Job

1 Ha näꞌä rä luga rä thuhu Uz mi ꞌmu̱i nꞌa rä ñꞌo̱ho̱ mrä thuhu Job. Näꞌä ñꞌo̱ho̱ꞌä nzäntho mi pe̱fi näꞌä xä ñho, mi pe̱ꞌspäbi nꞌa rä hogä ntsu Äjuä ꞌne mi ꞌuege de näꞌä xä ntsꞌo. 6 Nubye̱ bi zo̱ho̱ näꞌä rä pa nuꞌmu̱ yä tꞌu̱ Äjuä bi yu̱tꞌi pa dä kupa yä luga ndelante de rä Zi Dada Jeoba, ꞌne rä Zithu bi presenta ꞌnehe. 7 ꞌNepu̱ rä Zi Dada Jeoba bi ꞌñembäbi rä Zithu: «¿Xi nuꞌi habu̱ xkuä pengi?». Rä Zithu bi ꞌñembäbi Jeoba: «Dä ma dä no̱ke rä xiꞌmhai ꞌne dä ungä nꞌa mä gatꞌi». 8 ꞌNe Jeoba bi ꞌñembäbi rä Zithu: «¿Xkä u̱xä ri da mä ꞌme̱go Job? Joꞌo mä nꞌa nguꞌä ha rä xiꞌmhai. Näꞌä nzäntho pe̱fi näꞌä xä ñho: Pe̱ꞌspäbi nꞌa rä hogä ntsu Äjuä ꞌne di ꞌuege de näꞌä xä ntsꞌo». 9 Nubye̱, rä Zithu bi däti Jeoba ꞌne bi ꞌñembäbi: «¿Gi hurimu̱i ge Job pe̱tsꞌäꞌi rä hogä ntsu njabu̱tho? 10 ¿Hage hingä ngeꞌä xkä hutsꞌi nꞌa rä jutsꞌi nthetsꞌi de geꞌä ꞌne de rä nguu ꞌne de gatꞌho näꞌä pe̱ꞌtsi? Nuꞌi xkä jäpi näꞌä pe̱fi, ꞌne yä taxo xä xu ꞌne xä ñuxä ha gatꞌho näꞌä lugaꞌä. 11 Pe ndeꞌmu̱, tu̱ngi ri yꞌe̱ ꞌne fe̱tꞌi gatꞌho näꞌä pe̱ꞌtsi, ꞌne hyandixä mu̱ hingä ma dä zañꞌäꞌi ha ri hmi». 12 Hänge Jeoba bi ꞌñembäbi rä Zithu: «¡Hyandi! Gatꞌho näꞌä pe̱ꞌtsi o ha ri yꞌe̱. ¡Pe näꞌä ote gi o̱tuäbi!». Nubye̱, rä Zithu bi bo̱ni de rä thandi rä Zi Dada Jeoba. 13 Mꞌe̱fa, bi zo̱ho̱ rä pa nuꞌmu̱ yä tꞌu̱ ꞌne yä tꞌixu Job xki muntsꞌi pa mi ñuni ꞌne mi tsi yä binu ha rä nguu näꞌä rä ku mädä, 14 bi zo̱ho̱ nꞌa rä mensajero ꞌne bi ꞌñembäbi Job: «Yä doro mi mfu̱tsꞌi ꞌne yä burru mi ñuni getbu̱ de gehni, 15 ꞌne nse̱kitho bi zo̱ho̱ nuꞌu̱ yä sabeo pa bi hyo nuꞌu̱ ri ꞌme̱go ꞌne bi be nuꞌu̱ ri mboꞌni. Ho̱nse̱gi duä kꞌotꞌi ꞌne dä ehe gä xiꞌäꞌi». 16 Näꞌä mensajero tobe mi ñätho, kuando nse̱kitho bi zo̱ho̱ mä nꞌaa, ꞌne bi ꞌñembäbi: «¡Äjuä bä pe̱hnä yä tsibi de mähetsꞌi ꞌne bi nzo̱o̱ nuꞌu̱ ri de̱ti ꞌne nuꞌu̱ ri ꞌme̱go! Ho̱nse̱gi duä pongi ꞌne dä ehe gä xiꞌäꞌi». 17 Näꞌä mensajero tobe mi ñätho, kuando nse̱kitho bi zo̱ho̱ mä nꞌaa, ꞌne bi ꞌñembäbi: «Bi zo̱ho̱ hñu tꞌo̱tse yä caldeo ꞌne bi hyo nuꞌu̱ ri ꞌme̱go ꞌne bi be nuꞌu̱ ri kameyo. Ho̱nse̱gi duä kꞌotꞌi ꞌne dä ehe gä xiꞌäꞌi». 18 Näꞌä mensajero tobe mi ñätho, kuando nse̱kitho bi zo̱ho̱ mä nꞌaa, ꞌne bi ꞌñembäbi: «Nuꞌu̱ ri tꞌu̱ ꞌne ri tꞌixu mi ñuni ꞌne mi tsi yä zi binu ha rä nguu näꞌä rä ku mädä. 19 Kuando nse̱kitho, de yä yꞌotꞌä ꞌmatha bä ehe nꞌa rä däta bu̱nthi ꞌne bi me̱tꞌi nuꞌu̱ goho yä skinä rä nguu, hänge bi dagi ꞌne bi ze̱ꞌmi nuꞌu̱ yä bäsjäꞌi. Ho̱nse̱gi duä pongi ꞌne dä ehe gä xiꞌäꞌi». 20 Mi yꞌo̱de njabu̱, Job bi ꞌmai, bi tu̱ni yä dutu ꞌne bi hye̱kä yä xtää; ꞌnepu̱ bi ndandiñähmu ha rä hai, 21 ꞌne bi ꞌñenä: «Nsi mä dutu dä po̱ni de rä mu̱i mä nänä, ꞌne nsi mä dutu ma gä pengi. Rä Zi Dada Jeoba go xä uni ꞌne rä Zi Dada Jeoba go xä hñäki. Dä sigi drä tꞌespäbi rä nsu rä thuhu rä Zi Dada Jeoba». 22 Gatꞌho geꞌä bi thogi Job, pe näꞌä himbi peka nixi bi hyo̱xä rä thai Äjuä po näꞌä mi thogi.