет. 3:4–6). Мӕ мады хӕдӕфсармдзинад, йӕ фидар уырнындзинад ӕмӕ, иннӕтӕн кӕй аргъ кодта, уый-иу кӕйфӕнды зӕрдӕ дӕр бацагайдта. Мӕнӕн мӕ мад алкӕддӕр уыди Саррӕйы ӕцӕг чызг.